Isahluko 2
Incwadi Etyhila Ulwazi NgoThixo
1, 2. Kutheni ukhokelo loMdali wethu luyimfuneko kuthi?
KUSENGQIQWENI ukucinga ukuba uMdali wethu onothando ebeya kulungiselela incwadi yokunikela imiyalelo nokhokelo kuluntu. Yaye ngaba akuvumi ukuba ukhokelo luyimfuneko kubantu?
2 Ngaphezu kweminyaka engama-2 500 eyadlulayo, umprofeti owayekwangumbhali-mbali wabhala: “Akukhona endodeni ehambayo ukuqinisela ukunyathela kwayo.” (Yeremiya 10:23) Namhlanje, ukuba yinyaniso kwaloo mazwi kubonakala ngakumbi kunanini na ngaphambili. Ngaloo ndlela, umbhali-mbali uWilliam H. McNeill uthi: “Oko kuye kwenzeka kubantu kwesi sijikelezi-langa phantse bekulungcelele lweentlekele enye emva kwenye nokuphazanyiswa kolungelelwano olumiselweyo lwebutho labantu.”
3, 4. (a) Sifanele silujonge njani ufundisiso lweBhayibhle? (b) Siza kuyihlolisisa njani iBhayibhile?
3 EBhayibhileni sifumana lonke ulwalathiso lobulumko esilufunayo. Liyinyaniso elokuba abaninzi baphelelwa ngamandla xa beqala ukuhlolisisa iBhayibhile. Yincwadi enkulu, yaye amacandelo ayo athile akulula ukuwaqonda. Kodwa ukuba ubunikwe uxwebhu lwasemthethweni oluchaza oko umele ukwenze ukuze ufumane ilifa elixabisekileyo, ngaba ubungayi kuchitha ixesha ulufundisisa ngenyameko? Ukuba ufumanisa ukuba iinxalenye ezithile zolo xwebhu kunzima ukuziqonda, mhlawumbi ubuya kucela uncedo kumntu othile onamava kwimicimbi enjalo. Kutheni iBhayibhile ungayijongi ngesimo sengqondo esifanayo? (IZenzo 17:11) Kubandakanyeke okubaluleke ngakumbi kunelifa lezinto eziphathekayo. Njengokuba sifunde kwisahluko esandulelayo, ulwazi ngoThixo lunokukhokelela kubomi obungunaphakade.
4 Makhe sihlolisise incwadi etyhila ulwazi ngoThixo. Kuqala siza kukhe sihlolisise ngokufutshane oko kuqulethwe yiBhayibhile xa iyonke. Sandule ke sixubushe izizathu zokuba abantu abaninzi abanolwazi bekholelwa ukuba iliLizwi likaThixo eliphefumlelweyo.
OKO IBHAYIBHILE IKUQULETHEYO
5. (a) Ziqulethe ntoni iZibhalo zesiHebhere? (b) Ziqulethe ntoni iZibhalo zesiGrike?
5 IBhayibhile iqulethe iincwadi ezingama-66 ezahlulwe zangamacandelo amabini, ngokufuthi abizwa ngokuba yiTestamente Endala neTestamente Entsha. Iincwadi ezingama-39 ngokuyintloko zabhalwa ngesiHebhere zaza ezingama-27 zabhalwa ngesiGrike. IZibhalo zesiHebhere, eziqala kwiGenesis ukuya kuMalaki, zigubungela ixesha lokudala kwaneminyaka yokuqala engama-3 500 yembali yabantu. Xa sihlolisisa eli candelo leBhayibhile, sifunda ngendlela uThixo awayeqhubana ngayo namaSirayeli—ukususela ekuzalweni kwawo njengohlanga ngenkulungwane ye-16 B.C.E. ukuya kutsho kwinkulungwane yesi-5 B.C.E.a IZibhalo zesiGrike, eziquka incwadi kaMateyu ukuya kweyeSityhilelo, zigxininisa kwiimfundiso nezenzo zikaYesu Kristu nabafundi bakhe ngenkulungwane yokuqala yeXesha lethu Eliqhelekileyo.
6. Kutheni sifanele siyifundisise iBhayibhile iphela?
6 Bambi bathi “iTestamente Endala” yeyamaYuda yaye “iTestamente Entsha” yeyamaKristu. Kodwa ngokutsho kweyesi-2 kuTimoti 3:16, (NW) “sonke iSibhalo siphefumlelwe nguThixo kwaye siyingenelo.” Ngoko ke, ukuzifundisisa ngenyameko iZibhalo kumele kuquke iBhayibhile iphela. Eneneni, amacandelo amabini eBhayibhile ayaphelelisana, edibana ngemvisiswano ukuze avelise umxholo wayo xa iyonke.
7. Uthini umxholo weBhayibhile?
7 Mhlawumbi uneminyaka uhamba iinkonzo zonqulo ibe ukhe uve kufundwa indawo ezithile eBhayibhileni ngokuvakalayo. Okanye kusenokwenzeka ukuba ukhe wazifundela izicatshulwa zayo ngokwakho. Ngaba ubusazi ukuba iBhayibhile inomsonto oyidibanisayo ukusuka kwiGenesis ukusa kwiSityhilelo? Ewe, iBhayibhile inomxholo omnye. Nguwuphi loo mxholo? Kukuthethelelwa kwelungelo likaThixo lokulawula uluntu nokuphunyezwa kwenjongo yakhe yothando ngoBukumkani bakhe. Kamva, siya kubona indlela uThixo aya kuyizalisekisa ngayo le njongo.
8. IBhayibhile ityhila ntoni ngobuntu bukaThixo?
8 Ukongezelela ekuchazeni injongo kaThixo, iBhayibhile ityhila ubuntu bakhe. Ngokomzekelo, eBhayibhileni sifunda ukuba uThixo uneemvakalelo yaye ukhetho esilwenzayo lubalulekile kuye. (INdumiso 78:40, 41; IMizekeliso 27:11; Hezekile 33:11) INdumiso 103:8-14 ithi uThixo “unemfesane enobabalo . . . uzeka kade umsindo, mkhulu ngenceba.” Usiphatha ngemfesane, ‘ekhumbula ukuba senziwe ngothuli’ ibe sibuyela kulo xa sisifa. (Genesis 2:7; 3:19) Ezinjani ukubalasela iimpawu azibonakalisayo! Ngaba lo akalohlobo loThixo ofuna ukumnqula?
9. IBhayibhile isibonisa njani ngokucacileyo imilinganiselo kaThixo, ibe sinokungenelwa njani kolo lwazi?
9 IBhayibhile isibonisa ngokucacileyo imilinganiselo kaThixo. Maxa wambi le ibhalwa njengemithetho. Noko ke, ngokufuthi ibonakala kwimigaqo efundiswa ngemizekelo ethile. UThixo wabangela ukuba iziganeko ezithile ezenzeka kwimbali yamaSirayeli mandulo zibhalelwe ingenelo yethu. Ezi ngxelo zinyanisekileyo zibonisa oko kwenzekayo xa abantu besenza ngokuvisisana nenjongo kaThixo, kwanemiphumo ebuhlungu ebakho xa besenza unothanda. (1 Kumkani 5:4; 11:4-6; 2 Kronike 15:8-15) Ukufunda iingxelo zobomi bokwenene ezinjalo ngokungathandabuzekiyo kuya kuzichukumisa iintliziyo zethu. Ukuba sizama ukuzakhela umfanekiso-ngqondweni weziganeko ezibhaliweyo, sinokuzifanisa nabantu ababebandakanyekile kuzo. Ngaloo ndlela, sinokungenelwa kwimizekelo elungileyo size siphephe imigibe eyabambisa abenzi bokuphosakeleyo. Noko ke, lo mbuzo ubalulekileyo kufuneka uphendulwe: Sinokuqiniseka njani ukuba oko sikufunda eBhayibhileni kuphefumlelwe nguThixo ngokwenene?
NGABA UNOKUYITHEMBA IBHAYIBHILE?
10. (a) Kutheni abanye bevakalelwa kukuba iBhayibhile iphelelwe lixesha? (b) Eyesi-2 kuTimoti 3:16, 17 isixelela ntoni ngeBhayibhile?
10 Mhlawumbi uphawule ukuba iincwadi ezininzi ezinikela amacebiso ziphelelwa lixesha emva kweminyaka embalwa. Kuthekani ngeBhayibhile? Indala kakhulu, yaye kudlule iminyaka ephantse ibe ngama-2 000 amazwi ayo okugqibela abhalwayo. Bambi ke ngoko bavakalelwa kukuba ayisebenzi kweli xesha lethu. Kodwa ukuba iBhayibhile iphefumlelwe nguThixo, amacebiso ayo afanele asebenziseke ngalo lonke ixesha phezu kwabo nje ubudala bayo. IZibhalo zisafanele zibe ‘zisancedela ukufundisa, ukohlwaya, ukululeka, ukuqeqesha okusebulungiseni, ukuze umntu kaThixo afaneleke, exhobele wonke umsebenzi olungileyo.’—2 Timoti 3:16, 17.
11-13. Kutheni sinokuthi iBhayibhile iyasebenziseka kumhla wethu?
11 Ukuyihlolisisa ngokusondeleyo kutyhila ukuba imigaqo yeBhayibhile isasebenza nanamhlanje kanye njengokuba kwakunjalo ukubhalwa kwayo okokuqala. Ngokomzekelo, ngokuphathelele abantu iBhayibhile ibonisa ukubaqonda kakuhle okusebenza kuzo zonke izizukulwana zoluntu. Oku sinokukubona kakuhle kwiNtshumayelo kaYesu yaseNtabeni, efumaneka kwincwadi kaMateyu, isahluko 5 ukusa kwesesi-7. Le ntshumayelo yayichukumisa gqitha inkokeli engasekhoyo yaseIndiya uMohandas K. Gandhi kangangokuba kuthiwa walixelela oku igosa laseBritani: “Ukuba ilizwe lakho nelam linokudibana ekwenzeni ngokuvisisana neemfundiso ezabekwa nguKristu kule Ntshumayelo yaseNtabeni, siya kube sizicombulule iingxaki kungekuphela nje ezamazwe ethu kodwa ezo zehlabathi liphela.”
12 Akumangalisi ukuba abantu bachukumiseke ziimfundiso zikaYesu! KwiNtshumayelo yaseNtabeni, wasibonisa indlela yokufumana ulonwabo lokwenyaniso. Wachaza indlela yokucombulula iimbambano. UYesu wanikela imiyalelo ngendlela yokuthandaza. Wabonisa esona simo sengqondo sobulumko ngeentswelo zezinto eziphathekayo waza wanikela uMthetho Omkhulu wolwalamano olufanelekileyo nabanye. Indlela yokufumanisa ubuqhetseba bonqulo nendlela yokufumana ikamva elinqabisekileyo zezinye zeengongoma ezagutyungelwa kule ntshumayelo.
13 KwiNtshumayelo yaseNtabeni nakwamanye amaphepha ayo onke, iBhayibhile isixelela ngokucacileyo esimele sikwenze nesimele sikuphephe ukuze siphucule ubomi bethu. Iziluleko zayo ziyasebenziseka kangangokuba omnye umfundisi-ntsapho washukunyiselwa ukuba athi: “Nangona ndingumcebisi kwisikolo samabanga aphakamileyo onesidanga nee-master’s yaye ndifunde iincwadi ezininzi ezingokusebenza kwengqondo, ndifumanise ukuba isiluleko seBhayibhile ngezinto ezifana nomtshato ophumelelayo, ukuthintela ubunjubaqa ebantwaneni nendlela yokufumana abahlobo nokubalondoloza sibalasele kunayo nantoni na endiyifunde okanye endiyifundisise eyunivesithi.” Ukongezelela ekubeni isebenziseka kwaye ihambisana namaxesha, iBhayibhile inokuthenjwa.
ICHANILE YAYE INOKUTHENJWA
14. Yintoni ebonisa ukuba iBhayibhile ichanile kwezenzululwazi?
14 Nangona iBhayibhile ingeyoncwadi efundisa ngenzululwazi, ichanile kwezenzululwazi. Ngokomzekelo, ngexesha apho abantu abaninzi babekholelwa ukuba umhlaba uthe tyaba, umprofeti uIsaya wabhekisela kuwo ‘njengosisazinge’ (ngesiHebhere, chugh, gama elo elinentsingiselo “yobungqukuva”). (Isaya 40:22) Ingcamango yomhlaba ongqukuva ayizange yamkelwe ngokubanzi de kwadlula amawaka eminyaka emva komhla kaIsaya. Ukongezelela, uYobhi 26:7—owabhalwa ngaphezu kweminyaka engama-3 000 eyadlulayo—uthi uThixo ‘uxhoma ihlabathi kokungeni.’ Omnye umphengululi weBhayibhile uthi: “Indlela uYobhi awayazi ngayo le nyaniso, eboniswa zizifundo ngeenkwenkwezi, yokuba umhlaba umi esithubeni kokungeni, ngumbuzo ekungelula ukuwuphendula kwabo bakukhanyelayo ukuphefumlelwa kweZibhalo Ezingcwele.”
15. Indlela iBhayibhile ezichaza ngayo izinto iyomeleza njani intembelo kuyo?
15 Indlela ezichazwa ngayo izinto eBhayibhileni nayo iyayomeleza intembelo yethu kule ncwadi indala kakhulu. Ngokungafaniyo neentsomi, iziganeko ezichazwa eBhayibhileni zinxulumene nabantu nemihla engqalileyo. (1 Kumkani 14:25; Isaya 36:1; Luka 3:1, 2) Yaye ngoxa ababhali-mbali bamandulo phantse ngamaxesha onke babelubaxa uloyiso lwabalawuli babo baze bakufihle ukoyiswa neempazamo zabo, ababhali beBhayibhile babengafihli yaye benyanisekile—kwanangezono zabo ezinzulu.—Numeri 20:7-13; 2 Samuweli 12:7-14; 24:10.
INCWADI YEZIPROFETO
16. Bubuphi obona bungqina bunamandla bokuba iBhayibhile iphefumlelwe nguThixo?
16 Iziprofeto ezizalisekileyo zinikela ubungqina obeyisayo bokuba iBhayibhile iphefumlelwe nguThixo. IBhayibhile ineziprofeto ezininzi eziye zazaliseka ngokweenkcukacha. Ngokucacileyo, ayinakuba ngabantu ababangele oku. Ngoko, zivela phi ezi ziprofeto? IBhayibhile ichaza ukuba, “akukhanga kubekho siprofeto ngokuthanda komntu; bathi abantu abangcwele bakaThixo bathetha beqhutywa nguMoya oyiNgcwele,” okanye ngamandla kaThixo asebenzayo. (2 Petros 1:21) Khawuqwalasele imizekelo ethile.
17. Ziziphi iziprofeto ezakuxela kwangaphambili ukuwa kweBhabhiloni, ibe zazaliseka njani?
17 Ukuwa kweBhabhiloni. UIsaya noYeremiya bakuxela kwangaphambili ukoyiswa kweBhabhiloni ngamaMedi namaPersi. Okuphawulekayo kukuba isiprofeto sikaIsaya ngesi siganeko sabhalwa malunga neminyaka engama-200 ngaphambi kokuba iBhabhiloni yoyiswe! Ezi nkalo zilandelayo zesiprofeto kungoku nje zibhaliwe embalini: ukoma koMlambo umEfrati ngenxa yokuphambukiswa kwamanzi awo ngechibi elenziweyo (Isaya 44:27; Yeremiya 50:38); ukungakhathalelwa konqabiseko kumasango aseBhabhiloni awayesemlanjeni (Isaya 45:1); nokoyiswa ngumlawuli ogama linguKoreshi.—Isaya 44:28.
18. Sazaliseka njani isiprofeto seBhayibhile ekuphakameni nasekuweni ‘kokumkani waseGrisi’?
18 Ukuvela nokuwa ‘kokumkani waseGrisi.’ Embonweni, uDaniyeli wabona inkunzi yebhokhwe ihlaba inkunzi yegusha, isaphula iimpondo zayo ezimbini. Lwaza, uphondo lwebhokhwe olukhulu lwaphuka, kwaza kwavela iimpondo ezine esikhundleni salo. (Daniyeli 8:1-8) Wacaciselwa oku uDaniyeli: “Inkunzi yegusha oyibonileyo ineempondo ezimbini, ngookumkani bamaMedi nabamaPersi; nenkunzi yebhokhwe exhonti ngukumkani wakwaYavan [“waseGrisi,” NW]; uphondo olukhulu oluphakathi kwamehlo ngukumkani wokuqala. Ukwaphuka oku, kume zibe ne esikhundleni salo, kukuthi, kuya kusuka kume izikumkani ezine eluhlangeni, kungabi ngamandla alo ke.” (Daniyeli 8:20-22) Ngokuvisisana nesi siprofeto, malunga neenkulungwane ezimbini kamva, “ukumkani waseGrisi,” uAlesandire Omkhulu, wabubhukuqa uBukhosi obuneempondo ezimbini bamaMedi namaPersi. UAlesandire wafa ngowama-323 B.C.E. waza ekugqibeleni ezihlangwini zakhe kwangena iinjengele zakhe ezine. Noko ke, akukho nabunye ubukhosi obamlandelayo obathi bafana nobuka-Alesandire ngamandla.
19. Ziziphi iziprofeto ezazaliseka kuYesu Kristu?
19 Ubomi bukaYesu Kristu. IZibhalo zesiHebhere zinentaphane yeziprofeto ezazaliseka ekuzalweni, kubulungiseleli, ekufeni, nasekuvusweni kukaYesu. Ngokomzekelo, ngaphezu kweminyaka engama-700 ngaphambili, uMika waxela kwangaphambili ukuba uMesiya, okanye uKristu, wayeya kuzalelwa eBhetelehem. (Mika 5:2; Luka 2:4-7) Omnye owayephila ngaxeshanye noMika uIsaya waxela kwangaphambili ukuba uMesiya wayeya kubethwa aze atshicelwe. (Isaya 50:6; Mateyu 26:67) Kwiminyaka engama-500 ngaphambili, uZekariya waprofeta ngokuba uMesiya wayeya kungcatshwa ngamaqhosha esilivere angama-30. (Zekariya 11:12; Mateyu 26:15) Ngaphezu kweminyaka eliwaka ngaphambili, uDavide wachaza iimeko ezinxulumene nokufa kukaYesu uMesiya. (INdumiso 22:7, 8, 18; Mateyu 27:35, 39-43) Yaye malunga neenkulungwane ezintlanu ngaphambili, isiprofeto sikaDaniyeli satyhila ixesha uMesiya awayeya kuvela ngalo kwanobude bexesha lobulungiseleli bakhe nexesha lokufa kwakhe. (Daniyeli 9:24-27) Senze amavandlakanya nje eziprofeto ezazaliseka kuYesu Kristu. Uya kukufumanisa kunomvuzo ukufunda okungakumbi ngaye kamva.
20. Ingxelo yeBhayibhile egqibeleleyo ngeziprofeto ezizalisekileyo ifanele isinike yiphi intembelo?
20 Nezinye iziprofeto ezininzi zeBhayibhile ezaziza kuthabatha ixesha elide sele zizalisekile. Usenokubuza: ‘Kodwa oku kubuchaphazela njani ubomi bam?’ Kaloku, ukuba bekukho umntu obekuxelela inyaniso kangangeminyaka emininzi, ngaba ngesiquphe ubuya kumthandabuza xa ekuxelela into entsha? Nakanye! UThixo usixelele inyaniso kuyo yonke iBhayibhile. Ngaba oku akufanele kukwenze ukuthembe oko iBhayibhile ikuthembisayo, njengeziprofeto zayo ezingeparadisi ezayo emhlabeni? Ngokwenene, sinokuba nentembelo efanayo nekaPawulos, omnye wabafundi bakaYesu benkulungwane yokuqala, owabhala ukuba ‘uThixo akanakuxoka.’ (Tito 1:2) Ukongezelela, xa sifunda iZibhalo size sisebenzise isiluleko sazo, sisebenzisa ubulumko abantu abangenakuzifumanela bona, kuba iBhayibhile yincwadi etyhila ulwazi lukaThixo olukhokelela kubomi obungunaphakade.
‘LULANGAZELELE’ ULWAZI NGOTHIXO
21. Ufanele wenze ntoni ukuba izinto ezithile ozifunda eBhayibhileni zibonakala zinzima?
21 Njengoko ufundisisa iBhayibhile, kusenokwenzeka ukuba uza kufunda izinto ezahlukileyo kwezo wawuzifundisiwe ngaphambili. Usenokufumanisa nokuba amanye amasiko onqulo owaxabisileyo akamkholisi uThixo. Uza kufunda ukuba uThixo unemilinganiselo yokulungileyo nokubi ephakamileyo kunaleyo iqhelekileyo kweli hlabathi likavula-zibhuqe. Oku kusenokubonakala kunzima ekuqaleni. Kodwa yiba nomonde! Hlolisisa ngenyameko iZibhalo ukuze ufumane ulwazi ngoThixo. Lindela ukuba kusenokwenzeka isiluleko seBhayibhile sifune uhlengahlengiso kwindlela ocinga ngayo nakwizenzo zakho.
22. Kutheni ufundisisa iBhayibhile, ibe unokubanceda njani abanye bakuqonde oku?
22 Beneenjongo ezintle abahlobo nezalamane zakho basenokukuchasa ukufundisisa kwakho iBhayibhile, kodwa uYesu wathi: “Wonke umntu ngoko oya kundivuma phambi kwabantu, ndiya kumvuma nam phambi koBawo osemazulwini. Osukuba ke eya kundikhanyela phambi kwabantu, ndiya kumkhanyela nam phambi koBawo osemazulwini.” (Mateyu 10:32, 33) Bambi basenokoyikela ukuba uza kuba lilungu lehlelo elithile okanye ube nenzondelelo yempambano. Noko ke, eneneni kuphela nje uzabalazela ukuzuza ulwazi oluchanileyo ngoThixo nenyaniso yakhe. (1 Timoti 2:3, 4) Ukuze uncede abanye bakuqonde oku, yiba nolwazelelelo, ungaxambulisani nabo, xa uthetha nabo ngoko ukufundayo. (Filipi 4:5) Khumbula ukuba abaninzi ‘bazuzeka lingekho ilizwi’ xa bebona ubungqina bokuba ulwazi lweBhayibhile luyingenelo ngokwenene ebantwini.—1 Petros 3:1, 2.
23. ‘Unokululangazelela’ njani ulwazi ngoThixo?
23 IBhayibhile iyasibongoza: “Walangazeleleni, ngokweentsana ezisandula ukuzalwa, amasi angawelizwi, angenankohliso.” (1 Petros 2:2) Usana luxhomekeka kwisondlo olusifumana kunina yaye luyazingisa ukuze lukufumane oko lukufunayo. Ngokufanayo, sixhomekeke kulwazi oluvela kuThixo. ‘Lilangazelele’ iLizwi lakhe ngokuqhubeka nofundisiso lwakho. Eneneni, zibekele usukelo lokuyifunda mihla le iBhayibhile. (INdumiso 1:1-3) Oku kuya kukuzisela iintsikelelo ezityebileyo, kuba INdumiso 19:11 ithi ngemithetho kaThixo: ‘Ekuyigcineni mkhulu umvuzo.’
[Imibhalo esemazantsi]
a Elithi B.C.E. lithetha ukuthi “before the Common
Era [ngaphambi kweXesha Eliqhelekileyo],” yaye lichane ngakumbi kunelithi B.C. (“before Christ [ngaphambi koKristu]”). Elithi C.E. lithetha ukuthi “Common Era [iXesha Eliqhelekileyo],” ngokufuthi elibizwa ngokuthi A.D., omela anno Domini, othetha ukuthi “ngonyaka weNkosi yethu.”
HLOLA ULWAZI LWAKHO
IBhayibhile yahluke ngaziphi iindlela kwezinye iincwadi?
Kutheni unokuyithemba iBhayibhile?
Yintoni engqina ukuba iBhayibhile liLizwi likaThixo eliphefumlelweyo?
[Ibhokisi ekwiphepha 14]
YISEBENZISE NGOKUPHELELEYO IBHAYIBHILE YAKHO
Ukuqhelana neBhayibhile akumele kube nzima. Sebenzisa iziqulatho zayo ukuze ufunde ukulandelelana kweencwadi zeBhayibhile nendawo ezikuyo.
Iincwadi zeBhayibhile zinezahluko neendinyana ukuze uzifumane lula. Zahlukaniswa ngokwezahluko ngenkulungwane ye-13, yaye kubonakala ukuba umshicileli wenkulungwane ye-16 womFrentshi wahlulahlula iZibhalo zesiGrike zaziindinyana ezizizo namhlanje. IBhayibhile yokuqala epheleleyo eyayinezahluko neendinyana yayiluhlelo lwesiFrentshi, olwapapashwa ngowe-1553.
Xa kuboniswe izibhalo kule ncwadi, inani lokuqala libonisa isahluko, lize elilandelayo libonise indinyana. Ngokomzekelo, ukuba kuboniswe esi sibhalo “IMizekeliso 2:5” sithetha incwadi yeMizekeliso, isahluko 2, indinyana 5. Ngokukhangela izibhalo ezicatshuliweyo, ngokukhawuleza akuyi kuba nangxaki ekukhangeleni iindinyana zeBhayibhile.
Eyona ndlela ibalaseleyo yokuqhelana neBhayibhile kukuyifunda yonke imihla. Ekuqaleni, oku kusenokubonakala kulucelomngeni. Kodwa ukuba ufunda izahluko ezithathu ukuya kwezihlanu ngosuku, kuxhomekeka kubude bazo, uya kugqiba ukuyifunda iBhayibhile iphela ngonyaka. Kutheni ungaqali namhlanje?
[Ibhokisi ekwiphepha 19]
IBHAYIBHILE—INCWADI EKHETHEKILEYO
• IBhayibhile “iphefumlelwe nguThixo.” (2 Timoti 3:16) Nangona amazwi ayo abhalwa ngabantu, nguThixo owayesalathisa iingcinga zabo, ukuze ngokwenene iBhayibhile ibe “lilizwi likaThixo.”—1 Tesalonika 2:13.
• IBhayibhile yabhalwa kwixesha eligubungela iinkulungwane ezili-16, ngabantu abangama-40 abaneemvelaphi ezahlukahlukeneyo. Sekunjalo, yakuba igqityiwe yayivisisana ukususela ekuqaleni ukusa ekugqibeleni.
• IBhayibhile iye yasinda kwiimpikiswano ukudlula nayiphi na enye incwadi. Ebudeni bamaXesha Aphakathi, abantu babetshiselwa kwizibonda kuba nje babenombhalo weZibhalo.
• IBhayibhile yeyona ncwadi ithengwa kakhulu ehlabathini lonke. Iguqulelwe, iyonke okanye iinxalenye zayo kwiilwimi ezingaphezu kwama-2 000. Kushicilelwe amawaka ezigidi, yaye kungangenkankulu ukuba ikho indawo onokungayifumani kuyo emhlabeni.
• Eyona nxalenye indala yeBhayibhile yeyenkulungwane ye-16 B.C.E. Ngelo xesha yayingekabikho iRig-Veda yamaHindu (yamalunga nowe-1300 B.C.E.), okanye i-“Canon of the Three Baskets” yamaBhuda (yenkulungwane yesihlanu ngaphambi kweXesha Eliqhelekileyo), okanye iKoran yamaSilamsi (yenkulungwane yesixhenxe yeXesha Eliqhelekileyo), kwaneNihongi yamaShinto (yowama-720 C.E.).
[Umfanekiso ozalise iphepha, kwiphepha 20]