Isahluko 40

Ukutyunyuzwa Kwentloko Yenyoka

Umbono 14—ISityhilelo 20:1-10

Umbandela: Ukuphoswa enzonzobileni kukaSathana, uLawulo Lweminyaka Eliwaka, ukuvavanywa kokugqibela koluntu nokutshatyalaliswa kukaSathana

Ixesha lokuzaliseka: Ukususela ekupheleni kwembandezelo enkulu ukuya ekutshatyalalisweni kukaSathana

1. Kuqhubeke njani ukuzaliseka kwesiprofeto sokuqala seBhayibhile?

UYASIKHUMBULA na isiprofeto sokuqala seBhayibhile? Savakaliswa nguYehova uThixo xa wathi kwiNyoka: “Ndiya kubeka ubutshaba phakathi kwakho nomfazi naphakathi kwembewu yakho nembewu yakhe. Yona iya kukutyumza intloko uze wena uyityumze isithende.” (Genesis 3:15) Ngoku ukuzaliseka kweso siprofeto kufikelela incopho yako! Siye sayilanda imbali yokulwa kukaSathana nentlangano kaYehova yasezulwini ebumfazi. (ISityhilelo 12:1, 9) Imbewu yasemhlabeni yeNyoka, ikunye nonqulo, ezobupolitika noshishino olukhulu oluyinxalenye yalo, iye yavusa intshutshiso enenkohlakalo kwimbewu yomfazi, uYesu Kristu nabalandeli bakhe abathanjisiweyo abali-144 000, abalapha emhlabeni. (Yohane 8:37, 44; Galati 3:16, 29) USathana wambulala ngendlela engcungcuthekisayo uYesu. Kodwa oku kwangqineka kufana nesilonda esisesithendeni, kuba uThixo wamvusa uNyana wakhe othembekileyo ngomhla wesithathu.—IZenzo 10:38-40.

2. Ityunyuzwa njani iNyoka, yaye kwenzeka ntoni kwimbewu yasemhlabeni yeNyoka?

² Kuthekani ngeNyoka nembewu yayo? Malunga nowama-56 C.E. umpostile uPawulos wabhala incwadi ende eyayisiya kumaKristu aseRoma. Ekuyiqukumbeleni, wawakhuthaza ngokuthi: “UThixo onika uxolo uya kumtyumza uSathana kamsinya phantsi kweenyawo zenu.” (Roma 16:20) Oku asikokugruzulwa nje kuncinane. USathana uza kutyunyuzwa! UPawulos apha wasebenzisa igama lesiGrike, elingusyn·triʹbo, elithetha ukutyunyuzwa kwento de ibe yingqushu, ukuyinyhasha, ukuyitshabalalisa ngokupheleleyo ngokuyityumza. Ngokubhekisele kwimbewu yeNyoka engabantu, yona iza kufumana isibetho sokwenene ngemini yeNkosi, nto leyo eya kufikelela incopho yayo kwimbandezelo enkulu ngokutyunyuzwa ngokupheleleyo kweBhabhiloni Enkulu neenkqubo zobupolitika zehlabathi, kunye nabaxhasi bazo bemali nabezomkhosi. (ISityhilelo, isahluko 18 nese-19) Ngaloo ndlela uYehova ubufikisa encotsheni ubutshaba obuphakathi kweembewu ezimbini. IMbewu yomfazi kaThixo iyayoyisa imbewu yasemhlabeni yeNyoka, ize loo mbewu itshabalale!

Ukuphoswa KukaSathana Enzonzobileni

3. Yintoni uYohane asixelela ukuba iza kwenzeka kuSathana?

³ Ngoko, yintoni ayigcinelweyo uSathana needemon zakhe? UYohane uyasixelela: “Ndabona ingelosi isihla iphuma ezulwini inesitshixo senzonzobila nomxokelelwane omkhulu esandleni sayo. Yayibamba inamba, loo nyoka yantlandlolo, enguMtyholi, uSathana, yaza yayibopha iminyaka eliwaka. Yayiphosa enzonzobileni yaza yayivala, yayitywina, ukuze ingabi nakuzilahlekisa iintlanga kwakhona de kuphele iminyaka eliwaka. Emva koko iya kukhululwa ithuba elincinane.”—ISityhilelo 20:1-3.

4. Ingubani ingelosi enesitshixo senzonzobila, yaye sazi njani?

⁴ Ingubani le ngelosi? Imele ukuba inamandla amakhulu okutshabalalisa utshaba olukhulu lukaYehova. “Inesitshixo senzonzobila nomxokelelwane omkhulu.” Ngaba oku akusikhumbuzi ngombono ongaphambilana? Ewe, ukumkani weenkumbi ubizwa ngokuba ‘yingelosi yenzonzobila’! (ISityhilelo 9:11) Ngoko kwakhona apha sibona uMthetheleli kaYehova Ophambili, uYesu Kristu ozukisiweyo, ephumeza isenzo. Esi siphatha-zingelosi sakhupha uSathana ezulwini, sagweba iBhabhiloni Enkulu, nesatshabalalisa ‘ookumkani bomhlaba nemikhosi yabo’ eArmagedon ngokuqinisekileyo sasingayi kushenxa ukuze siyekele ingelosi engaphantsi ukuba yenze umsebenzi omkhulu wokuphosa uSathana enzonzobileni!—ISityhilelo 12:7-9; 18:1, 2; 19:11-21.

5. Ingelosi yenzonzobila iqhubana njani noSathana uMtyholi, yaye ngoba?

⁵ Xa inamba enkulu nebomvu yaphoswa phantsi ivela ezulwini, yachazwa ‘njengenyoka yantlandlolo, leyo ibizwa ngokuba nguMtyholi, noSathana, lowo ulahlekisa umhlaba omiweyo uphela.’ (ISityhilelo 12:3, 9) Ngoku, xa ebanjwa aze aphoswe enzonzobileni, kwakhona uchazwa ngokupheleleyo ‘njengenamba, inyoka yantlandlolo, enguMtyholi, uSathana.’ Lo mqwengi, umkhohlisi, umhlebi nomchasi odume kakubi uyabotshwa ngemixokelelwane aze aphoswe “enzonzobileni,” ethi ivalwe ize itywinwe ngokuqinileyo, ‘ukuze angabi nakuzilahlekisa iintlanga kwakhona.’ Oku kuvalelwa enzonzobileni kukaSathana kuya kuthabatha iminyaka eliwaka, ekuya kuthi ebudeni beli xesha impembelelo yakhe kuluntu ingabi sabakho kanye njengokuba kuba njalo ngebanjwa elifakwe ezantsi esiseleni. Ingelosi yenzonzobila imshenxisa ngokupheleleyo uSathana ukuze angadibani noBukumkani bobulungisa. Yenjani yona inkululeko kuluntu!

6. (a) Bubuphi ubungqina obukhoyo bokuba iidemon nazo ziya enzonzobileni? (b) Yintoni ngoku enokuqalisa, yaye ngoba?

⁶ Kwenzeka ntoni kwiidemon? Nazo “zibekelwe umgwebo.” (2 Petros 2:4) USathana ubizwa ngokuba ‘nguBhelezebhubhe umlawuli weedemon.’ (Luka 11:15, 18; Mateyu 10:25) Ngenxa yokusebenzisana kwazo noSathana kangangethuba elide, ngaba azimele zifumane umgwebo ofanayo nazo? Ukuphoswa enzonzobileni kudala kuyinto eyoyikwayo zezo demon; ngasihlandlo sithile xa uYesu wayejamelene nazo, “zambongoza ukuba angaziyaleli zimke ziye enzonzobileni.” (Luka 8:31) Kodwa xa uSathana ephoswa enzonzobileni, ngokuqinisekileyo iingelosi zakhe ziya kuphoswa enzonzobileni kunye naye. (Thelekisa uIsaya 24:21, 22.) Emva kokuphoswa enzonzobileni kukaSathana needemon zakhe, uLawulo Lweminyaka Eliwaka lukaYesu Kristu lunokuqalisa.

7. (a) USathana needemon zakhe baya kuba kweyiphi imeko ngoxa besenzonzobileni, yaye sazi njani? (b) Ngaba iHadesi nenzonzobila ziyafana? (Bona umbhalo osemazantsi.)

⁷ Ngaba uSathana needemon zakhe baya kusebenza ngoxa besenzonzobileni? Kaloku, khumbula irhamncwa elimbala ungqombela “lalikho, kodwa alikho, ukanti sele liza kunyuka liphume enzonzobileni.” (ISityhilelo 17:8) Ngoxa lalisenzonzobileni, ‘lalingekho.’ Lalingasebenzi, lingahambi, zonke iinjongo zalo zazifile. Ngokukwanjalo, ethetha ngoYesu, umpostile uPawulos wathi: “‘Ngubani na oya kuhla aye enzonzobileni?’ oko kukuthi, ukuze anyuse uKristu kwabafileyo?” (Roma 10:7) Ngoxa wayekuloo nzonzobila, uYesu wayefile.a Ngoko, kusengqiqweni ukugqiba ngelokuba uSathana needemon zakhe baya kuba kwimeko yokungasebenzi njengabafileyo kangangeminyaka eliwaka yokuba senzonzobileni kwabo. Ezinjani zona ukuba mnandi iindaba kubathandi bobulungisa!

Abagwebi Beminyaka Eliwaka

8, 9. Yintoni esiyixelelwa nguYohane ngoku ngabo bahleli ezitroneni, yaye bangoobani?

⁸ Emva kweminyaka eliwaka, uSathana uya kukhululwa enzonzobileni ithuba elifutshane. Ngoba? Ngaphambi kokunikela impendulo, uYohane utsalela ingqalelo yethu ekuqaleni kweso sihlandlo sexesha. Siyafunda: “Ndabona iitrone, yaye abo babehleli kuzo banikwa igunya lokugweba.” (ISityhilelo 20:4a) Ngoobani aba bahleli ezitroneni yaye belawula emazulwini noYesu ozukisiweyo?

⁹ ‘Ngabangcwele’ abachazwa nguDaniyeli njengabalawula kuBukumkani naLowo ‘unjengonyana womntu.’ (Daniyeli 7:13, 14, 18) Bakwangabadala abangama-24 abahleli kwiitrone zasezulwini kwindawo enoYehova. (ISityhilelo 4:4) Baquka abapostile abali-12, awathi uYesu wabanika esi sithembiso: “Ekudalweni okutsha, xa uNyana womntu ehlala phantsi kwitrone yakhe ezukileyo, nina eniye nandilandela niya kuhlala kwiitrone ezilishumi elinesibini, nigweba izizwe ezilishumi elinesibini zakwaSirayeli.” (Mateyu 19:28) Bakwaquka uPawulos, kwanamaKristu aseKorinte awahlala ethembekile. (1 Korinte 4:8; 6:2, 3) Babeya kuquka namalungu ebandla laseLawodike awathi oyisa.—ISityhilelo 3:21.

10. (a) UYohane ubachaza njani ookumkani abali-144 000? (b) Ngokwendlela uYohane asixelele ngayo ngaphambilana, ookumkani abali-144 000 baquka oobani?

¹⁰ Iitrone—ezili-144 000—zilungiselelwe aba boyisi bathanjisiweyo ‘abathengwa phakathi koluntu njengeentlahlela kuThixo nakuyo iMvana.’ (ISityhilelo 14:1, 4) UYohane uhlabela mgama esithi: “Ewe, ndabona imiphefumlo yabo babebulewe ngezembe ngenxa yobungqina ababunikelayo ngoYesu nangenxa yokuthetha ngoThixo, nabo babengalinqulanga irhamncwa nomfanekiso walo nababengalwamkelanga uphawu ebunzini labo okanye esandleni sabo.” (ISityhilelo 20:4b) Ngoko, phakathi kwabo kumkani, kukho abafeli-nkolo abangamaKristu abathi ngaphambili, ekuvulweni kwetywina lesihlanu, babuza uYehova ukuba kode kube nini na elindele ukuphindezelela igazi labo. Ngelo xesha, banikwa umwunduzo omhlophe baza baxelelwa ukuba balinde ithutyana. Kodwa ngoku baphindezelelwe ngokutshatyalaliswa kweBhabhiloni Enkulu, ukutshatyalaliswa kweentlanga nguKumkani wookumkani neNkosi yeenkosi, nokuphoswa kukaSathana enzonzobileni.—ISityhilelo 6:9-11; 17:16; 19:15, 16.

11. (a) Simele siliqonde njani ibinzana elithi ‘babulewe ngezembe’? (b) Kutheni le nto kusenokuthiwa lonke i-144 000 lifa ukufa okulidini?

¹¹ Ngaba bonke aba bagwebi basebukhosini bali-144 000 ‘babulawa ngezembe’ ngokoqobo? Kusenokwenzeka ukuba abambalwa ngentelekiso banqunyulwa ngokoqobo. Noko ke, akuthandabuzeki ukuba eli binzana lenzelwe ukuba liquke onke loo maKristu athanjisiweyo anyamezela ukufela ukholo ngandlel’ ithile.b (Mateyu 10:22, 28) Ngokuqinisekileyo, uSathana ubeya kukuthanda ukuba babulawe bonke ngezembe, kodwa, enyanisweni, asingabo bonke abazalwana abathanjisiweyo bakaYesu abafa njengabafeli-nkolo. Uninzi lwabo lufa ngenxa yezifo okanye ukwaluphala. Noko ke, abanjalo bakwangabeqela elibonwa nguYohane ngoku. Ukufa kwabo bonke aba, ngangqiqo ithile, kulidini. (Roma 6:3-5) Ukongezelela, akukho namnye kubo owayeyinxalenye yehlabathi. Ngenxa yoko, bonke baye bathiywa lihlabathi, yaye ngokungathi kunjalo, baba ngabafileyo emehlweni alo. (Yohane 15:19; 1 Korinte 4:13) Akukho namnye kubo owanqula irhamncwa okanye umfanekiso walo, yaye xa bafayo, akukho namnye kubo owayenophawu lwerhamncwa. Bonke bafa njengaboyisi.—1 Yohane 5:4; ISityhilelo 2:7; 3:12; 12:11.

12. Yintoni echazwa nguYohane ngookumkani abali-144 000, yaye ukudla kwabo ubomi kwenzeka nini?

¹² Ngoku aba boyisi bayaphila kwakhona! UYohane uthi: “Babuyela ebomini baza balawula njengookumkani kunye noKristu iminyaka eliwaka.” (ISityhilelo 20:4c) Ngaba oku kuthetha ukuba aba bagwebi abavuswa de kube semva kokutshatyalaliswa kweentlanga nokuphoswa enzonzobileni kukaSathana needemon zakhe? Akunjalo. Uninzi lwabo sele luphila ngenene, ekubeni luhamba noYesu ekuhlaseleni iintlanga eArmagedon. (ISityhilelo 2:26, 27; 19:14) Ngenene, uPawulos wabonisa ukuba ukuvuswa kwabo kuqalisa emva nje kokuqalisa kobukho bukaYesu ngowe-1914 yaye bambi bavuswa ngaphambi kwabanye. (1 Korinte 15:51-54; 1 Tesalonika 4:15-17) Ngoko ke, ukudla kwabo ubomi kwenzeka ebudeni bethuba elithile njengoko ngokwabantu ngabanye befumana isipho sobomi bokungafi emazulwini.—2 Tesalonika 1:7; 2 Petros 3:11-14.

13. (a) Simele siyijonge njani iminyaka eliwaka ekuthi ebudeni bayo i-144 000 lilawule, yaye ngoba? (b) UPapias waseHierapolis wayijonga njani iminyaka eliwaka? (Bona umbhalo osemazantsi.)

¹³ Ukulawula nokugweba kwabo kuya kuqhuba ithuba elingangeminyaka eliwaka. Ngaba le minyaka eliwaka yeyokoqobo, okanye ngaba simele siyijonge ngokomfuziselo njengesihlandlo sexesha esingachazwanga neside? “Amawaka” asenokuthetha inani elikhulu nelingaqingqwanga njengokuba kunjalo kweyoku-1 kaSamuweli 21:11. Kodwa apha igama elithi “iwaka” lelokoqobo, ekubeni libonakala izihlandlo ezithathu kwiSityhilelo 20:5-7 ‘njengeminyaka eliwaka.’ UPawulos walibiza eli xesha lomgwebo ngokuthi ‘yimini’ xa wathi: “[UThixo] umise imini anenjongo ngayo yokuba agwebe umhlaba omiweyo ngobulungisa.” (IZenzo 17:31) Ekubeni uPetros esixelela ukuba imini enye kuYehova injengeminyaka eliwaka, kufanelekile ukuba le Mini yoMgwebo ibe yiminyaka eliwaka yokoqobo.c—2 Petros 3:8.

Abafileyo Abaseleyo

14. (a) Ngawaphi amazwi ahlonyelwa nguYohane ngokuphathelele “abanye abafileyo”? (b) Amazwi avakaliswa ngumpostile uPawulos alicacisa njani ibinzana elithi “babuyele ebomini”?

¹⁴ Noko ke, ngoobani abaya kugwetywa ngaba kumkani ukuba, njengoko umpostile uYohane ehlomela apha, “(abanye abafileyo abazange babuyele ebomini kwada kwaphela iminyaka eliwaka)”? (ISityhilelo 20:5a) Kwakhona, ibinzana elithi “babuyele ebomini” limele liqondwe ngokomongo. Eli binzana linokuba neentsingiselo ezahlukahlukeneyo kwiimeko ezahlukahlukeneyo. Ngokomzekelo, uPawulos wathi ngamaKristu angoowabo athanjisiweyo: “Nina uThixo unenze naphila nangona nanifile kwizigqitho nezono zenu.” (Efese 2:1) Ewe, amaKristu athanjiswe ngomoya ‘enziwa aphila,’ kwanakwinkulungwane yokuqala, evakaliswa engamalungisa ngokwesizinzi sokukholwa kwawo kwidini likaYesu.—Roma 3:23, 24.

15. (a) AmaNgqina kaYehova angaphambi kwexesha lobuKristu anandipha kuphi ukuma noThixo? (b) Ezinye izimvu ‘zibuyela njani ebomini,’ yaye ziya kuwuma nini umhlaba ngokwengqiqo epheleleyo?

¹⁵ Ngokufanayo, amaNgqina kaYehova angaphambi kwexesha lobuKristu avakaliswa engamalungisa njengezihlobo zikaThixo; yaye uAbraham, uIsake noYakobi kwathethwa ngabo ‘njengabaphilayo’ nakubeni babefile ngokwenyama. (Mateyu 22:31, 32; Yakobi 2:21, 23) Noko ke, bona nabo bonke abanye abavuswayo, kwanesihlwele esikhulu sezinye izimvu ezithembekileyo esisindayo kwiArmagedon nabo nabaphi na abantwana ababazalayo kwihlabathi elitsha, bamele benziwe bafezeke njengabantu. Oku kuya kufezwa nguKristu nookumkani nababingeleli abanxulumene naye ebudeni beMini yoMgwebo yeminyaka eliwaka, ngesizinzi sedini lentlawulelo likaYesu. Ngasekupheleni kwaloo Mini, “abanye abafileyo” baya kube ‘bebuyele ebomini’ ngengqiqo yokuba baya kuba ngabantu abafezekileyo. Njengokuba siza kubona, ngoko bamele badlule kuvavanyo lokugqibela, kodwa baya kujongana nolo vavanyo njengabantu abenziwe bafezeka. Xa bedlula kolo vavanyo, uThixo uya kubavakalisa befanele ukuphila ngonaphakade, bengamalungisa ngokwengqiqo epheleleyo. Baya kubona inzaliseko epheleleyo yesi sithembiso: “Amalungisa aya kuwudla ilifa umhlaba, ahlale kuwo ngonaphakade.” (INdumiso 37:29) Elinjani lona ukuvuyisa ikamva eligcinelwe uluntu oluthobelayo!

Uvuko Lokuqala

16. UYohane uluchaza njani uvuko olufunyanwa ngabo balawula njengookumkani noKristu, yaye ngoba?

¹⁶ Ngoku ebuyela kwabo “babuyela ebomini baza balawula njengookumkani kunye noKristu,” uYohane ubhala oku: “Luvuko lokuqala ke olo.” (ISityhilelo 20:5b) Lolokuqala njani? “Luvuko lokuqala” ngokubhekisele kwixesha, kuba abo balufumanayo ‘baziintlahlela kuThixo nakuyo iMvana.’ (ISityhilelo 14:4) Ikwalolokuqala ngokubaluleka, ekubeni abo banesabelo kulo belawula noYesu kuBukumkani bakhe basezulwini baze bagwebe lonke uluntu. Okokugqibela, lolokuqala ngomgangatho. Ngaphandle koYesu Kristu ngokwakhe, abo bavuswa kuvuko lokuqala kuphela kwezidalwa ekuthethwa ngazo eBhayibhileni njengezenziwa zingafi.—1 Korinte 15:53; 1 Timoti 6:16.

17. (a) UYohane ulichaza njani ikamva elisikelelekileyo lamaKristu athanjisiweyo? (b) Kuyintoni ‘ukufa kwesibini,’ yaye kutheni kungenalo nje ‘igunya’ kuboyisi abali-144 000?

¹⁷ Elinjani lona ukusikeleleka ikamva elifunyanwa ngaba bathanjisiweyo! Kunjengokuba uYohane esithi: “Unoyolo yaye ungcwele lowo unesabelo kuvuko lokuqala; ukufa kwesibini akunagunya kubo.” (ISityhilelo 20:6a) Njengokuba uYesu wathembisa amaKristu aseSmirna, aba boyisi banesabelo “kuvuko lokuqala” abayi kujongana nengozi yokwenzakaliswa “kukufa kwesibini,” okuthetha imbubhiso, intshabalalo ekungekho themba lovuko kuyo. (ISityhilelo 2:11; 20:14) Ukufa kwesibini “akunagunya” kuboyisi abanjalo, kuba baya kuba bengabantu abangenakonakala nabangenakufa.—1 Korinte 15:53.

18. Uthini uYohane ngoku ngabalawuli abatsha bomhlaba, ibe baya kufeza ntoni?

¹⁸ Hayi indlela abahluke ngayo kookumkani bomhlaba abakhoyo ebudeni bokusebenzisa kukaSathana igunya! Ubukhulu becala baye balawula iminyaka nje engama-50 okanye engama-60, yaye uninzi lwabo lulawule iminyaka embalwa. Uninzi lwabo luye lwacinezela uluntu. Nokuba kunjani na, iintlanga zinokungenelwa njani ngokusisigxina phantsi kwabalawuli abasoloko betshintshwa nabaneenkqubo ezisoloko ziguqulwa? Ngokwahlukileyo koko, uYohane uthi ngabalawuli abatsha bomhlaba: “Baya kuba ngababingeleli bakaThixo nabakaKristu, balawule njengookumkani kunye naye iminyaka eliwaka.” (ISityhilelo 20:6b) Bekunye noYesu, baya kubumba urhulumente opheleleyo kangangeminyaka eliwaka. Umsebenzi wabo njengababingeleli, ekusebenziseni idini lobuntu obufezekileyo bukaYesu, uya kwenza abantu abathobelayo bafumane imfezeko yokomoya, yokuziphatha nengokwasemzimbeni. Umsebenzi wabo njengookumkani uya kuphumela ekwakhiweni kwebutho labantu elisemhlabeni wonke elibonakalisa ubulungisa nobungcwele bukaYehova. Njengabagwebi beminyaka eliwaka, bekunye noYesu, ngothando baya kwalathisa abantu abathobelayo ekufikeleleni usukelo lobomi obungunaphakade.—Yohane 3:16.

Uvavanyo Lokugqibela

19. Iya kuba njani imeko yomhlaba neyoluntu ekupheleni koLawulo Lweminyaka Eliwaka, yaye yintoni eyenziwa nguYesu ngoku?

¹⁹ Ekupheleni koLawulo Lweminyaka Eliwaka, wonke umhlaba uya kube ufana ne-Eden yangaphambili. Uya kuba yiparadesi yokwenene. Uluntu olufezekileyo alusayi kuphinda lumfune umbingeleli omkhulu wokululamlela phambi koThixo, njengoko yonke imizila yesono sika-Adam iya kube ishenxisiwe, notshaba lokugqibela olukukufa lutshatyalalisiwe. UBukumkani bukaKristu buya kube buyiphumezile injongo kaThixo yokudala ihlabathi elinye elinorhulumente omnye. Kweli thuba, uYesu ‘uya kunikela ubukumkani kuThixo wakhe noYise.’—1 Korinte 15:22-26; Roma 15:12.

20. Yintoni esiyixelelwa nguYohane ukuba iya kwenzeka xa kufika ixesha lovavanyo lokugqibela?

²⁰ Ngoku kulixesha lovavanyo lokugqibela. Ngaba elo hlabathi loluntu olwenziwe lwafezeka, ngokwahlukileyo kubantu bokuqala base-Eden, liya kuma ngokuqinileyo kwingqibelelo yalo? UYohane uyasixelela okwenzekayo: “Iya kuthi ke yakuphela iminyaka eliwaka, akhululwe uSathana entolongweni, aphume aye kulahlekisa iintlanga ezikwiimbombo zone zomhlaba, uGogi noMagogi, abahlanganisele emfazweni. Inani lingangentlabathi yaselwandle. Banyuka kububanzi bomhlaba, bayirhawula inkampu yabo bangcwele nesixeko esithandiweyo.”—ISityhilelo 20:7-9a.

21. Kumgudu wakhe wokugqibela, wenza ntoni uSathana, yaye kutheni singamele simangaliswe yinto yokuba abathile beya kulandela uSathana kwanasemva koLawulo Lweminyaka Eliwaka?

²¹ Uya kuba yintoni umgudu wokugqibela kaSathana? Ukhohlisa “iintlanga ezikwiimbombo zone zomhlaba, uGogi noMagogi,” aze azikhokelele “emfazweni.” Ngubani ekunokwenzeka ukuba axhase uSathana emva kolawulo lobuthixo lweminyaka eliwaka oluvuyisayo nolwakhayo? Kaloku, musa ukulibala ukuba uSathana walahlekisa uAdam noEva abafezekileyo ngoxa babenandipha ubomi kwiParadesi yase-Eden. Yaye wakwazi ukulahlekisa iingelosi ezazibone imiphumo emibi yemvukelo yangaphambili. (2 Petros 2:4; Yude 6) Ngoko asimele simangaliswe yinto yokuba bambi babantu abafezekileyo beya kulukuhlelwa ekulandeleni uSathana kwanasemva kweminyaka eliwaka evuyisayo yokulawula koBukumkani bukaThixo.

22. (a) Yintoni eboniswa libinzana elithi “iintlanga ezikwiimbombo zone zomhlaba”? (b) Kutheni le nto aba bavukeli bebizwa ngokuba ‘nguGogi noMagogi’?

²² IBhayibhile ibabiza aba bavukeli ngokuthi ‘ziintlanga ezikwiimbombo zone zomhlaba.’ Oku akuthethi ukuba uluntu luya kuphinde lwahlulelane lube ngamaqela eentlanga angevaniyo. Kubonisa nje ukuba ezi ntlanga ziya kuzahlula kumalungisa nakwabanyanisekileyo bakaYehova zize zibonakalise kwaumoya ombi oboniswa ziintlanga namhlanje. Ziya “kucinga icebo lenkohlakalo,” njengoko wenjenjalo uGogi noMagogi kwisiprofeto sikaHezekile, enosukelo lokutshabalalisa urhulumente wolawulo lobuthixo emhlabeni. (Hezekile 38:3, 10-12) Ngenxa yoko, zibizwa ngokuba ‘nguGogi noMagogi.’

23. Yintoni eboniswa sisibakala sokuba inani labavukeli “lingangentlabathi yaselwandle”?

²³ Inani labo bathelela uSathana kwimvukelo yakhe liya kuba ‘ngangentlabathi yaselwandle.’ Bangaphi ke abantu abanjalo? Akukho nani limiselwe kwangaphambili. (Thelekisa uYoshuwa 11:4; ABagwebi 7:12.) Inani lokugqibela elipheleleyo laba bavukeli liya kuxhomekeka kwindlela ngamnye wabo asabela ngayo kubuqhophololo benkohliso kaSathana. Noko ke, alithandabuzeki elokuba liya kuba liqela elikhulu, ekubeni beya kuziva benamandla awaneleyo okoyisa “inkampu yabo bangcwele nesixeko esithandiweyo.”

24. (a) Siyintoni ‘isixeko esithandiweyo,’ yaye sinokurhawulwa njani? (b) Yintoni efuziselwa ‘yinkampu yabo bangcwele’?

²⁴ ‘Isixeko esithandiweyo’ simele ukuba sisixeko athetha ngaso uYesu Kristu ozukisiweyo kubalandeli bakhe kwiSityhilelo 3:12 nasibiza ngokuba ‘sisixeko soThixo wam, iYerusalem entsha ehla iphuma ezulwini kuThixo wam.’ Ekubeni iyintlangano yasezulwini, loo mikhosi yasemhlabeni ‘inokuyirhawula’ njani? Inokwenjenjalo ngokuthi irhawule “inkampu yabo bangcwele.” Inkampu ingaphandle kwesixeko; ngoko ke, “inkampu yabo bangcwele” imele ukuba ifuzisela abo basemhlabeni bangaphandle kwendawo yasezulwini yeYerusalem Entsha abalixhasa ngokunyanisekileyo ilungiselelo likaYehova loburhulumente. Xa abavukeli abaphantsi koSathana behlasela abo bathembekileyo, iNkosi uYesu ikujonga oku njengokuhlaselwa kwayo. (Mateyu 25:40, 45) “Iintlanga” ziya kuzama ukukutshayela konke oko iYerusalem Entsha yasezulwini ikufezileyo ekwenzeni umhlaba ube yiparadesi. Ngoko ngokuhlasela “inkampu yabo bangcwele,” zikwahlasela “nesixeko esithandiweyo.”

Idike Lomlilo Nesalfure

25. UYohane uwuchaza njani umphumo wokuhlasela kwabavukeli “inkampu yabo bangcwele,” yaye oku kuya kuthetha ntoni kuSathana?

²⁵ Ngaba lo mgudu wokugqibela owenziwa nguSathana uya kuphumelela? Ngokuqinisekileyo awunakuphumelela—kanye njengokuba ingasayi kuphumelela intlaselo uGogi wakwaMagogi aza kuyenza kuSirayeli wokomoya kumhla wethu! (Hezekile 38:18-23) UYohane uwuchaza ngokucacileyo umphumo woku: “Kodwa kwehla umlilo uphuma ezulwini waza wabadla. UMtyholi owayebalahlekisa waphoswa edikeni lomlilo nesalfure, apho lalisele liphoswe khona irhamncwa nomprofeti wobuxoki.” (ISityhilelo 20:9b-10a) Kunokuba aphoswe nje enzonzobileni, ngeli xesha uSathana, inyoka yakudala, uya kutyunyuzwa angabikho, ahlekezwe aze abhujiswe ngokupheleleyo ngokungathi kungomlilo.

26. Kutheni le nto ‘idike lomlilo nesalfure’ zingenakuba yindawo yokoqobo yentuthumbo?

²⁶ Sele sitshilo ukuba ‘idike lomlilo nesalfure’ azinakuba yindawo yokoqobo yentuthumbo. (ISityhilelo 19:20) Ukuba uSathana ebeza kuthuthunjiswa ngokuqatha apho ngonaphakade, uYehova bekuya kufuneka amgcine ephilile. Kanti, ubomi sisipho, abusiso isohlwayo. Ukufa sisohlwayo sesono, yaye ngokutsho kweBhayibhile, izidalwa ezifileyo aziva ntlungu. (Roma 6:23; INtshumayeli 9:5, 10) Ngaphezu koko, kamva sifunda ukuba ukufa ngokwako, kunye neHadesi, ziphoswa kwakweli dike lomlilo nesulfure. Ngokuqinisekileyo, ukufa neHadesi azinakuyiva intlungu!—ISityhilelo 20:14.

27. Okwenzeka kwiSodom neGomora kusinceda njani ukuba siqonde ibinzana elithi ‘idike lomlilo nesalfure’?

²⁷ Konke oku komeleza imbono yokuba idike lomlilo nesalfure zizinto zokomfuziselo. Ngokungakumbi, ukukhankanywa komlilo nesulfure kusikhumbuza ngekamva leSodom neGomora zamandulo, ezatshatyalaliswa nguThixo ngenxa yobungendawo bazo obubi. Xa lafikayo ixesha lazo, “uYehova wanisa isalfure nomlilo ovela kuYehova, emazulwini, phezu kweSodom naphezu kweGomora.” (Genesis 19:24) Okwehlela ezo zixeko zibini kubizwa ngokuba ‘sisohlwayo sesigwebo somlilo ongunaphakade.’ (Yude 7) Kanti, ezo zixeko zibini azizange zithuthunjiswe ngonaphakade. Kunoko, zatshatyalaliswa, zapheliswa ngonaphakade, nabemi bazo abonakeleyo. Ezo zixeko azikho namhlanje, yaye akukho bani unokutsho ngokuqinisekileyo ukuba zazindawoni na.

28. Liyintoni idike lomlilo nesalfure, yaye lahluke njani kukufa, kwiHadesi nenzonzobila?

²⁸ Ngokuvisisana noku, iBhayibhile icacisa intsingiselo yedike lomlilo nesalfure: “Oku kuthetha ukufa kwesibini, idike lomlilo.” (ISityhilelo 20:14) Lifana ngokucacileyo neGehena uYesu awathetha ngayo, indawo apho abangendawo bahlala betshatyalalisiwe, kungekhona ukuthuthunjiswa ngonaphakade. (Mateyu 10:28) Yintshabalalo epheleleyo ekungekho themba lovuko kuyo. Ngaloo ndlela, ngoxa kukho izitshixo zokufa, zeHadesi, nezenzonzobila, ayikhankanywa into yokuba kukho isitshixo sokuvula eli dike lomlilo nesalfure. (ISityhilelo 1:18; 20:1) Alinakuze liwakhuphe amaxhoba alo.—Thelekisa uMarko 9:43-47.

Bathuthunjiswa Imini Nobusuku Ngonaphakade

29, 30. Yintoni ethethwa nguYohane ngoMtyholi kwanangerhamncwa nomprofeti wobuxoki, yaye oku kumele kuqondwe njani?

²⁹ Ebhekisela kuMtyholi nerhamncwa nomprofeti wobuxoki, ngoku uYohane usixelela oku: “Yaye baya kuthuthunjiswa imini nobusuku ngonaphakade kanaphakade.” (ISityhilelo 20:10b) Kuthetha ntoni oku? Njengoko sele kukhankanyiwe, akukho ngqiqweni ukuthi imifuziselo, enjengerhamncwa nomprofeti wobuxoki, nokufa neHadesi zinokuthuthunjiswa ngokoqobo. Ngenxa yoko, asinasizathu sokukholelwa ukuba uSathana uya kuva ubunzima ngonaphakade. Umele abhujiswe.

³⁰ Igama lesiGrike elisetyenziswe apha njengelithetha “ukuthuthumbisa,” ba·sa·niʹzo, ngokuyintloko lithetha “ukuvavanya (isinyithi) ngelitye elitshisayo.” “Ukuqinisekisa ngokusebenzisa intuthumbo” yintsingiselo yesibini. (The New Thayer’s Greek English Lexicon of the New Testament) Kulo mongo, ukusetyenziswa kweli gama lesiGrike kubonisa ukuba okwenzeka kuSathana, kuwo onke amaphakade, kuya kusebenza njengento egwebayo kwimbambano yokufaneleka nokuba nobulungisa kolawulo lukaYehova. Loo mbambano yolawulo lolongamo iya kuba izinziswe ngonaphakade. Akunakuze kwakhona kufuneke ukuba ucelomngeni kulongamo lukaYehova luvavanywe kangangethuba elide ukuze lungqinwe luphosakele.—Thelekisa iNdumiso 92:1, 15.

31. Amagama amabini esiGrike ahlobene nentsingiselo enye yegama elithi “ukuthuthumbisa” asinceda njani ukuba siqonde isohlwayo esifunyanwa nguSathana uMtyholi?

³¹ Ukongezelela, igama elihlobene neli, uba·sa·ni·stesʹ, “umthuthumbisi,” eBhayibhileni lisetyenziswa ukuthetha “umgcini wentolongo.” (Mateyu 18:34, Kingdom Interlinear) Ngokuvisisana noku, uSathana uya kuvalelwa entolongweni kwidike lomlilo ngonaphakade; akanakuze akhululwe. Okokugqibela, kwiSeptuagint yesiGrike, awayeyazi kakuhle uYohane, igama elihlobene neli, ubaʹsa·nos lisetyenziswa ukubhekisela kwihlazo elikhokelela ekufeni. (Hezekile 32:24, 30) Oku kusinceda sibone ukuba isohlwayo esifunyanwa nguSathana sesehlazo, kukufa okungunaphakade kwidike lomlilo nesalfure. Imisebenzi yakhe ufa nayo.—1 Yohane 3:8.

32. Sisiphi isohlwayo esiya kufunyanwa ziidemon, yaye sazi njani?

³² Kwakhona, iidemon azikhankanywa kule ndinyana. Ngaba ziya kukhululwa noSathana ekupheleni kweminyaka eliwaka zize ke zifumane isohlwayo sokufa okungunaphakade kunye naye? Ubungqina buphendula ngokuthi ewe koba njalo. Kumzekeliso wezimvu neebhokhwe, uYesu wathi iibhokhwe zaziya kuya “emlilweni ongunaphakade, owalungiselelwa uMtyholi neengelosi zakhe.” (Mateyu 25:41) Ibinzana elithi ‘umlilo ongunaphakade’ limele ukuba libhekisela kwidike lomlilo nesulfure apho uSathana aza kuphoselwa khona. Iingelosi zikaMtyholi zakhutshwa ezulwini kunye naye. Ngokucacileyo, zaphoswa enzonzobileni kunye naye ekuqaleni koLawulo Lweminyaka Eliwaka. Ngoko, ngokuvisisanayo, kwakhona ziya kutshatyalaliswa kunye naye kwidike lomlilo nesulfure.—Mateyu 8:29.

33. Yiyiphi inkcukacha yokugqibela yeGenesis 3:15 eya kuzaliseka ngelo xesha, yaye umoya kaYehova ngoku utsalela ingqalelo kaYohane kuwuphi umbandela?

³³ Ngale ndlela, inkcukacha yokugqibela yesiprofeto esibhalwe kwiGenesis 3:15 iyazaliseka. Xa uSathana ephoselwa kwidike lomlilo, uya kuba ngofileyo njengenyoka enyathelwe entloko ngesithende sentsimbi. Yena needemon zakhe baya kutshatyalaliswa ngonaphakade. Abaphindanga bakhankanywa kwincwadi yeSityhilelo. Ngoku, ekubeni ngokuprofetayo betshatyalalisiwe, umoya kaYehova utsalel’ ingqalelo kumbandela ongowomdla wokwenene kwabo banethemba lasemhlabeni: Uya kuba yintoni umphumo kuluntu oluphantsi kolawulo lwasezulwini ‘lukaKumkani wookumkani nabo babiziweyo nabanyuliweyo nabathembekileyo abakunye naye’? (ISityhilelo 17:14) Ukuze aphendule oku, uYohane usibuyisela emva kwakhona ekuqaleni koLawulo Lweminyaka Eliwaka.

[Imibhalo esemazantsi]

[Umfanekiso okwiphepha 293]

ULwandle Olufileyo. Indawo ekucingelwa ukuba yayimi kuyo iSodom neGomora

[Imifanekiso ekwiphepha 294]

“Ndiya kubeka ubutshaba phakathi kwakho nomfazi naphakathi kwembewu yakho nembewu yakhe. Yona iya kukutyumza intloko uze wena uyityumze isithende”