Isahluko 2
Ngaba Abantu Banokuluzisa Uxolo Nonqabiseko Olusisigxina?
1. Yiyiphi imibuzo ekufuneka sizibuze yona, ibe ngoba?
UKUZE ithemba libe nentsingiselo, limele lisekelwe kwinto yokwenene neyinyaniso. Amathemba abubuxoki asuka nje abamfamekise abantu kwinto yokwenyaniso. Ngoko ke, kufuneka sizibuze oku: Siyayiqonda na indlela ezinkulu ngayo iingxaki ezimele ukuconjululwa ukuze kuziswe uxolo nonqabiseko lokwenyaniso? Siyayiqonda na indlela ethe yangxamiseka ngayo imeko? Ngaba bukho ubungqina bokuba izicombululo zabantu beziya kubufanela ubukhulu balo msebenzi?
2, 3. (a) Kutheni le nto ukufuna uxolo nonqabiseko kungxamiseke ngakumbi nangakumbi namhlanje? (b) Ziziphi ezinye izisongelo ezikhoyo ebomini emhlabeni?
2 Kangangamawakawaka eminyaka abantu bebefuna uxolo nonqabiseko oluhlala luhleli, baza abaphumelela. Kodwa ngoku le meko ingxamiseke gqitha ngenxa yesisongelo semfazwe yenyukliya. Ingxelo yaseKhanada yalumkisa ngelithi: “Ayikho into ekuthiwa kukusinda kwimfazwe yenyukliya kuba imeko yasemva kwayo iya koyikeka gqitha kangangokuba abasindileyo bebeya kunqwenela ukuba ngabafileyo.”3 Sibonisa isizathu, isazi ngeenkwenkwezi uCarl Sagan wathi: “Ngoku kukho izixhobo zenyukliya ezingaphezu kwama-50 000, . . . ezaneleyo ukutshabalalisa iiHiroshima ezisisigidi.” Wongezelela ngelithi: “Akuthandabuzeki ukuba impucuko yethu yazwenibanzi ibiya kutshatyalaliswa.”4
3 Ukongezelela, kukho nezinye izisongelo ezenza ubomi emhlabeni bube sengozini. Esinye kukungcoliswa okwenziwa zwenibanzi komhlaba, umoya namanzi. Esinye kukwanda kwabemi nendlala enxulumene nako, izifo neziphithiphithi.
4. Imeko yoluntu namhlanje iye yachazwa njani?
4 Lithetha ngezisongelo ezahlukahlukeneyo ezijongene noluntu ngoku, iziko loxolo eNorway lathi: “Imeko yanamhla yezizwe ngezizwe iphawulwa ngamanqam anzulu agqugqisa phantse kuzo zonke iinkalo zemicimbi yabantu: ezoqoqosho nezentlalo, ezobupolitika nezomkhosi, ezingokomoya nezingokokuziphatha.” Longezelela lathi: “Ugonyamelo luyanda ibe ukusetyenziswa kwezigalo njengesixhobo sokuyilwa komthetho nothethathethwano kuye kwaba yinto enabileyo. . . . Isithuba esiphakathi koxolo nemfazwe siya sivuleka ngendlela eyingozi ngakumbi.”5 Ngaba oku kukhokelela phi? Usosiba-jikelele weZizwe Ezimanyeneyo walumkisa ngelithi: “Ngendlela eyingozi sisondela kumbhodamo omtsha wezizwe ngezizwe.”6
Linokubakho Na Ihlabathi Elingenamfazwe Ngemigudu Yabantu?
5. Ibonisa ntoni imbali ngokubhekisele kumandla omntu okuphelisa imfazwe?
5 Sikho na isizathu sokukholelwa ukuba abantu banokuyiphelisa imfazwe? Ngokwembali, lo mhlaba wawungenamfazwe ngokupheleleyo iminyaka nje embalwa egqagqeneyo. Kule nkulungwane yama-20 iyodwa, abantu abamalunga ne-100 lezigidi baye babulawa emfazweni! UManyano Lwezizwe lwayizolo neziZizwe Ezimanyeneyo zanamhla azikwazanga ukunqumamisa oku kubulawa kwabantu.
6. Ngaba ukoyikwa kwemfazwe yenyukliya kusisiseko esiphilileyo soxolo?
6 Kodwa ngaba ukoyikwa kokutshabalalisa kwezixhobo zenyukliya akuyi kukuguqula oku? Aluzange lubekho na uloyiko olwaneleyo lwezixhobo zenyukliya emva ngowe-1945 xa iibhombu zeathom zatshabalalisa izixeko ezibini zaseJapan? Kaloku, ukususela ngoko iindawo ekufunjwe kuzo izixhobo zenyukliya ezinamandla agqithiseleyo ziye zandiswa kaliwaka. Ibe ukususela nje kowe-1945 abantu abaqikelelwa bengama-35 000 000 baye babulawa ezimfazweni nakwiimvukelo ezibandakanya amazwe angaphezu kwe-100. Komnye unyaka wakutshanje iintlanga ezingama-45 zazibandakanyeke emfazweni!7 Ukoyikwa kwezixhobo zenyukliya akuyithintelanga imfazwe.
7. Ngaba ukutyobelwa kwezivumelwano zokubekwa phantsi kwezixhobo okanye kwezivumelwano zoxolo kuqinisekisa uxolo oluhlala luhleli?
7 Kuyavunywa ukuba, iintlanga zityobela izivumelwano zokubekwa phantsi kwezixhobo okanye zokwenziwa koxolo ibe mhlawumbi zoqhubeka zisenjenjalo. Kwiinkulungwane ezidluleyo ngokoqobo ngamawaka ezivumelwano aye atyobelwa. Kanti, xa imfazwe yathi yathabath’ unyawo, ezo zivumelwano zaba ngamaphepha nje angenamsebenzi. IZizwe Ezimanyeneyo kwakhona zisilele ukuthintela imfazwe, kuba nangona namhlanje phantse onke amazwe ayinxalenye yeZizwe Ezimanyeneyo, ayazityeshela xa ethanda. Ngoko ngaba kunobunyaniso ukuthemba ukuba iinkokeli zehlabathi zexa elizayo ziya kuligcina ilizwi lazo kunezo zexa elidluleyo?
8. IBhayibhile iyichaze njani inyaniso engokusilela komntu ukuzisa uxolo oluhlala luhleli?
8 Kwelinye icala, okuthethwa yiBhayibhile kuvisisana nezifundo zembali. Ayikuncomeli ukubeka kwethu ithemba lethu kwimigudu yabantu yokuzisa uxolo. Ngokwahlukileyo koko, yaxela kwangaphambili ukuba imigudu yabantu yayingena kuze izise uxolo oluhlala luhleli. Yalumkisa kwangaphambili ngelokuba ngaphambi nje kokuphela kwale nkqubo yezinto, iimfazwe neziphithiphithi zaziya kwanda zwenibanzi, ‘uhlanga luvukelane nohlanga nobukumkani buvukelane nobukumkani.’ (Luka 21:9, 10, 31; ISityhilelo 6:1-4) Ukususela ngowe-1914 iziganeko zehlabathi zizizalisekisile ezo ziprofeto. Ngoko kunokuba ivelise amathemba abubuxoki, ngokwenyaniso iBhayibhile ivakalisa oku: “Ayikhona emntwini indlela yakhe; akukhona endodeni ehambayo ukuqinisela ukunyathela kwayo.”—Yeremiya 10:23.
Ngaba Abantu Banokuhlangabezana Nokuphuphuma Kwabemi Bomhlaba?
9-11. (a) Abemi bomhlaba banda ngokuphindaphindiweyo kangakanani? (b) Yiyiphi imeko ethwaxa abantu abaninzi?
9 Abemi bomhlaba bafikelela iwaka lesigidi ngenkulungwane ye-19. Ngoku bamalunga namawaka amahlanu ezigidi,8 iwaka lesigidi ngasinye esitsha lifikelelwa ngokukhawuleza. Nyaka ngamnye, kongezeleleka abantu abangakumbi abazizigidi ezimalunga nama-90! Ibe uninzi lolu lwando longezelela nje ukubandezeleka okukwimimandla apho ubuhlwempu, indlala nezifo sele zibhuqa khona. Ngesizathu esilungileyo oku kwanda kwabemi bomhlaba kuye kwabizwa ngokuthi kukuphuphuma kwabemi bomhlaba. IThe New York Times yagqabaza yathi: “Inokwenzeka into yokuba amacandelo amakhulu omhlaba aya kuphethulelwa ekubeni yintlango ziingcinezelo zabemi bomhlaba abangalawulekiyo nobuhlwempu ngokungathi kungembubhiso yenyukliya.”9
10 Lithetha ngomlinganiselo wendlala esehlabathini, iphephancwadi iTime lathi: “Namhlanje ingxaki yendlala yahluke gqitha kuleyo yexa elidluleyo . . . Nyaka ngamnye, ngoku kukho ukutya okuncinane gqitha kwiindawo ezininzi kakhulu zehlabathi, kangangokuba abemi bomhlaba abangama-25 ekhulwini bayalamba okanye abondleki ngokwaneleyo.”10 Omnye umthombo uqikelela ukuba nyaka ngamnye iintsana ezizizigidi ezili-11 zifa ngaphambi kokuba zigqibe unyaka ngenxa yemiphumo yokungondleki nezifo.
11 Kwale ngxelo ithi: “Ubuncinane kubantu abahlanu omnye ubambiseke kubuhlwempu obupheleleyo, imeko yokuswela ngokupheleleyo kangangokuba kukutshabalala kohlanga ngokuzolileyo.”11 Ibe oku, ngokutsho kweToronto Star, kwathethwa emva kokuba kwinkomfa yehlabathi yokutya neyaqhutyelwa eRome kwishumi leminyaka eyadlulayo “kwenziwa isithembiso sokuba, kwishumi leminyaka, kwakungayi kubakho mntwana wayeya kulala elambile, kwakungayi kubakho ntsapho yayiya kuxhalela isonka sayo sosuku olulandelayo ibe kwakungayi kubakho kamva lamntu elaliya kuthintelwa kukungondleki.”12 Hayi indlela ezangqineka zibubuxoki ngayo ezo zithembiso! Njengokuba iGuardian yaseNgilani yatshoyo, inyaniso ikukuba: “Ihlabathi lisemngciphekweni wentlekele yabantu. . . . Amazwekazi ephela abone amathemba awo ekamva esithi shwaka.”13
12. Ngaba ukuncitshiswa kwemali echithelwa emkhosini ngenene bekungayicombulula le ngxaki?
12 Undoqo wengxaki awukho emhlabeni, kodwa ukubalawuli nabantu nesimo sengqondo sabo. Ngokomzekelo, nyaka ngamnye iintlanga ngoku zichitha izigidi zeerandi ezingamawakawaka kwizixhobo ngoxa izigidi zithwaxwa yindlala. Kodwa nokuba oku kwakhiwa komkhosi omkhulu bekutyeshelwe, iinkqubo zoqoqosho lwehlabathi ezahluleleneyo bezingayi kusebenzisana kunye nasiphi na isicombululo sokwenyaniso kule ngxaki. Ngokufuthi, xa ukutya kufumaneka, ukunqwenela iingeniso ezinkulu kuthintela ukusasazwa kwako kwabo bakusweleyo. Kwiindawo ezithile, oorhulumente baye bahlawula amafama ukuba angalimi ukudla okuthile ngenxa yokuba ukuveliswa kwako ngokugqithiseleyo bekuya kuwathoba gqitha amaxabiso. Intabalala yokutya ide yatshatyalaliswa ngenxa yokuba isele.
13. Ngaba iBhayibhile yayichanile xa yaxela kwangaphambili ngeemeko ezikhoyo ekupheleni kwehlabathi?
13 Ngaloo ndlela, phezu kwako nje ukuhambela kwalo phambili ngokwenzululwazi, ibutho lanamhla alikwazanga ukuphepha iimeko iBhayibhile eyazixela kwangaphambili. Ngokuchanileyo yaxela kwangaphambili ngokubakho ‘kokunqongophala kokutya’ okuqatha ebudeni ‘bokupheliswa kwephakade.’—Mateyu 24:3, 7; ISityhilelo 6:5-8.
Ngaba Abantu Banokuba Seluxolweni Nomhlaba?
14-16. Imbi kangakanani ingxaki yongcoliso?
14 Kangangamashumi eminyaka abantu baye balwa kwanomhlaba lo bahlala kuwo. Baye babangela ukuba inkunkuma enetyhefu ifumbe emanzini, emoyeni nasemhlabeni. Umxholo ophambili weToronto Star wavakalisa oku: “Ungcoliso Lubeka Umhlaba Engozini.” Eli nqaku lathi: “ISijikelezi-langa esinguMhlaba sihlaselwa ngendlela yokusibulala. Ibe ohlaselayo ngumntu.” Lathi “iityhefu zenkqubela yakhe” ngoku zisongela ubukho bakhe, yaye lakwathi: “Izazinzulu zigqala ukonakala kwemekobume kukubi njengesisongelo semfazwe yenyukliya.”14
15 Ngokomzekelo, lithetha ngeUnited States, iphephancwadi iDiscover lithi: “Amachiza nezinyithi eziyingozi ezithwethwela emhlabeni zisongela amanzi eli lizwe agcinwe ngaphantsi. Zimbi izazi ngokuhamba kwamanzi emhlabeni zoyikela ukuba zisenokuba sezishiywe lixesha lokusindisa ikota yawo.”15 ENgilani iThe Observer yathi ukungcolisa ngamachiza kwakonakalise “uninzi lwamanzi okuselwa eNgilani.”16 Ibe iNew Scientist yachaza oku: “INtlangano Yehlabathi Yempilo ithi izifo ezinxulumene namanzi amdaka mihla le zibulala abantu abangama-50 000.”17
16 KwelaseUnited States uphando olwenziwa ligqiza lwatyhila ukuba kukho izinto ezinetyhefu ngokugqithiseleyo emoyeni. IThe New York Times yachaza oku: “Amawaka eetoni ezinto ezibangela umhlaza kwanezinye izinto ezinobungozi zikhutshelwa emoyeni ziphuma kumakhulukhulu emizi-mveliso.”18 Into eyongezelela koku ngamachiza anobungozi xa efakwe emhlabeni, ngokomzekelo, izibulali-zinambuzane nasekutyeni okondla izilwanyana.
17. Ngaba kunokwenzeka ukuba ubugcisa bunokuyicombulula le ngxaki?
17 Ngaba ubugcisa bunokusihlangula koku? Ngaba oko kunokwenzeka, ekubeni budale iingxaki ezininzi? Incwadi ethi Environmental Ethics ithi: “Ubugcisa bungumkhonzi osebenziseka ngokulinganiselweyo kuphela, nongathembekanga gqitha. Xa bucombulula ingxaki, budla ngokudala ezimbini ezintsha—ibe imiphumo yazo esecaleni kudla ngokuba nzima ukuyibona kwangaphambili.”19
18. Ekuhlangabezaneni nongcoliso, luluphi ulwazi olubalulekileyo abantu abalusweleyo, kodwa ngubani onalo?
18 Kwakhona, iBhayibhile yaxela kwangaphambili ngokuswela komntu ubulumko ekusebenziseni izinto eziyintabalala emhlabeni. Isiprofeto esikwiSityhilelo 11:18 sathetha ngexesha laxa uThixo ebengathabatha ngalo inyathelo “lokonakalisa abo bawonakalisayo umhlaba.” Abantu bayavuma ukuba ababuqondi ngokupheleleyo ubomi nemekobume entsonkothileyo yomhlaba. Kodwa uThixo uyaziqonda ezi zinto, ekubeni inguye owazidalayo. Ngaba akubobulumko ukukhangela kulo Mthombo ukuze unikele isicombululo kwezi ngxaki?
Unqabiseko Ngokususwa Kolwaphulo-mthetho
19. Luluphi uloyiko abantu abaninzi abanalo namhlanje, ibe ngoba?
19 Ungcoliso lubek’ engozini ezona zinto zibalulekileyo zobukho bomntu. Kodwa kukwanda kolwaphulo-mthetho okubangela abantu abalinani elandayo ukuba boyike. Ulwaphulo-mthetho luphanga abantu abangakumbi nangakumbi ukuziva kwabo benqabisekile kungekuphela nje kwizixeko ezikhulu kodwa kwanakwiidolophana nakwimimandla esemaphandleni. Into esengozini asizozinto nje kodwa ngokufuthi ngumzimba nobomi bomntu.
20, 21. (a) Kungani ukumiswa kwemithetho emitsha bekungayi kuluphelisa ulwaphulo-mthetho? (b) Ngaba impumelelo engakumbi okanye iinkqubo ezintsha zokulwa ulwaphulo-mthetho bezingayicombulula le ngxaki?
20 Ngaba abantu banokuluzisa unqabiseko lokwenyaniso kwezi ngozi, mhlawumbi ngokuwisa imithetho emitsha? Sele kukho amawakawaka emithetho kwiincwadi zomthetho zehlabathi. Kanti, ezi ncwadi aziluthintelanga ulwaphulo-mthetho. Kwakhona, ukonakala okunzulu kudla ngokubonakala nakumaziko aqinisekisa ngokugcinwa komthetho. Ukunganyaniseki kwiindawo eziphakamileyo kusenokuphuthisa imigudu yamagosa anyanisekileyo aqinisekisa ukugcinwa komthetho.
21 Ngaba isicombululo sikwiinkqubo ezintsha zokucupha nokuthintela ulwaphulo-mthetho? Inkqubo nganye entsha eveliswayo, izaphuli-mthetho ziyila iindlela ezintsha zokuyoyisa. Ngaba ke ukuma kakuhle komntu okuthabath’ unyawo kuza kuyicombulula le ngxaki? Bekuya kuba yimpazamo ukugqiba ngelokuba ulwaphulo-mthetho lubalasele kuphela kumaqela amkela umvuzo ophantsi. Ulwaphulo-mthetho luyanda nakubantu abasebenza kwiindawo eziphakamileyo. Ngokomzekelo, nyaka ngamnye kwelaseUnited States ubuncinane kulahleka amawaka ezigidi zeerandi ezingama-200 ngenxa yolwaphulo-mthetho olunjalo. Malunga nama-30 ekhulwini awo onke amashishini atshonayo enjenjalo ngenxa yalo. ElaseMzantsi Afrika libika ukuba ubusela babasebenzi badodobalisa amashishini ali-1 500 ngonyaka nje omnye.20
22. Bubuphi ubungqina obubonisa ukuba umgudu wabantu uwodwa nje awunakulucombulula ulwaphulo-mthetho?
22 Ulwaphulo-mthetho olwandayo alupheleliselwanga kwiintlanga nje ezimbalwa. Lukuzo zonk’ iindawo. Khawuphawule imixholo ethile ephambili evela kulo lonke ihlabathi. EBrazil: “Ulwaphulo-mthetho Olwandayo.” EKhanada: “Ulwaphulo-mthetho Lwamabhinqa Olwandayo.” ENgilani: “Ulwaphulo-mthetho Olwenziwa Ngabantwana Nolusoloko Lusanda.” EIndiya: “Ulwaphulo-mthetho Olulungelelanisiweyo Lulushishino Olwandayo.” ERashiya: “IRashiya Yothuswa Lulwaphulo-mthetho Olwandayo.”21 Iphephancwadi iMaclean’s lathi: “Ulwaphulo-mthetho olunogonyamelo eDetroit luqheleke gqitha kangangokuba kwanokubulala maxa wambi kukhankanywa nje ngokufutshane kumaphepha angasemva amaphephancwadi.”22 Ngaloo ndlela, ulwaphulo-mthetho olwandayo luyingxaki kwizizwe ngezizwe ibe imigudu yabantu iyodwa nje ayinakulucombulula. Ukuba isicombululo sabantu besisebenza, olu lwaphulo-mthetho ludl’ ixesha nomgudu bekumele ukuba lungabi saba yingxaki.
23. Ngaba oko iBhayibhile yakuxela kwangaphambili ngeemeko ezikumhla wethu kuzalisekisiwe?
23 Okwenzekayo kunjengokuba iBhayibhile yaxela kwangaphambili: “Ngemihla yokugqibela kuya kufika amaxesha anomngcipheko. Kuba abantu baya kuba ngabazithandayo, . . . abangenakuzeyisa, izibhoja, abangenakuthanda kulunga, . . . abathandi beziyolo kunokuba bathande uThixo.” (2 Timoti 3:1-4) UYesu wakwaxela kwangaphambili ukuba ‘ukwanda kokuchas’ umthetho’ kwakuya kubalasela ngethuba elingaphambi nje kokuba uBukumkani bukaThixo benze lo mhlaba ube yindawo yokumiwa ‘ngabantu abalulamileyo’ kuphela. Oko ‘kwanda kokuchas’ umthetho’ kuyinto yokwenene kumhla wethu.—Mateyu 24:12; 5:5; INdumiso 37:29.
Ezona Ngxaki Zinkulu Kuzo Zonke
24. Nokuba abantu banokuzicombulula zonke iingxaki ezixutyushiweyo ukuza kuthi ga apha, ziziphi iintshaba ezinkulu ngakumbi ebeziya kusala?
24 Masithi abantu bebenokukwazi ukucombulula iingxaki zemfazwe, zobuhlwempu, zendlala, zongcoliso nezolwaphulo-mthetho. Ngaba oku bekungakuzisela uxolo nonqabiseko olupheleleyo? Hayi, bekungakho into esasilelayo. Ukugula nokufa bekusaza kusala kuziintshaba ezingenakoyiswa. Okunene, ukukhululeka kwezinye iingxaki bekungathetha ntoni xa ubukele othandekayo egula aze afe, okanye ubone owakho umzimba uhlaselwa sisigulo esibulalayo?
25, 26. Liliphi ithemba abaphengululi bezamayeza abanalo lokoyisa izifo?
25 Ngoxa kuye kwenziwa uhambelo-phambili kwezamayeza, ngaba oku kusizisele inkululeko ekuguleni nasekufeni? Igosa lezamayeza liphendula ngokuthi: “Izifo ezisulelayo azoyiswanga. Zisengunobangela ophambili ehlabathini wokufa ibe, apha [eUnited States], bezingunobangela ophambili wokugula.”23 KwelaseAfrika ingxelo ithi isifo sixhaphake gqitha kangangokuba “kubantwana abali-1 000 abathi bazalwe abamalunga nama-500 baza kufa ngaphambi kobudala beminyaka emi-5.”24 Ukutyhubela ihlabathi amakhulu ezigidi achatshazelwa sisifo seengcongconi, sisifo sobuthongo, yikholera, liqhenqa kwanezinye izifo. Kumazwe athile ahambele phambili, izifo zentliziyo zibulala abantu abamalunga nesiqingatha kubo bonke abafayo, ibe umhlaza ubulala umntu omnye kwabahlanu. Yaye iThe Lancet, ulindixesha wezamayeza waseBritani, uthi: “Ukutyhubela ihlabathi kukho abantu abanokuba ngama-250 ezigidi abaqalayo ukuba nedropsi nabangama-50 ezigidi abaqalayo ukuba negcushuwa nyaka ngamnye. Kukho nezinye izifo ezasuleleka komnye umntu ngesini ezisenokuba zixhaphake nangakumbi.”25
26 Isazinzulu sathi ukuba unyango lomhlaza luyafumaneka, isifo sentliziyo nesifo sezintso, ezinye izigulo beziya kuba ngababulali abakhulu. Sathi: “Kuyathandabuzeka ukuba siya kubandisa ubude bobomi okanye sirhoxise ukwaluphala kwikamva elingekude.”26 Ibe oogqirha kwelaseRashiya bathi: “Phezu kwako nje konke ukuphumelela koogqirha, kwimbali ebhaliweyo ubude bobomi bomntu buye bahlala bungaguqukanga.”27
27. (a) Ngawaphi amagqabaza aseBhayibhileni angobude bobomi babantu ayinyaniso namhlanje? (b) Sinokusifunda phi isizathu sokuba ubomi babantu bube bufutshane kangaka buze buzaliswe ziingxaki?
27 Hayi indlela aqhubeka eyinyaniso ngayo namhlanje amazwi eBhayibhile akuYobhi 14:1, 2: “Umntu, into ezelwe ngumfazi, imihla yakhe mifutshane, izele ziinkathazo. Uphuma njengentyatyambo, abune; ubaleka njengethunzi, angemi.” IBhayibhile ikwabonisa isizathu soku, ibe ichaza unobangela wazo zonke iingxaki zomntu, njengoko siza kubona kamva.
Uza Kuthembela Enini?
28-30. Ukuze kuconjululwe iingxaki ezijongene noluntu, kutheni kusengqiqweni ngakumbi ukukholosa ngesicombululo sikaThixo kunokukholosa ngesomntu?
28 Enyanisweni, ngaba kusengqiqweni ukukholosa ngabantu ukuze bacombulule iingxaki ezijongene noluntu? Okanye ngaba kusengqiqweni ngakumbi ukukholosa ngesicombululo iBhayibhile esibonisayo, esisesi, isenzo sikaThixo ngorhulumente wobulungisa wasezulwini?
29 Kude kudala umdumisi ophefumlelweyo wabhala la mazwi: “Musani ukukholosa ngamanene, ngonyana womntu, yena ungenalo usindiso. Uyaphuma umoya wakhe, abuyele yena emhlabeni wakhe; ngaloo mini ayatshitsha amabhongo akhe. Hayi, uyolo lwalowo uluncedo lunguThixo kaYakobi, lwalowo ulinde kuYehova uThixo wakhe: kuMenzi wezulu nomhlaba.”—INdumiso 146:3-6.
30 Ungaze ulibale ukuba kungakhathaliseki ukuba abantu banyaniseke kangakanani na okanye zisenokuba nempembelelo okanye namandla angakanani na iinkokeli zehlabathi, zonke zizizidalwa ezifayo. Ekubeni zingakwazi ukuzisindisa, zinokubasindisa njani ke abanye? Azinakukwazi. NguThixo kuphela onokwenza oko, ngorhulumente wakhe obuBukumkani.
[Umfanekiso okwiphepha 13]
Ukutyhubela imbali abantu ngenxa yokumfameka bebekhubeka kwiintlekele ngeentlekele—imfazwe, ulwaphulo-mthetho olwandayo, ungcoliso, ubuhlwempu kwanezinye ezininzi. Kunjengoko iBhayibhile ngokunyanisileyo isithi: “Akukhona endodeni ehambayo ukuqinisela ukunyathela kwayo”
[Umfanekiso okwiphepha 21]
“Musani ukukholosa . . . ngonyana womntu, yena ungenalo usindiso”