Isahluko 3
Ngaba Unqulo Lwehlabathi Lukhokela Kakuhle?
1. Yiyiphi imibuzo ebalulekileyo engonqulo lwehlabathi ephakanyiswayo apha?
“UNQULO luye lwaba yenye yeempembelelo ezizezona zinamandla embalini,”28 yatsho njalo iThe World Book Encyclopedia. Kodwa ngaba unqulo lwehlabathi beluyimpembelelo yokwenyaniso yoxolo nonqabiseko? Ngaba lufundise abalandeli balo ukuba uthando lobuzalwana lumele loyise imiqobo yobuhlanga nokungavisisani okubangelwa bubuzwe? Kwakhona, ngaba iicawa zeNgqobhoko, ezamaKatolika, ezamaProtestanti nezobuOrthodox zilingqina liyinyaniso ibango lazo lokulandela uYesu Kristu ‘njengoMthetheli Woxolo’? Okanye ngaba eneneni zifake isandla kwintiyo ebek’ engozini ikamva lomntu? Ukukhangela kwingxelo kuza kunikela impendulo eyothusayo.
2. Isixelela ntoni imithombo eyahlukahlukeneyo ngengxelo yembali?
2 Ngokubhekisele koku, iParade Magazine yathi: “Imbali ifundisa izifundo kwabo bakuvumayo ukufunda. Esinye sezona zifundo ziphambili sesokuba iimfazwe ezisekelwe kukungavisisani okungokonqulo nokungokwamahlelo ngalo lonke ixesha ziphantse zibe yeyona nto inenkohlakalo, eyona nto ihlala ihleli neyona nto kunzima gqitha ukuyicombulula.”29 Ibe kunjengoko iChicago Tribune yathi: “Lonke unqulo oluphambili lushumayela uxolo nobuzalwana nenceba, kanti ezona ngcinezelo zikhohlakeleyo nezona zingenakunyamezeleka embalini ziye zenziwa egameni likaThixo.”30 Ecinga ngezibakala ezingokwembali ngolo hlobo, umhleli wephephandaba uC. L. Sulzberger ngokufanelekileyo wabuza oku: “Nangona usenokungavunywa lo mbandela, ngaba akufanele kuqondwe ukuba ukongezelela kwabanye oonobangela—inkqubo yamathanga, ubuhlanga, nemfazwe—unqulo luye lwaba sisisongelo esikhula ngokuthe ngcembe kubomi babantu?”31
3. Luluphi uqheliselo lonqulo oluziintloni imbali yenkulungwane yethu yama-20 elutyhilayo?
3 Ewe, imbali inkone ligazi elaphalazwa yimbambano exhaswa lunqulo. Kwinkulungwane nje yethu, ebudeni beemfazwe ezimbini zehlabathi nasemva kwazo, siye sabona uqheliselo oluziintloni lwabantu bonqulo bebulalana—amaKatolika ebulala amaKatolika, amaProtestanti ebulala amaProtestanti, amaSilamsi ebulala amaSilamsi, kwanabanye. Ibe abefundisi kumacala achaseneyo, nangona bengabonqulo olunye, babesikelela imikhosi eyayiya kuthi kungekudala ibulale abazalwana babo bonqulo.
4. (a) Kutheni le nto iicawa zeNgqobhoko izezona zibekek’ ityala nje? (b) Athini amagqabaza omnye umhleli ngemfazwe?
4 Phakathi kwabona bantu babekek’ ityala kulo mcimbi ziicawa zeNgqobhoko. Kutheni? Kungenxa yokuba zithi zimela uThixo weBhayibhile noNyana wakhe uYesu Kristu, yena owathi: “Ngayo le nto baya kwazi bonke, ukuba ningabafundi bam, ukuba nithe nathandana.” (Yohane 13:35) Kanti okona kubulalana kukhulu kuko konke kwenzeke kanye phakathi kwiNgqobhoko. Kunjengokuba inqaku lomhleli kwiWaterloo Courier yaseIowa lavakalisa oku: “AmaKristu akazange azive ebuhlungu nakancinane ngokulwa iimfazwe kwamanye amaKristu. Ukuba ayevakalelwe njalo, uninzi lwezona mfazwe zimbi eYurophu ngezazingazange zabakho. . . . IMfazwe Yehlabathi I neyesi-II, ezabalasela gqitha ngokubulala kwamaKristu amanye amaKristu, ngezazingazanga zabakho.”32
5. (a) Ibaxelela ntoni iBhayibhile ngokucacileyo abo bamkhonza ngokwenyaniso uThixo? (b) Nguwuphi umbuzo amalungu ecawa amele ajongane nawo ngokubhekisele kwicawa yawo?
5 Kulo mcimbi, iBhayibhile icacile: Abo bamkhonza ngokwenyaniso uThixo baxelelwa ukuba ‘bafune uxolo, baluphuthume,’ nokuba ‘bakhande amakrele abo abe ngamakhuba,’ yaye ‘bangaphindi bafunde imfazwe.’ (1 Petros 3:11; Isaya 2:2-4) “Sithandane; singabi njengoKayin, obengowongendawo [uSathana uMtyholi], wambulala umninawa wakhe.” (1 Yohane 3:10-12) Kodwa abalandeli bolu nqulo lwehlabathi baqhubeka bebabulala abazalwana babo, njengoko wathi wenjenjalo uKayin, ibe abefundisi babo baye babaxhasa abo bafuna elo khondo. Ngaloo ndlela, ukuba ungowonqulo, khawuzibuze oku: ‘Ukuba wonk’ umntu emhlabeni ebekunqulo endikulo, ngaba iimfazwe ngezithintelwe ibe ngaba lo mhlaba ngoku ubungaba yindawo yoxolo lokwenyaniso?’
6. Imeko eyahluleleneyo nenemfazwe yonqulo lwehlabathi ingqina ntoni?
6 Imeko yokwahlukahlukana neyomlo yonqulo lwehlabathi ingqina ukuba uThixo akaluxhasi. Oku kunokubonakala kungumnqa kwabo bacinga ukuba lonke unqulo lumele lube lolulungileyo njengoko lusithi lumela uThixo. Kanti iBhayibhile ngokucacileyo ibonisa ukuba “uThixo akangowesiphithiphithi, ngowoxolo.” (1 Korinte 14:33) Kwakhona ibonisa ukuba kukho unqulo lokwenyaniso nonqulo lobuxoki. Ibe ithi unqulo oluxhaswa nguThixo lolusekelwe enyanisweni kuphela nolungenaluhanahaniso.—Mateyu 15:7-9; Yohane 4:23, 24; Tito 1:16.
7. (a) Liliphi igama elisetyenziswa yiBhayibhile ukuchaza unqulo lwehlabathi? (b) Liliphi ityala olumangalelwa ngalo?
7 Ngenxa yokuba unqulo lwehlabathi, ngokungathi kunjalo, luye lwahenyuza nezobupolitika, ezorhwebo nezentlalo, iBhayibhile ilufanisa njengolulihenyukazi. Ichaza eli “henyukazi,” ithi: “Kuwo kwafunyanwa igazi . . . nelabo bonke abasikiweyo emhlabeni.” (ISityhilelo 17:1-6; 18:24) Ewe, olu nqulo lwehlabathi lunetyala elikhulu legazi ngenxa yako konke ukubulawa kwabantu kwimbali yehlabathi! Ngenxa yoku luya kuziphendulela.
8. Amazwi kaYesu ‘angabakhokeli abaziimfama’ asebenza njani namhlanje?
8 Ngokucacileyo, naluphi na unqulo olunoqheliselo oluchaseneyo neBhayibhile alunakuze luphumelele ekukhokeleni uluntu ukusa kuxolo nakunqabiseko lokwenyaniso. Kungeso sizathu le nto uYesu wathetha oku ngeenkokeli zonqulo lobuxoki zomhla wakhe: “Ngabakhokeli beemfama abakwaziimfama; ke kaloku, xa sukuba imfama ikhokela imfama, zombini ziya kweyela emhadini.” (Mateyu 15:14) Ngokufanayo, unqulo lwehlabathi namhlanje ‘lungabakhokeli abaziimfama’ kumcimbi wemfazwe nakwezinye iinkalo ezibalulekileyo zobomi.
Ngaba Unqulo Lwehlabathi Lukhuthaza Ukuziphatha Okuhle?
9, 10. (a) Kutheni le nto ukubambelela kwimilinganiselo yokwenyaniso yokuziphatha okuhle kubalulekile nje ekufumanekeni koxolo nonqabiseko? (b) Njengoko kufundiswa eBhayibhileni, yintoni efak’ isandla ekuziphatheni okuhle okunjalo?
9 Ngaba nabani na unokulunandipha uxolo lokwenyaniso nabamelwane bakhe okanye unqabiseko lokwenene ukuba akulondolozwa imilinganiselo yokuziphatha okuhle? Xa imilinganiselo enjalo ingekho, kuxhaphaka ukuxoka, ukuba, ukukrexeza kwanoqheliselo olufana nolo. Kwelinye icala, uthando lokwenyaniso lommelwane lumele lukhuthaze ukuziphatha okuhle.
10 IBhayibhile ivakalisa imbono kaThixo ngokuziphatha okuhle ngale ndlela: “Omthandayo omnye uzalise umthetho. Kuba oku kuthi, Uze ungakrexezi, uze ungabulali, uze ungebi, uze ungangqini buxoki, uze ungakhanuki, nokuba kukho wumbi umthetho, uhlanganiselwe kweli lizwi lokuthi, Uze umthande ummelwane wakho ngoko uzithanda ngako. Uthando alusebenzi bubi kuye ummelwane.”—Roma 13:8-10.
11, 12. (a) Ngaba umntu ongabambeleliyo kwimilinganiselo yokuziphatha okuhle angalindela ukunandipha uxolo noThixo? (b) Ngubani ngokufanelekileyo omisela loo milinganiselo?
11 Noko ke, naku okubaluleke ngaphezu koku, ngaba ukholelwa ukuba umntu unokuba seluxolweni noThixo, aqinisekiswe ngenkoliseko nangenkuselo Yakhe, ukuba akayiqheliseli imilinganiselo kaThixo yokuziphatha okuhle? Ngaba unokude umhlonele uThixo obengekufuni ukuziphatha okuhle okulolo hlobo kwabo bathi bayamkhonza?
12 Ukuze uThixo afune kubanjelelwe kwimilinganiselo yakhe, bekuya kufuneka ecacisile ukuba iyintoni na loo milinganiselo. Oko ukwenzile kwiLizwi lakhe, iBhayibhile. (2 Timoti 3:16, 17) Ukuthi umntu ngamnye makazenzele eyakhe imilinganiselo yokuziphatha okuhle aze aphile ngayo akukho ngqiqweni njengokuthi mntu ngamnye makazenzele eyakhe imithetho yezihamba-ndlela aze ahambe ngayo. Uyazi ukuba ubungayintoni na umphumo. Ngokusengqiqweni iBhayibhile ibonisa ukuba inye kuphela indlela ebangela umntu abe ngokholisekileyo kuThixo. Njengoko uYesu watshoyo, zonke ezinye iindlela zikhokelela kwintshabalalo kuphela.—Mateyu 7:13, 14; Luka 13:24.
13-15. (a) Yiyiphi imibuzo engokuziphatha okuhle ekufuneka ibuziwe ngokubhekisele kumalungu ecawa kabani? (b) IBhayibhile ithi kumele kwenziwe ntoni ngelungu lebandla elizingisa ekwaphuleni imithetho kaThixo? (c) Ngaba oku kuyenziwa ezicaweni?
13 Ngaba iicawa zeNgqobhoko, ziyixhasa ngokukhethekileyo imilinganiselo kaThixo yokuziphatha okuhle zize ke zikhokele kwihlabathi lonke? Bubonisa ntoni ububi babaninzi abahamba ezo cawa? Ngaba ungumhambi-cawa? Ngoko khawuzibuze oku: ‘Ukuba nabani na emhlabeni ebephila njengamalungu onqulo endikulo, ngaba oko bekuya kuphelisa ulwaphulo-mthetho, uqheliselo lokunganyaniseki kumashishini, imbambano nokuziphatha okubi ngokwesini?’
14 IBhayibhile ilumkisa ngelokuba “igwele elincinane liyayibilisa intlama iphela” yaye ithi “incoko embi yonakalisa izimilo ezilungileyo.” (Galati 5:9; 1 Korinte 15:33) Ngenxa yesi sizathu ikwayala amaKristu isithi “maningazidibanisi nosukuba enegama lokuba ngumzalwana, ukanti wenza umbulo, nokuba ulibawa, nokuba ungumkhonzi wezithixo, nokuba ungumtshabhisi, nokuba ulinxila, nokuba ungumphangi; ningakhe nidle nokudla nonjalo. . . . Ize nimnyothule kuni nina lowo ungendawo.”—1 Korinte 5:11-13.
15 Kuyinyaniso ukuba umntu usenokuqutyulwa sisiphoso aze ke aguquke. Kodwa kuthekani ngabo baziqheliselayo izinto ezinjalo? Ukuba aba bantu bathi bakhonza uThixo, bangabahanahanisi. Ngokuqinisekileyo ukuthiyile ukuhanahanisa, ibe iBhayibhile ibonisa ukuba uThixo naye ukuthiyile nabo bakuqheliselayo. (Mateyu 23:27, 28; Roma 12:9) Ngoko, kuthekani ngonqulo okulo? Ngaba luyawulandela umyalelo weBhayibhile ‘wokunyothula’ abo bazingisayo ekwaphuleni imithetho kaThixo kwanabo bangaguquki ngokwenene? Okanye ngaba luyabavumela abantu abanjalo ukuba bahlale bengamalungu akwimeko entle, ngaloo ndlela ebangel’ ubungozi kwabanye? Ngaba lunikela inkonzo nje yomlomo ekuziphatheni okuhle ngoxa ngokwenene lukholana nesenzo esiphosakeleyo, okanye lude lusibethe ngoyaba?—Mateyu 15:7, 8.
16. (a) Bathini abefundisi abaninzi ngokuziphatha ngokwesini? (b) Ithini iBhayibhile ngehambo enjalo?
16 Abefundisi abaninzi ngakumbi bathi uhenyuzo, ukukrexeza nobufanasini ezi zinto aziphosakele ngokuyimfuneko. Kodwa abavisisani nendlela uThixo acinga ngayo. ILizwi lakhe ngokucacileyo lithi: “Musani ukulahlekiswa; abenza umbulo, nabakhonzi bezithixo, nabakrexezi, nezifebe, namadoda alalanayo, namasela, namabawa, namanxila, nabatshabhisi, nabaphangi, abayi kubudla ilifa ubukumkani bukaThixo.”—1 Korinte 6:9, 10.
Imiphumo Yokuchasa ILizwi LikaThixo
17-19. (a) Umpostile uPawulos wayijonga njani iBhayibhile? (b) Abefundisi abaninzi namhlanje bayijonga njani iBhayibhile?
17 Isizathu esisiseko esibangela ukuba unqulo lwehlabathi lube kwimeko eyahluleleneyo nenesiphithiphithi ngolo hlobo sesokuba lutyeshela imithetho kaThixo njengoko ifumaneka kwiLizwi lakhe, iBhayibhile. Eneneni, abefundisi abaninzi bayichasile iBhayibhile njengeLizwi eliphefumlelwe nguThixo. Kanti, umpostile uPawulos ophefumlelweyo wavakalisa oku: “Sonke isibhalo, siphefumlelwe nguThixo.” (2 Timoti 3:16) UPawulos wakwasibongoza ukuba samkele iBhayibhile ‘kungekhona njengelizwi labantu; silamkele njengokuba kunjalo okwenyaniso, lililizwi likaThixo.’ (1 Tesalonika 2:13) Ngokuqinisekileyo uYehova uThixo, uMdali onguSomandla wendalo iphela ekhwankqisayo, wayenokuyila incwadi aze aqinisekise ukuba ibulondolozile ubunyulu bayo kwiinkulungwane ezidluleyo!
18 Kanti, iNew Catholic Encyclopedia ithi: “Amagqabaza amaninzi angokweBhayibhile akayonyaniso nje kwaphela xa ehlolisiswa ngokolwazi lwanamhla lwenzululwazi nembali.”39 Ebhala kwiU.S. Catholic, umfundisi wathi ukudalwa komhlaba akunakwenzeka ukuba kwaqhubeka ngendlela ekuchazwe ngayo kwiGenesis. Ibe ethetha ngengxelo yayo yokudalwa komntu, wathi: “Isizwe sabantu asizange siqale ngaloo ndlela.”40 Ubhishophu wase-Episcopal wathi: “IBhayibhile ineempazamo, inamazwi angachananga nabangel’ impikiswano. Ngoko ke kuyaqondakala ukuba kutheni le nto iicawa ezinkulu zobuKristu zingayijongi iBhayibhile njengento engenampazamo.”41 ENgilani, ubhishophu waseTshetshi wabhekisela kuvuko lukaKristu “njengokwenza umlingo ngamathambo.”42
19 Ngaloo ndlela, abefundisi abaninzi bayijongela phantsi iBhayibhile okanye ababafundisi abalandeli babo ukuba bayihlonele baze balandele imithetho kaThixo ekuyo. Eso sisizathu esiphambili sokungaziwa kweLizwi likaThixo ngendlela ekhwankqisayo kuyo yonke iNgqobhoko. Umgqabazi wezonqulo uM. J. McManus wabhala oku ngabahambi-cawa: “Imbalwa imikhwa yonqulo esongela ngokulusingela phantsi gqitha unqulo olulungelelanisiweyo kule minyaka yee-1980 njengoko kusenjenjalo ukungabikho kolwazi lweBhayibhile.” Wathi “iBhayibhile isala iyincwadi engafundwayo nengaqhelekanga” kubahambi-cawa abaninzi.43
20, 21. Ibe yintoni imiphumo yokuchasa iimfundiso zeBhayibhile?
20 Ibe yintoni imiphumo yako konke oku? Ngaba unqulo lwehlabathi lubonakalise ukuba lunokuzisingela phantsi iimfundiso zeBhayibhile luze sekunjalo luvelise uxolo okanye ukuziphatha okuhle kubalandeli balo? Ngokwahlukileyo koko, iimeko ziya zisiba mbi zwenibanzi. Amazwe aneenkonzo ezingezizo ezamaKristu ngendlela eyandayo aye aba yindawo yeziphithiphithi, ukwahlulelana, ukonakala ngokobupolitika nokuziphatha okuhle okudodobalayo. Kodwa iNgqobhoko ngokungakumbi yiyo ekudala intlithwa ngamandla lulwaphulo-mthetho, kukuziphatha okubi, kukukhotyokiswa ziziyobisi, ziimbambano zobuzwe nemfazwe. Kwenzeke kanye njengokuba ilizwi likaThixo elinokuthenjwa laxela kwangaphambili lathi: “Ziyalicekisa ilizwi likaYehova; zinobulumko bukabani na ke?”—Yeremiya 8:9.
21 Ubungqina abunakukhanyelwa. Bubonisa ukuba olu nqulo lwehlabathi aluyompembelelo yokwenyaniso yokufumaneka koxolo nonqabiseko. Ibe lushiye abalandeli balo bengalazi ithemba lokwenyaniso—uBukumkani bukaThixo. Ngoko, kubonisa ntoni oku xa kukonke?
Isiphelo Sonqulo Lwehlabathi Sisondele
22, 23. IBhayibhile ithi yintoni eya kwehlela olu nqulo lobuxoki lwehlabathi?
22 UYesu Kristu wathi: “Zonke izityalo ezingatyalwanga nguBawo wasemazulwini ziya kuncothulwa.” (Mateyu 15:13) Isiqhamo esibi esiveliswe lolu nqulo lwehlabathi singqina ukuba alutyalwanga nguThixo. Ngaloo ndlela, iBhayibhile ixela kwangaphambili ngentshabalaliso ezayo yazo zonke iinkqubo zobuxoki zonqulo.
23 Echaza ngezi nkqubo zonqulo eziphantsi komfuziselo ‘weBhabhiloni Enkulu’ enjengehenyukazi, uThixo uthetha okulandelayo ngobukhosi behlabathi liphela bonqulo lobuxoki: “Izono zayo ziye zafikelela emazulwini, nezinto zayo zokungalungisi uzikhumbule uThixo. . . . ziya kufika ngamini-nye izibetho zayo, ukufa, nesijwili, nendlala. Iya kutsha ngumlilo, ngokuba ligorha iNkosi uThixo, lowo uyigwebayo.”—ISityhilelo 18:2, 5-8.
24. Iya kufika njani intshabalaliso enjalo, ibe iphuma kuwuphi umthombo?
24 Phawula ukuba le ntshabalaliso iza kufika ngequbuliso elimangalisayo, ngokungathi ‘kungaxa linye.’ Ngommangaliso nomothuko kubantu abaninzi, unqulo lobuxoki luya kupheliswa, lutshatyalaliswe, kwaziintlanga zobupolitika ebekudala luhenyuza nazo.—ISityhilelo 18:10-17, 21; 17:12, 16.
25. (a) KwiSityhilelo 18:4, abantu abanqwenela ukuba ngabakholisekileyo kuThixo babongozwa ukwenza ntoni? (b) Yintoni emele ishukumise ubani ukuthabatha inyathelo elinjalo?
25 Ngoko ke uThixo uhlaba eli khwelo: “Phumani kuyo, bantu bam, ukuze ningadlelani nayo ngezono zayo, nokuze ningamkeliswa kwizibetho zayo.” (ISityhilelo 18:4) Ukuthabatha amanyathelo anjalo kuthetha ukuba ubani ujonga unqulo lobuxoki njengoko uThixo elujonga. Kuthetha ukuba ubani uyalucekisa ngenxa yeziqhamo zalo ezibolileyo, ukuhanahanisa kwalo, neenkolo zalo. Unqulo lobuxoki lufanele lucekiswe ngenxa yendlela olummele kakubi ngayo uThixo phambi koluntu nangendlela oluye lwafak’ isandla ngayo ekubandezelekeni nakwingcinezelo yabantu. (Roma 2:24; Yeremiya 23:21, 22) Ukuba uyakuqonda oku, uya kuyeka ukuxhasa unqulo olunjalo, ngaloo ndlela ubonakalisa inkxaso yakho epheleleyo ngokulugweba kukaThixo.
26. (a) Ukongezelela, umntu umele afumane ntoni ukuba uza kunandipha uxolo nenkuselo kaThixo? (b) Ubani umele akhangele abantu abaluhlobo luni xa efuna ukufumana abo baqhelisela unqulo lokwenyaniso?
26 Noko ke, akwanele nje ukurhoxa. Umele uzingele uze ulufumane unqulo lokwenyaniso nolungahanahanisiyo oluya kukuzisela uxolo nenkuselo kaThixo xa kufika intshabalalo eyaxelwa kwangaphambili. Abo bakunqulo lokwenyaniso olunjalo kumele ibe ngabantu abasele ‘bewakhandile amakrele abo aba ngamakhuba, nabangaphindi bafunde ukulwa.’ (Isaya 2:4) Bamele babe ngabantu abalikholelwayo iLizwi likaThixo baze baphile ngalo, belivumela libe yimpembelelo ebakhokelayo kubomi babo. (INdumiso 119:105) Bamele babonakalise uthando lokwenyaniso nolungahanahanisiyo ngomntu onguwabo. (Yohane 13:35; Roma 13:8) Ngaba lukho naluphi na unqulo olunjalo namhlanje? Izigidi zilufumene kumaNgqina kaYehova. Aziwa kwihlabathi lonke ngokunamathela kwawo kwimithetho kaThixo njengoko ifumaneka kwiBhayibhile. Ibe uxolo nonqabiseko alunandipha kwanangoku luthethelela ubunyaniso namandla eLizwi likaThixo.
27. Yintoni oya kuzibonela ngokwakho ngokuya kwiintlanganiso zamaNgqina kaYehova kwiHolo yawo yoBukumkani?
27 AmaNgqina kaYehova ayixhalabele kunene imeko enobungozi eziswe lunqulo lobuxoki ebantwini. Ngokunyanisekileyo azabalazela ukulibeka kwindawo yokuqala iLizwi likaThixo kubomi bawo. Uyamenywa ukuba ubukele iintlanganiso zawo kwiHolo yawo yoBukumkani yasekuhlaleni uze uziphandele ngokwakho ngomlinganiselo awubonakalisa ngawo umoya kaThixo nokunandipha uxolo nonqabiseko oluziswa nguwo. Kwakhona uya kubona indlela akufunda ngayo nakusebenzisa ngayo okufunwa nguThixo kwabo baza kusinda kwintshabalaliso ezayo baze baphile kuLungelelwaniso Olutsha lobulungisa phantsi kolawulo loBukumkani bakhe basezulwini.
[Ibhokisi ekwiphepha 29]
Abefundisi abaninzi ngakumbi bamkela okugwetywa yiBhayibhile njengokuziphatha okubi ngokwesini, njengoko imizekelo yemixholo ephambili yamaphephandaba neengxelo zeendaba zibonisa:
“Xa Okubi Kusiba Kokulungileyo Umfundisi Uza Kusixelela.” “[ICawa yaseTshetshi] ngoku ilahla umfanekiso wayo omdala nongokwegunya. Isini ngaphambi komtshato, neqabane elinye okanye nangakumbi, . . . ukususela ngoku ukubhekisa phambili ziza kugqalwa zamkelekile ngokokuziphatha.”—Alberta Report.33
“Abefundisi Abathethi Nto Ngesini Sangaphambi Komtshato.” “Abefundisi baseMerika ngendlel’ esisono baye bathula ekushumayeleni ngesini sangaphambi komtshato . . . Boyikela ukuba baza kuphulukana namarhamente abo athile. UIsaya wayesazi ngabefundisi abanjalo. KwiSahluko 1 sencwadi yakhe, ucaphula iNkosi njengethi ngabo, ‘Ndiya kuwafihla amehlo am kuni; nokuba nandise ukuthandaza, andiyi kuva; izandla zenu zizele ngamagazi.’”—Telegraph, North Platte, Nebraska.34
“Ukrexezo Lulungile.” “Umfundisi oliNgesi . . . wothusa abantu xa wavakalisa imbono yeCawa yokuyekelela ngoMthetho weSixhenxe. . . . ‘Isimo sethu sengqondo sesokuba nenyameko kunokuba sigwebe,’ watsho njalo.”—The Sunday Times, Perth, Australia.35
“ICawa YamaUnitarian Ixhasa Imitshato Yamafanasini.”—The New York Times.36
“ICawa Emanyeneyo YaseKhanada iye yaxhasa ukumiselwa kwabantu abazinikele kubufanasini njengabalungiseleli.”—The Toronto Star.37
“Ukuvunywa Kobunongogo—Kusisicombululo Esingcwele.”—Ihlelwe yimonsignor yamaKatolika kwiPhiladelphia Daily News.38
[Imifanekiso ekwiphepha 25]
Izandla zabefundisi zixhaph’ igazi ngenxa yokuxhasa oozwilakhe