Isahluko 13
Thenga Igolide Esulungekiswe Ngomlilo
ILAWODIKE
1, 2. Limi ndawoni ibandla lokugqibela kwasixhenxe afumana isigidimi esivela kuYesu ozukisiweyo, yaye ziziphi ezinye izinto esi sixeko esiphawuleka ngazo?
ILAWODIKE libandla lokugqibela kwasixhenxe afumene isigidimi esivela kuYesu ovusiweyo. Enjani yona ukuvul’ amehlo nokuchukumisa inkcazelo esiyidluliselayo!
2 Namhlanje, unokufumana amabhodlo aseLawodike kufuphi naseDenizli, malunga neekhilomitha ezingama-88 ukuya kumzantsi-mpuma weAlasehir. Ngenkulungwane yokuqala, iLawodike yayisisixeko esihle. Ekubeni yayimi ekudibaneni kweendlela ezinkulu, yayisisazulu esiphambili ekwakugcinwa kuso imali nekwakurhwetywa kuso. Ukuthengiswa kwamafutha adumileyo okunyanga amehlo kwabangela ukuba sityebe ngakumbi, yaye sasidume nangeengubo zaso ezikumgangatho ophakamileyo ezaziveliswa apho ngoboya obuhle obumnyama. Ngenxa yokungabikho kwamanzi okwakuyingxaki enkulu kwesi sixeko, kwenziwa umjelo wamanzi ovela kumthombo otsitsa amanzi ashushu kude kufuphi nalapho. Ngaloo ndlela, amanzi ayenokufika sele edikidiki kweso sixeko.
3. UYesu usiqalisa njani isigidimi sakhe esiya kwibandla laseLawodike?
3 ILawodike yayikufutshane neKolose. Xa ebhalela amaKolose, umpostile uPawulos ukhankanya incwadi awayeyithumele eLawodike. (Kolose 4:15, 16) Asiyazi into eyabhalwa nguPawulos kuloo ncwadi, kodwa isigidimi esidluliselwa nguYesu ngoku kwabaseLawodike sibonisa ukuba bakwimeko elusizi ngokomoya. Noko ke, njengokuba esenjenjalo ngokuqhelekileyo, uYesu uqala ngokuchaza iimfaneleko zakhe, esithi: “Nengelosi yebandla eliseLawodike yibhalele uthi: Utsho uAmen ingqina elithembekileyo neliyinyaniso, isiqalo sendalo kaThixo.”—ISityhilelo 3:14.
4. UYesu unguye njani “uAmen”?
4 Kutheni le nto uYesu ezibiza ngokuba ungu-“Amen”? Esi sibizo sibangela ukuba sibe namandla ngakumbi isigidimi sakhe njengomgwebi. “UAmen” ligama lesiHebhere elibhalwe ngoonobumba bolunye ulwimi elithetha ukuthi “ngokuqinisekileyo,” “makube njalo,” ibe lisetyenziswa ekupheleni kwemithandazo ukuqinisekisa amazwi avakaliswe kuyo. (1 Korinte 14:16) UYesu ungu-“Amen” ngenxa yokuba ingqibelelo yakhe engenakusoleka nokufa okulidini zaqinisekisa ukuzaliseka kwazo zonke izithembiso zikaYehova ezixabisekileyo. (2 Korinte 1:20) Ukususela ngelo xesha, yonke imithandazo ngokufanelekileyo ibhekiswa kuYehova ngoYesu.—Yohane 15:16; 16:23, 24.
5. UYesu ulilo ngayiphi indlela “ingqina elithembekileyo neliyinyaniso”?
5 Kwakhona uYesu ‘ulingqina elithembekileyo neliyinyaniso.’ Kwisiprofeto usoloko enxulunyaniswa nokuthembeka, nenyaniso nobulungisa, kuba uthembeke ngokupheleleyo njengomkhonzi kaYehova uThixo. (INdumiso 45:4; Isaya 11:4, 5; ISityhilelo 1:5; 19:11) Ulelona Ngqina likaYehova liphakamileyo. Enyanisweni, ‘njengesiqalo sendalo kaThixo,’ uYesu ubevakalisa uzuko lukaThixo kwasekuqaleni. (IMizekeliso 8:22-30) Njengomntu owayesemhlabeni, wayingqinela inyaniso. (Yohane 18:36, 37; 1 Timoti 6:13) Emva kokuvuswa kwakhe, wathembisa abafundi bakhe ngomoya oyingcwele waza wabaxelela wathi: “Niya kuba ngamangqina am eYerusalem nakulo lonke elakwaYuda naseSamariya kude kuse nakwezona nxalenye zikude zomhlaba.” Ukususela ngePentekoste yowama-33 C.E. ukusa phambili, uYesu walathisa la maKristu athanjisiweyo ekushumayeleni iindaba ezilungileyo “kwindalo yonke ephantsi kwezulu.” (IZenzo 1:6-8; Kolose 1:23) Ngokwenyaniso, uYesu ukufanele ukubizwa ngokuba lingqina elithembekileyo neliyinyaniso. AmaKristu athanjisiweyo aseLawodike ebeya kungenelwa ngokuphulaphula amazwi akhe.
6. (a) UYesu uyichaza njani imeko yokomoya yebandla laseLawodike? (b) Nguwuphi umzekelo omhle kaYesu athe amaKristu aseLawodike asilela ukuwulandela?
6 Sisiphi isigidimi uYesu afuna ukusidlulisela kumaKristu aseLawodike? Akawancomi. Ngokuphandle uwaxelela oku: “Ndiyazazi izenzo zakho, ukuba akubandi yaye ungeshushu. Akwaba ububanda okanye ushushu. Ngoko, ngenxa yokuba udikidiki, ungeshushu ungabandi, ndiza kukuhlanza uphume emlonyeni wam.” (ISityhilelo 3:15, 16) Ubuya kusabela njani kwisigidimi esinjalo esivela kwiNkosi uYesu Kristu? Ngaba ubungayi kuvuka uze uzihlolisise? Ngokuqinisekileyo, abo bantu baseLawodike kufuneka babhinqele phezulu, kuba baye bangamavila ngokomoya, kuyabonakala ukuba bazithabatha lula gqitha izinto. (Thelekisa eyesi-2 kwabaseKorinte 6:1.) UYesu, lowo bona njengamaKristu bekumele ukuba bamxelisile, usoloko ebonakalisa inzondelelo enamandla ngoYehova nenkonzo yakhe. (Yohane 2:17) Ngokubhekele phaya, abalulamileyo bamfumanise engosoloko enobunono nobulali, engohlaziyayo njengendebe yamanzi abandayo kwimini egqats’ ubhobhoyi. (Mateyu 11:28, 29) Kodwa amaKristu aseLawodike akashushu yaye akabandi. Njengamanzi aqukuqelayo esiya kwisixeko sawo, aye aba dikidiki. Afanele achaswe ngokupheleleyo nguYesu, ‘awahlanze aphume emlonyeni wakhe’! Ngamana thina singasoloko sikuzabalazela ngenzondelelo ukubahlaziya ngokomoya abanye, njengoko uYesu wenzayo.—Mateyu 9:35-38.
“Uthi: ‘Ndisisityebi’”
7. (a) UYesu uwuchaza njani oyena nobangela wengxaki yamaKristu aseLawodike? (b) Kutheni uYesu esithi amaKristu aseLawodike ‘azimfama yaye ahamba ze’?
7 Kanye kanye uyintoni unobangela wengxaki yabantu baseLawodike? Sifumana ingcamango entle kumazwi kaYesu alandelayo: “Ngenxa yokuba uthi: ‘Ndisisityebi, ndizuze ubutyebi, andiswele nto,’ kodwa akwazi ukuba uludwayi nosizana nehlwempu nemfama kwaye uhamba ze.” (ISityhilelo 3:17; thelekisa uLuka 12:16-21.) Ekubeni behlala kwisixeko esityebileyo, baziva benentembelo ngenxa yokuba bezizityebi. Mhlawumbi, indlela abaphila ngayo yayiphenjelelwe zizinto ezazisenziwa kumabala emidlalo, ziiholo zokuzonwabisa nakwiindawo zokwenza umthambo, kangangokuba baye baba ‘ngabathandi beziyolo kunokuba bathande uThixo.’a (2 Timoti 3:4) Kodwa abantu baseLawodike abazizityebi ngokwezinto eziphathekayo bangamahlwempu ngokomoya. Abungako ‘ubuncwane abaziqwebele bona ezulwini,’ ukuba banabo kwaukuba nabo. (Mateyu 6:19-21) Abaligcinanga lingenakumbi iliso labo, bebeka uBukumkani bukaThixo kwindawo yokuqala kubomi babo. Ngenene basebumnyameni, baziimfama, ababoni ngokomoya. (Mateyu 6:22, 23, 33) Ngaphezu koko, phezu kwazo nje iingubo ezintle ezisenokuba zibabangele bazizityebi ngokwezinto eziphathekayo, emehlweni kaYesu bahamba ze. Abanazo iingubo zokomoya ezibafanisa njengamaKristu.—Thelekisa iSityhilelo 16:15.
8. (a) Imeko efana naleyo yaseLawodike inokubakho njani namhlanje? (b) Amanye amaKristu azikhohlise njani kweli hlabathi libawayo?
8 Hayi indlela ekhwankqisa ngayo le meko! Kodwa ngaba asidli ngakubona imeko efanayo kule mihla? Uyintoni unobangela osisiseko woku? Sisimo sengqondo sokuzithemba esibangelwa kukukholosa ngezinto eziphathekayo nangobuncwane babantu. Njengabahambi becawa beNgqobhoko, bambi abantu bakaYehova baye bazikhohlisa, becinga ukuba banokumkholisa uThixo ngokuya nje ezintlanganisweni ngamathub’ athile. ‘Bangabenzi belizwi’ nje ngegama. (Yakobi 1:22) Phezu kwazo nje izilumkiso eziphindaphindiweyo ezivela kudidi lukaYohane, bavumela iintliziyo zabo zithi ti yimpahla, iinqwelo-mafutha nezindlu ezisexesheni, yaye bathanda iziyolo. (1 Timoti 6:9, 10; 1 Yohane 2:15-17) Konke oku kuphumela ekubeni ingqiqo engokomoya idodobale. (Hebhere 5:11, 12) Endaweni yokuba babe dikidiki, kufuneka bavuselele “umlilo womoya” baze bakulangazelele ‘ukushumayela ilizwi.’—1 Tesalonika 5:19; 2 Timoti 4:2, 5.
9. (a) Ngawaphi amazwi kaYesu amele ashukumise amaKristu adikidiki, yaye ngoba? (b) ‘Izimvu’ ezibhadulayo zinokuncedwa njani libandla?
9 UYesu uwajonga njani amaKristu adikidiki? Amazwi akhe acacileyo amele awashukumise: “Akwazi ukuba uludwayi nosizana nehlwempu nemfama kwaye uhamba ze.” Izazela zawo zindindisholo kangangokuba akayiqondi kwaukuyiqonda imeko yawo enxunguphalisayo. (Thelekisa iMizekeliso 16:2; 21:2.) Le meko imbi ngokunzulu ikweli bandla ayinakubethwa nje ngoyaba. Ngokumisela umzekelo omhle wenzondelelo nangokwalusa ngothando, abadala nabanye ababelwe ngabo basenokuzivuselela ezi ‘zimvu’ zibhadulayo ukuze zifumane uvuyo ezazinalo ngaphambili lokukhonza ngentliziyo epheleleyo.—Luka 15:3-7.
Isiluleko ‘Esingokuba Zizityebi’
10. Iyintoni “igolide” uYesu axelela amaKristu aseLawodike ukuba ayithenge kuye?
10 Ngaba sikho isicombululo ngemeko elusizi yaseLawodike? Ewe sikho, ukuba loo maKristu aza kusilandela isiluleko sikaYesu esithi: “Ndikucebisa ukuba uthenge kum igolide esulungekiswe ngomlilo ukuze ube sisityebi.” (ISityhilelo 3:18a) “Igolide” yokwenyaniso yamaKristu, evuthiswe ngomlilo nesuswe lonke ukhokho olukuyo, yiyo eya kuwenza abe ‘zizityebi kuThixo.’ (Luka 12:21) Anokuyithenga phi igolide enjalo? Akanakuyithenga kubarhwebi beendawo zokugcina imali zasekuhlaleni kodwa anokuyithenga kuYesu! Umpostile uPawulos wacacisa oko loo golide ikuko xa waxelela uTimoti ukuba ayale amaKristu azizityebi ‘enze okulungileyo, atyebe emisebenzini emihle, angagogotyi lutho, alungele ukwabelana, aziqwebele isiseko esihle nesikhuselekileyo sekamva.’ Kuphela kungokuzibhokoxa ngale ndlela awayenokuthi afumane ‘ubomi benene.’ (1 Timoti 6:17-19) Abantu baseLawodike abatyebileyo ngokwezinto eziphathekayo bebefanele ukuba balandele icebiso likaPawulos baze ngaloo ndlela batyebe ngokomoya.—Bona kwaneMizekeliso 3:13-18.
11. Yiyiphi imizekelo yanamhla esinayo ngabo bathenga “igolide esulungekiswe ngomlilo”?
11 Ngaba ikho imizekelo yanamhla yabo bathenga “igolide esulungekiswe ngomlilo”? Ewe, ikho! Kwanangethuba laxa imini yeNkosi yayisondela, ibathwana labafundi beBhayibhile laliqalisa ukuqonda ubuxoki beemfundiso ezininzi zeNgqobhoko ezifana nezaseBhabhiloni, ezinjengoBathathu Emnye, ukungafi komphefumlo, intuthumbo kumlilo wesihogo, ukubhaptizwa kweentsana nokunqulwa kwemifanekiso eqingqiweyo (kuquka umnqamlezo naleyo kaMariya). Ngenxa yokuthethelela inyaniso yeBhayibhile, la maKristu avakalisa uBukumkani bukaYehova njengobukuphela kwethemba loluntu nedini likaYesu lentlawulelo njengendlela yokufumana usindiso. Kwiminyaka ephantse ibe ngama-40 ngaphambi kowe-1914, alatha kuloo nyaka njengophawulwe kwisiprofeto seBhayibhile ungowokuphela kwamaxesha eeNtlanga, alandelwa ziziganeko ezothusayo emhlabeni.—ISityhilelo 1:10.
12. Ngubani omnye wabo babekhokela phakathi kwamaKristu avukileyo, ibe wawumisela njani umzekelo obalaseleyo ekuziqwebeleni ubuncwane ezulwini?
12 Owayekhokela la maKristu avukileyo yayinguCharles Taze Russell, owathi ekuqaleni kweminyaka yee-1870, waseka iqela elalifundisisa iBhayibhile eAllegheny (ngoku eyinxalenye yePittsburgh), ePennsylvania, eUnited States. Ekuqaleni kwakhe ukuphanda inyaniso, uRussell wayekunye noyise ibe wayesel’ eza kuba ngusozigidi. Kodwa wathengisa iivenkile zakhe ezininzi waza wachitha ubutyebi bakhe ekuxhaseni ngokwemali ukuvakaliswa koBukumkani bukaThixo emhlabeni wonke. Ngowe-1884 uRussell waba ngumongameli wokuqala wombutho ngoku owaziwa njengeWatch Tower Bible and Tract Society of Pennsylvania. Ngowe-1916 wafa kuloliwe kufuphi nasePampa, eTexas, esendleleni eya eNew York, edinwe eyimfe luhambo lwakhe lokugqibela lokushumayela kwintshona yeUnited States. Wamisela umzekelo obalaseleyo wokuziqwebela ubuncwane bokomoya ezulwini, mzekelo lowo namhlanje olandelwa ngamakhulu amawaka abalungiseleli abangoovulindlela abazincamayo.—Hebhere 13:7; Luka 12:33, 34; thelekisa eyoku-1 kwabaseKorinte 9:16; 11:1.
Ukusebenzisa Intambiso Yamehlo Yokomoya
13. (a) Intambiso yamehlo yokomoya iya kuyiphucula njani imeko yabantu baseLawodike? (b) Luhlobo luni lwezambatho olunconyelwa nguYesu, yaye ngoba?
13 Kwakhona uYesu ubaluleka ngokuqatha abo bantu baseLawodike: ‘Thenga izambatho zangaphezulu ezimhlophe ukuze wambathe, lingabonakali ihlazo lobuze bakho, nentambiso yamehlo uthambise amehlo akho ukuze ubone.’ (ISityhilelo 3:18b) Bamele bafune unyango ngenxa yobumfama babo bokomoya ngokuthenga amafutha okunyanga amehlo, kungekhona lawo abaphilisi basekuhlaleni, kodwa lawo ohlobo olunokulungiselelwa nguYesu kuphela. Oku kwakuya kubanceda ukuba babe nengqiqo yokomoya, kubancede bahambe ‘kumendo wamalungisa’ amehlo abo abona kakuhle etsoliswe ekwenzeni ukuthanda kukaThixo. (IMizekeliso 4:18, 25-27) Ngaloo ndlela, basenokunxiba, kungekhona iingubo zexabiso zoboya obumnyama ezenziwa eLawodike, kodwa banxibe ‘izambatho zangaphezulu ezimhlophe’ ezintle ezibonisa ilungelo abanalo njengabalandeli bakaYesu Kristu.—Thelekisa eyoku-1 kuTimoti 2:9, 10; 1 Petros 3:3-5.
14. (a) Yiyiphi intambiso yamehlo yokomoya ebifumaneka ukususela ngowe-1879? (b) Ubuyintoni umthombo osisiseko wenkxaso engokwemali wamaNgqina kaYehova? (c) Ekusebenziseni iminikelo, amaNgqina kaYehova ahluke njani kwabanye?
14 Ngaba intambiso yamehlo yokomoya iyafumaneka namhlanje? Ngokuqinisekileyo iyafumaneka! Ngowe-1879 uPastor Russell, njengoko wayebizwa ngaloo ndlela ngenxa yokuthandwa, ngeenjongo zokukhusela inyaniso waqalisa ukupapasha iphephancwadi elaziwa ehlabathini lonke namhlanje ngokuthi IMboniselo Evakalisa UBukumkani BukaYehova. Kwinkupho yalo yesibini, wavakalisa oku: “Sikholelwa kwelokuba, [eli phephancwadi], lixhaswa nguYEHOVA, ibe ngoxa kunjalo alinakuze licele lize libongoze ukuxhaswa ngabantu. Xa Lowo uthi: ‘Yonke igolide nesilivere yeentaba yeyam,’ engayilungiseleli imali efunekayo, siya kuqonda ukuba kulixesha lokuyeka ukulipapasha.” Bambi abashumayeli abavela koomabonwakude baye bafumba intywenka yemali baza bahlala kubunewunewu ababufumene ngokungenazintloni (yaye maxa wambi ngenxa yokuziphatha okubi). (ISityhilelo 18:3.) Ngokwahlukileyo koko, aBafundi BeBhayibhile, namhlanje abaziwa njengamaNgqina kaYehova, baye basebenzisa yonke iminikelo yokuzithandela abayifumanayo ukuze balungelelanise baze bahambisele phambili ukushunyayelwa koBukumkani bukaYehova obuzayo ehlabathini lonke. Ukuza kuthi ga namhlanje udidi lukaYohane lwalathisa ukupapashwa kwephephancwadi IMboniselo noVukani!, yaye ngowama-2006 kuye kwasasazwa amaphephancwadi angaphezu kwezigidi ezingama-59. IMboniselo ifumaneka ngeelwimi ezimalunga ne-150. Ingulindixesha osemthethweni webandla lamaKristu angaphezu kwezigidi ezithandathu aye asebenzisa loo ntambiso yamehlo yokomoya ukuze amehlo awo avuleke abone unqulo lobuxoki nokungxamiseka kokushunyayelwa kweendaba ezilungileyo kuzo zonke iintlanga.—Marko 13:10.
Ukungenelwa Kwisohlwayo Nakuqeqesho
15. Kutheni le nto uYesu enikela isiluleko esinamandla kumaKristu aseLawodike, yaye limele lisabele njani eli bandla kuso?
15 Masibuyele kubantu baseLawodike. Baza kusabela njani kwisiluleko esiqatha esivela kuYesu? Ngaba bamele bazive bedimazekile yaye babe noluvo lokuba uYesu akasabafuni njengabalandeli bakhe? Hayi, akumele kube njalo konke konke. Esi sigidimi sihlabela mgama sisithi: “Bonke abo ndinomsa ngabo ndiyabohlwaya ndize ndibaqeqeshe. Ngoko ke yiba nenzondelelo uze uguquke.” (ISityhilelo 3:19) Njengoqeqesho oluvela kuYehova, uqeqesho lukaYesu lungumqondiso wothando lwakhe. (Hebhere 12:4-7) Ibandla laseLawodike limele liyisebenzise kakuhle inkxalabo yakhe enothando lize lisisebenzise isiluleko sakhe. Limele liguquke, liqonda ukuba ukuba dikidiki kwalo kusisono. (Hebhere 3:12, 13; Yakobi 4:17) Abadala balo mabangazithandi izinto eziphathekayo yaye bamele ‘basikhwezele njengomlilo’ isipho abasifumene kuThixo. Ngenxa yokusebenza kwentambiso yamehlo yokomoya, mabahlaziyeke bonke abasebandleni ngokungathi bafumana impepho epholileyo yamanzi abandayo aphuma emthonjeni.—2 Timoti 1:6; IMizekeliso 3:5-8; Luka 21:34.
16. (a) Uthando lukaYesu lubonakaliswa njani namhlanje? (b) Ukuba sifumana isiluleko esinamandla, simele sisabele njani?
16 Kuthekani ngathi namhlanje? UYesu uyaqhubeka ‘ebathanda abakhe abasehlabathini.’ Oku uya kukwenza “yonke imihla de kube sekuphelisweni kwenkqubo yezinto.” (Yohane 13:1; Mateyu 28:20) Uthando lwakhe lubonakaliswa ngodidi lukaYohane lwanamhla nangeenkwenkwezi, okanye abadala, abasebandleni lamaKristu. (ISityhilelo 1:20) Kula maxesha ovavanyo olugqithiseleyo, abadala banomdla wokwenene ekuncedeni thina sonke, abakhulu nabancinane, ukuba sihlale ngaphakathi kobuhlanti bolawulo lobuthixo, sixhathise umoya wokuzilawula, ukubawela izinto eziphathekayo nokungcola kokuziphatha okubi kweli hlabathi. Ukuba ngamaxesha athile sifumana isiluleko esinamandla okanye uqeqesho, masikhumbule ukuba “izohlwayo zengqeqesho ziyindlela yobomi.” (IMizekeliso 6:23) Thina sonke asifezekanga yaye simele sikuzondelele ukuguquka kangangoko kufuneka ukuze silungiswe size sihlale sithandwa nguThixo.—2 Korinte 13:11.
17. Ubutyebi bunokuba yingozi njani ngokomoya kuthi?
17 Asimele sivumele ukuthanda izinto eziphathekayo okanye ubutyebi busenze sibe dikidiki. Ubutyebi bunokunceda ekubeni kuvuleke iinkalo ezintsha zenkonzo, kodwa kwakhona bunokuba yingozi. (Mateyu 19:24) Umntu omi kakuhle usenokuba noluvo lokuba akuyomfuneko ukuba abe nenzondelelo kumsebenzi wokushumayela njengabanye, logama nje esenza iminikelo emikhulu ngamaxesha athile. Okanye usenokuba noluvo lokuba ukuba sisityebi kumenza afanelekele amalungelo. Ukongezelela, maninzi amathuba oyolo nawokuzonwabisa avulekele umntu osisityebi angenakufunyanwa ngabanye. Kodwa ezo zinto zidla ixesha yaye zisenokumtyekisa umntu ongaphaphanga kubulungiseleli bamaKristu, ngaloo ndlela zimenza abe dikidiki. Ngamana singayiphepha yonke imigibe enjalo size sihlale ‘sisebenza nzima size sizibhokoxe’ ngentliziyo epheleleyo, sikhangele ekuzuzeni ubomi obungunaphakade.—1 Timoti 4:8-10; 6:9-12.
‘Ukuthabatha Isidlo Sangokuhlwa’
18. Liliphi ithuba uYesu alivulele amaKristu aseLawodike?
18 UYesu uhlabela mgama esithi: “Khangela! Ndimi emnyango ndiyankqonkqoza. Ukuba nabani na uva ilizwi lam aze avule ucango, ndiza kungena endlwini yakhe ndize ndithabathe isidlo sangokuhlwa kunye naye.” (ISityhilelo 3:20) Ukuba amaKristu aseLawodike anokuthi amamkele uYesu ebandleni lawo, uya kuwanceda ayeke ukuba dikidiki!—Mateyu 18:20.
19. Uthetha ukuthini uYesu xa ethembisa ukuba nesidlo sangokuhlwa nebandla laseLawodike?
19 Alithandabuzeki elokuba ukukhankanya kukaYesu isidlo sangokuhlwa kukhumbuza abantu baseLawodike ngamaxesha axa wayenandipha izidlo nabafundi bakhe. (Yohane 12:1-8) Izihlandlo ezinjalo zazisoloko zisizisa iintsikelelo zokomoya kwabo babelapho. Ngokukwanjalo, kwakukho izihlandlo eziphawulekayo emva kokuvuka kukaYesu xa wayekunye nabafundi bakhe esidlweni, zihlandlo ezo ezathi zabomeleza gqitha. (Luka 24:28-32; Yohane 21:9-19) Ngenxa yoko, isithembiso sakhe sokuza kwibandla laseLawodike aze athabathe isidlo sangokuhlwa kunye nalo sisithembiso sokulizisela iingenelo zokomoya ezityebileyo ukuba linokuthi limamkele.
20. (a) Ekuqaleni kwemini yeNkosi, yintoni ebe ngumphumo wokuba dikidiki kweNgqobhoko? (b) Isigwebo sikaYesu siyichaphazela njani iNgqobhoko?
20 Isiluleko sikaYesu esinothando esiya kubantu baseLawodike sibaluleke gqitha kumaKristu athanjisiweyo aseleyo namhlanje. Wambi awo ayakhumbula ukuba, ekuqaliseni kwemini yeNkosi, abantu beenkonzo zeNgqobhoko baphola ngendlela eyothusayo. Kunokuba bamkele iNkosi yethu ebuyileyo ngowe-1914, abefundisi bayo bazibandakanya ekubulaleni abantu kwiMfazwe Yehlabathi I, awathi amazwe angama-24 kwangama-28 awayesilwa azibanga engawobuKristu. Hayi indlela elilikhulu ngayo ityala labo legazi! Ebudeni beMfazwe Yehlabathi II, nayo eyayisiliwa ubukhulu becala yiNgqobhoko, izono zabantu bonqulo lobuxoki kwakhona “zafumba zada zafikelela ezulwini.” (ISityhilelo 18:5) Ngokubhekele phaya, abefundisi baye babunikela umva uBukumkani bukaYehova obuzayo ngokuxhasa uManyano Lwezizwe, iZizwe Ezimanyeneyo, nemibutho yobuhlanga nevukelayo, ekungekho namnye kuyo onokuzicombulula iingxaki zoluntu. Kudala uYesu wabachasayo abefundisi, ebagweba ngokuqatha aze abaphosele kude, kanye njengokuba umlobi elahla intlanzi engafunekiyo ebanjiswe ngumnatha wakhe. Imeko elusizi yeecawa zeNgqobhoko namhlanje ingqinela ukuba igwetyiwe. Ngamana ukubhangiswa kwayo kokugqibela kungaba sisilumkiso kuthi!—Mateyu 13:47-50.
21. Ukususela ngowe-1919 ukusa phambili, amaKristu kwibandla lokwenyaniso asabele njani kumazwi kaYesu aya kumaKristu aseLawodike?
21 Kwanaphakathi kwibandla lokwenyaniso, bekukho abantu abathile abadikidiki abafana nesiselo esingeshushu ngokufudumezayo nesingabandi ngendlel’ ehlaziyayo. Kodwa uYesu usalithanda ngokufudumeleyo ibandla lakhe. Uzenza afumaneke kumaKristu asabela ngobubele, ibe amaninzi aye amamkela, ngokungathi amamkelela kwisidlo sangokuhlwa. Ngenxa yoko, ukususela ngowe-1919 ukusa phambili amehlo awo aye avulwa ukuze abone intsingiselo yeziprofeto zeBhayibhile. Anandiphe ithuba lokhanyo olukhulu.—INdumiso 97:11; 2 Petros 1:19.
22. Sisiphi esinye isidlo sangokuhlwa esiseza kubakho ekusenokwenzeka ukuba uYesu wayecinga ngaso, yaye ngoobani abaya kuba nesabelo kuso?
22 Xa uYesu wayethetha nabaseLawodike, kusenokwenzeka ukuba wayecinga ngesinye isidlo sangokuhlwa. Kamva kwiSityhilelo sifunda oku: “Banoyolo abo bamenyelwe kwisidlo sangokuhlwa somtshato weMvana.” Esi sisidlo esizukileyo soloyiso nesokudumisa uYehova emva kokuba egwebe unqulo lobuxoki—isidlo sikaKristu nomtshakazi wakhe olinani elipheleleyo elili-144 000 ezulwini. (ISityhilelo 19:1-9) Amalungu asabelayo elo bandla laseLawodike lamandulo—nabazalwana abathembekileyo bakaKristu Yesu namhlanje, abanxibe izambatho ezicocekileyo ukuze bafaniswe njengamaKristu okwenyaniso athanjisiweyo—bonke baya kudla kunye noMyeni wabo kweso sidlo sangokuhlwa. (Mateyu 22:2-13) Olunjani lona ukhuthazo ukuba namandla olwenzelwe ukuba babe nenzondelelo baze baguquke!
Itrone Yaboyisileyo
23, 24. (a) UYesu uthetha ngawuphi umvuzo ongakumbi? (b) UYesu wahlala nini kwitrone yakhe njengoMesiya, ibe waqalisa nini ukugweba abantu abathi bangamaKristu? (c) Sisiphi isithembiso esimangalisayo esenziwa nguYesu kubafundi bakhe xa wasungula iSikhumbuzo sokufa kwakhe?
23 UYesu uthetha ngomvuzo ongakumbi, esithi: “Lowo woyisayo ndiza kumnika ukuba ahlale nam phantsi kwitrone yam, kwanjengoko nam ndoyisayo ndaza ndahlala phantsi noBawo kwitrone yakhe.” (ISityhilelo 3:21) Ukuze kuzaliseke amazwi kaDavide akwiNdumiso 110:1, 2, uYesu ongumgcini wengqibelelo, akuba eloyisile ihlabathi, wavuswa ngowama-33 C.E. waza waphakanyiswa ukuze ahlale noYise kwitrone Yakhe yasezulwini. (IZenzo 2:32, 33) Ngomnye unyaka obalulekileyo, ngowe-1914, uYesu wafika ukuze ahlale kwitrone yakhe njengoMesiya noKumkani noMgwebi. Ngokucacileyo umgwebo waqalisa ngowe-1918 kubantu ababesithi bangamaKristu. Aboyisi abathanjisiweyo ababefe ngaphambi kwelo xesha babeya kuvuswa baze babe kunye noYesu eBukumkanini bakhe. (1 Petros 4:17) Wayebathembise oku xa wayesungula iSikhumbuzo sokufa kwakhe, esithi kubafundi bakhe: “Ndenza umnqophiso nani, kanye njengoko uBawo enze umnqophiso nam, wobukumkani, ukuze nidle, nisele etafileni yam ebukumkanini bam, nize nihlale ezitroneni ukuze nigwebe izizwe ezilishumi elinesibini zakwaSirayeli.”—Luka 22:28-30.
24 Esinjani sona ukumangalisa isabelo—ukuhlala noKumkani olawulayo ebudeni ‘bokudalwa okutsha’ uze wabelane naye, ngenxa yedini lakhe eligqibeleleyo, ekwenzeni ihlabathi loluntu oluthobelayo lifumane imfezeko yase-Eden! (Mateyu 19:28; 20:28) Njengokuba uYohane esazisa, uYesu wenza abo boyisileyo babe ‘ngookumkani nababingeleli kuThixo wakhe noYise,’ ukuze bahlale ezitroneni ezingqonge itrone kaYehova ezukileyo yasezulwini. (ISityhilelo 1:6; 4:4) Thina sonke—enoba singabathanjiswa okanye singabebutho lomhlaba omtsha elinethemba lokuba nesabelo ekubuyiseleni iParadesi—masiwafake entliziyweni amazwi kaYesu aya kubantu baseLawodike!—2 Petros 3:13; IZenzo 3:19-21.
25. (a) Njengokuba ebesenjenjalo nakwizigidimi ezingaphambilana, uYesu usiqukumbela njani isigidimi sakhe esiya eLawodike? (b) AmaKristu namhlanje amele asabele njani kumazwi kaYesu aya kwibandla laseLawodike?
25 Njengokuba ebesenjenjalo nakwizigidimi ezingaphambilana, uYesu uqukumbela esi ngamazwi esiluleko athi: “Lowo unendlebe makakuve oko ukutshoyo umoya kuwo amabandla.” (ISityhilelo 3:22) Siphila kwixesha lesiphelo. Budandalazile ubungqina bokuba iNgqobhoko ayinaluthando. Ngokwahlukileyo koku, ngamana thina njengamaKristu okwenyaniso singasabela ngenzondelelo kwisigidimi sikaYesu esiya kwibandla laseLawodike, ewe, sisabele kuzo zonke izigidimi ezisixhenxe zeNkosi yethu eziya emabandleni. Oku sinokukwenza ngokuba nesabelo ngamandla ekuzalisekiseni isiprofeto sikaYesu esikhulu esingomhla wethu, esithi: “Kwaye ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga; kwandule ke kufike ukuphela.”—Mateyu 24:12-14.
26. Uphinda athethe nini uYesu ngokungqalileyo noYohane, kodwa yiyiphi into aba nenxaxheba kuyo?
26 Isiluleko sikaYesu esiya kumabandla asixhenxe siphelile. Akaphindi athethe noYohane kwiSityhilelo de kube kwisahluko sokugqibela; kodwa uba nenxaxheba kwimibono emininzi, ngokomzekelo, ekuphumezeni imigwebo kaYehova. Ngoku masithelele udidi lukaYohane ekuhlolisiseni umbono wesibini ophawulekayo otyhilwa yiNkosi uYesu Kristu.
[Umbhalo osemazantsi]
a Ezi ndawo ziye zavunjululwa ngabembi bezinto zakudala kwindawo eyayineLawodike.
[Ibhokisi ekwiphepha 73]
Ukuthanda Izinto Eziphathekayo Akubobulumko
Ngowe-1956 umbhali wemihlathi yamaphephandaba wabhala wathi: “Kuqikelelwa ukuba kwinkulungwane edluleyo umntu nje oqhelekileyo wayenezinto ezingama-72 azifunayo, kodwa kuzo zazili-16 kuphela ezaziyimfuneko ngokwenene. Namhlanje kuqikelelwa ukuba umntu oqhelekileyo unezinto ezingama-474 azifunayo, kodwa zingama-94 kuphela eziyimfuneko ngokwenene. Kwinkulungwane edluleyo, zazingama-200 kuphela izinto ezazibhengezwa ngabarhwebi—kodwa namhlanje zingama-32 000 izinto ezibhengezwayo kwezorhwebo. Izinto eziyimfuneko ngokwenene emntwini zimbalwa—izinto ezingabalulekanga azifunayo, azinasiphelo.” Namhlanje, abantu bahlohlwa ngengcamango yokuba ukuba sisityebi yeyona nto ibalulekileyo ebomini. Ngaloo ndlela, abaninzi bayalityeshela icebiso lobulumko leNtshumayeli 7:12 elithi: “Ubulumko buyakhusela njengokuba nemali ikhusela; kodwa ingenelo yolwazi kukuba ubulumko bubagcina bephila abo banabo.”
[Umfanekiso okwiphepha 67]
Amanzi awayefika eLawodike ayenokuba dikidiki ngendlela engathandekiyo. AmaKristu aseLawodike ayenomoya odikidiki ngendlela enganelisiyo