UkuBandezeleka

Ingcaciso: Ngamava afunyanwa ngumntu xa enyamezela intlungu okanye unxunguphalo. Ukubandezeleka kusenokubakho ngokwasemzimbeni, ngokwasengqondweni, okanye ngokweemvakalelo. Zininzi izinto ezinokubangela ukubandezeleka; ngokomzekelo, umonakalo owenzekayo ngenxa yemfazwe nokubawa kwezorhwebo, iziphene ezizuzw’ ilifa, ukugula, iingozi, “iintlekele zemvelo,” izinto ezibonakala zingezozabubele ezithethwa okanye ezenziwa ngabanye, iingcinezelo zeedemon, ukuqonda intlekele esondelayo, okanye ubuyatha bukabani. Ukubandezeleka okubangelwa zezi zizathu zahlukahlukeneyo kuza kuqwalaselwa apha. Noko ke, ukubandezeleka kusenokubakho ngenxa yokuvakalelwa msinya komntu ngengxaki yabanye abantu okanye ngenxa yobuhlungu bakhe ekubukeleni ihambo yokungahloneli Thixo.

Kutheni uThixo evumele ukubandezeleka nje?

Ngubani ngokwenene omele abekw’ ityala ngako?

Abantu ngabo abamele babekw’ ityala ngokubandezeleka okukhulu. Benza iimfazwe, baphule umthetho, bangcolise imekobume, ngokufuthi baqhube amashishini ngendlela eshukunyiswa kukubawa kunokushukunyiswa kukuxhalabela abantu abangoowabo, ibe maxa wambi bazifica ngokugqith’ emgceni kwimikhwa abayaziyo ukuba inokuba yingozi kwimpilo yabo. Xa bezenza ezi zinto, benzakalisa iziqu zabo kwanabanye. Ngaba kumele kulindelwe ukuba abantu bebeya kukhuseleka kwimiphumo yoko bakwenzayo? (Gal. 6:7; IMize. 1:30-33) Ngaba kufanelekile ukubek’ ityala uThixo ngenxa yezi zinto abantu abazenza ngokwabo?

USathana kwaneedemon zakhe nabo banembopheleleko koku. IBhayibhile ibonisa ukuba ukubandezeleka okukhulu kubangelwa yimpembelelo yemimoya engendawo. Ukubandezeleka abantu abaninzi gqitha abambek’ ityala ngako uThixo akuphumi kuye konke konke.—ISityhi. 12:12; Ize. 10:38; bona kwanephepha 318, 319, phantsi komxholo othi “USathana UMtyholi.”

Kwaqalisa njani ukubandezeleka? Ukuhlolisiswa koonobangela kutsalela ingqalelo kubazali bethu bokuqala abangabantu, uAdam noEva. UYehova uThixo wabadala befezekile waza wababeka kwindawo eyiparadisi. Ukuba babemthobele uThixo, ngebabengazange bagula okanye bafa. Ngebanandipha ubomi bobuntu obufezekileyo ngonaphakade. Ukubandezeleka kwakungeyonxalenye yenjongo kaYehova kuluntu. Kodwa ngokucacileyo uYehova wamxelela uAdam ukuba ukuqhubeka kwakhe enandipha oko Wayebanike kona kwakuxhomekeke kwintobelo. Ngokucacileyo, kwakufuneka baphefumle, batye, basele, baze balale ukuze baqhubeke bephila. Ibe kwakufuneka bazigcine izinto ezazifunwa nguThixo ngokokuziphatha ukuze banandiphe ubomi ngokupheleleyo nokuze bababalwe ngobomi obunjalo ngonaphakade. Kodwa bakhetha ukuhamba ngabayibonayo, ukuzimisela eyabo imilinganiselo yokulungileyo nokubi, baza ngaloo ndlela batyeka kuThixo, uMniki-bomi. (Gen. 2:16, 17; 3:1-6) Isono sakhokelela ekufeni. UAdam noEva bazala abantwana bengaboni, yaye babengenakudlulisela ebantwaneni babo oko babengasenako. Bonke bazalelwa esonweni, benotyekelo lokwenza okuphosakeleyo, benobuthathaka obunokukhokelela ekuguleni, ilifa lesono elaliya kuthi ekugqibeleni liphumele ekufeni. Ngenxa yokuba wonk’ ubani osemhlabeni namhlanje wazalelwa esonweni, thina sonke siyakuva ukubandezeleka ngeendlela ezahlukahlukeneyo.—Gen. 8:21; Roma 5:12.

INtshumayeli 9:11 ithi ‘ixesha nesihlo’ nazo zinomphumo koko kwenzekayo kuthi. Sisenokwenzakala, kungengakuba uMtyholi inguye obangele ngokuthe ngqo oko okanye ngenxa yokuba kwenziwe nguye nawuphi na umntu, kodwa kwenzeka ngenxa yokuba sikwindawo ethile ngethuba eliphosakeleyo.

Kutheni le nto uThixo engenzi okuthile nje ukukhulula uluntu? Kutheni le nto thina sonke simele sibandezeleke ngenxa yento eyenziwa nguAdam?

EBhayibhileni, uThixo usixelela indlela esinokukuphepha ngayo ukubandezeleka okukhulu. Ulungiselele esona siluleko sihle gqitha sokuphila. Xa sisetyenziswa, esi siluleko sizalisa ubomi bethu ngentsingiselo, siphumela kubomi bentsapho obonwabisayo, sisibangela sinxulumane ngokusondeleyo nabantu abathandana ngokwenene, ibe siyasikhusela kuqheliselo olunokuzisa ukubandezeleka okukhulu emzimbeni nokungeyomfuneko. Ukuba siyalutyeshela olo ncedo, ngaba kufanelekile ukumbek’ ityala uThixo ngenkathazo esiyizisa ngokwethu kuthi nakwabanye?—2 Tim. 3:16, 17; INdu. 119:97-105.

UYehova wenze ilungiselelo lokupheliswa kwako konke ukubandezeleka. Wadala isibini esingabantu safezeka, ibe ngothando wenza onke amalungiselelo ukuze ubomi bube bobonwabisayo kuso. Xa sathi ngabom samnikela umva uThixo, ngaba uThixo wayenemfanelo yokungenelela ukuze akhusele abantwana baso kwimiphumo yoko abazali babekwenzile? (Dut. 32:4, 5; Yobhi 14:4) Njengoko sisazi kakuhle, izibini ezitshatileyo zisenokufumana uvuyo oluhambisana nokuba nabantwana, kodwa zikwanembopheleleko. Isimo sengqondo nezenzo zabazali ziyabachaphazela abantwana babo. Sekunjalo, uYehova, ngokubonakalisa ubabalo olungummangaliso, wathumela uNyana wakhe amthanda gqitha emhlabeni ukuba ancame ubomi bakhe njengentlawulelo, ukuze akhulule abo benzala ka-Adam ababeya kuthi ngoxabiso babe nokholo kweli lungiselelo. (Yoh. 3:16) Ngenxa yoku, abantu abaphilayo namhlanje bavulekelwe lithuba lokufumana oko kwalahlwa nguAdam—ubomi bobuntu obufezekileyo, obungenakubandezeleka, kumhlaba oyiparadisi. Elinjani ilungiselelo lobubele oko okukuko!

Bona kwanephepha 273-275, phantsi komxholo othi “INtlawulelo.”

Kodwa kutheni le nto uThixo wothando ebeya kuvumela ukubandezeleka kuqhubeke ithuba elide kangaka?

Ngaba siye sangenelwa kuba eye wakuvumela de kwangoku? “INkosi [uYehova, NW] ayilibali dinga, njengoko abathile baba iyalibala; isuka izeke kade umsindo kuthi, ingangi kungatshabalala nabani; inga bonke bangasinga enguqukweni.” (2 Pet. 3:9) Ukuba uThixo wathi ngoko nangoko wabatshabalalisa uAdam noEva, emva kokona kwabo, akukho namnye kuthi obeya kuba ngophilayo namhlanje. Ngokuqinisekileyo oko asikuko ebesiya kukufuna. Ngaphezu koko, ukuba uThixo ngaxa lithile kamva wayebatshabalalisile bonke ababengaboni, ngesingazange sazalwa. Isibakala sokuba uThixo evumele eli hlabathi linesono ukuba libekho de kube ngoku kusinike ithuba lokuphila nelokufunda iindlela zakhe, lokwenza iinguqulelo ezifunekayo kubomi bethu, nokufumana amalungiselelo akhe othando angawobomi obungunaphakade. Into yokuba uYehova abe usinike eli thuba kuyimbonakaliso yothando lwakhe olukhulu. IBhayibhile ibonisa ukuba uThixo umisele ixesha lokutshabalalisa le nkqubo ingendawo ibe oko uya kukwenza kungekudala.—Hab. 2:3; Zef. 1:14.

UThixo unokuyiphelisa ingozi enokuzela abakhonzi bakhe kule nkqubo yezinto ibe uya kwenjenjalo. UThixo asinguye obangela ukubandezeleka. Kodwa ngoYesu Kristu, uThixo uya kubavusa abafileyo, aphilise abathobekileyo kuzo zonke izigulo zabo, akhucule lonke uhlobo lwesono, aze ade abangele ubuhlungu bangaphambili buphele kwiingqondo zethu.—Yoh. 5:28, 29; ISityhi. 21:4; Isa. 65:17.

Ixesha eliye ledlula belifuneka ukuze kuzinziswe iimbambano ezaphakanyiswa e-Eden. Ukuze ufumane iinkcukacha, bona iphepha 318, 319, kwanelama-227, 229.

Sikuxhalabele ngokobuqu ukukhululeka. Kodwa xa uThixo enento ayenzayo, umele ayenzele bonke abakuthandayo okulungileyo, angenzeli nje abambalwa. UThixo akamkhethi wabuso bamntu.—Ize. 10:34.

Imizekeliso: Aliyonyaniso na elokuba umzali onothando usenokumvumela umntwana ukuba afumane utyando olubangel’ iintlungu ngenxa yemiphumo eyingenelo enokubangelwa lulo? Kwakhona, aliyonyaniso na elokuba “izicombululo ezikhawulezayo” kwizigulo ezibuhlungu ngokufuthi azinaluncedo lunzulu? Amaxesha amaninzi kuye kufuneke ixesha elingakumbi ukuze kushenxiswe unobangela weso sigulo.

Kutheni le nto uThixo engazange amxolele uAdam aze ke athintele ukubandezeleka okoyikekayo okuviwe luluntu?

Ngaba ngokwenene oko ngekwakukuthintele ukubandezeleka okanye kunoko, ngekwenza uThixo wabopheleleka ngako? Kwenzeka ntoni xa utata esuka nje ngabom asiphose kwelokulibala isenzo esiphosakeleyo sabantwana bakhe endaweni yokuba asebenzise imilinganiselo enamandla yokuqeqesha? Abantwana badla ngokubandakanyeka kuhlobo lokuqala olunye lwesenzo esiphosakeleyo bandule ke baye kolunye, ibe imbopheleleko enkulu iba phezu kotata.

Ngokufanayo, ukuba uYehova wayesixolele isono sika-Adam sangabom, ngokwenene ngekwenza uThixo wanesabelo kwisenzo esiphosakeleyo. Oko ngekwakungazange kwaziphucula iimeko emhlabeni kwaphela. (Thelekisa INtshumayeli 8:11.) Ngokungakumbi, ngekwaphumela ekunyelisweni kukaThixo ngoonyana bakhe abazizithunywa zezulu, ibe ngekwathetha ukuba kwakungekho siseko sokwenene sokuthembela kuyo nayiphi na into elunge ngakumbi. Kodwa imeko enjalo ngeyayingazange yenzeka, kuba ubulungisa busisiseko esingenakuguqulwa solawulo lukaYehova.—INdu. 89:14.

Kutheni le nto uThixo evumela abantwana bazalwe beneziphene ezinzulu ngokomzimba nangokwengqondo?

UThixo asinguye obangela iziphene ezinjalo. Isibini sokuqala esingabantu wasidala sifezekile, sinamandla okuzala abantwana abafezekileyo abafana naso.—Gen. 1:27, 28.

Isono sisizuz’ ilifa kuAdam. Elo lifa lihambisana neziphene ezisenokubakho ngokwasemzimbeni nangokwasengqondweni. (Roma 5:12; ukuze ufumane iinkcukacha ezingakumbi bona iphepha 33.) Eli lifa lesono silifumana ukususela kwixesha lokukhawulwa kwethu esibelekweni. Kungeso sizathu le nto uKumkani uDavide wabhala oku: “Ndakhawulwa nguma esonweni.” (INdu. 51:5) Ukuba uAdam wayengonanga, ngekwadluliselwa iimpawu ezinqwenelekayo kuphela. (Ngamagqabaza akuYohane 9:1, 2, bona iphepha 364, 365.)

Abazali banokubenzakalisa abantwana babo abangekazalwa—ngokomzekelo, ngokusebenzisa kakubi iziyobisi okanye ngokutshaya ngethuba lokukhulelwa kwabo. Kakade ke, akuyonyaniso ukuba ngalo lonke ixesha umama okanye utata ubophelelekile ngeziphene zokuzala okanye ngempilo enkenenkene yomntwana wabo.

UYehova ngothando udlulisela ebantwaneni iingenelo zedini lentlawulelo likaKristu. Ngolwazelelelo kubazali abamkhonza ngokuthembekileyo uThixo, ujonga abantwana babo abancinane njengabangcwele. (1 Kor. 7:14) Oku kushukumisa abazali aboyik’ uThixo ukuba bakulumkele ukuma kwabo noThixo, ngenxa yenkxalabo enothando ngenzala yabo. Kwabaselula abadala ngokwaneleyo kangangokuba bangabanokholo baze babonakalise intobelo kwimiyalelo kaThixo, uYehova udlulisa ilungelo lokuba nokuma okukholekileyo njengabakhonzi bakhe. (INdu. 119:9; 148:12, 13; Ize. 16:1-3) Kuyaphawuleka ukuba uYesu, owayembonakalisa ngokugqibeleleyo uYise, wabonisa umdla okhethekileyo kwimpilo-ntle yabancinane, wade wavusa umntwana kwabafileyo. Ngokuqinisekileyo uya kuqhubeka esenjenjalo njengoKumkani onguMesiya.—Mat. 19:13-15; Luka 8:41, 42, 49-56.

Kutheni le nto uThixo evumela “iintlekele zemvelo,” ezibangela umonakalo omkhulu empahleni nakubomi?

UThixo asinguye obangela iinyikima zomhlaba, izitshingitshane, izikhukula, iimbalela nogqabhuko-dubulo lweentaba nto ezo eziviwa ngokufuthi kwiindaba zanamhla. Akazisebenzisi ezi zinto ukuzisa isohlwayo kubantu abathile. Ngokomlinganiselo omkhulu, ezi zinto zibangelwa ngamandla emvelo abesebenza ukususela ekudalweni komhlaba. IBhayibhile yazixela kwangaphambili iinyikima ezinkulu zomhlaba nokunqongophala kokutya komhla wethu, kodwa oko akuthethi ukuba uThixo okanye uYesu babophelelekile ngezi zinto, kanye njengokuba isazi ngemozulu singabophelelekanga ngemozulu esiyixela kwangaphambili. Ngenxa yokuba ezi zinto zisenzeka kunye nazo zonke ezinye izinto ezaxelwa kwangaphambili kumqondiso oyintlanganisela wokupheliswa kwale nkqubo yezinto, ziyinxalenye yobungqina bokuba iintsikelelo zoBukumkani bukaThixo zisondele.—Luka 21:11, 31.

Abantu badla ngokuba nembopheleleko enkulu ngengozi eyenzekayo. Ngayiphi indlela? Kwanaxa benikwe isilumkiso esaneleyo, abantu abaninzi bayakugatya ukuphuma kwindawo enengozi okanye basilele ukusebenzisa imilinganiselo yokhuseleko efunekayo.—IMize. 22:3; thelekisa uMateyu 24:37-39.

UThixo unokuwathintela amandla emvelo alolo hlobo. Wanika uYesu Kristu amandla okuba azolise uqhwithelo kuLwandle lwaseGalili, njengomzekelo woko Yena aya kukwenzela uluntu phantsi koBukumkani Bakhe obulawulwa nguMesiya. (Marko 4:37-41) Ngokumnikela umva uThixo, uAdam wakugatya ukungenelela kukaThixo okulolo hlobo ngenxa yakhe nangenxa yenzala yakhe. Abo banikwa ubomi ebudeni boLawulo lukaKristu lobuMesiya baya kukhathalelwa ngothando olulolo hlobo, nto leyo eluhlobo lwenyameko enokunikelwa kuphela ngurhulumente onikwa amandla nguThixo.—Isa. 11:9.

Ngaba abantu ababandezeleke ngenxa yenkxwaleko bohlwaywa nguThixo ngenxa yobungendawo?

Abo bavukela imilinganiselo yokuhlonel’ uThixo yokuphila bayayifumana imiphumo emibi. (Gal. 6:7) Maxa wambi ngokukhawulezileyo bavuna isivuno esikrakra. Kwezinye iimeko, basenokubonakala bengabami kakuhle okwethuba elide. Ngokwahlukileyo koko, uYesu Kristu, ongazange enze okuphosakeleyo, nokukhohlakeleyo waphathwa kakubi waza wabulawa. Ngoko, kule nkqubo yezinto ukuma kakuhle akumele kujongwe njengobungqina bentsikelelo kaThixo, nokuba kwinkxwaleko akumele kujongwe njengobungqina bokuba akakholiswa nguwe.

Xa uYobhi waphulukana nezinto zakhe waza wantlithwa ngesifo esenyanyekayo, oko kwakungabangelwanga kukuba uThixo wayengakholiswa nguye. Ngokucacileyo iBhayibhile ithi uSathana nguye owayebophelelekile. (Yobhi 2:3, 7, 8) Kodwa amaqabane athi amtyelela uYobhi ema ngelithi ingxaki kaYobhi imele ibe bubungqina bokuba wayenze into engendawo. (Yobhi 4:7-9; 15:6, 20-24) UYehova wabakhalimela, esithi: “Umsindo wam uyavutha . . . kuba anithethanga nto iyiyo ngam, njengomkhonzi wam uYobhi.”—Yobhi 42:7.

Enyanisweni, abangendawo basenokuma kakuhle okwethuba elithile. UAsafu wabhala oku: “Bendibamonela abaqhayisayo, ndakukubona ukuphumelela kwabangendawo. Ebubini babantu abakho bona; abakhathazwa njengabanye abantu. Bahlalela ngentlamba, bathetha ngokubandezela, benobubi; bathetha iindumbisa zamazwi. Yabona abangendawo abaya banokuchulumacha ngonaphakade, bandile ngokutyeba.”—INdu. 73:3, 5, 8, 12.

Luya kufika lona usuku lokuziphendulela kuThixo. Ngelo xesha uya kubohlwaya abangendawo, ebatshabalalisa ngonaphakade. IMizekeliso 2:21, 22 ithi: “Abathe tye baya kulima ilizwe, basale kulo abagqibeleleyo, banqunyulwe ezweni abangendawo, abanginizayo bancothulwe kulo.” Ngoko abathe tye, uninzi lwabo oluye lwabandezeleka ngenxa yenkxwaleko, baya kunandipha impilo egqibeleleyo nesabelo esikhulu semveliso yomhlaba esiyintabalala.

Ukuba Ubani Uthi—

‘Kutheni le nto uThixo evumele konke oku kubandezeleka?’

Usenokuphendula uthi: ‘Lo ngumcimbi osixhalabise ngokunzulu thina sonke. Mhlawumbi ndingakubuza ndithi, Yintoni ekwenze wabuza oku namhlanje?’ Mhlawumbi usenokongeza uthi: (1) ‘(Sebenzisa umbandela okwiphepha 32-35.)’ (2) ‘(Chaza ezinye izibhalo ezithetha ngokukhululeka kuhlobo lwemeko ezise ukubandezeleka kuloo mntu.)’

Okanye unokuthi (ukuba ukuxhalaba kwabo kubangelwa kokungekho sikweni ehlabathini): ‘IBhayibhile ibonisa isizathu sokuba ezi meko zibekho namhlanje. (INtshu. 4:1; 8:9) Ubusazi na ukuba ikwabonisa oko uThixo aza kukwenza ukuze asikhulule? (INdu. 72:12, 14; Dan. 2:44)’

Enye indlela: ‘Ngokucacileyo ungumntu okholelwayo kuThixo. Ngaba uyakholelwa ukuba uThixo uluthando? . . . Uyakholelwa na ukuba ulumkile ibe ungusomandla? . . . Ngoko umele ukuba wayenezizathu ezithile ezilungileyo zokuvumela ukubandezeleka. IBhayibhile iyazibonisa ukuba ziyintoni na ezo zizathu. (Bona iphepha 32-35.)’