Isifundo 1

Indlela Onokukufumanisa Ngayo Oko UThixo Akufunayo

Yiyiphi inkcazelo ebalulekileyo efumaneka eBhayibhileni? (1)

Yabhalwa ngubani iBhayibhile? (2)

Kutheni ufanele ufundisise iBhayibhile? (3)

1. IBhayibhile sisipho esixabisekileyo esivela kuThixo. Injengencwadi esuka kubawo onothando isiya kubantwana bakhe. Isixelela inyaniso ngoThixo—umntu anguye nemigaqo yakhe. Isichazela indlela yokujamelana neengxaki nendlela yokufumana ulonwabo lokwenene. YiBhayibhile kuphela esixelela ngento esifanele siyenze ukuze sikholise uThixo.—INdumiso 1:1-3; Isaya 48:17, 18.

2. IBhayibhile yabhalwa ngabantu abanokuba ngama-40 kwisithuba esinokuba yiminyaka eli-1 600, eqala ngowe-1513 B.C.E. Iyilwe ziincwadana ezingama-66. Abo babhala iBhayibhile babephefumlelwe nguThixo. Babhala iingcinga zakhe, ingezizo ezabo. Ngoko nguThixo ezulwini onguMbhali weBhayibhile, hayi umntu osemhlabeni.—2 Timoti 3:16, 17; 2 Petros 1:20, 21.

3. UThixo waqinisekisa ukuba iBhayibhile ikhutshelwe ngokuchanileyo yaye ilondoloziwe. Kuye kwashicilelwa iiBhayibhile ezininzi ngaphezu kwayo nayiphi na enye incwadi. Asinguye wonke umntu oya kukuvuyela ukukubona ufundisisa iBhayibhile, kodwa musa ukuvumela ukuba oko kukuyekise. Ikamva lakho elingunaphakade lixhomekeke ekwazini kwakho uThixo nasekwenzeni ukuthanda kwakhe phezu kwayo nje inkcaso.—Mateyu 5:10-12; Yohane 17:3.