Isahluko 3

Izinto Ezimele Zenzeke Kamsinya

1. Unokusinda njani xa uThixo egweba eli hlabathi?

UMELE uzixhalabele gqitha iziganeko zehlabathi namhlanje. Kutheni umele wenjenjalo? Kungenxa yokuba eli hlabathi alinakusinda xa uThixo ezisa umgwebo. Kodwa wena unokusinda. Unokukwenza oku ‘ngokungabi yonxalenye yehlabathi’ eligwetyelwe intshabalalo. Oku akuthethi ukuba uphile ubomi bokuba ngqongqo ngokugqithiseleyo nobokuba likheswa. Kuthetha ukuba ngoxa unandipha ubomi obonwabisayo nobunentsingiselo, uyazahlula ekonakaleni okungokobupolitika, kurhwebo olubawayo, kunqulo olunyelisa uThixo nakwihambo enogonyamelo neyokuziphatha okubi. Kwangaxeshanye, umele ulandele imilinganiselo kaThixo ephakamileyo yehambo uze ufune ukwenza ukuthanda kwakhe. (Yohane 17:14-16; Zefaniya 2:2, 3; ISityhilelo 21:8) Incwadi yeBhayibhile yeSityhilelo ibonisa indlela ekubaluleke ngayo ukuba uzimisele ukuzenza ezi zinto, wenze iinguqulelo ebomini bakho.

2. Umpostile uYohane usitshayelela njani isiprofeto esizukileyo seSityhilelo, ibe uThixo wasinika bani esi sigidimi sinamandla?

² Umpostile uYohane utshayelela esi siprofeto sizukileyo ngala mazwi: “Isityhilelo ngoYesu Kristu, uThixo awamnika sona, ukuba abonise amakhoboka akhe izinto ezimele zenzeke kamsinya.” (ISityhilelo 1:1a) Ngoko yayinguYesu Kristu ovusiweyo owafumana esi sigidimi sinamandla sivela kuThixo. Endaweni yokuba aboniswe eyinxalenye kaBathathu Emnye odidayo, uYesu apha uboniswa engaphantsi kuYise. Ngendlela efanayo, “amakhoboka” abumba ibandla lamaKristu angaphantsi koYesu Kristu, ukuze ‘ahlale emlandela kungakhathaliseki apho aya khona.’ (ISityhilelo 14:4; Efese 5:24) Kodwa ngoobani namhlanje “amakhoboka” kaThixo okwenyaniso, ibe iSityhilelo siyingenelo njani kuwo?

3. (a) Ngoobani “amakhoboka” azithoba kuYesu Kristu? (b) Nguwuphi umsebenzi owenziwa ngala ‘makhoboka’ athembekileyo phantsi kolwalathiso lweengelosi?

³ Umpostile uYohane, owabhala iSityhilelo, uzichaza elelinye laloo ‘makhoboka.’ Wayengumpostile wokugqibela ekwangomnye weqela labakhonzi abakhethiweyo nabathanjiswe ngomoya abadl’ ilifa ubomi bokungafi emazulwini. Namhlanje, ngamawaka nje ambalwa asaseleyo emhlabeni. UThixo ukwanezinye izigidi zabakhonzi abasisihlwele esikhulu, amadoda, abafazi nabantwana. Besalathiswa ziingelosi, aba bantu babelana ‘namakhoboka’ athanjisiweyo ekuvakaliseni iindaba ezilungileyo ezingunaphakade kulo lonke uluntu. Hayi indlela onke la ‘makhoboka’ azinikela ngayo ukuze ancede abalulamileyo bomhlaba basindiswe! (Mateyu 24:14; ISityhilelo 7:9, 14; 14:6) ISityhilelo sibonisa omele ukwenze ukuze ungenelwe kwiindaba ezilungileyo ezonwabisayo.

4. (a) Ekubeni sele kudlule iminyaka engaphezu kwe-1 900 uYohane wabhala iSityhilelo, kutheni le nto ethetha ‘ngezinto ezimele zenzeke kamsinya’? (b) Ubungqina bubonisa ntoni ngoku ngezinto ezaxelwa kwangaphambili?

⁴ Noko ke, kutheni le nto uYohane wathi la ‘makhoboka’ ayeya kuboniswa “izinto ezimele zenzeke kamsinya”? Ngaba loo mazwi akazange athethwe kwiminyaka engaphezu kwe-1 900 eyadlulayo? KuYehova, ojonga iwaka leminyaka ‘njengemini yezolo,’ iminyaka eli-1 900 lixesha elifutshane xa ithelekiswa neminyaka emininzi awayichitha ekudaleni nasekulungiseni umhlaba ukuze umiwe ngabantu. (INdumiso 90:4) Umpostile uPawulos wabhala ‘ngolindelo awayenalo lwentumekelelo nethemba,’ kuba ngokungathandabuzekiyo ukuzuza kwakhe umvuzo kwakubonakala kusondele gqitha kuye. (Filipi 1:20) Noko ke, namhlanje, buninzi ubungqina bokuba zonke izinto ezaxelwa kwangaphambili ziya kwenzeka ngexesha elimisiweyo. Akuzange ngaphambili embalini ukuphila koluntu kungaqiniseki kangaka. NguThixo kuphela onesicombululo!—Isaya 45:21.

Ijelo Lonxibelelwano

5. ISityhilelo sadluliselwa njani kumpostile uYohane nasemabandleni?

⁵ ISityhilelo 1:1b, 2 siyaqhubeka sisithi: “Yaye [uYesu] wathumela ingelosi yakhe waza ngayo wasinikela [iSityhilelo] ngemiqondiso kwikhoboka lakhe uYohane, owanikela ubungqina kwilizwi uThixo awalinikelayo nakubungqina uYesu Kristu awabunikelayo, kwanakuzo zonke izinto awazibonayo.” Ngaloo ndlela, uYohane wafumana ingxelo ephefumlelweyo ngengelosi. Wayibhala kwincwadi esongwayo, wayidlulisela kumabandla exesha lakhe. Okusonwabisayo kukuba, uThixo uye wayilondoloza ukuze kukhuthazwe amabandla aphantse abe li-100 000 abakhonzi bakhe abamanyeneyo emhlabeni namhlanje.

6. UYesu walichaza njani ijelo awayeza kulisebenzisa ukulungiselela ‘amakhoboka’ akhe ukutya kokomoya namhlanje?

⁶ UThixo wayenejelo lokudlulisela iSityhilelo ngomhla kaYohane, ibe uYohane wayeyinxalenye yasemhlabeni yelo jelo. Ngokukwanjalo, uThixo unejelo lokulungiselela ‘amakhoboka’ akhe ukutya kokomoya namhlanje. Kwisiprofeto sakhe esibalaseleyo esingokupheliswa kwenkqubo yezinto, uYesu wachaza inxalenye esemhlabeni yeli jelo ‘njengekhoboka elithembekileyo neliyingqondi ethe inkosi yalo yalimisela phezu kwempahla yendlu yayo, ukuze liyinike ukutya kwayo ngexesha elifanelekileyo.’ (Mateyu 24:3, 45-47) Usebenzisa olu didi lukaYohane ekucaciseni intsingiselo yesiprofeto.

7. (a) Imiqondiso efumaneka kwiSityhilelo imele isichaphazele njani? (b) Sekulithuba elingakanani abanye bodidi lukaYohane benesabelo ekuzalisekiseni imibono yeSityhilelo?

⁷ Umpostile uYohane ubhala ebonisa ukuba uYesu wanikela iSityhilelo “ngemiqondiso” okanye ngemifuziselo. Le miqondiso icacile yaye kuyachwayitisa ukuyihlolisisa. Ichaza umsebenzi omkhulu owenziwayo ibe nathi ikwamele isishukumisele ukuba senze umgudu wenzondelelo ekwaziseni abanye ngesiprofeto nentsingiselo yaso. ISityhilelo sisibonisa imibono eliqela echulumancisayo, leyo uYohane awaba nenxaxheba kuyo okanye waba ngumbukeli. Bambi babo bodidi lukaYohane abaye banesabelo ekuzalisekiseni le mibono kangangeminyaka emininzi, bavuyiswa kukuba umoya kaThixo utyhile intsingiselo ukuze bayicacise kwabanye.

8. (a) Yintoni ephawulekayo ngemibono ebhalwe kwiSityhilelo? (b) Isiprofeto sikaDaniyeli sisinceda njani ukuba siqonde amarhamncwa eSityhilelo?

⁸ Le mibono ibhalwe kwiSityhilelo ayichazwa ngolandelelwano lwamaxesha. Ngamnye uzaliseka ngexesha elithile. Uninzi lwale mibono luyimpinda yamazwi eziprofeto zangaphambili ezisithela thupha ngentsingiselo yale mibono. Ngokomzekelo, isiprofeto sikaDaniyeli sachaza ngamarhamncwa amane awoyikekayo, sicacisa ukuba la marhamncwa ayemela amagunya alawulayo emhlabeni. Ngenxa yoko, siyancedwa ukuba siqonde into yokuba amarhamncwa eSityhilelo amela abezobupolitika, kuquka abo bakhoyo ngoku.—Daniyeli 7:1-8, 17; ISityhilelo 13:2, 11-13; 17:3.

9. (a) NjengoYohane, sisiphi isimo sengqondo udidi lukaYohane olusibonisileyo? (b) UYohane usibonisa njani indlela esingonwaba ngayo?

⁹ UYohane wayethembekile ekungqineleni isigidimi uThixo awamnika sona esidlulisela ngoYesu Kristu. Wazichaza ngokweenkcukacha “zonke izinto awazibonayo.” Udidi lukaYohane luye lwalufuna ngokunyanisekileyo ukhokelo oluvela kuThixo nakuYesu Kristu ukuze lusiqonde ngokupheleleyo isiprofeto luze lwazise iingongoma zaso ezintle kubantu bakaThixo. Ngenjongo yokuba kungenelwe ibandla labathanjiswa (nokuze kungenelwe isihlwele esikhulu sezizwe ngezizwe uThixo aya kusigcina siphilile ukutyhubela imbandezelo enkulu), uYohane ubhala la mazwi: “Unoyolo lowo uwafunda ngokuvakalayo nabo bawevayo amazwi esi siprofeto, nabazigcinayo izinto ezibhaliweyo kuso; kuba ixesha elimisiweyo likufuphi.”—ISityhilelo 1:3.

10. Yintoni esimele siyenze ngeSityhilelo ukuze sifumane ulonwabo?

¹⁰ Uya kungenelwa gqitha ngokufunda iSityhilelo ibe uya kungenelwa kwanangakumbi ngokugcina izinto ezibhalwe kuso. UYohane wacacisa ngolu hlobo kwenye yeencwadi zakhe: “Ukumthanda uThixo kuko ukuthi, siyigcine imiyalelo yakhe; kwaye ayinzima imiyalelo yakhe, ngenxa yokuba yonk’ into eye yazalwa nguThixo iyaloyisa ihlabathi. Lulo ke olu uloyiso esiloyise ngalo ihlabathi, ukholo lwethu.” (1 Yohane 5:3, 4) Unokonwaba ngokwenene ngokwakha ukholo olunjalo!

11. (a) Kutheni kungxamisekile nje ukuba sigcine amazwi esiprofeto? (b) Liliphi ixesha ngoku elimele ukuba lisondele ngokuyingozi?

¹¹ Kungxamisekile ukuba siwagcine amazwi esiprofeto, ‘kuba ixesha likufuphi.’ Ixesha lantoni? Ixesha lokuzaliseka kweziprofeto zeSityhilelo, kuquka imigwebo kaThixo. Lisondele ixesha lokuba uThixo noYesu Kristu baphumeze umgwebo wokugqibela kwinkqubo yeli hlabathi kaSathana. Xa uYesu wayelapha emhlabeni, wathi nguYise kuphela owayewazi “loo mhla okanye elo lixa.” Ebhekisela kwiinkathazo eziye zanda emhlabeni kweli xesha siphila kulo, kwakhona uYesu wathi: “Asisayi kudlula esi sizukulwana zingadanga zenzeke zonke ezi zinto.” Ngoko ixesha lokuba uThixo aphumeze oko agqibe ukukwenza limele ukuba lisondele ngokuyingozi. (Marko 13:8, 30-32) Kunjengokuba uHabhakuki 2:3 esitsho: “Umbono usengowexesha elimisiweyo, yaye uqhubeka ukhawulezela ekupheleni, ibe awuyi kuxoka. Kwanokuba unokulibala, hlala uwulindile; kuba uya kuba yinyaniso nakanjani na. Awuyi kufika emva kwexesha.” Ukusinda kwethu kwimbandezelo enkulu kuxhomekeke ekugcineni kwethu iLizwi likaThixo lesiprofeto.—Mateyu 24:20-22.

[Ibhokisi ekwiphepha 15]

Ukuze siyiqonde incwadi yeSityhilelo kufuneka

● Sifumane uncedo lomoya kaYehova

● Siqonde ixesha lokuqalisa kwemini yeNkosi

● Siqonde ikhoboka elithembekileyo neliyingqondi namhlanje