Ngaba Uyawuxhathisa Umoya Wehlabathi?
“Asamkelanga moya wehlabathi; samkele uMoya ophuma kuye uThixo.”—1 KORINTE 2:12.
1, 2. Yiyiphi intlekele ebandakanya igesi eyityhefu eyenzekayo eBhopal, eIndiya, kodwa yiyiphi “igesi” ebulala ngakumbi ephefumlwayo ehlabathini ngokubanzi?
NGOBUSUKU obupholileyo bukaDisemba we-1984, kwenzeka into eyothusayo eBhopal, eIndiya. Kweso sixeko, kukho umzi-mveliso wemichiza, yaye ngobo busuku bukaDisemba, isivalo asizange sisebenze kakuhle kwelinye lamatanki okugcina igesi. Ngequbuliso, iitoni zegesi imethyl isocyanate zaqalisa ukusasazeka emoyeni. Iqhutywa ngumoya, le gesi ibulalayo yanyebelezela ezindlwini nakwiintsapho ezileleyo. Yashiya kuthe waca amawakawaka ezidumbu, singasathethi ke ngeengxwelerha. Leyo yayiyeyona ngozi inkulu yakhe yakho kumzi-mveliso wezoshishino ukuya kuthi ga ngelo xesha.
2 Abantu bahanjelwa ngumzimba xa besiva ngeBhopal. Kodwa nakuba yayibulala kangako, loo gesi yayisasazeka apho yabulala abantu abambalwa lee kunabo babulawa ngokomoya “yigesi” ephefumlwa ngabantu emhlabeni jikelele mihla le. IBhayibhile iwubiza ngokuthi ‘ngumoya wehlabathi.’ Ngulo moya obulalayo awathi umpostile uPawulos uchasene nomoya ovela kuThixo xa wathi: “Ke thina asamkelanga moya wehlabathi; samkele uMoya ophuma kuye uThixo, ukuze sizazi izinto esazibabalwa nguThixo.”—1 Korinte 2:12.
3. Uyintoni ‘umoya wehlabathi’?
3 Uyintoni kanye kanye ‘umoya wehlabathi’? Ngokutsho kweThe New Thayer’s Greek English Lexicon of the New Testament, ngokuqhelekileyo igama elithi “umoya” (pneuʹma, ngesiGrike) lithetha “utyekelo okanye impembelelo ezalise nelawula umphefumlo wakhe nabani na.” Umntu unokuba nomoya okanye utyekelo oluhle okanye olubi. (INdumiso 51:10; 2 Timoti 4:22) Kwaneqela labantu lisenokuba nomoya, okanye utyekelo oluthile olunamandla. Umpostile uPawulos wambhalela oku umhlobo wakhe uFilemon: “Ubabalo lweNkosi yethu uYesu Kristu malube nomoya wenu.” (Filemon 25) Ngokufanayo—kodwa ngomkhamo omkhulu ngakumbi—ihlabathi ngokubanzi linotyekelo olunamandla, lona ‘olungumoya wehlabathi’ awayethetha ngawo uPawulos. Ngokutsho kweWord Studies in the New Testament kaVincent, “eli binzana lithetha umgaqo ongendawo ophembelela eli hlabathi elingenakulungiswa.” Lutyekelo lwesono olutyhutyha iingcinga zeli hlabathi luze luziphembelele ngamandla izenzo zabantu.
4. Ngubani ongumthombo womoya wehlabathi, yaye lo moya unawuphi umphumo ebantwini?
4 Lo moya uyityhefu. Ngoba? Ngenxa yokuba uvela ‘kumphathi weli hlabathi,’ uSathana. Eneneni, ubizwa ngokuba ‘ngumphathi wegunya lesibhakabhaka, womoya lo usebenzayo ngoku kubo abangevayo.’ (Yohane 12:31; Efese 2:2) Kunzima ukuwuphepha lo ‘moya osebenzayo ngoku kubo abangevayo.’ Ukho kuyo yonk’ indawo kwibutho labantu. Ukuba siyawusezela, siqalisa ukwamkela isimo sawo sengqondo, neenjongo zawo. Umoya wehlabathi ukhuthaza ‘ukuphila ngokwenyama,’ oko kukuthi, ngokuvisisana nokungafezeki kwethu kwesono. Uyabulala, “kuba xa niphila ngokwenyama, niza kufa.”—Roma 8:13.
Ukuwuphepha Lo Moya Wehlabathi
5. Yintoni eyathi ngobulumko yenziwa lelinye iNgqina ebudeni bentlekele yaseBhopal?
5 Ebudeni bentlekele yaseBhopal, elinye iNgqina likaYehova lavuswa kukukhala kweealamu nalivumba elitsarhayo legesi eyityhefu. Lingaphozisanga maseko lavusa intsapho yalo baza bagxabhagxabhisa ukuya esitratweni. Emva kokuba lithe xha nje umzuzwana ukuze liqonde icala umoya oya ngakulo, lasokola lona nentsapho yalo ukuthubeleza phakathi kwesihlwele esifathulayo besiya encotsheni yenduli engaphandle kwesixeko. Apho bakwazi ukuzalisa imiphunga yabo ngomoya ohlaziyayo, nococekileyo owawuvela ngakwichibi elikufuphi.
6. Singaya phi ukuze siphephe umoya wehlabathi?
6 Ngaba ikho indawo ephakamileyo esinokuya kuyo ukuze sikhuseleke ‘kumoya’ oyityhefu weli hlabathi? IBhayibhile ithi ikho. Ekhangele phambili kumhla wethu, umprofeti uIsaya wabhala oku: “Ke kaloku kuya kuthi ekupheleni kwemihla, intaba yendlu kaYehova ivelele ezincotsheni zazo iintaba, izongamele iinduli, zibe ngumsinga ukuya kuyo zonke iintlanga. Kuya kuhamba izizwe ezininzi, zithi, Yizani, sinyuke siye entabeni kaYehova, endlwini kaThixo kaYakobi; asiyalele iindlela zakhe, sihambe ngomendo wakhe. Kuba kuya kuphuma umyalelo eZiyon, nelizwi likaYehova eYerusalem.” (Isaya 2:2, 3) Indawo ephakamileyo yonqulo lwenyaniso, ‘intaba ephakanyisiweyo yendlu kaYehova,’ ikuphela kwendawo kwesi sijikelezi-langa ekhuselekileyo kumoya otsarhayo, noyityhefu weli hlabathi. Kukuyo apho umoya kaYehova usebenza ngokukhululekileyo phakathi kwamaKristu athembekileyo.
7. Abaninzi baye basindiswa njani kumoya wehlabathi?
7 Abaninzi ababephefumla umoya weli hlabathi ngaphambili baye banandipha isiqabu esifanayo neso safunyanwa lelaa Ngqina laseBhopal. Emva kokuba ethethe ‘ngabo bangevayo’ abaphefumla umoya weli hlabathi, umpostile uPawulos uthi: “Sasifudula nathi sonke sihleli phakathi kwabo ezinkanukweni zenyama yethu, sisenza ukuthanda kwenyama nokwengcinga, saye ngemvelo sikwangabantwana bengqumbo, njengabanye abo. Ke uThixo, esisityebi nje ngenceba, uthe ngenxa yothando lwakhe olukhulu, awasithanda ngalo, thina sifile nje ziziphoso, wasidlisa ubomi ndawonye noKristu.” (Efese 2:3-5) Abo bangaphefumli nto yimbi ngaphandle komoya onetyhefu wale nkqubo yezinto bafile ngokomoya. Noko ke, ngokuncedwa nguYehova, izigidi namhlanje zibalekela kwindawo ephakamileyo yokomoya yaye ziyasinda kuloo meko ibulalayo.
Iindlela Obonakala Ngazo ‘Umoya Wehlabathi’
8, 9. (a) Yintoni ebonisa ukuba simele sihlale sithe qwa ngokunxamnye nomoya wehlabathi? (b) Umoya kaSathana usenokusonakalisa njani?
8 Umoya obulalayo kaSathana usabhudla phakathi kwethu. Simele sithi qwa ukuze singaze sikhukuliselwe ezantsi, ehlabathini kwakhona, size mhlawumbi siminxwe ngokomoya. Oku kufuna ukuba sihlale siphaphile. (Luka 21:36; 1 Korinte 16:13) Ngokomzekelo, khawuqwalasele esi sibakala. Onke amaKristu aqhelene nemilinganiselo kaYehova yokuziphatha yaye akanakuze alugqale njengolwamkelekileyo uqheliselo olungacocekanga olunjengokukrexeza, ukuhenyuza nobufanasini. Ukanti, minyaka le bamalunga nama-40 000 abantu abasuswayo kubudlelane entlanganweni kaYehova. Kutheni? Ubukhulu becala kungenxa yalo kanye olu qheliselo lungacocekanga. Kunokwenzeka njani oko?
9 Ngenxa yokuba sonke asifezekanga. Inyama ibuthathaka, yaye kufuneka sithi gqolo ukulwa notyekelo oluphosakeleyo olusentliziyweni yethu. (INtshumayeli 7:20; Yeremiya 17:9) Phofu ke, olo tyekelo luphosakeleyo lukhuthazwa ngumoya wehlabathi. Abaninzi kweli hlabathi ababoni nto iphosakeleyo ekuziphatheni okubi, yaye ingcamango yokuvula zibhuqe iyinxalenye yotyekelo lwengqondo lwenkqubo kaSathana yezinto. Ukuba sizichanaba kwingcinga elolo hlobo, phantse ngokunokwenzeka siza kuqalisa ukucinga njengehlabathi. Kungabanga thuba lide, ezo ngcinga zingacocekanga zisenokuvelisa iminqweno ephosakeleyo eya kukhokelela kwisono esinzulu. (Yakobi 1:14, 15) Siya kube sibhadule sehla kwintaba yonqulo olunyulu lukaYehova saya ezantsi kwihlabathi elingcolileyo likaSathana. Akukho namnye ohleli kulo ngokuzithandela oya kubudla ilifa ubomi obungunaphakade.—Efese 5:3-5, 7.
10. Yiyiphi enye indlela obonakala ngayo umoya kaSathana, yaye kutheni amaKristu efanele akuphephe oku?
10 Umoya wehlabathi ubonakala nakuthathatha. Ngokomzekelo, kukho isimo sengqondo sokungabi nantlonelo, nesokuhlekisa ngabanye abanaso abaninzi ebomini. Bekatyiswe ngabezobupolitika abonakeleyo okanye abanonyawo lwemfene, kwanaziinkokeli zonqulo eziziphethe kakubi nezinyolukileyo, bathetha ngokungenantlonelo nkqu nangemibandela enzulu. AmaKristu ayaluchasa olu tyekelo. Nakuba sisenokuba nabo uburharha obufanelekileyo, siyakuphepha ukuzisa ebandleni umoya wokuhlekisa ngabanye ngokungenantlonelo. Intetho yomKristu ibonisa ukuba uyamoyika uYehova kwaye unentliziyo enyulu. (Yakobi 3:10, 11; thelekisa IMizekeliso 6:14.) Enoba siselula okanye sikhulile, ukuthetha kwethu kufanele “kuhlale kumnandi, kuvakaliswe ngetyuwa, ukuze [sazi ukuba simelwe] kukuthini na ukuphendula bonke ngabanye.”—Kolose 4:6.
11. (a) Yiyiphi inkalo yesibini yomoya wehlabathi? (b) Kutheni amaKristu ahlukile kwabo babonisa le nkalo?
11 Olunye utyekelo oluqhelekileyo olubonisa umoya weli hlabathi yintiyo. Ihlabathi lahlulahlulwe yintiyo nokujongana ngezikhondo zamehlo okungenxa yokungavisisani ngokobuhlanga, ngokobuzwe kwanangokobuqu. Hayi indlela ezilunge ngakumbi ngayo izinto apho kusebenza khona umoya kaThixo! Umpostile uPawulos wabhala oku: “Ningabuyekezi ububi ngobubi nakubani. Khathalelani okuhle emehlweni abantu bonke. Ukuba kunokwenzeka, okukokwenu nina, hlalani ninoxolo nabantu bonke. Musani ukuziphindezelela, zintanda; yikhweleleni ingqumbo; kuba kubhaliwe kwathiwa, Impindezelo yeyam, kuya kubuyekeza mna, itsho iNkosi. Ngoko ke, ukuba utshaba lwakho lulambile, luphe ludle; ukuba lunxaniwe, luseze; kuba ngokwenjenjalo ke, woba ufumba amalahle omlilo phezu kwentloko yalo. Musa ukweyiswa bububi; boyise ububi ngokulungileyo.”—Roma 12:17-21.
12. Kutheni amaKristu ekuphepha ukuthanda izinto eziphathekayo?
12 Umoya weli hlabathi ukwakhuthaza nokuthanda izinto eziphathekayo. Ngokukhuthazwa zezorhwebo, abaninzi bathe phithi zizixhobo zakutshanje, yifashoni yakutshanje, yinqwelo-mafutha yakutshanje. Bakhotyokiswe ‘yinkanuko yamehlo.’ (1 Yohane 2:16) Kwabaninzi ukuphumelela ebomini kuya ngokuthi banendlu engakanani okanye banamalini ebhankini. AmaKristu, aphefumla umoya ococekileyo wokomoya kwintaba ephakamileyo yonqulo olunyulu lukaYehova, ayaluxhathisa olu tyekelo. Ayazi ukuba ukuba nosukelo lwezinto eziphathekayo kunokubangela umonakalo. (1 Timoti 6:9, 10) UYesu wabakhumbuza oku abafundi bakhe: “Ubomi bomntu abumi ngabuninzi bempahla yakhe.”—Luka 12:15.
13. Ziziphi ezinye iindlela ezingakumbi obonakala ngazo umoya weli hlabathi?
13 Kukho nezinye iindlela obonakala ngazo ‘umoya’ ongenampilo weli hlabathi. Enye yazo ngumoya wemvukelo. (2 Timoti 3:1-3) Uye waphawula na ukuba abantu abaninzi abasenamsebenzi negunya? Ngaba uye waluphawula apho uphangela khona uqheliselo oluxhaphakileyo lokulova emsebenzini ngaphandle kokuba kukho ubani obabek’ esweni? Bangaphi abantu obaziyo abaye baphula imithetho—mhlawumbi baqhathe ekuhlawuleni iirhafu okanye babe okuthile emsebenzini? Ukuba usahamba isikolo, ngaba wakhe wadimazeka ukusa kwinqanaba lokuba ungazibhokoxi ngenxa yokuba abo ufunda nabo bebanyemba abo baphumelelayo kwizifundo zabo? Konke oku kubonisa umoya wehlabathi amele amaKristu awuxhathise.
Indlela Yokuwuxhathisa Umoya Weli Hlabathi
14. AmaKristu ahluke ngaziphi iindlela kwabo bangengomaKristu?
14 Noko ke, singawuxhathisa njani umoya wehlabathi ngoxa siphila kanye ehlabathini? Simele sikhumbule ukuba nokuba siphi na ngokomzimba, ngokomoya asingabo abehlabathi. (Yohane 17:15, 16) Usukelo lwethu asilulo usukelo lweli hlabathi. Imbono yethu ngezinto yahlukile. Singabantu bokomoya, abathetha nabacinga “kungengamazwi anokufundiswa bubulumko babantu, kungawo anokufundiswa nguMoya oyiNgcwele: izinto ezizezomoya sizilungelelanisa namazwi la angawomoya.”—1 Korinte 2:13.
15. Sinokuwuxhathisa njani umoya wehlabathi?
15 Angenza ntoni umntu ukuba uzifumene ekwindawo engcoliswe yigesi eyityhefu? Angafaka isigqubuthelo sobuso sokuzikhusela kwigesi esiqhagamshelwe kwisixhobo sokungenisa umoya ococekileyo, okanye asuke ashenxe ngokoqobo kuloo ndawo. Ezi ikwaziindlela zokuphepha umoya kaSathana. Kangangoko kunokwenzeka, sizama ukushenxa ngokoqobo kuyo nantoni na ebingenza umoya wehlabathi uchaphazele ukucinga kwethu. Ngenxa yoko, siyaluphepha unxulumano olubi, yaye asizichanabi nakuluphi na uhlobo lokuzonwabisa olukhuthaza ugonyamelo, ukuziphatha okubi, ukusebenzelana nemimoya, imvukelo, okanye nawuphi na omnye umsebenzi wenyama. (Galati 5:19-21) Phofu ke, ekubeni siphila ehlabathini, asinakukuphepha ngokupheleleyo ukuchanabeka kwezi zinto. Ngoko senza ngobulumko ukuba siziqhagamshelanisa nesixhobo sokungenisa impepho ehlaziyayo yokomoya. Sithi, ngokungathi kunjalo, sizalise imiphunga yethu yokomoya, ngokuthi siye rhoqo ezintlanganisweni, ngofundisiso lobuqu, ngemisebenzi nonxulumano lobuKristu, nangomthandazo. Ngale ndlela, ukuba naliphi na isuntswana lomoya kaSathana lithi linyebelezele kwimiphunga yethu yokomoya, umoya kaThixo uyasomeleza ukuze silichase.—INdumiso 17:1-3; IMizekeliso 9:9; 13:20; 19:20; 22:17.
16. Sibunikela njani ubungqina bokuba sinomoya kaThixo?
16 Umoya kaThixo umenza umKristu ahluke kubantu beli hlabathi. (Roma 12:1, 2) UPawulos wathi: “EsoMoya isiqhamo luthando, uvuyo, uxolo, ukuzeka kade umsindo, ububele, ukulunga, intembeko, ubulali, ukuzeyisa; akukho mthetho uchasene nezinto ezinjalo.” (Galati 5:22, 23) Kwakhona umoya kaThixo umenza umKristu abe nokuqonda okunzulu ngakumbi ngezinto. UPawulos wathi: ‘Akukho namnye uzaziyo izinto zikaThixo, ingenguwo umoya kaThixo.’ (1 Korinte 2:11) Ngokuqhelekileyo, ‘izinto zikaThixo’ ziquka iinyaniso ezinjengedini lentlawulelo, uBukumkani bukaThixo phantsi kukaYesu Kristu, ithemba lobomi obungunaphakade, nokushenxiswa okusemnyango kweli hlabathi lingendawo. Ngoncedo lomoya kaThixo, amaKristu ayazazi kwaye ezamkela ezo zinto njengenyaniso, yaye oku kuyenza imbono yawo ngobomi yahluke kuleyo yabantu behlabathi. Anelisiwe luvuyo analo lokukhonza uYehova ngoku, enethemba lokuqhubeka emkhonza ngonaphakade.
17. Ngubani owamisela umzekelo obalaseleyo wokuxhathisa umoya wehlabathi, yaye njani?
17 UYesu wayengumzekelo obalaseleyo wabo bawuxhathisayo umoya weli hlabathi. Kamsinya emva kokubhaptizwa kukaYesu, uSathana wazama ukumwexula ekukhonzeni uYehova ngokumzisela izilingo ezithathu. (Mateyu 4:1-11) Esokugqibela sasibandakanya ithemba lokuba uYesu wayenokuzuza ilungelo lokuba ngumlawuli wehlabathi liphela ngexabiso nje lesenzo esinye sokunqula uSathana. UYesu ngewayeqiqe ngelithi: ‘Kulungile, ndiza kusenza esi senzo sonqulo, ndize emva kokuba ndibe ngumlawuli wehlabathi, ndiguquke ndize ndibuyele ekunquleni uYehova. Njengomlawuli wehlabathi, ndiza kuba kwimeko entle ngakumbi yokuluzisela iingenelo uluntu kunaleyo ndikuyo ngoku njengomchweli waseNazarete.’ UYesu akazange aqiqe ngolo hlobo. Wayekulungele ukulinda de uYehova amenze abe ngumlawuli wehlabathi. (INdumiso 2:8) Ngeso sihlandlo, nangazo zonke ezinye izihlandlo ebomini bakhe, wayichasa impembelelo enetyhefu yomoya kaSathana. Ngenxa yoko, waloyisa eli hlabathi lingcolileyo ngokomoya.—Yohane 16:33.
18. Ukuwuxhathisa kwethu umoya wehlabathi kuyizisa njani indumiso kuThixo?
18 Umpostile uPetros wathi sifanele silandele ngokusondeleyo emanyathelweni kaYesu. (1 Petros 2:21) Nguwuphi umzekelo olunge ngakumbi esingaba nawo? Kule mihla yokugqibela, bephenjelelwa ngumoya wehlabathi, abantu beyela ngakumbi nangakumbi ebubini. Hayi indlela emangalisa ngayo into yokuba phakathi kweli hlabathi linje, yona indawo ephakamileyo yonqulo lukaYehova imi inyulu yaye icocekile! (Mika 4:1, 2) Ngokuqinisekileyo, amandla omoya kaThixo abonwa kwisibakala sokuba izigidi zingumsinga ukunyukela kwindawo kaThixo yonqulo, zixhathisa umoya weli hlabathi otyhutyha yonk’ indawo zize zizise uzuko nendumiso kuYehova! (1 Petros 2:11, 12) Kwanga sonke singazimisela ukuhlala kuloo ndawo iphakamileyo de uKumkani omiselweyo kaYehova alishenxise eli hlabathi lingendawo aze amvalele enzonzobileni uSathana uMtyholi needemon zakhe. (ISityhilelo 19:19–20:3) Ngoko, umoya weli hlabathi awusayi kuphinda ubekho. Hayi indlela eliya kube lisikeleleke ngayo elo xesha!
Ngaba Unokucacisa?
◻ Uyintoni umoya wehlabathi?
◻ Unawuphi umphumo umoya weli hlabathi ebantwini?
◻ Ziziphi ezinye iindlela obonakala ngazo umoya wehlabathi, yaye singawuphepha njani?
◻ Sibonisa njani ukuba sinomoya kaThixo?
◻ Ziziphi iintsikelelo ezifunyanwa ngabo bawuxhathisayo umoya wehlabathi?
[Umfanekiso okwiphepha 16, 17]
Umoya wehlabathi uvela kuSathana
Ukuze uwuphephe umoya wehlabathi, balekela kwindawo ephakamileyo yonqulo lukaYehova