Isahluko 3

Umlungiseleli Wendlela Uyazalwa

UELIZABHETE phantse sele ekulungele ukuba nomntwana. Ngezi nyanga zintathu zidlulileyo, uMariya ebehlala kunye naye. Kodwa ngoku lifikile ixesha lokuba uMariya amshiye aze athabathe uhambo olude lokugoduka esinge eNazarete. Malunga neenyanga ezintandathu naye uza kuba nomntwana.

Kungekudala uMariya ehambile, uElizabhete uyazala. Hayi indlela ekuluvuyo ngayo kuba ezala kakuhle ibe uElizabhete nosana besempilweni! Xa uElizabhete ebonisa abamelwane nezalamane usana, bonke bavuyisana naye.

Ngokutsho koMthetho kaThixo, ngosuku lwesibhozo emva kokuzalwa kwakhe, umntwana oyinkwenke kwaSirayeli umele aluswe. Ngesi sihlandlo abahlobo nezalamane bayeza ukuza kumtyelela. Bathi le nkwenkwe ifanele ithiywe igama likayise, uZekariya. Kodwa uElizabhete akavumi. Uthi: “Hayi; uya kubizwa ngokuba nguYohane.” Khumbula, elo ligama isithunywa sezulu esinguGabriyeli esathi lifanele linikwe umntwana.

Noko, abahlobo babo bayala besithi: “Akukho namnye ubizwa ngelo gama kwimizalwane yakho.” Ngoko ke, bethetha ngemiqondiso, babuza uyise ukuba ufuna libe ngubani na igama lale nkwenkwe. Ecela ukuba anikwe icwecwana lokubhala uZekariya ubhala athi, “Igama lakhe nguYohane,” nto leyo ebamangalisayo bonke.

Akutsho, ngokungummangaliso uZekariya uphinda akwazi ukuthetha. Uya kukhumbula ukuba akazange akwazi ukuthetha ukususela oko wayengazange asikholelwe isaziso sesithunywa sezulu sokuba uElizabhete wayeza kuba nomntwana. Kaloku, xa uZekariya ethetha, bonke abo bahlala elumelwaneni bayamangaliswa baze bazithethele besithi: “Azi uya kuba yintoni na lo mntwana? ”

Ngoku uZekariya uzaliswa ngumoya oyingcwele, yaye udanduluka athi: “Mayibongwe iNkosi, uThixo kaSirayeli, ngokuba ibavelele yabakhulula ngentlawulelo abantu bayo. Yasiphakamisela uphondo losindiso endlwini kaDavide, umkhonzi wayo.” Kambe ke, olu “phondo losindiso,” yiNkosi uYesu, oseza kuzalwa. Ngaye, uZekariya uthi, uThixo uya “kusinika ukuba sithi, sihlangulwe esandleni seentshaba zethu, siyikhonze singenakoyika, ngobungcwele nangobulungisa emehlweni ayo, yonke imihla yobomi bethu.”

Wandula ke uZekariya ngokubhekisele kunyana wakhe, uYohane axele kusengaphambili esithi: “Nawe, mntwana, uya kubizwa ngokuba ungumprofeti wOsenyangweni, kuba uya kuhamba phambi kobuso beNkosi, ulungise iindlela zayo, ukuze ubanike abantu bayo ukwaziwa kosindiso ngoxolelo lwezono zabo, ngenxa yenceba nemfesane yoThixo wethu, othe ngaye wasivelela umso wasenyangweni, ukuba ukhanye kwabo bahleliyo emnyameni, nasethunzini lokufa, ukuba uzingenise iinyawo zethu endleleni yoxolo.”

Ngeli xesha uMariya, ekucaca ukuba uselibhinqa elingatshatanga, ufikile kowabo eNazarete. Kuza kwenzeka ntoni kuye xa kucaca ukuba ukhulelwe? Luka 1:56-80; Levitikus 12:2, 3.

▪ UYohane umdala kangakanani kuYesu?

▪ Ziziphi izinto ezenzekayo xa uYohane eneentsuku ezisibhozo ubudala?

▪ UThixo uyiguqulele njani ingqalelo yakhe kubantu bakhe?

▪ Nguwuphi umsebenzi ekuxelwa kusengaphambili ukuba uYohane wayeza kuwenza?