Imibuzo Evela Kubafundi
Iidemon ziya kube ziphi ebudeni boLawulo lukaKristu Lweminyaka Eliwaka?
IBhayibhile ayiwuphenduli ngokucacileyo lo mbuzo. Noko ke, sinako ukwazi apho ziya kube zikho iidemon ebudeni boLawulo lukaKristu Lweminyaka Eliwaka.
Echaza ngoko kuya kwenzeka ebudeni bokuqalisa nasekupheleni kweminyaka Eliwaka, umpostile uYohane uthi: “Ndabona ingelosi isihla iphuma ezulwini inesitshixo senzonzobila nomxokelelwane omkhulu esandleni sayo. Yayibamba inamba, loo nyoka yantlandlolo, enguMtyholi, uSathana, yaza yayibopha iminyaka eliwaka. Yayiphosa enzonzobileni yaza yayivala, yayitywina, ukuze ingabi nakuzilahlekisa iintlanga kwakhona de kuphele iminyaka eliwaka. Emva koko iya kukhululwa ithuba elincinane.” (ISityhilelo 20:1-3) Ezi ndinyana zithetha kuphela ngokufakwa enzonzobileni kukaSathana nokukhululwa kwakhe okwethutyana. Nangona iidemon zingakhankanywanga, kubonakala kusengqiqweni ukuthi xa ingelosi enesitshixo senzonzobila—uYesu Kristu ozukileyo—ibamba ize ifake uMtyholi enzonzobileni, uya kwenza okufanayo nakwiidemon.—ISityhilelo 9:11.
Emva kokuba nguKumkani ngowe-1914, uYesu Kristu wenza into eyaba nomphumo kuSathana kwakunye needemon. ISityhilelo 12:7-9 sithi: “Kwabakho imfazwe ezulwini: UMikayeli neengelosi zakhe balwa idabi nenamba, yazilwela nayo inamba kunye neengelosi zayo [iidemon] kodwa ayizange yoyise, azabi safunyanelwa ndawo ezulwini. Ngoko yaphoswa phantsi inamba enkulu, inyoka yantlandlolo, leyo ibizwa ngokuba nguMtyholi, noSathana, lowo ulahlekisa umhlaba omiweyo uphela; waphoswa phantsi emhlabeni, neengelosi zakhe zaphoswa phantsi kunye naye.” Ukususela ngoko, uSathana needemon zakhe bebegcinwe kummandla womhlaba. Kusengqiqweni ukuqikelela ukuba xa uYesu Kristu ephelisa umsebenzi kaSathana ukuze akhulule umhlaba kwimpembelelo yakhe embi, Uya kwenza okufanayo nakwiidemon.
Kwakhona cinga ngesiprofeto sokuqala eBhayibhileni. Sifundeka ngolu hlobo: “Ndiya [uThixo] kubeka ubutshaba phakathi kwakho [uSathana] nomfazi [intlangano kaYehova esemazulwini] naphakathi kwembewu yakho [kaSathana] nembewu yakhe [uYesu Kristu]. Yona iya kukutyumza intloko uze wena uyityumze isithende.” (Genesis 3:15) Ukutyunyuzwa kwenyoka entloko kuquka ukufakwa enzonzobileni kukaSathana ebudeni boLawulo lukaKristu Lweminyaka Eliwaka. Esi siprofeto siqhubeka sisithi kukho ubutshaba phakathi kwaLowo utyumzayo nembewu kaSathana. Le mbewu, okanye intlangano, iquka inxalenye engabonakaliyo ebunjwa ziingelosi okanye iidemon ezingendawo. Ngoko ke kusengqiqweni ukuqiqa ngelithi xa uYesu efaka uSathana enzonzobileni, ukwavalela aze azifake enzonzobileni needemon. Isibakala sokuba imimoya engendawo iyayoyika inzonzobila kubonisa ukuba iyazi ukuba iza kuvalelwa kwixesha elizayo.—Luka 8:31.
Noko ke, ngaba kunokwenzeka ukuba ISityhilelo 20:1-3 asizikhankanyi iidemon kuba zitshatyalaliswe ngeArmagedon kunye nenxalenye yembewu kaSathana? IBhayibhile ibonisa ukuba oku akunakwenzeka. Ithetha ngesiphelo sikaSathana, ithi: “UMtyholi owayebalahlekisa waphoswa edikeni lomlilo nesalfure, apho lalisele liphoswe khona irhamncwa nomprofeti wobuxoki; yaye baya kuthuthunjiswa imini nobusuku ngonaphakade kanaphakade.” (ISityhilelo 20:10) Irhamncwa nomprofeti wobuxoki yinkqubo yezobupolitika yaye leyo yinxalenye yentlangano kaSathana engabonakaliyo. (ISityhilelo 13:1, 2, 11-14; 16:13, 14) Ziyatshatyalaliswa eArmagedon, xa uBukumkani bukaThixo butyumza buze buphelise zonke ezinye izikumkani zomhlaba. (Daniyeli 2:44) IBhayibhile ithetha ‘ngomlilo ongunaphakade owalungiselelwa uMtyholi neengelosi zakhe.’ (Mateyu 25:41) USathana needemon zakhe baya kuphoswa kwakelo “dike lomlilo nesalfure” njengerhamncwa nomprofeti wobuxoki oko kukuthi nabo baza kutshatyalaliswa. Ukuba imimoya enamandla neyinxalenye yembewu kaSathana inokutshatyalaliswa ngeArmagedon, ngokuqinisekileyo iidemon beziya kukhankanywa ngokungathi sele zisedikeni lokomfuziselo nerhamncwa nomprofeti wobuxoki. Kuba zingabhalwanga kwiSityhilelo 20:10 kubonisa ukuba iidemon azitshatyalaliswa ngeArmagedon.
Ekubeni iidemon zingakhankanywanga ngokucacileyo ukuba ziphoswa enzonzobileni, kwakhona akuthethwa ngazo njengokuba zikhululwa khona. Noko ke, ziya kuphelela kwindawo efanayo noMtyholi. Emva kokuba zikhululwe noMtyholi zize zimlandele xa uluntu luvavanywa okwesihlandlo sokugqibela ekupheleni kweminyaka eliwaka, iidemon nazo ziya kuphoswa edikeni lomlilo yaye ngaloo ndlela ziya kutshatyalaliswa ngonaphakade.—ISityhilelo 20:7-9.
Ngoko ke, nangona ISityhilelo 20:1-3 sithetha kuphela ngoSathana obanjwayo aze aphoswe enzonzobileni kwimeko yokungasebenzi, kusengqiqweni ukugqiba ngelithi iingelosi zakhe nazo ziya kubanjwa zize ziphoswe enzonzobileni. USathana needemon zakhe abasayi kukuphazamisa ukuzaliseka kwenjongo kaThixo yokuguqula umhlaba ube yiparadesi baze abantu bafezeke ebudeni boLawulo lukaKristu Lweminyaka Eliwaka.