Oyena Mhlobo Wethu Ukummandla Womoya

IBHAYIBHILE isinika inkcazelo ecace gca ngabo baphila kummandla womoya. UYehova uThixo wongamile ezulwini. UYesu Kristu unamandla negunya elinganeno kwelikaYehova. Iingelosi ezithembekileyo kuThixo zikhonza njengabalungiseleli bakaThixo nabantu bakhe abasemhlabeni. USathana needemon zakhe bachasa uThixo yaye balahlekisa abantu. Abafi balele kwelabafileyo de uThixo abavuse.

Iidemon Zifuna Sizinqule

Ekubeni abafi bengenabomi, akukho nto inokuzuzwa ngokubanqula. Ukwenzela abafi amadini kuxhasa kuphela ubuxoki bukaSathana needemon.

Ngaba iingelosi zikaThixo zinqwenela ukuba sizinqule? Akunjalo! Iingelosi ezithembekileyo zizukisa uThixo yaye zikhuthaza abantu ukuba benze okufanayo. Izihlandlo ezibini, umpostile uYohane wazama ukunqula iingelosi, kodwa zamkhalimela, zisithi: “Lumka! Musa ukukwenza oko! . . . Nqula uThixo.”—ISityhilelo 19:10; 22:8, 9.

USathana needemon zakhe, ngokwahlukileyo kwiingelosi ezithembekileyo, bafuna ukunqulwa nokuzukiswa. Oku kwangqineka mhla uSathana walinga uYesu xa uYesu wayengumntu emhlabeni. IBhayibhile ithi: “UMtyholi wamthabatha [uYesu] wamsa kwintaba ephakame ngokungaqhelekanga, waza wambonisa zonke izikumkani zehlabathi nozuko lwazo, yaye wathi kuye: ‘Zonke ezi zinto ndiza kukunika ukuba uwa phantsi uze wenze isenzo sonqulo kum.’”—Mateyu 4:8, 9.

UYesu waphendula wathi: “Hamb’ umke, Sathana! Kuba kubhaliwe kwathiwa, ‘NguYehova uThixo wakho omele umnqule, yaye kukuye yedwa omele unikele inkonzo engcwele.’” (Mateyu 4:10) UYesu wayewazi uMthetho kaYehova, yaye wayengafuni ukuwaphula.—Duteronomi 6:13.

Nangona uSathana engazange akwazi ukumenza uYesu amnqule, uye waphumelela kwabanye. Kambe ke, abantu abalibathwana bamnqula ngabom uSathana. Sekunjalo, ngobuqili, ukukhohlisa, ukuxoka nangokuboyikisa uSathana needemon zakhe baye baphembelela abantu abaninzi ukuba balityeshele unqulo olunyulu lukaYehova kangangokuba umpostile uYohane wabhala esithi: “Ihlabathi liphela lilele emandleni alowo ungendawo.” (1 Yohane 5:19) Abo banqula ngokuchaseneyo neLizwi likaThixo bazukisa uSathana, kungekhona uYehova. IBhayibhile iyalumkisa: “Izinto iintlanga ezizibingelelayo zizibingelela kwiidemon, yaye kungekhona kuThixo.”—1 Korinte 10:20.

NguYehova Ofanelwe Kukunqulwa

NguThixo kuphela esifanele simnqule. UYehova waxelela uMoses oku: “Uze ungabi nathixo bambi ngaphandle kwam. Uze ungazenzeli umfanekiso oqingqiweyo‚ nokuba ngowayiphi na into emilise esezulwini phezulu‚ nesemhlabeni phantsi‚ nesemanzini aphantsi komhlaba. Uze ungaqubudi kwezo nto‚ ungazikhonzi: kuba mna Yehova Thixo wakho, ndinguThixo onekhwele.”—Eksodus 20:3-5.

Nangona uYehova enobungangamsha esoyikeka, uyafikeleleka. Umfundi uYakobi wabhala: “Sondelani kuThixo, yaye uya kusondela kuni.” (Yakobi 4:8) Umpostile uPawulos wathi: ‘[UThixo] akakude kuye ngamnye wethu.’ (IZenzo 17:27) Yaye umpostile uYohane wabhala: “Le yintembelo esinayo [kuYehova], yokuba, kungakhathaliseki ukuba kuyintoni na oko sikucelayo ngokuvumelana nokuthanda kwakhe, uyasiva. Ngokubhekele phaya, ukuba siyazi ukuba uyasiva ngokuphathelele nantoni na esiyicelayo, siyazi ukuba simele sibe nazo izinto eziceliweyo ekubeni siye sazicela kuye.”—1 Yohane 5:14, 15.

Phawula ukuba uYohane wabhala ukuba uYehova uya kusinika esikucelayo ukuba sikucela “ngokuvumelana nokuthanda kwakhe.” Ukuze sikwazi oko kukuko ukuthanda kukaThixo, simele sifunde oko kufundiswa yiBhayibhile. AmaNgqina kaYehova aya kukuvuyela ukukunceda ukuba uyazi iBhayibhile.

Njengokuba ufunda okungakumbi ngoYehova, uya kuzuza ulwazi olungakumbi ngabo baphila kummandla womoya. Olu lwazi lukukhulula kwiinkolo nezithethe uSathana azisebenzisayo ukubamba abantu ngoloyiko nangobukhoboka. Ngokuba nolwazi oluchanileyo ngoThixo, uya kufunda ukukholosa ngaye ukuze akuncede uphephe okanye woyise iingxaki zobomi bemihla ngemihla. Unokuba ngumhlobo kaThixo. Yaye kuwe uThixo uya kuba ‘lihlathi, igwiba, ezimbandezelweni afumaneke eluncedo kunene.’—INdumiso 46:1.

Imikhosi Engendawo Iza Kutshatyalaliswa

Ungaze uthandabuze ukuba imikhosi yomoya ethanda okulungileyo iya kuyoyisa imikhosi yemimoya engendawo. Sithetha nje, yaliwa imfazwe kummandla womoya eyayicoca amazulu ngokugxotha uSathana namaqabane akhe angendawo. Incwadi yeSityhilelo ithi: “Yaye kwaqhambuka imfazwe ezulwini: UMikayeli [uYesu Kristu ovusiweyo] neengelosi zakhe balwa idabi nenamba, nenamba nezayo iingelosi yalwa idabi kodwa ayizange yoyise, azabi safunyanelwa ndawo ezulwini. Ngoko yaphoswa phantsi inamba enkulu, inyoka yantlandlolo, leyo ibizwa ngokuba nguMtyholi noSathana, olahlekisa umhlaba omiweyo uphela; waphoswa phantsi emhlabeni, neengelosi zakhe zaphoswa phantsi kunye naye.”—ISityhilelo 12:7-9.

Waba yintoni umphumo waloo mfazwe? Ingxelo ihlabela mgama isithi: “Ngenxa yoku chulumancani, nina mazulu nani nihlala kuwo! Yeha kuwo umhlaba nakulo ulwandle, ngenxa yokuba uMtyholi uhlile weza kuni, enomsindo omkhulu, esazi ukuba unesihlandlo esifutshane sexesha.” (ISityhilelo 12:12) Abo basezulwini babevuya, ekubeni uSathana needemon zakhe babengasekho apho ukuze babangele inkathazo. Noko ke, ukugxothwa kwakhe ezulwini, kuzise ooyeha abangakumbi, neenkathazo ezininzi kwabo basemhlabeni. Ngoku siphila kwixesha likayeha.—2 Timoti 3:1-5.

Ikamva Elingenabo Ubungendawo

Sekunjalo, iBhayibhile isoloko inikela ithemba. Isiqinisekisa ukuba uMtyholi usalelwe “lixesha elincinane” ngaphambi kokuba angasebenzi. Xa oko kusenzeka, uYehova uya kuzisa iintsikelelo ezichulumancisayo kubo bonke abafuna ukuba ngabahlobo bakhe emhlabeni. Qwalasela amadinga akhe ambalwa angekamva:

“Makubekho intabalala yengqolowa ezweni, ise encotsheni yentaba.”—INdumiso 72:16.

“Badle into esetyenzwe zizandla zabo abanyulwa bam. Abayi kuzixhamla ngokulambathayo.”—Isaya 65:22, 23.

“Akayi kuthi ummi wakhona: ‘Ndiyafa.’”—Isaya 33:24.

“Aya kuvulwa amehlo eemfama, zivulwe iindlebe zezithulu. Size sitsibe njengexhama isiqhwala, lumemelele ulwimi lwesidenge.”—Isaya 35:5, 6.

“Kwaye [uThixo] uya kuzisula zonke iinyembezi emehlweni alo, yaye ukufa akusayi kubakho, kungayi kubakho nakukhedama nasikhalo nantlungu kwakhona. Izinto zangaphambili zidlule.”—ISityhilelo 21:4.

“Amalungisa aya kulidla ilifa ilizwe, ahlale kulo ngonaphakade.”—INdumiso 37:29.

NguYehova kuphela, uThixo oyinyaniso, onokuzalisekisa amadinga azukileyo alolo hlobo. Akukho nto inokumthintela ekuphumezeni injongo yakhe. “Ngenxa yokuba kuThixo akukho luvakaliso luya kuba yinto engenakwenzeka.”—Luka 1:37.

[Imifanekiso ekwiphepha 9]

Xa ungumhlobo kaThixo, uya kukunceda ukuba uhlangabezane neengxaki zobomi