Ungakufunda Ukwenza Uxolo
NAKUBA sizalwa sityekele kokubi, ugonyamelo sidla ngokulufunda. Kunjalo ke, nangokwenza uxolo. Ngubani ke onokusifundisa iindlela zoxolo lokwenene? Akuthandabuzeki ukuba, oyena mntu unegunya loko nguMdali wethu, yena unobulumko obungenakuthelekiswa. Cinga nje ngezi ngongoma zintlanu zilandelayo kunye nobulumko bazo obuxabisekileyo obuphuma eBhayibhileni.
1 “Musa ukuyimonela indoda enogonyamelo.” (IMizekeliso 3:31) Yiqonde into yokuba amandla okwenene afumaneka kwiimpawu ezifana nokuzeyisa nokululama. IMizekeliso 16:32 ithi: “Ozeka kade umsindo ulunge ngakumbi kunendoda enamandla.” Kanye njengodonga olomeleleyo lwedama, uyakwazi ukunyamezela into emcaphukisayo. Enyanisweni, xa kukho into emcaphukisayo yena uyalulama, ngaloo ndlela ‘esusa umsindo.’ (IMizekeliso 15:1) Kodwa yona indoda enomsindo, isuka ivuthe nokuba yinto engekhoyo.—IMizekeliso 25:28.
2 Zikhethe ngobulumko izinxulumani zakho. IMizekeliso 16:29 ithi: “Umntu onogonyamelo uyalilukuhla idlelane lakhe.” Kwelinye icala, “ohamba nezilumko uya kuba sisilumko naye.” (IMizekeliso 13:20) Ewe, xa sinxulumana nabantu abathanda uxolo abakwaziyo ukuzeyisa baze bazibambe, oko kuya kusenza sizame ukubaxelisa.
3 Zabalazela ukubathanda ngokunyanisekileyo abanye. Eyona ndlela iluchaza kakuhle uthando kuzo zonke ezakha zabhalwa ifumaneka kweyoku 1 kwabaseKorinte 13:4-7. Inxalenye yayo ifundeka ngolu hlobo: “Uthando luzeka kade umsindo yaye lunobubele. . . . Alucaphuki. Alunanzondo. . . . Luthwala izinto zonke, . . . Lunyamezela izinto zonke.” UYesu wathi, ukuba sifuna ukuxelisa uThixo ngothando, simele sithande neentshaba zethu.—Mateyu 5:44, 45.
4 Thembela kuThixo ukuze ujamelane nabangendawo. UYehova uthi: “Musani ukubuyisela ububi ngobubi nakubani na. . . . Zamani ngokusemandleni enu, ukuba noxolo nabantu bonke. Musani ukuziphindezelela, zintanda, . . . kuba kubhaliwe kwathiwa: ‘Impindezelo yeyam; kuya kubuyekeza mna, utsho uYehova.’” (Roma 12:17-19) Xa sinokholo kuThixo nakwizithembiso zakhe, siya kuba noxolo lwangaphakathi abangenalo nabangenakuze baluqonde abo baswele ukholo.—INdumiso 7:14-16; Filipi 4:6, 7.
5 Lindela kuBukumkani bukaThixo ukuze kubekho uxolo lokwenene emhlabeni. UBukumkani bukaThixo ngurhulumente wokwenene wasezulwini osele uza kuphelisa bonke ubungendawo uze ulawule kuwo wonke umhlaba. (INdumiso 37:8-11; Daniyeli 2:44) Xa kulawula obo Bukumkani, “uya kuhluma olilungisa,” yaye kuya kubakho ‘uxolo oluninzi ide ingabi sabakho inyanga.’—INdumiso 72:7.
Ezi mfundiso zeBhayibhile ziye zanceda izigidi zabantu—kuquka abathile abathanda ugonyamelo—baba ngabathandi boxolo. Umzekelo onokucinga ngawo ngulowo kaSalvador Garza.