2. Kugcine Kucocekile
NJENGOKUBA ugqirha otyandayo ekhusela izigulana zakhe ngokuhlamba izandla, acoce nezixhobo zakhe kuquka igumbi lotyando, nawe unokuyikhusela intsapho yakho ngokuzigcina wena ucocekile, ikhitshi nokutya kwakho.
● Hlamba izandla.
IArhente Yempilo Yabantu EKhanada ithi, “izandla zisasaza phantse iipesente ezingama-80 zezifo eziqhelekileyo ezosulelayo njengomkhuhlane.” Ngoko ke, umele uhlambe izandla ngesepha namanzi ngaphambi kokutya, xa uphuma kwindlu encinane, naxa ulungisa ukutya.
● Gcina ikhitshi licocekile.
Olunye uphando lwabonisa ukuba ngoxa kwafunyaniswa ukuba indlu yangasese yeyona icocekileyo, “indawo eyayithe mome ziintsholongwane yayisisiponji nelaphu lokuhlamba izitya ekhitshini.”
Ngoko ke, watshintshe rhoqo amalaphu ezitya, uze usebenzise amanzi ashushu anesepha okanye isibulala-zintsholongwane ukucoca ikhitshi lakho. Ukwenza oku akusoloko kulula. UBola libhinqa elihlala kwikhaya elingenamanzi aphuma etephini. Uthi: “Oku kunzima gqitha. Kodwa sihlala sinamanzi nesepha eyaneleyo, ukuze ikhitshi nekhaya lethu lihlale licocekile.”
● Kuhlambe.
Ngaphambi kokuba imveliso yokutya ithengiswe, isenokuba ikhe yadibana namanzi angacocekanga, izilwanyana, ilindle okanye okunye ukutya okukrwada. Ngoko, nokuba uza kuwasusa amaxolo esiqhamo okanye emifuno, qala uwahlambe ukuze ususe iintsholongwane eziyingozi. Oku kuthatha ixesha. UDaiane umama waseBrazil uthi, “Xa ndisenza isaladi, ndithi chu ukuze ndiwahlambe kakuhle amagqabi.”
● Yahlukanise inyama ekrwada.
Ukuze iintsholongwane zinganweni, yivale okanye uyisongele yonke inyama ekrwada, inkuku nentlanzi uzahlule kokunye ukutya. Sebenzisa iibhodi neemela ezahlukileyo ukunqunqa ezo zinto, okanye umana uzihlamba ngesepha namanzi ashushu ngaphambi nasemva kokunqunqa inyama ekrwada okanye intlanzi.
Ekubeni ngoku wena, izixhobo zakho nezinto oza kuzipheka zicocekile, ungakupheka njani ukutya ngendlela ekhuselekileyo?
[Ibhokisi ekwiphepha 5]
QEQESHA ABANTWANA BAKHO: “Sifundisa abantwana bethu ukuba bahlambe izandla zabo ngaphambi kokutya okanye bakulahle ukutya okuwele phantsi.”—UHoi, eHong Kong