Icandelo 11
Ngoku Kubekwa Isiseko Sehlabathi Elitsha
1, 2. Kwinzaliseko yesiprofeto seBhayibhile, kwenzeka ntoni kanye phambi kwamehlo ethu?
KWAKHONA okumangalisayo sisibakala sokuba kanye ngoku kubekwa isiseko sehlabathi elitsha likaThixo, njengoko nehlabathi elidala likaSathana liphela. Kanye phambi kwamehlo ethu, uThixo uhlanganisa abantu abaphuma kuzo zonke iintlanga aze abenze isiseko sebutho elitsha lasemhlabeni eliya kuthi kungekudala lithabathel’ indawo ihlabathi lanamhlanje eliziintlaba-zahlukane. EBhayibhileni, kweyesi-2 kaPetros 3:13, eli butho litsha labantu libizwa ngokuthi ‘ngumhlaba omtsha.’
2 Isiprofeto seBhayibhile sikwathi: “Ekupheleni kwemihla [ixesha esiphila kulo ngoku] . . . , kuya kuhamba izizwe ezininzi, zithi, Yizani, sinyuke siye entabeni kaYehova [unqulo lwakhe lokwenyaniso], . . . asiyalele iindlela zakhe, sihambe ngomendo wakhe.”—Isaya 2:2-3.
3. (a) Isiprofeto sikaIsaya sizaliseka phakathi koobani? (b) Incwadi yokugqibela yeBhayibhile ithini ngoku?
3 Eso siprofeto siyazaliseka ngoku phakathi kwabo bazithobayo ‘kwiindlela zikaThixo baze bahambe ngomendo wakhe.’ Incwadi yokugqibela yeBhayibhile ithetha ngeli butho labantu bezizwe ngezizwe elithanda uxolo ‘njengesihlwele esikhulu esiphuma kuzo zonke iintlanga, nezizwe, nabantu neelwimi,’ ubuzalwana bokwenyaniso behlabathi lonke obukhonza uThixo ngokumanyeneyo. Kwakhona iBhayibhile ithi: “Aba ngabaphumayo embandezelweni enkulu.” Oko kukuthi, baya kusinda kwisiphelo sale nkqubo yezinto embi.—ISityhilelo 7:9, 14; Mateyu 24:3.
Ubuzalwana Bezizwe Ngezizwe Bokwenyaniso
4, 5. Ubuzalwana behlabathi lonke bamaNgqina kaYehova bubangelwe yintoni?
4 Izigidi zamaNgqina kaYehova zizama ngokunyanisekileyo ukuphila ngokuvisisana nemiyalelo neendlela zikaThixo. Ithemba lawo lobomi obungunaphakade lisekelwe kwihlabathi elitsha likaThixo. Ngokuphila ubomi bawo bemihla ngemihla ethobela imithetho kaThixo, ambonisa ukuba akulungele ukuzithoba kwindlela alawula ngayo ngoku nakwihlabathi elitsha. Kuzo zonke iindawo, kungakhathaliseki uhlanga okanye isizwe aphuma kuso, athobela imilinganiselo efanayo—leyo yandlalwe nguThixo kwiLizwi lakhe. Kungoko ebubuzalwana bezizwe ngezizwe bokwenyaniso, ibutho labantu behlabathi elitsha elenziwe nguThixo.—Isaya 54:13; Mateyu 22:37, 38; Yohane 15:9, 14.
5 AmaNgqina kaYehova awazizukisi ngelithi ngawo azibangele ukuba abe bubuzalwana obahlukileyo behlabathi lonke. Ayazi ukuba oku kubangelwe ngumoya onamandla kaThixo osebenza kubantu abazithobayo kwimithetho yakhe. (IZenzo 5:29, 32; Galati 5:22, 23) Kubangelwe nguThixo. Njengoko uYesu watshoyo, “izinto ezingenakwenzeka kubantu, zinokwenzeka kuye uThixo.” (Luka 18:27) Ngoko uThixo owabangela ubukho bendalo iphela eya kuhlala ikho ikwanguye obangele ukuba kubekho ibutho labantu eliya kuhlala likho lehlabathi elitsha.
6. Kutheni kunokuthiwa ubuzalwana bamaNgqina kaYehova ngummangaliso wale mihla?
6 Ngenxa yoko, indlela uYehova aya kulawula ngayo kwihlabathi elitsha sele inokubonwa ngoku koko akuvelisayo njengesiseko esibekwayo ngoku sehlabathi elitsha. Ibe, ngengqiqo ethile, oko akwenzileyo ngamaNgqina akhe ngummangaliso wezi mini. Ngoba? Ngenxa yokuba uye wawenza amaNgqina kaYehova ubuzalwana bokwenyaniso behlabathi lonke, obungenakuze bahlukaniswe zizilangazelelo ezahlukanisayo zobuhlanga, zobuzwe, okanye zonqulo. Ngoxa amaNgqina ezizigidi ngenani yaye ehlala kumazwe angaphezu kwama-200, amanyene ngokungathi abotshwe ngentambo engenakuze iqhawulwe. Ngokwenene obu buzalwana behlabathi lonke, obungazange bubonwe kuyo yonke imbali, bungummangaliso wezi mini—ummangaliso owenziwe nguThixo.—Isaya 43:10, 11, 21; IZenzo 10:34, 35; Galati 3:28.
Ukufanisa Abantu BakaThixo
7. UYesu wathi abalandeli bakhe bokwenyaniso babeya kufaniswa njani?
7 Banokubonwa njani ngakumbi abo bangabantu uThixo abasebenzisayo njengesiseko sehlabathi lakhe elitsha? Kaloku, ngoobani abazalisekisa amazwi kaYesu akuYohane 13:34, 35? Wathi: “Ndiniwisela umthetho omtsha, wokuba nithandane, njengoko ndinithandileyo nina, ukuze nani nithandane. Ngayo le nto baya kwazi bonke, ukuba ningabafundi bam, ukuba nithe nathandana.” AmaNgqina kaYehova ayawakholelwa la mazwi kaYesu yaye ayawasebenzisa. Njengoko iLizwi likaThixo liwayalela, ‘athandana ngokunyamekileyo.’ (1 Petros 4:8) ‘Ambatha uthando, oluyintambo yogqibelelo.’ (Kolose 3:14) Ngoko uthando lobuzalwana “lusisinamatheliso” esiwagcine emanyene ehlabathini lonke.
8. Eyoku-1 kaYohane 3:10-12 ibafanisa njani ngokubhekele phaya abantu bakaThixo?
8 Kwakhona, eyoku-1 kaYohane 3:10-12 ithi: “Babonakala ngaloo nto abantwana bakaThixo, nabantwana bakaMtyholi. Bonke abangenzi bulungisa abangabakaThixo, nalowo ungamthandiyo umzalwana wakhe. Ngokuba le yintshumayelo enayivayo kwasekuqalekeni, ukuba sithandane; singabi njengoKayin, obengowongendawo, wambulala umninawa wakhe.” Ngaloo ndlela, abantu bakaThixo babubuzalwana obungenalugonyamelo nobehlabathi lonke.
Olunye Uphawu Lokubafanisa
9, 10. (a) Abakhonzi bakaThixo babeya kubonwa ngawuphi umsebenzi kwimihla yokugqibela? (b) AmaNgqina kaYehova amzalisekise njani uMateyu 24:14?
9 Kukho enye indlela yokufanisa abakhonzi bakaThixo. Kwisiprofeto sakhe esingokuphela kwehlabathi, uYesu wathetha ngezinto ezininzi ezaziya kuphawula eli xesha njengemihla yokugqibela. (Bona iCandelo 9.) Uphawu olusisiseko lwesi siprofeto lukhankanywa kumazwi akhe akuMateyu 24:14: “Ezi ndaba zilungileyo zobukumkani ziya kuvakaliswa kulo elimiweyo liphela, zibe bubungqina kuzo zonke iintlanga; kwandule ke ukufika ukuphela.”
10 Ngaba siye sakubona ukuzaliseka kweso siprofeto? Ewe. Ukususela ekuqaleni kwemihla yokugqibela ngowe-1914, amaNgqina kaYehova ebeshumayela iindaba ezilungileyo zoBukumkani bukaThixo kulo lonke ihlabathi ngendlela eyayalelwa nguYesu, eyile, emakhayeni abantu. (Mateyu 10:7, 12; IZenzo 20:20) Izigidi zamaNgqina zityelela abantu kuzo zonke iintlanga ukuze zithethe nabo ngehlabathi elitsha. Oko kukhokelele ekubeni ufumane le ncwadana inemifanekiso, njengoko umsebenzi wamaNgqina kaYehova uquka ukushicilela nokusasaza amawaka ezigidi zoncwadi oluthetha ngoBukumkani bukaThixo. Ngaba kukho nabani na ongomnye oshumayela ngoBukumkani bukaThixo kwindlu ngendlu kulo lonke ihlabathi? Yaye uMarko 13:10 ubonisa ukuba lo msebenzi wokushumayela nokufundisa umele wenziwe “kuqala,” ngaphambi kokufika kwesiphelo.
Ukuphendula Imbambano Enkulu Yesibini
11. Yintoni enye amaNgqina kaYehova ayifezayo ngokuzithoba kulawulo lukaThixo?
11 Ngokuzithoba kwimithetho nemigaqo kaThixo, amaNgqina kaYehova afeza nenye into. Abonisa ukuba uSathana wayexoka xa wayesithi abantu babengenakuthembeka kuThixo xa bevavanywa, ngaloo ndlela baphendula imbambano enkulu yesibini, ebandakanya ingqibelelo yabantu. (Yobhi 2:1-5) Ekubeni elibutho labantu abazizigidi abaphuma kuzo zonke iintlanga, amaNgqina abonakalisa, njengeqela, ukunyaniseka kulawulo lukaThixo. Nangona engabantu abangafezekanga, aphakamisa icala likaThixo kwimbambano yolongamo lwendalo iphela, phezu kwayo nje ingcinezelo eziswa nguSathana.
12. Ngokholo lwawo, amaNgqina axelisa bani?
12 Namhlanje, ezi zigidi zamaNgqina kaYehova zongezelela ubungqina bazo kobo bongcelele lwamanye amangqina amaxesha amandulo awabonakalisa ukunyaniseka kuThixo. Phakathi kwawo kwakukho uAbheli, uNowa, uYobhi, uAbraham, uSara, uIsake, uYakobi, uDebhora, uRute, uDavide noDaniyeli, ukukhankanya nje abambalwa. (Hebhere, isahluko 11) Ngokutsho kweBhayibhile, ‘alilifu elikhulu lamangqina athembekileyo.’ (Hebhere 12:1) La namanye ekwakukho phakathi kwawo abafundi bakaYesu agcina ingqibelelo yawo kuThixo. Yaye noYesu wamisela owona mzekelo ubalaseleyo ngokugcina ingqibelelo ngokugqibeleleyo.
13. Yintoni eyathethwa nguYesu ngoSathana eye yangqineka iyinyaniso?
13 Oku kubonisa ukuba oko kwathethwa nguYesu ngoSathana kwiinkokeli zonqulo kuyinyaniso: “Kaloku ke, nifuna ukubulala mna, mntu unixelele inyaniso endayiva kuThixo . . . Nina ningaboyihlo uMtyholi, neenkanuko zoyihlo niyathanda ukuzenza. Yena waye esisibulala-mntu kwasekuqaleni; akemi enyanisweni, ngokuba akukho nyaniso kuye. Xa sukuba ethetha ubuxoki, uthetha okukokwakhe; ngokuba ulixoki, noyise wawo.”—Yohane 8:40, 44.
Yintoni Oyikhethayo?
14. Kwenzeka ntoni kwisiseko sehlabathi elitsha ngoku?
14 Isiseko sehlabathi elitsha esibekwa nguThixo ngoku ngebutho lezizwe ngezizwe lamaNgqina kaYehova siya sisiba luqilima ngakumbi nangakumbi. Nyaka ngamnye amakhulu amawaka abantu asebenzisa inkululeko yawo yokuzikhethela, esekelwe kulwazi oluchanileyo, ukwamkela ulawulo lukaThixo. Aba yinxalenye yebutho labantu lehlabathi elitsha, ephakamisa icala likaThixo kwimbambano yolongamo lwendalo iphela, yaye emngqina uSathana elixoki.
15. Nguwuphi umsebenzi wokwahlula owenziwa nguYesu kulo mhla wethu?
15 Ngokukhetha ulawulo lukaThixo, ayafaneleka ukuba abe “ngasekunene” kukaKristu njengoko esahlula “izimvu” “ezibhokhweni.” Kwisiprofeto sakhe esingemihla yokugqibela, uYesu waxela kwangaphambili: “Zihlanganiswe phambi kwakhe zonke iintlanga, abahlule abanye kwabanye, njengokuba umalusi ezahlula izimvu ezibhokhweni; athi zona izimvu azimise ngasekunene kwakhe, athi kodwa zona iibhokhwe azimise ngasekhohlo.” Izimvu ngabantu abathobekileyo abanxulumana nabazalwana bakaKristu baze babaxhase, bezithoba kulawulo lukaThixo. Iibhokhwe ngabantu abaneenkani abangafuni nokubabona abazalwana bakaKristu nabangenzi nto ukuxhasa ulawulo lukaThixo. Ngawuphi umphumo? UYesu wathi: “Baya kumka aba [iibhokhwe] baye elubethweni olungunaphakade; ke wona amalungisa [izimvu] aya kuya ebomini obungunaphakade.”—Mateyu 25:31-46.
16. Yintoni omele uyenze ukuba ufuna ukuphila kwiParadisi ezayo?
16 Ngokwenyaniso, uThixo usikhathalele! Kungekudala uza kuzisa iparadisi evuyisayo yasemhlabeni. Ngaba ufuna ukuphila kuloo Paradisi? Ukuba uyafuna, bonakalisa uxabiso lwakho ngamalungiselelo kaYehova ngokufunda ngaye nangokwenza ngokuvisisana noko ukufundayo. “Funani uYehova esenokufunyanwa; mbizeni esekufuphi. Ongendawo makashiye indlela yakhe, indoda enobutshinga mayishiye iingcinga zayo, ibuyele kuYehova: woba nemfesane kuyo.”—Isaya 55:6, 7.
17. Kutheni kungekho xesha lokudlalisa ekukhetheni lowo ufuna ukumkhonza?
17 Akukho xesha lokudlalisa. Isiphelo sale nkqubo indala asifikanga sigalelekile. ILizwi likaThixo liyaluleka: “Musani ukulithanda ihlabathi, kwanezinto ezisehlabathini. Ukuba kukho othi alithande ihlabathi, uthando lukaYise alukho kuye . . . Ihlabathi ke liyadlula, nenkanuko yalo; ke yena owenza ukuthanda kukaThixo uhleli ngonaphakade.”—1 Yohane 2:15-17.
18. Sisiphi isenzo esiya kukunceda ukwazi ukukhangela phambili ngentembelo ekuphileni kwihlabathi elitsha nelizukileyo likaThixo?
18 Ngoku abantu bakaThixo baqeqeshelwa ubomi obungunaphakade kwihlabathi elitsha. Bafunda ubuchule bokomoya nobunye obufunekayo ukwakha iparadisi. Siyakubongoza ukuba uzikhethele uThixo njengoMlawuli uze ube negalelo kumsebenzi wokusindis’ ubomi owenziwa kulo lonke ihlabathi namhlanje. Fundisisa iBhayibhile namaNgqina kaYehova, uze umazi uThixo okukhathalele ngokwenene noya kuphelisa ukubandezeleka. Ngale ndlela nawe unokuba yinxalenye yesiseko sehlabathi elitsha. Ngoko ngentembelo unokukhangela phambili ekuzuzeni inkoliseko kaThixo nasekuphileni ngonaphakade kwelo hlabathi litsha lizukileyo.
[Umfanekiso okwiphepha 31]
AmaNgqina kaYehova anobuzalwana bokwenyaniso bezizwe ngezizwe
[Umfanekiso okwiphepha 32]
Ngoku kubekwa isiseko sehlabathi elitsha likaThixo