Imibuzo Evela Kubafundi

Ngaba uMariya owaba ngunina kaYesu wayesele ekhulelwe xa wayetyelela isalamane sakhe uElizabhete?

Ewe, ubungqina bubonisa njalo.

KuLuka isahluko 1, okokuqala sifunda ngokukhulelwa kukaElizabhete, umfazi wombingeleli uZekariya, owazala uYohane (uMbhaptizi). Xa uElizabhete ‘wayekwinyanga yesithandathu, isithunywa esinguGabriyeli’ satyelela uMariya ukuze simazise ukuba wayeza kukhulelwa azale “uNyana wOsenyangweni.” (Luka 1:26, 30-33) Kodwa wakhulelwa nini uMariya?

Ingxelo kaLuka ihlabela mgama ibalisa ukuba emva koko uMariya waya kwaYuda etyelela isalamane sakhe esikhulelweyo uElizabhete. Athi akudibana la mabhinqa mabini, imveku esesizalweni sikaElizabhete (uYohane) yaxhuma. UElizabhete wabhekisela ‘kwisiqhamo sesizalo sikaMariya,’ waza wabiza uMariya ngokuthi “unina weNkosi yam.” (Luka 1:39-44) Ngoko ke isigqibo esisengqiqweni sesokuba uMariya wayesele ekhawule, kwanokuba wayekhulelwe xa waya kubona uElizabhete.

ULuka 1:56 ufundeka ngolu hlobo: “Wahlala ke uMariya naye iinyanga ngathi zaba ntathu, waza wabuyela ekhaya.” Le ndinyana ayichazi inani leentsuku elithe ngqo ngokwekhalenda. Ithi “iinyanga ngathi zaba ntathu,” okwakuza kwenza ukuba uElizabhete abe kwinyanga yesithoba ekhulelwe.

Emva kokuba ebe luncedo kuElizabhete ebudeni beenyanga zokugqibela zokukhulelwa kwakhe, uMariya wabuyela ekhayeni lakhe eNazarete. Kunokwenzeka ukuba uMariya waqonda ukuba xa uElizabhete ezele (uYohane), kwakusenokubakho iindwendwe ezininzi, kude kubekho nezalamane zakhe. Oko kwakunokuba ziintloni kwibhinqa eliselula elingatshatanga nelikhulelweyo. Wayenexesha elingakanani ekhulelwe uMariya xa wayebuyela eNazarete? Ekubeni wayekunye noElizabhete “iinyanga ngathi zaba ntathu,” kunokwenzeka ukuba uMariya wayengasekupheleni kwenyanga yesithathu okanye ekuqaleni kwenyanga yesine ekhulelwe xa wabuyela eNazarete.—Akekeliswe sithi.