Isahluko 15
Ukubuyela KuThixo Wenyaniso
“Ndiniwisela umthetho omtsha, wokuba nithandane, njengoko ndinithandileyo nina, ukuze nani nithandane. Ngayo le nto baya kwazi bonke, ukuba ningabafundi bam, ukuba nithe nathandana.”—Yohane 13:34, 35.
1, 2. Ifanele ibe yintoni imiphumo yothando lwamaKristu okwenyaniso?
NGALOO mazwi, uYesu wamisela uphawu olwahlula abo bathi bangabalandeli bakhe bokwenyaniso. Kwakuza kufuneka ukuba uthando lobuKristu luzoyise zonke iiyantlukwano zobuhlanga nezobuzwe. Oku bekuya kufuna ukuba amaKristu okwenyaniso ‘angabi ngawo awehlabathi,’ kanye njengokuba noYesu ‘engenguye owehlabathi.’—Yohane 17:14, 16; Roma 12:17-21.
2 UmKristu uzibonakalisa njani ukuba ‘akanguye owehlabathi’? Ngokomzekelo, ufanele asabele njani ngokuphathelele isiphithiphithi sezobupolitika, umoya wemvukelo neemfazwe zamaxesha ethu? Umpostile uYohane ongumKristu wabhala oku ngokuvisisana namazwi kaYesu angasentla: “Bonke abangenzi bulungisa abangabakaThixo, nalowo ungamthandiyo umzalwana wakhe. Ngokuba le yintshumayelo enayivayo kwasekuqalekeni, ukuba sithandane.” Yaye uYesu wacacisa isizathu sokuba abafundi bakhe bengazange balwele ukumhlangula, esithi: “Ubukumkani bam asibubo obeli hlabathi; ukuba bebububo obeli hlabathi ubukumkani bam, amakhonza am ange ezama [elwile, NW] . . . ngoku ke ubukumkani bam asibobalapha.” Kwanaxa ubomi bukaYesu babusemngciphekweni, abo babekho abazange babandakanyeke ekuzinziseni imbambano ngokuthi baphakamise izigalo ngokweendlela ekwenziwa ngazo ehlabathini.—1 Yohane 3:10-12; Yohane 18:36.
3, 4. (a) Waprofeta wathini uIsaya ngokubhekisele “ekupheleni kwemihla”? (b) Yiyiphi imibuzo efuna ukuphendulwa?
3 Kwiminyaka engaphezu kwama-700 ngaphambi koKristu, uIsaya waprofeta ukuba abantu bazo zonke iintlanga babeya kuhlanganisana kunqulo oluyinyaniso lukaYehova yaye babengayi kuba safunda ukulwa. Wathi: “Ke kaloku kuya kuthi ekupheleni kwemihla, intaba yendlu kaYehova ivelele ezincotsheni zazo iintaba, . . . zibe ngumsinga ukuya kuyo zonke iintlanga. Kuya kuhamba izizwe ezininzi, zithi, Yizani, sinyuke siye entabeni kaYehova, endlwini kaThixo kaYakobi; asiyalele iindlela zakhe, sihambe ngomendo wakhe, kuba kuya kuphuma umyalelo eZiyon, nelizwi likaYehova eYerusalem. Úya kugweba phakathi kweentlanga, ohlwaye izizwe ezininzi; ziwakhande amakrele azo abe ngamakhuba, nezikhali zazo zibe zizitshetshe zeediliya; uhlanga lungaphakamiseli uhlanga ikrele, nezizwe zingaphindi zifunde ukulwa.”a—Isaya 2:2-4.
4 Luluphi unqulo kuzo zonke iinkonzo ezisehlabathini, oluye lwabalasela ekuhlangabezaneni nezi mfuneko? Ngoobani abaye bala ukufunda ukulwa phezu kwako nje ukuvalelwa ezintolongweni, kwiikampu zoxinaniso nokugwetyelwa ukufa?
Uthando Nobundilele BamaKristu
5. Yiyiphi ingxelo yobundilele bamaKristu eye yaveliswa ngamaNgqina kaYehova ngokwabantu ngabanye, yaye ngoba?
5 AmaNgqina kaYehova aziwa ehlabathini lonke ngobundilele bawo bobuKristu ngamnye eqhutywa sisazela sakhe. Aye anyamezela ukuvalelwa ezintolongweni, kwiikampu zoxinaniso, ukuthuthunjiswa, ukugxothwa emazweni awo nokutshutshiswa ukutyhubela inkulungwane yama-20 ngenxa yokuba eye ala ukuncama uthando nomanyano lwawo njengebandla lazwenibanzi lamaKristu elikhonza uThixo. KwiJamani yamaNazi ebudeni beminyaka yowe-1933-45, kwafa malunga namaNgqina aliwaka ibe angamawaka amaninzi avalelwa ezintolongweni, ngenxa yokwala kwawo ukuba nenxaxheba kwimfazwe kaHitler. Ngokukwanjalo, phantsi kolawulo lukaFranco kwilizwe laseSpeyin elalisakuba lelobuFasi, amakhulukhulu amaNgqina aselula avalelwa entolongweni ibe amaninzi achitha umlinganiselo weminyaka elishumi lilinye kwiintolongo zasemkhosini kunokuba afunde ukulwa. Ukuza kuthi ga kulo mhla kumazwe aliqela, amaNgqina kaYehova aselula amaninzi atsala nzima ezintolongweni ngenxa yekhondo lawo lobundilele bobuKristu. Noko ke, amaNgqina kaYehova awaphazamisani noorhulumente kwiinkqubo zabo zasemkhosini. Ukungaxengaxengi kwamaNgqina ekugcineni ubundilele bawo bobuKristu kwimicimbi yezobupolitika kube lolunye uphawu lokubambelela kwawo ngokuqinileyo kwiinkolelo zawo ukutyhubela zonke iingxwabangxwaba neemfazwe zenkulungwane yama-20. Kuwaphawula njengabalandeli bokwenyaniso bakaKristu yaye kuyabahlula kwiinkonzo zeNgqobhoko.—Yohane 17:16; 2 Korinte 10:3-5.
6, 7. Yintoni aye ayiqonda amaNgqina kaYehova ngokubhekisele kubuKristu?
6 Ngokubambelela eBhayibhileni nakumzekelo kaKristu, amaNgqina kaYehova abonisa ukuba aqhelisela unqulo loThixo wenyaniso, uYehova. Ayaluqonda uthando lukaThixo njengoko lubonakaliswe kubomi nakwidini likaYesu. Ayaqonda ukuba uthando lokwenene lobuKristu lubangela ukubakho kobuzalwana obungenakwahlulwa bazwenibanzi—obudlulela ngaphaya kweeyantlukwano zobupolitika, zobuzwe nezobuhlanga. Ngamany’ amazwi, ubuKristu bungaphezu kokuba bobezizwe ngezizwe; budlulela ngaphaya kwemida, igunya okanye izilangazelelo zobuhlanga. Bulugqala uhlanga loluntu njengentsapho enye enokhokho omnye nenoMdali omnye, uYehova uThixo.—IZenzo 17:24-28; Kolose 3:9-11.
7 Ngoxa phantse zonke ezinye iinkonzo ziye zabandakanyeka kwiimfazwe—ekuthi kuzo kubulalane izalamane nabantu ngokubanzi—amaNgqina kaYehova aye abonisa ukuba asixabisa ngokusuk’ entliziyweni isiprofeto sikaIsaya 2:4, esicatshulwe ngaphambilana. Usenokubuza uthi, ‘Kodwa, ayevela phi amaNgqina kaYehova? Uyintoni umsebenzi wawo?’
Uludwe Lwabo Baye Bangqinela UThixo
8, 9. Sisiphi isimemo aye uThixo wasidlulisela kuluntu?
8 Ngaphezu kwama-2 700 eminyaka eyadlulayo, umprofeti uIsaya wakwavakalisa esi simemo silandelayo: “Funani uYehova esenokufunyanwa; mbizeni esekufuphi. Ongendawo makashiye indlela yakhe, indoda enobutshinga mayishiye iingcinga zayo, ibuyele kuYehova: woba nemfesane kuyo; ibuyele kuThixo wethu ngokuba woxolela ngokukhulu.”—Isaya 55:6, 7.
9 Kwiinkulungwane kamva, umpostile uPawulos ongumKristu wacacisela amaGrike aseAtene ‘awayehlonela izithixo [zasentsomini]’ esithi: “Kanjalo [uThixo] wazenza ngagazi-nye zonke iintlanga zabantu, ukuba zime phezu kwawo wonke umhlaba, emisa amaxesha abekwe ngenxa engaphambili, nemida yokuma kwazo; ukuze bayifune iNkosi, ukuba kambe bangaphuthaphutha bayifumane, nakuba ingekude kuthi sonke ngabanye.”—IZenzo 17:22-28.
10. Sazi njani ukuba uThixo wayengekude kuAdam noEva nabantwana babo?
10 Ngokuqinisekileyo uThixo wayengekude kwizidalwa zakhe ezingabantu uAdam noEva. Wathetha nabo ebachazela ngemiyalelo nangeminqweno yakhe. Ngokubhekele phaya, uThixo akazange azifihle koonyana babo uKayin noAbheli. Wamluleka uKayin owayenentiyo xa waba nomona ngenxa yedini elanyuswa ngumntakwabo kuThixo. Noko ke, kunokuba aguqule uhlobo lwakhe lokunqula, uKayin wabonisa umona, nokungazinyamezeli iimbono ezingokonqulo zomntakwabo uAbheli waza wambulala.—Genesis 2:15-17; 3:8-24; 4:1-16.
11. (a) Lithetha ukuthini igama elithi “umfeli-nkolo”? (b) UAbheli waba nguye njani umfeli-nkolo wokuqala?
11 UAbheli, ngokuthembeka kwakhe kuThixo kwada kwasa ekufeni, waba ngumfeli-nkolo.b Kwakhona waba lingqina lokuqala likaYehova nomanduleli kuludwe olude lwamangqina angabagcini bengqibelelo ukuhla ukutyhubela imbali. Ngaloo ndlela uPawulos wakwazi ukuthi: “Ngokholo uAbheli wasondeza kuye uThixo umbingelelo ogqithileyo kunokaKayin, awangqinelwa ngawo ukuba ulilungisa, uThixo wayingqinelayo nje iminikelo yakhe; ngalo ke, efile nje, usathetha.”—Hebhere 11:4.
12. Ngoobani abanye abayimizekelo yamangqina athembekileyo kaYehova?
12 Kwakuloo ncwadi yayisiya kumaHebhere, uPawulos udwelisa uludwe lwamadoda namabhinqa okholo anjengoNowa, uAbraham, uSara noMoses, awathi, ngengxelo yawo yokugcina ingqibelelo, abumba ‘ilifu elikhulu lamangqina [mar·tyʹron, ngesiGrike]’ naye angumzekelo nokhuthazo kwabanye abafuna ukwazi nokukhonza uThixo wenyaniso. Ayengamadoda namabhinqa awayenolwalamano noYehova uThixo. Amfuna aza amfumana.—Hebhere 11:1–12:1.
13. (a) Kutheni le nto uYesu eyimbonakaliso ebalaseleyo yothando lukaThixo? (b) Yiyiphi indlela ekhethekileyo athe uYesu wamisela umzekelo ngayo kubalandeli bakhe?
13 Owayebalasele kuloo mangqina ngulowo uchazwe kwincwadi yeSityhilelo ngokuthi, “UYesu Kristu, oliNgqina elithembekileyo.” UYesu ukwabobunye ubungqina obucacileyo bothando lukaThixo, kuba kunjengokuba uYohane wabhala esithi: “Sibonile thina, siyangqina, ukuba uYise umthumile uNyana ukuba nguMsindisi wehlabathi. Othe wavuma ukuba uYesu unguye uNyana kaThixo, uThixo uhleli kuye, naye uhleli kuye uThixo. Sikwazile thina, sakholwa kukusithanda kukaThixo.” Ekubeni wayezelwe engumYuda, uYesu wayelingqina lokwenyaniso yaye wafa njengomfeli-nkolo othembekileyo kuYise, uYehova. Abalandeli bokwenyaniso bakaKristu ukuhla ukutyhubela izizukulwana babeza kuthi ngokukwanjalo babe ngamangqina akhe nakaThixo wenyaniso, uYehova.—ISityhilelo 1:5; 3:14; 1 Yohane 4:14-16; Isaya 43:10-12; Mateyu 28:19, 20; IZenzo 1:8.
14. Nguwuphi umbuzo ngoku ofuna ukuphendulwa?
14 Isiprofeto sikaIsaya sabonisa ukuba ukubuyela kuThixo wenyaniso, uYehova, kwakuya kwenzeka “ekupheleni kwemihla,” okanye ngexesha ezinye iindinyana zeBhayibhile ezilibiza ngokuba ‘yimihla yokugqibela.’c Ngenxa yeendidi ngeendidi zonqulo nokudideka okungokonqulo esiye sakuchaza kule ncwadi, kuphakama umbuzo wokuba: Ngoobani kule mihla yokugqibela esiphila kuyo abaye bamfuna ngokwenene uThixo wenyaniso, ukuze bamkhonze “ngoMoya nangenyaniso”? Ukuze siphendule loo mbuzo, simele kuqala siphethulele ingqalelo yethu kwiziganeko zenkulungwane ye-19.—Isaya 2:2-4; 2 Timoti 3:1-5; Yohane 4:23, 24.
Ityendyana Lomfana Elalikwiphulo Lokufuna UThixo
15. (a) Wayengubani uCharles Taze Russell? (b) Ngawaphi amanye amathandabuzo angokonqulo awayenawo?
15 Ngonyaka we-1870 ityendyana lomfana elalinenzondelelo, uCharles Taze Russell (1852-1916), laqalisa ukubuza imibuzo emininzi ngeemfundiso ezingokwesithethe zeNgqobhoko. Njengoko wayeselula, wayesebenza kwivenkile kayise yempahla yamadoda kwisixeko sezoshishino saseAllegheny (ngoku esinyinxalenye yePittsburgh), ePennsylvania, eUnited States of America. Imvelaphi yakhe yonqulo yayiseRhabe nakwiCongregational. Phofu ke, wayekhathazwa yimfundiso yokuba ikamva lomntu limiselwa kwangaphambili neyokuthuthunjiswa ngonaphakade kwisihogo somlilo. Ziziphi izizathu ezabangela ukuba azithandabuze ezi mfundiso zisisiseko zeenkonzo ezithile zeNgqobhoko? Wabhala oku: “UThixo owasebenzisa amandla akhe ekudaleni abantu awayebazi kwangaphambili waza wabamisela ikamva lokuba bafanele bathuthunjiswe ngonaphakade, akanakuba sisilumko, engenakuba ngosesikweni okanye onothando. Ebeya kuba kumgangatho ongaphantsi kunowabantu abaninzi.”—Yeremiya 7:31; 19:5; 32:35; 1 Yohane 4:8, 9.
16, 17. (a) Ziziphi iimfundiso ezazizezomdla onzulu kwiqela likaRussell elalifundisisa iBhayibhile? (b) Kukuphi ukungavisisani okukhulu okwavelayo, yaye uRussell wasabela njani?
16 Ngoxa wayesel’ eza kugqiba iminyaka yakhe yeshumi elivisayo, uRussell waqalisa isifundo seBhayibhile seqela seeveki ngeeveki kunye nabanye abafana. Baqalisa ukuhlolisisa iimfundiso zeBhayibhile kweminye imibandela, njengokungafi komphefumlo kwanedini lentlawulelo likaKristu nokuza kwakhe kwesibini. Ngowe-1877, xa wayeneminyaka engama-25, uRussell walishiyela kuyise ishishini labo elalihambela phambili waza waqalisa umsebenzi wokushumayela ixesha elizeleyo.
17 Ngowe-1878 uRussell akazange avisisane kwaphela kunye nelinye lamaqabane akhe, elayigatyayo imfundiso yokuba ukufa kukaKristu kwakunokucamagushela izono. Exhasa ukungavumelani kwakhe noko uRussell wabhala oku: “Ngokufa nokuvuka kwakhe uKristu wafeza izinto ezilungileyo ezahlukahlukeneyo ngenxa yethu. Wafa ngenxa yethu; wafa engosesikweni efela okungekho sikweni—bonke babesenza okungekho sikweni. Ngenxa yobabalo lukaThixo uYesu Kristu wafela bonke abantu. . . . Waba ngumthombo wosindiso lukanaphakade kubo bonke abamthobelayo.” Wahlabela mgama esithi: “Ukuhlawulela kuthetha ukuthenga kwakhona. Yintoni uKristu awayithengela bonke abantu kwakhona? Bubomi. Saphulukana nabo ngenxa yokungathobeli kuka-Adam wokuqala. UAdam wesibini [uKristu] wabuthenga kwakhona ngobomi bakhe.”—Marko 10:45; Roma 5:7, 8; 1 Yohane 2:2; 4:9, 10.
18. (a) Kwaphumela entwenini ukungavisisani ngombandela wentlawulelo? (b) Nguwuphi umzekelo owalandelwa ngaBafundi BeBhayibhile ngokubhekisele kwiminikelo?
18 Ekubeni wayesoloko eyimela ngokungagungqiyo imfundiso esisiseko ephathelele intlawulelo, uRussell wawaqhawula onke amaqhina onxibelelwano kunye neqabane lakhe langaphambili. NgoJulayi 1879, uRussell waqalisa ukupapasha iZion’s Watch Tower and Herald of Christ’s Presence, eyaziwa ehlabathini lonke namhlanje njengeMboniselo—Evakalisa UBukumkani BukaYehova. Ngowe-1881 ekunye namanye amaKristu azahluleleyo, waseka umbutho weBhayibhile ongarhwebiyo. Wawubizwa ngokuba yiZion’s Watch Tower Tract Society, owaziwa namhlanje njengeWatch Tower Bible and Tract Society of Pennsylvania, uthunywashe ongokwasemthethweni omela amaNgqina kaYehova. Kwasekusekweni kwawo, uRussell wagxininisa ukuba kwakungayi kubakho nkongozelo kwiintlanganiso zebandla yaye kwakungazukurhwetywa ngeempapasho zeWatch Tower. Abantu abathelela uRussell kufundisiso olunzulu lweBhayibhile bathi baziwa ngokuqhelekileyo njengaBafundi BeBhayibhile.
Ukubuyela Kwinyaniso YeBhayibhile
19. Ziziphi iimfundiso zeNgqobhoko ezagatywayo ngaBafundi BeBhayibhile?
19 Ngenxa yofundisiso lwabo lweBhayibhile, uRussell namaqabane akhe bazigatya iimfundiso zeNgqobhoko ‘Zoyena Bathathu Emnye Ungcwele’ uyimfihlelo, zomphefumlo womntu ongafiyo ngokwemvelo, nezokuthuthunjiswa ngonaphakade esihogweni somlilo. Kwakhona bayigatya imfuneko yezikolo ezikhethekileyo zokuqeqesha udidi lwabefundisi. Babefuna ukubuyela kwiinkqubo zantlandlolo eziqhelekileyo zobuKristu, ekwakukho kuzo abadala abafanelekayo ngokomoya bokukhokela amabandla bengalindelanga kufumana mvuzo okanye ukuhlawulwa.—1 Timoti 3:1-7; Tito 1:5-9.
20. Yintoni abo Bafundi BeBhayibhile abayifumanisayo ngokuphathelele ipa·rou·siʹa kaKristu nowe-1914?
20 Ekuphengululeni kwabo iLizwi likaThixo, abo Bafundi BeBhayibhile babenomdla omkhulu kwiziprofeto zeZibhalo zamaKristu zesiGrike ezazinokuthanani “nokupheliswa kweli hlabathi” “nokuza” kukaKristu. (Mateyu 24:3, KJ) Ngokuphethukela kwisibhalo sesiGrike, bafumanisa ukuba ‘enyanisweni,’ ukuza, kukaKristu kwakuyi-“pa·rou·siʹa,” okanye ubukho obungabonakaliyo. Ngoko ke, uKristu wayedlulisele kubafundi bakhe inkcazelo engobungqina bobukho bakhe obungabonakaliyo kweli xesha lesiphelo, kungekhona ukuza okubonakalayo kwikamva. Ukongezelela kolu fundisiso, abo bafundi beBhayibhile babenolangazelelo olukhulu lokuqonda ubalo lwamaxesha eBhayibhile ngokuhlobene nobukho bukaKristu. Nakubeni babengaziqondi zonke iinkcukacha, uRussell namaqabane akhe baqonda ukuba owe-1914 wawuya kuba ngunyaka obalulekileyo kwimbali yoluntu.—Mateyu 24:3-22; Luka 21:7-33.
21. Yiyiphi imbopheleleko uRussell namakholwa angoowabo abavakalelwa kukuba babenayo?
21 URussell wayesazi ukuba kwakumele kwenziwe umsebenzi omkhulu wokushumayela. Wayewaphaphele amazwi kaYesu awabhalwa nguMateyu athi: “Zaye ezi ndaba zilungileyo zobukumkani ziya kuvakaliswa kulo elimiweyo liphela, zibe bubungqina kuzo zonke iintlanga; kwandule ke ukufika ukuphela.” (Mateyu 24:14; Marko 13:10) Abo Bafundi BeBhayibhile bangaphambi kowe-1914 babewenza ngokungxamisekileyo lo msebenzi. Babekholelwa ukuba umsebenzi wabo wokushumayela wawuya kufikelela incopho yawo ngaloo nyaka, baza ngenxa yoko bavakalelwa kukuba babefanele bazibhokoxe ngokupheleleyo ekuncedeni abanye ukuba bazi “ezi ndaba zilungileyo zobukumkani.” Ekugqibeleni, iintetho zeBhayibhile zikaC. T. Russell zazipapashwa kumawakawaka amaphephandaba kulo lonke ihlabathi.
Iimvavanyo Neenguqulelo
22-24. (a) Yasabela njani inkoliso yaBafundi BeBhayibhile xa uC. T. Russell wafayo? (b) Ngubani owalandelayo emva koRussell njengomongameli weWatch Tower Society?
22 Ngowe-1916, xa wayeneminyaka engama-64 ubudala, uCharles Taze Russell wafa ngequbuliso ebudeni bohambo lwakhe lokushumayela kwelaseUnited States. Ngoko kwakuza kwenzeka ntoni kuBafundi BeBhayibhile? Ngaba babeza kubhanga ngokungathi babengabalandeli nje bomntu? Babeza kuhlangabezana njani neemvavanyo zeMfazwe Yehlabathi I (1914-18), ekwakusele kumbovu ukuba elaseUnited States libandakanyeke kuyo?
23 Indlela eyasabela ngayo inkoliso yaBafundi BeBhayibhile yaboniswa ngamazwi kaW. E. Van Amburgh, owayeligosa leWatch Tower Society ngelo xesha: “Lo msebenzi mkhulu wehlabathi lonke asingomsebenzi womntu omnye. Mkhulu gqitha ukuba ungasingathwa ngumntu omnye. Ngumsebenzi kaThixo yaye awuguquki. UThixo uye wasebenzisa abakhonzi abaninzi kwixesha elidluleyo ibe ngokungathandabuzekiyo Uya kusebenzisa abaninzi nakwixesha elizayo. Asizinikelanga mntwini, okanye ekwenzeni umsebenzi womntu, kodwa sizinikele ekwenzeni ukuthanda kukaThixo, njengoko Eza kukutyhila kuthi ngeLizwi Lakhe nangokhokelo olungokobuthixo. UThixo usengumalathisi wethu.”—1 Korinte 3:3-9.
24 NgoJanuwari 1917, uJoseph F. Rutherford, owayeligqwetha nomfundi onenzondelelo weBhayibhile, wanyulwa njengomongameli wesibini weWatch Tower Society. Wayeyindoda ekhutheleyo ibe wayengoyiki ngokoyikiswa. Wayesazi ukuba kwakumele kushunyayelwe ngoBukumkani bukaThixo.—Marko 13:10.
Inzondelelo Ehlaziyiweyo Negama Elitsha
25. Abafundi BeBhayibhile basabela njani kucelomngeni lweminyaka yasemva kwemfazwe yehlabathi yokuqala?
25 IWatch Tower Society yalungiselela iindibano eUnited States ngowe-1919 nowe-1922. Emva kwentshutshiso yeMfazwe Yehlabathi I eUnited States, kwaba ngathi yenye iPentekoste kuBafundi BeBhayibhile abambalwa belo xesha. (IZenzo 2:1-4) Kunokuba boyike abantu, bawuphumeza ngamandla angakumbi umyalelo weBhayibhile wokuhamba nowokushumayela kwiintlanga. Ngowe-1919 iWatch Tower Society yavelisa iphephancwadi eliliqabane leMboniselo elalibizwa ngokuba yiThe Golden Age, elaziwa ehlabathini lonke namhlanje njengoVukani! Liye lasebenza njengesixhobo esinamandla sokuvusa abantu ukuze bakuphaphele ukubaluleka kwamaxesha esiphila kuwo nokuze babe nentembelo kwidinga loMdali lehlabathi elitsha loxolo.
26. (a) Yiyiphi imbopheleleko aBafundi BeBhayibhile abayigxininisa ngakumbi nangakumbi? (b) Kukuphi ukuqonda okucace ngakumbi kweBhayibhile okwafunyanwa ngaBafundi BeBhayibhile?
26 Ebudeni beminyaka yee-1920 neyee-1930, aBafundi BeBhayibhile banamathela ngakumbi nangakumbi kwinkqubo yamaKristu okuqala yokushumayela—kwindlu ngendlu. (IZenzo 20:20) Kholwa ngalinye lalinembopheleleko yokunikela ubungqina kubantu abaninzi kangangoko kunokwenzeka ngokuphathelele ulawulo lukaKristu loBukumkani. Babona ngokucacileyo ngokusuka eBhayibhileni ukuba imbambano enkulu olwalujamelene nayo uluntu yayiyeyolongamo lwendalo iphela ibe yayiza kuzinziswa ngokuthi uYehova uThixo atshabalalise uSathana nabo bonke oothunywashe bakhe bokonakalisa umhlaba. (Roma 16:20; ISityhilelo 11:17, 18) Ngokomongo wale mbambano, kwaye kwaqondwa ukuba ukusindiswa komntu kwakungabalulekanga ngaphezu kokuthethelelwa kukaThixo njengoMongami onelungelo lokulawula indalo iphela. Ngoko ke, kwakumele kubekho emhlabeni amangqina athembekileyo akulungeleyo ukunikela ubungqina ngeenjongo nangolongamo lukaThixo. Le mfuneko yazalisekiswa njani?—Yobhi 1:6-12; Yohane 8:44; 1 Yohane 5:19, 20.
27. (a) Sisiphi isiganeko esibalulekileyo esenzeka ngowe-1931? (b) Ziziphi ezinye zeenkolelo eziwenza ahluke amaNgqina?
27 NgoJulayi 1931, aBafundi BeBhayibhile baba nendibano eColumbus, eOhio, ekwathi ebudeni bayo amawaka awayekho amkela isigqibo. Kuso amkela ngovuyo “igama elavakaliswa ngumlomo weNkosi uThixo,” yaye avakalisa oku: “Sinqwenela ukwaziwa nokubizwa ngelo gama, elithi, ‘amaNgqina kaYehova.’” Ukususela ngolo suku, amaNgqina kaYehova aye aziwa ehlabathini lonke kungekhona nje kuphela ngenxa yeenkolelo zawo ezahlukileyo kodwa kwakhona ngenxa yenzondelelo yawo kubulungiseleli bendlu ngendlu nobasesitratweni. (Bona iphepha 356-7.)—Isaya 43:10-12; Mateyu 28:19, 20, IZenzo 1:8.
28. Kukuphi ukuqonda okucace ngakumbi okwafunyanwa ngamaNgqina ngowe-1935 ngokubhekisele kulawulo loBukumkani?
28 Ngowe-1935 amaNgqina, aluqonda ngokucacileyo udidi loBukumkani basezulwini, oluza kulawula noKristu nabalawulwa balo basemhlabeni. Ayesele esazi ukuba inani lamaKristu athanjisiweyo awayefumene ubizo lokulawula noKristu emazulwini laliza kuba li-144 000 kuphela. Ngoko, laliza kuba yintoni ithemba lalo lonke olunye uluntu? Urhulumente kufuneka abe nabalawulwa bokuthethelela ukufaneleka kwakhe. Lo rhulumente wasezulwini, obuBukumkani, naye wayeza kuba nezigidi zabalawulwa abathobekileyo apha emhlabeni. Babeza kuba ‘sisihlwele esikhulu, ekungekho namnye unako ukusibala, siphuma kuzo zonke iintlanga, nezizwe, nabantu, neelwimi,’ sidanduluka sisithi: “Usindiso kuye uThixo wethu [uYehova], lowo uhleli phezu kwetrone, nakuyo iMvana [uKristu Yesu]!”—ISityhilelo 7:4, 9, 10; 14:1-3; Roma 8:16, 17.
29. Luluphi ucelomngeni awathi amaNgqina aluqonda aza alwamkela?
29 Oku kuqonda okuphathelele isihlwele esikhulu kwawanceda amaNgqina kaYehova ukuba abone ukuba ayenocelomngeni olukhulu phambi kwawo—ukufumana nokufundisa zonke ezo zigidi ezazifuna uThixo wenyaniso nezaziya kubumba “isihlwele esikhulu.” Oko kwakuya kubandakanya iphulo lokufundisa kwizizwe ngezizwe. Kwakuya kufuna izithethi nabalungiseleli abaqeqeshiweyo. Kwakuza kufuneka izikolo. Konke oku kwacingwa ngumongameli owalandelayo weWatch Tower Society.
Iphulo Lazwenibanzi Lokufuna Abo Bafuna UThixo
30. Ziziphi iziganeko zeminyaka yee-1930 neyee-1940 ezachaphazela amaNgqina?
30 Ngowe-1931 kwakukho amaNgqina angaphantsi kwama-50 000 kumazwe angaphantsi kwama-50. Iziganeko zeminyaka yee-1930 neyee-1940 zawatsalisa nzima ekushumayeleni kwawo. Ngelo xesha kwavela ubuFasi nobuNazi kwaza kwaqhambuka iMfazwe Yehlabathi II. Ngowe-1942 uJ. F. Rutherford wafa. IWatch Tower Society yayiza kufuna ukhokelo olunamandla ukuze amaNgqina kaYehova abe nenzondelelo engakumbi ekushumayeleni.
31. Yintoni eyaqalisa ukusebenza ngowe-1943 ukuze kwandiswe ukushunyayelwa kweendaba ezilungileyo?
31 Ngowe-1942, xa wayeneminyaka engama-36 ubudala, uNathan H. Knorr wanyulwa ukuba abe ngumongameli wesithathu weWatch Tower Society. Wayengumququzeleli okhutheleyo owayeyiqonda ngokucacileyo imfuneko yokukhuthaza ukushunyayelwa kweendaba ezilungileyo kulo lonke ihlabathi ngokukhawuleza kangangoko kunokwenzeka, nakubeni iintlanga zazisabandakanyeke kwiMfazwe Yehlabathi II. Ngenxa yoko, waseka ngoko nangoko isikolo sokuqeqesha abavangeli basemazweni, esabizwa ngokuba siSikolo SeBhayibhile seWatchtower saseGiliyadi.d Abafundi abalikhulu bokuqala, bonke ababengabalungiseleli bexesha elizeleyo, babhalisa ngoJanuwari 1943. Babefundisisa ngenkuthalo iBhayibhile neminye imibandela yobulungiseleli ehlobene nayo phantse ithuba elingangeenyanga ezintandathu ngaphambi kokuthunyelwa kwizabelo zabo, ubukhulu becala ezazikumazwe angaphandle. Ukuza kuthi ga ngowe-1990, kuye kwaphumelela iiklasi ezingama-89, ibe kuye kwathunyelwa abalungiseleli abangamawakawaka ukusuka eGiliyadi ukuya kukhonza kulo lonke ihlabathi.
32. Yiyiphi inkqubela eye yenziwa ngamaNgqina kaYehova ukususela ngowe-1943?
32 Ngowe-1943 kwakukho amaNgqina ali-126 329 kuphela awayeshumayela kumazwe angama-54. Phezu kwayo nje inkcaso yenkohlakalo yobuNazi, yobuFasi, yobuKomanisi neyoMbutho wobuKatolika kwanaleyo yoko kwakufane kubizwe ngokuba lulawulo-melo ebudeni beMfazwe Yehlabathi II, ngowe-1946 amaNgqina kaYehova ayefikelele incopho yabavakalisi boBukumkani abangaphezu kwe-176 000. Kwiminyaka engamashumi amane anesine kamva, kubekho phantse abazizigidi ezine abakhutheleyo kumazwe, kwiziqithi nakwimimandla engaphezu kwama-200. Ngaphandle kwamathandabuzo, ukufaniswa kwabo ngokucacileyo ngegama nangezenzo kuye kwaba negalelo ekubenzeni baziwe ehlabathini lonke. Kodwa kukho abanye oothunywashe ababandakanyekileyo abaye bakuphembelela ngamandla ukusebenza kwabo ngenzondelelo.—Zekariya 4:6.
Ukulungelelaniswa Kwemfundo YeBhayibhile
33. Kutheni le nto amaNgqina kaYehova eneeHolo zoBukumkani?
33 AmaNgqina kaYehova aba neentlanganiso zeeveki ngeeveki zokufundisisa iBhayibhile kwiiHolo zawo zoBukumkani ntlanganiso ezo eziqhutywa kumabandla angaphezu kwama-60 000 emhlabeni wonke. Ezi ntlanganiso azisekelwanga kwisithethe okanye kwimvakalelo kodwa zisekelwe ekuzuzeni ulwazi oluchanileyo lukaThixo, lweLizwi lakhe, nolweenjongo zakhe. Ngoko ke, amaNgqina kaYehova ayahlanganisana izihlandlo ezithathu ngeveki ukuze andise ulwazi lwawo lweBhayibhile nokuze afunde indlela yokushumayela neyokufundisa isigidimi sayo kwabanye.—Roma 12:1, 2; Filipi 1:9-11; Hebhere 10:24, 25.
34. Iyintoni injongo yeSikolo Sobulungiseleli Sobuthixo?
34 Ngokomzekelo, intlanganiso yaphakathi evekini iquka iSikolo Sobulungiseleli Sobuthixo, ekuthi kuso kubhalise amalungu ebandla. Esi sikolo, esonganyelwa ngumdala ongumKristu ofanelekileyo, siqeqesha amadoda, abafazi nabantwana kubuchule bokufundisa nobokuthetha ngokutyibilikayo xa bexubusha ngemigaqo yeBhayibhile. Umpostile uPawulos wathi: “Ukuthetha kwenu makuhlale kumnandi, kuvakaliswe ngetyuwa, ukuze nazi ukuba nimelwe kukuthini na ukuphendula bonke ngabanye.” Kwiintlanganiso zawo zamaKristu, amaNgqina akwafunda indlela yokuvakalisa isigidimi soBukumkani “ngobulali nangentlonelo enzulu.”—Kolose 4:6; 1 Petros 3:15, NW.
35. Ziziphi ezinye iintlanganiso aba nazo, amaNgqina yaye zinaziphi iingenelo?
35 Kwakhona, ngosuku olwahlukileyo, amaNgqina ayahlanganisana ukuze anandiphe intetho yeBhayibhile yemizuzu engama-45 elandelwa kukuqwalasela kwebandla (ngemibuzo neempendulo) umxholo weBhayibhile ohlobene nemfundiso okanye ihambo yamaKristu okuthabatha iyure enye. Amalungu ebandla akhululekile ukuba anganenxaxheba. Kwakhona nyaka ngamnye amaNgqina aba neentlanganiso ezinkulu ezintathu, iindibano zosuku olunye ukuya kwiintsuku ezine, ekuthi kuzo ngokuqhelekileyo kuhlanganisane amawaka ukuza kuphulaphula iintetho zeBhayibhile. Ngenxa yezi ntlanganiso zesisa kwakunye nezinye, Ngqina ngalinye liyalwandisa ulwazi lwalo ngamadinga kaThixo ngalo mhlaba nangoluntu yaye likwafumana imfundo ebalaseleyo engehambo yomKristu yokuziphatha. Umntu ngamnye usondezwa kuThixo wenyaniso, uYehova, ngokulandela iimfundiso nomzekelo kaKristu Yesu.—Yohane 6:44, 65; 17:3; 1 Petros 1:15, 16.
Alungelelaniswe Njani AmaNgqina?
36. (a) Ngaba amaNgqina analo udidi lwabefundisi abahlawulwayo? (b) Ngoko, ngoobani abakhokelayo ebandleni?
36 Ngokusengqiqweni, ukuba amaNgqina kaYehova aba neentlanganiso yaye alungelelaniselwe ukushumayela, kumele kubekho umntu othile okhokelayo. Phofu ke, awanalo udidi oluhlawulwayo lwabefundisi ibe engenayo nenkokeli ebabalwe ngomoya nekwisigxina esiphakamileyo. (Mateyu 23:10) UYesu wathi: “Namkéle ngesisa, yiphani ngesisa.” (Mateyu 10:8; IZenzo 8:18-21) Kwibandla ngalinye, kukho abadala nezicaka zolungiselelo ezifanelekayo ngokomoya, abaninzi babo bayaphangela yaye banyamekela intsapho, abathi ngokuzithandela banikele ukhokelo ekufundiseni nasekwalathiseni ibandla. Lo ngumzekelo ofana ncam nalowo wamiselwa ngamaKristu enkulungwane yokuqala.—IZenzo 20:17; Filipi 1:1; 1 Timoti 3:1-10, 12, 13.
37. Bamiselwa njani abadala nezicaka zolungiselelo?
37 Bamiselwa njani aba badala nezicaka zolungiselelo? Ukumiselwa kwabo kwalathiswa liqumrhu elilawulayo labadala abathanjisiweyo bamazwe awahlukahlukeneyo nabasebenza ngendlela efanayo neyequmrhu labapostile nabadala baseYerusalem ababekhokela kwibandla lamaKristu okuqala. Njengoko sibonile kwiSahluko 11, akukho namnye umpostile owayongamile kunabanye. Babefikelela kwizigqibo zabo njengequmrhu, ibe ezo zigqibo zazihlonelwa ngamabandla awayesasazeke kuyo yonke iRoma yamandulo.—IZenzo 15:4-6, 22, 23, 30, 31.
38. Lisebenza njani iQumrhu Elilawulayo?
38 IQumrhu Elilawulayo lamaNgqina kaYehova lisebenzisa kwailungiselelo elifanayo namhlanje. Liba neentlanganiso zeeveki ngeeveki kwikomkhulu lalo lehlabathi eBrooklyn, eNew York, kuze ukusuka apho kuthunyelwe imiyalelo kwiiKomiti zamaSebe ezikulo lonke ihlabathi nezongamela umsebenzi wobulungiseleli kwilizwe ngalinye. Ngokulandela umzekelo wamaKristu okuqala, amaNgqina kaYehova aye akwazi ukugubungela imimandla emikhulu yomhlaba ngokushumayela iindaba ezilungileyo zoBukumkani bukaThixo. Loo msebenzi uyaqhubeka usenziwa kwihlabathi lonke.—Mateyu 10:23; 1 Korinte 15:58.
Abantu Bayathontelana Ukuya KuThixo Wenyaniso
39. (a) Kutheni le nto amaNgqina esiba ngoondilele kwimicimbi yezobupolitika? (b) Aye anda kangakanani amaNgqina ebudeni bokuvalwa komsebenzi?
39 Ebudeni benkulungwane yama-20, amaNgqina kaYehova aye anda kakhulu kuwo wonke umhlaba. Oku kuye kwenzeka kwanakumazwe apho umsebenzi wawo ubuvaliwe khona. Oku kuvalwa komsebenzi bekunyanzeliswa ubukhulu becala ngabalawuli ababengasiqondi isimo sengqondo sobundilele samaNgqina kaYehova ngokuphathelele ukungabi nanxaxheba kwawo kwimicimbi yezobupolitika neyobuhlanga kweli hlabathi. (Bona ibhokisi, kwiphepha 347.) Kanti, kuloo mazwe, amashumi amawaka abantu aye aphethukela kuBukumkani bukaThixo njengobukuphela kwethemba lokwenene loxolo nonqabiseko loluntu. Kumazwe amaninzi kuye kwanikelwa ubungqina obaneleyo, ibe ngoku kukho izigidi zamaNgqina akhutheleyo kuyo yonke indawo. Bona isicangca, kwiphepha 361.
40, 41. (a) Yintoni ngoku amaNgqina kaYehova ayilindeleyo? (b) Nguwuphi umbuzo osamele uphendulwe?
40 Ngenxa yothando lwawo lobuKristu nethemba lawo ‘lezulu elitsha nomhlaba omtsha,’ amaNgqina kaYehova akhangele kwixesha elizayo elingekude xa kuya kwenzeka iziganeko ezigungqisa ihlabathi ezimele kwakamsinya ziphelise konke okungekho sikweni, ukonakala nobungendawo obukhoyo kulo mhlaba. Ngenxa yeso sizathu aza kuqhubeka etyelela abamelwane bawo esenza umgudu ozingisileyo wokusondeza abo bantliziyo zinyanisekileyo kuThixo wenyaniso, uYehova.—ISityhilelo 21:1-4; Marko 13:10; Roma 10:11-15.
41 Ngeli thuba, ngokwesiprofeto seBhayibhile, ikamva lilufumbathele ntoni uluntu, unqulo nalo mhlaba ungcolisiweyo? Isahluko sethu sokugqibela siza kuwuphendula loo mbuzo ubalulekileyo.—Isaya 65:17-25; 2 Petros 3:11-14.
[Imibhalo esemazantsi]
a Ezi zivakalisi zibini zokugqibela zifumaneka kwi-“Isaiah Wall” ngaphambi kwezakhiwo zeZizwe Ezimanyeneyo nakumfanekiso oqingqiweyo okwimiyezo yeZizwe Ezimanyeneyo, ibe enyanisweni, ukuzaliseka kwazo kuyenye yeenjongo zeZizwe Ezimanyeneyo.
b Igama lesiGrike elithi marʹtyr, elithatyathwe kulo igama lesiNgesi elithi “martyr” (“umfeli-nkolo”) (“ubani onikela ubungqina ngokufa kwakhe,” An Expository Dictionary of New Testament Words, nguW. E. Vine), ngokoqobo lithetha “ubungqina” (“ubani ongqinela, okanye onokungqinela, oko yena ubuqu aye wakubona okanye wakuva okanye wakwazi ngandlel’ ithile,” A Greek-English Lexicon of the New Testament, nguJ. H. Thayer).
c Ukuze ufumane ukuqwalaselwa ngokweenkcukacha ‘kwemihla yokugqibela,’ bona incwadi ethi Unokuphila Ngonaphakade KwiParadisi Esemhlabeni, epapashwe yiWatchtower Bible and Tract Society of New York, Inc., ngowe-1982, isahluko 18.
d Igama elithi Giliyadi, lithatyathwe kwelesiHebhere elithi Gal·ʽedhʹ, elithetha “Imfumba Ebubungqina.” Bona kwaneInsight on the Scriptures, Umqulu 1, iphepha 882, 942.—Genesis 31:47-49.
[Ibhokisi ekwiphepha 347]
Ubundilele BamaKristu KwiRoma YobuHedeni
Ngokuvisisana nemigaqo yothando noxolo eyafundiswa nguYesu, neyayisekelwe kufundisiso lwawo lobuqu lweLizwi likaThixo, amaKristu okuqala ayengenanxaxheba kwiimfazwe okanye kuqeqesho lwazo. UYesu wayethe: “Ubukumkani bam asibubo obeli hlabathi; ukuba bebububo obeli hlabathi ubukumkani bam, amakhonza am ange ezama, ukuze ndinganikelwa kumaYuda; ngoku ke ubukumkani bam asibobalapha.”—Yohane 18:36.
Kamva ngowama-295 C.E., uMaximilianus waseTheveste, unyana wejoni elaliligqala kubukhosi baseRoma, wabizelwa emkhosini. Xa umphathi wamajoni wambuza igama lakhe, waphendula wathi: “Ngoku, kutheni wafuna ukwazi igama lam? Isazela sam asindivumeli ukuba ndiye emkhosini: NdingumKristu. . . . Andinakuya emkhosini; andinakona ngokunxamnye nesazela sam.” Lo mphathi wamajoni wamlumkisa ngelokuba wayeza kuphulukana nobomi bakhe ukuba wayengathobeli. “Andizukuya emkhosini. Nokuba ningandinqumla intloko, kodwa andisayi kuwakhonza amagunya Eli Hlabathi; ndiza kukhonza uThixo wam.”—An Historian’s Approach to Religion, nguArnold Toynbee.
Kumaxesha anamhlanje, ufundisiso lobuqu lweBhayibhile luye lwashukumisela amaNgqina kaYehova emhlabeni wonke ukuba alulamele izazela zawo ekulandeleni ikhondo elifanayo. Kwamanye amazwe amaninzi awo aye aphulukana nobomi bawo, ngokukodwa kwiJamani yamaNazi, apho athi adutyulwa, axhonywa, aza anqunyulwa iintloko ebudeni beMfazwe Yehlabathi II. Kodwa umanyano lwawo lwazwenibanzi, olusekelwe kuthando lobuKristu, aluzange luphele. Akukho namnye owakhe wafa emfazweni ngokubulawa ngomnye wamaNgqina kaYehova angamaKristu. Hayi indlela ebiya kwahluka ngayo imbali yehlabathi ukuba mntu ngamnye ozibanga engumKristu ebekwathobela umthetho kaKristu wothando!—Roma 13:8-10; 1 Petros 5:8, 9.
[Ibhokisi ekwiphepha 356, 357]
Oko AmaNgqina KaYehova Akukholelwayo
Umbuzo: Uyintoni umphefumlo?
Impendulo: EBhayibhileni umphefumlo (neʹphesh, ngesiHebhere; psy·kheʹ, ngesiGrike) ngumntu okanye isilwanyana okanye ubomi umntu okanye isilwanyana esibuphilayo.
“Wathi uThixo, Umhlaba mawuphume imiphefumlo ephilileyo ngohlobo lwayo: izinto ezizitho zine, nezinambuzane, nezinto eziphilileyo zomhlaba ngohlobo lwazo. UYehova uThixo wambumba umntu ngothuli lwasemhlabeni, waphefumlela emathatheni akhe impefumlo yobomi; umntu ke waba ngumphefumlo ophilileyo.”—Genesis 1:24; 2:7.
Izilwanyana nabantu BAYIMIPHEFUMLO ephilileyo. Umphefumlo awuyonto ezimele geqe. Unako ukufa yaye uyafa. “Yabonani, yonke imiphefumlo yeyam; umphefumlo woyise unjengomphefumlo wonyana, yeyam yomibini; umphefumlo owonayo, kuya kufa wona.”—Hezekile 18:4.
Umbuzo: Ngaba uThixo unguBathathu Emnye?
Impendulo: AmaNgqina kaYehova akholelwa ukuba uYehova uyiNkosi enguMongami wendalo iphela ongenakulinganiswa nanto. “Yiva, Sirayeli: uYehova uThixo wethu nguYehova mnye.” (Duteronomi 6:4) UKristu Yesu njengoLizwi wayesisidalwa somoya waza weza emhlabeni ngokuthobela ukuthanda kukaYise. Ungaphantsi kukaYehova. “Xa ke zithe zathotyelwa phantsi kwakhe [uKristu] zonke izinto, uya kwandula noNyana ngokwakhe athotyelwe phantsi kwalowo wazithobela phantsi kwakhe zonke izinto, ukuze uThixo abe zizinto zonke kubo bonke.”—1 Korinte 15:28; bona kwanoMateyu 24:36; Marko 12:29; Yohane 1:1-3, 14-18; Kolose 1:15-20.
Umoya oyingcwele ungamandla kaThixo asebenzayo, kungekhona umntu.—IZenzo 2:1-4, 17, 18.
Umbuzo: Ngaba amaNgqina kaYehova anqula okanye ahlonela izithixo?
Impendulo: AmaNgqina kaYehova awaqheliseli naluphi na uhlobo lokunqula izithixo, enoba luquka imifanekiso eqingqiweyo, abantu okanye iintlangano ezithile.
“Siyazi ukuba akukho nto isisithixo ehlabathini; siyazi ukuba mnye kwaphela uThixo, akukho wumbi. Kuba kambe, nokuba kukho ekuthiwa bangoothixo, nokuba kusezulwini, nokuba kuphezu komhlaba (kwanjengokuba kukho oothixo abaninzi, neenkosi ezininzi), kuthi thina mnye uThixo, uYise, eziphuma kuye izinto zonke; nathi sikholo yena. Inye iNkosi, uYesu Kristu, ezingayo zonke izinto; nathi singaye.”—1 Korinte 8:4-6; bona kwaneNdumiso 135:15-18.
Umbuzo: Ngaba amaNgqina kaYehova ayalibhiyozela idini leMisa okanye uMthendeleko?
Impendulo: AmaNgqina kaYehova awakholelwa kwimfundiso yokuba isonka newayini ziyaguqulwa zibe ngumzimba negazi lokoqobo likaYesu, njengokuba oko kuyimfundiso yeRoma Katolika. Ayasibhiyozela iSidlo SeNkosi Sangokuhlwa ngosuku olungqamana noNisan 14 wamaYuda (oludla ngokuba ngoMatshi okanye ngoAprili) njengesikhumbuzo saminyaka le sokufa kukaKristu. Kule ntlanganiso ahambisa ebandleni isonka esingenagwele newayini ebomvu njengomfuziselo womzimba ongenasono kaKristu negazi lentlawulelo. Kuphela ngabo banethemba lokulawula kunye noKristu kuBukumkani basezulwini abathabathayo kwimifuziselo.—Marko 14:22-26; Luka 22:29; 1 Korinte 11:23-26; ISityhilelo 14:1-5.e
[Imifanekiso]
AmaNgqina kaYehova ahlanganisana rhoqo kwiiHolo zoBukumkani ukuze afundisise iBhayibhile
IiHolo zoBukumkani: KwisiXeko saseIchihara, eJapan (kwiphepha elandulelayo), naseBoituva, eBrazil
[Umbhalo osemazantsi]
e Ukuze ufumane ukuqwalaselwa ngokweenkcukacha kwalo mbandela, bona incwadi ethi Ukuqiqa NgeZibhalo, epapashwe yiWatchtower Bible and Tract Society of New York Inc., ngowe-1985, iphepha 346-50; 329-33.
[Isicangca esikwiphepha 361]
Amazwe Athile Ashumayela Kuwo AmaNgqina
Ilizwe AmaNgqina Anenzondelelo
IArgentina 79 000
IOstreliya 51 000
IBrazil 267 000
IBritani 117 000
IKhanada 98 000
IColombia 42 000
IEl Salvador 18 000
IFinland 17 000
IFransi 109 000
Intshona Jamani 129 000
IGrisi 24 000
IHungary 10 000
I-Indiya 9 000
I-Itali 172 000
IJapan 138 000
IKorea 57 000
ILebhanon 2 500
IMexico 277 000
INigeria 137 000
IiPhilippines 102 000
IPoland 91 000
IPortugal 36 000
IPuerto Rico 24 000
UMzantsi Afrika 46 000
ISpeyin 78 000
IU.S.A. 818 000
IVenezuela 47 000
IZambia 72 000
Kwangama-36 umsebenzi uvaliwe 220 000
Amanani Ehlabathi ngowe-1989 Amabandla Angama-60 192
AmaNgqina Angama-3 787 000
[Imifanekiso ekwiphepha 346]
Kumfanekiso oqingqiweyo weZizwe Ezimanyeneyo kukho umbhalo othi: “Siya kuwakhanda amakrele ethu abe ngamakhuba”; esi sicatshulwa seBhayi-bhile sibhalwe kwi-“Isaiah Wall”
[Umfanekiso okwiphepha 351]
AmaNgqina kaYehova akholelwa kwidini lentlawulelo likaKristu lokuxolelwa kwezono zoluntu
[Imifanekiso ekwiphepha 363]
IiHolo zeeNdibano zamaNgqina kaYehova: Umfanekiso othatyathwe phezulu weholo yaseMpuma Pennines, eNgilani
IHolo yeNdibano, eFort Lauderdale, eFlorida, eUnited States of America, esetyenziselwa ucwangci-so lwesiNgesi, lwesi-Spanish nolwesiFrentshi
[Imifanekiso ekwiphepha 364]
IKomkhulu Lehlabathi leWatch Tower Society, eBrooklyn, eNew York; (ukususela ekhohlo phezulu) iiofisi, imizi-mveliso namagumbi okuhlala (iinxalenye eziqaqambileyo zomfanekiso)
[Imifanekiso ekwiphepha 365]
Iiofisi zamaSebe eWatch Tower (ukususela ngasentla ekhohlo) yeyaseMzantsi Afrika, eyaseSpeyin neyaseNew Zealand