Isahluko 24

Isizathu Sokuza KukaYesu Emhlabeni

UYESU nabafundi bakhe abane bebenosuku oluxakeke gqitha eKapernahum, luphela ngalo ngokuhlwa abantu baseKapernahum besizisa bonke abagulayo babo ukuba baphiliswe. Akukhange kubekho xesha lokuba abe yedwa.

Ngoku kusekuseni ngentsasa elandelayo. Ngoxa kusemnyama, uYesu uyavuka aze aphumele ngaphandle eyedwa. Uya kwindawo eyodwa apho anokuthandaza kuYise emfihlekweni. Kodwa ukuba yedwa kukaYesu akuthathi thuba lide kuba xa uPetros nabanye beqonda ukuba akakho, bayaphuma ukuya kumfuna.

Xa bemfumana uYesu, uPetros uthi: “Bonke bayakufuna.” Abantu baseKapernahum bafuna ukuba uYesu ahlale nabo. Bakuxabisa ngokwenene oko abenzele kona! Kodwa ngaba uYesu weza emhlabeni ngokuyintloko ukuza kwenza loo mimangaliso yokuphilisa? Uthini ngako oku?

Ngokwenye ingxelo yeBhayibhile, uYesu ubaphendula abafundi bakhe athi: “Masihambe siye emizini ekufuphi, ukuze nakhona ndivakalise iindaba ezilungileyo, kuba ndiphumele oko.” Nakubeni abantu bembongoza uYesu ukuba ahlale, ubaxelela oku: “Ndimelwe kukuba ndizishumayele iindaba ezilungileyo zobukumkani bukaThixo nakweminye imizi, ngokuba ndithunywe oko.”

Ewe, uYesu weza emhlabeni ngokukodwa ukuza kushumayela ngoBukumkani bukaThixo, obuya kuthethelela igama likaYise buze ngokusisigxina bucombulule zonke iingxaki zabantu. Phofu ke, ukunikela ubungqina bokuba uthunywe nguThixo, uYesu wenza imimangaliso yokuphilisa. Ngendlela efanayo uMoses, kwiinkulungwane ngaphambili, wenza imimangaliso ukumisela ubungqina bakhe njengomkhonzi kaThixo.

Ngoku, xa uYesu eshiya iKapernahum ukuya kushumayela kwezinye izixeko, abafundi bakhe abane bahamba naye. Aba bane nguPetros nomntakwabo uAndreya, noYohane nomntakwabo uYakobi. Uya kukhumbula ukuba, kwiveki nje enye ngaphambili, baye bamenyelwa ukuba ngabasebenzi bokuqala abahamba noYesu.

Uhambo lokushumayela kukaYesu eGalili nabafundi bakhe abane lunomphumo omangalisayo! Enyanisweni, ingxelo engemisebenzi yakhe ide iye kulo lonke elaseSiriya. Izihlwele ezikhulu eziphuma eGalili, kwelakwaYuda naphesheya koMlambo iYordan zilandela uYesu nabafundi bakhe. Marko 1:35-39; Luka 4:42, 43; Mateyu 4:23-25; Eksodus 4:1-9, 30, 31.

▪ Kwenzeka ntoni ngentsasa elandela usuku lukaYesu oluxakekileyo eKapernahum?

▪ Wayethunyelwe ntoni uYesu emhlabeni, yaye yayiyintoni injongo yemimangaliso yakhe?

▪ Ngoobani abahamba noYesu kuhambo lwakhe lokushumayela eGalili, yaye iba yintoni intsabelo kumsebenzi kaYesu?