Isahluko 37

UYesu Uphelisa Intlungu Yomhlolokazi

KUNGEKUDALA emva kokuphilisa umkhonzi wegosa lomkhosi, uYesu usinga eNayin, isixeko esingaphezu kwama-32 eekhilomitha kumzantsi ntshona weKapernahum. Uphelekwa ngabafundi bakhe nesihlwele esikhulu. Kanye kuxa kuthi ngcwale xa besondela kwimida yeNayin. Apha badibana nongcelele lwabantu besiya kungcwaba. Kuthwelwe isidumbu segatyana lomfana sisisiwa ngaphandle kwesixeko ukuya kungcwatywa.

Imeko kanina ilusizi ngakumbi, ekubeni engumhlolokazi ibe lo ebekuphela komntwana wakhe. Xa indoda yakhe yafayo, wayezithuthuzela ngesibakala sokuba wayenonyana. Amathemba akhe, iminqweno kunye namabhongo akhe onke ayekwikamva lalo mfana. Kodwa ngoku akukho mntu anokuzithuthuzela ngaye. Njengoko abantu besixeko bempheleka ukuya emangcwabeni usentlungwini egqithiseleyo.

Xa uYesu ebona lo mfazi, intliziyo yakhe iyachukumiseka kukuba lusizi kwakhe gqitha. Ngoko ngobubele, ukanti enokomelela okunika intembelo, uthi kuye: “Musa ukulila.” Indlela enza ngayo nenyathelo alithabathayo zithimba ingqalelo yesihlwele. Ngoko xa esondela aze achukumise ithala ekuthwelwe ngalo isidumbu, abasithweleyo bema bhuxe. Bonke bamele bamangaliswe koko aza kukwenza.

Kuyinyaniso ukuba abo bapheleke uYesu bambonile ephilisa ngokungummangaliso abantu abaninzi ababenezifo. Kodwa kuyabonakala ukuba abazange bambone evusa umntu ekufeni. Ngaba unokuyenza into enjalo? Ethetha nesidumbu, uYesu uyasiyalela: “Ndodana, ndithi kuwe, Vuka.” Yaye eli tyendyana lihlala nkqo! Liqalisa ukuthetha, aze uYesu alinikele kunina.

Xa abantu bebona ukuba lo mfana ngokwenene uyaphila, baqalisa ukuthi: “Kuvele umprofeti omkhulu phakathi kwethu.” Abanye bathi: “Ubavelele uThixo abantu bakhe.” Ngokukhawuleza ezi ndaba ziphathelele esi siganeko singummangaliso zisasazeka kulo lonke elakwaYuda nakwilizwe elijikelezileyo.

UYohane uMbhaptizi usesentolongweni, ibe ufuna ukwazi okungakumbi ngemisebenzi uYesu akwaziyo ukuyenza. Abafundi bakaYohane bayamxelela ngale mimangaliso. Usabela njani? Luka 7:11-18.

▪ Kwenzeka ntoni njengoko uYesu esondela eNayin?

▪ UYesu uvakalelwa njani ngento ayibonayo, yaye wenza ntoni?

▪ Abantu basabela njani kummangaliso owenziwe nguYesu?