Isahluko Seshumi Elinesithandathu

Siyasondela Isiphelo Sookumkani Abalwayo

1, 2. Watshintsha njani ukumkani wasemntla emva kwemfazwe yehlabathi yesibini?

SICHAZA imeko yezobupolitika yaseUnited States naseRashiya, isithandi sobulumko esikwangumbhali-mbali saseFransi uAlexis de Tocqueville ngowe-1835 sabhala sisithi: “Elinye lisekela yonk’ into eliyenzayo kwinkululeko; ngoxa elinye liqanyangelwe ngamakhamandela. La mazwe . . . ahamba iindlela ezahlukeneyo; noko ke, ngalinye libonakala ngathi linikwe amandla athile nguThixo ukuze ngeny’ imini ikamva lesiqingatha sehlabathi libe sezandleni zalo.” Lwaqhuba njani olu thelekelelo ekuqhambukeni kweMfazwe Yehlabathi II? Umbhali-mbali uJ. M. Roberts uyabhala: “Ekupheleni kweMfazwe Yehlabathi yesibini, okunene ikamva lehlabathi lada labonakala lisezandleni zamagunya amabini amakhulu ahluke okwempuma kwintshona, elinye lisezandleni zoko bekubizwa ngokuba yiRashiya, ngoxa elinye liseUnited States of America.”

² Ebudeni beemfazwe ezimbini zehlabathi, iJamani yayilutshaba oluphambili lokumkani wasemzantsi—iGunya Lehlabathi LamaNgesi NamaMerika—ibe yayingukumkani wasemntla. Noko ke, emva kweMfazwe Yehlabathi II, elo lizwe lahlulwa. INtshona Jamani yaba lihlakani lokumkani wasemzantsi, yaza iMpuma Jamani yazakhel’ ubuhlobo nolunye umanyano olunamandla—amazwe obuKomanisi awayekhokelwa yiSoviet Union. La mazwe, okanye oorhulumente bezobupolitika, aba ngukumkani wasemntla, eluthiy’ egazini umanyano lwamaNgesi NamaMerika. Kwaye ubutshaba obabuphakathi kwaba kumkani babini baba yiMfazwe Yomlomo eyasusela ngowe-1948 yaya kutsho ngowe-1989. Ngaphambilana, ukumkani wasemntla ongumJamani wayenze ‘ngokuchasene nomnqophiso ongcwele.’ (Daniyeli 11:28, 30) La mazwe obuKomanisi ayeza kuwuphatha njani umnqophiso?

AMAKRISTU OKWENYANISO ABA ZIZISULU KODWA AYOYISA

3, 4. Ngoobani abo “bawuphatha ngokungendawo umnqophiso,” yaye luluphi ulwalamano abaye banalo nokumkani wasemntla?

³ Ingelosi kaThixo yathi: “Abo bawuphatha ngokungendawo umnqophiso, [ukumkani wasemntla] uya kubakhokelela kuwexuko ngamazwi agudileyo.” Le ngelosi yalek’ umsundulo ngelithi: “Kodwa ke bona abantu abamaziyo uThixo wabo, baya koyisa, baphumelele. Abo banengqiqo phakathi kwabantu, baya kunika abaninzi ukuqonda. Kodwa ke kangangeentsuku ezithile baya kuba zizisulu zekrele, namadangatye, nokuthinjwa, nokuphangwa.”—Daniyeli 11:32, 33.

⁴ Abakho abanye ‘abanokuwuphatha ngokungendawo umnqophiso’ ngaphandle kweenkokeli zeNgqobhoko, ezizibanga zingamaKristu ngoxa izenzo zazo zihlambela kwaigama elithi ubuKristu. Kwincwadi yakhe ethi Religion in the Soviet Union, uWalter Kolarz uthi: “[Ebudeni bemfazwe yehlabathi yesibini] uRhulumente waseRashiya wenza umgudu wokurhwebesha iiCawa ukuba zimxhase ngamarhamente azo nangezinto eziphathekayo ukuze akhusele ilizwe lakhe.” Emva kwemfazwe iinkokeli zecawa zazama ukubugcina obo buhlobo, nangona eli gunya ngoku elalingukumkani wasemntla lalinenkqubo esekelwe kukungakholelwa kubukho bukaThixo. Ngaloo ndlela, iNgqobhoko yaba yinxalenye yeli hlabathi ngakumbi kunangaphambili—iwexuke ngendlela elizothe emehlweni kaYehova.—Yohane 17:16; Yakobi 4:4.

5, 6. Yayingoobani “abantu abamaziyo uThixo wabo,” yaye baqhuba njani phantsi kokumkani wasemntla?

⁵ Kuthekani ngamaKristu okwenyaniso—“abantu abamaziyo uThixo wabo” kunye ‘nabo banengqiqo’? Nangona ngokufanelekileyo ‘ayewathobela amagunya awongamileyo,’ amaKristu awayephantsi kolawulo lokumkani wasemntla ayengeyonxalenye yeli hlabathi. (Roma 13:1; Yohane 18:36) Ekuxhalabele ukubuyisela “izinto zikaKesare kuKesare,” kwakhona anikela “izinto zikaThixo kuThixo.” (Mateyu 22:21) Ngenxa yoku, ingqibelelo yawo yacelw’ umngeni.—2 Timoti 3:12.

⁶ Ngenxa yoko, amaKristu okwenyaniso ‘aba zizisulu’ kodwa “oyisa.” Aba zizisulu ngokutshutshiswa kanobom, amanye ada abulawa. Kodwa oyisa kuba inkoliso yawo yahlala ithembekile. Aloyisa ihlabathi, kanye njengoko uYesu wenzayo. (Yohane 16:33) Ngaphezu koko, akazange ayeke ukushumayela, kwanaxa esentolongweni okanye kwiinkampu zoxinaniso. Ngokwenjenjalo, ‘anika abaninzi ukuqonda.’ Phezu kwayo nje intshutshiso eyayigquba kwinkoliso yamazwe awayephantsi kokumkani wasemntla, inani lamaNgqina kaYehova landa. Ngenxa yokuthembeka ‘kwabo banengqiqo,’ siye sanda “isihlwele esikhulu” kuloo mazwe.—ISityhilelo 7:9-14.

ABANTU BAKAYEHOVA BAYASULUNGEKISWA

7. Luluphi “uncedo oluncinane” olwafunyanwa ngamaKristu athanjisiweyo awayephantsi kokumkani wasemntla?

⁷ Ingelosi yathi: “Ngexesha laloo nkxwaleko [abantu bakaThixo] baya kuzuza uncedo oluncinane.” (Daniyeli 11:34a) Uloyiso lokumkani wasemzantsi kwimfazwe yehlabathi yesibini lwezisa isiqabu kumaKristu awayephila phantsi kokumkani olutshaba. (Thelekisa ISityhilelo 12:15, 16.) Ngokufanayo, abo babetshutshiswa ngukumkani owalandelayo babefumana isiqabu ngamaxesha athile. Njengoko iMfazwe Yomlomo yayisiya ngasekupheleni, iinkokeli ezininzi zayiqonda into yokuba amaKristu athembekileyo akasosisongelo zaza ngaloo ndlela zawamkela ngokusemthethweni. Olunye uncedo lwavela kumanani andayo esihlwele esikhulu, esasabelayo ekushumayeleni ngokuthembeka kwabathanjiswa saza naso sabancedisa.—Mateyu 25:34-40.

8. Abanye bangenelela njani kubantu bakaThixo ‘ngokuhanahanisa’?

⁸ Asingabo bonke ababesithi banomdla wokukhonza uThixo ebudeni beMfazwe Yomlomo ababeneentshukumisa ezintle. Ingelosi yayilumkisile isithi: “Abaninzi baya kuzibandakanya nabo behanahanisa.” (Daniyeli 11:34b) Abaninzi babonakalisa umdla enyanisweni kodwa bengavumi ukuzinikela kuThixo. Ukanti abanye babebonakala bezamkele iindaba ezilungileyo ngoxa enyanisweni babeziintlola ezithunyelwe ngabasemagunyeni. Ingxelo evela kwelinye ilizwe ifundeka ngolu hlobo: “Amanye ala matshivela ayengamaKomanisi azinikeleyo awanyebelezela kwintlangano yeNkosi, abonakalisa inzondelelo enkulu, ada amiselwa nakwizikhundla eziphakamileyo zenkonzo.”

9. Kwakutheni ukuze uYehova avumele amanye amaKristu athembekileyo ukuba “akhubeke” ngenxa yoontamnani?

⁹ Le ngelosi yaqhubeka yathi: “Bambi kwabo banengqiqo baya kukhubeka, kodwa olu iya kuba luvavanyo lokusulungekiswa nokuhlanjululwa kwabo, kude kube sisiphelo, esiya kufika ngexesha elimiselweyo.” (Daniyeli 11:35) Aba ntamnani babangela ukuba abanye abathembekileyo bawele ezandleni zabasemagunyeni. UYehova wakuvumela oko ukuze kusulungekiswe kuze kuhlanjululwe abantu bakhe. Kanye njengokuba uYesu “wafunda ukuthobeka ngeembandezelo awazifumanayo,” nabo bathembekileyo bafunda ukunyamezela ngenxa yokulingwa kokholo lwabo. (Hebhere 5:8; Yakobi 1:2, 3; thelekisa uMalaki 3:3.) Ngaloo ndlela ‘basulungekisiwe baza bahlanjululwa.’

10. Lithetha ukuthini ibinzana elithi “kude kube sisiphelo”?

¹⁰ Abantu bakaYehova babeseza kukhubeka yaye basulungekiswe “kude kube sisiphelo.” Kakade ke, balindele ukutshutshiswa de kufike isiphelo sale nkqubo yezinto. Noko ke, ukusulungekiswa nokuhlanjululwa kwabantu bakaThixo ngenxa yokungenelela kokumkani wasemntla ‘kwakukokwexesha elimiselweyo.’ Ngenxa yoko, kuDaniyeli 11:35, “isiphelo” simele sibhekisele kwisiphelo sexesha elifunekayo ukuze abantu bakaThixo basulungekiswe ngoxa benyamezela ukuxhatshazwa ngukumkani wasemntla. Kuyabonakala ukuba ukukhubeka kwaphela ngexesha elimiselwe nguYehova.

UKUMKANI UZENZA MKHULU

11. Yathini ingelosi ngesimo sengqondo sokumkani wasemntla ngokuphathelele ulongamo lukaYehova?

¹¹ Ithetha ngokumkani wasemntla, ingelosi yongezelela yathi: “Ukumkani lowo ke uya kwenza unothanda, aziphakamise, azenze mkhulu kunabo bonke oothixo; [engalugqali ulongamo lukaYehova] athethe izinto ezinkulu nxamnye noThixo woothixo. Ngokuqinisekileyo uya kuphumelela side siphele isiqalekiso; ngenxa yokuba kumele kwenzeke oko kugqitywe kuko. Akayi kumkhathalela uThixo wooyise; engayi kukukhathalela noko kulangazelelwa ngabafazi kwanabo bonke abanye oothixo, kodwa uya kuzenza mkhulu ngaphezu kwakhe wonk’ ubani.”—Daniyeli 11:36, 37.

12, 13. (a) Ukumkani wasemntla wamchasa njani “uThixo wooyise”? (b) Yayingoobani “abafazi” ukumkani wasemntla angazange akunanze nganto ‘oko bakulangazelelayo’? (c) Nguwuphi lo “thixo” ukumkani wasemntla awayelunikela kuye uzuko?

¹² Ezalisekisa la mazwi esiprofeto, ukumkani wasemntla wamnikel’ umva “uThixo wooyise,” onjengothixo onguBathathu Emnye weNgqobhoko. Amazwe obuKomanisi ayelikhupha litsole elokuba uThixo akakho. Ngaloo ndlela ukumkani wasemntla wazenza uthixo, ‘ezenza mkhulu ngaphezu kwakhe wonk’ ubani.’ Engakukhathalele kwaphela oko “kulangazelelwa ngabafazi”—amazwe amxhasayo anjengomNtla weVietnam, awayenjengezicakakazi zolawulo lwakhe—lo kumkani wenza “ngokokuthanda kwakhe.”

¹³ Iqhubeka nesi siprofeto, ingelosi yathi: “Uya kuzukisa uthixo weenqaba, thixo lowo ababengamazi ooyise; amzukise ngegolide, nangesilivere, nangamatye anqabileyo, nangezinto ezinqwenelekayo.” (Daniyeli 11:38) Enyanisweni, ukumkani wasemntla wakholosa ngobugcisa bale mihla benzululwazi yezomkhosi, “uthixo weenqaba.” Wayeqamele ngalo “thixo,” enikela ngentaphane yobuncwane kwisibingelelo sakhe.

14. Ukumkani wasemntla ‘wahlasela njani ngempumelelo’?

¹⁴ “Uya kuhlasela ngempumelelo nawona magwiba anqatyisiweyo, ekholose ngalo thixo wakhe wasemzini. Uya kubazukisa abo bamvumayo lo thixo, aze ababeke ezikhundleni eziphezulu, abavuze nangemihlaba.” (Daniyeli 11:39) Ekholose “ngalo thixo wakhe wasemzini” wezomkhosi, ukumkani wasemntla ‘wahlasela ngempumelelo,’ ezingqina eligunya elingenakuchukunyiswa mntu ‘lemihla yokugqibela.’ (2 Timoti 3:1) Abo babexhasa iingcamango zakhe babevuzwa ngokunikwa inkxaso yezobupolitika, yemali, maxa wambi neyomkhosi.

‘USUKUZWANO’ NGEXESHA LOKUPHELA

15. Ukumkani wasemzantsi ‘wasukuzana’ njani nokumkani wasemntla?

¹⁵ Ingelosi yaxelela uDaniyeli isithi: “Ngexesha lesiphelo ukumkani wasemzantsi uya kusukuzana naye.” (Daniyeli 11:40a) Ngaba ukumkani wasemzantsi ukhe ‘wasukuzana’ nokumkani wasemntla ebudeni ‘bexesha lesiphelo’? (Daniyeli 12:4, 9) Kunjalo kanye. Emva kwemfazwe yehlabathi yokuqala, ngokuqinisekileyo isivumelwano esenziwayo sokohlwaya ukumkani wasemntla welo xesha—iJamani—‘sasilusukuzwano,’ sixhokonxa impindezelo. Emva kokoyisa kwimfazwe yehlabathi yesibini, ukumkani wasemzantsi wajolisa izixhobo ezoyikekayo zenyukliya kutshaba lwakhe waza waqula waligangatha ngomkhosi oyimbumba onamandla, iNorth Atlantic Treaty Organization (NATO). Ethetha ngeyona njongo yokuyilwa kweNATO, umbhali-mbali waseBritani uthi: “Yayisesona sixhobo siphambili ‘sokuxhathisa’ iUSSR, ngoku eyayigqalwa njengesona sisongelo siphambili soxolo eYurophu. Iphulo layo lathabatha iminyaka engama-40, yaye laphumelela ngendlela engathethekiyo.” Njengoko kwakudlula iminyaka iMfazwe Yomlomo iqhubeka, ‘usukuzwano’ olwaluqhwaywe ngukumkani wasemzantsi lwalubandakanya ubugcisa bokucupha kunye nokujijisana kwezozakuzo nakwezomkhosi.

16. Ukumkani wasemntla wasabela njani kusukuzwano olwaqhwaywa ngukumkani wasemzantsi?

¹⁶ Wafana wathini ke ukumkani wasemntla? “Aze ukumkani wasentla agaleleke kuye njengesaqhwithi eneenqwelo, nabakhweli-mahashe, neenqanawa ezininzi; yaye ngokuqinisekileyo uya kungena emazweni akhukule adlule.” (Daniyeli 11:40b) Imbali yemihla yokugqibela iye yenza amavandlakanya ngenkqubo yokwandisa umhlaba ebilandelwa ngukumkani wasemntla. Ebudeni bemfazwe yehlabathi yesibini, “ukumkani” wamaNazi wagqobhoza kwimida yakhe waza waya kungena kumazwe aselumelwaneni. Ekupheleni kwaloo mfazwe, “ukumkani” owalandelayo wakha ubukhosi obunamandla. Ebudeni beMfazwe Yomlomo, ukumkani wasemntla walwa notshaba lwakhe ngokuxhasa amazwe anxamnye naye ezimfazweni nangokuxhasa iimvukelo eAfrika, eAsia nakuMbindi noMzantsi Merika. Wawatshutshisa amaKristu okwenyaniso, exaba endleleni kumsebenzi wawo—kodwa ke akazange awuthintele. Yaye iphulo lakhe lezomkhosi nelezobupolitika labangela ukuba amazwe amaninzi angene phantsi kwekhwapha lakhe. Yiloo nto kanye ke eyayiprofetwe yingelosi isithi: “Okunene uya kungena nasezweni Eliligugu [umhlaba wokomoya wabantu bakaYehova], akhubekise amazwe amaninzi.”—Daniyeli 11:41a.

17. Yiyiphi imida awayisikelwayo ukumkani wasemntla kwiphulo lakhe lokwandisa umhlaba wakhe?

¹⁷ Noko ke, ukumkani wasemntla akazange aloyise lonke ihlabathi. Ingelosi yaxela kwangaphambili isithi: “Ke wona amaEdom, namaMowabhi, nenxalenye eyintloko yoonyana baka-Amon, baya kusinda esandleni sakhe.” (Daniyeli 11:41b) Mandulo phaya, amaEdom, namaMowabhi nama-Amon ayephakathi kwemida yokumkani wasemzantsi waseYiputa nokumkani wasemntla waseSiriya. Namhlanje la mazwe amela iintlanga kunye nemibutho eyayigxeleshwe ngukumkani wasemntla kodwa akakwazi ukuyiphembelela.

IYIPUTA AYISINDI

18, 19. Ziziphi iindlela awathi ukumkani wasemzantsi wayiva ngazo impembelelo yotshaba lwakhe?

¹⁸ Ingelosi kaYehova yahlabela mgama isithi: “[Ukumkani wasemntla] uya kusolula isandla sakhe emazweni; nelizwe laseYiputa aliyi kusinda. Uya kubulawula ubuncwane obufihliweyo begolide, nobesilivere, nobazo zonke izinto ezinqwenelekayo zaseYiputa. Aya kumlandela amaLibhiya namaTiyopiya.” (Daniyeli 11:42, 43) Nkqu nokumkani wasemzantsi, ‘iYiputa,’ akazange asinde kwimiphumo yeenkqubo zokwandisa umhlaba zokumkani wasemntla. Ngokomzekelo, ukumkani wasemzantsi woyiswa ngokupheleleyo eVietnam. Yaye kuthekani ke ‘ngamaLibhiya namaTiyopiya’? Aba bamelwane beYiputa yamandulo basenokuzifanekisela kakuhle iintlanga ezingabamelwane bokoqobo ‘beYiputa’ yale mihla (ukumkani wasemzantsi). Maxa wambi, ziye ‘zamlandela’ ukumkani wasemntla.

¹⁹ Ngaba ukumkani wasemntla uye walawula phezu ‘kobuncwane obufihliweyo baseYiputa’? Eneneni uye wanempembelelo kakhulu kwindlela ukumkani wasemzantsi ayisebenzise ngayo imali yakhe. Esoyika utshaba lwakhe, ukumkani wasemzantsi uye wasebenzisa izityhwentywe zemali ukuze agcine umkhosi wamajoni, owaselwandle nowasemoyeni womelele. Ngaloo ndlela, ukumkani wasemntla ‘wabulawula’ ubuncwane bokumkani wasemzantsi.

IPHULO LOKUGQIBELA

20. Ingelosi ilichaza njani iphulo lokugqibela lokumkani wasemntla?

²⁰ Ungquzulwano oluphakathi kokumkani wasemntla nokumkani wasemzantsi—enoba lolomkhosi, loloqoqosho okanye lolunye—lusondela esiphelweni. Ityhila iinkcukacha zongquzulwano oluzayo, ingelosi kaYehova yathi: “Kuya kubakho iingxelo eziya kumphazamisa [ukumkani wasemntla], eziphuma empumalanga nasemntla, aze ke anduluke enomsindo omkhulu, ahambe ebhubhisa, etshabalalisa abaninzi. Ke iintente zebhotwe lakhe uya kuzityala phakathi kolwandle olukhulu nentaba engcwele yelizwe Eliligugu; aze afikelwe sisiphelo sakhe, engenamncedi.”—Daniyeli 11:44, 45.

21. Yintoni esisamele siyazi ngokumkani wasemntla?

²¹ Kwathi kwakuchithwa iSoviet Union ngoDisemba 1991, ukumkani wasemntla wangquleka phantsi kabuhlungu. Ngubani oza kuba ngulo kumkani xa uDaniyeli 11:44, 45 ezaliseka? Ngaba iza kuba lelinye lamazwe awayeyinxalenye yoko kwakusakuba yiSoviet Union? Okanye ngaba uza kutshintsha ngokupheleleyo, njengokuba sele enzile kangangezihlandlo eziliqela ngaphambili? Ngaba ukwenziwa kwezixhobo zenyukliya zezinye iintlanga ezongezelelekileyo kuya kudala olunye ukhuphiswano lwezixhobo aze ke ngaloo ndlela abonakale loo kumkani? Le mibuzo iza kuphenduleka ekuhambeni kwexesha. Kuya kuba bubulumko ukuba singazifuniseli iimpendulo. Xa ukumkani wasemntla ephum’ iphulo lokugqibela, ukuzaliseka kwesiprofeto kuya kubonwa nguye wonk’ ubani onengqiqo esekelwe eBhayibhileni.—Bona ibhokisi enomxholo othi “Ookumkani AbakuDaniyeli Isahluko 11,” kwiphepha 284.

22. Yiyiphi imibuzo ephakamayo ngokuphathelele uhlaselo lokugqibela lokumkani wasemntla?

²² Noko ke, siyayazi into eza kwenziwa ngukumkani wasemntla kungekudala. Eqhutywa ziingxelo “eziphuma empumalanga nasemntla,” uya kuphuma iphulo ‘ukuze abhubhise abaninzi.’ Liza kujoliswa koobani eli phulo? Yaye ziziphi ezi “ngxelo” eziza kuxhokonxa olo hlaselo?

WOTHUSWA YINGXELO EPHAZAMISAYO

23. (a) Sisiphi isiganeko esibalaseleyo esimele senzeke ngaphambi kweArmagedon? (b) Ngoobani ‘ookumkani abavela ekuphumeni kwelanga’?

²³ Khawuqwalasele oko incwadi yeSityhilelo ikutshoyo ngesiphelo seBhabhiloni Enkulu, ubukhosi behlabathi bonqulo lobuxoki. Ngaphambi ‘kwemfazwe yemini enkulu kaThixo uSomandla,’ iArmagedon, olu tshaba luphambili lonqulo lokwenyaniso ‘luya kutshiswa ngokupheleleyo ngomlilo.’ (ISityhilelo 16:14, 16; 18:2-8) Ukutshatyalaliswa kwayo kufuziselwa ngokuthululwa kwesitya sesithandathu sengqumbo kaThixo kumlambo umEfrati wokomfuziselo. Lo mlambo uyatsha ukuze “ilungiswe indlela yookumkani abavela ekuphumeni kwelanga.” (ISityhilelo 16:12) Bangoobani aba kumkani? Abakho abanye ngaphandle koYehova uThixo noYesu Kristu!—Thelekisa uIsaya 41:2; 46:10, 11.

24. Sisiphi isenzo sikaYehova esisenokumphazamisa ukumkani wasemntla?

²⁴ Ukutshatyalaliswa kweBhabhiloni Enkulu kuchazwe ngokucacileyo kwincwadi yeSityhilelo, ethi: “Iimpondo ezilishumi ozibonileyo [ookumkani abalawula ngexesha lesiphelo], nerhamncwa [iZizwe Ezimanyeneyo], ngabo baya kulithiya ihenyukazi, baliphanzise, balihlube libe ze, bazidle iinxalenye zenyama yalo baze balitshise ngokupheleleyo ngomlilo.” (ISityhilelo 17:16) Yintoni eza kubangela ukuba abalawuli bayitshabalalise iBhabhiloni Enkulu? Kungenxa yokuba ‘uThixo ubeka oko ezintliziyweni zabo ukuba baphumeze ingcamango yakhe.’ (ISityhilelo 17:17) Phakathi kwaba balawuli kukho nokumkani wasemntla. Loo nto ayivayo ‘ephuma empumalanga’ isenokuba isisenzo sikaYehova, xa efaka ezintliziyweni zabalawuli abangabantu ingcamango yokubhubhisa ihenyukazi elikhulu lonqulo.

25. (a) Yiyiphi indawo ajolisa kuyo ngokukhethekileyo ukumkani wasemntla? (b) Ukumkani wasemntla ‘uzityala phi iintente zebhotwe lakhe’?

²⁵ Kodwa ke ikho le ndawo ikhethekileyo ejoliswe kuyo ingqumbo yokumkani wasemntla. Ingelosi ithi uya “kutyala iintente zebhotwe lakhe phakathi kolwandle olukhulu nentaba engcwele yelizwe Eliligugu.” Ngexesha likaDaniyeli, ulwandle olukhulu yayilolweMeditera yaye intaba engcwele iyeyeZiyon, eyayikhe yema kuyo itempile kaThixo. Ngenxa yoko ke, kwinzaliseko yesiprofeto, lo kumkani wasemntla uphathw’ emanyeni uphuma iphulo nxamnye nabantu bakaThixo. Ngengqiqo yokomoya, indawo ‘ephakathi kolwandle olukhulu nentaba engcwele’ imela umhlaba wokomoya wabakhonzi abathanjisiweyo bakaYehova. Baye baphuma ‘kulwandle’ lwabantu abangenanto yakwenza noThixo yaye banethemba lokulawula kwiNtaba yeZiyon esezulwini kunye noYesu Kristu.—Isaya 57:20; Hebhere 12:22; ISityhilelo 14:1.

26. Njengoko kuboniswe sisiprofeto sikaHezekile, zisenokuba zivela phi iindaba ‘eziphuma emntla’?

²⁶ UHezekile, owayephila ngexesha likaDaniyeli, naye waprofeta ngohlaselo olwaluza kujoliswa kubantu bakaThixo “ekupheleni kwemihla.” Wathi obo butshaba babuya kuntyontyelwa nguGogi wakwaMagogi, ngamany’ amazwi nguSathana uMtyholi. (Hezekile 38:14, 16) Ngokomfuziselo, uvela kweliphi icala uGogi lo? “Kweyona mimandla ithe qelele yasemntla,” utsho uYehova, esebenzisa uHezekile. (Hezekile 38:15) Enoba angabahlasela ngolunya kangakanani na, akasokuze abatshabalalise abantu bakaYehova. Loo nto iza kubangelwa ngamanyathelo kaYehova okubhubhisa imikhosi kaGogi. Ngaloo ndlela uYehova uthi kuSathana: ‘Ngokuqinisekileyo ndiya kukufaka amagwegwe emihlathini ndize ndikuzise.’ ‘Ndiza kukunyusa kweyona mimandla ithe qelele yasemntla ndikuzise ezintabeni zakwaSirayeli.’ (Hezekile 38:4; 39:2) Ngoko ke, iindaba ‘eziphuma emntla’ ezimphath’ emanyeni ukumkani wasemntla zimele ukuba zivela kuYehova. Kodwa ke eyokuba ziza kube zisithini ezo ngxelo “eziphuma empumalanga nasemntla,” nguThixo kuphela oya kugqiba ibe thina siya kuyazi ekuhambeni kwexesha.

27. (a) Kutheni uGogi eza kuphembelela iintlanga, kuquka nokumkani wasemntla, ukuba zihlasele abantu bakaYehova? (b) Luya kuphelela phi uhlaselo lukaGogi?

²⁷ Ke yena uGogi uxhobe waf’ amacala elungiselela ukuhlasela ngenxa yokubona inkqubela ‘kaSirayeli kaThixo,’ kunye ‘nesihlwele esikhulu’ ‘sezinye izimvu,’ esingeyonxalenye yehlabathi lakhe. (Galati 6:16; ISityhilelo 7:9; Yohane 10:16; 17:15, 16; 1 Yohane 5:19) UGogi usigxeleshile “isizwana esihlanganiselwe ndawonye siphuma ezintlangeni, eso siziqwebela indyebo nempahla [yokomoya].” (Hezekile 38:12) Egqala umhlaba wokomoya wamaKristu ‘njengelizwe elivulekileyo lasemaphandleni’ elinokuthiwa xhwii nanini na, uGogi wenza umgudu omkhulu wokushenxisa loo mqobo uxabe endleleni yakhe ukuze alulawule ngokupheleleyo uluntu. Kodwa utsho phantsi. (Hezekile 38:11, 18; 39:4) Xa ookumkani bomhlaba, kuquka nokumkani wasemntla, behlasela abantu bakaYehova, ‘baya kufikelela ekupheleni kwabo.’

‘UKUMKANI UYA KUFIKELELA EKUPHELENI KWAKHE’

28. Sazi ntoni ngekamva lokumkani wasemntla nokumkani wasemzantsi?

²⁸ Kwiphulo lakhe lokugqibela, ukumkani wasemntla akalwi nokumkani wasemzantsi. Ngoko ke, ukumkani wasemntla akapheleli ezandleni zotshaba lwakhe olukhulu. Ngokufanayo, nokumkani wasemzantsi akatshatyalaliswa ngukumkani wasemntla. Ukumkani wasemzantsi uyatshatyalaliswa, “kungengasandla [samntu],” kodwa buBukumkani bukaThixo.a (Daniyeli 8:25) Enyanisweni, kwanto nje ingukumkani wasemhlabeni iza kushenxiswa buBukumkani bukaThixo, kwidabi leArmagedon, yaye kuyacaca ke ukuba koba njalo nakukumkani wasemntla. (Daniyeli 2:44) UDaniyeli 11:44, 45 uchaza iziganeko ezikhokelela kwelo dabi lokugqibela. Ayimangalisi ngoko into yokuba ‘kungayi kubakho mncedi’ xa ukumkani wasemntla ecinyw’ igama!

[Umbhalo osemazantsi]

UZUZE NTONI?

• Watshintsha njani ukumkani wasemntla emva kwemfazwe yehlabathi yesibini?

• Ekugqibeleni kuza kwenzeka ntoni kukumkani wasemntla nakukumkani wasemzantsi?

• Ungenelwe njani ngokunikela ingqalelo kwisiprofeto sikaDaniyeli esiphathelele ookumkani ababini abangquzulanayo?

[Isicangca/Umfanekiso okwiphepha 284]

OOKUMKANI ABAKUDANIYELI ISAHLUKO 11

Daniyeli 11:5 USeleucus I Nicator UPtolemy I

Daniyeli 11:7-9 USeleucus II UPtolemy III

Daniyeli 11:10-12 UAntiochus III UPtolemy IV

Daniyeli 11:20 UAgasto

Daniyeli 11:21-24 UTibheriyo

[Umbhalo osemazantsi]

[Umfanekiso ozalise iphepha, kwiphepha 271]

[Imifanekiso ekwiphepha 279]

‘Usukuzwano’ olwaqhwaywa ngukumkani wasemzantsi lwalubandakanya ubugcisa bokucupha nesisongelo sokuhlasela ngomkhosi