Icandelo 5

Isipho Esimangalisayo Senkululeko Yokuzikhethela

1, 2. Sisiphi isipho esimangalisayo esadalwa naso?

UKUZE siqonde isizathu sokuvumela kukaThixo ukubandezeleka noko aya kukwenza ngako, sifanele siqonde indlela awasenza ngayo. Wenza okungakumbi kunokudala nje imizimba nobuchopho bethu. Kwakhona wasidala sanengqondo neemvakalelo.

² Inxalenye ebalulekileyo yendlela eyenziwe ngayo ingqondo neemvakalelo zethu yinkululeko yokuzikhethela. Ewe, uThixo wafaka kuthi amandla enkululeko yokuzikhethela. Ngokwenene yayisisipho esimangalisayo esasiphiwa nguye.

Indlela Esenziwe Ngayo

3-5. Kutheni siyithanda nje inkululeko yokuzikhethela?

³ Masiqwalasele indlela inkululeko yokuzikhethela ebandakanyeke ngayo ekuvumeleni kukaThixo ukubandezeleka. Okokuqala, khawucinge ngoku: Ngaba uyakuxabisa ukuba nenkululeko yokukhetha oko uza kukwenza noza kukuthetha, oko uza kukutya noza kukunxiba, uhlobo lomsebenzi oza kuwenza, nendawo oza kuhlala kuyo nendlela oza kuhlala ngayo? Okanye ubungathanda ukuba omnye umntu akuxelele konke oko mawukuthethe noko mawukwenze mzuzu ngamnye wobomi bakho?

⁴ Akakho umntu ophilileyo ofuna ukuba ubomi bakhe bulawulwe ngokupheleleyo ngolo hlobo ngabanye abantu. Kutheni? Kungenxa yendlela uThixo awasenza ngayo. IBhayibhile isixelela ukuba uThixo wamdala umntu ‘ngokomfanekiselo wakhe nangokufana naye,’ yaye olunye lweempawu anazo uThixo lolo lwenkululeko yokuzikhethela. (Genesis 1:26; Duteronomi 7:6) Xa wadala abantu, wabanika olo phawu lufanayo olumangalisayo—isipho senkululeko yokuzikhethela. Eso sezinye sezizathu ezibangela ukuba kusinxunguphalise ukukhotyokiswa ngabalawuli abacinezelayo.

⁵ Ngoko akwenzekanga ngengozi ukuba sinqwenele ukukhululeka, kuba uThixo unguThixo wenkululeko. IBhayibhile ithi: “Apho kukho umoya kaYehova, kukho inkululeko.” (2 Korinte 3:17, NW) Ngenxa yoko, uThixo wafaka kuthi inkululeko yokuzikhethela njengenxalenye yokubunjwa kwethu. Ekubeni wayeyazi indlela ezaziya kusebenza ngayo iingqondo neemvakalelo zethu, wayesazi ukuba eyona nto iya kusonwabisa gqitha kukuba nenkululeko yokuzikhethela.

6. UThixo wabudala njani ubuchopho bethu ukuba busebenze ngokuvisisana nenkululeko yokuzikhethela?

⁶ Kunye neso sipho senkululeko yokuzikhethela, uThixo wasipha amandla okucinga, okuhlolisisa imicimbi, okwenza izigqibo, nokwazi okulungileyo kokuphosakeleyo. (Hebhere 5:14) Ngenxa yoko, inkululeko yokuzikhethela yayimele isekelwe kukhetho olusengqiqweni. Asizange senziwe sibe ziirobhoti ezingenangqondo nezingenakwenza oko zikuthandayo. Yaye asizange sidalelwe ukuba senze izinto ngethuku njengezilwanyana. Kunoko, ubuchopho bethu obumangalisayo bayilelwa ukuba busebenze ngokuvisisana nenkululeko yethu yokuzikhethela.

Esona Siqalo Sihle

7, 8. Sisiphi isiqalo esihle uThixo awasinika abazali bethu bokuqala?

⁷ Ukuze abonise indlela awayenenkathalo ngayo uThixo, kunye nesipho senkululeko yokuzikhethela, abazali bethu bokuqala, uAdam noEva, banikwa zonke izinto nabani na onengqiqo abengazifuna. Babekwa kwiparadisi enkulu nenjengomyezo. Babenentabalala yezinto eziphathekayo. Babeneengqondo nemizimba efezekileyo, ngoko babengayi kwaluphala okanye bagule okanye bafe—babenokuphila ngonaphakade. Ngebabenabantwana abafezekileyo nabo ababenokuba nekamva elivuyisayo nelikanaphakade. Yaye abemi abandayo ngebabenomsebenzi owanelisayo wokwenza ukuba ekugqibeleni wonke umhlaba ube yiparadisi.—Genesis 1:26-30; 2:15.

⁸ Ngokuphathelele oko kwalungiselelwayo, iBhayibhile ithi: “Wakubona uThixo konke akwenzileyo, nanko, kulungile kunene.” (Genesis 1:31) Kwakhona iBhayibhile ithi ngoThixo: “Ugqibelele umsebenzi wakhe.” (Duteronomi 32:4) Ewe, uMdali wayinika intsapho engabantu isiqalo esigqibeleleyo. Asikho esasinokuba ngaphezu kweso. Onjani yena ukuba nenkathalo uThixo awazibonakalisa enguye!

Inkululeko Enemida

9, 10. Kutheni inkululeko yokuzikhethela imele isetyenziswe ngokufanelekileyo?

⁹ Noko ke, ngaba uThixo wayenenjongo yokuba inkululeko yokuzikhethela ingabi namida? Khawube nomfanekiso wesixeko esiphithizelayo nesingenamithetho ilawula izithuthi, apho bonke abantu benokuqhuba besiya nangakwiliphi na icala nangasiphi na isantya. Ngaba ubungathanda ukuqhuba kwiimeko ezinjalo? Hayi, lowo ibingangumbhodamo wezithuthi yaye ngokuqinisekileyo bekungaphumela kwiingozi ezininzi.

¹⁰ Kunjalo ke nangesipho sikaThixo senkululeko yokuzikhethela. Inkululeko engenamida ibingathetha ukungabikho kocwangco ebantwini. Kumele kubekho imithetho yokulawula imicimbi yabantu. ILizwi likaThixo lithi: “Ziphatheni njengabantu abakhululekileyo. Kambe ke inkululeko leyo mayingabi likhusi lokungcola.” (1 Petros 2:16, TE) UThixo ufuna ukuba inkululeko yokuzikhethela isetyenziselwe ukulungelwa kwabo bonke abantu. Wayengenanjongo yokuba sibe nenkululeko epheleleyo, kodwa sibe nenkululeko elinganiselweyo, ilawulwe ngumthetho.

Imithetho Kabani?

11. Sasidalelwe ukuba sithobele imithetho kabani?

¹¹ Sasidalelwe ukuba sithobele imithetho kabani? Enye inxalenye yendinyana ekweyoku-1 kaPetros 2:16 (The Jerusalem Bible) ithi: “Aningomakhoboka amntu koko ningamakhoboka kaThixo.” Oku akubhekiseli kubukhoboka obucinezelayo, kodwa, kunoko, kuthetha ukuba sadalelwa ukuba sonwabe gqitha xa sizithoba kwimithetho kaThixo. (Mateyu 22:35-40) Imithetho yakhe inikela olona lwalathiso luluncedo kunayo nayiphi na imithetho equlunqwe ngabantu. “Mna Yehova, Thixo wakho, ndingokufundisa okungakuncedayo, ndikunyathelise ngendlela oya kuhamba ngayo.”—Isaya 48:17.

12. Yiyiphi inkululeko yokuzikhethela esinayo phakathi kwemida yemithetho kaThixo?

¹² Kwangaxeshanye, imithetho kaThixo inikela ithuba lokusetyenziswa kwenkululeko enkulu yokuzikhethela kwimida yayo. Oku kuphumela kwiintlobo ezahlukahlukeneyo zezinto yaye kubangela ukuba intsapho engabantu ibe nomtsalane. Cinga ngeentlobo ezahlukahlukeneyo zokutya, zokunxiba, zomculo, zobugcisa, namakhaya ezikho kulo lonke ihlabathi. Ngokuqinisekileyo sikhetha ukuzenzela ngokwethu izigqibo kwimibandela elolu hlobo kunokuba omnye umntu asigqibele ngokwakhe.

13. Yiyiphi imithetho yendalo esimele siyithobele ukuze kulungelwe thina?

¹³ Ngaloo ndlela sadalelwa ukuba sonwabe gqitha xa sizithoba kwimithetho kaThixo yokuziphatha kwabantu. Kufana nokuzithoba kwimithetho kaThixo yendalo. Ngokomzekelo, ukuba siyawutyeshela umthetho womxhuzulane size sitsibe kwindawo ephakamileyo, siya kwenzakala okanye sife. Ukuba siyayityeshela imithetho engaphakathi kwimizimba yethu size siyeke ukutya, ukusela amanzi, okanye ukuphefumla umoya, siya kufa.

14. Sazi njani ukuba abantu babengadalelwanga ukuba bazimele geqe kuThixo?

¹⁴ Njengoko ngokuqinisekileyo sasidalelwe ukuba sizithobe kwimithetho kaThixo yendalo, sadalelwa ukuba sizithobe nakwimithetho kaThixo yokuziphatha neyentlalo. (Mateyu 4:4) Abantu babengadalelwanga ukuba bazimele geqe kuMenzi wabo baze baphumelele. Umprofeti uYeremiya uthi: “Akukhona endodeni ehambayo ukuqinisela ukunyathela kwayo. Ndithethise, Yehova.” (Yeremiya 10:23, 24) Ngoko ngazo zonke iindlela abantu babedalelwe ukuba baphile phantsi kolawulo lukaThixo, kungekhona olwabo.

15. Ngaba imithetho kaThixo ngeyayibe luxanduva kuAdam noEva?

¹⁵ Ukuthobela imithetho kaThixo ngekwakungeloxanduva kubazali bethu bokuqala. Kunoko, ngekwakuhambisele phambili intlalo-ntle yabo neyentsapho yonke yabantu. Ukuba isibini sokuqala sasihleli kwimida yemithetho kaThixo, zonke izinto ngezahamba kakuhle. Enyanisweni, ngoku ngesiphila kwiparadisi emangalisayo yolonwabo siyintsapho ethandanayo nemanyeneyo yabantu! Ngebungekho ubungendawo, ukubandezeleka nokufa.

[Umfanekiso okwiphepha 11]

UMdali wanika abantu isiqalo esigqibeleleyo

[Umfanekiso okwiphepha 12]

Ngaba ubungathanda ukuqhuba kwindawo ekuphithizela izithuthi kuyo ukuba ibingekho imithetho elawula izithuthi?