Ungumvuzi Wabo Bonke Abamkhonzayo

“ENKOSI.” Ngubani ongenakuvuya xa esiva amazwi ombulelo ngenxa yokwenziwa kakuhle komsebenzi othile okanye xa ubani ekupha isipho ngokusuka entliziyweni? Sonke siyakufuna ukunconywa ngemigudu esiyenzayo ngokukodwa ngabo sibathandayo. Kakade ke, oyena mntu simthandayo nguYehova uThixo. Ngaba uyayixabisa imigudu yethu yokumkhonza? Makhe siqwalasele indlela awaqhubana ngayo noEbhedi-meleki, indoda eyabeka ubomi bayo esichengeni ukuze ihlangule omnye wabaprofeti bakaThixo.—Funda uYeremiya 38:7-13 no-39:16-18.

Wayengubani uEbhedi-meleki? Kubonakala ngathi wayeligosa lenkundla likaKumkani uZedekiya wakwaYuda.a UEbhedi-meleki wayephila ngaxeshanye noYeremiya, lowo uThixo awamthuma ukuba alumkise uYuda ongathembekanga ngentshabalalo eyayiza kumfikela. Nangona wayengqongwe ziinkosana ezazinqula izithixo, uEbhedi-meleki wayemoyika uThixo yaye emhlonela uYeremiya. Iimpawu zakhe zobuthixo zaye zavavanywa xa iinkosana zatyhola uYeremiya ngokuba ubangela isiphendu zaze zamphosa equleni ukuze afe. (Yeremiya 38:4-6) Wayeza kwenza ntoni uEbhedi-meleki?

UEbhedi-meleki waba nenkalipho, engoyiki ukuba iinkosana zingaziphindezelela. Waya kuZedekiya waza wabonisa ekuhleni ukuba wayengahambisani nendlela awaphathwa ngayo uYeremiya. Mhlawumbi esalatha kubantu abenze obu bubi, waxelela ukumkani la mazwi: “La madoda enze ububi . . . kuYeremiya.” (Yeremiya 38:9) UEbhedi-meleki waphumelela, waza uZedekiya, wayalela ukuba kuthatyathwe amadoda angama-30 ukuze kuhlangulwe uYeremiya.

Ngoku uEbhedi-meleki ubonisa olunye uphawu oluhle: uvelwano. Wathabatha “amadlavu eengubo ezikrazukileyo namadlavu eziqwenga zamalaphu wawathobela kuYeremiya . . . ngeentsontelo.” Kwakutheni ukuze eze neengubo namalaphu? Ukuze uYeremiya angatyabuki njengoko wayekhutshwa equleni elalinodaka.—Yeremiya 38:11-13.

UYehova wakubona oko kwenziwa nguEbhedi-meleki. Ngaba wakuxabisa? Esebenzisa uYeremiya, uThixo waxelela uEbhedi-meleki ukuba intshabalalo kaYuda yayingenakujika. Emva koko uThixo wanika uEbhedi-meleki oko omnye umphengululi akubiza ngokuba “zizithembiso zosindiso ezihlanu.” UYehova wathi: “Ndiza kukuhlangula . . . Akuyi kunikelwa esandleni samadoda . . . Nakanjani na ndiya kukusindisa . . . Akuyi kuwa ngekrele . . . Ngokuqinisekileyo uya kuba lixhoba lakho umphefumlo wakho.” Kwakutheni ukuze uYehova amthembise ngokumkhusela uEbhedi-meleki? UYehova wamxelela oku: “Ngenxa yokuba ukholose ngam.” (Yeremiya 39:16-18) UYehova wayesazi ukuba uEbhedi-meleki wathabatha eli nyathelo lokuhlangula uYeremiya kungekhona kuba exhalabele uYeremiya kodwa nangenxa yokuba wayenokholo yaye ethembele ngoThixo.

Isifundo sicacile: UYehova uyakuxabisa oko sikwenzayo xa simkhonza. IBhayibhile iyasiqinisekisa ukuba ukhumbula kwanezinto ezincinane esizenzayo xa simnqula siqhutywa yintliziyo enokholo. (Marko 12:41-44) Ngaba izinto ozifundileyo azikwenzi ufune ukusondela kulo Thixo unoxabiso? Ukuba kunjalo, unokuqiniseka ukuba uyakwenza ngokuvisisana namazwi aseLizwini lakhe athi: “Ungumvuzi wabo bamfuna ngenyameko.”—Hebhere 11:6.

Izibhalo onokuzifunda ngoMeyi:

◼ Yeremiya 32-50

[Umbhalo osemazantsi]