Isifundo 3

Ngubani UYesu Kristu?

Kutheni uYesu ebizwa ngokuba nguNyana kaThixo ‘olizibulo’? (1)

Kutheni ebizwa ngokuba ‘nguLizwi’? (1)

Kwakutheni ukuze uYesu eze emhlabeni njengomntu? (2-4)

Kwakutheni ukuze enze imimangaliso? (5)

Yintoni uYesu aza kuyenza kungekudala? (6)

1. UYesu waphila ezulwini njengomntu ongumoya ngaphambi kokuba eze emhlabeni. Wayengowokuqala kwindalo kaThixo, ngoko ukwabizwa ngokuba nguNyana kaThixo ‘olizibulo.’ (Kolose 1:15; ISityhilelo 3:14) NguYesu kuphela uNyana owadalwa nguThixo ngokwakhe. UYehova wasebenzisa uYesu ngaphambi kokuba abe ngumntu ‘njengengcibi’ yakhe ukudala zonke ezinye izinto ezulwini nasemhlabeni. (IMizekeliso 8:22-31; Kolose 1:16, 17) Kwakhona uThixo wamsebenzisa njengesithethi Sakhe esiyintloko. Kungeso sizathu lento uYesu ebizwa ngokuba ‘nguLizwi.’—Yohane 1:1-3; ISityhilelo 19:13.

2. UThixo wathumela uNyana Wakhe emhlabeni ngokudlulisela ubomi bakhe kwisibeleko sikaMariya. Ngoko uYesu akazange abe nobawo ongumntu. Kungeso sizathu le nto engazange azuze sono njengelifa okanye ukungafezeki. UThixo wathumela uYesu emhlabeni ngezizathu ezithathu: (1) Ukusifundisa inyaniso ngoThixo (Yohane 18:37), (2) ukugcina ingqibelelo, esimisela umzekelo ukuze siwulandele (1 Petros 2:21), kunye (3) nokunikela ngobomi bakhe njengedini lokusikhulula esonweni nasekufeni. Kwakutheni ukuze oku kube yimfuneko?—Mateyu 20:28.

3. Ngokungawuthobeli umthetho kaThixo, umntu wokuqala, uAdam, wenza oko iBhayibhile ikubiza ngokuthi ‘sisono.’ UThixo wamgwebela ukufa. (Genesis 3:17-19) Akazange aphinde afikelele kwimilinganiselo kaThixo, ngoko wayengafezekanga kwaphela. Ngokuthe ngcembe waluphala waza wafa. UAdam wadlulisela isono kubo bonke abantwana bakhe. Kungeso sizathu lento nathi sisaluphala, sigula, size sife. Uluntu lunokusindiswa njani?—Roma 3:23; 5:12.

4. UYesu wayengumntu ofezekileyo njengoAdam. Noko ke, ngokungafaniyo noAdam, uYesu wamthobela uThixo ngokugqibeleleyo naxa wayejamelene novavanyo oluqatha. Ngoko ke wayenokunikela ngobomi bakhe bomntu ofezekileyo ukuhlawulela isono sika-Adam. IBhayibhile ibhekisela koku ngokuthi ‘yintlawulelo.’ Ngaloo ndlela, abantwana baka-Adam babenokukhululwa kwisigwebo sokufa. Bonke abo banokholo kuYesu banokuxolelwa izono zabo baze bafumane ubomi obungunaphakade.—1 Timoti 2:5, 6; Yohane 3:16; Roma 5:18, 19.

5. Ngoxa wayesemhlabeni uYesu waphilisa abagulayo, wondla abalambileyo, waza wazolisa neenkqwithela. Wada wavusa nabafileyo. Kwakutheni ukuze enze imimangaliso? (1) Wasikwa yimfesane ngabantu ababebandezelekile, yaye wayefuna ukubanceda. (2) Imimangaliso awayenzayo yayingqina ukuba wayenguNyana kaThixo. (3) Yayibonisa oko aya kukwenzela abantu abathobelayo xa elawula njengoKumkani emhlabeni.—Mateyu 14:14; Marko 2:10-12; Yohane 5:28, 29.

6. UYesu wafa yaye uThixo wamvusa njengesidalwa somoya, waza wabuyela ezulwini. (1 Petros 3:18) Ukususela ngoko, uThixo wamenza uKumkani. Kungekudala uYesu uza kuphelisa bonke ubungendawo nokubandezeleka kulo mhlaba.—INdumiso 37:9-11; IMizekeliso 2:21, 22.

[Imifanekiso ekwiphepha 7]

Ubulungiseleli bukaYesu babuquka ukufundisa, ukwenza imimangaliso, kwanokunikela ubomi bakhe ngenxa yethu