Isahluko 7
Ngaba IBhayibhile Iyaziphikisa?
Isityholo esoloko ibekwa sona iBhayibhile sesokuba iyaziphikisa. Ngokuqhelekileyo, abantu abayityhola ngolu hlobo abakhange bona ngokobuqu bayifunde iBhayibhile; baphinda nje oko bakuvileyo. Noko ke, bambi bafumanise oko kubonakala ngathi kuphikisana ngokwenene yaye bakhathazekile kuko.
1, 2. (Quka intshayelelo.) (a) Sisiphi isityholo esoloko ibekwa sona iBhayibhile? (b) Ekuthelekiseni izicatshulwa ezahlukeneyo zeBhayibhile, yintoni esifanele siyikhumbule? (c) Ziziphi ezinye zezizathu zokuba maxa wambi kukho umahluko kwindlela ababhali ababini beBhayibhile abayinikela ngayo ingxelo yesiganeko esikwasinye?
UKUBA ngokwenene iliLizwi likaThixo, iBhayibhile imele ivisisane, ingaphikisani. Ngoko, kutheni le nto ezinye zezicatshulwa zayo zibonakala ziphikisana nezinye? Ngeliphendulayo, kufuneka sikhumbule ukuba, ngoxa iBhayibhile iliLizwi likaThixo, yabhalwa liqela lamadoda kwiinkulungwane eziliqela. Aba babhali babeneemvelaphi, izimbo zokubhala neziphiwo ezahlukahlukeneyo, yaye konke oku kwahlukahlukana kubonakaliswe kwisakhono sabo sokubhala.
2 Ngaphezu koko, ukuba ababhali ababini okanye abangaphezulu baxubusha isiganeko esinye, omnye kubo usenokuquka iinkcukacha azishiyileyo omnye. Ukongezelela, ababhali abahlukahlukeneyo bawuvelisa ngeendlela ezahlukahlukeneyo umbandela abawuxubushayo. Omnye usenokuwubhala ngokolandelelwano lwamaxesha, ngoxa omnye esenokuwulungelelanisa ngokwahlukileyo. Kwesi sahluko, siya kwandlala ezinye zeengongoma ekuthiwa ziyaphikisana eBhayibhileni size siqwalasele indlela ezinokuvisisaniswa ngayo, sithabathela engqalelweni aba thunywashe bangasentla.
Amangqina Awabhala Ngokwahlukeneyo
3, 4. Ngokuphathelele umthetheli-khulu owayegulelwa sisicaka sakhe, kubonakala ngathi kukho kuphi ukungangqinelani phakathi kwengxelo kaMateyu naleyo kaLuka, yaye ezi ngxelo zinokuvisisaniswa njani?
3 “Ukuphikisana” okuthile kuvela xa sineengxelo ezimbini okanye ezingaphezulu zesiganeko esikwasinye. Ngokomzekelo, kuMateyu 8:5 sifunda ukuba xa uYesu wafikayo eKapernahum, “kweza kuye umthetheli-khulu embongoza,” ecela uYesu ukuba aphilise isicaka sakhe. Kodwa kuLuka 7:3, sifunda ngalo mthetheli-khulu ukuba “wathuma kuye [uYesu] amadoda amakhulu amaYuda, emcela ukuba eze kumsindisa umkhonzi wakhe.” Ngaba ngulo mthetheli-khulu owathetha noYesu okanye ngaba wathumela amadoda amakhulu?
4 Ngelicacileyo, impendulo ikukuba le ndoda yathumela amadoda amakhulu amaYuda. Ngoko, kutheni le nto uMateyu esithi le ndoda yambongoza ngokwayo uYesu? Kungenxa yokuba, ngokungathi kunjalo, le ndoda yamcela uYesu ngokusebenzisa amadoda amakhulu amaYuda. La madoda makhulu asebenza njengabathetheli bayo.
5. Kutheni le nto iBhayibhile isithi nguSolomon owakha itempile, ngoxa ngokucacileyo umsebenzi wokoqobo wenziwa ngabanye?
5 Ukuzekelisa oku, sifunda oku kweyesi-2 yeziKronike 3:1: “USolomon waqala ukuyakha indlu kaYehova eYerusalem.” Kamva, sifunda oku: “Wayigqiba ke uSolomon indlu kaYehova.” (2 Kronike 7:11) Ngaba uSolomon wayakha ngokobuqu itempile ukususela ekuqaleni ukusa ekugqityweni kwayo? Akunjalo konke konke. Ukwakha ngokoqobo kwenziwa liqela elikhulu lamagcisa omsebenzi nangabasebenzi abangabanye. Kodwa uSolomon wayengumlungelelanisi walo msebenzi, engulowo wayenembopheleleko ngawo. Ngenxa yoko, iBhayibhile ithi wayakha indlu. Kwangokunjalo, iVangeli kaMateyu isixelela ukuba umthetheli-khulu womkhosi waya kuYesu. Kodwa uLuka unikela iinkcukacha ezongezelelekileyo zokuba wathetha noYesu ngokusebenzisa amadoda amakhulu amaYuda.
6, 7. Sinokuzivisisanisa njani iingxelo ezimbini ezahlukeneyo zeeVangeli ezingesicelo soonyana bakaZebhedi?
6 Nanku omnye umzekelo okwanjalo. KuMateyu 20:20, 21, sifunda oku: “Kweza kuye [uYesu] unina woonyana bakaZebhedi, enoonyana bakhe, equbuda, ecela into kuye.” Awayekucela yayikukuba oonyana bakhe bafumane esona sikhundla siphakamileyo xa uYesu wayeya kubuya eseBukumkanini bakhe. Kwingxelo ekuMarko yesi siganeko sikwasinye, sifunda oku: “Kuthi kuze kuye [uYesu] uYakobi noYohane, oonyana bakaZebhedi, besithi, Mfundisi, sithanda ukuba usenzele into esothi siyicele.” (Marko 10:35-37) Ngaba yayingoonyana ababini bakaZebhedi okanye yayingunina wabo, owenza isicelo kuYesu?
7 Ngokucacileyo, yayingoonyana ababini bakaZebhedi abenza isicelo, kanye njengokuba uMarko echaza. Kodwa basenza ngokusebenzisa unina. Unina wayengumlomo wabo. Oku kuxhaswa yingxelo kaMateyu yokuba xa abanye abapostile bakuvayo oko kwenziwa ngunina woonyana bakaZebhedi, bacaphuka, bengacaphukeli unina, kodwa bacaphukela “abo bazalwana bobabini.”—Mateyu 20:24.
8. Kunokwenzeka njani ukuba iingxelo ezimbini ezahlukeneyo zesiganeko esikwasinye zahlukane zize sekunjalo zombini zibe yinyaniso?
8 Ngaba wakha wabeva abantu ababini bechaza isiganeko esinye ababesibonile bobabini? Ukuba kunjalo, ngaba wakuphawula ukuba mntu ngamnye wagxininisa iinkcukacha ezamchukumisayo yena? Omnye usenokuba wazishiya izinto ezaqukwayo ngomnye. Phofu ke, bobabini babethetha inyaniso. Kunjalo nangeengxelo zone zeeVangeli zobulungiseleli bukaYesu, kwanangezinye iziganeko ezingokwembali abanikele ingxelo yazo ababhali abaliqela beBhayibhile. Mbhali ngamnye wabhala inkcazelo echanileyo kwanaxa omnye waquka iinkcukacha ezashiywayo ngomnye. Ngokuziqwalasela zonke iingxelo, kunokuzuzwa ukuqonda okuphelele ngakumbi ngoko kwenzekayo. Iiyantlukwano ezinjalo zingqinela ukuba iingxelo zeBhayibhile zabhalwa ngokwahlukeneyo. Yaye ukuvisisana kwazo okusisiseko kungqinela ukuba ziyinyaniso.
Wufunde Umongo
9, 10. Kungayiphi indlela othi umongo usincede sibone apho uKayin wamfumana khona umkakhe?
9 Ngokufuthi, okubonakala ngathi akungqinelani kunokuconjululwa ukuba nje sithi siwuhlole umongo. Ngokomzekelo, khawuqwalasele ingxaki ekusoloko kuthethwa ngayo engomfazi kaKayin. KwiGenesis 4:1, 2 sifunda oku: “[UEva] wazala uKayin, wathi, Ndizuze indoda ngoYehova. Waphinda wazala umninawa wakhe, uAbheli.” Njengoko kusaziwa nguwonkewonke, uKayin wambulala uAbheli; kodwa emva koko, sifunda ukuba uKayin waba nomfazi nabantwana. (Genesis 4:17) Ukuba uAdam noEva babenoonyana ababini kuphela, uKayin wamfumana phi umkakhe?
10 Isicombululo sikwisibakala sokuba uAdam noEva babenabantwana abangaphezu kwababini. Ngokomongo, babenentsapho enkulu. KwiGenesis 5:3 sifunda ukuba uAdam wazala omnye unyana ogama linguSete yaye emva koko, kwindinyana elandelayo, sifunda oku: “Wazala oonyana neentombi.” (Genesis 5:4) Ngoko uKayin umele ukuba watshata omnye woodade wabo okanye nkqu omnye wabatshana bakhe. Ngelo thuba lokuqalisa kwembali yoluntu xa uluntu lwalusasondele kangako emfezekweni, kubonakala ukuba imitshato enjalo yayingababeki sichengeni abantwana abazalwe kumanyano olunjalo njengoko kunokuba njalo kule mihla.
11. Yintoni ekuthiwa ayivumelani phakathi kukaYakobi nompostile uPawulos abalatha kuyo abathile?
11 Ukuqwalasela kwethu umongo kukwasinceda ukuba siqonde oko bambi baye bathi kukungavumelani phakathi kompostile uPawulos noYakobi. KumaEfese 2:8, 9, uPawulos uthi amaKristu asindiswa ngokholo, kungekuko ngemisebenzi. Uthi: “Kuba nisindiswe, nangalo ukholo . . . akuphumi misebenzini.” Kambe ke, uYakobi ugxininisa ukubaluleka kwemisebenzi. Ubhala esithi: “Kuba, kwanjengokuba umzimba, ungekho umoya, ufile, ngokunjalo ukholo, ingekho imisebenzi, lufile nalo.” (Yakobi 2:26) Zinokuvisisaniswa njani ezi nkcazelo zimbini?
12, 13. Amazwi kaYakobi awaphelelisa njani lawo ompostile uPawulos kunokuba awaphikise?
12 Xa siqwalasela umongo wamazwi kaPawulos, sifumanisa ukuba enye inkcazelo iphelelisa enye. Umpostile uPawulos ubhekisela kwimigudu yamaYuda yokugcina uMthetho kaMoses. Ayekholelwa kukuba ukuba ayewugcinile uMthetho nazo zonke iinkcukacha zawo, ayeya kuba ngamalungisa. UPawulos wabonisa ukuba oku kwakungenakuze kwenzeke. Asinakuze sibe ngamalungisa—size ngaloo ndlela sifanelwe lusindiso—ngenxa yemisebenzi yethu, kuba sinesono esisizuz’ ilifa. Sinokusindiswa kuphela ngokuba nokholo kwidini lentlawulelo likaYesu.—Roma 5:18.
13 Noko ke, uYakobi wongezelela ingongoma ebalulekileyo yokuba ukholo ngokwalo alunto yanto ukuba aluxhaswa zizenzo. Umntu othi unokholo kuYesu umele alubonise ngoko akwenzayo. Ukholo olungenamisebenzi lulukholo olufileyo yaye aluyi kukhokelela elusindisweni.
14. UPawulos ukubonisa kweziphi izicatshulwa ukuba uvumelana ngokupheleleyo nomgaqo wokuba ukholo oluphilileyo lumele lubonakaliswe ngemisebenzi?
14 Umpostile uPawulos wayevumelana ngokupheleleyo noku, yaye ngokufuthi ukhankanya iindidi zemisebenzi afanele abandakanyeke kuyo amaKristu ukubonakalisa ukholo lwawo. Ngokomzekelo, wawabhalela oku amaRoma: “Kuba umntu ukholwa ngentliziyo, ukuze abe nobulungisa; avume ke ngomlomo [“enze uvumo lwasekuhleni,” NW], ukuze asindiswe.” Ukwenza “uvumo lwasekuhleni”—ukwabelana nabanye ngokholo lwethu—kubalulekile ukuze kuzuzwe usindiso. (Roma 10:10; bona kwaneyoku-1 yabaseKorinte 15:58; Efese 5:15, 21-33; 6:15; 1 Timoti 4:16; 2 Timoti 4:5; Hebhere 10:23-25.) Phofu ke, akukho msebenzi unokwenziwa ngumKristu, yaye ngokuqinisekileyo akukho mgudu wokuzalisekisa uMthetho kaMoses, oya kumzuzisa ilungelo lokungena kubomi obungunaphakade. Obu ‘busisibabalo [“isipho,” NW] sikaThixo’ kwabo banokholo.—Roma 6:23; Yohane 3:16.
Iindlela Ezahlukeneyo Zokujonga Imicimbi
15, 16. Kwakunokwenzeka njani ukuba uMoses noYoshuwa babe babechanile xa omnye wathi impuma yeYordan ‘yayinganeno’ komlambo ngoxa omnye wathi ‘yayingaphesheya’?
15 Maxa wambi ababhali beBhayibhile babhala ngesiganeko esikwasinye besijonge ngokweembono ezahlukeneyo, okanye bazinikela iingxelo zabo ngeendlela ezahlukeneyo. Xa ezi ndlela zahlukeneyo zithatyathelwa engqalelweni, nakuphi na okungakumbi okubonakala ngathi kuyaphikisana kuconjululwa ngokulula. Umzekelo woku ukwiNumeri 35:14, apho uMoses athetha ngommandla ongasempuma yeYordan, ewubiza ngokuthi “nganeno kweYordan.” Noko ke, xa uYoshuwa wayethetha ngelizwe elingasempuma yeYordan, walibiza ngokuthi “phesheya kweYordan.” (Yoshuwa 22:4) Yiyiphi echanileyo?
16 Eneneni, zombini zichanile. Ngokwengxelo ekwiNumeri, amaSirayeli ayengekawuweli uMlambo iYordan ukungena kwiLizwe Ledinga, ngoko kuwo impuma yeYordan ‘yayinganeno.’ Kodwa uYoshuwa wayesele eyiwelile iYordan. Ngoku, ngokobuqu, wayengasentshona komlambo, kwilizwe lakwaKanan. Ngoko kuye, impuma yeYordan ‘yayingaphesheya.’
17. (a) Yintoni ekuthiwa ayingqinelani abalatha kuyo abathile kwizahluko zokuqala ezibini zeGenesis? (b) Siyintoni isizathu esisisiseko soko kucingelwa ikukungangqinelani?
17 Ukongezelela, indlela ibali elo elakhiwe ngayo inokukhokelela kokubonakala ngathi kuyaphikisana. KwiGenesis 1:24-26, iBhayibhile ibonisa ukuba izilwanyana zadalwa ngaphambi komntu. Kodwa kwiGenesis 2:7, 19, 20, kubonakala ngathi ithi umntu wadalwa ngaphambi kwezilwanyana. Kutheni kukho oku kungangqinelani nje? Kungenxa yokuba zombini ezi ngxelo zixubusha ngendalo ngeendlela ezimbini ezahlukeneyo. Eyokuqala ichaza ukudalwa kwamazulu nomhlaba neento zonke ezikwezo zinto. (Genesis 1:1–2:4) Eyesibini igxininisa ekudalweni kohlanga loluntu nokuwela kwalo esonweni.—Genesis 2:5–4:26.
18. Sinokukuvisisanisa njani oko kubonakala ngathi kukungangqinelani phakathi kweengxelo ezimbini ezingendalo kwizahluko zokuqala zeGenesis?
18 Ingxelo yokuqala yakhiwe ngokolandelelwano lwamaxesha, yahlulahlulelwe ‘kwimihla’ emithandathu elandelelanayo. Eyesibini ibhalwe ngokolandelelwano lwembaluleka yeziganeko zeso sihlandlo. Emva kwentshayelelo emfutshane, ngokusengqiqweni ithi ithethe ngqo ngokudalwa kuka-Adam, ekubeni yena nentsapho yakhe kuthethwa ngabo ngokulandelayo. (Genesis 2:7) Kuthi ke kulandeliswe enye inkcazelo njengoko kuyimfuneko. Sifunda ukuba emva kokudalwa kwakhe uAdam wayeza kuphila kumyezo othile e-Eden. Ngoko ngoku kukhankanywa ukutyalwa komyezo wase-Eden. (Genesis 2:8, 9, 15) UYehova uxelela uAdam ukuba azithiye amagama “zonke izinto eziphilileyo zasendle, nazo zonke iintaka zezulu.” Ngoko, lingoku ixesha lokukhankanya ukuba “uYehova uThixo wabumba ngomhlaba” zonke ezi zidalwa, nangona ukudalwa kwazo kwaqala kude kudala ngaphambi kokuba uAdam abekho.—Genesis 2:19; 1:20, 24, 26.
Yifunde Ngenyameko Ingxelo
19. Yintoni ebonakala ngathi iyadida kwingxelo yeBhayibhile yokoyiswa kweYerusalem?
19 Maxa wambi, ekuphela kwento efunekayo ukuze kuconjululwe okubonakala ngathi kuyaphikisana kukuyifunda ngenyameko ingxelo uze uqiqe ngenkcazelo enikelweyo. Oko kunjalo xa siqwalasela ukoyiswa kweYerusalem ngamaSirayeli. IYerusalem yayidweliswe njengenxalenye yelifa lakwaBhenjamin, kodwa sifunda ukuba isizwe sakwaBhenjamin asizange sikwazi ukuyoyisa. (Yoshuwa 18:28; ABagwebi 1:21) Sikwafunda nokuba uYuda akazange akwazi ukuyoyisa iYerusalem—ngokungathi yayiyinxalenye yelifa leso sizwe. Ekugqibeleni, uYuda wayoyisa iYerusalem, eyitshisa ngomlilo. (Yoshuwa 15:63; ABagwebi 1:8) Phofu ke, kumakhulukhulu eminyaka kamva, kukwabhalwe kwathiwa uDavide wayoyisa iYerusalem.—2 Samuweli 5:5-9.
20, 21. Ngokuzihlolisisa ngenyameko zonke iinkcukacha ezinxulumene noku, yintoni evelayo njengembali yokoyiswa kwesixeko saseYerusalem ngamaHebhere?
20 Xa uqala ukukubona oku, kukonke nje kusenokubonakala kudida, kodwa eneneni akuphikisani. Enyanisweni, umda owawuphakathi kwelifa lakwaBhenjamin nelakwaYuda wawusehla njalo unxuse iNtlambo yakwaHinom, utyhubela njalo isixeko samandulo saseYerusalem. Oko kamva kwathi kwaziwa njengeSixeko sikaDavide ngokoqobo kwakumi kumhlaba wakwaBhenjamin, kanye njengokuba uYoshuwa 18:28 esitsho. Kodwa kunokwenzeka ukuba isixeko samaYebhusi saseYerusalem sasinabile de saya kuwelela ngaphaya kweNtlambo yakwaHinom yaye ngaloo ndlela sasiwelele nakumhlaba wakwaYuda, khon’ ukuze noYuda kufuneke alwe nxamnye nabemi baso abangamaKanan.
21 UBhenjamin akazange akwazi ukusoyisa isixeko. Ngasihlandlo sithile, uYuda wayoyisa iYerusalem waza wayitshisa. (ABagwebi 1:8, 9) Kodwa kucaca ukuba imikhosi kaYuda yahambela phambili, yaye bambi babemi bantlandlolo beso sixeko babuya baya kuhlala kuso. Kamva, babumba igcuntswana labaxhathisi angazange akwazi ukulishenxisa uYuda noBhenjamin. Ngaloo ndlela, amaYebhusi aqhubeka ehlala eYerusalem de uDavide wasoyisa eso sixeko kumakhulukhulu eminyaka kamva.
22, 23. Ngubani owathwala umthi wentuthumbo kaYesu ukuwusa kwindawo awabulawelwa kuyo?
22 Sikwanomnye umzekelo wesibini kwiiVangeli. Ngokunxulumene nokuqhutywa kukaYesu esisiwa ekufeni kwakhe, kwiVangeli kaYohane sifunda oku: “Ethwele umthi wakhe wentuthumbo, waphuma.” (Yohane 19:17, NW) Phofu ke, kuLuka sifunda oku: “Kuthe ke xa bamrholayo, babamba Simon uthile, waseKirene, obevela emaphandleni, bawubeka phezu kwakhe umthi wentuthumbo ukuba awuthwale emva koYesu.” (Luka 23:26, NW) Ngaba uYesu wasithwala isixhobo awabulawelwa kuso, okanye ngaba nguSimon owamthwalela sona?
23 Okokuqala nje, licacile elokuba uYesu wawuthwala ngokwakhe umthi wakhe wentuthumbo, kanye njengokuba uYohane esitsho. Kodwa kamva, njengokuba uMateyu, uMarko noLuka bengqina, uSimon waseKirene wanyanzelelwa ukuba amthwalele wona kwinxalenye eyayisasele yendlela eyayisiya kwindawo awabulawelwa kuyo.
Ubungqina Bokuba Babhale Ngokwahlukeneyo
24. Kutheni singamangaliswa nje kukufumanisa iindawo ezithile ezibonakala ngathi azingqinelani eBhayibhileni, kodwa yintoni esingamele kugqiba kuyo ngokuphuma koku?
24 Kuyinyaniso ukuba, zikho iindawo ezithile ezibonakala ngathi azingqinelani eBhayibhileni nekunzima ukuzivisisanisa. Kodwa asimele kuthelekelela ukuba ezo ziimpikiswano eziqinisekileyo. Ngokufuthi kungumbandela nje wokungabi nankcazelo ipheleleyo. IBhayibhile inikela ulwazi olwaneleyo lokuzalisa iintswelo zethu zokomoya. Kodwa ukuba ibisinike zonke iinkcukacha ezingesiganeko ngasinye esikhankanyiweyo, ibinokuba lithala elikhulu leencwadi elingenakuphathwa bani, kunokuba ibe ngulo mqulu osebenziseka lula nekulula ukuwuthwala esinawo namhlanje.
25. Uthini uYohane ngengxelo yobulungiseleli bukaYesu, yaye oku kusinceda njani ukuba siqonde isizathu sokuba iBhayibhile ingasiniki zonke iinkcukacha ngazo zonke iziganeko?
25 Ethetha ngobulungiseleli bukaYesu, umpostile uYohane wabhala esebenzisa umbabazo athethelelekayo ngokuwusebenzisa xa esithi: “Kukho ke nezinye izinto ezininzi awezenzayo uYesu; ezingathi zithe zabhalwa ngazinye, ndithi nehlabathi eli alingezibambi iincwadi ezo zingabhalwayo.” (Yohane 21:25) Bekunokude kube yinto engenakwenzeka ngakumbi ukubhala phantsi zonke iinkcukacha zembali ende yabantu bakaThixo ukususela kwithuba loosolusapho ukuza kuthi ga kwibandla lamaKristu lenkulungwane yokuqala!
26. IBhayibhile isiqulathele inkcazelo eyaneleyo yokuba siqiniseke ngasiphi isibakala esibalulekileyo?
26 Eneneni, iBhayibhile ishwankathelwe ngendlela engummangaliso. Iqulethe inkcazelo eyaneleyo yokusinceda ukuba siyigqale njengaleyo ingeyoncwadi yabantu. Naziphi na iiyantlukwano enazo zingqina ngokwenyaniso ukuba ababhali babengamangqina awabhala ngokwahlukeneyo. Kwelinye icala, ukumanyana okubalaseleyo kweBhayibhile—esiya kuxubusha ngako ngokweenkcukacha ezingakumbi kwisahluko esizayo—ngokungathandabuzekiyo kubonisa ukuba ivela kuThixo. Ililizwi likaThixo, kungelilo elomntu.
[Amagama acatshulweyo akwiphepha 89]
Okubonakala ngathi akungqinelani eBhayibhileni kungqina ukuba ngokwenyaniso ababhali babengamangqina awabhala ngokwahlukeneyo
[Amagama acatshulweyo akwiphepha 91]
Ukuqwalaselwa komongo kudla ngokusinceda ukuba sicombulule oko kuthiwa kuyaphikisana
[Ibhokisi ekwiphepha 93]
Akunyanzelekanga Ukuba “Ukungangqinelani” Kube Kukuphikisana
UKenneth S. Kantzer, ongumfundisi wezakwalizwi, wakha wabonisa indlela ezinokuthi iingxelo ezimbini zesiganeko esikwasinye zibonakale ziphikisana ngayo zize sekunjalo zibe yinyaniso zombini. Wabhala oku: “Kwixesha elithile eladlulayo unina wesihlobo sethu esithandeka kakhulu wafa. Saqala ukuva ngokufa kwakhe ngesihlobo sethu esisithembileyo esanikela ingxelo yokuba unina wesihlobo sethu wayemi kwimbombo yesitrato elindele uduladula, watshayiswa ngomnye uduladula owayedlula apho, wenzakala ngokungaginyisi mathe, waza wafa kwimizuzu nje embalwa kamva.”
Kungekudala emva koko weva ingxelo eyahluke ngokupheleleyo. Uthi: “Seva ngomzukulwana walo mama ufileyo ukuba uninakhulu wafa ngenxa yongquzulwano lweenqwelo-mafutha, yaye inqwelo-mafutha awayekhwele kuyo yamtyekezela kude phaya waza wafa ngequbuliso. Le nkwenkwana yayiqiniseke ngokwenene ngezibakala zayo.
“Kuthe sekudlule ithuba elithile . . . saphanda nzulu sifuna ukuvisisanisa ezi nkcazelo. Safumanisa ukuba uninakhulu wale nkwenkwana wayelindele uduladula, waza watshayiswa ngomnye uduladula owayedlula, waza wenzakala ngokungaginyisi mathe. Wacholwa yenye inqwelo-mafutha eyayidlula waza wabalekiselwa esibhedlele, kodwa kulo ngxashingxashi, le nqwelo-mafutha wayesisiwa ngayo esibhedlele yatshayisana nenye inqwelo-mafutha. Watyekezelwa ngaphandle yile nqwelo-mafutha waza wafa ngequbuliso.”
Ewe, iingxelo ezimbini zesiganeko esikwasinye zisenokuba yinyaniso zombini nakubeni zibonakala ngathi azivumelani. Maxa wambi oku kuba njalo ngeBhayibhile. Amangqina awabhala ngokwahlukeneyo asenokuchaza iinkcukacha ezahlukeneyo ezingesiganeko esikwasinye. Noko ke, kunokuba kube kokuphikisanayo, oko akubhalayo kuyaphelelisana, yaye ukuba sizinikel’ ingqalelo zonke izibakala, siba ngabakuqonda ngokulunge ngakumbi oko kwenzekayo.