Inkululeko Ekutyhilekeni KukaYesu Kristu
“Nivuye . . . nasekutyhilekeni kobuqaqawuli bakhe, nivuye nigcoba.”—1 PETROS 4:13.
1. UYehova ubatyebise njani abakhonzi bakhe?
UYEHOVA uwatyebise ngezipho ezininzi amaNgqina akhe. NjengoMyaleli wethu Ozukileyo, usikhanyisele ngolwazi olupheleleyo ngokuphathelele ukuthanda nenjongo yakhe. Ngomoya wakhe oyingcwele, ukhulise kuthi ubuchule bokukhanyisa ngokungafihlisi. Kweyoku-1 kwabaseKorinte 1:6, 7 umpostile ophefumlelweyo uPawulos usixelela oku: “Ubungqina bukaKristu [baqiniswa] kuni; ngokokude ningasileli nakwesinye isipho enisibabalweyo; nilinde kakhulu ukutyhileka kweNkosi yethu uYesu Kristu.”
2. Liliphi ithemba elivuyisayo “ukutyhileka kweNkosi yethu uYesu Kristu” okulizisayo?
2 “Ukutyhileka kweNkosi yethu uYesu Kristu”—kuthetha ukuthini oko? Kubhekisela kwixesha aya kutyhilwa ngalo uYesu njengoKumkani ozukileyo, evuza abalandeli bakhe abathembekileyo yaye ephumeza impindezelo kwabangahloneli Thixo. Njengokuba eyoku-1 kaPetros 4:13 ibonisa, iya kuba lixesha lokuba amaKristu agcina ingqibelelo nathanjiswe ngomoya namaqabane awo ‘esihlwele esikhulu’ ‘avuye agcobe,’ kuba kuya kuba ngumqondiso wokuphela kwenkqubo yezinto kaSathana.
3. Simele sime ngokuqinileyo njani, njengoko benzayo abazalwana bethu baseTesalonika?
3 Njengoko elo xesha lisondela, ngenxa yomsindo uSathana uyayandisa ingcinezelo yakhe kuthi. Njengengonyama egqumayo, uzama ukusiqwenga. Simele sime siqine! (1 Petros 5:8-10) Abazalwana bethu kwiTesalonika yamandulo, ngoxa babesebatsha enyanisweni, babandezeleka ngokufanayo namaNgqina kaYehova amaninzi namhlanje. Ngenxa yoko, amazwi ompostile uPawulos awayesiya kubo anentsingiselo ngakumbi kuthi. Wabhala wathi: “Yinto ebubulungisa kuThixo ukubabuyekeza ngembandezelo abanibandezelayo; athi, nina babandezelwayo, anibuyekeze ngokuniphumza kunye nathi, ekutyhilekeni kweNkosi uYesu, ivela emazulwini inezithunywa zamandla ayo; inomlilo odangazelayo, ibaphindezela abangamaziyo uThixo, nabangazilulameliyo iindaba ezilungileyo zeNkosi yethu uYesu.” (2 Tesalonika 1:6-8) Ewe, siza kuphunyuzwa!
4. Kutheni abefundisi sibafanele isigwebo esiya kuwiswa ekutyhilekeni kukaYesu?
4 Ngexesha likaPawulos ubukhulu becala imbandezelo yayivela kwiinkokeli zonqulo zamaYuda. Nanamhlanje ngokufanayo, ngokufuthi ukuchaswa kwamaNgqina kaYehova athanda uxolo bekuphenjelelwa ngabo bathi bamela uThixo, ngokukodwa abefundisi beNgqobhoko. Aba bathi bayamazi uThixo, kodwa bayamgatya “uYehova omnye” weBhayibhile, baze bamthabathel’ indawo ngoBathathu Emnye oyimfihlelo. (Marko 12:29, NW) Abazilulameli iindaba ezilungileyo ezingeNkosi yethu uYesu, bakhangela kulawulo lwabantu befuna ukuphunyuzwa yaye bayazigatya iindaba ezilungileyo zoBukumkani bukaKristu bobulungisa obuzayo. Bonke aba bachasi bonqulo bamele batshabalale “ekutyhilekeni kweNkosi uYesu, ivela emazulwini”!
‘Ukuza’ KukaYesu Kristu
5. Ukutyhileka kukaYesu kuchazwa njani ngokucace gca kuMateyu 24:29, 30?
5 Oko kutyhileka kuchazwa ngokucace gca nguYesu kuMateyu 24:29, 30. Echaza iimbalasane ezahlukahlukeneyo zomqondiso wobukho bakhe nowokuqosheliswa kwale nkqubo yezinto, uthi: “Ilanga liya kwenziwa mnyama, ithi nenyanga ifiphale, zithi neenkwenkwezi ziwe ezulwini, athi namandla amazulu azanyazanyiswe.” Ngelo xesha “uya kubonakala . . . umqondiso woNyana woMntu ezulwini.” Iintlanga zomhlaba “zimbambazele, . . . zimbone uNyana woMntu [uKumkani kaThixo onguMesiya] esiza phezu kwamafu ezulu, enamandla, nobuqaqawuli obukhulu.” Oku ‘kuza,’ er·khoʹme·non ngesiGrike, kubhekisela ekubonakaleni kukaYesu njengoMthetheleli kaYehova.
6, 7. Kwenzeka njani ukuba ‘amehlo onke ambone,’ yaye ngoobani abaqukiweyo koku?
6 Nompostile uYohane uyakuchaza oku ‘kuza’ kwiSityhilelo 1:7, apho athi: “Yabonani, uza namafu.” Ewe, ezo ntshaba aziyi kumbona ngamehlo okoqobo uYesu, kuba “amafu” abonisa ukuba uza engabonakali ukuze aphumeze umgwebo. Ukuba abantu bebeza kububona ubuqaqawuli bakhe basezulwini ngeliso lenyama, bebeya kutyhaphaka, kanye njengokuba uSawule, endleleni eya eDamasko, watyhaphakayo xa uYesu ozukisiweyo wabonakala kuye ngokhanyiso olukhulu olubanekayo.—IZenzo 9:3-8; 22:6-11.
7 Ingxelo yeSityhilelo ithi “aye eya kumbona amehlo onke, kwanabo bamhlabáyo; zaye ziya kummbambazelela zonke izizwe zomhlaba.” Oku kuthetha ukuba ngentshabalaliso uYesu aya kubazisela yona abachasi abasemhlabeni baya kuqonda ukuba uza enamandla nobuqaqawuli obukhulu njengoMgwebi kaYehova. Kutheni ezi ntshaba zichazwa ngokuthi “abo bamhlabáyo”? Kungenxa yokuba isimo sazo sengqondo sokuthiya abakhonzi bakaYehova namhlanje siyafana nesabo babetshutshisa uYesu. Ngokwenene, baya ‘kummbambazelela.’
8. Sisiphi isilumkiso uYesu noPawulos abasivakalisayo?
8 Iya kufika njani loo mini yempindezelo kaYehova? Kwisiprofeto esikuLuka isahluko 21, uYesu uchaza iziganeko eziyintlekele eziye zangumqondiso wobukho bakhe ukususela ngowe-1914. Aze ke, kwindinyana 34 neyama-35, uYesu alumkise: “Zilumkeleni ke, hleze zisindwe iintliziyo zenu kukuzingxala, nakukunxila, nangamaxhala obu bomi, ize loo mini inifikele ngebhaqo. Kuba iya kubazela njengomgibe bonke abahleliyo phezu kwehlabathi lonke.” Ewe, loo mini yempindezelo kaYehova ifika ngesiquphe, ngebhaqo! Umpostile uPawulos uyakungqina oku kweyoku-1 kwabaseTesalonika 5:2, 3, esithi: “Imini yeNkosi [“kaYehova,” NW], njengesela ebusuku, yenjenjalo ukuza kwayo. Kuba xenikweni baya kuthi, Luxolo nokunqaba, oko baya kufikelwa yintshabalaliso ngebhaqo.” Kwanangoku iintlanga zithetha ngoxolo nonqabiseko yaye zithetha ngokomeleza iZizwe Ezimanyeneyo ukuze zikhusele iindawo ezinezixholoxholo zisebenzisa umkhosi.
9. ‘Ukukhanya kukhanyisela’ oobani, yaye ngoba?
9 Kwindinyana 4 neyesi-5, lo mpostile uhlabela mgama asixelele oku: “Ke nina, bazalwana, anisebumnyameni, ukuba imini leyo iniqubule njengesela [“njengokuba ibiya kwenza kumasela,” NW]. Nonke nina ningabokukhanya, abemini; asingabobusuku, asingabobumnyama.” Kuyasivuyisa ukuba ngoonyana bokukhanya—ukuthwalela ukukhanya kwabanye abanqwenela uxolo nonqabiseko lokwenyaniso kwihlabathi elitsha likaThixo. KwiNdumiso 97:10, 11, sifunda oku: “Bathandi bakaYehova, kuthiyeni okubi. Umgcini wemiphefumlo yabenceba bakhe uya kubahlangula esandleni sabangendawo. Ukukhanya likuhlwayelelwe ilungisa, novuyo baluhlwayelelwe abantliziyo zithe tye.”
Izinto Eziya Kwenzeka
10. Sisiphi isilumkiso esivakaliswa kusengaphambili esifanele sisithobele ngokuphathelele imini kaThixo yengqumbo? (ISityhilelo 16:15)
10 Kuya kwenzeka ntoni xa imbandezelo enkulu ifika? Masityhile kwiSityhilelo isahluko 16. Phawula ukuba, njengoko kuchazwe kwindinyana 13 ukuya kweye-16, oomoya abangcolileyo beedemon bahlanganisela iintlanga zomhlaba wonke eArmagedon, imfazwe yaloo mini inkulu kaThixo uSomandla. Kwakhona, ukuza kwale mini yomgwebo njengesela kuyagxininiswa, yaye silunyukiswa ukuba sihlale siphaphile—sinxibe iingubo zethu zokomoya ezisifanisa njengabaya kusinda. Lifikile ixesha lokugwetywa kwabantu, iintlanga zomhlaba, kunye—nomnye umntu. Ngubani ke lowo?
11. Umfazi okuthethwa ngaye kwiSityhilelo 17:5 uye wazibonakalisa njani?
11 Ngumfazi wokomfuziselo oye wazama ukuzenza “uthile.” Uchazwa kwiSityhilelo 17:5 ngokuthi “imfihlelo, iBhabheli Enkulu, unina wamahenyukazi nowamasikizi omhlaba.” Kodwa akaseyomfihlelo kumaNgqina kaYehova. Uye wazibonakalisa ngokucacileyo njengobukhosi behlabathi bonqulo lobuxoki, amahlelo eNgqobhoko abumba inxalenye yabo ebalaseleyo. Kungamasikizi kuYehova ukugxuphuleka kwakhe kwimibandela yezobupolitika, ‘ukunxila kwakhe ligazi labangcwele’ ngokutshutshisa amaKristu okwenyaniso, nokuba netyala kwakhe ngegazi “labo bonke abasikiweyo emhlabeni,” kuquka abantu abangaphezu kwekhulu lezigidi ababulewe kwiimfazwe zale nkulungwane yama-20 kuphela.—ISityhilelo 17:2, 6; 18:24.
12. Kutheni amahlelo eNgqobhoko egwetyiwe?
12 Okona kubi kakhulu kukuba amahlelo eNgqobhoko aye abangela ukungcikivwa kwegama loThixo ngokuhanahanisa athi amela yena. Aye afundisa iintanda-bulumko zaseBhabhiloni nezamaGrike kunokufundisa iLizwi likaThixo elinyulu yaye aye anegalelo ekonakaleni ngokokuziphatha kwezizwe ziphela ngokuvumela iindlela zobomi zokuvula zibhuqe ezigculela imigaqo yeBhayibhile. Amaqotha qikili aphakathi kwabo ayagwetywa ngamazwi akuYakobi 5:1, 5: “Wenani kaloku, zityebi, lilani nenze isijwili ngeenkxwaleko zenu ezizayo. Nadla ubuncwane emhlabeni apha, naxhamla iziyolo, nazondla iintliziyo zenu njengamhla kuxheliweyo.”
Ukutshatyalaliswa KweBhabhiloni Enkulu!
13. Lenzeka njani igalelo lokuqala lembandezelo enkulu, yaye kukuphi ukugxamiseka okugxininiswa kwiSityhilelo 18:4, 5?
13 Igalelo lokuqala lembandezelo enkulu liya kuba kukuphunyezwa komgwebo kaYehova kwiBhabhiloni Enkulu. ISityhilelo 17:15-18 ngokweenkcukacha sichaza “ingcinga” kaThixo—ukusebenzisa “iimpondo ezilishumi,” imikhosi enamandla ‘yerhamncwa’ eliziZizwe Ezimanyeneyo ezibunjwa ngamazwe ngamazwe, ukuba ziyitshabalalise. “Iimpondo ezilishumi owazibonayo ziserhamncweni, ngabo baya kulithiya ihenyukazi, baliphanzise, balihlube, bayidle inyama yalo, balitshise ngomlilo. Kuba uThixo ubeke ezintliziyweni zabo ukwenza ingcinga yakhe.” Akumangalisi ukuba ilizwi lasezulwini livakalise isilumkiso esingxamisekileyo kwiSityhilelo 18:4, 5: “Phumani kuyo, bantu bam, ukuze ningadlelani nayo ngezono zayo, nokuze ningamkeliswa kwizibetho zayo. Ngokuba izono zayo ziye zafikelela emazulwini, nezinto zayo zokungalungisi uzikhumbule uThixo.” Nangoku kusahlatyw’ elo khwelo: Qhawulani lonke unxibelelwano nonqulo lobuxoki, ngaphambi kokuba nishiywe lixesha!
14. Ngoobani abaya kulilela ukutshatyalaliswa kweBhabhiloni Enkulu, yaye ngasiphi isizathu?
14 Ihlabathi liya kukujonga njani ukutshatyalaliswa kweBhabhiloni Enkulu? Bemele kude, abezobupolitika abanganyanisekanga—“ookumkani bomhlaba”—bayayililela ngenxa yokuba kangangeenkulungwane bebefumana uyolo ngokuhenyuza nayo ngokomoya. Abanye abayililelayo nabayikhalelayo ngamadoda abawayo ezorhwebo, “abarhwebi bomhlaba . . . , abo batyeba ngayo.” Naba bacezela kude kuyo, besithi: “Yeha, yeha, mzi mkhulu owawuthiwe wambu ngelinen ecikizekileyo, nengubo ebomvu, nengubo emfusa, uhonjiswe ngegolide, namatye anqabileyo, neeperile! Ngokuba buphanziswe ngalixa linye ubutyebi obungaka.” Zonke izivatho ezimbejembeje zabefundisi beecawa namapomakazi ezindlu zeecawa ezinkulu ehlabathini ziya kuba zitshabalele ngonaphakade! (ISityhilelo 18:9-17) Kodwa ngaba iBhabhiloni Enkulu iya kulilelwa ngabo bonke abantu?
15, 16. Sisiphi isizathu sokuvuya abaya kuba naso abantu bakaThixo?
15 ISityhilelo 18:20, 21 siyaphendula: “Wenzele imihlali, nina mazulu, nani bapostile bangcwele, nani baprofeti; ngokuba uThixo eniphindezelele kuwo.” Njengelitye elikhulu lokusila eliphoswe elwandle, ‘iBhabheli, umzi omkhulu, [iya kube] igadlelwe, ingabi safunyanwa.’
16 Esinjani sona isizathu sokuvuya! ISityhilelo 19:1-8 siyakubonisa oku. Izihlandlo ezine kuvakala ukuhlokoma kwala mazwi, “Haleluya!” ephuma ezulwini. Abathathu bokuqala kwaba Haleluya badumisa uYehova ngenxa yokuba ephumeze umgwebo wobulungisa kwihenyukazi elingathandwayo, iBhabhiloni Enkulu. Ubukhosi behlabathi bonqulo lobuxoki abusekho! Kuphuma ilizwi etroneni kaThixo, lisithi: “Mdumiseni uThixo wethu, nonke nina bakhonzi bakhe, nani bamoyikayo, abancinane kwanabakhulu.” Hayi ilungelo esiya kuba nalo lokuthelela kuloo ngoma!
Umtshato Wemvana
17. Xa sithelekisa ngokomongo ISityhilelo 11:17 nese–19:6, kungaziphi iindlela ezimbini uYehova aqalisa ngazo ukulawula njengoKumkani?
17 UHaleluya wesine uqalisa omnye umxholo: “Haleluya! Ngokuba iNkosi uThixo uSomandla inguKumkani.” Kodwa ngaba bekungenziwanga isibongo esifanayo kwiSityhilelo 11:17? Apho sifunda oku: “Siyabulela kuwe, Nkosi, Thixo, Somandla, . . . Kuba uwathabathile amandla akho amakhulu, waba nguKumkani.” Kunjalo. Noko ke, umongo weSityhilelo 11:17 ubhekisela ekuziseni kukaYehova uBukumkani bukaMesiya ngowe-1914 ‘ukuze buzaluse zonke iintlanga ngentonga yentsimbi.’ (ISityhilelo 12:5) Umongo weSityhilelo 19:6 uthetha ngokutshatyalaliswa kweBhabhiloni Enkulu. Ekubeni unqulo olubuhenyukazi luphelisiwe, ukuba nguThixo kukaYehova kuthethelelwe. Ngoku uya kunqulwa njengoMongami Ophakamileyo noKumkani kuse emaphakadeni!
18. Ukutshatyalaliswa kweBhabhiloni Enkulu kwenza ukuba kuvakaliswe siphi isaziso esichwayitisayo?
18 Ngenxa yoko, kunokwenziwa esi saziso sichwayitisayo: “Masivuye sigcobe, [simzukise uYa]; ngokuba ufikile umsitho weMvana, umfazi wayo uzilungisile. Wanikwa ukuba athiwe wambu ngelinen ecikizekileyo, emhlophe, eqaqambileyo; kuba ilinen ecikizekileyo yimisebenzi yobulungisa yabangcwele.” (ISityhilelo 19:7, 8) Ixesha abathanjiswa abasaseleyo emhlabeni abaya kulufumana ngayo uvuko lwabo lwasezulwini alichazwanga. Kodwa umongo apha uyasiqinisekisa ukuba ukuba nenxaxheba kwabo kumtshato weMvana, uKristu Yesu, kuya kuba lixesha lolonwabo, yaye ingakumbi ekubeni beya kuba bezibonele ukuhlaziswa kwehenyukazi elingathandwayo, iBhabhiloni Enkulu.
Ukutshatyalaliswa Kwehlabathi LikaSathana
19. Yiyiphi enye into eyenzekayo echazwe kwiSityhilelo 19:11-21?
19 Ihashe elimhlophe elikhankanywe okokuqala kwiSityhilelo 6:2 ngoku liyabonakala kwakhona. KwiSityhilelo 19:11 sifunda oku: “Lowo uhleli phezu kwalo kusithiwa, nguThembekile, nguNyaniso; ugweba, enze imfazwe, ngobulungisa.” Ngaloo ndlela “uKumkani kakumkani, uNkosi kankosi” uyaphalisa ukuze abethe iintlanga yaye anyathele isixovulelo sewayini “yomsindo neyengqumbo kaThixo uSomandla.” Ukuhlanganisana ‘kookumkani bomhlaba, nemikhosi yabo’ ukuze benze imfazwe eArmagedon kulilize. UMkhweli wehashe elimhlophe uyalugqiba uloyiso lwakhe. Akusali nento le kwintlangano kaSathana yasemhlabeni.—ISityhilelo 19:12-21.
20. Kwenzeka ntoni kuMtyholi?
20 Kodwa kuthekani ngoMtyholi? KwiSityhilelo 20:1-6, uKristu Yesu uchazwa ‘njengesithunywa sezulu, esihla siphuma emazulwini, sinesitshixo senzonzobila, nomxokelelwane omkhulu esandleni saso.’ Uyayibamba inamba, iNyoka yakudala, enguMtyholi uSathana, ayikhonkxe, ayiphose enzonzobileni, aze avale yaye atywine ngaphezu kwayo. Ekubeni uSathana engasekho ukuze alahlekise iintlanga, uLawulo Lwewaka Leminyaka oluzukileyo lweMvana nomtshakazi wayo luyaqalisa. Iinyembezi zosizi azisekho! Ukufa okweza noAdam akusekho! Akusekho sijwili, akusekho kukhala, akusekho zintlungu! “Izinto zokuqala zigqithile.”—ISityhilelo 21:4.
21. Njengoko ngolangazelelo silinde ukutyhileka kukaYesu Kristu, lufanele lube yintoni uzimiselo lwethu?
21 Ngoxa ngolangazelelo silinde ukutyhileka kweNkosi yethu uYesu Kristu, masibonakalise inzondelelo ekuxeleleni abanye ngamadinga kaThixo othando ngoBukumkani. Inkululeko isondele! Kwanga singenza inkqubela, sityhalele phambili, njengabantwana abakhanyiselweyo beNkosi enguMongami uYehova!
Impinda
◻ Yintoni ebonisa ukuba ukutyhileka kukaYesu Kristu kusemnyango?
◻ Imini yempindezelo kaYehova iya kufika njani?
◻ ‘Abathandi bakaYehova’ bafanele bayijonge njani imeko ekhoyo yehlabathi?
◻ Kuya kwenzeka ntoni xa imbandezelo enkulu ifika?
[Umfanekiso okwiphepha 23]
UYesu ‘uza namafu’ ngokungabonakaliyo, ukuze aphumeze umgwebo
[Umfanekiso okwiphepha 25]
Kungekudala unqulo lobuxoki, inkqubo engendawo kaSathana, noSathana ziyakutshabalala zonke ezo zinto