Isahluko 22
UThixo ‘WoMthetheli Woxolo’ Uba “Zizinto Zonke Kubo Bonke”
1. UYesu Kristu umisela umzekelo entwenini kuzo zonke ezinye izidalwa ezulwini nasemhlabeni?
EMVA nje kokuvuka kwakhe, “uMthetheli woxolo” wathi komnye wabafundi bakhe: “Ndiyenyuka, ndiya kuBawo, kuYihlo; kuThixo wam, kuThixo wenu.” (Yohane 20:17) Ngaloo mazwi wavuma ukuba uYise wasezulwini wayekwanguThixo wakhe, Lowo wayenqula yena kuphela. Kunqulo olunjalo wamisela umzekelo kuzo zonke ezinye izidalwa ezulwini nasemhlabeni.
2, 3. (a) Eyoku-1 yabaseKorinte 15:24-26, 28 isichaza njani isenzo esikhethekileyo sikaYesu sokuzithoba kuYise? (b) Uya kuba yintoni umphumo ozukileyo?
2 Onjani umzekelo ukuzuka “uMthetheli woxolo” aya kuba nguwo kulo lonke uluntu olwenziwe lwafezeka xa ngokunyanisekileyo ezithoba ngendlela ekhethekileyo kuLowo unguMongami ofanelekileyo wendalo iphela! Oku kuya kutyhilwa ngendlela engenakuthelekiswa nanto ekupheleni koLawulo lwakhe Lweminyaka Eliwaka phezu koluntu, xa aya kube ebuyisele uxolo, unqabiseko nemvisiswano kumhlaba wonke. Kwisiprofeto esingaphazamiyo, siqinisekiswa ngoku:
3 “Kwandule ke ukubakho isiphelo, xa athe wabunikela ubukumkani kuye uThixo uYise, xa athe wabubhangisa bonke ubulawuli, nalo lonke igunya, namandla. Kuba umelwe yena kukuthi alawule, ade azibeke phantsi kweenyawo zakhe zonke iintshaba. Olokugqibela utshaba oluya kubhangiswa kukufa. Xa ke zithe zathotyelwa phantsi kwakhe zonke izinto, uya kwandula noNyana ngokwakhe athotyelwe phantsi kwalowo wazithobela phantsi kwakhe zonke izinto, ukuze uThixo abe zizinto zonke kubo bonke.” (1 Korinte 15:24-26, 28) Okanye kunjengokuba iThe Amplified Bible ichaza inxalenye yokugqibela yendinyana 28 ngokuthi: “Ukuze uThixo abe kuko konke kubo bonke—oko kukuthi, abe yinto yonke kumntu wonke, abe ngophakamileyo, nguthunywashe wobomi ongaphakathi nolawulayo.”
4. (a) Abemi bomhlaba baya kusabela njani kulo mzekelo woYise wabo obamkeleyo? (b) Yiyiphi inkalo entsha yokuzithoba eya kubakho ngoko?
4 Xa “uMthetheli woxolo” enikela uBukumkani kuThixo wakhe ekupheleni koLawulo Lweminyaka Eliwaka, abemi bomhlaba bokwenziwa basiqonde esi senzo soBawo wabo obamkeleyo. Benaye njengoMzekelo wabo Ongokwasebukhosini, ngokukwanjalo baya kuzithoba ngendlela entsha kuThixo Osenyangweni. Okwesihlandlo sokuqala baya kuzithoba ngothando ngokuthe ngqo kuYehova, ewe, bamnqule, ngako konke ukunyaniseka nokuthembeka, bengasafuni uncedo lombingeleli onguYesu, kwanaxa bethandaza.
5. Siya kuba yintoni isimo sengqondo sookumkani abali-144 000 abazizinxulumani noYesu Kristu?
5 Ngale ndlela uThixo Osenyangweni kwakhona uya kuba nguKumkani wendalo iphela engenammeli wasebukhosini ezulwini okanye emhlabeni. Kuyabonakala ukuba ookumkani abazizinxulumani abali-144 000 uYesu Kristu abahlawuleleyo emhlabeni nabo baya kuguqa phambi koMlawuli waseBukhosini omkhulu ibe ngale ngqiqo ingakumbi baya kumvuma njengoMongami Wendalo Iphela.
Uvavanyo Lokugqibela Kuluntu Lonke
6. (a) Kuya kwenzeka ntoni kubantu abangathobeliyo ebudeni boLawulo Lwewaka Leminyaka lukaYesu? (b) Iya kuba njani imeko yabo uYesu abaphethulela kuYise wasezulwini?
6 Egqala uYehova njengoMgwebi Ophakamileyo, uYesu Krisu unqwenela ukuba uThixo abonakalise inkoliseko yakhe efunekayo kumsebenzi uYesu awufezileyo ebudeni boLawulo lwakhe Lweminyaka Eliwaka. Ebudeni bolo lawulo, abo bantu bangakuvumiyo ukwamkela iimfuneko zobulungisa nababonakalisa ukungathobeli uKumkani baya kube betshatyalalisiwe. Ngaloo ndlela, abo uYesu Kristu abenza baphethukele kuYehova uThixo, uMgwebi wokugqibela, iya kuba ngabo bathobekileyo baye bafumana imfezeko yobuntu.
7. (a) Yintoni eya kuvavanywa emva kokuba uYesu ebuyisele uBukumkani? (b) Uluntu olwenziwe lwafezeka luya kubekwa njani kolo vavanyo?
7 Kwelo nqanaba iya kuba lixesha lokuba ukuzinikela kwabantu okuhlala kuhleli kuMongami Wendalo Iphela, uYehova uThixo kubekwe eluvavanyweni. Njengakwimeko kaYobhi, umbuzo ngulo: Ngaba bathanda yaye banqula uThixo kuphela ngenxa yazo zonke izinto ezilungileyo abenzele zona, okanye bamthanda ngenxa yoko akuko—uMongami Ofanelekileyo wendalo iphela? (Yobhi 1:8-11) Kodwa uluntu olwenziwe lwafezeka luya kubekwa njani kuvavanyo lokunyaniseka kwalo kwentliziyo? IBhayibhile iphendula ngelithi: USathana uMtyholi needemon zakhe baya kukhululwa “ixeshana elincinane” enzonzobileni abebevalelwe kuyo iwaka leminyaka. (ISityhilelo 20:3) Ngokuvumela uMtyholi ukuba avavanye uluntu olubuyiselweyo, amalungu oluntu olwenziwe lwafezeka anokungqinwa ngokubhekisele kwingqibelelo yomntu ngamnye kuThixo ngokwengqiqo efezekileyo.—Thelekisa uYobhi 1:12.
8. (a) Bakukhululwa enzonzobileni, uSathana needemon zakhe baya kuzabalazela ukwenza ntoni? (b) Abo bazivumela ukuba balahlekiswe nguMtyholi needemon zakhe baya kuthabatha liphi ikhondo lesenzo?
8 Kwiminyaka engamawaka asixhenxe eyadlulayo, uSathana uMtyholi wakwazi ukulukuhla uAdam noEva abafezekileyo ukuba bone ngokuzithabathela ikhondo abazifunela lona lesenzo. Ukuba ziziphi na iindlela zokulinga uYehova aya kuzivumela uSathana needemon bazisebenzise emva kokukhululwa kwabo enzonzobileni iZibhalo azichazi. Kodwa ngokungathandabuzekiyo kobakho umtsalane ekuzingceni nakumnqweno wokufuna ukuzimela geqe kuThixo. Esavukela ulongamo lukaYehova, uMtyholi uya kuba nosukelo lokwenza uluntu lube ngabavukeli nalo. Ukuba kanye kanye iya kuphumelela ukusa kuwuphi umlinganiselo le mikhosi yeedemon ikhululweyo nako oko akuchazwanga, kodwa kuya kubakho abavukeli abangabantu abaneleyo bokwenza babonakale besisihlwele esikhulu. Isono esiya kwenziwa siso nasiphi na isidalwa esingumntu, esobe sifezekile ngelo xesha, soba singabangelwa kukuphazama ibe, ke ngoko, soba sisesangabom. Sobonakalisa ukushenxa ekunquleni okuphela koThixo oyinyaniso nophilileyo nokuba kwicala likaSathana uMtyholi. (ISityhilelo 20:7, 8) Ngaloo ndlela, uYehova akayi kuba “zizinto zonke kubo bonke” kwaba bavukeli.
9. (a) Kwenzeka ntoni kwabo bangayigciniyo ingqibelelo yabo kuYehova uThixo? (b) Baya kushenxiswa njani bonke abavukeli kummandla ongabonakaliyo? (c) Yiyiphi imeko ezukileyo eya kwesamela ngoko ezulwini nasemhlabeni?
9 Noko ke, abanyanisekileyo bokugatya ukunikezela kwiimpikiswano neengcinezelo eziya kuveliswa ngaba balahlekisiweyo bathand’ ubuhlanga. Ngokungathandabuziyo, abanyanisekileyo bokhetha ukuba uYehova abe “zizinto zonke kubo bonke” kwimeko yabo. Ukuze kubekho okusesikweni, ulongamo lukaYehova lumele luphunyezwe ngokungqongqo. Ngoko ke, bonke abavukeli abaphenjelelwa nguSathana emhlabeni boshenxiswa bangabikho ngonaphakade. Ngoko siya kuvuya xa bengekho! Ummandla ongabonakaliyo wendalo nakuwo kumele kushenxiswe bonke abavukeli. Ngoko, ukuze kucocwe indalo iphela ngokupheleleyo, uSathana uMtyholi nayo yonke imikhosi yakhe eziidemon uya kutshatyalaliswa, ashenxiswe angabikho. Ngaloo ndlela amazulu nomhlaba aya kucocwa kungabikho nechaphaza eli lesono. (ISityhilelo 20:9, 10) Ubungcwele bukaYehova buya kwesamela kwiindawo zonke. (Thelekisa uZekariya 14:20.) Igama elingcwele loThixo Osenyangweni longcwaliswa ezulwini nasemhlabeni. Bonke abasezulwini nabasemhlabeni baya kwenza ngovuyo ukuthanda kwakhe okuphakamileyo.
10. Umhlaba uya kwahluka ngaziphi iindlela nto leyo engayi kunanditshwa zezinye izijikelezi-langa?
10 Kuwo onke amaphakade umhlaba wethu uya kwahluka kangangokuba kungabikho sijikelezi-langa kuwo wonke ummandla osesithubeni siya kukunandipha oko, nangona umhlaba usenokungabi kuphela kwesijikelezi-langa esiya kuze simiwe. Ngokuncamisileyo, uya kuba yindawo apho uYehova aluthethelele ngokungenakukhanyelwa ulongamo lwakhe lwendalo iphela, emisela umzekelo ongokwasemthethweni nongunaphakade kwindalo iphela. Kuya kuba kuphela kwesi sijikelezi-langa apho uYehova wemikhosi aya kube elwe ‘imfazwe yaloo mini inkulu kaThixo uSomandla.’ Kuya kuba kuphela kwesi sijikelezi-langa uThixo awathumela kuso okuphela koNyana wakhe othandekayo ukuba abe ngumntu aze afe ukuze akhuphe abemi besijikelezi-langa esonweni nasekufeni. Kuya kuba kuphela kwesi sijikelezi-langa uYehova aya kube ethabathe i-144 000 labemi baso ukuba babe ‘ziindlalifa zikaThixo, iindalifa ke kunye noKristu.’—Roma 8:17.
Iiserafi, Iikerubhi Nezithunywa Zezulu
11, 12. (a) Luhlobo luni lwezidalwa zomoya uIsaya awazibonayo embonweni? (b) Ezi zidalwa zinawuphi umdla kuthi bantu?
11 UThixo, uMthombo ozukileyo wendalo yonke, esezulwini nesemhlabeni, uya kuba “zizinto zonke” kungekuphela nje kwiindlalifa noKristu ezili-144 000 kodwa kwanakwabanye abakummandla wezulu. Kwisahluko 6 sencwadi kaIsaya, sithelwa thsupha ngoko kuya kwenzeka kwiinkundla zasezulwini. Apho sifunda oku: “Ndayibona iNkosi ihleli etroneni ende enyukileyo; amasondo eengubo zayo ezirholayo azalisa itempile. Kumi iiserafi ngaphezu kwayo, iyileyo inamaphiko amathandathu, ngamabini ifihle ubuso bayo, ngamabini ifihle iinyawo zayo, ngamabini iphaphazela. Iyileyo idanduluke kuleyo isithi. Uyingcwele, uyingcwele, uyingcwele uYehova wemikhosi; buzalise ihlabathi lonke ubuqaqawuli bakhe.”—Isaya 6:1-3.
12 Hayi indlela awababalwa kakhulu ngayo uIsaya ngokubona Oyena ungcwele kwindalo iphela ehleli phezu kwetrone yakhe yasezulwini engqongwe ziiserafi ezizukileyo! Onjani umbono ukoyikeka lowo owawunguwo, utyhila isigxina sokubabalwa kakhulu ezo serafi ezazikuso, kuba ungOngcwele Ngokupheleleyo obungcwele bakhe ezazibuvakalisa njengoko zazinikela ubungqina ngobungcwele bakhe ngokubugxininisa kathathu! Iiserafi zinomdla ekuncedeni abanquli bakaYehova babe ngcwele njengoko uThixo engcwele.—Isaya 6:5-7.
13. (a) Luluphi olunye uhlobo lwezidalwa zomoya iBhayibhile esityhilela lona? (b) UYehova uchazwa njani ngokuhlobene nazo?
13 Kanye njengokuba kukho izidalwa ezahlukahlukeneyo apha emhlabeni, ezibonisa amandla kaYehova uThixo, ngokukwanjalo kukwakho izidalwa ezilolunye uhlobo kummandla womoya. IBhayibhile ibonisa ukuba ezi zidalwa ziikerubhi ezizukileyo, ekumele ukuba zinesantya esiphakamileyo xa zibhabha. (INdumiso 18:10; thelekisa amaHebhere 9:4, 5.) IGenesis 3:24 ibonisa ukuba emva kokuba uAdam noEva bona kuThixo oyingcwele wezulu ngokudla kwisiqhamo esalelweyo, uMdali wabeka ngasempumalanga ngaphandle kwindlela ebuyela eParadisi yoyolo iikerubhi kunye “nelangatye lekrele elijikajikayo.” UYehova kuthethwa ngaye ‘njengohleli ekerubhini.’ (INdumiso 99:1; Isaya 37:16) Ngaloo ndlela uboniswa njengohleli etroneni phezu kweekerubhi.
14. (a) Luluphi olunye uhlobo lwezidalwa zomoya ezingamele kutyeshelwa? (b) Zininzi kangakanani?
14 Enye into engamele kulityalwa phakathi kwenginginya yezidalwa zomoya zizithunywa zezulu. Kukho izigidi ezininzi zazo. (Daniyeli 7:9, 10) Phakathi kwazo kukho izithunywa zezulu ezabelwe ukulungiselela abanquli bakaYehova emhlabeni. UYesu walumkisa ngelokuba akumele kubekho mntu ukhubekisa nawuphi na wabanquli bakaYehova ngenxa yokuba “izithunywa zabo emazulwini zihlala zibubona ubuso bukaBawo osemazulwini.” (Mateyu 18:10; Hebhere 1:14) Ekupheleni kweentsuku ezingama-40 zikaYesu zokuzila entlango nasemva kokuxhathisa kwakhe ngoloyiso izihendo ezithathu ezibalulekileyo ezanikelwa nguMtyholi, elinjani ilungelo elaba lilo kwizithunywa zezulu ukulungiselela kwiintswelo zokwenyama zikaYesu obhityileyo nolambileyo!—Mateyu 4:11.
15, 16. (a) Khawuchaze umanyano olufana nolwentsapho oluya kubakho ezulwini nasemhlabeni. (b) Nguwuphi umvuzo ovela kuYehova oya kunikelwa kwabo bangabantu abenziwe bafezeka abaya kudlula bephumelele eluvavanyweni? (c) UYehova uya kukujonga njani ukufezwa kwenjongo yakhe yangaphambili?
15 Phezulu kummandla wasezulwini, abemi bakhona abazukileyo nabangumoya baya kuba ngabazalwana omnye komnye, ngoxa apha emhlabeni intsapho engabantu eyenziwe yafezeka iya kwenziwa abazalwana noodade omnye komnye. Baya kuba nomfanekiselo baze bafane noThixo ngomlinganiselo omkhulu uAdam noEva ‘ababe nomfanekiselo yaye befana’ noMdali wabo ngawo ekudalweni kwabo nguYehova uThixo. (Genesis 1:26, 27) Emva kokudlula kuvavanyo lokugqibela, abantu abenziwe bafezeka baya kunikwa ilungelo lokuphila ngonaphakade ibe ngothando baya kwamkelwa ‘njengabantwana bakaThixo,’ bavuye kwinkululeko ezukileyo baze babe yinxalenye yentsapho kaYehova emanyeneyo ezulwini nasemhlabeni.—Roma 8:21.
16 Lolunjani uyolo nemincili uYehova uThixo aya kuba nazo njengoko eya kukhangela ekufezweni kwenjongo yakhe yangaphambili—imfezo engenakuthelekiswa nanto yokuba nezinto zonke ngokwesigqibo sakhe esiyintloko—zonke izidalwa zikumanyano oluthandekayo olungenakuchithwa kunye naye!
17. Ngenxa yako konke oku, ngubani oya kuzibandeza ekwenzeni ntoni, ngokuvisisana namazwi omdumisi?
17 Ekukhanyeni kwako konke oku, ngubani oya kuzibandeza ekudumiseni lo Mnini weNjongo onguThixo nomangalisayo? Ewasebenzisa ngokufanelekileyo amazwi akhe ekuthetheni nezidalwa ezinamandla angaphaya kwawomntu, umdumisi uthi: “Mbongeni uYehova, nina zithunywa zakhe, magorha omeleleyo, alenzayo ilizwi lakhe, ephulaphula isandi selizwi lakhe. Mbongeni uYehova, nonke mikhosi yakhe, balungiseleli bakhe, benzi bokuthanda kwakhe.”—INdumiso 103:20, 21.
18. Umdumisi uyiqukumbela njani incwadi yeeNdumiso?
18 Umdumisi ochwayitileyo nophefumlelweyo uqukumbela incwadi yeeNdumiso ngala mazwi esiluleko athi: “Haleluya! Dumisani uThixo engcweleni yakhe, mdumiseni esibhakabhakeni samandla akhe. Mdumiseni ngenxa yobugorha bakhe, mdumiseni ngokobuninzi bobukhulu bakhe. Mdumiseni ngokuvuthela isigodlo, mdumiseni ngomrhubhe nohadi. Mdumiseni ngengqongqo nengqungqo, mdumiseni ngeento ezineentambo nogwali. Mdumiseni ngamacangci akhenkcezayo, mdumiseni ngamacangci adumayo. Yonke into ephefumlayo mayimdumise uYehova. Haleluya!”—INdumiso 150:1-6.
19. (a) Indalo iphela iya kumanyaniswa ngaliphi iqhina? (b) Zonke izidalwa ezisebenzisa ingqiqo ziya kufana nezithini?
19 Indalo iphela iya kumanyana ekugqibeleni kwiqhina eligqibeleleyo eliya kuhlala likho ngonaphakade, iqhina lonqulo olunye loBawo wasezulwini ngenxa yokuba abantwana bakhe bemthanda yaye bemzukisa ngaphezu kwento yonke. Ewe, ngelo xesha zonke izidalwa ezisebenzisa ingqiqo, ngokungathi kunjalo, ziya kuthetha oku njengoko iiserafi zathi: “Uyingcwele, uyingcwele, uyingcwele uYehova wemikhosi; buzalise ihlabathi lonke ubuqaqawuli bakhe.” Ngoko, ngokwenene, uThixo ‘woMthetheli Woxolo’ uya kube ‘ezizinto zonke kubo bonke’—ngonaphakade kanaphakade.
[Umfanekiso okwiphepha 188, 189]
Indalo iphela iya kumanyana ekunquleni ngoxolo uMongami Wendalo Iphela