Amabandla Alungelelaniselwe Ukushumayela UBukumkani BukaThixo

Xa wayesemhlabeni, uYesu Kristu washumayela ngoBukumkani bukaThixo, esiya kwiilali ngeelali nakwizixeko ngezixeko. Wakwaqeqesha waza wathumela abafundi bakhe ukuba benze umsebenzi okwamnye. Ngaphambi kokunyukela ezulwini, wayalela abalandeli bakhe ukuba babenze abafundi abantu bazo zonke iintlanga. Kwasekusekweni kwalo, ibandla lamaKristu langaphambili lalilungelelaniselwe ukushumayela iindaba ezilungileyo. Naphi na apho abafundi babesiya khona, babeya kufunyanwa beshumayela uBukumkani bukaThixo.—Mateyu 4:17, 23; 10:1-16; 28:19, 20; Luka 4:43, 44; 8:1; 10:1-9; IZenzo 1:8; 4:31; 5:42; 8:12; 19:8; 28:23, 30, 31; Roma 10:9, 10, 14.

Kwisiprofeto sikaYesu esingokupheliswa kwale nkqubo yezinto, wathi: “Ezi ndaba zilungileyo zobukumkani ziya kuvakaliswa kulo elimiweyo liphela, zibe bubungqina kuzo zonke iintlanga; kwandule ke ukufika ukuphela.” Oku kushumayela kuyimbopheleleko ephambili yebandla lamaKristu namhlanje.—Mateyu 24:14; Marko 13:10.

Zwenibanzi, onke amabandla amaNgqina kaYehova alungelelaniselwe ukugubungela ummandla wawo wasekuhlaleni ngendlela ecwangcisiweyo ngokushumayela iindaba ezilungileyo zoBukumkani bukaThixo. Ukuze oku kwenziwe ngendlela elungeleleneyo, kwilizwe ngalinye iofisi yesebe yeWatch Tower Society yabela ibandla ngalinye ummandla elinokunikela ubungqina kuwo. Ibandla lahlulahlula lo mhlaba liwabelweyo ube ziinxalenye ezincinane, ezithi zabelwe abo baya kuba nembopheleleko yokuqiniseka ukuba abantu batyelelwe.—1 Korinte 14:33, 40.

AmaNgqina adla ngokudibana nabantu ngokuya kwindlu ngendlu. Kwiintlanganiso zawo, amaNgqina kaYehova aye aqeqeshelwa ukunikela iintshumayelo ezimfutshane zesigidimi soBukumkani kwindlu ngendlu, esebenzisa iiBhayibhile zawo. AmaNgqina aphatha uncwadi lweBhayibhile alushiyela abaninimzi abafuna ukuzuza ulwazi olungakumbi lweLizwi likaThixo.

Ukuze anike wonke ubani kulo mmandla ithuba lokuva isigidimi esibalulekileyo soBukumkani, amaNgqina agcina ingxelo eneenkcukacha njengoko esiya kwindlu ngendlu, ephawula apho abantu bangafunyanwanga ekhaya okanye apho ngenxa yesizathu esithile kungenzekanga ukuba kunikelwe ubungqina obucokisekileyo. Kuya kutyelelwa ngelinye ixesha. Apho kubonakaliswe umdla, oko kuyaphawulwa, aze amaNgqina abuyele ukuze anikele inkcazelo eyongezelelekileyo engeZibhalo. Ukuba kunqwenelwa njalo, isifundo seBhayibhile esithe rhoqo siya kuqhutywa. Konke oku kwenziwa ngesisa.

AmaNgqina kaYehova akwanikela amaphephancwadi kubantu abadlula ngendlela. Ngale ndlela ayakwazi ukudibana nabantu abaninzi asenokungabafumani ekhaya. Kwenziwa umgudu wokwenene wokufikelela wonk’ ubani oya kuphulaphula.—IZenzo 17:17; ISityhilelo 14:6, 7; 22:17.

Kutheni le nto amaNgqina eman’ ukutyelela ngoxa uninzi lungabonisi mdla? Kuye kwafunyaniswa ukuba imeko yabantu ngabanye idla ngokuguquka baze basabele kakuhle kolunye utyelelo, okanye kunokudityanwa nomnye umntu wekhaya yena oya kubonisa umdla.

UYesu wathi kubafundi bakhe: “Funani ke tanci ubukumkani bukaThixo nobulungisa bakhe.” Ukushunyayelwa koBukumkani bukaThixo kunendima ebalulekileyo ekufuneni kwethu tanci uBukumkani, ibe amaNgqina kaYehova akwenza oku injongo yawo ebalulekileyo ebomini bawo.—Mateyu 6:33; 2 Timoti 4:2.

• Nguwuphi umsebenzi kaYesu nowamaKristu angaphambili owaxelwa kwangaphambili usiya kwenziwa kwakhona ngomhla wethu?

• Umsebenzi wokushumayela wamaNgqina kaYehova ulungelelaniswe njani?

• Kutheni amaNgqina eman’ ukutyelela abantu ngoxa uninzi lungabonakalisi mdla?

[Imifanekiso ekwiphepha 16, 17]

AmaNgqina kaYehova eshumayela uBukumkani bukaThixo kumazwe awahlukahlukeneyo

EThailand

EMexico

ENetherlands

EKorea

ECuraçao

EGhana

EBritani

EOstreliya