Isahluko 31

Indlela Yokukhethwa Nokukhokelwa NguThixo

“KUSENGQIQWENI ukucinga ukuba bekuya kubakho unqulo olunye lokwenyaniso. Oku kuvisisana nesibakala sokuba uThixo oyinyaniso ‘akangowesiphithiphithi, ngowoxolo.’ (1 Korinte 14:33) IBhayibhile ithi eneneni kukho kuphela ‘lunye ukholo.’ (Efese 4:5) Ngoko, ngoobani abayila iqela labanquli bokwenyaniso namhlanje? Asikuthandabuzi ukuthi ngamaNgqina kaYehova” itsho njalo incwadi ethi, Unokuphila Ngonaphakade KwiParadisi Esemhlabeni.a

Bambi basenokubuza: ‘Yintoni enenza niqiniseke kangako ukuba olwenu lunqulo lokwenyaniso? Aninabungqina obungamandla angaphezu kwawomntu—njengeziphiwo zemimangaliso. Ibe ukutyhubela iminyaka ngaba asinini ebekufuneka niguqule iimbono neemfundiso zenu? Ngoko, ninokuqiniseka njani ukuba nikhokelwa nguThixo?’

Ukuze siphendule loo mibuzo, kuluncedo ukuqala siqwalasele indlela uYehova awayebakhetha aze abakhokele ngayo abantu bakhe kumaxesha amandulo.

Indlela KaThixo Yokukhetha Ngamaxesha Okubhalwa KweBhayibhile

Ngenkulungwane ye-16 B.C.E., uYehova wahlanganisa amaSirayeli kwiNtaba yeSinayi waza wawamemela ukuba abe ngabantu bakhe abakhethiweyo. Noko ke, kuqala uYehova wawaxelela ukuba kwakukho iimfuneko ezikhethekileyo awayefanele ahlangabezane nazo. Wawaxelela oku: “Ukuba nithe naliphulaphula okunene izwi lam, . . . noba yinqobo kum.” (Eks. 19:5) Esebenzisa uMoses, uYehova wakuchaza ngokucacileyo oko kwakufuneka, bandula ke abantu baphendula besithi: “Onke amazwi awathethileyo uYehova sowenza.” Wandula ke uYehova wenza umnqophiso namaSirayeli wawanika uMthetho wakhe.—Eks. 24:3-8, 12.

Ukukhethwa nguThixo—elinjani ukuba likhulu ilungelo! Kodwa elo lungelo labeka phezu kwamaSirayeli imbopheleleko yokuwuthobela ngokungqongqo uMthetho kaThixo. Ukusilela ukwenjenjalo kwakuya kuphumela ekulahlweni kwawo njengohlanga. Ukuze abethelele ukumoyika okufanelekileyo ukuze amthobele, uYehova wabangela imiqondiso eyoyikekayo engenakwenziwa ngamandla omntu—“kwabakho iindudumo, nemibane,” ibe “yanyikima kunene yonke intaba.” (Eks. 19:9, 16-18; 20:18, 20) Malunga neminyaka eli-1 500 elandelayo, amaSirayeli ayekwisikhundla esikhethekileyo—ayengabantu bakaThixo abakhethiweyo.

Noko ke, ngenkulungwane yokuqala yeXesha Eliqhelekileyo, le meko yaguquka ngokuphawulekayo. USirayeli waphulukana nokuma kwakhe okulilungelo, walahlwa nguYehova ngenxa yokungamkeli uNyana wakhe. (Mat. 21:43; 23:37, 38; IZe. 4:24-28) Wandula ke uYehova wazala ibandla lamaKristu okuqala, elalakhelwe kuKristu. NgePentekoste yowama-33 C.E., uYehova wathulula umoya wakhe oyingcwele kubalandeli bakaYesu ababeseYerusalem, ebamisela ukuba babe ‘sisizwe esikhethiweyo, uhlanga olungcwele, abantu abakhethekileyo.’ (1 Pet. 2:9, NW; IZe. 2:1-4; Efe. 2:19, 20) Baba “ngabanyulwa bakaThixo.”—Kol. 3:12.

Ukuba lilungu lolo hlanga lukhethiweyo kwakunemiqathango. UYehova wamisela iimfuneko ezingqongqo zokuziphatha nezokomoya ekwakufuneka zifikelelwe. (Gal. 5:19-24) Abo babephila ngokuvisisana nezo mfuneko babezenza bafanelekele ukukhethwa nguye. Noko ke, besakuba bekhethiwe nguThixo, kwakubalulekile ukuba bahlale beyithobela imithetho yakhe. Kuphela ‘ngabo bamthobela njengomlawuli’ ababeya kuqhubeka befumana umoya wakhe oyingcwele. (IZe. 5:32, NW) Abo babesilela ukumthobela babesengozini yokulahlelwa ngaphandle kwebandla neyokulahlekelwa lilifa labo kuBukumkani bukaThixo.—1 Kor. 5:11-13; 6:9, 10.

Kodwa abanye babeya kwazi njani ngokuqinisekileyo ukuba uThixo wayekhethe elo bandla lamaKristu okuqala ukuba lithabathe indawo kaSirayeli ‘njengebandla likaThixo’? (IZe. 20:28) Wayebonakala ngokucacileyo lowo wayekhethwe nguThixo. Emva kokufa kukaYesu, uThixo wadlulisela izipho zemimangaliso kumalungu ebandla lokuqala lamaKristu ukuze abonise ukuba ngoku ayengabanyulwa bakaThixo.—Heb. 2:3, 4.

Ngaba imiqondiso engaphezu kwamandla omntu, okanye imimangaliso, yayisoloko iyimfuneko ukuze kubonwe abo babekhethwe yaye bekhokelwa nguThixo ngamaxesha okubhalwa kweBhayibhile? Hayi, akunjalo konke konke. Imisebenzi yamandla yayingeyonto eqhelekileyo kuyo yonke imbali yeBhayibhile. Inkoliso yabantu ababephila ngamaxesha okubhalwa kweBhayibhile ayizange khe ibone nokuba ube mnye ummangaliso. Inkoliso yemimangaliso ebhalwe eBhayibhileni yenzeka ebudeni bemihla kaMoses noYoshuwa (ngenkulungwane ye-16 neye-15 B.C.E.), kaEliya noElisha (ngenkulungwane ye-10 neyesi-9 B.C.E.), nekaYesu nabapostile bakhe (ngenkulungwane yoku-1 C.E.). Abanye abantu abathembekileyo ababekhethwe nguThixo ukwenzela iinjongo ezikhethekileyo, njengoAbraham noDavide, babona okanye baba namava eembonakaliso zamandla kaThixo, kodwa akukho bungqina bokuba bona benza imimangaliso. (Gen. 18:14; 19:27-29; 21:1-3; thelekisa eyesi-2 kaSamuweli 6:21; Nehemiya 9:7.) Ngokuphathelele izipho zemimangaliso ezazikho ngenkulungwane yokuqala, iBhayibhile yaxela kwangaphambili ukuba ezi zaziya “kubhangiswa.” (1 Kor. 13:8) Ibe oku kwenzeka emva kokufa kowokugqibela wabapostile abali-12 nabo babefumene izipho zemimangaliso kubo.—Thelekisa IZenzo 8:14-20.

Kuthekani Ngendlela UThixo Akhetha Ngayo Namhlanje?

Emva kwenkulungwane yokuqala, uwexuko olwaluxelwe kwangaphambili lwavela kungekho nto yakuluthintela. (IZe. 20:29, 30; 2 Tes. 2:7-12) Kangangeminyaka emininzi isibane sobuKristu bokwenyaniso sasiloziza. (Thelekisa uMateyu 5:14-16.) Sekunjalo, komnye umzekeliso uYesu wabonisa ukuba “ekuphelisweni kweli phakade,” ‘ingqolowa,’ (amaKristu okwenyaniso) ‘nomdiza’ (amaKristu obuxoki) zaziya kwahluka ngokucacileyo. Ingqolowa, okanye “abanyulwa,” babeya kuhlanganiselwa kwibandla elinye lamaKristu okwenyaniso, njengokuba kwakunjalo ngenkulungwane yokuqala. (Mat. 13:24-30, 36-43; 24:31) Kwakhona uYesu wachaza amalungu athanjisiweyo elo bandla ‘njengomkhonzi othembekileyo noqondayo’ waza wabonisa ukuba ngexesha lesiphelo, ayeya kudlulisela ukudla kokomoya. (Mat. 24:3, 45-47) Loo mkhonzi uthembekileyo wayeya kuthelelwa ‘sisihlwele esikhulu’ sabanquli bokwenyaniso abaphuma kuzo zonke iintlanga.—ISityhi. 7:9, 10; thelekisa uMika 4:1-4.

Abanquli bokwenyaniso ababeya kuphila ngexesha lesiphelo babeya kubonwa njani? Ngaba babeya kusoloko bechanile, ngaba babengayi kuphazama ekwenzeni izigqibo? Abapostile bakaYesu nabo kwakufuneka balungiswe. (Luka 22:24-27; Gal. 2:11-14) Njengabapostile, abalandeli bakaKristu bokwenyaniso kumhla wethu bamele bathobeke, bakulungele ukwamkela uqeqesho yaye, xa kuyimfuneko, benze uhlengahlengiso, ukuze bavisisanise ngakumbi ukucinga kwabo nokukaThixo.—1 Pet. 5:5, 6.

Xa ihlabathi langena kwimihla yalo yokugqibela ngowe-1914, liliphi iqela elangqineka liyintlangano yamaKristu okwenyaniso? KwiNgqobhoko kwakuzele iicawa ezazisithi zimela uKristu. Kodwa umbuzo ngulo: Yiyiphi, ukuba ikho kwaukubakho, phakathi kwazo eyayikufikelela oko kufunwa ziZibhalo?

Ekuphela kwebandla lamaKristu okwenyaniso kwakuya kufuneka libe yintlangano ebambelela kwiBhayibhile njengelona gunya layo liphambili, kungekhona ecaphula iindinyana ezithe saa kodwa izigatye ezinye xa ezi zingavisisani nezifundo zayo zezakwalizwi zelo xesha. (Yoh. 17:17; 2 Tim. 3:16, 17) Kwakuya kufuneka libe yintlangano amalungu ayo—kungekhona athile kodwa onke—angeyonxalenye yehlabathi ngokwenene, exelisa uKristu. Ngoko ayenokubandakanyeka njani kwezobupolitika, njengokuba iicawa zeNgqobhoko ziye zenjenjalo ngokuphindaphindiweyo? (Yoh. 15:19; 17:16) Kwakuya kufuneka ukuba intlangano yamaKristu okwenyaniso inikele ubungqina kwigama likaThixo, uYehova, ize yenze umsebenzi uYesu awawuyalelayo—ukushumayela iindaba ezilungileyo zoBukumkani bukaThixo. Njengebandla lenkulungwane yokuqala, onke amalungu ayo kungekhona nje ambalwa ayeya kuba ngabahambisi bevangeli abazinikele ngomphefumlo uphela. (Isa. 43:10-12; Mat. 24:14; 28:19, 20; Kol. 3:23) Abanquli bokwenyaniso babeya kwaziwa nangothando lokuzincama abanalo omnye ngomnye, uthando oluya kudlulela ngaphaya kwemiqobo yobuzwe neyobuhlanga luze lubamanyanise babe bubuzalwana bomhlaba wonke. Uthando olunjalo kwakuya kufuneka lubonakaliswe kungekhona nje kwiimeko ezimbalwa kodwa ngendlela eyayiya kubenza bahluke ngokwenene njengentlangano.—Yoh. 13:34, 35.

Ngokucacileyo, xa ixesha lesiphelo laqalisayo ngowe-1914, akukho nanye kwiicawa zeNgqobhoko eyayiyifikelela le milinganiselo yeBhayibhile yebandla lokwenyaniso lamaKristu. Noko ke, kuthekani ngaBafundi beBhayibhile, njengokuba amaNgqina kaYehova ayesaziwa njalo ngoko?

Iphulo Elineziqhamo Lokufuna Inyaniso

Ngoxa wayengumfana, uC. T. Russell wagqiba kwelokuba iBhayibhile yayimelwe kakubi gqitha yiNgqobhoko. Kwakhona wayekholelwa kwelokuba lalifikile ixesha lokuba iLizwi likaThixo liqondwe ibe abo babeya kuyifundisisa ngokunyanisekileyo iBhayibhile baze bayisebenzise kubomi babo babeya kuyiqonda.

Ibali elingobomi bukaRussell, elapapashwa ngokukhawuleza emva kokufa kwakhe, lacacisa: “Ebengengomseki wonqulo olutsha, ibe akazange khe atsho. Uhlaziye iinyaniso ezibalaseleyo ezafundiswa nguYesu nangabaPostile, waza ezi wazikhanyisa ngokwale nkulungwane yamashumi amabini. Akazange athi utyhilelwe ngokukhethekileyo nguThixo, kodwa ebemi kwelokuba ibilixesha likaThixo elifanelekileyo lokuba iBhayibhile iqondwe; ibe, ekubeni ezinikele ngokupheleleyo eNkosini nakwinkonzo Yayo, wavunyelwa ukuba ayiqonde. Ngenxa yokuba ebezinikele ekukhuliseni iziqhamo nobabalo loMoya Oyingcwele, eli dinga leNkosi liye lazaliseka kuye: ‘Kuba xa zikhoyo ezo zinto kuni, zisanda, zinenza ukuba ninganqeni, ningabi ngabaswele isiqhamo ekuyazini iNkosi yethu uYesu Kristu.’—2 Petros 1:5-8.”—IMboniselo (yesiNgesi), Disemba 1, 1916, iphe. 356.

Iphulo lokufuna ukuziqonda iZibhalo likaC. T. Russell nezinxulumani zakhe laba neziqhamo. Njengabathandi benyaniso, babekholelwa ukuba iBhayibhile iliLizwi likaThixo eliphefumlelweyo. (2 Tim. 3:16, 17) Bazichasa iingcamango zendaleko zikaDarwin neembono ezitshabalalisa ukholo zabahlalutyi beBhayibhile. Besamkela iZibhalo njengegunya eliphakamileyo, kwakhona bazigatya njezingekhoyo ezibhalweni iimfundiso zikaBathathu Emnye, ukungafi komphefumlo, nentuthumbo kanaphakade—iimfundiso ezinemvelaphi yonqulo lobuhedeni. Phakathi “kweenyaniso ezinkulu” abazamkelayo yeyokuba uYehova unguMdali wezinto zonke, ukuba uYesu Kristu unguNyana kaThixo, owanikela ngobomi bakhe njengentlawulelo yokukhulula abanye, nokuba ekubuyeni kwakhe uYesu uya kubakho ngokungabonakaliyo njengesidalwa somoya. (Mat. 20:28; Yoh. 3:16; 14:19; ISityhi. 4:11) Kwakhona baqonda ngokucacileyo ukuba umntu ungumphefumlo ofayo.—Gen. 2:7; Hez. 18:20.

Asikuko ukuba ngaBafundi beBhayibhile ababenxulumene noRussell abatyhila zonke ezi nyaniso; ezininzi zaziqondwe kwangaphambili ngabantu abanyanisekileyo ababesithi bangamaKristu, abanye babo abade babambelela kwiinkolelo zabo naxa zazingathandwa. Kodwa ngaba abo bantu bazivisisanisa nazo zonke iimfuneko zonqulo lokwenyaniso eziseZibhalweni? Ngokomzekelo, ngaba ngokwenene babengeyiyo inxalenye yehlabathi, njengokuba uYesu wathi abalandeli bakhe bokwenyaniso babeya kuba njalo?

Ukongezelela kwindlela abayijonga ngayo iBhayibhile, ziziphi ezinye iindlela aBafundi beBhayibhile ababenxulumene noRussell ababahluke ngazo? Ngokuqinisekileyo kwinzondelelo ababeyibonisa ekwabelaneni nabanye ngeenkolelo zabo, begxininisa ekuvakaliseni igama likaThixo noBukumkani bakhe. Nangona babembalwa noko, ngokukhawuleza bafikelela kumazwe amaninzi ngeendaba ezilungileyo. Kwakhona ngaba babengeyonxalenye yehlabathi ngokwenene, njengabalandeli bakaKristu? Ngeendlela ezithile singathi, ewe. Kodwa iindlela ababekuqonda ngayo okubandakanyekileyo koku iye yakhula ukususela ngeMfazwe Yehlabathi I, de kube ngoku iye yaba luphawu olubalaseleyo lwamaNgqina kaYehova. Akufanele kulityalwe ukuba xa amanye amaqela onqulo ayelothulel’ umnqwazi uManyano Lwezizwe yaye, kamva, iZizwe Ezimanyeneyo, amaNgqina kaYehova ayevakalisa uBukumkani bukaThixo—kungekhona nayiphi na intlangano eyilwe ngabantu—njengobukuphela kwethemba loluntu.

Kodwa ngaba ezinye zeenkolelo zamaNgqina kaYehova akukhange kufuneke ziguqulwe njengokuba iminyaka ibihamba? Ukuba abo babekhethiwe yaye bekhokelwa nguThixo ngokwenene yaye ukuba iimfundiso zabo zazixhaswa ligunya leZibhalo kwasekuqaleni, yintoni ebiya kubangela ukuba kufuneke utshintsho olunjalo?

Indlela UYehova Abakhokela Ngayo Abantu bakhe

Abo bayila ekuphela kwentlangano yamaKristu okwenyaniso namhlanje abanazityhilelo zazithunywa zezulu yaye abaphefumlelwanga nguThixo. Kodwa banazo iZibhalo Ezingcwele eziphefumlelweyo, ezityhila indlela uThixo acinga ngayo nokuthanda kwakhe. Njengentlangano nanjengabantu ngabanye, bamele bayamkele iBhayibhile njengenyaniso evela kuThixo, bayifundisise ngenyameko, baze bayivumele isebenze kubo. (1 Tes. 2:13) Kodwa bafikelela njani kulwazi oluchanileyo lweLizwi likaThixo?

IBhayibhile ithi: “Izityhilo asizezikaThixo na?” (Gen. 40:8) Ukuba xa befundisisa iZibhalo indinyana ethile kunzima ukuyiqonda, bamele baphande ukuze bafumane ezinye iindinyana eziwukhanyisayo loo mbandela. Ngaloo ndlela bavumela iBhayibhile izitolike ngokwayo, baze ngokusuka koku bazame ukuqonda “umzekelo” wenyaniso ochazwe eLizwini likaThixo. (2 Tim. 1:13) UYehova ubalathisa okanye ubenza bafumane ulwazi olunjalo ngomoya wakhe oyingcwele. Kodwa ukuze bafumane ukhokelo lwaloo moya, bamele bahlakulele iziqhamo zawo, bangawenzi buhlungu okanye baphikisane nawo, baze baqhubeke besabela xa ubabongoza. (Gal. 5:22, 23, 25; Efe. 4:30) Ngaphezu koko, ngokusebenzisa oko bakufundayo ngenzondelelo, baqhubeka belwakha ukholo lwabo, njengesiseko sokuzuza ukuyiqonda okucace ngakumbi nangakumbi indlela abamele bakwenze ngayo ukuthanda kukaThixo kwihlabathi abangeyonxalenye yalo.—Luka 17:5; Fil. 1:9, 10.

UYehova ebesoloko ebakhokelela ekukuqondeni ngokucace ngakumbi ukuthanda kwakhe abantu bakhe. (INdu. 43:3) Eyona ndlela ebebakhokela ngayo inokuzekeliswa ngale ndlela: Ukuba umntu ebekwigumbi elimnyama ixesha elide, ngaba eyona nto ilungileyo ibingebi kukumfaka ekukhanyeni ngokuthe ngcembe? UYehova uye wabafaka ekukhanyeni kwenyaniso ngendlela efanayo abantu bakhe; uye wabakhanyisela ngokuqhubekayo. (Thelekisa uYohane 16:12, 13.) Bekunjengokuba umzekeliso usithi: “Umendo wamalungisa unjengokukhanya komso, okuya kuba mhlophe ngokuba mhlophe, kude kube semini enkulu.”—IMize. 4:18.

Indlela uYehova awayeqhubana ngayo nabakhonzi bakhe ngamaxesha okubhalwa kweBhayibhile ingqina ukuba ngokufuthi ukukuqonda ngokucacileyo ukuthanda neenjongo zakhe kuza ngokuthe ngcembe. Ngaloo ndlela, uAbraham akazange ayiqonde ngokupheleleyo indlela injongo kaYehova mayela ‘nembewu’ eyayiya kuzaliseka ngayo. (Gen. 12:1-3, 7; 15:2-4; thelekisa amaHebhere 11:8.) UDaniyeli akazange awuqonde umphumo weziprofeto awazibhalayo. (Dan. 12:8, 9) UYesu, ngoxa wayesemhlabeni, wavuma ukuba wayengawazi umhla nelixa eya kuphela ngawo le nkqubo ikhoyo yezinto. (Mat. 24:36) Abapostile ekuqaleni abazange baqonde ukuba uBukumkani bukaYesu babuya kuba bobasezulwini, babungayi kumiselwa ngenkulungwane yokuqala, nokuba kwanabeeNtlanga basenokubudla ilifa.—Luka 19:11; IZe. 1:6, 7; 10:9-16, 34, 35; 2 Tim. 4:18; ISityhi. 5:9, 10.

Akufanele kusimangalise ukuba nakula maxesha anamhlanje, uYehova ngokufuthi ebebakhokela njengentlangano eqhubekayo abantu bakhe, ebakhanyisela ngokuthe ngcembe iinyaniso zeBhayibhile. Asizonyaniso eziguqukayo. Inyaniso ihlala iyinyaniso. Ukuthanda kukaYehova neenjongo zakhe, njengoko zandlalwe eBhayibhileni, aziguquki. (Isa. 46:10) Kodwa indlela abaziqonda ngayo ezi nyaniso ngokuthe ngcembe iyacaca “ngexesha elifanelekileyo,” ngexesha elililo likaYehova. (Mat. 24:45; thelekisa uDaniyeli 12:4, 9.) Maxa wambi, ngenxa yeempazamo zabantu okanye inzondelelo ephosisileyo, kusenokufuneka kwenziwe uhlengahlengiso oluthile kwimbono yabo.

Ngokomzekelo, ngamaxesha awahlukahlukeneyo kwimbali yanamhlanje yamaNgqina kaYehova, inzondelelo nehlombe lawo ngokuthethelelwa kolongamo lukaYehova ezo zinto ziye zakhokelela ekubeni balilindele kwangaphambi kwexesha ilixa lokuphela kwale nkqubo yezinto ingendawo kaSathana. (Hez. 38:21-23) Kodwa uYehova akalityhilanga kusengaphambili ixesha elichanileyo. (IZe. 1:7) Ngenxa yoko, kuye kwafuneka ukuba abantu bakaYehova bazilungise iimbono zabo kulo mbandela.

Ukulungiswa okunjalo kwembono akuthethi ukuba injongo kaThixo iguqukile. Kungathethi nokuba isiphelo sale nkqubo kumele ukuba sisekude. Ngokwahlukileyo koko, ukuzaliseka kweziprofeto zeBhayibhile eziphathelele ‘ukupheliswa kwephakade eli’ kungqina ukusondela kwesiphelo. (Mat. 24:3) Kodwa, ngaba isibakala sokuba amaNgqina kaYehova eye azilinda kwangaphambili izinto ezithile sithetha ukuba awakhokelwa nguThixo? Akunjalo kanye njengokuba umbuzo wabapostile ongokusondela koBukumkani ngemini yabo ungazange uthethe ukuba babengakhethwanga yaye bengakhokelwa nguThixo!—IZe. 1:6; thelekisa IZenzo 2:47; 6:7.

Kutheni amaNgqina kaYehova eqiniseke kangaka ngokuba alunqulo lokwenyaniso? Kungenxa yokuba ayakukholelwa ibe ayakwamkela oko iBhayibhile ikutshoyo ngeempawu abaya kubonwa ngazo abanquli bokwenyaniso. Imbali yawo yanamhlanje, njengokuba ixutyushiwe kwizahluko ezingaphambili zale mpapasho, ibonisa ukuba, ezi mfaneleko awazifikeleli njengabantu ngabanye kuphela kodwa azifikelela njengentlangano: Ngokunyaniseka amela iBhayibhile njengeLizwi likaThixo elingcwele lenyaniso (Yoh. 17:17); azigcina ahlukile ngokupheleleyo kwimicimbi yehlabathi (Yak. 1:27; 4:4); anikela ubungqina ngegama likaThixo, uYehova, ibe avakalisa uBukumkani bukaThixo njengobukuphela kwethemba loluntu (Mat. 6:9; 24:14; Yoh. 17:26); ibe athandana ngokunyanisekileyo.—Yoh. 13:34, 35.

Kutheni uthando luluphawu olubalaseleyo lwabanquli boThixo oyinyaniso? Luthando olunjani olufanisa amaKristu okwenyaniso?

Footnotes]

[Blurb on page 705]

Besakuba bekhethiwe nguThixo, kwakubalulekile ukuba bahlale beyithobela imithetho yakhe

[Blurb on page 706]

Abanquli bokwenyaniso ababeya kuphila ngexesha lesiphelo babeya kubonwa njani?

[Blurb on page 707]

“Akazange athi utyhilelwe ngokukhethekileyo nguThixo”

[Blurb on page 708]

Bavumela iBhayibhile izitolike ngokwayo

[Blurb on page 709]

UYehova ebebakhokela njengentlangano eqhubekayo abantu bakhe, ebakhanyisela ngokuthe ngcembe iinyaniso zeBhayibhile