Ukwaneliseka Nokupha

KUKANGAPHI USIVA KUSITHIWA UMNTU ONEZINTO OKANYE OSISITYEBI WONWABILE? Becinga loo nto, abantu abaninzi bachitha ixesha elininzi emsebenzini kuba befuna ukwenza imali eninzi. Kodwa ngaba imali nezinto esinazo zenza sihlale sonwabile? Luthini uphando?

IJournal of Happiness Studies ithi xa sele unazo zonke izinto ozidingayo akusekho nto ingako ikonwabisayo ngokuba nemali eninzi. Imali ayiyongxaki. Inqaku elikwenye imagazini lithi, “eyona nto isenza singonwabi kukuleqeka emva kwemali.” La mazwi afana nalawo athethwa yiBhayibhile kwiminyaka ephantse ibe yi-2 000 eyadlulayo, athi: ‘Ukuthanda imali yingcambu yazo zonke iintlobo zobubi, yaye ngenxa yokusukelana nolo thando bambi baye bazingxwelerha ngeentlungu ezininzi.’ (1 Timoti 6:9, 10) Ingazeziphi ezinye zezo ntlungu?

UKUBA NAMAXHALA NOKUNGAKWAZI UKULALA KUBA UBUTYEBI KUFUNEKA BUKHUSELWE. “Bumnandi ubuthongo bokhonzayo, enoba udla kancinane okanye kakhulu; kodwa indyebo yesityebi ayisivumeli ukuba silale.”—INtshumayeli 5:12.

UKUPHOXEKA KUBA UNGALUFUMANI ULONWABO OBULUTHEMBILE. Enye into ebangela oku kuphoxeka kukuba umntu akasoze onele yimali anayo. “Umthandi nje wesilivere akayi kwaneliswa yisilivere, nabani na othanda indyebo akaneliswa yingeniso.” (INtshumayeli 5:10) Ukuleqeka emva kobutyebi kunokwenza umntu abalekele kude kwizinto ezinokumenza onwabe, njengokuchitha ixesha nentsapho yakhe nabahlobo, okanye ukwenza izinto ezimsondeza kuThixo.

INTLUNGU YAXA IMALI YAKHO IPHELA OKANYE LEYO OBUYITYALILE ITSHONILE. “Musa ukubulalekela ukuzuza ubutyebi. Yeka okwakho ukuqonda. Ngaba uya kubukrwaqula ngamehlo akho na, ekubeni bungeyonto? Kuba bona buzenzela amaphiko njengokhozi buze buphaphazele businge emazulwini.”—IMizekeliso 23:4, 5.

IIMPAWU EZIKWENZA WONWABE

UKWANELISEKA. “Asingenanga nanto ehlabathini, ngoko ke asinakuphuma nanto. Ukuba sinesixhaso nesambatho, masaneliswe zezo zinto.” (1 Timoti 6:7, 8) Abantu abanelayo abafane bakhalaze, loo nto ibanceda bangabi namona. Ibe ngenxa yokuba bengazikhathazi ngezinto abangenamali yazo ababi nestres.

UKUPHA. “Kunoyolo ngakumbi ukupha kunokwamkela.” (IZenzo 20:35) Abantu abaphayo bonwatyiswa kukwenza abanye abantu bonwabe, nokuba ekuphela kwento abaphisa ngayo lixeshana abanalo namandla abo. Abo bantu babaphayo babanika izinto ezingenakuthengwa ngamali, uthando, intlonipho nabahlobo bokwenene!—Luka 6:38.

UKUTHANDA ABANTU KUNEZINTO ONAZO. “Silunge ngakumbi isidlo semifuno apho kukho uthando kunenkunzi yenkomo eyondliwe emkhumbini kunye nentiyo.” (IMizekeliso 15:17) Yintoni esiyifundayo? Ukuthanda abantu kubaluleke ngaphezu kobutyebi. Njengoko siza kufunda kwelinye lamanqaku alandelayo, ukuze sonwabe kufuneka sibathande abantu.

Ibhinqa laseMzantsi Merika, uSabina, lafunda ukuxabiseka kwemigaqo yeBhayibhile. Emva kokuba lishiywe ngumyeni, eli bhinqa neentombi zalo ezimbini basokola. Laliphangela kwiindawo ezimbini, livuka ngo-4:00 qho kusasa. Nakuba wayexakeke ngolo hlobo, uSabina waye wafuna ukufunda iBhayibhile. Kwenzeka ntoni?

Loo nto ayizange imenze afumane imali engaphezu kwale ebeyifumana. Kodwa indlela awayebujonga ngayo ubomi yakhawuleza yatshintsha. Ngokomzekelo, ukufunda kwakhe iBhayibhile kwamenza wonwaba. (Mateyu 5:3) Wafumana abahlobo bokwenene kubantu awayekhonza nabo. Ibe wonwatyiswa nakukuchazela abanye ngezinto azifunde eBhayibhileni.

IBhayibhile ithi “ubulumko bungqineka bububulungisa ngemisebenzi yabo.” (Mateyu 11:19) Ngoko ukwaneliseka, ukupha, nokuthanda abantu kunezinto onazo bubulunigisa!