Isahluko 1
Ukunqwenelwa Koxolo Nonqabiseko Kwihlabathi Lonke
1, 2. Yintoni efunwa ngokumandla luluntu, ibe ngoba?
UXOLO nonqabiseko zizinto esizifunayo apha emhlabeni. Ukufuneka kwemeko enqweneleka ngolo hlobo akuzange kungxamiseke kunendlela ekunjalo ngayo namhlanje. Oku kunjalo kungekuphela nje kuthi njengabantu ngabanye kodwa kukwanjalo nangayo yonke intsapho yabantu jikelele emhlabeni.
2 Kungeso sizathu le nto abemi bomhlaba abakhoyo ngoku bephila kwelona xesha livuyisayo kuwo onke amaxesha! Usenokubuza uthi, ‘Kunokwenzeka njani oku, ekubeni ngoku sihambele phambili kwelona thuba loyikisayo kuyo yonke imbali yabantu, ixesha lezixhobo zenyukliya?’
3. (a) Kuthiwa siyintoni isizathu sokuba amazwe abe nebhombu yenyukliya? (b) Ukuqiqa kwemvelo kumele kubonise ntoni?
3 Kubikwa ukuba ubuncinane ngamazwe asibhozo akwaziyo ukuvelisa ibhombu yenyukliya. Ibe kuqikelelwa ukuba amazwe angama-31 anokuba nezixhobo zenyukliya ngonyaka wama-2000. Isizathu sokuba abe nezona bhombu zinobungozi kuthiwa kukuzikhusela, ukuthintela amanye amazwe axhobe ngendlela efanayo, nto leyo esisisongelo sokuziphindezela ngenyukliya. Ekubeni ejongene nemeko enjalo yemicimbi yehlabathi, ukuqiqa kwemvelo kumele kubonise nje ukuba amazwe amele avume ukuhlala ndawonye enyamezelana.
4. Nangona uMdali engayithintelanga imigudu yabantu yokufuna unqabiseko, yiyiphi injongo anayo kule nkalo?
4 Noko ke, ngaba luxolo nje olwenziwe ngumntu esilufunayo, kunye nonqabiseko olulungiselelwa ngumntu? Nangona uMdali engayithintelanga imigudu yabantu yokuseka nokulondoloza uxolo nonqabiseko zwenibanzi, uneyakhe indlela egqibeleleyo yokwanelisa ukunqwenela kwethu kokwemvelo uxolo nonqabiseko. Unelakhe ixesha alimiseleyo lokushenxisa bonke abaphazamisi bonqabiseko lwabo banqwenela ukumnqula. Hayi indlela esinokuvuya ngayo kukwazi ukuba ixesha lokuba akwenze oku lisondele!
5. Wathini umdumisi ophefumlelweyo ngomhlaba, ibe iyintoni injongo yoMdali ngomntu?
5 Emva kwamawakawaka eminyaka yembali yabantu eneziphithiphithi, kumele kulindelwe ukuba kufanele kubekho umnqweno onamandla nobonakala zwenibanzi wokufunwa koxolo nonqabiseko. Umhlaba ubuyindawo yokwemvelo yokuhlala umntu ukususela kwasekuqalekeni kobukho babantu. Umdumisi ophefumlelweyo wathi: “Amazulu ngamazulu kaYehova, ihlabathi ulinike oonyana babantu.” (INdumiso 115:16) Kwasekuqalekeni, kwakuyinjongo ethandekayo yoMdali ukuba umntu anandiphe ubomi obupheleleyo kwikhaya elingumhlaba nalinikwe nguThixo.
6. Umntu wokuqala nenzala yakhe babeya kukwazi ngayiphi indlela ukwenza njengoThixo?
6 Ngokwengxelo engendalo ekwiGenesis 2:7, “uThixo wambumba umntu ngothuli lwasemhlabeni, waphefumlela emathatheni akhe impefumlo yobomi; umntu ke waba ngumphefumlo ophilileyo.” Asikho esinye isidalwa esiphilileyo emhlabeni esasikumgangatho wobomi bomntu okanye sinobuchule obunjengobomntu—esasinokukwazi ukwenza njengoThixo ngokukwazi ukulawula. Ngokungakumbi, olu lawulo lwalungayi kupheleliselwa kwisidalwa sokuqala esingumntu kodwa lwaluza kuphunyezwa luze lunanditshwe nayinzala yakhe.
7. UAdam wamfumana njani umfazi, ibe wathini xa esi sidalwa sifezekileyo sathi seziswa kuye?
7 Ngenxa yeso sizathu, uMdali wanika uAdam umfazi. Wayeza kuba ngunina wabo bonke abemi bomhlaba abangabantu nabexesha elizayo. Kungeso sizathu le nto, yakunikwa esi sidalwa sigqibeleleyo, indoda ibe yathetha oku: “Eli ke ngoku lithambo lasemathanjeni am, yinyama yasenyameni yam.” Ngoko ke yambiza ngokuba ngumama wabantu, ’ish·shahʹ, gama elo elilelesikhomokazi kwelesiHebhere eliguqulelwe ngokuthi indoda, elileli, ’ish.—Genesis 2:21-23.
8. Yiyiphi imiyalelo uMdali awayinikela kwisibini sokuqala esingabantu?
8 UMdali noYise wasezulwini wathi kwisibini sokuqala esingabantu: “Qhamani, nande, niwuzalise umhlaba niweyise.” (Genesis 1:28) Le nkqubo yayiyinto entsha ngokupheleleyo kwimbali yezidalwa ezinengqondo. Abemi bokomoya bamazulu angabonakaliyo abazange babakho ngokuzalwa.
9. INdumiso 8:4, 5 ilichaza njani ilungiselelo likaThixo lezinto?
9 Akumangalisi ukuba, ngexesha lokudalwa komhlaba, abe ‘amemelela kunye amakhwezi okusa, beduma bonke oonyana bakaThixo.’ (Yobhi 38:7) Ngelo xesha, yonk’ into yayiseluxolweni ibe ivisisana kwindalo iphela. Kwindumiso yesibhozo, ebonakalisa uvuyo ngenxa yokucwangcisa kukaThixo izinto, umdumisi udanduluka athi ngomntu: “Umsilelise kancinane ebuThixweni, wamthi jize ngobuqaqawuli nangobungangamela.” (INd 8 Indinyana 4, 5) Ngokutsho kwale ndumiso, uThixo wabeka zonke izinto apha emhlabeni phantsi kweenyawo zomntu.
Ukuqalisa Kolongamo Olulwayo
10. (a) Ngaphambi kokukhawulwa komntwana wokuqala ongumntu, yintoni eyavelayo? (b) Ngaloo ndlela yintoni eyayinokumiselwa phezu koluntu?
10 Okumangalisayo kukuba, ngaphambi kokukhawulwa komntwana wokuqala ongumntu, kwaqhambuka imvukelo kwintlangano kaYehova uThixo yendalo iphela. Le meko yayinokukhokelela ekuyilweni kolongamo olutsha, ulawulo olutsha oluphakamileyo, phezu koluntu—ukuba uluntu lwalunokwahlulwa luze lutyeke kwintlangano kaYehova yendalo iphela. Kwakunokuyilwa ulongamo olwalunokusukuzana nolwakhe. Oku kwabangela ukuba kuthethwe ubuxoki bokuqala, obenza uYehova uThixo abonakale elixoki.
11. Ngokwenza uYehova uThixo ixoki, umvukeli wokuqala waba yintoni?
11 Ukuthethwa kobu buxoki bokuqala kwamenza lo mvukeli wokuqala kaThixo waba lixoki lokuqala, umtyholi, okanye umhlebi wokuqala. Ngokwahluke gqitha kuye, uYesu Kristu wathi: “Ndim indlela, ndim inyaniso, ndim ubomi.” (Yohane 14:6) UYesu wathi kubachasi bakhe abangabonqulo: “Nina ningaboyihlo uMtyholi, neenkanuko zoyihlo niyathanda ukuzenza. Yena waye esisibulala-mntu kwasekuqaleni; akemi enyanisweni, ngokuba akukho nyaniso kuye. Xa sukuba ethetha ubuxoki, uthetha okukokwakhe; ngokuba ulixoki, noyise wawo.”—Yohane 8:44.
12. (a) UMtyholi wakubangela njani ukuthethwa kobuxoki bokuqala, ibe waba yintoni umphumo kuEva? (b) Waba yintoni umphumo xa uAdam wadlayo kwisiqhamo esalelweyo?
12 Ngokuthetha ngenyoka kumyezo wase-Eden, okanye kwiparadisi yolonwabo, uMtyholi wabangela ukuba ubuxoki bokuqala buchazwe kumfazi wokuqala. Wathi uMdali walo mfazi wayelixoki, ngaloo ndlela ephazamisa uxolo lwengqondo kaEva. Wamenza waziva enganqabisekanga kwimeko yokungazi awazicingela ekuyo, ngoko wasidla isiqhamo esalelweyo. Wabongoza indoda yakhe, uAdam, ukuba idle naye isiqhamo esalelweyo waza ngaloo ndlela wathelela umfazi ekuvukeleni uYehova uThixo. (Genesis 3:1-6) Esi sibini singathobeliyo saphulukana noxolo lwaso noThixo saza sagxothwa kwiparadisi yolonwabo sahlala kwimeko yokunganqabiseki ngaphandle. AmaRoma 5:12 achaza le meko ibuhlungu, esithi: “Isono sangena ngamntu mnye ehlabathini, kwangena ke ukufa ngaso isono; kwaza ngokunjalo ukufa kwabatyhutyha abantu bonke, ekubeni bonke bonayo.”
13. Luluphi ukhetho olumele lwenziwe nguye ngamnye wethu namhlanje?
13 Imeko ekhoyo kumhla wethu ifuna ukuba senze ukhetho oluqinisekileyo. Lukhetho oluphakathi kolongamo olulwayo lukaSathana uMtyholi, “uthixo weli phakade,” nolongamo lukaYehova, uThixo Osenyangweni nonguSomandla wendalo iphela.—2 Korinte 4:4; INdumiso 83:18.
Indlela Yokunandipha Uxolo NoThixo
14. Luluphi uxolo nonqabiseko esinokuqalisa ukulunandipha kwanangoku?
14 Luzenzakalisa kabuhlungu lona ngokwalo, uninzi loluntu alukunqweneli ukwamkela okanye ukukholelwa kwilungiselelo likaThixo uSomandla alenzele abanquli bakhe ukuba banandiphe uxolo nonqabiseko olukumlinganiselo othile nakule meko ihlungisa ngokugqithiseleyo yabantu. Noko ke, uYehova ‘unguThixo onikela uxolo,’ ibe kulilungelo lethu elisikelelekileyo ngoku ukufumana olo xolo nonqabiseko olungayi kuze lusilele. (Roma 16:20; Filipi 4:6, 7, 9) Luxolo nonqabiseko alunikela kwanangoku kwiqumrhu labakhonzi bakhe abasemhlabeni, intlangano yakhe ebonakalayo, ezalisekisa amadinga akhe asoloko enganokuthenjwa. Luxolo nonqabiseko esinokulunandipha kuphela ngokunxulumana nentlangano yakhe ebonakalayo yasemhlabeni.
15. Ngaba akukho ngqiqweni ukucinga ukuba uThixo unayo intlangano, ibe yintoni uYesu Kristu awayiqondayo?
15 Bekungayi kuvisisana neemfundiso ezicacileyo zeZibhalo ukukholelwa ukuba uThixo akanayo intlangano, abantu abalungelelanisiweyo, abo abagqala ngokupheleleyo. UYesu Kristu wayeqonda ukuba uYise wasezulwini wayenentlangano ebonakalayo. De kwayiPentekoste yowama-33 C.E., yayiyintlangano yamaYuda eyayikulwalamano lomnqophiso noYehova uThixo phantsi koMthetho kaMoses.—Luka 16:16.
16. (a) UMoses wayengumlamli phakathi koobani? (b) UMoses Omkhulu, uYesu Kristu, unguMlamli phakathi koobani?
16 Kanye njengokuba uhlanga lukaSirayeli wamandulo lwalukulwalamano lomnqophiso noYehova uThixo ngomlamli uMoses, ngokunjalo uhlanga lukaSirayeli wokomoya, ‘uSirayeli kaThixo,’ lunolwalamano lomnqophiso ngomlamli. (Galati 6:16) Kunjengokuba umpostile uPawulos wabhalela umsébenzi onguwabo nongumKristu: “Mnye uThixo; mnye nomlamli phakathi koThixo nabantu, umntu uKristu Yesu.” (1 Timoti 2:5) Ngaba uMoses wayengumlamli ophakathi koYehova uThixo noluntu ngokubanzi? Hayi, wayengumlamli phakathi koThixo ka-Abraham, kaIsake noYakobi nohlanga lwenzala yabo yokwenyama. Ngokukwanjalo, uMoses Omkhulu, uYesu Kristu, akangoMlamli phakathi koYehova uThixo nalo lonke uluntu. UnguMlamli phakathi kukaYise wasezulwini, uYehova uThixo, nohlanga loSirayeli wokomoya, opheleliselwe kumalungu ali-144 000 kuphela. Olu hlanga lokomoya lunjengomhlambi omncinane wabantu bakaYehova ababumvu.—Roma 9:6; ISityhilelo 7:4.
Akalusi Nje Kuphela ‘Umhlambi Omncinane’
17. (a) UYehova uThixo umabele ukuba abe yintoni uYesu Kristu? (b) Wathini uYesu kwabo baza kubudl’ ilifa uBukumkani basezulwini?
17 KwiNdumiso 23:1, uKumkani uDavide woSirayeli wamandulo waphefumlelwa ukuba athi: “UYehova ngumalusi wam, andisweli lutho.” UYehova, uMalusi Omkhulu, wabele uYesu Kristu ukuba abe ‘ngumalusi olungileyo.’ (Yohane 10:11) KuLuka 12:32, uYesu wathi kwabo anguMalusi Olungileyo kubo: “Musani ukoyika, mhlambi mncinane; ngokuba kukholekile kuYihlo ukuninika ubukumkani.”
18. (a) Ngoobani namhlanje abafana nabakhonzi betempile noonyana babakhonzi bakaSolomon abangengomaSirayeli? (b) Ngoobani abanxulumene nabo ngokusondeleyo?
18 Kumaxesha amandulo, kwakukho abantu ababengengomaYuda, abanjengabakhonzi betempile noonyana babakhonzi bakaSolomon abangengomaSirayeli, ababenxulumene nohlanga lukaSirayeli. (Ezra 2:43-58; 8:17-20) Ngokufanayo namhlanje, kukho amadoda nabafazi abazahlulele ngokupheleleyo kuThixo ngoYesu Kristu kodwa abangengomaSirayeli okomoya. Noko ke, banxulumene nentsalela yoSirayeli wokomoya ngenxa yokuzahlulela kwabo kuYehova uThixo ngoYesu Kristu, “lowo wazinikelayo ukuba abe yintlawulelo yokukhulula abantu bonke.” (1 Timoti 2:6) Namhlanje, aba bantu bawadlula lee amaSirayeli okomoya ali-144 000, aza kubudl’ ilifa uBukumkani basezulwini.
19. Wathini uYesu Kristu ukubonisa ukuba wayeya kuba nguMalusi kungekuphela nje ‘kumhlambi omncinane’?
19 Ngaloo ndlela ngexesha likaThixo elifanelekileyo, uYesu Kristu wayeza kwabelwa ukuba nguMalusi womhlambi omkhulu ngakumbi wabantu ababumvu ababeya kuwudl’ ilifa umhlaba ngaye. Aba bantu ngabo wayecinga ngabo xa wathi: “Ndinazo nezinye izimvu, ezingezizo ezobu buhlanti; nazo ezo ndimelwe kukuza nazo; zaye ziya kuliva izwi lam, zibe mhlambi mnye, nomalusi abe mnye.” Ecinga ngezi ‘zimvu zizezinye,’ umpostile uYohane wakwabhala oku ngoYesu: “Yena usisicamagushelo sezono zethu; engesazethu zodwa, usiso nesehlabathi liphela.”—Yohane 10:16; 1 Yohane 2:2.
20. (a) Inani ‘lezinye izimvu’ lithelekiseka njani nelo labaseleyo ‘bomhlambi omncinane’? (b) Inyameko yoMalusi Olungileyo ithetha ntoni kubo bonke abo?
20 Namhlanje, kukho abamalunga nama-9 000 abathi bangamalungu entsalela ‘yomhlambi omncinane’ wezimvu zokomoya. Kwelinye icala, kukho izigidi zabazahluleleyo abanxulumene nentsalela ethanjisiweyo ekulandeleni emanyathelweni oMalusi Olungileyo, uYesu Kristu. Bafunyanwa emazweni angaphezu kwama-200 jikelele ehlabathini. Le nyameko yaloo Malusi Ulungileyo ithetha ntoni kubo bonke abo? Ithetha ukunanditshwa koxolo nonqabiseko! Ukuba bebengenalo uxolo phakathi kwabo, ngebengenalo umanyano oluphuma entliziyweni nentsebenziswano engenakuchithwa phakathi kwabo. Ukuba bebengaxhalabelananga ngendlela ethandekayo ngokubhekisele kwizilangazelelo zokomoya, ngebengenalo unqabiseko abalunandiphayo. Ngaloo ndlela, ukunqwenela kwabo uxolo nonqabiseko emhlabeni wonke kuye kwaqalisa ukwaneliswa kwanangoku.
[Umfanekiso okwiphepha 4, 5]
UMdali unendlela yakhe egqibeleleyo yokwanelisa umnqweno wabantu woxolo nonqabiseko