Ngaba Zonke Iinkonzo Ziyamkholisa UThixo?

Ngaba uvakalelwa kukuba zonke iinkonzo ziyamkholisa uThixo? Mhlawumbi zonke iinkonzo ozaziyo zikhuthaza ihambo entle, ubuncinane ukusa kumlinganiselo othile. Kodwa ngaba oko kwanele ukuze zimkholise uThixo?

BAMBI bathi, ‘Nyaniseka nje wena kunqulo lwakho, ibe uThixo uya kukholiswa koko. Lubakho uphawu olulungileyo kuzo zonke iinkonzo.’ Ngokomzekelo, uNqulo lwamaBahai luye lwayamkela le mbono kangangokuba lwamkela iinkolelo zeenkonzo ezisithoba ezibalaseleyo ehlabathini. Eli qela lonqulo likholelwa ekubeni zonke ezi nkonzo zasekwa nguThixo yaye ziyinxalenye yenyaniso. Kunokwenzeka njani oku?

Ukongezelela koko, unesizathu esihle sokuzibuza ukuba kunokwenzeka njani ukuba unqulo lumkholise uThixo xa luyalela amalungu alo ukuba atyale igesi erhaxayo kwiindawo zikawonke-wonke, ekunokwenzeka ukuba ibulale abantu abaninzi kuzo. Eso sityholo siye sabekwa kwelinye iqela lonqulo laseJapan. Okanye ngaba uThixo uyakholiswa lunqulo olukhuthaza amalungu alo ukuba azibulale? Kwiminyaka embalwa eyadlulayo, oko kwenzeka kubalandeli benkokeli yonqulo uJim Jones.

Xa sikhangela kumaxesha amandulo, sisenokubuza oku, Ngaba iinkonzo zinokumkholisa uThixo xa ziqhwaya iimfazwe, njengeMfazwe Yeminyaka Engamashumi Amathathu, eyagquba ukususela ngowe-1618 ukusa kowe-1648? Ngokutsho kweThe Universal History of the World, loo mbambano yonqulo eyayiphakathi kwamaKatolika namaProtestanti yaba “yenye yezona mfazwe zoyikekayo kwimbali yaseYurophu.”

IiMfazwe zoMnqamlezo zonqulo ezaqalisa ngenkulungwane ye-11 ukusa kweye-13 nazo zaphumela ekuphalazweni kwegazi okoyikekayo. Ngokomzekelo, kwiMfazwe yoMnqamlezo yokuqala amajoni omnqamlezo awayesithi angamaKristu abulala abemi baseYerusalem abangamaSilamsi nabangamaYuda.

Kwakhona, cinga ngoko kwenzekayo ebudeni bexesha lokuNcinwa Kwamakholwa, elaqalisa ngenkulungwane ye-13 laza laqhubeka iminyaka emalunga nama-600. Amawaka abantu angcungcuthekiswa aza abulawa ngokutshiswa ngokwemiyalelo yeenkokeli zonqulo. Kwincwadi yakhe ethi Vicars of Christ—The Dark Side of the Papacy, uPeter De Rosa uthi: “Egameni lepopu, [abancini] babangela okona kubulawa kwabantu kumasikizi nokuye kwanyanyezelwa luluntu embalini yohlanga [lwabantu].” Ngokuphathelele umncini ongumDominic uTorquemada waseSpeyin, uDe Rosa uthi: “Akuba emiselwe ngowe-1483, walawula ngegqudu iminyaka elishumi elinesihlanu. Amaxhoba akhe ayengaphezu kwe-114 000 ekwathi kuwo kwatshiswa ali-10 220.”

Kakade ke, iinkonzo zeNgqobhoko asizizo zodwa ezinetyala legazi. Kwincwadi yaso ethi Pensées, isithandi-bulumko saseFransi uBlaise Pascal sathi: “Abantu abakhe benze izinto ezingendawo ngokupheleleyo yaye bevuya njengaxa bezenza egameni lonqulo.”

Luqondwa Ngeziqhamo Zalo

Ngokwembono kaThixo, ukwamkeleka konqulo akuxhomekekanga kwinkalo enye kuphela. Ukuze unqulo lwamkeleke kuye, iimfundiso nemisebenzi yalo zimele zivisisane neLizwi lakhe elibhaliweyo lenyaniso, iBhayibhile. (INdumiso 119:160; Yohane 17:17) Isiqhamo sonqulo olwamkelekileyo kuThixo simele sifikelele imilinganiselo kaYehova uThixo.

KwiNtshumayelo yakhe yaseNtabeni, uYesu Kristu wabonisa ukuba kwakuya kubakho abaprofeti bobuxoki ababeya kuthi bamela uThixo. UYesu wathi: “Baphapheleni abaprofeti bobuxoki abeza kuni ngesigqubuthelo segusha, kodwa ngaphakathi baziingcuka eziqwengayo. Nobaqonda ngeziqhamo zabo. Abantu abaze bahlanganise iidiliya emeveni okanye amakhiwane enkunzaneni, andibi kunjalo? Ngokunjalo wonke umthi olungileyo uvelisa isiqhamo esihle, kodwa wonke umthi obolileyo uvelisa isiqhamo esingento yanto; umthi olungileyo awunako ukuthwala isiqhamo esingento yanto, nomthi obolileyo awunako ukuvelisa isiqhamo esihle. Wonke umthi ongavelisi siqhamo sihle uyagawulwa uze uphoswe emlilweni. Ngokwenene, ke ngoko, niya kubaqonda ngeziqhamo zabo abo bantu.” (Mateyu 7:15-20) La mazwi abonisa ukuba kufuneka siphaphe ngokomoya. Sisenokucinga ukuba inkokeli okanye iqela elithile lonqulo lamkelekile kuThixo nakuKristu, kodwa sisenokuba siyaphazama.

Imfuneko Yokulumka

Nangona unqulo oluthile luzibanga lwamkelekile kuThixo yaye nabalungiseleli balo befunda izicatshulwa zeBhayibhile, oko akuthethi kuthi olo hlobo lonqulo luyamkholisa uThixo. Iinkokeli zalo zisenokude zenze izinto ezimangalisayo ezenza kube ngathi uThixo uyazisebenzisa. Sekunjalo, olo nqulo lusenokuba lolobuxoki, aluvelisi ziqhamo zamkelekileyo kuThixo. Ababingeleli baseYiputa ababeqhelisela ubugqi ngexesha likaMoses bakwazi ukwenza izinto ezimangalisayo, kodwa ngokuqinisekileyo babengamkelekanga kuThixo.—Eksodus 7:8-22.

Njengakumaxesha amandulo, namhlanje iinkonzo ezininzi zikhuthaza iingcamango neentanda-bulumko zabantu kunokunamathela koko uThixo athi kuyinyaniso. Ngoko ke, sifaneleke ngokukhethekileyo isilumkiso seBhayibhile esithi: “Lumkani: mhlawumbi kusenokubakho uthile oya kunithabatha njengexhoba lakhe ngentanda-bulumko nenkohliso elambathayo ngokwesithethe sabantu, ngokwezinto eziziziqalelo zehlabathi yaye kungekhona ngokukaKristu.”—Kolose 2:8.

Emva kokuthetha ngeziqhamo ezilungileyo nezimbi, uYesu wathi: “Asinguye wonk’ ubani othi kum, ‘Nkosi, Nkosi,’ oya kungena ebukumkanini bamazulu, kodwa lowo wenza ukuthanda kukaBawo osemazulwini uya kungena. Abaninzi baya kuthi kum ngaloo mini, ‘Nkosi, Nkosi, asizange na siprofete egameni lakho, saza sakhupha iidemon egameni lakho, yaye senza imisebenzi emininzi yamandla egameni lakho?’ Ukanti ndiya kwandula ndivume kubo ndithi: Andizange ndinazi! Mkani kum, nina basebenzi bokuchas’ umthetho.”—Mateyu 7:21-23.

Hlolisisa Iziqhamo

Ngoko ke, kuyacaca ukuba kubalulekile ukuhlola iziqhamo zonqulo ngaphambi kokugqiba kwelokuba lwamkelekile kuThixo. Ngokomzekelo, ngaba olo nqulo lubandakanyekile kwezobupolitika? Ngoko phawula la mazwi, abhalwe kuYakobi 4:4: “Nabani na . . . ofuna ukuba ngumhlobo wehlabathi uzimisa njengotshaba lukaThixo.” Ukongezelela koko, uYesu wathetha oku ngabalandeli bakhe bokwenyaniso: “Abayonxalenye yehlabathi, kanye njengoko nam ndingeyonxalenye yehlabathi.” (Yohane 17:16) Unqulo olufanelekileyo emehlweni kaThixo alubandakanyeki kwezobupolitika zeli hlabathi, ‘elilele emandleni alowo ungendawo,’ isidalwa esingabonakaliyo somoya uSathana uMtyholi. (1 Yohane 5:19) Kunoko, unqulo alwamkelayo uThixo lubumela ngokunyaniseka uBukumkani bakhe phantsi kukaYesu Kristu yaye luvakalisa iindaba ezilungileyo eziphathelele loo rhulumente wasezulwini.—Marko 13:10.

Ngaba unqulo olukhuthaza ukungathotyelwa kwemithetho karhulumente lwamkelekile kuThixo? Impendulo icacile ukuba siphulaphula isiluleko sompostile uPawulos: “Qhubeka ubakhumbuza ukuba balulamele baze bathobele oorhulumente namagunya njengabaphathi, ukuba balungele wonke umsebenzi olungileyo.” (Tito 3:1) Kakade ke, uYesu wabonisa ukuba abalandeli bakhe babemele ‘babuyisele izinto zikaKesare kuKesare, kodwa izinto zikaThixo kuThixo.’—Marko 12:17.

Masithi unqulo oluthile lukhuthaza ukubandakanyeka kwiimfazwe zeentlanga. Eyoku-1 kaPetros 3:11 isibongoza ukuba ‘senze oko kulungileyo’ yaye ‘sifune uxolo size silusukele.’ Unqulo lunokumkholisa njani uThixo ukuba amalungu alo akulungele ukubulala amanye amalungu olo nqulo akwelinye ilizwe xa kusiliwa? Amalungu onqulo olwamkelekileyo kuThixo abonakalisa uphawu lwakhe oluphambili—uthando. Yaye uYesu wathi: “Ngako oku bonke baya kwazi ukuba ningabafundi bam, ukuba ninothando phakathi kwenu.” (Yohane 13:35) Olo thando lwahlukile kwintiyo enogonyamelo ekhuthazwa ziimfazwe zamazwe.

Unqulo lokwenyaniso luguqula abathanda ukulwa babe ngabathandi boxolo. Oku kwaxelwa kwangaphambili ngala mazwi: “Ziwakhande amakrele azo abe ngamakhuba, nezikhali zazo zibe zizitshetshe zeediliya; uhlanga lungaphakamiseli uhlanga ikrele, nezizwe zingaphindi zifunde ukulwa.” (Isaya 2:4) Kunokuba bathethe amazwi entiyo, abo baqhelisela unqulo lokwenyaniso bathobela umyalelo othi: “Umele umthande ummelwane wakho njengawe siqu.”—Mateyu 22:39.

Abo baqhelisela unqulo lokwenyaniso bazabalazela ukuphila ngokwemilinganiselo ephakamileyo kaYehova uThixo, abavumi ukwamkela ubomi bokuziphatha kakubi. ILizwi likaThixo lithi: “Intoni! Anazi na ukuba abantu abangengomalungisa abayi kubudla ilifa ubukumkani bukaThixo? Ningalahlekiswa. Abahenyuzi, nabanquli-zithixo, nabakrexezi, namadoda agcinelwe iinjongo ezingezozamvelo, namadoda alala namadoda, namasela, nabantu ababawayo, namanxila, nabatshabhisi, nabaphangi abayi kubudla ilifa ubukumkani bukaThixo. Ukanti oko koko bambi kuni babekuko. Kodwa niye nahlanjwa nahlambuluka, kodwa niye nangcwaliswa, kodwa niye navakaliswa ningamalungisa egameni leNkosi yethu uYesu Kristu nangomoya kaThixo wethu.”—1 Korinte 6:9-11.

Ixesha Lokwenza Isigqibo

Kubalulekile ukuwuqonda umahluko phakathi konqulo lobuxoki nolwenyaniso. Kwincwadi yeBhayibhile yeSityhilelo, ubukhosi behlabathi bonqulo lobuxoki kuthiwa ‘yiBhabhiloni Enkulu,’ ihenyukazi lokomfuziselo “elo ookumkani bomhlaba bahenyuza nalo.” Linetyala legazi yaye liphethe indebe yegolide ‘ezele zizinto ezilizothe nezinto ezingahlambulukanga zohenyuzo lwalo.’ (ISityhilelo 17:1-6) Zonke izinto zalo azamkelekanga kuThixo.

Eli lixesha lokwenza isigqibo. Kubantu abanyanisekileyo abasekwiBhabhiloni Enkulu, uMdali wethu onothando udlulisela esi simemo: “Phumani kuyo, bantu bam, ukuba anifuni kwabelana nayo ngezono zayo, yaye ukuba anifuni kwamkela inxalenye yezibetho zayo.”—ISityhilelo 18:4.

Ukuba ufuna ukuqhelisela unqulo olumkholisayo uThixo, kutheni ungaziqhelanisi namaNgqina kaYehova nje? Kwisicangca esikweli nqaku kudweliswe ezinye zeenkolelo zawo, kunye neZibhalo ezisekelwe kuzo. Hlola iBhayibhile yakho ukuze ubone enoba iinkolelo zamaNgqina ziyavisisana neLizwi likaThixo kusini na. Phanda ukuze ufumane enoba unqulo lwawo luvelisa uhlobo lweziqhamo onokuzilindela kunqulo lokwenyaniso kusini na. Ukuba ufumanisa ukuba lunjalo, uya kube ulufumene unqulo olumkholisayo uThixo.

[Ibhokisi ekwiphepha 5]

OKO AKUKHOLELWAYO AMANGQINA KAYEHOVA

INKOLELO IZIBHALO ESEKELWE KUZO

Igama likaThixo nguYehova Eksodus 6:3; INdumiso 83:18

IBhayibhile liLizwi likaThixo Yohane 17:17; 2 Timoti 3:16, 17

UYesu Kristu nguNyana kaThixo Mateyu 3:16, 17; Yohane 14:28

Uluntu aluzange luvele Genesis 1:27; 2:7

ngendaleko kodwa lwadalwa

Ukufa kwabantu kwabangelwa Roma 5:12

sisono somntu wokuqala

Umphefumlo uyafa xa umntu INtshumayeli 9:5, 10;

esifa Hezekile 18:4

Isihogo lingcwaba eliqhelekileyo Yobhi 14:13; ISityhilelo 20:13,

loluntu King James Version

Kukho ithemba lokuvuswa Yohane 5:28, 29; 11:25;

kwabafileyo IZenzo 24:15

UKristu wanikela ngobomi bakhe Mateyu 20:28; 1 Petros 2:24;

basemhlabeni njengentlawulelo 1 Yohane 2:1, 2

kubantu abathobelayo

Imithandazo imele ibhekiswe Mateyu 6:9; Yohane 14:6, 13, 14

Imithetho yeBhayibhile 1 Korinte 6:9, 10

Imifanekiso eqingqiweyo ayimele Eksodus 20:4-6; 1 Korinte 10:14

isetyenziswe kunqulo

Ukusebenzelana nemimoya kumele Duteronomi 18:10-12;

kuphetshwe Galati 5:19-21

Ubani akamele afake igazi Genesis 9:3, 4;

emzimbeni wakhe IZenzo 15:28, 29

Abalandeli bakaYesu bokwenyaniso Yohane 15:19; 17:16;

bazigcina bahlukile kwihlabathi Yakobi 1:27; 4:4

AmaKristu anikela ubungqina, Isaya 43:10-12;

evakalisa iindaba ezilungileyo Mateyu 24:14; 28:19, 20

Ukubhaptizwa ngokuntywiliselwa Marko 1:9, 10; Yohane 3:22;

ngokupheleleyo emanzini IZenzo 19:4, 5

kufuzisela uzahlulelo kuThixo

Izibizo zonqulo zichasene Yobhi 32:21, 22;

nezibhalo Mateyu 23:8-12

Siphila ‘kwixesha lokuphela’ Daniyeli 12:4; Mateyu 24:3-14;

2 Timoti 3:1-5

Ubukho bukaKristu abubonakali Mateyu 24:3; Yohane 14:19;

emehlweni 1 Petros 3:18

USathana ngumlawuli Yohane 12:31; 1 Yohane 5:19

ongabonakaliyo wehlabathi

UThixo uza kuyitshabalalisa le Daniyeli 2:44;

UBukumkani bukaThixo phantsi Isaya 9:6, 7;

kukaKristu buya kulawula Daniyeli 7:13, 14;

umhlaba ngobulungisa Mateyu 6:10

‘Umhlambi omncinane’ uza kulawula Luka 12:32;

noKristu ezulwini ISityhilelo 14:1-4; 20:4

Abanye akholiswayo ngabo uThixo Luka 23:43; Yohane 3:16;

baya kufumana ubomi ISityhilelo 21:1-4

[Umfanekiso okwiphepha 4]

Amawaka abulawa ebudeni bokuNcinwa Kwamakholwa

[Umfanekiso okwiphepha 6]

IiMfazwe zoMnqamlezo zabangela ukuphalazwa kwegazi okoyikekayo

[Umfanekiso okwiphepha 7]

Unqulo lokwenyaniso lubonwa ngeziqhamo zalo ezihle

[Inkcazelo Ngomfanekiso okwiphepha 2]

Cover: Garo Nalbandian