Iindlela Ezintandathu Zokukhusela Impilo Yakho

Ucelomngeni Kumazwe Asakhasayo

NAMHLANJE abantu abaninzi basebenza nzima ukuze bahlale becocekile, ingakumbi kumazwe ekungekho manzi acocekileyo nalapho inkqubo yogutyulo inqongopheleyo khona. Ukanti, kufanelekile ukwenza umgudu ukuze uhlale ucocekile. Kuthelekelelwa ukuba isiqingatha sazo zonke izigulo nokufa kwabantwana abancinane kubangelwa ziintsholongwane eziba sezandleni zabo ezimdaka, nokutya okungacocekanga okanye amanzi amdaka. Izifo ezininzi, ngokukodwa isisu esihambisayo, zinokuthintelwa ngokusebenzisa la macebiso alandelayo akwincwadi ethi Facts for Life, yeUnited Nations Children’s Fund.

1 Lahla ilindle kude nabantu

Iintsholongwane ezininzi zifumaneka kwilindle. Xa iintsholongwane ezibangela izifo zingena emanzini nasekutyeni okanye ezandleni, ezityeni okanye kwiindawo ekuphekelwa nekuphakelwa kuzo, zisenokungena emlonyeni aze umntu aziginye yaye loo nto inokumbangela agule. Eyona ndlela yokuthintela ukusasazeka kwezo ntsholongwane kukulahla ilindle. Ilindle lomntu lifanele lifakwe kwindlu yangasese. Qiniseka ukuba akukho lindle lezilwanyana kufuphi nasekhaya, kwiindledlana okanye kwiindawo abadlala kuzo abantwana.

Xa zingekho izindlu zangasese, ligqumelele ngoko nangoko ilindle. Khumbula ukuba ilindle linokubangela izifo, kwanelindle leentsana. Nelindle labantwana lifanele lifakwe kwindlu yangasese okanye ligqunyelelwe.

Zicoce rhoqo izindlu zangasese. Umngxuma wendlu yangasese ufanele uhlale ugqunyiwe yaye zifanele zigungxulwe ngalo lonke ixesha ezo kusetyenziswa amanzi kuzo.

2 Hlamba izandla

Ufanele uzihlambe rhoqo izandla. Xa uhlamba izandla ngesepha namanzi okanye ngothuthu namanzi iintsholongwane ziyasuka. Ukuhlamba izandla ngamanzi nje akwanele—zozibini izandla zifanele zihlanjwe ngesepha okanye ngothuthu.

Kubalulekile ukuhlamba izandla xa ugqiba kuzithuma nasemva kokusula iimpundu zosana okanye zomntwana ogqiba kuzithuma. Kwakhona, kufuneka uhlambe izandla xa ugqiba kuphatha izilwanyana, ngaphambi kokuba uphathe ukutya nangaphambi kokuba utyise abantwana.

Ukuhlamba izandla kukhusela abantu kwimibungu ebangela ukugula. Le mibungu mincinane kakhulu, unokuyibona ngemikroskopu kuphela. Le mibungu ihlala kwilindle nasemchameni, emanzini amileyo nasemhlabeni, nakwinyama ekrwada okanye engavuthwanga kakuhle. Eyona ndlela enokuthintelwa ngayo le mibungu ukuba ingangeni emzimbeni kukuhlamba izandla. Ngaphezulu, kufuneka unxibe izihlangu xa uhamba kufuphi nendlu yangasese ukuze unganyatheli le mibungu ize ingene emzimbeni wakho.

Abantwana bayakuthanda ukufaka izandla emlonyeni, ngoko zihlambe rhoqo izandla zabo ngokukodwa xa begqiba kuzithuma nangaphambi kokuba batye. Bafundise ukuba bahlambe izandla yaye bangadlali kufuphi nendlu yangasese okanye kufuphi neendawo abantu abazithuma kuzo.

3 Hlamba ubuso yonke imihla

Ukuze uphephe iingxaki zamehlo hlamba ubuso ngesepha namanzi yonke imihla. Nabantwana bafanele bahlanjwe ubuso. Iimpukane ziyabuthanda ubuso obumdaka yaye zithwala iintsholongwane. Ezi ntsholongwane zinokubangela izifo zamehlo yaye zinokude zenze umntu abe yimfama.

Wahlole rhoqo amehlo abantwana bakho. Amehlo asempilweni akomi yaye ahlala eqaqambile. Ukuba umntwana unamehlo omileyo, abomvu abuhlungu okanye anobuthuku, ufanele axilongwe ngumongikazi okanye ngugqirha.

4 Sebenzisa amanzi acocekileyo kuphela

Iintsapho ezisebenzisa amanzi acocekileyo zize ziwakhusele kwiintsholongwane azifane zigule. Mhlawumbi sisenokuthi amanzi acocekile xa ephuma kwimpompo eyakhiwe kakuhle okanye kwimithombo ecocekileyo. Amanzi akhiwe echibini, emlanjeni, kumatanki avulekileyo okanye emithonjeni akanakufane acoceke, kodwa anokubiliswa ukuze kungabi yongozi ukuwasebenzisa.

Imithombo ifanele igqunywe. Iiemele, iintambo neengqayi ezisetyenziswayo xa kukhiwa amanzi zifanele zihlanjwe rhoqo zize zibekwe kwindawo ecocekileyo, zingabekwa phantsi. Izilwanyana zifanele zibe kude neendawo ezinamanzi okusela neendawo ezihlala iintsapho. Musa ukusebenzisa izibulala-zinambuzane okanye imichiza kufuphi nomthombo wamanzi.

Ekhaya, amanzi afanele afakwe kwinto ecocekileyo ize igqunywe. Kubhetele ukuba into yokufaka amanzi ibe nempompo. Ukuba akukho mpompo, amanzi afanele akhiwe ngesikhelelelo okanye ikomityi ecocekileyo. Izandla ezimdaka azifanele zifakwe emanzini okusela.

5 Khusela ukutya kwiintsholongwane

Xa ukutya ukupheka kuvuthwe, iintsholongwane ziyafa. Ukutya kufanele kuphekwe kuvuthwe ngokukodwa inyama nenkuku. Iintsholongwane zanda ngokukhawuleza xa ukutya kufudumele. Ngoko ke, ukutya kufanele kutyiwe ngokukhawuleza xa kugqiba kuvuthwa. Ukuba ukutya kuza kuhlala ngaphezu kweeyure ezimbini, qiniseka ukuba ukubeka endaweni etshisayo okanye ebandayo. Kwakhona, ukuba ufuna ukugcina ukutya okuphekiweyo ukuze ukutye ngelinye ixesha, kugqume. Xa ukugqumile akungenwa ziimpukane nezinambuzane. Ngaphambi kokuba ukutye, phinda ukufudumeze.

Ubisi lwebele lolona bisi lulungele iintsana nabantwana abancinane. Ubisi lwezilwanyana olusandul’ ukubiliswa okanye xa iintsholongwane zibulewe kulo [pasteurized] lubhetele kunobisi olungabiliswanga. Kuphephe ukuncancisa umntwana ibhotile ngaphandle kokuba uza kuyihlamba ngamanzi abilayo rhoqo ngaphambi kokuba uyisebenzise. Iibhotile zidla ngokuthwala iintsholongwane ezibangela isisu esihambisayo. Kubhetele umntwana ancance ibele okanye atyiswe ngekomityi ecocekileyo.

Iziqhamo nemifuno zifanele zihlanjwe ngamanzi acocekileyo. Oku kubaluleke ngakumbi xa abantwana beza kuzitya zikrwada.

6 Thabatha yonke inkunkuma esendlwini uyilahle

Iimpukane, amaphela, neempuku zithwala iintsholongwane. Ezi zinto zonke ziyayithanda inkunkuma. Ukuba kwindawo ohlala kuyo inkunkuma ayithuthwa, yimba umngxuma ukuze uyilahle khona okanye uyitshise yonke imihla. Gcina ikhaya lakho licocekile lingenankunkuma yaye lingenamanzi amdaka.

Ukuba la macebiso uwasebenzisa rhoqo, uya kuwaqhela nje ngokulula. Akakho nzima yaye akabizi mali ininzi, kodwa aya kuyikhusela impilo yakho neyentsapho yakho.

[Umfanekiso okwiphepha 27]

Xa izindlu zangasese zingekho, ilindle lifanele ligqunyelelwe ngoko nangoko

[Umfanekiso okwiphepha 27]

Hlamba izandla rhoqo

[Umfanekiso okwiphepha 28, 29]

Hlamba ubuso ngesepha namanzi yonke imihla

[Imifanekiso ekwiphepha 28]

Xa iintsapho zisebenzisa amanzi acocekileyo zize ziwakhusele kwiintsholongwane, azifane zigule

[Umfanekiso okwiphepha 29]

Ukuba ufuna ukugcina ukutya okusele kuphekiwe ukuze ukutye ngelinye ixesha, kugqume

[Umfanekiso okwiphepha 29]

Inkunkuma esendlwini ifanele ifakwe emngxunyeni okanye itshiswe yonke imihla