UYesu Uyasindisa—Njani?
“UYesu uyasindisa!” “UYesu unguMsindisi wethu!” Kumazwe amaninzi ehlabathi lonke, izigidimi ezinjalo zixhonywa kwiindonga zezakhiwo nakwezinye iindawo zikawonke-wonke. Izigidi zabantu abanyanisekileyo zikholelwa ukuba uYesu unguMsindisi wazo. Ukuba ungazibuza, “UYesu usisindisa njani?” kusenokwenzeka ukuba beziya kuphendula zenjenje, “UYesu wasifela” okanye, “uYesu wafela izono zethu.” Ewe, ukufa kukaYesu kwenza ukuba sikwazi ukusinda. Kodwa kunokwenzeka njani ukuba ukufa komntu omnye kuhlawulele izono zesihlwele sabantu? Ukuba ubunokubuzwa, “Ukufa kukaYesu kunokusisindisa njani?” ubunokuthini?
IMPENDULO iBhayibhile eyinikelayo kulo mbuzo ilula kakhulu kodwa icacile yaye ibalulekile. Noko ke, ukuze siqonde ukubaluleka kwayo, simele kuqala sibone ubomi nokufa kukaYesu njengesicombululo kwingxaki enkulu kakhulu. Sinokuliqonda ngaloo ndlela kuphela ixabiso elikhulu lokufa kukaYesu.
Ukuze asingathe imeko eyabangelwa kukona kuka-Adam, uThixo wayalela uYesu ukuba anikele ngobomi bakhe. Hayi indlela eyaba nkulu ngayo inkxwaleko eyabangelwa seso sono! Indoda yokuqala nomfazi wayo, uEva, babefezekile. Umyezo omhle wase-Eden wawulikhaya labo. UThixo wabanika umsebenzi onenjongo wokunyamekela ikhaya labo elingumyezo. Babefanele balawule ezinye izidalwa eziphilayo emhlabeni. Yaye njengoko uluntu lwalusanda yaye luzalisa umhlaba ngezigidi zabanye abafana nabo, babefanele bandise iparadesi emhlabeni wonke. (Genesis 1:28) Hayi indlela owawumnandi nowawuvuyisa ngayo loo msebenzi ababewunikiwe! Ngaphezu koko, babenolwalamano olunothando olwaluphakathi kwabo. (Genesis 2:18) Babengaswelanga nto. Ubomi obonwabisayo obungunaphakade babuphambi kwabo.
Kunzima ukusicinga isizathu sokuba uAdam noEva bone. Kodwa isibini sokuqala savukela lo kanye wasidalayo—uYehova uThixo. Esebenzisa inyoka, isidalwa esingumoya uSathana uMtyholi wakhohlisa uEva ukuba angamthobeli uYehova, yaye uAdam wamlandela.—Genesis 3:1-6.
Kwakungekho kungaqiniseki ngoko uMdali wayeza kukwenza ngoAdam noEva. Wayesele exelile ngoko kuya kwenzeka ngokungathobeli, esithi: “Kuyo yonke imithi yomyezo ungadla wanele. Kodwa wona umthi wokwazi okulungileyo nokubi uze ungadli kuwo, kuba mhla uthe wadla kuwo uya kufa ngokuqinisekileyo.” (Genesis 2:16, 17) Ngoku kwakufuneka isicombululo kwimbambano eyayibaluleke gqitha.
Uluntu Lujamelene Nengxaki Enkulu
Isono santlandlolo sabangela ingxaki enkulu kuluntu. UAdam waqalisa ubomi njengomntu ofezekileyo. Ngoko ke, abantwana bakhe ngebabenandiphe ubomi obungunaphakade obufezekileyo. Noko ke, uAdam wona ngaphambi kokuba abe nabantwana. Lonke uhlanga loluntu lwalusesesinqeni sakhe xa wafumana isigwebo esithi: “Uya kudla isonka sokubila kobuso bakho ude ubuyele emhlabeni, kuba uthatyathwe kuwo. Ngokuba uluthuli, uya kubuyela kwaseluthulini.” (Genesis 3:19) Ngoko xa uAdam wonayo waza waqalisa ukufa njengoko uThixo waxelayo, lonke uluntu lwafumana isigwebo sokufa njengaye.
Ngokufanelekileyo, umpostile uPawulos wabhala kamva esithi: “Isono sangena ngamntu mnye [uAdam] ehlabathini nokufa ngaso isono, ngaloo ndlela ukufa kwasasazeka kubo bonke abantu ngenxa yokuba bonke bonayo.” (Roma 5:12) Ewe, ngenxa yesono santlandlolo, abantwana ababefanele ukuba bazalwe befezekile benobomi obungenasiphelo bazalwa begula, besaluphala yaye besifa.
Omnye umntu usenokuthi: “Oku kukudlelw’ indlala. Asizange sikhethe ukungamthobeli uThixo—nguAdam owenjenjalo. Kutheni sifanele silahlekelwe lithemba lobomi obungunaphakade nolonwabo?” Siyazi ukuba ukuba inkundla yomthetho ibinokufaka unyana entolongweni kuba uyise eye weba inqwelo-mafutha, ngokufanelekileyo loo nyana unokukhala ngelithi: “Nindidlel’ indlala! Andenzanga nto imbi.”—Duteronomi 24:16.
Ngokulukuhlela indoda nomfazi wokuqala esonweni, uSathana mhlawumbi wayecinga ukuba wayeza kufaka uThixo engxakini. UMtyholi wahlasela ekuqaleni kwembali yohlanga loluntu—ngaphambi kokuba kubekho nabaphi na abantwana. Xa uAdam wonayo, nanku umbuzo owawubalulekile, UYehova uza kwenza ntoni ngabantwana uAdam noEva abaya kubazala?
UYehova uThixo wenza oko kwakusesikweni. Indoda elungileyo uElihu yathi: “Makube lee kuThixo oyinyaniso ukwenza ngobungendawo, nakuSomandla ukwenza ngokungekho sikweni!” (Yobhi 34:10) Yaye ngokuphathelele uYehova, umprofeti uMoses wabhala: “NguLiwa, ugqibelele umsebenzi wakhe, ngokuba zonke iindlela zakhe zisesikweni. NguThixo wentembeko, tu ubugqwetha; lilungisa yaye uthe tye yena.” (Duteronomi 32:4) Isicombululo uThixo oyinyaniso awasinikela kwingxaki eyadalwa sisono sika-Adam asiliphelisi ithuba esinalo lobomi obungunaphakade kwiparadesi esemhlabeni.
UThixo Unikela Isicombululo Esifezekileyo
Cinga ngesicombululo uThixo awasichaza kwisigwebo sikaSathana uMtyholi. UYehova wathi kuSathana: “Ndiya kubeka ubutshaba phakathi kwakho nomfazi [intlangano kaThixo yasezulwini] naphakathi kwembewu yakho [ihlabathi eliphantsi kolawulo lukaSathana] nembewu yakhe [uYesu Kristu]. Yona iya kukutyumza [uSathana] intloko uze wena uyityumze isithende [ukufa kukaYesu].” (Genesis 3:15) Kwisiprofeto sokuqala seBhayibhile, uYehova wakhankanya injongo yakhe yokuba uNyana wakhe ongumoya aze kuphila emhlabeni njengomntu ofezekileyo onguYesu andule ke afe—atyunyuzwe isithende—engenasono.
Kwakutheni ukuze uThixo avume ukuba umntu ofezekileyo afe? Kaloku, sasiyintoni isohlwayo sikaYehova uThixo kuAdam ukuba uthe wona? Ngaba sasingekuko ukufa? (Genesis 2:16, 17) Umpostile uPawulos wabhala: “Umvuzo isono esiwuhlawulayo kukufa.” (Roma 6:23) UAdam wahlawulela isono sakhe ngokufa kwakhe. Wayenikwe ubomi, wakhetha isono, yaye wafa njengesohlwayo sesono sakhe. (Genesis 3:19) Kuthekani ngesigwebo uhlanga lonke loluntu elalifanele lisinyamezele ngenxa yeso sono? Kwakufuneka kufe othile ukuze kuhlawulelwe izono zabo. Kodwa kukufa kukabani okwakunokugubungela ngokusemthethweni ukunxaxha koluntu lonke?
UMthetho kaThixo oya kuhlanga lwamandulo lwakwaSirayeli wawufuna “unikele umphefumlo ngomphefumlo [okanye, ubomi ngobomi].” (Eksodus 21:23) Ngokutsho kwalo mgaqo usemthethweni, umntu owayefanele afe ukuze ahlawulele ukunxaxha koluntu kwakufuneka abe nexabiso elilingana nelo lika-Adam. Kuphela kukufa komnye umntu ofezekileyo okwakuya kuhlawula umvuzo wesono. UYesu wayeyindoda enjalo. Eneneni, uYesu “waba yintlawulelo” ukuze asindise lonke uluntu olunokuhlawulelwa oluyinzala ka-Adam.—1 Timoti 2:6; Roma 5:16, 17.
Ukufa KukaYesu Kunexabiso Elikhulu
Ukufa kuka-Adam kwakungenaxabiso; kodwa wayefanelwe kukufa ngenxa yesono sakhe. Noko ke, ukufa kukaYesu kwakunexabiso kuba wafa engenasono. UYehova uThixo wayenokulamkela ixabiso lobomi obufezekileyo bukaYesu njengentlawulelo yenzala ethobelayo ka-Adam onesono. Yaye ixabiso ledini likaYesu alipheleli nje ekuhlawuleleni izono zethu esizenze kwixesha elidluleyo. Ukuba bekunjalo, ngesingenalo ikamva. Ekubeni sizalelwe esonweni, siza kuphinda senze isiphoso. (INdumiso 51:5) Hayi indlela esinombulelo ngayo kuba ukufa kukaYesu kusinika ithuba lokufumana imfezeko uYehova awayeyilungiselele kwantlandlolo kwinzala ka-Adam noEva!
UAdam unokufaniswa noyise owafa waza wasishiya sinetyala lemali enkulu (isono) kangangokuba kungabikho ndlela yokuba lihlawulwe elo tyala. Kwelinye icala, uYesu unjengobawo olungileyo owafa waza wasishiyela ilifa elikhulu ukuba lingasikhululi nje kuphela kwityala elikhulu uAdam awasenzela umthwalo ngalo kodwa wasilungiselela ngokwaneleyo ukuze siphile ngonaphakade. Ukufa kukaYesu asikokucima nje izono zangaphambili; ikwalilungiselelo elihle lekamva lethu.
UYesu uyasindisa kuba wasifela. Yaye hayi indlela elixabiseke ngayo ilungiselelo lokufa kwakhe! Xa silibona njengenxalenye yesicombululo sikaThixo kwingxaki entsonkothileyo yesono sika-Adam, ukholo lwethu kuYehova nendlela azenza ngayo izinto luyomelela. Ewe, ukufa kukaYesu yindlela yokuhlangula “wonk’ ubani obonisa ukholo” kuye kwisono, izifo, ukwaluphala nokufa. (Yohane 3:16) Ngaba unombulelo kuThixo ngokwenza eli lungiselelo lothando ukuze sisindiswe?
[Umfanekiso okwiphepha 5]
UAdam wazisa isono nokufa kuluntu
[Umfanekiso okwiphepha 6]
UYehova wanikela isicombululo esifezekileyo