Chapter 23

“Kufuneka Nibe Nonyamezelo”

1. (a) Kutheni amaNgqina kaYehova ngokwenyaniso engabantu abonwabileyo? (b) Kodwa sisiphi isiluleko esikumaHebhere 10:36 esisebenza kuthi sonke?

ABO baye bathembela ngoYehova bangabona bantu bonwabe ngokwenyaniso emhlabeni namhlanje. Bayazi apho kunokufunyanwa khona esona siluleko silungileyo esingendlela yokuhlangabezana neengxaki zobomi—kwiLizwi likaThixo. Aboyiki njengokuba bekhangela kwikamva, kuba bayazi ukuba iyintoni na injongo kaThixo ngalo mhlaba. (Yeremiya 17:7, 8; INdumiso 46:1, 2) Sekunjalo, umpostile uPawulos wabhalela amaKristu angoowabo wathi: “Kufuneka nibe nonyamezelo, ukuze, emva kokuba nikwenzile ukuthanda kukaThixo, nibe nokufumana inzaliseko yedinga.” (Hebhere 10:36, NW) Yintoni ebangela ukuba kubekho le mfuneko yokunyamezela?

2. Kutheni abafundi bakaYesu bekuya kufuneka babe nonyamezelo?

² Ngaphambi kokufa kwakhe, uYesu wabenza bayiqonda abapostile bakhe into eyayingaphambili, esithi: “Ukuba beningabehlabathi, ihlabathi linge likuthanda okwalo; ke ngokuba ningengabehlabathi, ndaninyulayo mna kulo ihlabathi, ngenxa yoko linithiyile ihlabathi. Likhumbuleni ilizwi endalithethayo mna kuni, elithi, Akukho mkhonzi umkhulu kuneNkosi yakhe. Ukuba banditshutshisa mna, bonitshutshisa nani; ukuba ilizwi lam baligcina, nelenu boligcina. Ke ezi zinto zonke baya kuzenza kuni ngenxa yegama lam, ngokuba bengamazi owandithumayo.” (Yohane 15:19-21) Hayi indlela ekungqineke kuyinyaniso ngayo oko!

3. (a) Abafundi bakhe batshutshiswa ‘ngenxa yegama likaYesu’ njani? (b) Abatshutshisi ‘abamazi’ ngayiphi ingqiqo Lowo wathuma uYesu? (c) Ngubani ongunobangela oyintloko wentshutshiso?

³ Abalandeli bakaYesu bathiyiwe kuba baphila kwihlabathi elikuchasayo oko kumelwa bubuKristu bokwenene. Igama elithi Kristu lithetha “Othanjisiweyo.” UYesu Kristu uthanjiswe nguYehova ukuba abe nguKumkani, alawule wonke umhlaba. Ngaloo ndlela xa uYesu wathi abafundi bakhe babeya kutshutshiswa ‘ngenxa yegama lakhe,’ wayethetha ukuba intshutshiso yayiya kubakho ngenxa yokunamathela kwabo kuye njengoKumkani kaYehova onguMesiya, ngenxa yokuthobela kwabo uKristu ngaphezu kwakhe nawuphi na umlawuli womhlaba, ngenxa yokunamathela kwabo ngokunyanisekileyo kuBukumkani bakhe nokungabandakanyeki kwimicimbi yoorhulumente babantu. UYesu wongeza ngelithi kwakuya kubakho inkcaso ngenxa yokuba abatshutshisi “bengamazi owandithumayo”—oko kukuthi, abakuvumi ukugqala uYehova uThixo njengoMongami Wendalo Iphela. (Thelekisa iEksodus 5:2.) Ngubani unobangela ophambili wale ntshutshiso? NguSathana uMtyholi.—ISityhilelo 2:10.

4. (a) Ukuzaliseka kweSityhilelo 12:17 kubuchaphazela njani ubomi bethu? (b) Iyintoni injongo kaSathana?

⁴ Ingakumbi ukususela ukuba uSathana waphoselwa ngaphandle kwezulu emva kokuzalwa koBukumkani bukaYehova obulawulwa nguMesiya ngowe-1914, ibe nkulu ingcinezelo ephezu kwamaKristu okwenyaniso. Musa ukuyijongela phantsi. UMtyholi needemon zakhe balwa ngendlela engathethekiyo nabo bonke abaye bema ngakwicala loBukumkani bukaThixo obulawulwa nguYesu Kristu. Ngokubhekisele koku, ISityhilelo 12:17 sithi: “Yamqumbela umfazi [intlangano kaThixo yasezulwini ebumfazi] inamba [uSathana uMtyholi], yemka yaya kulwa nabaseleyo bembewu yakhe [abalandeli bakaKristu basemhlabeni abathanjiswe ngomoya], abo bayigcinayo imithetho kaThixo, abanobungqina bukaYesu Kristu.” “Nezinye izimvu,” zizifumana ziphakathi emlweni. Ngeendlela zobuqhophololo, uSathana uzabalazela ukuzilinga okanye ukuzinyanzelela ukuba zingayithobeli imithetho kaThixo. Ufuna ukuzenza buthathaka aze ke abutshabalalise ngokupheleleyo ubumoya bazo. Injongo yakhe kukuthintela ukuvakaliswa kukaYesu njengoKumkani onguMesiya kaYehova. Kodwa kulo mlo wokomoya abakhonzi abanyanisekileyo bakaThixo bayoyisa.

AMELE ASABELE NJANI AMAKRISTU?

5. Ziziphi izinto ezenziwa ngoorhulumente kumaNgqina kaYehova?

⁵ Amagosa amaninzi karhulumente ayaqonda ukuba amaNgqina kaYehova angabantu abagcina umthetho nokuba anempembelelo entle kwindawo ahlala kuyo. Sekunjalo, bonke oorhulumente babantu bayinxalenye yenkqubo yezinto yehlabathi likaSathana. (1 Yohane 5:19; ISityhilelo 13:2) Ngoko akumele kumangalise xa abanye oorhulumente bezalela iintlanganiso zabo banqula uThixo oyinyaniso, bebhangisa uncwadi lwabo lweBhayibhile, bethintela ukushumayela kwabo ngoBukumkani bukaThixo, ewe, bade babavalele ezintolongweni baze babaphathe kakubi ngokwasemzimbeni. Ukuba wena ngokobuqu uba phantsi kwengcinezelo enjalo, uza kwenza ntoni?

6. (a) Sisiphi isimo sengqondo esimele sibe naso ngamagosa karhulumente? (b) Kodwa yiyiphi into ngokuqinileyo esinesigqibo sokuyenza? (c) Nakubeni sitshutshiswa, singaqhubeka njani sonwabile?

⁶ Abapostile bakaYesu Kristu babewahlonela amagosa karhulumente. Xa babetshutshiswa, abazange baphindezele. Kodwa xa baxelelwa ukuba bayeke ukwenza oko uThixo wayekuyalele, baphendula ngamandla bathi: “Simelwe kukuthi sive uThixo kunokuba sive abantu.” (IZenzo 5:29; Roma 12:19; 1 Petros 3:15) Kwanaxa ubomi babo babusongelwa, ukoyika ukufa akuzange kubenze balalanise. Babesazi ukuba babekhonza “uThixo lo ubavusayo abafileyo.” (2 Korinte 1:9; Hebhere 2:14, 15) Nangona babetshutshiswa, babevuya—bevuyiswa kukuba babesazi ukuba babekholisa uThixo, babevuyiswa kukuba nethuba lokuba nesabelo ekuthetheleleni igama lakhe nokungqina ukunyaniseka kwabo kuKumkani wakhe othanjisiweyo. (IZenzo 5:41, 42; Mateyu 5:11, 12) Ngaba olo luhlobo lomntu olulo? Ngaba uzichaza ngokuphandle njengokunye nabo bafumana amava anjalo? UEbhedi-meleki wayengomnye ongazange arhoxobise ngenxa yoloyiko. Wayengubani yena?

7. (a) Wayengubani uEbhedi-meleki, yaye kutheni engowomdla kuthi ngoku? (b) Xa wevayo ukuba uYeremiya wayephoswe kumngxuma onodaka, wenza ntoni uEbhedi-meleki, yaye ngoba?

⁷ UEbhedi-meleki wayengumTiyopiya owayesoyika uThixo nowayephila eYerusalem ebudeni bethuba elalingaphambi kokutshatyalaliswa kwayo ngamaBhabhiloni. Wayeqeshwe endlwini kaKumkani uZedekiya. Ngelo xesha uYeremiya wayekhonza njengomprofeti kaYehova kuBukumkani bakwaYuda nakwiintlanga ezazibungqongile. Ngenxa yokuba wathi ngokungalalanisiyo wanikel’ isigidimi sikaThixo sesilumkiso, watshutshiswa ngokugqithiseleyo. Ngenxa yempembelelo eyayivela kubathetheli abathile eYerusalem, wade waphoswa emhadini ukuze atshone eludakeni aze afe. Nangona uEbhedi-meleki wayengengomSirayeli, wayemqonda uYeremiya njengomprofeti kaYehova. Akuba ekuvile okwakwenzekile, ngokukhawuleza uEbhedi-meleki wafuna ukumkani esangweni lesixeko ukuze ancede uYeremiya. Esenza ngokwemiyalelo kakumkani, ngokukhawuleza wafumana amadoda angama-30, kwanezintya namadlavu. Wayalela uYeremiya ukuba afake amadlavu ngaphantsi kwamakhwapha akhe ukuze angagruzulwa zizintya, bandula ke bakhupha lo mprofeti kulo mhadi.—Yeremiya 38:4-13.

8. Liliphi idinga eliqinisekisayo uYehova awalithumela kuEbhedi-meleki, yaye ngoba?

⁸ Kuyaqondakala ukuba uEbhedi-meleki wayekhathazekile ngoko kwakusenokwenziwa ngabathetheli kuye ngenxa yokukatyisa kwakhe iyelenqe labo, kodwa uloyiko lwakhe loyiswa kukuhlonela kwakhe umprofeti kaYehova nokukholosa kwakhe ngoThixo. Ngenxa yoko, uYehova wamqinisekisa uEbhedi-meleki ngoYeremiya wathi: “Amazwi am ndiwazisela ububi kulo mzi, andiwaziseli okulungileyo; aya kwenzeka phambi kwakho ngaloo mhla. Ke ndokuhlangula ngaloo mhla, utsho uYehova, unganikelwa esandleni samadoda onxungupheleyo ngawo. Ngokuba, inene, ndiya kukusiza, ungawi likrele; uya kuba lixhoba kuwe umphefumlo wakho, ngokuba ukholose ngam; utsho uYehova.”—Yeremiya 39:16-18.

9. (a) “Ezinye izimvu” ziye zafana njani noEbhedi-meleki? (b) Ngoko, idinga likaYehova kuEbhedi-meleki lithetha ntoni ‘kwezinye izimvu’ namhlanje?

⁹ Hayi indlela elixabiseke ngayo elo dinga kubakhonzi bakaYehova namhlanje! NjengoEbhedi-meleki, “ezinye izimvu” ziyakubona okungekho sikweni okwenziwa kudidi lukaYeremiya lwanamhla, intsalela ethanjisiweyo, nemigudu eyenziwayo ukuthintela ukushumayela kwalo isigidimi sikaYehova. Azithandabuzanga ukwenza nangayiphi na indlela ezinokuthi zikwazi ngayo ukulondoloza nokunceda udidi lwabathanjiswa. Ngoko ke, ngokufanelekileyo, idinga likaYehova kuEbhedi-meleki liyazomeleza, liqinisa intembelo yazo yokuba uThixo akayi kubavumela abachasi bazitshabalalise kodwa Uya kubalondoloza njengodidi ukutyhubela intshabalalo yehlabathi esondelayo kuse ‘kumhlaba Wakhe omtsha’ wobulungisa.

10. AmaKristu adibana nentshutshiso kuziphi iinkalo zobomi?

¹⁰ Asingabo bonke abahamba emanyathelweni kaYesu Kristu abasongelwa ngokuvalelwa ezintolongweni, kodwa bonke bayayifumana intshutshiso ngandlela ithile. (2 Timoti 3:12) Amawakawaka abafazi, namadoda angamaKristu, kangangeminyaka emininzi baye banyamezela ngokuthembekileyo inkcaso enkulu kanye emakhayeni abo. Nabantwana, ngenxa yokunqwenela kwabo ukukhonza uYehova, baye balahlwa ngabazali. (Mateyu 10:36-38) Ulutsha olungamaKristu nalo lusenokuhlangana nentshutshiso esikolweni; abantu abakhulu, banokuhlangana nayo kwiindawo zabo zempangelo. Onke amaNgqina kaYehova ayayingcamla njengokuba esiba nesabelo ekunikeleni ubungqina ekuhleni ngoBukumkani bukaThixo. Kubo bonke abanjalo, ayasebenza amazwi kaYesu athi: “Ekunyamezeleni kwenu, noyizuza imiphefumlo yenu.”—Luka 21:19.

11. (a) Ziziphi ezinye iimeko ezizisa uvavanyo oluqatha kwabaninzi? (b) Ngubani omnye owadibana nezi zinto, yaye ngoba?

¹¹ Kukho nezinye iimeko ezininzi ezibabeka eluvavanyweni. Basenokugula ngokuqatha, ukugula okuphanga uvuyo olukhulu ebomini. Okanye, mhlawumbi bajongana nezona meko zinzima zoqoqosho. Maxa wambi, kusenokwenzeka ukuba, amazwi athethwa ngamaqabane asondeleyo ngangalungileyo nangabonisi bubele. Kwimeko kasolusapho uYobhi, uSathana wasebenzisa zonke ezi ndlela ngomgudu wokwaphula ingqibelelo yakhe. Siya kusabela njani ukuba sizifumana sikwiimeko ezifanayo?—Yakobi 5:11.

12. (a) Kutheni uNowa wayekufuna ngokukodwa ukunyamezela kubulungiseleli bakhe? (b) Iye yafana njani le meko kumhla wethu?

¹² Kwelinye icala, kuthekani ukuba abantu abasabeli kakuhle kangako kwimigudu yethu yokunikela ubungqina ngeenjongo zikaYehova? Nako oko, kufuna unyamezelo. Khumbula ukuba, ebudeni bayo yonke iminyaka awathi ngayo uNowa washumayela ngaphambi koMkhukula, kuphela ngumfazi wakhe noonyana bakhe nabafazi babo abamthelelayo ekukhonzeni uYehova. Lonke uluntu ‘aluzange luqonde.’ (Mateyu 24:39) Ngokufanayo, namhlanje, uninzi ‘aluqondi.’ Noko ke, kweminye imimandla, apho abantu babekade besabela kancinane kwisigidimi soBukumkani, ngoku kukho isivuno esiyintabalala sabanquli boThixo oyinyaniso. Banoyolo abo bathi banyamezela iminyaka yokungakhathalelwa okanye inkcaso ephandle yaye ngoku besiba nesabelo kulo msebenzi wokuhlanganisa uzukileyo!

‘BANOYOLO ABANYAMEZELAYO’

13. (a) Ukuze sihlale sinyamezela, yintoni esimele sihlale sinikela ingqalelo kuyo? (b) Yintoni ekufuneka siyiqonde ngokubhekisele kwiindlela zikaSathana?

¹³ Ukuze sikuphephe ukuphulukana nethemba elingummangaliso lobomi ‘kumhlaba omtsha,’ kubalulekile ukuba sihlale siyiqonda ngokucacileyo imbambano enkulu ejongene nendalo yonke—imbambano yolongamo lwendalo iphela. Ngaba ngokungahanahanisiyo sikwicala likaYehova? Ngaba siyiqonda ngokupheleleyo into yokuba mabini kuphela amacala akhoyo, asinakuba ngoondilele? Ukuba asizukuba ziingxwelerha kule mfazwe, kufuneka siqonde ukuba ubutshaba nomgibe ziindlela ezisetyenziswa nguSathana ukwaphula ingqibelelo yethu, ukusibangela singamthobeli uThixo, ukusityekisa kumsebenzi obalulekileyo wokunikela ubungqina ngoBukumkani obulawulwa nguMesiya.—1 Petros 5:8, 9; Marko 4:17-19.

14. (a) Luluphi ulwalamano esimele siluhlakulele, yaye siluhlakulele nabani? (b) Uya kusinceda njani?

¹⁴ Kwakhona simele sihlakulele ukukholosa ngokupheleleyo ngoYehova. Hayi indlela ebekuya kuba bubuyatha ngayo ukuzama ukusebenzisa amandla ethu ukuze siphephe imigibe echuliweyo yotshaba olunamandla angaphaya kwawomntu! Kodwa ukuba sikholosa ngoYehova ngazo zonke iintliziyo zethu, ngoko xa sidibana nobunzima size sijongane nesilingo siya kusondela kuye. (Efese 6:10, 11; IMizekeliso 3:5, 6) UYehova akasinyanzeleli ukuba sihambe ngendlela ethile. Akayi kusikhokelela ukuba senze ngokuchasene nokuthanda kwethu. Kodwa ukuba siphethukela kwiLizwi lakhe ukuze sifumane ukhokelo, sithandazele amandla kuye size sihlale ngokusondeleyo kwintlangano yakhe, uya kuwalathisa amanyathelo ethu. Yaye uya kusomeleza ngobungqina obuhlaziyiweyo bothando lwakhe olungenakusilela.—Roma 8:38, 39.

15. (a) Ngubani omele eze kuqala kubomi bethu? (b) Simele sizijonge njani iimeko ezivavanya ukholo lwethu?

¹⁵ Iinzima nezilingo othi uzifumane ziya kukubek’ eluvavanyweni. Ngubani ombeka kuqala kubomi bakho? Ibango likaSathana lelokuba thina sonke sixhalabele iziqu zethu ngokuphambili. Abantu abaninzi banjalo. UYesu Kristu wayahlukile. Ngaba unjalo nawe? Ngaba ukufundile ukubeka kuqala ukuzukisa igama likaYehova? Ngoko, ukuba kunjalo, kunokuba uziphephe iimeko ezivavanya ukholo lwakho, uya kukwazi ukuhlangabezana nazo ngokungqalileyo, uthandaza kuYehova ukuba akunike ubulumko bokusebenzisa ezi zinto ukuze umhlonele. Imbandezelo okuyo iya kuvelisa unyamezelo; ukunyamezela kwakho ngenxa yokuthanda kwakho uYehova kuya kukubangela ukuba ube ngokholisekileyo kuye. “Inoyolo indoda ekunyamezelayo ukulingwa; ngokuba yothi, yakuba icikidekile, isamkele isithsaba sobomi, ebabeke ngedinga iNkosi abo bayithandayo.”—Yakobi 1:2-4, 12; Roma 5:3, 4.

16. Luluphi usukelo esimele sizabalazele ukulufikelela?

¹⁶ Akwanele ukusuka nje uqalise kwinkonzo kaYehova okanye unyamezele ithuba elifutshane. Siselugqatsweni, ibe umvuzo unikwa abo bafika entanjeni. Hayi indlela abaya kuvuya ngayo bonke abaya kube bezibhokoxa amehlo ejonge ngokuthe ngqo emvuzweni xa le nkqubo indala iya kube ibhujiswa! Ngoko elinjani ukuzuka ithemba elibalindeleyo!—Hebhere 12:1-3; Mateyu 24:13.