IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • re isahl. 38 iphe. 272-279
  • Makadunyiswe UYa Ngenxa Yemigwebo Yakhe!

No video available for this selection.

Sorry, there was an error loading the video.

  • Makadunyiswe UYa Ngenxa Yemigwebo Yakhe!
  • ISityhilelo—Incopho Yaso Ezukileyo Isondele!
  • Imixholwana
  • Amanqaku Afanayo
  • ‘Haleluya—UYehova UnguKumkani!’
  • Umtshato WeMvana Usondele!
  • Umfazi WeMvana Uzilungisile
  • Banoyolo Abo Bamenyiweyo
  • Indima KaYesu Kwisiprofeto
  • Inkululeko Ekutyhilekeni KukaYesu Kristu
    IMboniselo Evakalisa UBukumkani BukaYehova—1993
  • “Moyikeni UThixo, Nimzukise”
    IMboniselo Evakalisa UBukumkani BukaYehova—1988
  • Incwadi YeBhayibhile 66—ISityhilelo
    “Sonke ISibhalo Siphefumlelwe NguThixo Kwaye Siyingenelo”
  • Ukuvuma Ingoma Entsha Yoloyiso
    ISityhilelo—Incopho Yaso Ezukileyo Isondele!
Khangela Okunye
ISityhilelo—Incopho Yaso Ezukileyo Isondele!
re isahl. 38 iphe. 272-279

Isahluko 38

Makadunyiswe UYa Ngenxa Yemigwebo Yakhe!

1. Ngawaphi amazwi eviwa nguYohane angathi “lilizwi elikhulu lesihlwele esikhulu ezulwini”?

IBHABHILONI ENKULU ayisekho! Ngokwenyaniso ezi ziindaba ezivuyisayo. Akumangalisi ukuba uYohane abe uva amazwi ovuyo nawendumiso emazulwini! “Emva koko ndeva oko kwakungathi lilizwi elikhulu lesihlwele esikhulu ezulwini. Sathi: ‘Haleluya!a Usindiso nozuko namandla ngakaThixo wethu, ngenxa yokuba imigwebo yakhe iyinyaniso yaye ibubulungisa. Kuba uligwebile ihenyukazi elikhulu elawonakalisayo umhlaba ngohenyuzo lwalo, waliphindezelela igazi lamakhoboka akhe esandleni salo.’ Saza sandula ke okwesihlandlo sesibini sathi: ‘Haleluya!’b Umsi walo uyaqhubeka unyuka ngonaphakade kanaphakade.”—ISityhilelo 19:1-3.

2. (a) Lithetha ntoni igama elithi “Haleluya,” yaye ukuviwa kwalo nguYohane kangangezihlandlo ezibini kweli thuba kubonisa ntoni? (b) Ngubani ofumana uzuko ngokutshabalalisa iBhabhiloni Enkulu? Cacisa.

2 Haleluya! Eli gama lithetha ukuthi “Dumisani uYa,” “uYa” yindlela efutshanisiweyo yegama likaThixo, elinguYehova. Apha sikhunjuzwa ngesiluleko esavakaliswa ngumdumisi: “Yonk’ into ephefumlayo—mayidumise uYa. Dumisani uYa!” (INdumiso 150:6) Ukuva kukaYohane iqela lasezulwini elinemincili livuma lisithi “Haleluya!” izihlandlo ezibini kweli thuba kwiSityhilelo kubonisa ukuba uThixo uyaqhubeka etyhila inyaniso. UThixo weZibhalo zamaKristu zesiGrike ukwanguThixo weZibhalo zesiHebhere zangaphambili, yaye igama lakhe nguYehova. UThixo owabangela ukuwa kweBhabhiloni yamandulo ngoku ugwebe iBhabhiloni Enkulu waza wayitshabalalisa. Lonke uzuko luya kuye ngenxa yeso senzo! Amandla awabangela ukuba iwe ngawakhe asingawo aweentlanga awazisebenzisayo njengezixhobo zokuyiphanzisa. Simele sithi usindiso luvela kuYehova kuphela.—Isaya 12:2; ISityhilelo 4:11; 7:10, 12.

3. Kutheni le nto ihenyukazi elikhulu beliwufanele kangaka umgwebo walo?

3 Kutheni le nto ihenyukazi elikhulu beliwufanele kangaka lo mgwebo? Ngokutsho komthetho uYehova awawunika uNowa—waza wathi ngaye wawudlulisela kulo lonke uluntu—ukuphalazwa kwegazi ngokungakhathali kuzisa isigwebo sokufa. Oku kwaphindwa kwachazwa kuMthetho kaThixo awawunika uSirayeli. (Genesis 9:6; Numeri 35:20, 21) Ngaphezu koko, phantsi kwaloo Mthetho kaMoses ukukrexeza ngokwenyama nangokomoya kwakusizisa ukufa. (Levitikus 20:10; Duteronomi 13:1-5) Kangangamawaka eminyaka, iBhabhiloni Enkulu ibinetyala legazi, yaye ingumhenyuzi omkhulu. Ngokomzekelo, inkqubo yeCawa yamaRoma Katolika yokungabavumeli abefundisi bayo ukuba batshate iphumele ekubeni uninzi lwabo luziphathe kakubi ngokunzulu yaye iqela labo namhlanje lifumana isifo sikaGawulayo. (1 Korinte 6:9, 10; 1 Timoti 4:1-3) Kodwa izono zayo ezikhulu, ‘eziye zafumba zada zafikelela ezulwini,’ zizenzo zayo ezothusayo zokuhenyuza ngokomoya—oku kuhenyuza ngokomoya ikwenza ngokufundisa ubuxoki nokuzimanyanisa kwayo nabezobupolitika abonakeleyo. (ISityhilelo 18:5) Ekubeni isohlwayo sayo side safika ekugqibeleni, ngoku inginginya yasezulwini iphinda uHaleluya wesibini.

4. Yintoni efuziselwa kukuthi umsi ophuma kwiBhabhiloni Enkulu “uqhubeka unyuka ngonaphakade kanaphakade”?

4 IBhabhiloni Enkulu iye yatshiswa njengesixeko esoyisiweyo, yaye umsi ophuma kuyo “uyaqhubeka unyuka ngonaphakade kanaphakade.” Xa isixeko sokoqobo sitshiswa yimikhosi eyoyisileyo, umsi uyaqhubeka unyuka lo gama nje uthuthu luseshushu. Nabani na ozama ukuphinda asakhe ngoxa sisaqhuma uya kutshiswa ngamabhodlo adilikayo. Ekubeni umsi ophuma kwiBhabhiloni Enkulu uya kunyuka “ngonaphakade kanaphakade” nto leyo efanekisela umgwebo wayo opheleleyo, akukho bani oya kuze abuyisele eso sixeko singendawo. Unqulo lobuxoki lutshatyalaliswe ngonaphakade. Ngokwenene, makuthiwe Haleluya!—Thelekisa uIsaya 34:5, 9, 10.

5. (a) Yintoni eyenziwa nethethwa ngabadala abangama-24 nezidalwa eziphilayo ezine? (b) Kutheni ingoma ethi Haleluya ivakala iluncuthu kuneengoma ezithetha ngoHaleluya ezivunywa kwiicawa zeNgqobhoko?

5 Kumbono wangaphambilana, uYohane wabona izidalwa eziphilayo ezine zijikeleze itrone, kunye nabadala abangama-24 abafanekisela iindlalifa zoBukumkani zikwisigxina sazo esizukileyo sasezulwini. (ISityhilelo 4:8-11) Ngoku uyaphinda ababone njengoko bevakalisa ngokwelizwi lendudumo uHaleluya wesithathu ngenxa yokutshatyalaliswa kweBhabhiloni Enkulu: “Abadala abangamashumi amabini anesine nezidalwa eziphilayo ezine bawa phantsi baza bamnqula uThixo ohleli etroneni, bathi: ‘Amen! Haleluya’!”c (ISityhilelo 19:4) Ngoko, le ngoma izukileyo ithi Haleluya yongezelela ‘kwingoma entsha’ yendumiso ebhekiswa kwiMvana. (ISityhilelo 5:8, 9) Ngoku bavuma ingoma ezukileyo yoloyiso, besithi lonke uzuko lolweNkosi enguMongami uYehova ngenxa yokoyisa kwayo ngokupheleleyo ihenyukazi elikhulu, iBhabhiloni Enkulu. Aba Haleluya bavakala beluncuthu lwengoma kunazo naziphi na iingoma ezithetha ngoHaleluya ezivunywa kwiicawa zeNgqobhoko, apho uYehova, okanye uYa, aye wanyeliswa waza wadelelwa khona. Ukucula ngendlela ehanahanisa ngolo hlobo egculela igama likaYehova ngoku kupheliswe ngonaphakade!

6. ‘Lilizwi’ likabani eliviwayo, libongoza lisithini, ibe ngoobani abasabelayo?

6 Kwakungowe-1918 awathi uYehova waqalisa ukubavuza ‘abo boyika igama lakhe, abancinane nabakhulu’—abokuqala baba ngamaKristu athanjisiweyo awayefe ethembekile, awathi wawavusa waza wawabeka kwizigxina zasezulwini zabadala abangama-24. (ISityhilelo 11:18) Abanye bathelela aba ekuvumeni ooHaleluya, kuba uYohane uthi: “Kanjalo, kwaphuma ilizwi etroneni lathi: ‘Mdumiseni uThixo wethu, nonke nina makhoboka akhe, amoyikayo, abo bancinane nabakhulu.’” (ISityhilelo 19:5) Eli ‘lilizwi’ leSithethi sikaYehova, uNyana wakhe uYesu Kristu, omi “phakathi kwetrone.” (ISityhilelo 5:6) Akukho zulwini nje kuphela kodwa kwanalapha emhlabeni, “nonke nina makhoboka akhe” ninesabelo ekuvumeni le ngoma, njengoko udidi lukaYohane oluthanjisiweyo lukhokela emhlabeni. Hayi indlela abanesabelo ngokuchulumancisayo ngayo aba ekuthobeleni umyalelo othi: “Mdumiseni uThixo wethu”!

7. Emva kokutshatyalaliswa kweBhabhiloni Enkulu, ngoobani abaya kudumisa uYehova?

7 Ewe, abo besihlwele esikhulu bakwabalelwa phakathi kwala makhoboka. Ukususela ngowe-1935 bebephuma kwiBhabhiloni Enkulu yaye babone ukuzaliseka kwesithembiso sikaThixo esithi: “Uya kubasikelela abo boyika uYehova, abancinane kwakunye nabakhulu.” (INdumiso 115:13) Xa kutshatyalaliswa iBhabhiloni enjengehenyukazi, izigidi zabo ziya kuthelela ‘ekudumiseni uThixo wethu’—kunye nodidi lukaYohane nawo wonke umkhosi wasezulwini. Kamva, abo bavuselwe emhlabeni, enoba ngaphambili babengabadumileyo okanye babengenjalo, akuthandabuzeki ukuba baya kuvuma ooHaleluya abangakumbi xa besiva ukuba iBhabhiloni Enkulu itshatyalaliswe ngonaphakade. (ISityhilelo 20:12, 15) Yonke indumiso mayibhekiswe kuYehova ngenxa yokoyisa kwakhe ngokupheleleyo ihenyukazi ekudala likho!

8. Ingoma yasezulwini yendumiso eyeviwa nguYohane ifanele isinike luphi ukhuthazo ngoku, ngaphambi kokutshatyalaliswa kweBhabhiloni Enkulu?

8 Olunjani lona ukhuthazo esilunikwa kuko konke oku ukuze sibe nesabelo ngokupheleleyo kumsebenzi kaThixo owenziwayo namhlanje! Ngamana bonke abakhonzi bakaYa bangazinikela ngentliziyo nangomphefumlo ekuvakaliseni imigwebo kaThixo, kunye nethemba loBukumkani elizukileyo, ngoku, ngaphambi kokuba iBhabhiloni Enkulu ishenxiswe ize itshatyalaliswe.—Isaya 61:1-3; 1 Korinte 15:58.

‘Haleluya—UYehova UnguKumkani!’

9. Kutheni le nto uHaleluya wokugqibela evakala ngokupheleleyo nangokuzukileyo?

9 Kukho izizathu ezingakumbi zokuvuya, njengoko uYohane ehlabela mgama esixelela oku: “Ndaza ndeva oko kwakungathi lilizwi lesihlwele esikhulu nesandi samanzi amaninzi nesandi seendudumo ezinkulu. Sathi: ‘Haleluya,d ngenxa yokuba uYehova uThixo wethu, uSomandla, uqalisile ukulawula njengokumkani.’” (ISityhilelo 19:6) Lo Haleluya wokugqibela wenza esi sibhengezo sivakale ngokupheleleyo. Esi sisandi esinamandla esivela ezulwini, esibalasele ngakumbi kunaso nasiphi na isandi esikhutshwa liqela labantu abaculayo, sinobungangamsha kunayo nayiphi na ingxangxasi yasemhlabeni, yaye soyikeka ngakumbi kunaso nasiphi na isiphango sasemhlabeni. Izigidi zezidalwa zasezulwini zibhiyozela into yokuba ‘uYehova uThixo wethu, uSomandla, eqalisile ukulawula njengokumkani.’

10. Kunokutshiwo ngayiphi ingqiqo ukuba uYehova uqalisa ukulawula njengokumkani emva kokutshatyalaliswa kweBhabhiloni Enkulu?

10 Noko ke, kutshiwo njani ukuba uYehova uqalisa ukulawula? Sekudlule amawakawaka eminyaka ukususela ekubeni umdumisi wavakalisa la mazwi: “UThixo nguKumkani wam kususela kudala.” (INdumiso 74:12) UYehova wayelawula njengokumkani kwanangaphambi kwelo xesha, ngoko kunokwenzeka njani ukuba iqela lomculo lendalo iphela livume ingoma lisithi ‘UYehova uqalisile ukulawula njengokumkani’? Oku kwenzeka ngendlela yokuba xa iBhabhiloni Enkulu itshatyalalisiwe, uYehova akasayi kuphinda abe nento asukuzana nayo nezikhukhumalisileyo engamthobeliyo njengoMongami Wendalo Iphela. Unqulo lobuxoki alusayi kubakhuthaza abalawuli basemhlabeni ukuba bamchase. Xa iBhabhiloni yamandulo yawayo yaza ayalilawula ihlabathi, iZiyon yeva amazwi oloyiso awavakaliswayo: “UThixo wakho uye waba ngukumkani!” (Isaya 52:7) Emva kokumiselwa koBukumkani ngowe-1914, abadala abangama-24 bavakalisa besithi: “Siyakubulela, Yehova Thixo . . . ngenxa yokuba uye wathabatha amandla akho amakhulu waza waqalisa ukulawula njengokumkani.” (ISityhilelo 11:17) Ngoku, emva kokutshatyalaliswa kweBhabhiloni Enkulu, kuyaphindwa kuvakaliswe la mazwi: ‘UYehova uqalisile ukulawula njengokumkani.’ Akukho thixo wenziwe ngumntu oseleyo ukuze alwe ngokuchasene nolongamo loThixo oyinyaniso, uYehova!

Umtshato WeMvana Usondele!

11, 12. (a) Yathini iYerusalem yamandulo kwiBhabhiloni yamandulo, nto leyo eyamisela wuphi umzekelo ngokubhekisele kwiYerusalem Entsha nakwiBhabhiloni Enkulu? (b) Xa kusoyiswa iBhabhiloni Enkulu, yiyiphi ingoma nesaziso esenziwa yinginginya yasezulwini?

11 “Mfazindini olutshaba lwam”! Leyo yindlela iYerusalem, indawo eyayinetempile ekwakunqulelwa kuyo uYehova, eyathetha ngayo neBhabhiloni eyayinqula izithixo. (Mika 7:8) Ngokukwanjalo, ‘isixeko esingcwele, iYerusalem Entsha,’ ebunjwe ngumtshakazi wamalungu ali-144 000, inesizathu esifanelekileyo sokuthi iBhabhiloni Enkulu ilutshaba lwayo. (ISityhilelo 21:2) Kodwa ekugqibeleni ihenyukazi elikhulu libandezelekile, lifumene intlekele nembubhiso. Uqheliselo lwayo lokukhafula nabavumisi ngeenkwenkwezi ebasebenzisayo abakwazanga kuyisindisa. (Thelekisa uIsaya 47:1, 11-13.) Ngenene, olu luloyiso olukhulu kunqulo lokwenyaniso!

12 Njengoko ihenyukazi elicekisekayo, iBhabhiloni Enkulu, litshatyalaliswe ngonaphakade, ngoku kunokunikelwa ingqalelo kumtshakazi weMvana onyulu ngokupheleleyo! Ngenxa yoko, inginginya yasezulwini ngemincili ivuma ingoma yokudumisa uYehova: “Masibe nemihlali size sivuye ngokugqithiseleyo, yaye masimnike uzuko, ngenxa yokuba umtshato weMvana ufikile nomfazi wayo uzilungisile. Ewe, unikwe ukuba avathiswe ngelinen eqaqambileyo, ecocekileyo, ecikizekileyo, kuba ilinen ecikizekileyo imela izenzo zobulungisa zabo bangcwele.”—ISityhilelo 19:7, 8.

13. Liliphi ilungiselelo lomtshato weMvana eliye lenziwa ukuhla ukutyhubela iinkulungwane?

13 Ukuhla ukutyhubela iinkulungwane, uYesu uye wenza ilungiselelo elithandekayo lalo mtshato wasezulwini. (Mateyu 28:20; 2 Korinte 11:2) Ebecoca uSirayeli wokomoya oli-144 000 ukuze “alingcwalise, alihlambulule ngokuhlamba kwamanzi ngelizwi, ukuze alizise kuye ibandla limbejembeje, lingenabala okanye mibimbi okanye nayiphi na yezinto ezinjalo, kodwa ukuze libe ngcwele yaye lingabi nasiphako.” (Efese 5:25-27) Ejonge ekuzuzeni “umvuzo wobizo lwaphezulu lukaThixo,” mKristu ngamnye othanjisiweyo kuye kwafuneka ahlube ubuntu obudala noqheliselo lwabo, ambathe ubuntu obutsha bobuKristu, aze enze imisebenzi yobulungisa ‘ngomphefumlo uphela ngokungathi uyenzela uYehova.’—Filipi 3:8, 13, 14; Kolose 3:9, 10, 23.

14. USathana uzame njani ukonakalisa abaza kuba ngamalungu omfazi weMvana?

14 Ukususela ngePentekoste yowama-33 C.E. ukusa phambili, uSathana wasebenzisa iBhabhiloni Enkulu njengesixhobo sakhe ekuzameni ukonakalisa abaza kuba ngamalungu omfazi weMvana. Ngasekupheleni kwenkulungwane yokuqala, wayehlwayele iimbewu zonqulo lweBhabhiloni ebandleni. (1 Korinte 15:12; 2 Timoti 2:18; ISityhilelo 2:6, 14, 20) Umpostile uPawulos uchaza abo babelusingela phantsi ukholo ngala mazwi: “Kuba abo banjalo ngabapostile bobuxoki, abasebenzi benkohliso, bezimilisa okwabapostile bakaKristu. Yaye akumangalisi oko, kuba noSathana ngokwakhe uzimilisa okwengelosi yokukhanya.” (2 Korinte 11:13, 14) Kwiinkulungwane ezalandelayo, iNgqobhoko ewexukileyo, njengayo yonke iBhabhiloni Enkulu, yazambathisa izambatho zobutyebi ‘ezimfusa nezingqombela, igolide nelitye elixabisekileyo neeperile.’ (ISityhilelo 17:4) Abefundisi noopopu bayo benza izivumelwano nabalawuli abanxanelw’ igazi, abanjengoConstantine noCharlemagne. Ayizange yambathiswe ‘ngezenzo zobulungisa zabo bangcwele.’ Njengomtshakazi wobuxoki, ngokwenyaniso yayingumsebenzi wobuchule benkohliso kaSathana. Ekugqibeleni, itshatyalaliswe ngonaphakade!

Umfazi WeMvana Uzilungisile

15. Ukutywinwa kwenzeka njani, yaye yintoni efunekayo kumKristu othanjisiweyo?

15 Ke ngoko, emva kweminyaka ephantse ibe ngama-2 000, lonke i-144 000 lodidi lomtshakazi lizilungisile. Kodwa kukwesiphi isihlandlo sexesha ekunokutshiwo ukuba ‘umfazi weMvana uzilungisile’? Ngokwamabakala, ukususela ngePentekoste yowama-33 C.E. ukusa phambili, abathanjisiweyo abangamakholwa ‘batywinwa ngomoya oyingcwele owathenjiswayo,’ oku kusenziwa ngenxa ‘yemini yokukhululwa ngentlawulelo.’ Njengokuba umpostile uPawulos wavakalisayo, uThixo “ukwabeke netywina lakhe kuthi yaye ubeke umqondiso woko kuzayo, oko kukuthi, umoya, ezintliziyweni zethu.” (Efese 1:13; 4:30; 2 Korinte 1:22) MKristu ngamnye othanjisiweyo ‘uyabizwa aze anyulwe,’ yaye uzingqine ‘ethembekile.’—ISityhilelo 17:14.

16. (a) Kwagqitywa nini ukutywinwa kompostile uPawulos, yaye sazi njani? (b) Umfazi weMvana uya kube ‘ezilungise’ nini ngokupheleleyo?

16 Emva kweminyaka emininzi yokuvavanywa, uPawulos wavakalisa wathi: “Ndiwulwile umlo omhle, ugqatso ndilubaleke kwada kwesa ekugqibeleni, ukholo ndilugcinile. Ngoko ke ndibekelwe isithsaba sobulungisa, eya kuthi iNkosi, umgwebi olilungisa, indinike sona njengomvuzo ngaloo mini, kanti ingendim kuphela, kodwa kwanabo bonke abo bakuthandayo ukubonakaliswa kwayo.” (2 Timoti 4:7, 8) Kubonakala ukuba lo mpostile wayesele etywiniwe, nakubeni wayesengumntu wenyama yaye eseza kujongana nokufela ukholo. Ngokufanayo, limele lifike ixesha laxa bonke abaseleyo emhlabeni be-144 000 beya kuba betywinwe ngokwabantu ngabanye njengabakaYehova. (2 Timoti 2:19) Oku kuya kwenzeka xa umfazi weMvana eya kube ezilungise ngokupheleleyo—uninzi lwe-144 000 sele luwufumene umvuzo walo wasezulwini nabo basemhlabeni sele bamkelwe ngokupheleleyo baza batywinwa njengabathembekileyo.

17. Umtshato weMvana unokuqhubeka nini?

17 Ngeli thuba locwangciso lukaYehova lwexesha, xa ukutywinwa kwe-144 000 kugqityiwe, iingelosi zivulela imimoya emine yembandezelo enkulu. (ISityhilelo 7:1-3) Okokuqala, kuphunyezwa umgwebo kwiBhabhiloni Enkulu enjengehenyukazi. Ngokulandelayo uKristu owoyisayo ngokukhawuleza ulungiselela iArmagedon ukuze atshabalalise yonke inxalenye yentlangano kaSathana esemhlabeni, aze ekugqibeleni, aphose uSathana needemon zakhe enzonzobileni. (ISityhilelo 19:11–20:3) Ukuba baya kuba besekho abathanjiswa abasesemhlabeni, ngokukhawuleza emva kokuba uKristu elugqibile uloyiso lwakhe baya kufumana umvuzo wabo wasezulwini, apho baya kuthelela amanye amalungu odidi lomtshakazi. Kuya kwandula ke, ngexesha likaThixo elifanelekileyo, kuqhubeke umtshato weMvana!

18. INdumiso 45 ikuqinisekisa njani ukulandelelana kweziganeko ngokubhekisele kumtshato weMvana?

18 Ingxelo yesiprofeto ekwiNdumiso 45 ichaza indlela eziya kulandelelana ngayo ezi ziganeko. Okokuqala uKumkani obekwe etroneni uyahamba esoyisa iintshaba zakhe. (Indinyana 1-7) Kwandula ke kuqhubeke umtshato, umtshakazi wasezulwini ephelekwa emhlabeni ngamaqabane akhe aziintombi ezinyulu, isihlwele esikhulu. (Indinyana 8-15) Ngokulandelayo lo mtshato uba nesiqhamo, njengoko uluntu luvuselwa kwimfezeko phantsi kokongamela ‘kweenkosana emhlabeni wonke.’ (Indinyana 16, 17) Ezinjani zona ukuzuka iintsikelelo ezihambisana nomtshato weMvana!

Banoyolo Abo Bamenyiweyo

19. Ngabaphi abanoyolo besine kwabasixhenxe abachazwe kwiSityhilelo, yaye ngoobani abanesabelo kolu yolo lukhethekileyo?

19 Ngoku uYohane ubhala ngabanoyolo besine kwabasixhenxe abachazwe kwiSityhilelo: “Yandula ke [ingelosi ebityhila ezi zinto kuYohane] yathi kum: ‘Bhala uthi: Banoyolo abo bamenyelwe kwisidlo sangokuhlwa somtshato weMvana.’ Yaphinda yathi: ‘La ngamazwi ayinyaniso kaThixo.’” (ISityhilelo 19:9)e Abo bamenyelwe “kwisidlo sangokuhlwa somtshato weMvana” ngamalungu odidi lomtshakazi. (Thelekisa uMateyu 22:1-14.) Lonke iqela elithanjisiweyo elingumtshakazi lifumana uyolo lokuzuza esi simemo. Uninzi lwabamenyiweyo sele lusezulwini, indawo ekuza kuqhutyelwa kuyo isidlo sangokuhlwa somtshato. Nabo basesemhlabeni bonwabile, kuba besifumene esi simemo. Indawo yabo kwisidlo sangokuhlwa somtshato igcinwe kakuhle. (Yohane 14:1-3; 1 Petros 1:3-9) Xa bevuselwa ezulwini, uya kwandula ke wonke umtshakazi omanyeneyo abelane neMvana kuloo mtshato uphakamileyo wolonwabo.

20. (a) Iyintoni intsingiselo yamazwi athi: “La ngamazwi ayinyaniso kaThixo”? (b) UYohane wachatshazelwa njani ngamazwi engelosi, ibe yathini ingelosi?

20 Ingelosi yongezelela ngelokuba “la ngamazwi ayinyaniso kaThixo.” Eli gama lithi “ayinyaniso” liguqulelwe ngokusuka kwelesiGrike elithi a·le·thi·nosʹ yaye lithetha ukuthi “ngokwenene” okanye “ngokuthembekileyo.” Ekubeni la mazwi ngenene evela kuYehova, athembekile yaye kunokuthenjelwa ngawo. (Thelekisa eyoku-1 kaYohane 4:1-3; ISityhilelo 21:5; 22:6.) Njengomnye wabamenyelwe kweso sidlo somtshato, uYohane umele ukuba wayezaliswe luvuyo ekuveni oku nasekucingeni ngeentsikelelo eziza kufunyanwa ludidi lomtshakazi. Enyanisweni, wayeshukunyiswe ngokunzulu kangangokuba ingelosi kwafuneka imnike isiluleko, njengoko uYohane ebalisa esithi: “Ngako oko ndawa phantsi phambi kweenyawo zayo ukuba ndiyinqule. Kodwa yathi kum: ‘Lumka! Ungakwenzi oko! Kuphela nje ndilikhoboka kunye nawe kwanakunye nabazalwana bakho abanomsebenzi wokungqina ngoYesu. Nqula uThixo.’”—ISityhilelo 19:10a.

21. (a) Yintoni eboniswa siSityhilelo mayela neengelosi? (b) Sisiphi isimo sengqondo amaKristu amele abe naso ngeengelosi?

21 Kuso sonke iSityhilelo kunikelwa ubungqina obuphawulekayo ngokuthembeka nokukhuthala kweengelosi. Zibandakanyekile kumjelo wenyaniso etyhilwayo. (ISityhilelo 1:1) Zisebenza kunye nabantu ekushumayeleni iindaba ezilungileyo nasekuphalazeni izibetho zokomfuziselo. (ISityhilelo 14:6, 7; 16:1) Zalwa zincedisana noYesu ekukhupheni uSathana neengelosi zakhe ezulwini, ibe ziya kulwa zimncedisa kwakhona eArmagedon. (ISityhilelo 12:7; 19:11-14) Ngenene, zikunye noYehova ngokwakhe. (Mateyu 18:10; ISityhilelo 15:6) Sekunjalo, zingabakhonzi bakaThixo abathobekileyo. Kunqulo olunyulu iingelosi azinqulwa kwanangomlinganiselo othile, ngokuthi kunqulwe uThixo kusetyenziswa “ingcwele” ethile okanye ingelosi. (Kolose 2:18) AmaKristu anqula uYehova kuphela, esenza izicelo zawo kuye egameni likaYesu.—Yohane 14:12, 13.

Indima KaYesu Kwisiprofeto

22. Ithini ingelosi kuYohane, yaye athetha ntoni la mazwi?

22 Yandula ke ingelosi ithi: “Kuba injongo yesiprofeto kukunikela ubungqina ngoYesu.” (ISityhilelo 19:10b) Kwenzeka njani oku? Oku kuthetha ukuba sonke isiprofeto esiphefumlelweyo sibakho ngenxa kaYesu nangenxa yendima ayiphumezayo kwiinjongo zikaYehova. Isiprofeto sokuqala esiseBhayibhileni sathembisa ngokuza kwembewu. (Genesis 3:15) UYesu waba yiloo Mbewu. Izityhilelo ezalandelayo zayila isakhiwo esikhulu senyaniso engokwesiprofeto kwesi sithembiso sisisiseko. Umpostile uPetros wamxelela oku uKorneli ongoweeNtlanga nowayelikholwa: “Kuye [uYesu] bonke abaprofeti banikela ubungqina.” (IZenzo 10:43) Kwiminyaka enokuba ngama-20 kamva, umpostile uPawulos wathi: “Kuba kungakhathaliseki ukuba zininzi kangakanani na izithembiso zikaThixo, ziye zaba nguEwe ngaye [uYesu].” (2 Korinte 1:20) Emva kweminye iminyaka engama-43, uYohane uyasikhumbuza esithi: ‘Inyaniso yabakho ngoYesu Kristu.’—Yohane 1:17.

23. Kutheni le nto isikhundla negunya eliphakamileyo likaYesu zingalunciphisi unqulo esilunikela kuYehova?

23 Ngaba oku ngayo nayiphi na indlela kuyalunciphisa unqulo esilunikela kuYehova? Akunjalo. Khumbula icebiso lesilumkiso lengelosi, elithi: “Nqula uThixo.” UYesu akaze azame ukusukuzana noYehova. (Filipi 2:6) Kuyinyaniso ukuba, zonke iingelosi ziyaxelelwa ukuba ‘ziqubude kuye [uYesu],’ yaye yonke indalo imele isivume isikhundla sakhe esiphakamileyo ukuze “egameni likaYesu agobe onke amadolo.” Kodwa phawula, oku kwenzelwa ukuze ‘kuzukiswe uThixo uYise’ yaye kwenziwa ngokomyalelo wakhe. (Hebhere 1:6; Filipi 2:9-11) UYehova wanika uYesu igunya lakhe eliphakamileyo, yaye ngokuvuma elo gunya, sinikela uzuko kuThixo. Ukuba asivumi ukuzithoba kulawulo lukaYesu, sigatya uYehova uThixo ngokwakhe.—INdumiso 2:11, 12.

24. Ziziphi iziganeko ezibini ezibalaseleyo esimele sicinge nzulu ngazo, yaye ke ngoko ngawaphi amazwi esifanele siwavakalise?

24 Ngoko ke, ngokumanyeneyo masivakalise amazwi okuvula eNdumiso 146 ukuya kweye-150 athi: “Dumisani uYa!” Ngamana ingoma enguHaleluya ingavakala ngamandla njengoko kulindelwe ukuba uYehova oyise ubukhosi behlabathi bonqulo lobuxoki obuyiBhabhiloni! Yaye kwanga singaphuphuma luvuyo njengoko umtshato weMvana usondela!

[Imibhalo esemazantsi]

a Umbhalo osemazantsi weNW eneembekiselo.

b Umbhalo osemazantsi weNW eneembekiselo.

c Umbhalo osemazantsi weNW eneembekiselo.

d Umbhalo osemazantsi weNW eneembekiselo.

e Bona kwaneSityhilelo 1:3; 14:13; 16:15.

[Ibhokisi ekwiphepha 273]

“Incwadi Eya ESodom NaseGomora”

Phantsi kwalo mxholo ubalaseleyo, iDaily Telegraph yaseLondon kaNovemba 12, 1987, yachaza ngento eyaqhubeka phambi kweBhunga Labaphathi Becawa Jikelele beCawa yaseNgilani. Apha kwakuhlatyw’ ikhwelo kusithiwa makugxothwe “amaKristu” angamafanasini ecaweni. Umbhali wemihlathi yamaphephandaba uGodfrey Barker wathi: “UBhishophu Omkhulu waseCanterbury engonwabanga uvakalise uluvo lwakhe izolo wathi: ‘Ukuba iNgcwele uPawulos ibinokubhala incwadi eya kwiCawa yaseNgilani, sisenokuzibuza ukuba luhlobo luni lwencwadi ebiya kuyibhala.’” UMnu. Barker wagqabaza ngokwakhe wathi: “Yincwadi eya eSodom naseGomora,” waza walek’ umsundulo wathi: “UGqr. Runcie [ubhishophu omkhulu] uye wathelekelela ukuba ibiya kufundeka njengabaseRoma, Isahl. 1.”

Umbhali wacaphula amazwi kaPawulos akwabaseRoma 1:26-32: “UThixo wabanikela ekuthabathekeni okulihlazo; . . . amadoda esenza kumadoda okuziintloni, . . . bona bathi, besazi kakuhle isimiselo sikaThixo, sokuba abo bazenzayo izinto ezinjalo bafanelwe kukufa, banganeli kukuzenza, basuka bathakazelele nabo bazenzayo.” Waqukumbela ngelithi: “INgcwele uPawulos yayikhathazwe nje ngamafanasini angamalungu ecawa. Ingxaki kaGqr. Runcie yeyamafanasini asepulpitini.”

Kutheni ubhishophu omkhulu enengxaki elolu hlobo nje? Imixholo ephambili kwiDaily Mail yaseLondon kaOktobha 22, 1987, yayivakalise oku: “‘Umfundisi omnye kumafanasini amathathu’ . . . Iphulo lokugxotha amafanasini ‘liya kuyibhangisa iCawa yaseNgilani.’” Iingxelo zacaphula usosiba-jikelele “ongumfundisi” weQela lamaKristu angamaFanasini njengothi: “Ukuba eli phulo belinokwamkelwa beliya kuyibhangisa iCawa, yaye uBhishophu Omkhulu waseCanterbury uyakwazi oko. Ngokwenani nje, sikholelwa kwelokuba ama-30 nama-40 ekhulwini abefundisi beCawa yaseNgilani bangamafanasini. Ibe bangabona bantu bafak’ isandla ngokukhutheleyo kubulungiseleli beCawa.” Alithandabuzeki elokuba ukuncipha kwenani labantu abahamba icawa ngokuyinxenye kuyimbonakaliso yokucekiswa kobo bulungiseleli bukhulayo bamafanasini.

Lagqiba entwenini ibhunga labaphathi becawa? Amalungu amaninzi gqitha angama-388 (ama-95 ekhulwini ingabefundisi) avotela ukuxhaswa kokungaqiniswa kweli phulo. Mayela noku, iThe Economist kaNovemba 14, 1987, yathi: “ICawa yaseNgilani ichasene noqheliselo lobufanasini, kodwa hayi kangako. Ibhunga labaphathi becawa jikelele, ipalamente yeCawa, icinga ngabefundisi abangamafanasini, kule veki igqibe kwelokuba izenzo zamafanasini, ngokungafaniyo nohenyuzo nokrexezo azisosono: ‘azifikeleli kwelo nqanaba’ njengoko ‘iintlobano zesini zisisenzo sokuzibophelela ngokupheleleyo nesithi ngokufanelekileyo senziwe kulwalamano olusisigxina lomtshato.’” Ithelekisa isimo sengqondo soBhishophu Omkhulu waseCanterbury namazwi angqalileyo ompostile uPawulos kwabaseRoma 1:26, 27, iThe Economist yabonakalisa ingcaphulo yamazwi kaPawulos angasentla kwibinzana elithi “INgcwele uPawulos yayikwazi eyayikucinga.”

NoYesu Kristu wayekwazi awayekucinga waza wakuchaza ngokucacileyo. Wathi kwakuya “kunyamezeleka ilizwe laseSodom ngeMini yoMgwebo” kunabantu bonqulo ababechase isigidimi sakhe. (Mateyu 11:23, 24) Apha uYesu wayesebenzisa ukubaxa ukuze abonise ukuba ezo nkokeli zonqulo ezachasa uNyana kaThixo nemfundiso yakhe zazinetyala elingakumbi kunabantu baseSodom. UYude 7 uthi abo bantu baseSodom bafumana “isohlwayo sesigwebo somlilo ongunaphakade,” nto leyo ethetha intshabalalo engunaphakade. (Mateyu 25:41, 46) Ngoko, hayi indlela oya kuba qatha ngayo umgwebo wabo kufane kuthiwe ziinkokeli ezingamaKristu abathi ngokumfamekileyo bakhokele imihlambi yabo eziimfama ukuba ibe kude lee nemilinganiselo yokuziphatha ephakamileyo yoBukumkani bukaThixo, ize ingene kwiindlela zikavula-zibhuqe nezokuzibhubhisa zeli hlabathi! (Mateyu 15:14) Mayela nonqulo lobuxoki, iBhabhiloni Enkulu, ilizwi elivela ezulwini ngokungxamisekileyo livakalisa lisithi: “Phumani kuyo, bantu bam, ukuze ningabelani nayo ngezono zayo, nokuze ningamkeliswa kwizibetho zayo.”—ISityhilelo 18:2, 4.

[Imifanekiso ekwiphepha 275]

Izulu livakalisa ooHaleluya abane, lidumisa uYa ngoloyiso lwakhe lokugqibela kwiBhabhiloni Enkulu

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share