UMoya Wehlabathi

Ingcaciso: Ngamandla ashukumisayo naphembelela ibutho labantu elibunjwe ngabo bangengabo abakhonzi bakaYehova uThixo, ubangela abantu abanjalo bathethe baze benze izinto ngendlela ebafanisayo. Nangona abantu besenza ngendlela abakhetha ngayo ngokwabantu ngabanye, abo babonakalisa umoya wehlabathi banikela ubungqina besimo sengqondo esithile esisiseko, iindlela zokwenza izinto, neenjongo ebomini zinto ezo eziqhelekileyo kwinkqubo yezinto ekhoyo uSathana angumlawuli nothixo wayo.

Kutheni le nto ukonakaliswa ngumoya wehlabathi kuyinto emele ixhalatyelwe ngokunzulu nje?

1 Yoh. 5:19: “Ihlabathi liphela lilele kongendawo.” (USathana ukhuthaze umoya olawula indlela yokucinga nemicimbi yabo boluntu abangengabo abakhonzi bakaYehova akholiswa ngabo. Lo ngumoya wokuzingca nekratshi oxhaphake gqitha kangangokuba ufana nomoya ophefumlwa ngabantu. Kufuneka silumke gqitha ukuze singabi phantsi kwegunya likaSathana ngokuvumela loo moya uxonxe ubomi bethu.)

ISityhi. 12:9: “Yaphoswa phantsi inamba enkulu, inyoka yakudala, leyo kuthiwa nguMtyholi, uSathana ke, lowo ulilahlekisayo elimiweyo liphela; yaphoswa emhlabeni, nezithunywa zayo zaphoswa kunye nayo.” (Ukususela ekwenzekeni koku, emva kokuzalwa koBukumkani ngowe-1914, impembelelo kaSathana needemon zakhe iye yathabath’ unyawo phakathi koluntu. Umoya wakhe uye waqhubela abantu kwizenzo zokuzingca nogonyamelo olwandileyo. Ingakumbi abo bafuna ukukhonza uYehova ngabo abacinezelwa gqitha ukuze babe yinxalenye yehlabathi, ukuze benze oko kwenziwa ngabanye, nokuze balutyeshele unqulo lokwenyaniso.)

Ziziphi ezinye zeempawu zomoya wehlabathi ekufuneka sizilinde kuzo?

1 Kor. 2:12: “Ke thina asamkelanga moya wehlabathi; samkele uMoya ophuma kuye uThixo, ukuze sizazi izinto esazibabalwa nguThixo.” (Ukuba umoya wehlabathi uya usendela kwindlela umntu acinga ngayo nakwiminqweno yakhe, isiqhamo sawo kungekudala sibonakala kwizenzo ezibonakalisa loo moya. Ngoko, ukwahlukana nomoya wehlabathi kufuna kungekuphela nje ukuphepha izinto ezingezozabukristu kwanokugqithisa ekwenzeni izinto kodwa kukwafuna nokufikelela kumazantsi omcimbi ngokuhlakulela isimo sengqondo esibonakalisa umoya kaThixo nokuzithanda ngokwenyaniso iindlela zakhe. Oku umele uhlale ukukhumbula njengoko uqwalasela iimbonakaliso ezilandelayo zomoya wehlabathi.)

Ukwenza oko umntu afuna ukukwenza, engakukhathaleli ukuthanda kukaThixo

USathana wabongoza uEva ukuba azigqibele ngokwakulungile nokwakukubi. (Gen. 3:3-5; njengomahluko woku bona IMizekeliso 3:5, 6.) Abaninzi abalandela ikhondo likaEva abakwazi oko uThixo akufunayo kuluntu, bengenawo nomdla wokukufumanisa. Basuka nje “benze unothanda,” njengoko besitsho. Abo bazaziyo izinto uThixo azifunayo baze bazame ukuzivisisanisa nazo kufuneka balumke ukuba umoya wehlabathi ungababangeli basityeshele ngabom isiluleko seLizwi likaThixo koko basenokukujonga ‘njengezinto ezincinane.’—Luka 16:10; bona kwanothi “UkuZilawula.”

Ukusabela kwiimeko ngokusekelwe kwikratshi

YayinguSathana owaba ngowokuqala ukuvumela ukuzicingela konakalise intliziyo yakhe. (Thelekisa uHezekile 28:17; IMizekeliso 16:5.) Ikratshi liyinto eyahlulayo kwihlabathi angumlawuli walo, libangela abantu bazijonge njengababhetele kunabo bezinye izizwe, iintlanga, amaqela eelwimi, nabakumgangatho othile ngokwezoqoqosho. Kwanabo bakhonza uThixo kusenokufuneka bezisusile iimvakalelo ezinjalo ezisaseleyo. Kwakhona kufuneka balumke ukuze ikratshi lingababangeli benze iimbambano ezinkulu kwimicimbi emincinane, okanye babe ngumqobo ekuvumeni kwabo iziphoso zabo nasekwamkeleni isiluleko baze ngaloo ndlela bangenelwe kuncedo oluthandeka kunene uYehova alulungiselela ngentlangano yakhe.—Roma 12:3; 1 Pet. 5:5.

Ukubonakalisa isimo sengqondo sokuvukela igunya

Imvukelo yaqalisa ngoSathana, ogama lithetha “uMxhathisi.” Ngokuvukela kwakhe uYehova, uNimrodi, ogama lakhe lisenokuthetha oku “Masivukele,” wabonisa ukuba wayengumntwana kaSathana. Ukuphepha loo moya kuya kwenza abantu aboyika uThixo bangabavukeli abalawuli behlabathi (Roma 13:1); kuya kunceda abancinane bazithobe kwigunya elinikelwe nguThixo nelabazali babo (Kol. 3:20); kuya kulondoloza umntu angavelani nabawexuki, abanyelisa abo uYehova abaphathise imbopheleleko kwintlangano yakhe ebonakalayo.—Yuda 11; Heb. 13:17.

Ukungathinteli iinkanuko zenyama enesono

Impembelelo yoku inokubonwa ize iviwe kuzo zonke iindawo. Ngalo lonke ixesha kukho imfuneko yokukulumkela oku. (1 Yoh. 2:16; Efe. 4:17, 19; Gal. 5:19-21) Indlela yokucinga neminqweno enokukhokelela kubungqina obunzulu ngakumbi boku isenokubonakala kwincoko yomntu, kwiziqhulo azisebenzisayo, kumculo awuphulaphulayo, kuhlobo lomngqungqo awenzayo, okanye ekubukeleni kwakhe imiboniso ebalaselisa isini sokuziphatha okubi. Le nkalo yomoya wehlabathi izibonisa ekusetyenzisweni kakubi kweziyobisi, ekunxileni, kukrexezo, kuhenyuzo, nakubufanasini. Kwakhona uyabonakala xa umntu ngokungekho zibhalweni, kodwa mhlawumbi ngokusemthethweni, eqhawula umtshato nelinye iqabane aze athabathe elinye.—Mal. 2:16.

Ukuvumela ubomi bukabani bulawulwe ngumnqweno wokufumana oko akubonayo

Yayingumnqweno onjalo uSathana awawuhlakulela kuEva, emtsala ukuba enze into eyonakalisa ulwalamano lwakhe noThixo. (Gen. 3:6; 1 Yoh. 2:16) UYesu wasichasa ngamandla isilingo esinjalo. (Mat. 4:8-10) Abo bafuna ukukholisa uYehova kufuneka balumke ukuze bangavumeli ihlabathi lezorhwebo livelise umoya onjalo kubo. Umphumo uba yintlungu nokonakala okukhulu ngokomoya kwabo barhintyelwa lilo.—Mat. 13:22; 1 Tim. 6:7-10.

Ukuqhayisa kukabani ngezinto zakhe nangezinto acinga ukuba uzenzile

Nolu qheliselo, ‘luphuma ehlabathini’ ibe kufuneka lulahlwe ngabo bathi babe ngabakhonzi bakaThixo. (1 Yoh. 2:16) Iingcambu zalo likratshi, ibe endaweni yokuba lwakhe abanye ngokomoya, lubabonisa izilingo zezinto eziphathekayo nokuzithelekelela ufeza okuthile ehlabathini.—Roma 15:2.

Ukungalawuli kukabani iimvakalelo zakhe ngokusebenzisa intetho engcolileyo nezenzo zogonyamelo

Le ‘yimisebenzi yenyama’ abantu abaninzi ekufuneka balwe nzima nayo. Ngokuba nokholo lokwenyaniso nokufumana uncedo lomoya kaThixo banokuloyisa ihlabathi kunokuvumela umoya walo ubalawule.—Gal. 5:19, 20, 22, 23; Efe. 4:31; 1 Kor. 13:4-8; 1 Yoh. 5:4.

Ukusekela ithemba noloyiko lukabani koko abantu bakwaziyo ukukwenza

Umntu wokwenyama ugqala oko anokukubona nanokukuchukumisa njengento ebaluleke kunene. Ithemba noloyiko lwakhe lusekelwe kumadinga nakwizisongelo zabanye abantu. Ukhangela kubalawuli abangabantu ukuze afumane uncedo ibe uyadana xa besilela. (INdu. 146:3, 4; Isa. 8:12, 13) Kuye, obu bomi kuphela kwabo. Izisongelo zokufa zimkhobokisa ngokulula. (Ngokwahlukileyo koku, bona uMateyu 10:28; Hebhere 2:14, 15.) Kodwa amandla amatsha ashukumisa iingqondo zabantu abathi bamazi uYehova, abo bazalisa iingqondo neentliziyo zabo ngamadinga akhe nabafunda ukuphethukela kuye ukuze bafumane uncedo ngalo lonke ixesha beswele.—Efe. 4:23, 24; INdu. 46:1; 68:19.

Ukunikela imbeko yonqulo eyiyekaThixo ebantwini nakwizinto

“Uthixo weli phakade,” uSathana uMtyholi, ukhuthaza zonke iintlobo zoqheliselo ezilahlekisa utyekelo lokunqula uThixo alunike umntu. (2 Kor. 4:4) Bambi abalawuli baye baphathwa njengoothixo. (Ize. 12:21-23) Izigidi zabantu zinqula izithixo. Izigidi ezingakumbi zenza abadlali beqonga neembaleki ezibalaseleyo izithixo. Ngokufuthi imibhiyozo inikela imbeko engafanelekanga kubantu abathile. Lo moya uqheleke kangangokuba abo bamthanda ngokwenyaniso uYehova nabafuna ukuzinikela kuye ngokupheleleyo kufuneka bayiphaphele impembelelo yawo imihla ngemihla.