Isahluko 6
Yintoni Ebisenziwa NguThixo?
1. Abantu abaninzi namhlanje bakholelwa ntoni ngoThixo, kodwa ngaba kuyinyaniso?
NAMHLANJE abantu abaninzi bakholelwa ukuba uThixo akanamdla ngokwenene emhlabeni okanye bakholelwa ukuba akenzi nantoni na ngeengxaki ezikhathaza uluntu. Kodwa inyaniso ikukuba uThixo ukhathala ngokwenene. Kuyinyaniso ukuba, usenokuba akakwenzanga oko abantu bebelindele ukuba akwenze. Kodwa oko akuthethi ukuba akenzanga nto. Eneneni, ebesenzela uluntu izinto ukususela ekuqalekeni kwembali yabantu ukuza kutsho kulo mhla.
2. Ubufutshane bobomi babo buyichaphazela njani indlela abantu abacinga ngayo ngalo mcimbi?
2 Esinye isizathu esenza abantu abathile bagqibe ngokuthi uThixo akenzi nanye into singenxa yobufutshane bobomi babo. Oku kubenza bangxamele ukwenza izinto ngexesha elifutshane abalivunyelwa bubomi. Ngoko umnqweno wokubona iinguqulelo ebudeni bexesha labo lobomi ulawula indlela abacinga ngayo. Ngoko, batyekele ekugwebeni uThixo ngokwesizinzi samava anjalo abantu, nazo zonke iintsilelo zawo.
3. Ubude bobomi bukaYehova buwachaphazela njani amandla akhe okusingatha iimeko ngelona xesha lifanelekileyo?
3 Kwelinye icala, uYehova uhleli ngonaphakade. (INdumiso 90:2, 4; Isaya 44:6) Ngokwembono yakhe unokubona ngqo kumsinga wexesha apho izenzo zakhe ziya kuthi ziphumeze okona kulungele wonke ubani obandakanyekileyo zize zithi ngempumelelo ziphumeze injongo yakhe. (Isaya 40:22; 2 Petros 3:8, 9) Yiloo nto ke kanye ebisenziwa nguThixo.
Indlela Azityhile Ngayo UThixo
4. UYehova uyivakalise iyintoni injongo yakhe, yaye luluphi ulwazi alunike uluntu?
4 Injongo kaYehova kukulungiselela ulawulo lobulungisa kwindalo yonke, oluya kumanyanisa uluntu eluxolweni nakubunye, lunandiphe unqabiseko olupheleleyo. (Efese 1:9, 10; IMizekeliso 1:33) Noko ke, uThixo akanyanzeli namnye ukuba abe phantsi kolawulo lwakhe. Kuphela ngabo bamkhonzayo nabathanda indlela yakhe yokulawula abamkelekileyo. Enenjongo yokuseka lonke ihlabathi eliya kuphila ngemilinganiselo yolawulo lwakhe lobulungisa, uThixo unike uluntu ulwazi lwaloo milinganiselo nendlela ulawulo lwakhe olusebenza ngayo. Kwangaxeshanye uThixo ebebangela kube nokwenzeka ngoluntu ukuzuza ulwazi olubalulekileyo olungaye neempawu zakhe zobuqu.—Yohane 17:3.
5. Yintoni esinokuyifunda ngoThixo kwimisebenzi yendalo?
5 Kakade ke, ekubeni engumoya, uYehova akabonakali emntwini. Ngoko, ebengabenza njani abantu benyama negazi baziqonde ezi zinto? Phakathi kwezinye izinto, kuninzi okunokufundwa ngeempawu zoMdali emsebenzini wezandla zakhe. (Roma 1:20) Ulwalamano olumangalisayo phakathi kwezinto eziphilileyo nemithetho yemvelo elawula yonke into inikela ubungqina bobulumko bakhe. Amandla amakhulu abonakala kwiilwandlekazi, kwimozulu, nakumandla eenkwenkwezi angqinela ubusomandla bakhe. (Yobhi 38:8-11, 22-33; 40:2) Ibe iintlobo ezahlukahlukeneyo zokudla ezinandiphekayo, ubuhle beentyatyambo, beentaka, bokuphuma kwelanga nokutshona kwalo, ukuthand’ ukudlala kwezilwanyana—zonke ezi zinto zibonakalisa ukuthanda koMdali uluntu nomnqweno wakhe wokuba ubomi lubufumanise busonwabisa. Kanti ukuzityhila kukaThixo akupheleli kwezi zinto.
6. (a) UThixo ukutyhile ngokungqalileyo ngaziphi iindlela ukuthanda kwakhe? (b) Yiyiphi enye indlela athe uThixo watyhila ngayo imigaqo neempawu zakhe emntwini?
6 Kwizihlandlo ezahlukahlukeneyo wakwathetha esemazulwini. Kwiimeko ezithile oku wakwenza ngokobuqu. Kwezinye iimeko wathetha ngezithunywa zezulu, njengakwiNtaba yeSinayi kusingaSiqithi waseArabhi, apho wanikela umthetho wakhe kwizigidi zamaSirayeli. (Eksodus 20:22; Hebhere 2:2) Ngoko, ngabaprofeti bakhe wanxibelelana nabantu kwiinkulungwane ezininzi waza wabayalela ukuba babhale izityhilelo zokuthanda kwakhe. (2 Petros 1:21) Ngaloo ndlela, ngokuthe ngcembe uYehova uye waqhelanisa umntu nemilinganiselo Yakhe yobulungisa nokuthanda Kwakhe. Inkalo ebalulekileyo yoku yindlela ayityhile ngayo imigaqo neempawu zakhe ngokuqhubana kwakhe nabantu. Oku kongezelele umtsalane ofudumeleyo wamava abantu kwiLizwi elibhalwe nguye. Hayi indlela ekufundisa kuze kweyisele ngakumbi ngayo ukungaphulaphuli nje uze ufunde ukuvakalisa kukaThixo injongo kodwa nokufumana kwingxelo yeBhayibhile imizekelo ephilileyo esinceda sikuqonde kakuhle ukuthanda kwakhe! (1 Korinte 10:11) Yintoni etyhilwa yiloo ngxelo?
7. (a) UThixo ubonise njani ukuba akakunyamezeli ngonaphakade ukungalungisi? (b) Sakufunda ngendlela uThixo ayijonga ngayo ihambo enjalo, sifanele senzeni?
7 Inikela ubungqina bokuba uThixo akakunyamezeli ngonaphakade ukungalungisi. Kuyinyaniso ukuba, wayiyeka inzala ka-Adam noEva ukuba ihambe ngokuthanda kwayo, eyila ingxelo engenakuphepheka yokungakwazi komntu ukuzilawula ngempumelelo. Kodwa uThixo akazange alushiye uluntu lungenabo ubungqina bokugweba Kwakhe iindlela zalo zokungalungisi. Ngaloo ndlela wanisa unogumbe womhla kaNowa kuba “ihlabathi lalizele lugonyamelo.” (Genesis 6:11-13) Wazitshabalalisa izixeko ezazonakele ngokuziphatha zaseSodom neGomora. (Genesis 19:24, 25; Yuda 7) Waluyeka uhlanga lukaSirayeli, olwalusithi luyamkhonza, lwathinjwa kuba lwaluqhelisela unqulo lobuxoki. (Yeremiya 13:19, 25) Ngokufunda indlela uThixo ayijonga ngayo ihambo enjalo, siba nethuba lokwenza iinguqulelo ebomini bethu ukubonisa ukuthanda kwethu okulungileyo. Ngaba siya kwenjenjalo?
8. Xa uThixo etshabalalisa, bakho na abasindi? Zekelisa.
8 Ingxelo yeBhayibhile ikwatyhila ukuba uThixo uyabahlula abangamalungisa nabangendawo. NgoMkhukula womhlaba, uThixo akazange amtshabalalise uNowa, ‘owayengumvakalisi wobulungisa,’ kodwa wamlondoloza nabanye abasixhenxe. (2 Petros 2:5) Ibe, ngaphambi kokuna komlilo nesulfure eSodom, kuLote olilungisa nendlu yakhe banikwa ithuba lokusaba.—Genesis 19:15-17; 2 Petros 2:7.
9. Sifunda ntoni kwindlela uYehova awaqhubana ngayo noSirayeli wamandulo?
9 Xa abantu bakwaSirayeli, ababenze isifungo sokukhonza uThixo, bathi bazingqina bengathembekanga akazange abalahle ngokukhawuleza. Kunjengokuba wabaxelela oku: “Ndabathumela kuni bonke abakhonzi bam, abaprofeti, ndibathuma imihla ngemihla kwakusasa.” Kodwa abazange baphulaphule. (Yeremiya 7:25, 26) Kwanaxa lathi lasondela ixesha lokutshatyalaliswa kweYerusalem, uYehova wathi: “Kumnandi na kanene kum ukufa kongendawo? . . . Okumnandi kum asikuko na ukuthi abuye ezindleleni zakhe, aphile? . . . Zibuyiseni ke niphile.”—Hezekile 18:23, 32.
10. Ngaphandle kokuba nomonde kwakhe, yintoni enye esiyifundiswa zezi ngxelo zeBhayibhile ngoThixo?
10 Ngoko, sibona ntoni? UYehova uwenze wacaca umonde wakhe omkhulu ngoluntu ngendlela eyichaphazela ngokunzulu intliziyo yabantu abatyekele kubulungisa. Kwangaxeshanye, iinkqubano zakhe zikwalubethelela ngamandla kuthi uthando lwakhe ngobulungisa nokubaluleka kokuphila kwethu ngokuvisisana nezinto azifunayo.
11. (a) UYehova wayivakalisa wathini injongo yakhe e-Eden? (b) Ebesenza ntoni uThixo ukususela ngoko?
11 Kukwakho nenye into esisiseko ngokwenene ebalaseliswayo. Kwasekuqaleni kuyacaca ukuba uThixo waba nenjongo eqinisekileyo ngento yonke ayenzileyo. Ibe akazange asilele ukuthabatha inyathelo xa inzaliseko yenjongo yakhe ifuna isenzo. Le njongo isisiseko yachazwa e-Eden. Xa wayedlulisa isigwebo kuSathana, uYehova waxela kwangaphambili ukuba uSathana wayeza kuba nethuba lokuvelisa “imbewu,” abo babeya kubonakalisa iimpawu zakhe baze bamxhase. Kwakhona waxela kwangaphambili ngokuveliswa kwenye “imbewu,” umhlanguli olilungisa. Yena lo wayeya kuyibetha ayibulale “inyoka yakudala, leyo kuthiwa nguMtyholi, uSathana,” ngaloo ndlela akhulule uluntu kulawulo lwayo olonakalisayo. (Genesis 3:15; ISityhilelo 12:9) Emva kokuba evakalise le njongo, uYehova waqhubela phambili esenza amalungiselelo angqalileyo olawulo lokugqibela lwemicimbi yomhlaba phantsi ‘kwembewu’ ethenjisiweyo. Lo msebenzi wokulungiselela wawuya kuthabatha ixesha, njengoko siza kubona.
Isizathu Sokusebenzisana Kwakhe Ngokungqalileyo NoSirayeli Wamandulo
12, 13. (a) Kungani uThixo wanyula uSirayeli waza wanikela imithetho yakhe kolo hlanga lunye kuphela? (b) Ke, yintoni esinokuyifunda kwimbali kaSirayeli nakwezinye iintlanga?
12 Kwakudala ngaphambi kokubakho kweentlanga zanamhla, uThixo wanyula uhlanga lwalunye awathi walusebenzisa kangangamakhulukhulu eminyaka njengabantu bakhe. Ngoba? Ukuze akubonakalise ngendlela ephilileyo ukusebenza kwemigaqo yakhe yobulungisa. Olo hlanga, uSirayeli wamandulo, wayeyilwe yinzala ka-Abraham, indoda eyayibonakalise ukholo olukhulu kuMdali. UYehova wathi kubo: “Akungabuninzi benu kunezinye izizwe zonke, le nto athene nca nani uYehova, waninyula; kuba nimbalwa kunezinye izizwe zonke. Kungokunithanda kukaYehova, kungokusigcina kwakhe isifungo abesifungele ooyihlo.”—Duteronomi 7:7, 8; 2 Kumkani 13:23.
13 Emva kokuluhlangula kubukhoboka baseYiputa, uYehova waluthembisa ngokulungenisa kulwalamano olukhethekileyo naye, ibe lwaphendula lwathi: “Konke akuthethileyo uYehova sokwenza.” (Eksodus 19:8) Wandula ke uYehova walunika imimiselo yakhe, ngaloo ndlela elwahlula kuzo zonke ezinye iintlanga waza walunika inkcazelo eneenkcukacha ngemilinganiselo yakhe yobulungisa. (Duteronomi 4:5-8) Ngoko, imbali kaSirayeli wamandulo inikela ingxelo yokwenzekayo xa imithetho kaThixo yobulungisa ithotyelwa okanye ingathotyelwa. Kwangaxeshanye, imbali yezinye iintlanga ibonisa umphumo kwabo bangaphili ngomthetho kaThixo.
14. (a) Ngaba uThixo wazona iintlanga ezingengomaSirayeli ngokungaphazamisi imicimbi yazo? (b) Kanti, zangenelwa njani kubabalo lukaThixo?
14 Kuthekani ngezo ntlanga zizezinye? Zahamba ngokubona kwazo, zinyula iintlobo zazo zoorhulumente. Abantu bazo babengengabo abangenabulungisa ngokupheleleyo kubomi babo. Babesenayo imbilini yesazela, ibe oku maxa wambi kwabaqhubela ukuba benze ngokwenkxalabo yobuntu kubantu abangoowabo. (Roma 2:14; IZenzo 28:1, 2) Kodwa isono sazo ezasizuz’ ilifa nokugatya kwazo ukhokelo lobuthixo kwazibangela zafuna ikhondo lokuzifunela okwazo nelakhokelela kwiimfazwe zenkohlakalo nakuqheliselo olonakeleyo. (Efese 4:17-19) Ngokuqinisekileyo uThixo wayengenakubopheleleka ngooyeha abeziswe likhondo lobomi ezazinyulela ngokwazo. Ekuphela kwamaxesha awathi uThixo wangenelela ngawo kwakuxa imicimbi yabantu yayingqubana nokuphunyezwa kweenjongo zakhe. Okwelo thuba, ngobubele uThixo wazivumela ukuba zibe nalo uvuyo lokuphila, zinandiphe ubuhle bendalo neziqhamo zomhlaba.—IZenzo 14:16, 17.
15. Ngawaphi amalungiselelo okusikelelwa ekugqibeleni kwabantu bezi ntlanga awayephunyezwa nguThixo?
15 Ibe uYehova akazange abakhuphele ecaleni abantu bezi ntlanga ekubeni bazizuze ekugqibeleni iingenelo ezathenjiswa ‘ngembewu’ ka-Abraham. UYehova wathi ngale “mbewu” yayiya kuza ngomnombo wentsapho ka-Abraham: “Zisikelelwe ngembewu yakho zonke iintlanga zehlabathi, ngenxa enokuba uliphulaphule ilizwi lam.” (Genesis 22:18) Ngoko nakubeni uYehova wayeqhubana noSirayeli ngokupheleleyo, kwakhona ngokungenamkhethe wayephumeza injongo yakhe ukuze asikelele nezinye iintlanga kamva, nangona zazingakwazi oku.—IZenzo 10:34, 35.
16. (a) Ebudeni balo lonke eli xesha, wayesenza ntoni uThixo ngokunxibelelene nedinga elingeMbewu? (b) Yangqineka ingubani loo Mbewu yedinga?
16 Ebudeni bexesha lokuqhubana kukaYehova noSirayeli wamandulo, wanikela iziprofeto eziliqela ezazalisa intswelo ebalulekileyo kubantu bokholo—indlela yokufanisa iMbewu ethenjisiweyo ka-Abraham xa yayiya kuthi ifike ekugqibeleni. Kwanomnombo wakhe wentsapho, ngesizwe sakwaYuda nendlu kaDavide, wathi wachazwa ngokungqalileyo. (Genesis 49:10; INdumiso 89:35, 36) Indawo yokuzalwa kwayo, iBhetelehem, yakhankanywa. (Mika 5:2) Kwiinkulungwane ngaphambili kwaboniswa unyaka eyayiya kuthanjiswa ngawo njengoMesiya. (Daniyeli 9:24-27) Imisebenzi yayo yobubingeleli ngenxa yoluntu yafanekiselwa kusengaphambili. Ibe kwaba njalo nangedini layo elavulel’ ithuba lobomi obungunaphakade ebantwini bazo zonke iintlanga. (Hebhere 9:23-28) Ngaloo ndlela, lakufika ixesha elimiselweyo, yonk’ into yamfanisa ngokungaphazamiyo uYesu Kristu njengeMbewu yedinga lowo iintsikelelo zaziya kuthi ekugqibeleni zifike ngaye kulo lonke uluntu.—Galati 3:16, 24; 2 Korinte 1:19, 20.
Ukulungiselelwa Kwabalawuli Boluntu
17. Yintoni uThixo awayeza kuyizisa ngoYesu, ibe oku kwabethelelwa njani ngexesha lokuzalwa kwakhe?
17 Ngaphambi kokuzalwa kukaYesu unina uMariya wayexelelwe sisithunywa sezulu ukuba unyana wakhe wayeza kunikwa ubukumkani obungunaphakade. Abalusi kufuphi neBhetelehem bathi baziswa ngokuzalwa kwakhe, baza ke beva indimbane yemikhosi yasezulwini imdumisa uThixo yaye isithi: “Uzuko kuThixo enyangweni, uxolo emhlabeni, inkolelo ebantwini.”—Luka 1:31-33; 2:10-14.
18. (a) Amava akhe emhlabeni amlungiselela isigxina sokuba ngukumkani nombingeleli ngayiphi indlela? (b) Ukufa kwakhe kwaba nawuphi umphumo ekuzuzweni koxolo?
18 Khawuqwalasele iingenelo zalo Kumkani wasezulwini wexa elizayo zokuphila kwakhe emhlabeni. Njengomntu wathi wazazi waza waziqonda iingxaki zoluntu. Waphila waza wasebenza nabo, edlelana nabo ngentlungu yabo yaye esiva ubunzima ngokobuqu. Phantsi kwezona mvavanyo ziqatha wakungqina ukunyaniseka kwakhe kuYehova nokuthanda kwakhe ubulungisa. Ngale ndlela uThixo wayelungiselela uYesu ukuba abe nguKumkani oqondayo kwanoMbingeleli Omkhulu wokudlulisa iingenelo ezinik’ ubomi kuluntu. (Hebhere 1:9; 4:15; 5:8-10) Ngokubhekele phaya, ngokunikela ubomi bakhe njengedini, uYesu Kristu wavulel’ indlela uluntu ukuba lubuye luzuze ulwalamano oluseluxolweni noThixo.—1 Petros 3:18.
19. (a) Sazi njani ukuba uYesu wavuswa waza wanyukela ezulwini? (b) Ngokubhekisele kubukumkani bakhe, wenza ntoni akuba ebuyele ezulwini?
19 Emva kokufa kukaYesu, uThixo wamvusela ebomini kwakhona, ibe wabonwa ngamangqina angabantu angaphezu kwama-500 awayenokungqina ukuba uvuko lwalwenzeke ngenene. (1 Korinte 15:3-8) Kwiintsuku ezimashumi mane kamva uYesu wavuswa, wenyukela ezulwini waza wathi shwaka emehlweni abafundi bakhe ababembukele. (IZenzo 1:9) Esezulwini waqalisa ukusebenzisa ulawulo lwakhe kubalandeli bakhe abathembekileyo, ibe iingenelo zolawulo lwakhe zabenza bahluka ngokubalaseleyo kulo lonke uluntu. Kodwa ngaba ngoku kwakulixesha lokuba aqalise ukulawula iintlanga? Hayi, kuba kucwangciso lukaThixo olukhulu kwakusafuneka kunikelwe ingqalelo kwezinye izinto.—Hebhere 10:12, 13.
20. Nguwuphi umsebenzi omtsha uYesu awawuvulela abafundi bakhe emhlabeni?
20 Umsebenzi omkhulu kwakufuneka wenziwe emhlabeni wonke. Ngaphambi kokufa nokuvuka kukaYesu akukho maSirayeli aphumayo njengabashumayeli bokuguqula abantu bezinye iintlanga. Kanti nabani na owayenqwenela ukwamkela unqulo lukaYehova wayenokusoloko efumana iingenelo noSirayeli. (1 Kumkani 8:41-43) Noko ke, ukuqala kobuKristu kwavula umsebenzi omtsha. UYesu Kristu wamisela umzekelo waza wawushiya njengelifa kubafundi bakhe, ebaxelela oku ngaphambi kokunyukela kwakhe ezulwini: “Nibe ngamangqina am eYerusalem, nakulo lonke elakwaYuda nelaseSamariya, kude kuse nasekupheleni komhlaba.”—IZenzo 1:8.
21. Kunokuguqulwa kwehlabathi, yintoni eyayiphunyezwa nguThixo ngobo bungqina?
21 Ngaba injongo yayikukuguqula ihlabathi? Akunjalo. Kunoko, uYesu wabonisa ukuba ebudeni bethuba elehlela ‘ekuphelisweni kwephakade’ kwakuya kuhlanganiswa ngokuyintloko ‘oonyana bobukumkani.’ Ewe, amanye amalungu oburhulumente obuzayo nobuBukumkani kwakufuneka ekhethiwe. (Mateyu 13:24-30, 36-43) Nabani na ofunda iZibhalo zamaKristu zesiGrike unokubona kwaoko ukuba ukususela ngePentekoste yowama-33 C.E., abanye babemenyelwa ukuba nesabelo noYesu Kristu kulawulo lwakhe loBukumkani basezulwini.—2 Timoti 2:12; Hebhere 3:1; 1 Petros 1:3, 4.
22. (a) Ziziphi iimpawu ezazifunwa nguThixo kwezi ndlalifa zilindelekileyo zoBukumkani basezulwini? (b) Ngoko, ngaba ukhetho lwalusenziwa ngokungxama?
22 Ukunyulwa kwaba balawuli bangamadlelane belixa elizayo phezu koluntu kwakuya kuthabatha ixesha. Ngoba? Phakathi kwezinye izinto, elo thuba laliza kuvulelwa abantu bazo zonke iintlanga. Ibe, ngoxa abaninzi babezibabaza belifumene, bambalwa ngokwenyaniso abazingqina bengabalandeli abathembekileyo boNyana kaThixo. (Mateyu 22:14) Kwakufuneka kuhlangatyezwane nemilinganiselo ephakamileyo. Nangona amaKristu engahlalanga njengeqela lohlanga oluthe geqe kwabanye abantu njengoSirayeli wamandulo, aye ajongwa njengabasemzini, abamela enye indlela yobomi. (1 Petros 2:11, 12) Amele ahlale ecocekile kuqheliselo olungokuziphatha nolonakeleyo lwehlabathi eliwangqongileyo. (1 Korinte 6:9, 10) Ukuze abe “ngoonyana bakaThixo” bokwenene, amele azingqine ‘engabaxolisi,’ angabi nanxaxheba kwiimfazwe zeentlanga ibe angaphindezeli xa etshutshiswa ngenxa yokholo lwawo. (Mateyu 5:9; 26:52; Roma 12:18, 19) Amele abonakalise ukunyaniseka kulawulo lukaThixo ngokungavumi ukumela oorhulumente bobupolitika, eBhayibhileni abafanekiselwe ‘njengamarhamncwa.’ (ISityhilelo 20:4, 6) Ngenxa yako konke oku nangenxa yokuba eliphakamisele phezulu igama likaYesu Kristu kwindima yakhe njengoKumkani othanjiswe nguThixo, aye ‘athiywa ziintlanga zonke.’ (Mateyu 24:9) Ngoko abo baza kuba ngabalawuli basezulwini boluntu kunye noKristu abanyulwanga ngokungxama.
23. (a) Bangaphi abaza kuba kwelo qumrhu lolawulo lwasezulwini kunye noKristu? (b) Bakhethwe koobani, yaye ngoba?
23 Into eyenze ukuba unyulo luthabathe ithuba elide kangaka akungenxa yokuba inani elinyuliweyo lalimele libe likhulu. Ngokutsho kweZibhalo, uThixo walilinganisela inani leli qumrhu linyuliweyo lolawulo neliphantsi koYesu Kristu laba ngabantu abali-144 000 kuphela. (ISityhilelo 14:1-3) Kodwa uThixo ubanyule ngenyameko. Baye bathatyathwa “kuzo zonke izizwe, neelwimi, nabantu, neentlanga.” (ISityhilelo 5:9, 10) Phakathi kwabo kukho abantu abavela kuzo zonke iindidi zobomi, amadoda nabafazi, abantu abaye bafumana zonke iingxaki ezahlukahlukeneyo zoluntu. Ebudeni bokwambatha kwabo ubuntu obutsha bobuKristu, akukho ngxaki abathe abathile kubo abajongana nayo baze bayoyisa. (Efese 4:22-24; 1 Korinte 10:13) Hayi indlela esinokuvuya ngayo ngoku! Ngoba? Kuba kusinika isiqinisekiso sokuba baya kuba ngookumkani nababingeleli abanovelwano nenceba, abakwaziyo ukunceda amadoda nabafazi bazo zonke iindidi ukuba bangenelwe kwilungiselelo likaThixo lobomi obungunaphakade.
24. Kuthekani ngezigidi zabanye abantu ezaziphila nezathi zafa ebudeni beli xesha, uninzi lwazo lungayiqondi iBhayibhile?
24 Kuthekani ngoluntu olungekho kweli lungiselelo? Ebudeni balo lonke eli xesha, uThixo akazange abaphazamise oorhulumente abahlukahlukeneyo. Wabayeka abantu benza ngendlela abakhetha ngayo. Kakade ke, izigidi zabantu zathi zaphila zaze zafa, uninzi lwazo lungazange lweva ngeBhayibhile okanye ngoBukumkani bukaThixo. Kanti uThixo akazilibalanga. Wayelungiselela ixesha umpostile uPawulos awathetha ngalo esithi: “Ndinethemba kuThixo, . . . ukuba kuza kubakho uvuko lwabafileyo, lwamalungisa kwanolwabangemalungisa.” (IZenzo 24:15) Ngoko, phantsi kweemeko ezintle zoLungelelwaniso Olutsha lukaThixo, baya kunikwa ithuba elipheleleyo lokufunda ngeendlela zikaYehova. Ngokusekelwe koku, banokuthabatha ukuma kobuqu kwimbambano yolongamo lwendalo iphela. Abo bathanda ubulungisa baya kufumana ithuba lokuphila ngonaphakade.
Njengoko “Ukuphela” Kusondela
25, 26. (a) Ngexesha elifanelekileyo, liliphi igunya elingakumbi awayeya kunikwa lona uKristu, ibe wayeya kuthabatha inyathelo ngokunxamnye noobani? (b) Oku kwakuya kuzichaphazela njani iimeko emhlabeni?
25 Ngaphambi kolo Lungelelwaniso Lutsha luzayo, kumele kwenzeke iziganeko ezichwayitisayo. IBhayibhile yaxela kwangaphambili ngenguqulelo enkulu kwimicimbi yehlabathi. Ngelo xesha uYesu Kristu wayeya kuhlaliswa etroneni njengoKumkani angalawuli nje abafundi bakhe kodwa abe negunya lokuthabatha inyathelo ehlabathini liphela. Kwakuya kwenziwa esi sibhengezo ezulwini: “Izikumkani zehlabathi zithe zaba zezeNkosi yethu nezikaKristu wayo. Wayeya kuba nguKumkani kuse emaphakadeni asemaphakadeni.” (ISityhilelo 11:15) Inyathelo lokuqala lalo Kumkani laliya kuba lelinxamnye ‘nomphathi weli hlabathi,’ uSathana uMtyholi needemon zakhe. (Yohane 14:30) Le mikhosi ingendawo yayiya kuthi isemazulwini iphoselwe phantsi ize ipheleliselwe kummandla womhlaba. Ubungayintoni umphumo?
26 Ingcaciso yesiprofeto ichaza ngelizwi eliphuma ezulwini lisithi: “Ngenxa yoko yibani nemihlali, nina mazulu, nani ninomnquba kuwo. Yeha, abo bawumiyo umhlaba nolwandle! ngokuba uhlile weza kuni uMtyholi, enomsindo omkhulu, esazi nje ukuba ixesha analo lincinane.” (ISityhilelo 12:12) Kwakuya kwenzeka isiphithiphithi esingenamanduleli phakathi kweentlanga, kodwa ukuphela kwakungayi kufika kwangoko.
27. (a) Njengoko “ukuphela” kwakuya kusondela, nguwuphi umsebenzi omkhulu wokwahlula owawuya kwenziwa, ibe njani? (b) Intshabalalo yehlabathi eyaxelwa kwangaphambili iya kuba nkulu kangakanani?
27 Eli yayiya kuba lixesha lomsebenzi omkhulu wokwahlula. Phantsi kolwalathiso lukaYesu Kristu osetroneni, abalandeli bakhe abathembekileyo babeya kuqhubeka nokushumayela ezi “ndaba zilungileyo zobukumkani” kwelimiweyo liphela ukuze zibe bubungqina kuzo zonke iintlanga. Kuzo zonk’ iindawo abantu babeya kunikwa ithuba lokubonakalisa isimo sengqondo sabo ngolawulo lobuthixo. (Mateyu 24:14; 25:31-33) Kwakuba kufeziwe oku, njengoko uYesu wacacisayo, “kwandule ke ukufika ukuphela.” Kuya kubakho “imbandezelo enkulu, ekungazanga kubekho injalo kwasekuqalekeni kwehlabathi, kwada kwaba kalokunje, ekungasayi kubuye kubekho injalo.” (Mateyu 24:21) Abantu abayi kuze baphinde babuze bathi, Yintoni ebisenziwa nguThixo? Ekuphela kwabaya kusinda iya kuba ngabo baye bakunyamekela ngokwaneleyo ukufumanisa oko wayekwenza baza bavisisanisa ubomi babo nezinto azifunayo ngaphambi kokufika kwentshabalalo yehlabathi.
28. (a) Uhlaliswa nini etroneni uKristu ibe bahlulwa nini abantu bazo zonke iintlanga? (b) Ngoko, yintoni engxamisekileyo ukuba yenziwe ngumntu ngamnye?
28 Kodwa ziza kwenzeka nini zonke ezi ziganeko? UKristu ulinikwa nini igunya lokulawula njengoKumkani nokuqhubeka nokwahlula abantu bazo zonke iintlanga? Izibakala zibonisa ukuba uThixo ebesenza ezi zinto ebudeni bale nkulungwane yama-20. UKristu sele esetroneni yakhe yasezulwini, yaye umsebenzi wokwahlula sele uza kugqitywa. Ixesha lokuba sisondele kwicala likaThixo lembambano yolongamo lwendalo iphela lifutshane gqitha. “Imbandezelo enkulu” isemnyango! Ukuhlolisiswa kwesiprofeto seBhayibhile ngokwembali yakutshanje kukungqina oku kuyinyaniso. Sikubongoza ukuba usiqwalasele ngenyameko.
[Umfanekiso okwiphepha 62]
Ngokuphila phakathi kwabantu, umlawuli omtsha womhlaba wathi waluqonda kakuhle uluntu