Isahluko 10
Uyakuvuma Na Ukuyisebenzisa Inyaniso Kubomi Bakho?
1, 2. (a) Singangenelwa njani yinyaniso? (b) Yintoni oyikholelwa ingumthombo wokwenene uxolo nonqabiseko lokwenyaniso oluya kuphuma kuwo?
UKWAZI inyaniso kunokuba kokuxabisekileyo. Xa ukusebenzisa ngobulumko, kunokukukhusela kwingozi okanye kwilahleko kuze kufak’ isandla kulonwabo nonqabiseko lwakho. Oku kunjalo ngokukodwa ngenyaniso engoko kungaphambi kwesi sizukulwana.
2 Ekukhanyeni kweengongoma ezichazwe kule ncwadi, usenokuvuma ukuba umntu akanakuluzisa uxolo nonqabiseko lokwenyaniso. Usenokuqonda ukuba okuthethwa yiBhayibhile kuyinyaniso—ukuba nguThixo kuphela, ngoBukumkani bakhe, onokuzicombulula iingxaki ezijongene noluntu. Ngoko bekungayi kuba bubulumko na ukuxonxa ikhondo lakho lobomi livisisane noko ngoku ukwazi kuyinyaniso? (Yakobi 1:22) Kubandakanya ntoni oku?
3. Zibaluleke kangakanani iinguqulelo ezimele zenziwe ngumntu kubomi bakhe ukuba ufuna ukuphila kuLungelelwaniso Olutsha lukaThixo?
3 IBhayibhile yandlala imilinganiselo ethile ekumele kuhlangatyezwane nayo ngabo uThixo aya kubamkela njengenxalenye yoLungelelwaniso lwakhe Olutsha lobulungisa. Le milinganiselo ifuna ukuba kwenziwe iinguqulelo ngoku kubomi bomntu wonke ofuna ukuphila ngelo xesha. Kuyinyaniso ukuba, ngokwendlela abona ngayo umntu, asiyondlela yobomi yangoku yomntu wonke egqalwa imbi. Sekunjalo, ukuguqukela kwimilinganiselo yeBhayibhile kuquka ukubona ngendlela entsha kwaphela ebomini. Kungoko amaRoma 12:2 esithi: “Ningamilisi okweli phakade; manibe kumila kumbi ngokuhlaziyeka kwengqiqo yenu, ukuze nikucikide into okuyiyo ukuthanda kukaThixo okulungileyo, okukholekileyo, okuzalisekileyo.”
4. Ukuba ngokwenene siza kuhamba ‘endleleni yenyaniso,’ simele sikumisele ngokwasiphi isizinzi okulungileyo nokubi?
4 Ukumila okunjalo kuya kuchaphazela indlela esigqiba ngayo ngoko kufanelekileyo nokuphosakeleyo. Kwixa elidluleyo kusenokuba siye sakholosa ngezimvo zabanye okanye sazimisela eyethu imilinganiselo. Kodwa ngoku siyaqonda ukuba yayikwayile mbono eyabangela uAdam noEva bachasa uThixo njengoMlawuli wabo, nto leyo eyaphumela kwintlekele. Ukuba sifuna ukuba ngabakholisekileyo kuThixo, simele sikhangele kuye ukuze sifumane imilinganiselo yokwenyaniso yoko kufanelekileyo nokuphosakeleyo. Loo milinganiselo ifumaneka ngoko nangoko kwiLizwi likaThixo, iBhayibhile. Kunjengoko INdumiso 119:151 isithi: ‘Yonke imithetho yakhe iyinyaniso.’ Ngoko ke, ukuvisisana nayo kuthetha ‘ukuhamba endleleni yenyaniso.’ (INdumiso 86:11) Ngaba oko asikuko oko ufuna ukukwenza?
Imfuneko Yesiluleko Noqeqesho
5. (a) Ukuba siza kwenza iinguqulelo kubomi bethu, yinyaniso yiphi engeziqu zethu esimele sikuvume ukujongana nayo? (b) Yintoni edla ngokuthintela umntu ukuba ayivume impazamo, ibe ngawuphi umphumo?
5 Ukuba umntu uza kwenza iinguqulelo kubomi bakhe, umele aqiniseke ukuba ikho imfuneko yoko. “Akukho mntu ungoniyo,” itsho iBhayibhile. (1 Kumkani 8:46) Kanti abantu abaninzi bayala ukuzivuma iimpazamo. Kutheni? Bathiwe lwale likratshi. Endaweni yokukuvuma ukungalungisi kwabo ngokuzithoba, badla ngokubek’ ityala abanye. Oku kusuka nje kuyandise ingxaki.
6. Sifanele silukhangele phi uqeqesho, ibe ngoba?
6 Ingxaki enkulu ngokufanayo yeyokuba asifezekanga ibe asisoloko siliqonda ikhondo elifanelekileyo esingahamba ngalo. Sisenokude sikhohliselwe ekucingeni ukuba ikhondo eliyingozi lelona lihle. (IMizekeliso 16:25) Ngoko sifuna uqeqesho oluvela kumthombo ongentla kunomntu ukuba ngokuzingisileyo siza kusebenzela kwezona zilangazelelo zethu zilungileyo nezabantu abangoowethu. IMizekeliso 3:11 iwuchaza lo Mthombo ngokuthi: “Uqeqesho lukaYehova, nyana wam, musa ukulucekisa.”
7. (a) Uqeqesho lukaYehova lusifikelela njani? (b) Ukulwamkela nokulusebenzisa kwethu uqeqesho olunjalo kubonisa ntoni ngathi?
7 UYehova ulunikela njani olu qeqesho? Ukwenza oku ngeLizwi lakhe, iBhayibhile Engcwele. Ngoko xa sifunda iBhayibhile, okanye xa isiluleko sayo siziswa kwingqalelo yethu likholwa elinguwethu, size siqonde ukuba ngandlel’ ithile asenzi okufanelekileyo, sifumana uqeqesho lukaThixo. Ngokwamkela olo qeqesho njengolulungileyo size senze into ngalo, singqina ukuba siyayisebenzisa inyaniso. Siyalivuma ilungelo likaThixo lokusalathisa ibe sibonisa ukuba siluhlobo lwabantu alufunayo kuLungelelwaniso Olutsha lwakhe. Ewe, ubomi bethu buxhomekeke ekuthobeleni uqeqesho lobuthixo!—IMizekeliso 4:13.
8. (a) Kungani besingaba sizenzakalisa ngokwenene ukuba sizenza abalwamkelayo uqeqesho kodwa singaziguquli ngokwenene iindlela zethu? (b) Kungani kuyintuthuzelo ukwazi ukuba uYehova uyasibona nokuba siphi na?
8 Ngokuqinisekileyo ukuba siza kungenelwa kuqeqesho lukaThixo, simele sinyaniseke kwiziqu zethu. Akuyi kusinceda nganto ukuhanahanisa xa sibonwa ngabanye, size sibuyele kwiindlela ebesifudula sikuzo xa singabonwa. Ukuba ngabahanahanisi bekungasuka nje kutshise izazela zethu. Ibe nangona abantu besenokusibuka ngokusincoma, asinakumkhohlisa uMdali. IMizekeliso 15:3 isixelela oku: “Asezindaweni zonke amehlo kaYehova, ebonisela abanobubi nabalungileyo.” Ukwazi ukuba uYehova uThixo uyabona kufanele kusithintele ekwenzeni okubi. Kwangaxeshanye sinokufumana ukhuthazo kwisiqinisekiso sokuba ubakhangela ngenkoliseko ‘abo balungileyo.’
“Thethani Inyaniso Elowo Kummelwane Wakhe”
9. (a) Xa kufikelelwa ekuthetheni inyaniso, yintoni eyamkelwa njengeqhelekileyo ehlabathini? Ngoba? (b) Ngoko, ukuba umntu umele ‘angamilisi okweli phakade,’ kufuneka yiphi inguqulelo?
9 Nangona bengazibangi benamathele ngokungqongqo eBhayibhileni, namhlanje abantu abaninzi abazigqali benganyanisekanga. Kodwa bangaphi abasoloko betheth’ inyaniso? Abantu abaninzi ngokuqhelekileyo bayayifihla inyaniso okanye bathetha kuphela oko bakukholelwa kusiya kufeza iinjongo zabo. Nangona oku kujongwa njengokuqhelekileyo ehlabathini, oko akuyenzi into efanelekileyo. Ihlabathi loluntu elityekileyo kuThixo “lilele kongendawo.” Lowo ‘ungendawo,’ uSathana uMtyholi, ‘unguyise wamaxoki.’ Ukuxoka kwakuphuma kuye. (1 Yohane 5:19; Yohane 8:44) Ngoko akumele kummangalise umntu ukufumanisa ukuba kufuneka enze inguqulelo enkulu kumcimbi wokunyaniseka ukuba uza kukulahla ‘ukungamilisi okweli phakade.’
10. Umjikelo wenkohlakalo wokunganyaniseki usebenza njani nxamnye noxolo nonqabiseko?
10 Kukho isizathu esihle sokufuna ukunyaniseka. Akukho nto ilusingela phantsi uxolo nonqabiseko ngaphezu kokunganyaniseki onke amaxesha—ekhayeni, emsebenzini okanye kushishino, ekuzihlaziyeni nakubudlelane basentlalweni. Xa abantu bengamawexuwexu, xa bekhohlisa okanye beqhatha, akuzuzi namnye. Amaxhoba okunganyaniseki adla ngokudana aze abe nomsindo. Ngaphandle kweengcinezelo zemvakalelo nezengqondo, ukunganyaniseki kunokubangela ukwenzakala ngokomzimba kwanokufa. Ngokomzekelo, umsebenzi ongekho mgangathweni, impahla yokwakha engeyiyo namabango enkohliso aye afak’ isandla kwiingozi ezimbi. Umntu ocinga ukuba uyazuza ngokunganyaniseki kwakhe kwangaxeshanye uyalahlekelwa ngokunganyaniseki kwabanye. Naye, uhlawula amaxabiso aphezulu eempahla nokulungiselelwa izinto kuba abaqeshwa kwanabathengi bayeba. Ngaloo ndlela ukunganyaniseki kubangela umjikelo wenkohlakalo. Njengoko beya besiba ngakumbi abantu abaxhaphaza abanye, ukukatya, ugonyamelo, ukwenzakala kwanokufa kuyaphindaphindeka.
11. UYehova uvakalelwa njani ngokunganyaniseki nokuxoka?
11 Ngenxa yesiqhamo esibi ngolo hlobo, akumangalisi ukuba phakathi kwezinto ‘azithiyileyo uYehova’ kukuxoka, ukufunga ubuxoki, amatye okulinganisa angawenkohliso nezikali eziyinkohliso. (IMizekeliso 6:16-19; 20:23) Abantu ekulikakade labo ukuxoka abayi kuzifumana iintsikelelo uThixo azigcinele abo bamthandayo. (ISityhilelo 21:8) Ngaba oku asinto ebesifanele siyilindele kuThixo olilungisa? Ukuba uThixo ebengaqhubeka ebanyamezele abo banqwenela ukuzuza ngokukhohlisa ukuze kudleke abamelwane babo, ubengathini nabani na ukuziva enqabisekile kuLungelelwaniso Olutsha Lwakhe?
12, 13. (a) Ithini iBhayibhile ngentetho eyinyaniso? (b) Ukunyaniseka kwethu kunawuphi umphumo enoba sinokumkhonza na uYehova njengamangqina akhe?
12 Ngoko ke iBhayibhile ayimele ithatyathwe lula xa iyalela oku: “Thethani inyaniso elowo kummelwane wakhe.” (Zekariya 8:16; Efese 4:25) Ngokubhekisele kwizithembiso okanye kwizivumelwano “uEwe” wethu makabe nguEwe, “noHayi,” wethu abe nguHayi. (Yakobi 5:12) Ukuba siyakufuna ukumela ‘uYehova uThixo wenyaniso,’ simele sihlale sithetha inyaniso. (INdumiso 31:5) Ukuba umntu akayithethi inyaniso, akanakuhlonelwa nguThixo okanye ngabantu abangoowabo. Ibe engenakummela noThixo njengomnye wamangqina Akhe. Umdumisi wathi: “Kongendawo uthi uThixo, Useke phi na wena ukuxela ummiselo wam, uwuphathe ngomlomo wakho umnqophiso wam. Umlomo wakho uwuyekela ebubini; ulwimi lwakho luthungela inkohliso.”—INdumiso 50:16, 19.
13 Kodwa bambi basenokuzibuza bathi: Ngaba umntu unokunyaniseka yaye athembeke aze sekunjalo aphile kweli hlabathi? Ngaba angaphumelela ekushishineni ngaphandle kokwenza okwenziwa ngabo bonke abanye?
UThixo Uyabanyamekela Abo Basebenzisa Inyaniso
14. IBhayibhile isinceda njani siqonde ukuba sinokuphila ngaphandle kokunganyaniseki?
14 Ukuthi umntu akanakuphila ngaphandle kokunyaniseka bekuya kuba kukuthi uThixo akabanyamekeli abo bamthandayo. Kodwa oku kwahlukile kumava abakhonzi bakaThixo kumawaka eminyaka. (Hebhere 13:5, 6) Umdumisi uDavide wathi: “Ndakha ndamtsha, kungokunje ndimdala; ukanti andizanga ndilibone ilungisa lishiywa, nembewu yalo ivukela ukutya.” (INdumiso 37:25) Oku akuthethi ukuba abantu abangamalungisa abaziva iinzima okanye amaxesha anzima. UDavide kwanyanzeleka ukuba aphile okwexeshana ngokogxothiweyo ebuthweni. Kodwa wayenazo iimfuneko zobomi.
15. Wathini uYesu ngomdla kaThixo ekufumaneni kwethu izinto eziphathekayo zokuzimas’ ubomi?
15 Into etsalela abantu kunqulo lokwenyaniso asikokuzuza izinto eziphathekayo. Noko ke, uYesu wafundisa abalandeli bakhe ukuba kufanelekile ukuthandazela kuThixo intsikelelo Yakhe kwimigudu yabo yokuzuza ‘isonka semihla ngemihla.’ (Luka 11:2, 3) Ekuvuma ukufuna kwabo iimfuneko zobomi, waqinisekisa abafundi bakhe ngokuthi: “Uyihlo wasemazulwini uyazi ukuba ezo zinto ziyafuneka kuni.” Kodwa wababongoza wathi: “Funani ke tanci ubukumkani bukaThixo nobulungisa bakhe, zaye zonke ezo zinto ziya kongezelelwa kuni.” (Mateyu 6:25-34) Uyakukholelwa na oko? Ukuba kunjalo, akuyi kulingelwa ekuyilahleni imilinganiselo yobulungisa kaThixo kuba nje abanye abantu besenjenjalo. Kunoko, uya kubuxabisa ubulumko boko kubhalwe kweyoku-1 kuTimoti 6:6-8, ethi: “Ke kona ukuhlonela uThixo, kundawonye nokwanela, kusekeleze inzuzo enkulu. Kuba sibe singangenanga nanto ehlabathini; kuyabonakala kananjalo ukuba asinakuphuma nanto. Sinento ke edliwayo neyambathwayo, masanele zezo zinto.”
16. Ukusebenzisa kwethu le migaqo yeZibhalo kunokusilondoloza njani?
16 Ukulandela esi siluleko kufuna imbono eyahluke kwaphela kokuqhelekileyo ehlabathini namhlanje. Ngoko, noku kubandakanyekile ‘ekuzimiliseni ngeny’ indlela iingqondo zethu.’ Ukwaneliswa ziimfuneko zobomi kuyasithintela ekwenzeni imali nezinto eziphathekayo zibe yinjongo ephambili ebomini nasekulingelweni ekuxhaphazeni abanye abantu ukuze sizuze ezi zinto. (IMizekeliso 28:20; Mateyu 6:24; 1 Timoti 6:9, 10) Abo benza ubutyebi bube lusukelo lwabo basenokucinga ukuba ezi zinto zimela unqabiseko nolonwabo. Kodwa kunoko kunjengokuba iBhayibhile isithi, “othanda isilivere akaneliswa yisilivere; nalowo uthanda intabalala, akangenelwa nto.” (INtshumayeli 5:10) Abo banokuninzi bafuna okungaphezulu. Badla ngokuncama impilo yabo nobomi babo bentsapho ukuze bakufumane. Kunokuziva benqabisekile, baphila besoyikela ukuphulukana noko banako.
17. (a) Xa umntu emilisela intliziyo yakhe ekuzuzeni ubutyebi bokuphathekayo, yiyiphi inyaniso ayityeshelayo? (b) Bubuphi ubungqina obukhoyo bokuba kuluncedo ukusebenzisa imigaqo yokunyaniseka ekuzameni ukuphila?
17 Umntu osukela ubutyebi akajongani nesibakala sokuba “ubomi bomntu abumi ngabuninzi bempahla yakhe,” njengoko uYesu watshoyo. (Luka 12:15) Kulunge gqitha ukukholwa emandleni kaThixo okulungiselela abakhonzi bakhe. Kumazwe angaphezu kwama-200 phakathi kwezigidi zamaNgqina kaYehova, kukho ubungqina obuphilileyo bokuba uThixo uyalenza ilungiselelo elinjalo. Phantsi kwazo zonke iintlobo zoorhulumente ibe nakuzo zonke iintlobo zomsebenzi ofanelekileyo, amaNgqina azo zonke izizwe neemvelaphi ayakwazi ukuphila ubomi obonwabisayo, elungiselela iintswelo zawo. Ukholo lwawo emandleni kaThixo okulungiselela, kwanaxa ukunyaniseka kubonakala kuwafaka kwimeko engentle, luye lwavuzwa. Aye ahlonelwa ngabantu abangoowawo ibe adla ngokukhethwa njengabasebenzi kuba abantu basafuna ukuqhubana nabo bantu banokuthenjwa. Kodwa okubaluleke ngakumbi kukuba abathe tye banandipha isazela esicocekileyo ngenxa yokunyaniseka kwabo.
18, 19. (a) Kungani aba bantu bebuguqule nje ubomi babo ukuze bavisisane nemilinganiselo kaThixo? (b) Luhlobo luni lwabantu olukhangelwa nguThixo ukuba alulondolozele kuLungelelwaniso lwakhe Olutsha?
18 Ngaphambi kokuba ngamaNgqina kaYehova, babehamba ngendlela yehlabathi ngomlinganiselo omkhulu okanye omncinane. Kodwa ukufundisisa iBhayibhile nokusebenzisa inyaniso yayo kwababangela ukuba baluyeke uqheliselo olubi. Ngoku bazama nzima bebonakalisa ‘ukuthembeka okulungileyo, ukuze bayivathise imfundiso yoMsindisi wethu uThixo ezintweni zonke.’ (Tito 2:10) Bekungasoloko kulula ngawo ukujongana nenyaniso nokwenza iinguqulelo kubomi bawo. Kodwa ukuthanda inyaniso kuwancedile enze ngokuvisisana nayo.
19 Ngaba nawe uyithanda ngale ndlela inyaniso? Ukuba unjalo, uluhlobo lomntu uThixo alufunayo ukuba alulondoloze luphila kuLungelelwaniso lwakhe Olutsha. Ukuze wamkelwe nguThixo, ‘umele kukumnqula ngomoya nangenyaniso.’ (Yohane 4:24) Oku kuya kukuphawula njengowahlukileyo kwihlabathi elikungqongileyo. Kukwakho nezinye iindlela ekumele wahluke ngazo ehlabathini ukuba uza kukholisa uYehova. Ziyintoni ezi ndlela?
[Umfanekiso okwiphepha 113]
Ngaba umntu unokunyaniseka yaye athembeke aze sekunjalo aphumelele ngokwemali kweli hlabathi?