IHLABATHI ELIGCWELE UBUBI

2 | Khusela Imali Yakho Nezinto Onazo

KUTHENI KUBALULEKILE?

Abantu abaninzi batsala nzima bezama ukufumana izinto abazidingayo. Okubuhlungu kukuba iingxaki ezikhoyo emhlabeni zisenokubenzela nzima nangakumbi. Ngoba?

Xa kukho iingxaki kwiindawo esihlala kuzo, izinto ezifana nokutya nendawo yokuhlala zibaduru kakhulu.
Iingxaki ezikhoyo zisenokwenza abantu balahlekelwe yimisebenzi okanye kunyanzeleke ukuba basebenzele imali encinci.
Iintlekele zisenokumosha amashishini abantu, amakhaya abo nezinye izinto abanazo. Le nto isenokwenza abaninzi babo bahlupheke.

Into Omele Uyazi

Ukuba uyisebenzisa kakuhle imali, uza kukwazi ukuzilungiselela xa kuvela ingxaki.
Hlala ukhumbula ukuba imali yakho, naleyo uyigcinileyo nezinto onazo zisenokuphela.
Kukho izinto ongenakukwazi ukuzithenga ngemali, njengolonwabo nentsapho emanyeneyo.

Into Onokuyenza Ngoku

IBhayibhile ithi: “Ukuba sinokutya nento yokunxiba, masaneliswe zezo zinto.”—1 Timoti 6:8.

Xa singabantu abonelayo siyonwaba xa sinazo izinto esizidingayo. Oku kubaluleke nangakumbi xa singenamali ingako.

Ukuze waneliseke, kufuneka ufunde ukungasebenzisi imali eninzi. Ukuba usebenzisa imali ongenayo, loo nto ingakwenza ube neengxaki ezininzi.

INDLELA YOKUMELANA NALE NTO—Amacebiso Aluncedo

Ngexesha lobubi, khusela imali yakho nezinto onazo ngokusebenzisa la macebiso alandelayo

SUYISEBENZISA KAKHULU IMALI

Suyisebenzisa kakhulu imali

Sukusebenzisa imali kwizinto ongazidingiyo njengakwimpahla okanye izixhobo ezisetyenziswa endlini. Zibuze: ‘Ngaba ndiyidinga nyhani imoto? Ndingakwazi ukuba negadi ukuze ndityale?’
Ngaphambi kokuba uthenge into zibuze: ‘Ngaba ndiyayidinga nyhani? Ngaba ndinayo imali yayo?’
Faka isicelo sokufumana imali esuka kurhulumente ukuba uyafaneleka.

“Saye sahlala phantsi njengentsapho saze sajonga indlela esiyisebenzisa ngayo imali. Saye saziyeka iindlela zokuzonwabisa ezisityela imali. Saqalisa nokupheka ukutya okungafuni izinto ezininzi.”—UGift.

BHALA PHANTSI INDLELA YOKUSEBENZISA IMALI YAKHO

Bhala phantsi indlela yokusebenzisa imali yakho

IBhayibhile ithi: “Amacebo omntu okhutheleyo aza kumenza aphumelele ngokuqinisekileyo, kodwa bonke abenza ngokungxama, nakanjani na baza kuphelela endlaleni.” (IMizekeliso 21:5) Xa ubhala phantsi indlela ofuna ukuyisebenzisa ngayo imali yakho, loo nto iza kukunceda ungasebenzisi imali eninzi kunaleyo uyamkelayo.

Okokuqala, bhala imali ocinga ukuba uza kuba nayo kuloo nyanga.
Emva koko, bhala izinto odla ngokuyisebenzisa kuzo imali yakho nyanga nganye.
Qiniseka ukuba unemali eyaneleyo yokubhatala zonke izinto ozidingayo. Ukuba uyabona ukuba awunayo imali eyaneleyo, ziyeke ezinye izinto ongazidingiyo.

“Qho ngenyanga siye sibhale phantsi imali esiza kuyifumana kunye nesiza kuyisebenzisa. Mna nomfazi wam siye sigcine imali yezinto ezinokufane zithi gqi kunye nemali yezinto esiyaziyo ukuba siza kuzidinga kwixesha elizayo. Le nto iyasinceda kwangaphambili ukuze siyazi indlela esiza kuyisebenzisa ngayo imali esiyifumanayo.”—UCarlos.

WAPHEPHE AMATYALA / BEKA IMALI ECALENI

Waphephe amatyala / yiba nemali oyibeka ecaleni

Yiba nendlela oceba ukuwabhatala ngayo amatyala. Ukuba kunokwenzeka, sukuwathatha amatyala. Kunoko, zama ukubeka imali ecaleni yokuthenga loo nto uyifunayo.
Qho ngenyanga beka imali ecaleni ukwenzela iimeko ezinokuthi gqi.

SEBENZA NZIMA / WUGCINE UMSEBENZI WAKHO

IBhayibhile ithi: “Kukho umvuzo kulo lonke uhlobo lomsebenzi onzima.”—IMizekeliso 14:23.

Sebenza nzima / wugcine umsebenzi wakho

Wujonge ngendlela efanelekileyo umsebenzi wakho. Nokuba lo msebenzi ibingenguwo lo ubuwufuna kodwa uyakunika imali.
Yiba ngumntu okhutheleyo nonokuthenjwa. Le nto ingakunceda uwugcine umsebenzi okuwo, nokuba ungaphela, kungalula ukuba ufumane omnye.

“Ndithatha nawuphi na umsebenzi ovelayo, nokuba andiwuthandi okanye imali endiyifumanayo asiyiyo le bendiyilindele. Ndingumntu onokuthenjwa ibe ndiwenza kakuhle umsebenzi, ngokungathi ndisebenzela mna.”—UDmitriy.

Ukuba ufuna umsebenzi . . .

Yiba nento oyenzayo. Fownela iinkampani ezinokuba nomsebenzi onokukwazi ukuwenza nokuba azikakhangeli bantu. Xelela abahlobo nentsapho ukuba ufuna umsebenzi.
Yiba bhetyebhetye. Kunqabile ukuba ufumane umsebenzi onayo yonke le nto uyifunayo.