Isahluko 27

Ukuzalwa KoBukumkani BukaThixo!

Umbono 7—ISityhilelo 12:1-17

Umbandela: Umfazi wasezulwini uyazala, uMikayeli ulwa noSathana aze amphosele emhlabeni

Ixesha lokuzaliseka: Ukususela kwixesha lokubekwa etroneni kukaKristu Yesu ngowe-1914 ukuza kuthi ga kwimbandezelo enkulu

1. Ukuqonda imiqondiso echazwe kwiSityhilelo isahluko 12 ukuya kwese-14 kuya kusinceda njani?

IMFIHLELO engcwele kaThixo ityhiliwe. (ISityhilelo 10:7) UBukumkani bukaYehova obulawulwa nguMesiya wakhe ngoku buyinto yokwenene gqitha. Buyalawula! Ubukho babo buthetha intshabalalo kuSathana nembewu yakhe noloyiso oluzukileyo lweMbewu yentlangano kaThixo yasezulwini. Noko ke, ingelosi yesixhenxe ayikagqibi ukuvuthela ixilongo layo, kuba isenokuninzi ngakumbi eza kusityhilela kona mayela noyeha wesithathu. (ISityhilelo 11:14) Imiqondiso echazwe kwiSityhilelo isahluko 12 ukuya kwese-14 iya kusinceda silwenze banzi uxabiso lwethu ngako konke oko kubandakanyekileyo kuloo yeha nasekugqityweni kwemfihlelo engcwele kaThixo.

2. (a) Nguwuphi umqondiso omkhulu obonwa nguYohane? (b) Yatyhilwa nini intsingiselo yomqondiso omkhulu?

² Ngoku uYohane ubona umqondiso omkhulu—eyona nto ibangela umdla gqitha kubantu bakaThixo. Lo mqondiso utshayelela umbono ochulumancisayo wesiprofeto, intsingiselo yawo eyapapashwa okokuqala kwinkupho yeMboniselo (yesiNgesi) kaMatshi 1, 1925, kwinqaku elalinomxholo othi “Ukuzalwa Kohlanga” yaza ke yaphinda yapapashwa ngowe-1926 kwincwadi ethi Deliverance. Olu lwazi luqaqambileyo lweBhayibhile lwaba luphawu olungokwembali ekuhambeleni phambili komsebenzi kaYehova. Ngoko masimvumele uYohane asichazele ngesi siganeko njengoko siqalisa ukutyhilwa: “Yaye kwabonakala umqondiso omkhulu ezulwini, umfazi evathiswe ngelanga, inyanga ingaphantsi kweenyawo zakhe, entloko kuye isisithsaba seenkwenkwezi ezilishumi elinesibini, yaye wayemithi. Wadanduluka esezintlungwini yaye engcungcutheka ekuzaleni.”—ISityhilelo 12:1, 2.

3. Ungubani umfazi obonwa ezulwini?

³ Kokokuqala ukuba uYohane abone umfazi ezulwini. Kambe ke, akangomfazi wokoqobo. Kunoko, ungumqondiso, okanye umfuziselo. (ISityhilelo 1:1) Ufuzisela ntoni? Kwiziprofeto eziphefumlelweyo, maxa wambi abafazi bamela iintlangano “ezitshate” nabantu ababalaseleyo. KwiZibhalo zesiHebhere, kwakuthethwa ngoSirayeli njengomfazi kaYehova uThixo. (Yeremiya 3:14) KwiZibhalo zesiGrike, ibandla lamaKristu athanjisiweyo kuthethwa ngalo njengomtshakazi kaKristu. (ISityhilelo 21:9-14) Umfazi uYohane ambonayo apha ukwatshate nothile, yaye sele ezala. Ungubani umyeni wakhe? Kaloku, kamva umntwana wakhe “wathatyathelwa kuThixo nakwitrone yakhe.” (ISityhilelo 12:5) Ngaloo ndlela uYehova ubanga lo mntwana njengowakhe. Ngoko ke, umfazi obonwa nguYohane umele ukuba ngumfazi kaYehova wokomfuziselo.

4. Bangoobani oonyana bomfazi kaThixo wokomfuziselo, yaye umpostile uPawulos umbiza njani umfazi obonwa nguYohane?

⁴ Malunga neenkulungwane ezisibhozo ngaphambi koku, uYehova wayethethe nalo mfazi wokomfuziselo, esithi: “Bonke oonyana bakho baya kufundiswa nguYehova.” (Isaya 54:5, 13) UYesu wacaphula esi siprofeto waza wabonisa ukuba aba nyana yayingabalandeli bakhe abathembekileyo, abathi kamva bayila ibandla lamaKristu athanjisiweyo. (Yohane 6:44, 45) Ngoko amalungu eli bandla, ekuthethwa ngawo njengoonyana bakaThixo, akwangabantwana bomfazi kaThixo wokomfuziselo. (Roma 8:14) Umpostile uPawulos wongeza inxalenye yokugqibela yenkcazelo xa esithi: “IYerusalem ephezulu ikhululekile, yaye inguma wethu.” (Galati 4:26) Ngoko, “umfazi” obonwa nguYohane, ‘yiYerusalem ephezulu.’

5. Ekubeni umfazi kaYehova wokomfuziselo enesithsaba seenkwenkwezi ezili-12, ngenene iyintoni iYerusalem ephezulu?

⁵ Noko ke, kanye kanye iyintoni iYerusalem ephezulu? Ekubeni uPawulos wathetha ngayo ‘njengephezulu,’ noYohane eyibona isezulwini, ngokucacileyo ayisosixeko sasemhlabeni; yaye ayifani ‘neYerusalem Entsha,’ ekubeni loo ntlangano ingumtshakazi kaKristu, kungekhona umfazi kaYehova. (ISityhilelo 21:2) Phawula ukuba unesithsaba seenkwenkwezi ezili-12. Inani elilishumi elinambini linxulunyaniswa nokuphelela ngokwentlangano.a Ngoko kubonakala ukuba ezi nkwenkwezi zili-12 zibonisa ukuba ulilungiselelo elingokwentlangano ezulwini, kanye njengokuba yayinjalo iYerusalem yamandulo emhlabeni. IYerusalem ephezulu yintlangano kaYehova ekwindalo iphela yezidalwa zomoya esebenza njengomfazi wakhe, ekukhonzeni yena nasekuveliseni inzala.

6. (a) Yintoni eboniswa sisibakala sokuba umfazi obonwa nguYohane uthiwe wambu ngelanga, unenyanga ngaphantsi kweenyawo zakhe, yaye unesithsaba seenkwenkwezi? (b) Ifuzisela ntoni inimba yomfazi omithiyo?

⁶ UYohane ubona lo mfazi ethiwe wambu ngelanga nekukho inyanga phantsi kweenyawo zakhe. Xa sisongezelela nesithsaba sakhe seenkwenkwezi, ungqongwe ngokupheleleyo zizikhanyiso zasezulwini. Inkoliseko kaThixo ikhanya kuye imini nobusuku. Onjani ukufaneleka umfuziselo wentlangano kaYehova ezukileyo yasezulwini! Kwakhona ukhulelwe, unyamezele inimba. Ukukhalela kwakhe uncedo lukaThixo kubonisa ukuba lifikile ixesha lokuba azale. EBhayibhileni inimba idla ngokufuzisela umsebenzi onzima ofunekayo ukuze kuveliswe umphumo obalulekileyo. (Thelekisa iNdumiso 90:2; IMizekeliso 25:23; Isaya 66:7, 8.) Alithandabuzeki elokuba inimba elolu hlobo yabakho njengoko intlangano kaYehova yasezulwini yayilungiselela oku kuzala kungokwembali.

Inamba Enkulu Ebomvu

7. Uyintoni omnye umqondiso obonwa nguYohane ezulwini?

⁷ Yintoni ebonwa nguYohane ngokulandelayo? “Kwabonakala omnye umqondiso ezulwini, yaye, khangela! nantso inamba enkulu embala ubumlilorha, ineentloko ezisixhenxe neempondo ezilishumi nakwiintloko zayo izizithsaba ezisixhenxe; kwaye umsila wayo urhuqa isinye kwisithathu seenkwenkwezi zezulu, yaza yaziphosa phantsi emhlabeni. Inamba leyo yema phambi komfazi owayesele eza kuzala, ukuze, xa athe wazala, imqwenge umntwana wakhe.”—ISityhilelo 12:3, 4.

8. (a) Ingubani inamba enkulu ebomvu? (b) Kubonisa ntoni ukuba neentloko ezisixhenxe kwenamba, iimpondo ezilishumi nesithsaba kwintloko nganye?

⁸ Le namba nguSathana, “inyoka yantlandlolo.” (ISityhilelo 12:9; Genesis 3:15) Ungumtshabalalisi owoyikekayo—inamba eneentloko ezisixhenxe, okanye umqwengi, onokuliginya ngokupheleleyo ixhoba lakhe. Hayi indlela abonakala engaqhelekanga ngayo! Ezo ntloko zisixhenxe nezo mpondo zilishumi zibonisa ukuba ungumyili werhamncwa lobupolitika eliza kuchazwa kungekudala kwiSityhilelo isahluko 13. Nalo eli rhamncwa lineentloko ezisixhenxe neempondo ezilishumi. Ekubeni uSathana enesithsaba kwintloko nganye—ezisixhenxe xa zizonke—sinokuqiniseka ukuba amagunya ehlabathi amelwa lelo rhamncwa ebephantsi kolawulo lwakhe. (Yohane 16:11) Iimpondo ezilishumi zingumfuziselo ofanelekileyo wokuphelela kwegunya analo kweli hlabathi.

9. Yintoni eboniswa sisibakala sokuba umsila wenamba “urhuqa isinye kwisithathu seenkwenkwezi zezulu” ukuza emhlabeni?

⁹ Inamba inegunya kwanakummandla womoya. Ngomsila wayo, ‘irhuqa isinye kwisithathu seenkwenkwezi zezulu.’ Iinkwenkwezi zinokumela iingelosi. (Yobhi 38:7) Ukukhankanywa ‘kwesinye kwisithathu’ bekuya kubethelela ukuba inani elikhulu leengelosi liye lalahlekiswa nguSathana. Zathi zakuba phantsi kolawulo lwakhe, azabi nakuphuncula. Zazingenakubuyela kwintlangano kaThixo engcwele. Zaba ziidemon, ngokungathi kunjalo, zirhuqwa nguSathana ukumkani wazo, okanye umlawuli wazo. (Mateyu 12:24) USathana wakwaziphosa phantsi emhlabeni. Ngokungathandabuzekiyo oku kubhekisela kumhla kaNowa ngaphambi koMkhukula, xa uSathana walukuhla oonyana bakaThixo abangathobeliyo ukuba baye emhlabeni baze bahlalisane neentombi zabantu. Njengesohlwayo, ezi ‘ngelosi zonayo’ ziye zaphoswa nguThixo kwimeko enjengeyentolongo ebizwa ngokuba yiTartaro.—Genesis 6:4; 2 Petros 2:4; Yude 6.

10. Ziziphi iintlangano ezichaseneyo ezithi zibonakale, yaye kutheni inamba ifuna ukuqwenga umntwana xa umfazi emzala?

¹⁰ Ngaloo ndlela, iintlangano ezimbini ezichaseneyo ziye zabonakala ngokucacileyo—intlangano kaYehova yasezulwini njengoko ifanekiselwa ngumfazi nentlangano kaSathana yeedemon ecel’ umngeni ulongamo lukaThixo. Imbambano enkulu yolongamo imele izinziswe. Kodwa imele izinziswe njani? USathana, osarhuqa iidemon, ufana nerhamncwa elikhohlakeleyo elihlasela amaxhoba nelifunzele kwinto elinokuyibamba njengexhoba lalo. Ulindele umfazi ukuba azale. Ufuna ukuqwenga olu sana lulindelweyo kuba uyazi ukuba luzisa isisongelo esikhulu kubukho bakhe obuqhubekayo nobobo behlabathi alilawulayo.—Yohane 14:30.

Unyana, Inkwenkwe

11. UYohane ukuchaza njani ukuzalwa komntwana womfazi, yaye kutheni le nto lo mntwana ebizwa ngokuba ‘ngunyana, inkwenkwe’?

¹¹ Ixesha elimiselweyo lokuba iintlanga zilawule ngaphandle kokuphazanyiswa nguThixo lafikelela esiphelweni ngowe-1914. (Luka 21:24) Kwandula ke, ngexesha elifanelekileyo, umfazi azale umntwana: “Wazala unyana, inkwenkwe, oya kuzalusa zonke iintlanga ngentonga yentsimbi. Yaye umntwana wakhe wathatyathelwa kuThixo nakwitrone yakhe. Waza umfazi wasabela entlango, apho anendawo ayilungiselelwe nguThixo, ukuba bamondle apho iintsuku eziliwaka elinamakhulu amabini anamashumi amathandathu.” (ISityhilelo 12:5, 6) Lo mntwana ‘ngunyana, inkwenkwe.’ Kutheni le nto uYohane ephindaphinda amabinzana afanayo? Oku ukwenza ukuze abonise ukufaneleka kwalo mntwana, ubuchule bakhe bokulawula iintlanga ngamandla afanelekileyo. Kwakhona kubethelela indlela esikhulu ngayo nesivuyisa ngayo esi sihlandlo sokuzala! Kunendima ephambili ekugqityweni kwemfihlelo engcwele kaThixo. Ewe, lo mntwana uyinkwenkwe uya kude ‘azaluse zonke iintlanga ngentonga yentsimbi’!

12. (a) KwiiNdumiso, yintoni uYehova ngokuprofetayo awayithembisayo ngoYesu? (b) Kufuzisela ntoni ukuzala komfazi unyana ‘oza kuzalusa zonke iintlanga ngentonga yentsimbi’?

¹² Ngoku, ngaba elo binzana livakala liqhelekile? Ewe, uYehova ngokuprofetayo wathembisa oku ngoYesu: “Uya kuziqhekeza ngentonga yobukhosi yentsimbi, ngokungathi sisitya sombumbi uya kuziqhekeza zibe ziingceba.” (INdumiso 2:9) Kwakhona kwaprofetwa kwathiwa ngaye: “Intonga yamandla akho uYehova uya kuyithumela iphuma eZiyon, esithi: ‘Hamba usoyisa phakathi kweentshaba zakho.’” (INdumiso 110:2) Ngoko ke, ukuzala okubonwa nguYohane kumquka ngokupheleleyo uYesu Kristu. Kodwa, asikokuzalwa kukaYesu yintombi enyulu emva phayaa ngaphambi kwenkulungwane yokuqala yeXesha lethu Eliqhelekileyo; yaye kwakungabhekiseli ekuvuselweni kwakhona kukaYesu kubomi bomoya ngowama-33 C.E. Ngokungakumbi, akubhekiseli ekwenziweni kwakhe kumila kumbi. Kunoko, kukuzalwa koBukumkani bukaThixo ngowe-1914 njengento yokwenene, ngoYesu—osezulwini ngoku kangangeenkulungwane eziphantse zibe ngama-20—nobekwe etroneni njengoKumkani.—ISityhilelo 12:10.

13. Kuthetha ntoni ‘ukuthatyathelwa komntwana oyinkwenkwe kuThixo nakwitrone yakhe’?

¹³ UYehova wayengenakuze amvumele uSathana ukuba aqwenge umfazi Wakhe okanye unyana Wakhe owayesandul’ ukuzalwa! Ngethuba lokuzalwa kwakhe, lo mntwana uyinkwenkwe ‘uthatyathelwa kuThixo nakwitrone yakhe.’ Ngaloo ndlela ukhuselwa ngokupheleleyo nguYehova oya kubunyamekela ngokupheleleyo obu Bukumkani busandul’ ukuzalwa, obusisixhobo Sakhe sokungcwaliswa kwegama Lakhe elingcwele. Kwangaxeshanye, umfazi ubalekela endaweni ayilungiselelwe nguThixo entlango. Iinkcukacha ezingakumbi ngako oku zochazwa kamva! Ngoku uSathana ulungiselelwe isiganeko esibalulekileyo esiya kubangela kungabi nakwenzeka ngokupheleleyo ukuba aphinde asongele uBukumkani ezulwini. Siyintoni eso siganeko?

Imfazwe Ezulwini!

14. (a) Njengoko uYohane echaza, sisiphi isiganeko esibangela kungabi nakwenzeka ngoSathana ukuba aphinde asongele uBukumkani? (b) USathana needemon zakhe bapheleliselwa kuwuphi ummandla?

¹⁴ UYohane usixelela oku: “Kwabakho imfazwe ezulwini: UMikayeli neengelosi zakhe balwa idabi nenamba, yazilwela nayo inamba kunye neengelosi zayo kodwa ayizange yoyise, azabi safunyanelwa ndawo ezulwini. Ngoko yaphoswa phantsi inamba enkulu, inyoka yantlandlolo, leyo ibizwa ngokuba nguMtyholi, noSathana, lowo ulahlekisa umhlaba omiweyo uphela; waphoswa phantsi emhlabeni, neengelosi zakhe zaphoswa phantsi kunye naye.” (ISityhilelo 12:7-9) Ngoko njengesiganeko esiphawulekayo sokugqitywa kwemfihlelo engcwele kaThixo, uSathana uyagxothwa, ukhutshelwa ngaphandle kwezulu, yaye iidemon zakhe ziphoselwa phantsi emhlabeni kunye naye. Lowo ulahlekise elimiweyo liphela ngokokude abe nguthixo walo ekugqibeleni upheleliselwa kulo mmandla osisijikelezi-langa, apho imvukelo yakhe yaqalisa khona.—2 Korinte 4:3, 4.

15, 16. (a) Ungubani uMikayeli, yaye sazi njani? (b) Kutheni kufanelekile nje ukuba uMikayeli abe ngulowo uphosa uSathana phantsi ephuma ezulwini?

¹⁵ Ngoobani abafeza olu loyiso lukhulu egameni likaYehova? IBhayibhile ithi nguMikayeli neengelosi zakhe. Kodwa ungubani lo Mikayeli? Igama elithi ‘Mikayeli’ lithetha ukuthi “Ngubani OnjengoThixo?” Ngoko uMikayeli umele ukuba unomdla ekuthetheleleni ulongamo lukaYehova ngokungqina ukuba akukho mntu unokuthelekiswa Naye. Kwindinyana yesi-9 kaYude, ubizwa ngokuba ‘nguMikayeli isiphatha-zingelosi.’ Okubangel’ umdla kukuba, isibizo esithi “isiphatha-zingelosi” sisetyenziswe kwenye indawo eBhayibhileni ukubhekisela kumntu omnye kuphela: uYesu Kristu.b UPawulos uthi ngaye: “INkosi ngokwayo iya kuhla ivela ezulwini, idanduluke ngezwi lesiphatha-zingelosi nangexilongo likaThixo.” (1 Tesalonika 4:16) Isibizo esithi ‘isiphatha-zingelosi’ sithetha “inkosi yeengelosi.” Ngoko akumangalisi ukuba iSityhilelo sithethe ‘ngoMikayeli neengelosi zakhe.’ Ezinye iindawo apho iBhayibhile ikhankanya khona iingelosi njengeziphantsi komkhonzi kaThixo olilungisa zibhekisela kuYesu. Ngaloo ndlela, uPawulos uthetha ‘ngokutyhileka kweNkosi uYesu, ivela ezulwini kunye neengelosi zayo ezinamandla.’—2 Tesalonika 1:7; bona kwanoMateyu 24:30, 31; 25:31.

¹⁶ Ezi zibhalo kwanezinye zisikhokelela kwisigqibo esingaphephekiyo sokuba uMikayeli yiNkosi uYesu Kristu ekwisigxina sakhe sasezulwini. Ngoku, kwimini yeNkosi, akasavakalisi nje la mazwi kuSathana: “Ngamana uYehova angakukhalimela.” Ekubeni eli ilixesha lokugweba, uYesu, njengoMikayeli, uphosa phantsi uSathana ongendawo neengelosi zakhe eziziidemon ebakhupha ezulwini. (Yude 9; ISityhilelo 1:10) Kufaneleke kunene ukuba ibe nguye owenza oku, njengoko enguKumkani osandul’ ukumiselwa. UYesu ukwayiMbewu, eyathenjiswa emva phayaa e-Eden, eya kuthi ekugqibeleni ityumze intloko yeNyoka, ngaloo ndlela iyitshabalalisa ngonaphakade. (Genesis 3:15) Ngokukhupha uSathana ezulwini, uYesu sele esondele koko kutyumza kokugqibela.

“Chulumancani, Nina Mazulu”

17, 18. (a) Indlela izulu elisabela ngayo ichazwa njani nguYohane mayela nokuwa kukaSathana ezulwini? (b) Lisenokuba livela phi ilizwi elikhulu eliviwa nguYohane?

¹⁷ UYohane uchaza indlela asabela ngovuyo ngayo amazulu koku kuwa kukaSathana kukhulu: “Ndaza ndeva ilizwi elikhulu ezulwini lisithi: ‘Ngoku lufikile usindiso namandla nobukumkani boThixo wethu negunya likaKristu wakhe, ngenxa yokuba uye waphoswa phantsi ummangaleli wabazalwana bethu, obamangalela imini nobusuku phambi koThixo wethu! Yaye bamoyisile ngenxa yegazi leMvana nangenxa yelizwi lokungqina kwabo, ibe abayithandanga imiphefumlo yabo kwanaxa bejamelene nokufa. Ngoko chulumancani, nina mazulu nani nihlala kuwo!’”—ISityhilelo 12:10-12a.

¹⁸ Lelikabani elo lizwi likhulu liviwa nguYohane? IBhayibhile ayilichazi. Kodwa ukudanduluka okufanayo okuchazwe kwiSityhilelo 11:17 kwakuvela kubadala abangama-24 abavusiweyo nabakwizigxina zabo zasezulwini, apho ngoku banokumela khona i-144 000 labangcwele. (ISityhilelo 11:18) Yaye ekubeni abakhonzi bakaThixo abathanjisiweyo abatshutshiswayo abasesemhlabeni apha kuthethwa ngabo ‘njengabazalwana bethu,’ la mazwi anokuba aphuma kwakubantu abafanayo. Alithandabuzeki elokuba aba bathembekileyo nabo banokudanduluka, ekubeni uvuko lwabo beluya kulandela kungekudala emva kokuba uSathana nemikhosi yakhe eziidemon bekhutshiwe ezulwini.

19. (a) Ukugqitywa kwemfihlelo engcwele kaThixo kuvulela indlela yokuba uYesu enze ntoni? (b) Yintoni eboniswa kukubizwa kukaSathana ngokuba ‘ungummangaleli wabazalwana bethu’?

¹⁹ Ukugqitywa kwemfihlelo engcwele kaThixo kubangela ukuba uYesu abe negunya kuBukumkani bukaYehova. Ngako oko ivuliwe indlela yokuba uThixo aphumeze injongo yakhe enkulu yokuhlangula uluntu oluthembekileyo. UYesu uzisa usindiso kungekuphela nje kubafundi bakhe aboyika uThixo ngoku abasemhlabeni kodwa kwanakwizigidi ezingenakubaleka zabafileyo ezikhunjulwayo nguThixo. (Luka 21:27, 28) Ukubizwa kukaSathana ngokuba ‘ungummangaleli wabazalwana bethu’ kubonisa ukuba, nakubeni izimangalo zakhe nxamnye noYobhi zangqineka zibubuxoki, waqhubeka ecel’ umngeni ingqibelelo yabakhonzi bakaThixo abasemhlabeni. Kucacile ukuba, kwizihlandlo ezininzi waphindaphinda isityholo sokuba umntu uya kuncama yonke into anayo ngenxa yomphefumlo wakhe. Hayi indlela asilele ngokupheleleyo ngayo uSathana!—Yobhi 1:9-11; 2:4, 5.

20. AmaKristu athembekileyo amoyise njani uSathana?

²⁰ AmaKristu athanjisiweyo, ajongwa engamalungisa “ngenxa yegazi leMvana,” ayaqhubeka engqinela uThixo noYesu Kristu phezu kwazo nje iintshutshiso. Kwiminyaka engaphezu kwe-120, olu didi lukaYohane belusalatha kwiimbambano ezibalulekileyo ezaziquka ukuphela kwamaXesha eeNtlanga ngowe-1914. (Luka 21:24) Ibe ngoku isihlwele esikhulu sikhonza ngokunyaniseka ecaleni kwalo. Akukho namnye kwaba ‘owoyika abo babulala umzimba, kodwa bengenako ukubulala umphefumlo,’ njengoko amava amaNgqina kaYehova aye abonisa ngokuphindaphindiweyo kwixesha lethu. Ngomlomo nangehambo efanelekileyo yobuKristu, aye amoyisa uSathana, ngokuzingisileyo emngqina elixoki. (Mateyu 10:28; IMizekeliso 27:11; ISityhilelo 7:9) Xa evuselwa ezulwini, hayi indlela amele ukuba avuya ngayo amaKristu athanjisiweyo, ekubeni uSathana engasekho apho ukuze amangalele abazalwana bawo! Ngenene, lixesha lokuba yonke imikhosi yeengelosi isabele ngovuyo kolu bizo: “Chulumancani, nina mazulu nani nihlala kuwo!”

Uyeha Wosukuzwano!

21. USathana umzise njani uyeha emhlabeni naselwandle?

²¹ Ekhathazekile ngenxa yoyeha wesithathu, ngoku uSathana uzimisele ukuhlasela uluntu ngolwakhe uhlobo loyeha. “Yeha kuwo umhlaba nakulo ulwandle, ngenxa yokuba uhlile weza kuni uMtyholi, enomsindo omkhulu, esazi ukuba ixesha analo lifutshane.” (ISityhilelo 12:12b) Ukukhutshwa kukaSathana ezulwini ngenene kuthetha uyeha kumhlaba wokoqobo, owonakaliswa ngabantu abazingcayo abaphantsi kolawulo lwakhe. (Duteronomi 32:5) Ngokude kwangakumbi, inkqubo kaSathana ‘yokulawula okanye yokonakalisa’ izisa uyeha kumhlaba wokomfuziselo, ibutho labantu, nakulwandle lokomfuziselo, uluntu olungazolanga. Ebudeni beemfazwe ezimbini zehlabathi, ingqumbo kaSathana yabonakala kwingqumbo yeentlanga ezilawulwa nguye, yaye iindlela ezifanayo zokubonakala kokudubuleka komsindo weedemon ziyaqhubeka zibonakala ukuza kuthi ga kulo mhla—nangona zingayi kuqhubeka zibonakala ithuba elide! (Marko 13:7, 8) Kodwa nakuba amaqhinga kaMtyholi esenokoyikeka, akayi kuze azise umphumo onguyeha wesithathu—osisenzo soBukumkani bukaThixo—oya kuziswa kwintlangano kaSathana ebonakalayo!

22, 23. (a) UYohane uthi kwenzeka ntoni emva kokuba inamba iphoselwe phantsi emhlabeni? (b) Kwenzeka njani ukuba inamba itshutshise ‘umfazi ozele unyana, inkwenkwe’?

²² Ukususela ekukhutshweni kukaSathana okulishwangusha, abazalwana bakaKristu abasesemhlabeni baye bafumana ingqumbo yakhe. UYohane uyachaza esithi: “Ngoko xa inamba yabonayo ukuba iphoswe phantsi emhlabeni, yamtshutshisa umfazi owazala umntwana oyinkwenkwe. Kodwa umfazi wanikwa amaphiko amabini okhozi olukhulu, ukuze aphaphazele aye entlango kwindawo yakhe; apho kulapho ondliwa khona ixesha namaxesha nesiqingatha sexesha ekude nobuso benyoka.”—ISityhilelo 12:13, 14.

²³ Apha lo mbono uchaza into ebichazwe kwindinyana yesi-6, ebonisa ukuba emva kokuzalwa kwalo mntwana wakhe, umfazi ubalekela entlango, kude nenamba. Sisenokuzibuza ukuba inamba inokumtshutshisa njani na umfazi, ekubeni umfazi esezulwini nenamba ngoku iphoswe phantsi emhlabeni. Kaloku, khumbula ukuba umfazi unabantwana apha emhlabeni, imbewu yakhe. Kamva kulo mbono, saziswa ukuba uSathana ukhuphela umsindo wakhe kulo mfazi ngokutshutshisa imbewu yakhe. (ISityhilelo 12:17) Okwenzeka kwimbewu yomfazi apha emhlabeni kusenokujongwa njengokwenzeka kumfazi ngokwakhe. (Thelekisa uMateyu 25:40.) Yaye inani elikhulayo lamaqabane embewu apha emhlabeni nalo beliya kufumana kwaezi ntshutshiso.

Uhlanga Olutsha

24. Ziziphi izinto ezehlela aBafundi BeBhayibhile ezifana nezo ahlangulwa kuzo amaSirayeli eYiputa?

²⁴ Ngoxa kwakusiliwa imfazwe yehlabathi yokuqala, abazalwana bakaYesu ngokuthembekileyo baqhubeka nokunikela kwabo ubungqina kangangoko babenako. Oku kwenziwa phezu kwayo nje inkcaso enkulu eyayivela kuSathana nakubaxhasi bakhe abakhohlakeleyo. Ekugqibeleni, ukushumayela ekuhleni kwaBafundi BeBhayibhile kwaphantse kwayekwa. (ISityhilelo 11:7-10) Oko kwenzeka xa behlelwa zizinto ezifana kanye nezo zehlela amaSirayeli eYiputa awathi nawo anyamezela phantsi kwengcinezelo enkulu. UYehova wawasindisa ngokukhawulezileyo, ngokungathi kungamaphiko okhozi, ewasa kwindawo ekhuselekileyo kwintlango yaseSinayi. (Eksodus 19:1-4) Ngokukwanjalo, emva kwentshutshiso ekrakra yowe-1918-19, uYehova wawahlangula amangqina akhe, njengoko emela umfazi wakhe, ewasa kwimeko yokomoya eyayikhuselekile kuwo njengokuba intlango yayinjalo kumaSirayeli. Oku kwaba yimpendulo kwimithandazo yawo.—Thelekisa iNdumiso 55:6-9.

25. (a) Yintoni eyahlanganiswa nguYehova ngowe-1919, kanye njengokuba wahlanganisa amaSirayeli njengohlanga entlango? (b) Ngoobani ababumba olu hlanga, yaye baziswa kweyiphi imeko?

²⁵ Entlango, uYehova wahlanganisa amaSirayeli njengohlanga, ewanyamekela ngokomoya nangokwenyama. Ngokufanayo, ukususela ngowe-1919, uYehova wahlanganisa imbewu yomfazi njengohlanga lokomoya. Oku akumele kubhidaniswe noBukumkani bukaMesiya obebulawula emazulwini ukususela ngowe-1914. Kunoko, olu hlanga lutsha lubunjwe yintsalela yamangqina asemhlabeni athanjisiweyo, awathi aziswa kwimeko yokomoya ezukileyo ngowe-1919. Ekubeni ngoku ayelungiselelwa ‘umlinganiselo wawo wokutya ngexesha elifanelekileyo,’ omelezelwa umsebenzi owawungaphambili.—Luka 12:42; Isaya 66:8.

26. (a) Lide kangakanani ithuba elikhankanywe kwiSityhilelo 12:6, 14? (b) Yayiyintoni injongo yethuba lamaxesha amathathu anesiqingatha, aqala nini, yaye aphela nini?

²⁶ Eli xesha lokuphumla kwembewu yomfazi kaThixo lalilide kangakanani? ISityhilelo 12:6 sithi laliziintsuku ezili-1 260. ISityhilelo 12:14 silibiza eli thuba ngokuba lixesha, amaxesha, nesiqingatha sexesha; ngamanye amazwi, ngamaxesha amathathu anesiqingatha. Enyanisweni, omabini la mabinzana amela iminyaka emithathu enesiqingatha, kuMntla Weikhweyitha asusela entlakohlaza yowe-1919 ukusa ekwindla lowe-1922. Eli yayilithuba lokuhlaziywa nelokulungelelaniswa kwakhona kodidi lukaYohane olubuyiselweyo.

27. (a) Ngokutsho kwengxelo kaYohane, yenza ntoni inamba emva kowe-1922? (b) Yayiyintoni injongo kaSathana ekuvuleleni umkhukula wentshutshiso nxamnye namaNgqina?

²⁷ Inamba ayizange inikezele! “Yaye inyoka yakhupha amanzi anjengomlambo emlonyeni wayo emva komfazi, ukuze imenze arhaxwe ngumlambo.” (ISityhilelo 12:15) Kusingiselwe entwenini ngokuthi “amanzi anjengomlambo,” okanye “umkhukula wamanzi”? (The New English Bible) UKumkani wamandulo uDavide wathetha ngabantu abangendawo ababemchasile ‘njengezikhukula zamadoda angamatshivela’ [“imisinga yoongantweni,” Young]. (INdumiso 18:4, 5, 16, 17) Okukhutshwa nguSathana ngoku ngokukwanjalo yintshutshiso ebangelwa ngabantu abangoongantweni okanye ‘abangamatshivela.’ Emva kowe-1922 uSathana wavulela umkhukula wentshutshiso nxamnye namaNgqina. (Mateyu 24:9-13) Oku kwaquka ugonyamelo lwasemzimbeni, ‘inkathazo eyilwe ngommiselo,’ ukuvalelwa ezintolongweni nokubulawa ngokuxhonywa, ukudutyulwa nokunqunyulwa intloko. (INdumiso 94:20) USathana othotyiweyo, ekubeni wayebandezwe indlela yokufikelela ngokuthe ngqo kumfazi kaThixo ezulwini, ngomsindo wazimisela ukuhlasela nokutshabalalisa imbewu yakhe eseleyo emhlabeni, ngokungqalileyo okanye ngokuyibangela ukuba iphulukane nenkoliseko kaThixo ngokwaphula ingqibelelo yayo. Kodwa uzimiselo lwayo lwangqineka lufana nolo lukaYobhi: “Ndide ndibhubhe andiyi kuyisusa kum ingqibelelo yam!”—Yobhi 27:5.

28. Umkhukula wentshutshiso wayifikelela njani incopho ebudeni beMfazwe Yehlabathi II?

²⁸ Lo mkhukula unenkohlakalo wentshutshiso wafikelela kwinqanaba eliphezulu ebudeni beMfazwe Yehlabathi II. EYurophu amaNgqina anokuba li-12 000 avalelwa kwiinkampu zoxinaniso zamaNazi nasezintolongweni, yaye amalunga nama-2 000 afa. Phantsi kweengqwayingqwayi zemfazwe ezalawula eItali, eJapan, eKorea naseTaiwan, amaNgqina athembekileyo afumana inkohlakalo efanayo. Kwanakumazwe afane abizwe ngokuba ngawolawulo-melo, amaNgqina ahlaselwa ngamaQela amaKatolika, aqatywa itela aza afakwa iintsiba, andula akhutshelwa ngaphandle kwedolophu. Iindibano zamaKristu zazichithachithwa yaye abantwana bamaNgqina babegxothwa ezikolweni.

29. (a) UYohane uluchaza njani uncedo olwaluvela kumthombo ongalindelekanga? (b) Kwenzeka njani ukuba ‘umhlaba uncede umfazi’? (c) Inamba iye yaqhubeka isenza ntoni?

²⁹ Uncedo lwafika luvela kumthombo ongalindelekanga: “Kodwa umhlaba wamnceda umfazi, wawuvula umhlaba umlomo wawo waza wawuginya umlambo inamba eyayiwukhuphe emlonyeni wayo. Yaye inamba yamqumbela umfazi, yaza yaya kwenza imfazwe nabo baseleyo bembewu yakhe, abagcina imiyalelo kaThixo nabanomsebenzi wokungqinela uYesu.” (ISityhilelo 12:16, 17) “Umhlaba”—oothunywashe abakwinkqubo yezinto kaSathana—waqalisa ukuwuginya “umlambo,” okanye “umkhukula.” Ebudeni beminyaka yee-1940 amaNgqina ayesoloko ephuma phambili kwiNkundla Ephakamileyo yaseUnited States, nakumagunya alawulayo kwamanye amazwe, nto leyo eyayixhasa inkululeko yonqulo. Ekugqibeleni, amazwe Amanyeneyo abaginya abaqwengi abangamaNazi nabangamaFasi, nto leyo eyabangela ukukhululeka kwamaNgqina awayeve ubunzima phantsi kolawulo lobuzwilakhe olunenkohlakalo. Iintshutshiso azizange zinqumame ngokupheleleyo, kuba ingqumbo yenamba iqhubekile ukuza kuthi ga namhlanje, yaye isoloko isilwa nabo ‘banomsebenzi wokungqinela uYesu.’ Emazweni amaninzi, amaNgqina anyanisekileyo asesezintolongweni, yaye wambi asafa ngenxa yengqibelelo yawo. Kodwa kwamanye ala mazwe, ngamathuba athile amagunya ayayekelela kwingcinezelo yawo, aze amaNgqina anandiphe umlinganiselo omkhulu ngakumbi wenkululeko.c Ngaloo ndlela, ngokuzalisekisa esi siprofeto, umhlaba uyaqhubeka uginya umlambo wentshutshiso.

30. (a) Umhlaba uye walungiselela uncedo olwaneleyo lokuba kwenzeke ntoni? (b) Ingqibelelo yabantu bakaThixo iphumela entwenini?

³⁰ Ngale ndlela, umhlaba ulungiselele uncedo olwaneleyo ukuze umsebenzi kaThixo usasazwe kumazwe amalunga nama-235 nokuze kuveliswe abashumayeli abathembekileyo beendaba ezilungileyo abangaphezu kwezigidi ezithandathu. Sikunye nabaseleyo bembewu yomfazi, isihlwele esikhulu esiphuma kwizizwe ngezizwe samakholwa amatsha sigcina imithetho kaThixo ngokubhekisele ekwahlukeni ehlabathini, ekuziphatheni ngokucocekileyo, nasekuthandeni abazalwana, yaye sinikela ubungqina ngoBukumkani bukaMesiya. Ingqibelelo yaso iphendula ucelomngeni olungcikivayo lukaSathana, khon’ ukuze kuvakaliswe isilumkiso sokusondela kokufa kukaSathana nenkqubo yakhe yezinto.—IMizekeliso 27:11.

[Imibhalo esemazantsi]

[Ibhokisi ekwiphepha 185]

‘Umhlaba Wawuvula Umlomo Wawo’

Umkhukula kaSathana wentshutshiso uye wavulelwa emazweni amaninzi nxamnye namaKristu athanjisiweyo namaqabane awo. Noko ke, ngokufuthi iziganeko ezenzeke kwinkqubo yezinto kaSathana ziye zaphumela ekubeni umkhukula uginywe.

Umkhukula wokuhlaselwa ngamahlokondiba nokuvalelwa ezintolongweni eUnited States ubukhulu becala waginywa zizigqibo ezithandekayo ezakhutshwa yiNkundla Ephakamileyo ebudeni beminyaka yee-1940.

Ngowe-1945: Intshutshiso enenkohlakalo emazweni alawulwa yiJamani nayiJapan yathintelwa kukoyisa kwamazwe Amanyeneyo kwiMfazwe Yehlabathi II.

Xa kwavalwa umsebenzi wamaNgqina kaYehova kwiRiphabliki yaseDominica, amaNgqina avalelwa ezintolongweni, atywatyushwa aza abethwa ngemiva yemipu. Ngowe-1960 ukuxabana kozwilakhe uRafael Trujillo neCawa yamaRoma Katolika kwakhokelela ekubeni umsebenzi wamaNgqina kaYehova uvulwe.

Ukudutyulwa, ukutshiswa, ukudlwengulwa, ukubethwa, ukuthuthunjiswa nokubulawa kwamaNgqina ebudeni bemfazwe yamakhaya yaseNigeria kwaphela ngowe-1970 xa imikhosi karhulumente yoyisa iphondo elalifuna ukuzimela geqe apho kwakusenzeka khona ezi zinto.

ESpeyin kwahlaselwa amakhaya aza amaKristu ahlawuliswa yaye avalelwa ezintolongweni “ngolwaphulo-mthetho” lokuthetha ngoThixo nokuqhuba iintlanganiso zamaKristu. Ekugqibeleni le ntshutshiso yaphela ngowe-1970, xa amaNgqina kaYehova avunyelwa ukuba abhaliswe ngokusemthethweni, ngenxa yokutshintshwa kwenkqubo karhulumente kwiinkonzo ezingezizo ezobuKatolika.

EPortugal amakhulukhulu amakhaya agqogqwa ngaphandle kwemvume engokomthetho. AmaNgqina enzakaliswa emzimbeni aza aphoswa entolongweni, yaye iiBhayibhile zawo zahluthwa. Obu bugrogrisi ‘baginywa’ xa, ngowe-1974, imvukelo yomkhosi yaphumela ekubeni kutshintshwe urhulumente kwaza kwawiswa umthetho owawuvumela inkululeko yokuhlanganisana.

EArgentina, phantsi korhulumente womkhosi, abantwana bamaNgqina kaYehova bagxothwa ezikolweni, aza amaNgqina kulo lonke elo lizwe abanjwa ngenxa yokushumayela iindaba ezilungileyo. Ekugqibeleni le ntshutshiso yaphela ngowe-1984 xa urhulumente owayelawula ngoko waluvuma ngokusemthethweni uManyano lwamaNgqina kaYehova.

[Isicangca esikwiphepha 183]

1914 Ukuzalwa koBukumkani

1919 Ukuzalwa kohlanga olutsha

1919-1922 Ixesha lokuhlaziywa

1922- Umkhukula wentshutshiso

[Imifanekiso ekwiphepha 182]

Uyeha emhlabeni