INtanda-bulumko

Ingcaciso: Igama lesiNgesi elithi philosophy liphuma kwiingcambu zesiGrike ezithetha “ukuthanda ubulumko.” Njengoko lisetyenzisiwe apha, intanda-bulumko ayisekelwanga ekwamkeleni inkolelo kuThixo, kodwa izama ukunika abantu ukuqonda okuvisisanayo ngendalo iphela ize izabalazele ukubenza babe ngabantu abacinga ngokuhlaba amadlala. Ngokuyintloko isebenzisa intelekelelo kunokuqwalasela ngokufuna inyaniso.

Sinokuluzuza njani ulwazi nobulumko bokwenyaniso?

IMize. 1:7; INdu. 111:10: “Ukoyika uYehova kukuqala kokwazi . . . [nobulumko].” (Ukuba indalo yayingabangelwanga nguMdali okrelekrele kodwa yayibangelwe nje kuphela ngamandla athile amfamekileyo nangasekelwanga kwingqiqo, ngoko bekungayi kubakho kuqonda kuvisisanayo ngendalo iphela, akunjalo na? Akukho nto ibiya kufaneleka njengobulumko ebiya kubangelwa kukufundisisa into engekho ngqiqweni ngokwayo, akunjalo na? Abo bazama ukuqonda indalo iphela okanye ubomi ngokwabo, ngoxa bezabalazela ukutyeshela uThixo nenjongo yakhe, basoloko bekatya. Bakuchaza phosakeleyo abakufundayo baze bazisebenzise phosakeleyo izibakala abaziqokelelayo. Ukutyeshela ukukholelwa kuThixo kutshabalalisa isikhokelo sokufumana ulwazi oluchanileyo kuze kubangele kube yinto engenakwenzeka ukufumana naziphi na iingcamango ezivisisana ngokwenyaniso.)

IMize. 2:4-7: “Ukuba uthe wabufuna njengesilivere, wabumba njengobutyebi obuselelweyo: uya kwandula ukukuqonda ukoyika uYehova, ukufumane ukumazi uThixo, ngokuba uYehova upha ubulumko; emlonyeni wakhe kuphuma ukwazi nokuqonda. Ubaqwebela uzimaso abathe tye.” (UYehova ulungiselela uncedo olufunekayo ngeLizwi elibhalwe nguye nangentlangano yakhe ebonakalayo. Umnqweno onyanisekileyo nomgudu wobuqu, kuquka nokusebenzisa kukabani amandla akhe okucinga ngendlela eyakhayo, nazo ziyafuneka.)

Ngaba kuyinto yokwenene ukulindela ukufumana inyaniso epheleleyo kulo Mthombo?

2 Tim. 3:16; Yoh. 17:17: “Sonke isibhalo, siphefumlelwe nguThixo.” “[UYesu wathi kuYise wasezulwini:] Ilizwi lakho liyinyaniso.” (Alikho ngqiqweni na elokuba uMdali wendalo iphela ebeya kuyiqonda ngokupheleleyo? EBhayibhileni akasixelelanga yonk’ into ngendalo, kodwa into ayibhalileyo apho asiyontelekelelo; yinyaniso. Kwakhona eBhayibhileni uchaze oko injongo yakhe ikuko ngomhlaba nangoluntu nendlela aya kuyifeza ngayo. Amandla akhe amakhulu, ubulumko obungenakulinganiswa nanto, okusesikweni okungenagxeke nothando olukhulu ziqinisekisa ukuba le njongo iya kufezwa ngokupheleleyo, ibe ifezwe ngeyona ndlela ilungileyo inokwenzeka. Ngaloo ndlela iimpawu zakhe ziyasiqinisekisa ukuba injongo yakhe echaziweyo yinto enokuthenjwa ngokupheleleyo; iyinyaniso.)

Zivela phi iintanda-bulumko zabantu?

Zivela ebantwini abasikelwe umda: IBhayibhile isazisa oku: “Akukhona endodeni ehambayo ukuqinisela ukunyathela kwayo.” (Yer. 10:23) Imbali ingqina ukuba ukuzama ukutyeshela oko kusikelwa umda akuvelisanga miphumo ilungileyo. Ngasihlandlo sithile, “uYehova wamphendula uYobhi, esemoyeni ovuthuzayo, wathi, Ngubani na lo usitha icebo ngokuthetha okungenakwazi? Khawuwabhinqise njengomfo amanqe akho, ndikubuze, undazise. Ubuphi na wena ukuseka kwam ihlabathi? Xela, ukuba uyazi, uyaqonda.” (Yobhi 38:1-4) (Abantu ngokwemvelo basikelwe umda. Ukongezelela, amava abo ebomini mafutshane ngokwentelekiso ibe adla ngokulinganiselwa kwimpucuko enye okanye kwindawo enye. Ngaloo ndlela ulwazi abanalo lulinganiselwe, ibe yonk’ into inxibelelene nenye kangangokuba badla ngokufumana iinkalo abangaziqwalaselanga ngokwaneleyo. Nayiphi na intanda-bulumko abayivelisayo iya kukubonakalisa oku kusikelw’ umda.)

Ziveliswa ngabantu abangafezekanga: “Bonile bonke, basilela eluzukweni lukaThixo.” (Roma 3:23) “Kukho indlela ethe tye phambi komntu, ukanti ukuphela kwayo ziindlela zokufa.” (IMize. 14:12) (Ngenxa yokungafezeki okunjalo, iintanda-bulumko zabantu zidla ngokubonakalisa ukuzingca okusisiseko mhlawumbi okukhokelela kuyolo lokwexeshana kwanolukhokelela kukatyo nokungonwabi okukhulu.)

Ziphenjelelwa ngoomoya beedemon: “Ihlabathi liphela lilele kongendawo.” (1 Yoh. 5:19) “[Lowo] kuthiwa nguMtyholi, uSathana ke, lowo ulilahlekisayo elimiweyo liphela.” (ISityhi. 12:9) “Enanifudula nihamba kuzo ngokwesimo seli hlabathi, ngokomphathi wegunya lesibhakabhaka, womoya lo usebenzayo ngoku kubo abangevayo.” (Efe. 2:2) (Iintanda-bulumko ezikhuthaza abantu ukuba bangazithobeli izinto ezifanelekileyo nezithe tye ezifunwa nguThixo zibonakalisa impembelelo enjalo. Akumangalisi ukuba, njengoko imbali ingqina njalo, iintanda-bulumko namacebo abantu zisoloko zisizisa intlungu kwinxalenye enkulu yoluntu.)

Kutheni le nto kububungqina bokucinga kakuhle ukufundisisa iimfundiso zikaYesu Kristu kunokufundisisa intanda-bulumko yabantu?

Kol. 1:15-17: “[UYesu Kristu] ungumfanekiselo kaThixo ongenakubonwa, owamazibulo kwindalo yonke. Ngokuba zadalelwa kuye zonke izinto, ezisemazulwini nezisemhlabeni, . . . zonke izinto zidalwe nguye, zidalelwe yena. Yena ke ungaphambi kweento zonke, nazo zonke izinto zima zimi kuye.” (Ulwalamano lwakhe olusenyongweni noThixo lumenza akwazi ukusinceda ukuba sifunde inyaniso engoThixo. Ingakumbi, njengalowo zathi zonke ezinye izinto zenziwa ngaye, uYesu uyazi ngokupheleleyo indalo iphela. Akukho sithandi sobulumko esingumntu esinokwenza nakuphi na koku.)

Kol. 1:19, 20: “Ngokuba kwakholeka ukuthi ukuzaliseka konke kuhlale kuye [uYesu Kristu], nokuthi ngaye azixolelanise naye zonke izinto, elwenzile uxolo ngalo igazi lomnqamlezo wakhe.” (Ngaloo ndlela uYesu Kristu ngulowo uThixo athe waceba ukubuyisela ngaye yonke indalo kwimvisiswano naye. UThixo ukwaphathise uYesu ulawulo phezu kwawo wonke umhlaba, njengoko kuboniswe kuDaniyeli 7:13, 14. Ngoko ithemba lethu lobomi elingekamva lixhomekeke ekwazini yena nasekusabeleni kakuhle kumyalelo wakhe.)

Kol. 2:8: “Lumkani, kungabikho bani unithimbayo ngayo intanda-bulumko, nangokulukuhla okungento yanto, ngokwesithethe sabantu, ngokweziqalelo zehlabathi, kungengokukaKristu.” (Enjani impazamo ukuba buhlungu ebekuya kuba yiyo ukukhetha intanda-bulumko yabantu ekhohlisa ngolo hlobo ngaphezu kokufuna ubulumko bokwenyaniso njengomfundi kaYesu Kristu, umntu wesibini ongoyena mkhulu kwindalo iphela, olandela emva koThixo!)

UThixo ubujonga njani “ubulumko” obunikelwa yintanda-bulumko yabantu?

1 Kor. 1:19-25: “Kubhaliwe kwathiwa, Ndiya kubutshabalalisa ubulumko bezilumko, ingqondo yeengqondi ndiyitshitshise. Siphi na ke isilumko? Uphi na ke umbhali? Uphi na ke umphiki weli phakade? UThixo akabenzanga baba bubudenge na ubulumko beli hlabathi? Ekubeni ke kuthe, ebulumkweni bukaThixo, ihlabathi alamazi uThixo ngobulumko balo, kwakholeka kuThixo ukusindisa abo bakholwayo, ngabo ubudenge [njengoko bubonakala ehlabathini] bokuvakalisa iindaba ezilungileyo. . . . Ngokuba into kaThixo ebubudenge [njengoko ihlabathi libona njalo] ilumkile kunabantu, nento kaThixo engenamandla [njengoko ihlabathi lisenokubona njalo] yomelele kunabantu.” (Imbono kaThixo elolo hlobo ngokuqinisekileyo ifanelekile okanye isengqiqweni. EBhayibhileni, eyiyeyona ncwadi isasazwa ngokubanzi ehlabathini, ubhale amazwi acacileyo angenjongo yakhe. Uthumele amangqina akhe ukuba axubushe ngayo nabo bonke abaya kuphulaphula. Hayi indlela ekububuyatha ngayo ngaso nasiphi na isidalwa ukucinga ukuba sinobulumko obukhulu ngakumbi kunobukaThixo!)