Kutheni Sisifa?
“Phezulu phaya ezindulini kuthe nzwanga, phezulu emithini akuva nento le ephefumlayo; iintaka zithe khebevu emithini zithurh’ ubuthongo: linda; nawe uza kuphumla njengazo.”—JOHANN WOLFGANG VON GOETHE, IMBONGI YASEJAMANI.
UTHIXO wadala abantu banomnqweno wokuphila ngonaphakade. Eneneni, iBhayibhile ithi “ubunaphakade ububekile entliziyweni yabo.” (INtshumayeli 3:11, Appleyard’s Version) Kodwa uThixo akazange anele nje ukunika abantu loo mnqweno wokuphila ngonaphakade. Wakwabanika nethuba lokwenjenjalo.
2 Abazali bethu bokuqala, uAdam noEva, badalwa bafezeka, bengenasiphako engqondweni okanye emzimbeni. (Duteronomi 32:4) Khawufan’ ucinge—babengenamahlaba azingileyo yaye bengaqaqanjelwa, bengatyhwatyhwi luloyiko okanye babhuqwe ngamaxhala! Ngaphezu koko, uThixo wababeka kwikhaya eliyiparadesi elihle kunene. UThixo wayenenjongo yokuba umntu aphile ngonaphakade yaye ekuhambeni kwexesha umhlaba uzaliswe ngabantwana babo abafezekileyo. (Genesis 1:31; 2:15) Ngoku ke, kutheni sisifa?
Ukungathobeli Kuzala Ukufa
3 UThixo wayalela uAdam wathi: “Yonke imithi yomyezo ungayidla uyidle; ke wona umthi wokwazi okulungileyo nokubi uze ungawudli; kuba mhlana uthe wawudla, uya kufa.” (Genesis 2:16, 17) Ngoko kuAdam noEva ukuphila ngonaphakade kwakuxhomekeke kokuthile; kwakufuneka bathobele uThixo.
4 Noko ke, ngelishwa uAdam noEva abazange bawuthobele umthetho kaThixo. (Genesis 3:1-6) Ngenxa yaloo nto, baba ngaboni, kuba “isono sikukuchas’ umthetho.” (1 Yohane 3:4) Ngenxa yoko, laphelel’ emoyeni ithemba lobomi obungunaphakade kuAdam noEva. Ngoba? Kuba “umvuzo isono esiwuhlawulayo kukufa.” (Roma 6:23) Ngaloo ndlela, xa wayewisa isigwebo kuAdam noEva, uThixo wathi: “Uluthuli, uya kubuyela kwaseluthulini.” Ngoko abazali bethu bokuqala bagxothwa kwelo khaya labo liyiParadesi. Ngaloo mini bona ngayo, uAdam noEva bathi chu betotobela kwaNtsonganyawana.—Genesis 3:19, 23, 24.
“Ukufa Kwasasazeka Kubo Bonke Abantu”
5 UAdam noEva babesele benesibhaxu sesono. Ngenxa yoko, babengenakuze bazale abantwana abafezekileyo, kanye njengokuba into yokubumba egxokogxoko ingenakuvelisa into ethe tse. (Yobhi 14:4) Eneneni, nanini na kuzalwa umntu sitsho sibone ukuba abazali bethu bokuqala bayilahla kude impilo efezekileyo nobomi obungunaphakade baza baphosanisa abantwana babo nelo cham. Umpostile ongumKristu uPawulos wabhala wathi: “Isono sangena ngamntu mnye ehlabathini nokufa ngaso isono, ngaloo ndlela ukufa kwasasazeka kubo bonke abantu ngenxa yokuba bonke bonayo.”—Roma 5:12; thelekisa INdumiso 51:5.
6 Namhlanje izazinzulu azisazi isizathu sokuba abantu baluphale baze bafe. Noko ke iBhayibhile, iyasichazela ukuba sifa ngenxa yokuba sizalelwe esonweni, meko leyo abasithi ntimfa ngayo abazali bethu bokuqala abangabantu. Kodwa kwenzeka ntoni kuthi xa sifayo?
[Imibuzo YeSifundo]
1, 2. (a) Abantu badalwa benawuphi umnqweno? (b) Isibini sokuqala esingabantu sasiphila ubomi obunjani?
3. Kwakufuneka benze ntoni uAdam noEva ukuze baphile ngonaphakade?
4. Xa uAdam noEva bonayo, kwakutheni ukuze liphelel’ emoyeni ithemba labo lokuphila ngonaphakade eParadesi?
5. Ukufa kwabatyhutyha njani abantu?
6. Kutheni sisifa?