Ngaba Singabahlobo Nje—Okanye Kukho Into Engaphaya? Inxalenye 1

NGABA KUKHO UMNTU OTHE QATHA XA UFUNDA LO MXHOLO?

EWE → KHAWULEZA UFUNDE ELI NQAKU. MHLAWUMBI LIYA KUKUNCEDA.

HAYI → NAWE LIFUNDE ELI NQAKU. LIYA KUNCEDA UBE NOBUHLOBO OBUFANELEKILEYO NABANTU BESINI ESAHLUKILEYO NGAPHANDLE

Phawula la mazwi alandelayo ngokuba yinyani okanye bubuxoki:

Andimele ndibe nabahlobo besini esahlukileyo de ndilungele ukuba nobuhlobo obuza kukhokelela emtshatweni.

․․․․․ YINYANI ․․․․․ BUBUXOKI

Cinga ngoku: Nakuba engazange acebe ukutshata, uYesu wayenabo abahlobo besini esahlukileyo. (Mateyu 12:46-50; Luka 8:1-3) Kuyacaca ukuba naye uTimoti wayenabahlobo besini esahlukileyo, kuba umpostile uPawulos wamxelela ukuba aphathe ‘amabhinqa amancinane njengoodade wabo enobunyulu bonke.’—1 Timoti 5:1, 2.

UPawulos umele ukuba wayeqonda ukuba njengoko uTimoti wayekhonza kumabandla aliqela, wayeza kudibana neqela loodade abaselula. (Marko 10:29, 30) Ngaba kwakuza kuphosakala ukuba uTimoti anxulumane nabo? Hayi. Kodwa ekubeni wayengacingi ngokutshata ngelo xesha, kwakuza kufuneka azibekele umda ukuze angathabatheki ngabo dade baselula okanye adlale ngeemvakalelo zabo.—Luka 6:31.

Kuthekani ngawe? Ngaba sele ukulungele ukutshata?

Ukuba KUNJALO ⇨ Ubuhlobo bakho nabantu besini esahlukileyo bunokukhokelela ekubeni ufumane iqabane oya kuhlala nalo ubomi bakho bonke.—IMizekeliso 18:22; 31:10.

Ukuba AKUNJALO ⇨ Umele ubeke imida. (Yeremiya 17:9) Ngaba asinto inzima na leyo? Ewe! UNia oneminyaka eli-18 ubudala uthi, “Kunzima ukuba ngumhlobo nje womntu wesini esahlukileyo.a Kunzima ukwazi apho uphela khona umda.”

Yintoni phofu efuna ukuba kubekwe umda kwasekuqaleni? Kukuba xa ungawubeki, uya kwenzakala okanye wenzakalise abanye. Cinga ngesi sizathu.

ISIBAKALA: Xa uthabatheka ungekakulungeli ukutshata, ubakho umntu owenzakalayo. UKelli oneminyaka eli-19 ubudala uthi, “Yenzeke kabini loo nto kum. Ngesinye isihlandlo, ndaziva ndithanda omnye umfana, ukanti kwesesibini yaba ngomnye umfana awavakalelwa ngolo hlobo ngam. Zozibini ezo zihlandlo kwakubakho owenzakalayo, yaye imiphumo yazo isekho nanamhlanje.”

Into omele uyicinge:

● Kuxa kutheni apho kufanelekileyo ukunxulumana nomntu wesini esahlukileyo? Ziziphi izinto omele uziphephe?

● Kutheni kungebobulumko nje ukusoloko nindawonye nobabini nomntu wesini esahlukileyo? Yintoni enokucingwa nguloo mntu? Wena yintoni onokuyicinga?

“Maxa wambi, ndandikhe ndiziqhathe ngelithi, ‘Hayi, singabahlobo nje kuphela. Ufana nomntakwethu.’ Kodwa, xa enikela ingqalelo kwenye intombazana, kube buhlungu—ngokungathi umele ajonge mna kuphela.”—UDenise.

IBhayibhile ithi: “Abanokuqonda baya kuyibona ingxaki isekude baze bayiphephe, kodwa abangakwazi kucinga baya kuhamba ngqo bazifake kuyo baze bazisole kamva.”—IMizekeliso 22:3, Good News Translation.

ISIBAKALA: Xa uthabatheka ungekakulungeli ukutshata, ungaphulukana nobuhlobo obuhle. UKati oneminyaka eli-16 ubudala uthi, “Mna nomnye umfana sathumelelana imiyalezo, kodwa wathi akubonisa isincwaso, yaqina imiyalezo phantse yonk’ imihla. Ngenye imini wandixelela ukuba uyandithanda yaye ufuna into engaphaya kobuhlobo. Ingxaki yaba kukuba, kwakungathi thiki ngokuthandana naye. Emva kokuba ndimxelele, sayeka ukuthetha baza baphela obo buhlobo bethu.”

Into omele uyicinge:

● Ngubani owenzakalayo kwimeko kaKati, ibe ngoba? Ngaba uKati okanye loo mfana babenako ukuyiphepha loo ntlungu? Ukuba babenako, njani?

● Xa uthumela imiyalezo, kungaziphi iindlela anokuthi umntu engaqondi adlulisele ingcamango yokuba ufuna into engaphaya kobuhlobo?

“Maxa wambi kwakufuneka ndizibambe. Abafana banokuba ngabahlobo abafanelekileyo, kodwa ndandingafuni ukuchitha obo buhlobo ngokufuna into engaphaya kwabo.”—ULaura.

IBhayibhile ithi: “Abanobulumko bayalijonga inyathelo labo.”—IMizekeliso 14:15, Good News Translation.

Eyona nto ibalulekileyo: Ukunxulumana nabantu besini esahlukileyo akuphosakelanga kona ngokwakho. Kodwa ukuba akukakulungeli ukuthandana ukuze utshate, kufuneka uzibekele imida.

KWINQAKU ELILANDELAYO “ABANTU ABASELULA BAYABUZA” . . .

Ukuthabatheka luthando ungekawulungeli umtshato kungakuzisela igama elibi—funda indlela okwenzeka ngayo oko.

Amanye amanqaku athi “Abantu Abaselula Bayabuza” afumaneka kwiWebhsayithi ethi www.watchtower.org/ype

[Umbhalo osemazantsi]

[Ibhokisi/Umfanekiso okwiphepha 16]

YINTONI OZA KUYENZA?

IBALI LOKWENENE: “Ndathumela umyalezo kumhlobo wam ohlala malunga neekhilomitha ezili-1 500. Sasithumelelana imiyalezo phantse veki nganye. Ndandingancwasanga kuthandana naye, ibe naye ndandingacingi ukuba unomdla kwelo cala. Kwala ngenye imini xa wandithumelela umyalezo othi: ‘Molo mbelukazi! Ndiyakukhumbula. Ucinga ntoni ngayo yonke le nto yethu?’ Ndothuka! Ndamxelela ukuba bendimthatha njengomhlobo nje kuphela andinamdla wakuthandana naye. Waphendula wathi, ‘Kulungile nokuba yintoni na.’ Emva koko akazange aphinde andithumelele myalezo.”—UJanette.

● Ukuba akukakulungeli ukuthandana, ubuya kusabela njani kumyalezo ofana nalowo kaJanette?

● Ukuba ungumfana, ngaba ucinga ukuba wawufanelekile lo myalezo wafunyanwa nguJanette? Sithini isizathu sempendulo yakho?

● Ngaba ucinga ukuba ukuthumela imiyalezo kwenza kube lula ukuthandana nomntu kunokuba kunjalo xa nincokola ubuso ngobuso? Sithini isizathu sempendulo yakho?

[Ibhokisi ekwiphepha 17]

KUTHENI UNGABUZI ABAZALI BAKHO?

Cela uluvo lwabazali bakho kwimibuzo enamachaphaza kweli nqaku. Ngaba izimvo zabo zahlukile kwezakho? Ukuba kunjalo, kutheni? Ziziphi izibakala esisengqiqweni kuluvo lwabo?—IMizekeliso 11:14.

[Ibhokisi/Imifanekiso ekwiphepha 17]

OKO KUTHETHWA LOLUNYE ULUTSHA

UJoshua—Okukhona uchitha ixesha elininzi nomntu omnye, kokukhona utsaleleka kuye.

UNatasha—Ukuba nifuna nje ukuba ngabahlobo kuphela, kodwa nisoloko nichitha ixesha kunye, iimvakalelo zothando ziya kukhula komnye okanye kuni nobabini.

UKelsey—Kwanokuba niqala ngokuba ngabahlobo nje, kulula ukuba neemvakalelo ukuba nichitha ixesha elininzi kunye. Asiyonto ingenakwenzeka into yokuba ngabahlobo nje, kodwa kufuneka nikhule yaye nibe nengqiqo.

[Umfanekiso okwiphepha 16]

Ukuthabatheka luthando ungekawulungeli umtshato kunokukuzisela intlekele