Isisongelo Senyukliya—Sisuswe Ngokupheleleyo!
UTHIXO akafuni uluntu luphile ubomi bentshontsho. ‘NjengoThixo owonwabileyo,’ ufuna ukuba banandiphe uxolo baze baphile benqabisekile—ngamafutshane, bonwabe. (1 Timoti 1:11) Kwihlabathi elizaliswe zizisongelo zenyukliya, ngokucacileyo oku akunakwenzeka.
“Uxolo Nonqabiseko”—Ubuxoki
Ifanele ukuba icacile into yokuba isisongelo senyukliya asikapheli. Sekunjalo, phezu kwazo nje izixholo-xholo zobupolitika, iingxaki zoqoqosho, kunye nezemicimbi yasentlalweni, izizwe ngokubanzi zibonakala zinethemba. Ukususela ngowe-1986, uNyaka Woxolo Wezizwe Ngezizwe Wezizwe Ezimanyeneyo bekubonakala kukho umzamo othe ngcembe wokuphelisa le ngozi.
IThe Bulletin of the Atomic Scientists iye kwiminyaka elishumi edluleyo yayitshintsha iwotshi yayo yemini yentshabalalo—eyinkqubo yayo yokubonakalisa amathuba okubakho kwemfazwe yenyukliya—ukususela kwimizuzu emi-3 ngaphambi kwasezinzulwini zobusuku ukusa kwimizuzu eli-17 ngaphambi kwasezinzulwini zobusuku. Ngowe-1989 kwiStockholm International Peace Research Institute kwathiwa “kukho ithemba elikhulu lokuba iingxaki ziya kuconjululwa ngokuseluxolweni kunawo nangawuphi na unyaka ukususela ekupheleni kweMfazwe Yehlabathi II.”
Kwiminyaka yakutshanje iZizwe Ezimanyeneyo ziye zomelezwa ukuze zihlangabezane nemimandla enezidubedube ehlabathini lonke. Ukuphumelela kwazo, nangona zingekaphumeleli ngokupheleleyo, kwanele ukubangela ithemba kuwonke wonke. Ngokunokwenzeka kwixesha elizayo kuza kubakho ezinye izinto ezibonisa impumelelo engakumbi. Izibhengezo ‘zoxolo nonqabiseko’ ziya kwanda ngakumbi nangakumbi. Zisenokude zikholeleke.
Kodwa lumka! IBhayibhile ilumkisa isithi: “Kuba xenikweni baya kuthi, Luxolo nokunqaba, oko baya kufikelwa yintshabalaliso ngebhaqo, kwanjengenimba komithiyo; baye bengayi kukha basinde.” Ngaloo ndlela, izibhengezo ‘zoxolo nokunqaba’ ziya kuba ngumqondiso wexesha likaThixo “lokonakalisa abo [bathi ngongcoliso, lwenyukliya nangezinye izinto] bawonakalisayo umhlaba.”—1 Tesalonika 5:3, 4; ISityhilelo 11:18.
Phawula ukuba iBhayibhile ayithi izizwe ziya kulufikelela “uxolo nokunqaba.” Kubonakala ukuba ziya kuba zithetha ngalo ngendlela ekhethekileyo, zivakalisa ukuba nethemba nolweyiseko ezingazange zibe nalo ngaphambili. Amathuba okufikelela uxolo nonqabiseko aya kubonakala ekufuphi kunanini na ngaphambili. Phezu kwaso nje isisongelo esiqhubekayo senyukliya, iintlanga ziya kukhohliselwa kunqabiseko lobuxoki.
Noko ke, amaKristu okwenyaniso akayi kukhohliswa. Enolangazelelo olungamandla aya kukhangela ngaphaya koxolo nonqabiseko oluza kuziswa ngumntu kwinto elunge ngakumbi!
Uxolo Nonqabiseko—Into Yokwenene
Ngokutsho kweNdumiso 4:8, uxolo nonqabiseko lokwenyaniso luya kufumaneka kuphela ngelungiselelo likaYehova uThixo: “Ndiya kulala phantsi, ndilale ubuthongo kwangoku, ndixolile, ngokuba wena, Yehova, undihlalisa ndikholosile, noko ndindedwa.” Nasiphi na isibhengezo ‘soxolo nokunqaba’ esivakaliswa ngaphandle kwelungiselelo loBukumkani bukaYehova sibubuxoki. Akukho nto sinokuyifikelela ehlala ihleli.
UBukumkani bukaThixo phantsi kukaKristu abenzi zinto zingaphelelanga. Urhulumente kaThixo uya kwenza okungakumbi kunokunciphisa nje kuphela izixhobo zenyukliya; kodwa uya kuzitshabalalisa ngokupheleleyo nezinye izixhobo zemfazwe. INdumiso 46:9 iyathembisa: “Ulophelisa iimfazwe kude kuse eziphelweni zehlabathi; waphula isaphetha, angqumze umkhonto, atshise iinqwelo zokulwa ngomlilo.”
Ngokufanayo, izisongelo zenyukliya ezibangelwa zizixhobo zokuvelisa amandla enyukliya ezingasebenzi kakuhle okanye yinkunkuma enemitha yeathom ziya kuba yinto yexesha elidluleyo. Kungenjalo la mazwi ebeya kuba bubuxoki: “Baya kuhlala elowo phantsi komdiliya wakhe, naphantsi komkhiwane wakhe, kungabikho uboyikisayo; kuba umlomo kaYehova wemikhosi uthethile.” UThixo akanakuxoka. Asinasizathu sokuwathandabuza amazwi akhe.—Mika 4:4; Tito 1:2.
Ngaba ungathanda ukuba nethemba lokuphila kwihlabathi elingenasisongelo senyukliya ngonaphakade? Unako, kuba iLizwi likaThixo likwenza kucace oko kufunekayo. Ngokufunda ngako nangokuphila ngokuvisisana nako, ngamhla uthile uya kuba novuyo lokuthi ukhululekile: “Isisongelo senyukliya—siphelile ekugqibeleni!”
[Umfanekiso okwiphepha 7]
Kuya kulawula uxolo kwihlabathi likaThixo elitsha kungekho zisongelo zenyukliya
[Inkcazelo]
M. Thonig/H. Armstrong Roberts
[Inkcazelo Ngomfanekiso okwiphepha 6]
U.S. National Archives photo