UkuZalwa Ngokutsha

Ingcaciso: Ukuzalwa ngokutsha kubandakanya ukubhaptizwa emanzini (‘ukuzalwa ngamanzi’) nokuzalwa ngomoya kaThixo (‘ukuzalwa ngumoya’), ngaloo ndlela usiba ngunyana kaThixo ngethemba lokuba nesabelo eBukumkanini bukaThixo. (Yoh. 3:3-5) UYesu wafumana oku, njengoko lisenjenjalo ne-144 000 eliziindlalifa kunye naye eBukumkanini basezulwini.

Kungani kuyimfuneko ukuba amaKristu athile “azalwe ngokutsha”?

UThixo unenjongo yokuba inani elisikelwe umda labantu abathembekileyo linxulumane noYesu Kristu eBukumkanini basezulwini

Luka 12:32: “Musani ukoyika, mhlambi mncinane; ngokuba kukholekile kuYihlo ukuninika uBukumkani.”

ISityhi. 14:1-3: “Ndabona, nantso iMvana [uYesu Kristu] imi phezu kwentaba yeZiyon, kumi nayo ikhulu elinamanci mane anesine lamawaka, . . . ababethengiwe emhlabeni.” (Bona iphepha 431, 432, phantsi komxholo othi “IZulu.”)

Abantu abanakuya ezulwini benemizimba yenyama negazi

1 Kor. 15:50: “Nditsho ukuthi, inyama negazi azinako ukubudla ilifa uBukumkani bukaThixo; nokonakala akunakukudla ilifa ukungonakali.”

Yoh. 3:6: “Okuzelwe yinyama kuyinyama, nokuzelwe nguMoya kungumoya.”

Kuphela ngabantu ‘abazelwe ngokutsha,’ ngaloo ndlela besiba ngoonyana bakaThixo, abanokuba nesabelo kuBukumkani basezulwini

Yoh. 1:12, 13: “Ke bonke abamamkelayo [uYesu Kristu] wabanika igunya lokuba babe ngabantwana bakaThixo, abo ke bakholwayo kwigama lakhe; abangazalwanga ngagazi, nangakuthanda kwanyama, nangakuthanda kwandoda; bazalwa nguThixo.” (Ngokuthi “bonke abamamkelayo” akuthethi bonke abantu abanokholo kuKristu. Phawula ekubhekiselwe kubo, njengoko kuboniswe kwindinyana 11 [“abakhe,” amaYuda]. Kwaeli lungelo lidluliselwe kwabanye boluntu, kodwa kuphela ‘kumhlambi omncinane.’)

Roma 8:16, 17: “UMoya ngokwakhe ungqinelana nomoya wethu, ukuba singabantwana bakaThixo. Ukuba ke singabantwana, sikwaziindlalifa; iindlalifa zikaThixo, iindlalifa ke kunye noKristu; ukuba okunene siva ubunzima kunye naye, ukuze sizukiswe nokuzukiswa kunye naye.”

1 Pet. 1:3, 4: “Makabongwe uThixo, uYise weNkosi yethu uYesu Kristu, othe ngokobuninzi benceba yakhe, wasizala ngokutsha, ukuba sibe nethemba eliphilileyo ngokuvuka kukaYesu Kristu kwabafileyo; sibe nelifa elingenakonakala, elingenakudyobheka, elingenakuguga, eniligcinelweyo emazulwini.”

Baya kwenza ntoni ezulwini?

ISityhi. 20:6: “Baya kusuka babe ngababingeleli bakaThixo nabakaKristu, babe ngookumkani kunye naye iminyaka eliwaka.”

1 Kor. 6:2: “Anazi na, ukuba abangcwele aba baya kuligweba ihlabathi?”

Ngaba umntu ongazanga “azalwe ngokutsha” angasindiswa?

ISityhi. 7:9, 10, 17: “Emva koko, [emva kokuva kukampostile uYohane ngenani labo babeya ‘kuzalwa ngokutsha,’ abo babeya kubumba uSirayeli wokomoya nababeya kuba noKristu ezulwini; thelekisa abaseRoma 2:28, 29 namaGalati 3:26-29] ndabona, naso isihlwele esikhulu, ebekungekho namnye unako ukusibala, siphuma kuzo zonke iintlanga, nezizwe, nabantu, neelwimi, simi phambi kwetrone naphambi kweMvana, bethiwe wambu ngeengubo ezinde ezimhlophe, benamasundu ezandleni zabo, bedanduluka ngezwi elikhulu, besithi: Usindiso kuye uThixo wethu, lowo uhleli phezu kwetrone, nakuyo iMvana! . . . IMvana [uYesu Kristu] esesazulwini setrone iya kubalusa, ibakhokelele emithonjeni ephilileyo yamanzi.”

Emva kokudwelisa abantu abaninzi bokholo bangaphambi kwexesha lobuKristu, amaHebhere 11:39, 40 athi: “Aba ke bonke bathi, nakuba babengqinelwe ngalo ukholo, abazuzana nalo idinga, uThixo esazalelele thina ngeyona nto ilungileyo, ukuze bangenziwa bagqibelele ngaphandle kwethu.” (Ngoobani ekuthethwa bona ngokuthi “thina”? AmaHebhere 3:1 abonisa ukuba bona ‘ngamabelana ngobizo lwasemazulwini.’ Ngoko ke, abantu bangaphambi kwexesha lobuKristu ababenokholo, bamele ukuba babe nethemba lobomi obufezekileyo kwenye indawo engelilo izulu.)

INdu. 37:29: “Amalungisa aya kulidla ilifa ilizwe, ahlale kulo ngonaphakade.”

ISityhi. 21:3, 4: “Yabona, umnquba lo kaThixo unabantu; uya kuhlala nabo emnqubeni, bona babe ngabantu bakhe, yena uThixo abe nabo, enguThixo wabo; azisule uThixo zonke iinyembezi emehlweni abo, kungabi sabakho kufa, kungabi sabakho nasijwili, nakukhala, nantlungu; ngokuba izinto zokuqala zigqithile.”

Kunokwenzeka na ngomntu ukuba nomoya kaThixo ukanti ‘angazalwa ngokutsha’?

Sithetha ngoYohane umbhaptizi, isithunywa sikaYehova sathi: “Uya kuzaliswa nguMoya oyiNgcwele kwasekuzalweni kwakhe.” (Luka 1:15) NoYesu wathi kamva: “Phakathi kwabo bazelweyo ngabafazi, akuvelanga mkhulu kunoYohane umbhaptizi; kanti ke nomncinane kunabanye ebukumkanini bamazulu mkhulu kunaye. [Ngoba? Kuba uYohane akayi kuba semazulwini yaye ke kwakungekho mfuneko yokuba “azalwe ngokutsha”]. Kususela ke kwimihla kaYohane umbhaptizi kude kube kalokunje, [xa uYesu wayechaza oku], ubukumkani bamazulu buyagonyamelwa.”—Mat. 11:11, 12.

Umoya kaYehova “wamfikela” uDavide yaye ‘wathetha’ ngaye (1 Sam. 16:13; 2 Sam. 23:2), kodwa akukho nanye indawo eBhayibhileni ethi ‘wazalwa ngokutsha.’ Yayingekho imfuneko yokuba yena “azalwe ngokutsha,” kuba, njengokuba IZenzo 2:34 zisitsho: “UDavide, enganyukanga waya emazulwini.”

Bafaniswa ngantoni abantu abanomoya kaThixo namhlanje?

Bona iphepha 197, 198, phantsi komxholo othi “UMoya.”

Ukuba Ubani Uthi—

‘Mna ndizelwe ngokutsha’

Usenokuphendula uthi: ‘Loo nto ithetha ukuba ngenye imini ulindele ukuba noKristu ezulwini, andibi kunjalo? . . . Wawukhe wazibuza na ngento eya kwenziwa ngabo baya ezulwini?’ Mhlawumbi usenokongeza uthi: (1) ‘Baya kuba ngookumkani nababingeleli, belawula noKristu. (ISityhi. 20:6; 5:9, 10) UYesu wathi aba babeya kuba nje ‘ngumhlambi omncinane.’ (Luka 12:32)’ (2) ‘Ukuba bangookumkani, bamele babekho abalawulwa abaya kubalawula. Baya kuba ngoobani bona? . . . Nazi iingongoma ezithile endizifumene zibangel’ umdla kunene xa zathi zeziswa kwingqalelo yam. (INdu. 37:11, 29; IMize. 2:21, 22)’

‘Ngaba wena uzelwe ngokutsha?’

Usenokuphendula uthi: ‘Ndifumanisa ukuba into abantu abasingisela kuyo ngokuthi “ukuzalwa ngokutsha” ayisoloko ifana. Ngaba ubungandixelela ukuba kuwe kutheth’ ukuthini?’

Okanye unokuthi: ‘Ufuna ukwazi enoba ndimamkele na uYesu njengoMsindisi yaye ndimamkele nomoya oyingcwele, andibi kunjalo? Mandikuqinisekise ngokuphendula ndithi Ewe; kungenjalo ngendingathethi nawe ngoYesu.’ Mhlawumbi usenokongeza uthi: (1) ‘Kodwa xa ndicinga ngokuba nomoya oyingcwele, ndifumanisa ukuba ubungqina bokuba naloo moya abukho ngokulusizi kuninzi oluzibanga lungamaKristu. (Gal. 5:22, 23)’ (2) ‘Ubungakunandipha na ukuhlala kulo mhlaba ukuba wonk’ umntu ebebonakalisa ezo mpawu zokuhlonel’ uThixo? (INdu. 37:10, 11)’

Enye indlela: ‘Xa ngaloo nto uthetha ukuba, “Ndimamkele na uKristu njengoMsindisi wam?” Ndiphendula ngokuthi Ewe. Onke amaNgqina kaYehova akwenzile oko. Kodwa ke, kuthi, ukuzalwa ngokutsha kubandakanya okuninzi ngaphezu koko.’ Mhlawumbi usenokongeza uthi: (1) ‘Xa uYesu wathetha ngokuzalwa ngokutsha wathi kwakuyimfuneko ukuze kungenwe eBukumkanini bukaThixo, oko kukuthi, ukuba yinxalenye yoBukumkani bukaThixo, urhulumente wakhe wasezulwini. (Yoh. 3:5)’ (2) ‘IBhayibhile ikwabonisa ukuba abantu abaninzi abenza ukuthanda kukaThixo baya kuphila apha emhlabeni, njengabalawulwa abonwabileyo bobo Bukumkani. (Mat. 6:10; INdu. 37:29)’

Icebiso elongezelelekileyo: Abo bangabodidi lwasezulwini bangaphendula bathi: ‘Ewe ndinjalo. Kodwa iBhayibhile isilumkisa sonke ngelithi singazithembi gqitha ngesigxina sethu. Kufuneka sisoloko sizihlola ukuqiniseka ukuba sikwenza ngokwenene na okufunwa nguThixo nanguKristu kuthi. (1 Kor. 10:12)’ Mhlawumbi usenokongeza uthi: ‘Yiyiphi imbopheleleko uYesu awayithwalisa abafundi bakhe bokwenyaniso? (Mat. 28:19, 20; 1 Kor. 9:16)’