Uloyiso Lokugqibela LukaMikayeli, UMthetheli Omkhulu
“Ngelo xesha, uya kusuka eme uMikayeli, umthetheli omkhulu, omela oonyana babantu bakowenu.”—DANIYELI 12:1.
1. Sisiphi isimo sengqondo esiye sabonakaliswa ngabalawuli abaninzi behlabathi ngakulongamo lukaYehova, kwaye ukumkani wasentla uzibonakalise njani engahlukanga?
“NGUBANI na uYehova, ukuba ndiphulaphule izwi lakhe, lokuba ndindulule uSirayeli?” (Eksodus 5:2) La yayingamazwi kaFaro okungcikiva uMoses. Engavumi ukwamkela ukuba uYehova unguThixo ophakamileyo, uFaro wayezimisele ukugcina uSirayeli esebukhobokeni. Abanye abalawuli baye babonisa indelelo efanayo kuYehova, yaye ookumkani awaprofeta ngabo uDaniyeli abahlukanga koko. (Isaya 36:13-20) Eneneni, ukumkani wasentla uye wathi kratya ngendelelo. Isithunywa sezulu sithi: “Azinyuse, azikhulise ngaphezu koothixo bonke, athethe amazwi abalulekileyo ngoThixo woothixo . . . Akayi kubaqonda oothixo booyise, nokunqwenelekayo kubafazi, nothixo onguwumbi angamqondi, kuba uya kuzikhulisa ngaphezu kwabo bonke.”—Daniyeli 11:36, 37.
2, 3. Yiyiphi indlela ukumkani wasentla angabamkelanga ngayo “oothixo booyise” ukuze anqule omnye “uthixo”?
2 Ezalisekisa la mazwi esiprofeto, ukumkani wasentla akazange abamkele “oothixo booyise” (okanye, “oothixo bookhokho bakhe,” The New English Bible), enoba ngoothixo bobuhedeni baseRoma okanye ubuthixo bukaBathathu Emnye weNgqobhoko. UHitler wasebenzisa iNgqobhoko ukuze afeze iinjongo zakhe kodwa kubonakala ukuba wayeceba ukuyithabathel’ indawo ngecawa entsha yaseJamani. Ilandela lakhe lakhuthaza ukungakholelwa ngokupheleleyo kuThixo. Ngaloo ndlela ukumkani wasentla uye wazenza uthixo, ‘eziphakamisa ngaphezu kwabo bonke.’
3 Isiprofeto siyaqhubeka: “Endaweni yabo wozukisa uthixo weenqaba, uthixo ababengamazi ooyise; amzukise ngegolide, nangesilivere, nangamatye anqabileyo, nangezinto ezinqwenelekayo.” (Daniyeli 11:38) Enyanisweni, ukumkani wasentla wakholosa ngenkqubo yomkhosi yezi mini esebenzisa inzululwazi, “uthixo weenqaba.” Kulo lonke eli xesha lokuphela, uye wafuna ukuzisindisa ngalo “thixo,” enikela intaphane yobutyebi kwisibingelelo sakhe.
4. Yiyiphi impumelelo aye wanayo ukumkani wasentla?
4 “Wokwenzela oku [“uya kwenza ngokuphumelelayo nxamnye,” NW] iinqaba ezinqatyisiweyo ngothixo wolunye uhlanga; lo umbukayo, uya kumandisela uzuko, amphathise abaninzi, amabele umhlaba ngokumvuza.” (Daniyeli 11:39) Ekholose “ngothixo wolunye uhlanga” wezomkhosi, ukumkani wasentla uye wenza ngeyona ndlela ‘iphumelelayo,’ engqineka eligunya elinamandla kwezomkhosi “ngemihla yokugqibela.” (2 Timoti 3:1) Abo babexhasa iingcamango zakhe wabavuza ngokubaxhasa kwezobupolitika, ngemali yaye maxa wambi nangezomkhosi.
“Ngexesha Lokuphela”
5, 6. Ukumkani wasezantsi uye ‘wahlaba’ njani, yaye ukumkani wasentla uye wasabela njani?
5 UDaniyeli 11:40a ufundeka ngolu hlobo: “Ngexesha lokuphela uya kuhlabana nokumkani wasezantsi.” Le ndinyana kunye nezilandelayo ziye zagqalwa njengeziya kuzaliseka kwikamva lethu. Noko ke, ukuba eli “xesha lokuphela” libhekisela kwixesha elifanayo nelo likaDaniyeli 12:4, 9, sifanele siyilindele inzaliseko yala mazwi kule mihla yokugqibela. Ngaba ukumkani wasezantsi uye ‘wahlabana’ nokumkani wasentla ebudeni beli xesha? Eneneni, kunjalo. Emva kwemfazwe yehlabathi yokuqala, ngokuqinisekileyo isivumelwano soxolo esasenziwe ngenjongo yokohlwaya ‘sasikukuhlabana,’ into eyayixhokonxa ukuziphindezelela. Akuba oyisile kwimfazwe yehlabathi yesibini, ukumkani wasezantsi wajolisa izixhobo ezoyikekayo zenyukliya kutshaba lwakhe waza wamisa nxamnye nalo umanyano oluluqilima kwezomkhosi, iNATO. Njengoko iminyaka yayihamba, ‘ukuhlaba’ kwakhe kwaquka iindlela zobugcisa obukhulu bobuntlola kwanokumhlasela ngokuphazamisa amaqhina ozakuzo nangomkhosi.
6 Ukumkani wasentla wasabela njani? “Ukumkani wasentla adlongozele aye kuye, eneenqwelo zokulwa, nabamahashe, neenqanawa ezininzi; awangenele amazwe, akhukule, adlule.” (Daniyeli 11:40b) Imbali yemihla yokugqibela iye yabalaselisa ukwanda kommandla wokumkani wasentla. Ebudeni bemfazwe yehlabathi yesibini, “ukumkani” wobuNazi wayandisa imida yakhe yafikelela nakumazwe amngqongileyo. Ekupheleni kwaloo mfazwe, “ukumkani” olilandela wakha ubukhosi obunamandla ngaphaya kwemida yakhe. Ebudeni beMfazwe Yomlomo, ukumkani wasentla walwa notshaba lwakhe ngokuxhasa amazwe awayesilwa namazwe awayexhaswa ngukumkani wasezantsi neenkqubo zovukelo-mbuso eAfrika, eAsia nakuMbindi noMzantsi Merika. Wawatshutshisa amaKristu okwenyaniso, ewudodobalisa (kodwa akazange nangayiphi na indlela awunqumamise) umsebenzi wawo. Yaye ngokuhlasela ngezomkhosi nezopolitiko wabangela ukuba amazwe aliqela abe phantsi kwakhe. Oku kunjengokuba kanye isithunywa sezulu saprofetayo: “Wongena ezweni eliligugu [ilizwe lokomoya labantu bakaThixo], bakhubeke abaninzi.”—Daniyeli 11:41a.
7. Yintoni angazange akwazi ukuyifikelela ukumkani wasentla kwinkqubo yokwandisa ummandla wakhe?
7 Sekunjalo, nakubeni—ngokwembono yotshaba lwakhe—ukumkani wasentla eye wabonakala esisisongelo, akakwazanga kuloyisa ihlabathi. “Ke aba baya kusinda esandleni sakhe: ooEdom, noMowabhi, nentlahlela yoonyana baka-Amon.” (Daniyeli 11:41b) Kumaxesha amandulo, elakwaEdom, elakwaMowabhi nelakwa-Amon ayemi malunga nommandla owawuphakathi kweYiputa neSiriya. Anokugqalwa njengamela amazwe neentlangano namhlanje ukumkani wasentla awayencwase ukuwafumana kodwa akakwazi ukuba nempembelelo kuwo.
‘IYiputa Ayisayi Kusinda’
8, 9. Iye yaphawuleka njani impembelelo yokumkani wasentla, kwanakutshaba lwakhe oluyintloko?
8 Isithunywa sezulu sihlabela mgama sisithi: “Uya kusolula isandla sakhe emazweni la, nelizwe laseYiputa aliyi kusinda. Woba ngumphathi wobutyebi begolide nobesilivere, nobezinto zonke ezinqwenelekayo zaseYiputa; omlandela amaLibhi namaKushi [“namaTiyopiya,” NW].” (Daniyeli 11:42, 43) Kwanokumkani wasezantsi, “iYiputa,” akazange ayiphephe imiphumo yeenkqubo zokumkani wasentla zokwandisa ummandla wakhe. Wayiva imiphumo, wachaphazeleka, ngokomzekelo, woyiswa kanobom eVietnam. Yaye kuthekani ‘ngamaLibhi namaTiyopiya’? Aba bamelwane beYiputa yamandulo basenokuba bafanekisela kusengaphambili amazwe amelene ‘neYiputa’ yanamhlanje, ngokwendlela elimi ngayo ilizwe, nalawo maxa wambi aye angabalandeli, ‘emlandela,’ ukumkani wasentla.
9 Ngaba ukumkani wasentla uye wangumphathi ‘wobutyebi obufihlakeleyo baseYiputa’? Kaloku, ngokuqinisekileyo akamoyisanga ukumkani wasezantsi, yaye ukuza kuthi ga kulo we-1993 imeko yehlabathi yenze kwabonakala kungenakwenzeka ukuba enjenjalo. Kodwa uye wanempembelelo enamandla kwindlela ukumkani wasezantsi ayisebenzisa ngayo imali yakhe. Ngenxa yokoyika utshaba lwakhe, ukumkani wasezantsi uye wachitha intywenka yemali nyaka ngamnye ukuze ahlale enomkhosi, umkhosi wolwandle nomkhosi womoya onamandla. Kungale ndlela ekunokuthiwa ukumkani wasentla uye ‘wangumphathi,’ walawula, indlela obusetyenziswa ngayo ubutyebi bokumkani wasezantsi.
Iphulo Lokugqibela Lokumkani Wasentla
10. Yiyiphi indlela isithunywa sezulu esikuchaza ngayo ukuphela kosukuzwano oluphakathi kookumkani ababini?
10 Ngaba usukuzwano oluphakathi kwaba kumkani babini luqhubeka ngonaphakade? Hayi. Isithunywa sezulu samxelela oku uDaniyeli: “Ziya kumkhwankqisa [ukumkani wasentla] iindaba ezivela empumalanga nasentla, aphume enobushushu obukhulu, ukuze abatshabalalise, abasingele phantsi abaninzi. Wozitwabulula iintente zebhotwe lakhe phakathi kweelwandle, ngasentabeni engcwele eligugu, afike ke ekupheleni kwakhe, kungabikho umncedayo.”—Daniyeli 11:44, 45.
11, 12. Ziziphi iziganeko zakutshanje zezobupolitika ezinokuthanani nosukuzwano oluphakathi kokumkani wasentla nokumkani wasezantsi, ibe yintoni esiseza kuyifunda?
11 Ezi iziganeko ziseza kwenzeka, ngoko asinakuchaza ngokweenkcukacha indlela esiya kuzaliseka ngayo esi siprofeto. Kutshanje, imeko yezobupolitika ebhekisele kwaba kumkani babini iye yaguquka. Usukuzwano olubi phakathi kweUnited States namazwe aseMpuma Yurophu luye lwathotha. Ngaphezu koko, ngowe-1991 iSoviet Union yapheliswa yaye ayisekho.—Bona inkupho kaMatshi 1, 1992, yeMboniselo, iphepha 4, 5.
12 Ngoko ngubani ukumkani wasentla ngoku? Ngaba ulelinye lamazwe ebeyinxalenye yeSoviet Union engasekhoyo? Okanye ngaba uza kuguquka ngokupheleleyo abe lelinye ilizwe, njengoko eye wenjenjalo izihlandlo eziliqela ngaphambili? Asingetsho. Ngubani oya kube engukumkani wasentla xa uDaniyeli 11:44, 45 ezaliseka? Ngaba luya kuphinda luvuke phantsi usukuzwano oluphakathi kwaba kumkani babini? Yaye kuthekani ngentaphane efunjiweyo yezixhobo zenyukliya ezisekhoyo kumazwe amaninzi? Lixesha kuphela eliya kuyiphendula le mibuzo.
13, 14. Sazi ntoni ngekamva laba kumkani babini?
13 Ikho into enye esiyaziyo. Kungekudala, ukumkani wasentla uya kuqalisa iphulo lokuhlasela eliya kuxhokonxwa ‘ziindaba eziya kumkhwankqisa, ezivela empumalanga nasentla.’ Ngoko nangoko eli phulo liya kulandelwa ‘kukuphela’ kwakhe. Sinokufunda okungakumbi ngezi “ndaba” ukuba siqwalasela ezinye iziprofeto zeBhayibhile.
14 Noko ke, okokuqala phawula ukuba ezi zenzo zokumkani wasentla akuthiwa zijoliswe kukumkani wasezantsi. Akapheliswa lutshaba lwakhe olukhulu. Ngokufanayo, ukumkani wasezantsi akatshatyalaliswa ngukumkani wasentla. Ukumkani wasezantsi (kwezinye iziprofeto ochazwe njengophondo lokugqibela olukhula mva erhamncweni) utshatyalaliswa buBukumkani bukaThixo ‘kungengasandla [samntu].’ (Daniyeli 7:26; 8:25) Enyanisweni, ekugqibeleni bonke ookumkani basemhlabeni batshatyalaliswa buBukumkani bukaThixo kwidabi leArmagedon, yaye ngokucacileyo kwenzeka oku nakukumkani wasentla. (Daniyeli 2:44; 12:1; ISityhilelo 16:14, 16) UDaniyeli 11:44, 45 uchaza iziganeko ezikhokelela kwelo dabi lokugqibela. Akumangalisi ke ukuba “kungabikho umncedayo” ukumkani wasentla xa ejamelana nesiphelo sakhe!
15. Yiyiphi imibuzo ebalulekileyo esamele ixutyushwe?
15 Ngoko, ziziphi, ezinye iziprofeto ezisikhanyisela ‘ngeendaba’ ezishukumisela ukumkani wasentla ekubeni azimisele ‘ukusingela phantsi abaninzi’? Kwaye ngoobani “abaninzi” aya kufuna ukubatshabalalisa?
Iindaba Ezivela Empumalanga
16. (a) Sisiphi isiganeko esibalaseleyo esimele senzeke ngaphambi kweArmagedon? (b) Ngoobani “ookumkani abo bavela empumalanga”?
16 Ngaphambi kwedabi lokugqibela, leArmagedon, utshaba olukhulu lonqulo lokwenyaniso lumele lutshatyalaliswe—iBhabhiloni Enkulu enjengehenyukazi, ubukhosi behlabathi lonke bonqulo lobuxoki. (ISityhilelo 18:3-8) Ukutshatyalaliswa kwayo kufanekiselwa kwangaphambili kukuphalazwa kwengqayi yesithandathu yengqumbo kaThixo kumlambo umEfrati wokomfuziselo. Umlambo uyoma “ukuze ilungiswe indlela yookumkani abavela empumalanga.” (ISityhilelo 16:12) Ngoobani aba kumkani? NguYehova uThixo noYesu Kristu!a
17. (a) IBhayibhile isixelela ntoni ngokutshatyalaliswa kweBhabhiloni Enkulu? (b) Iindaba “ezivela empumalanga” zisenokungqineka ziyintoni?
17 Ukutshatyalaliswa kweBhabhiloni Enkulu kuchazwa ngokucacileyo kwincwadi yeSityhilelo: “Iimpondo ezilishumi owazibonayo [‘ookumkani’ abalawulayo ngexesha lokuphela] ziserhamncweni [irhamncwa elibomvu, elimela intlangano yeZizwe Ezimanyeneyo], ngabo baya kulithiya ihenyukazi, baliphanzise, balihlube, bayidle inyama yalo, balitshise ngomlilo.” (ISityhilelo 17:16) Ngokwenyaniso, iintlanga ‘zidla inyama eninzi’! (Daniyeli 7:5) Kodwa kutheni abalawuli, kuquka ukumkani wasentla, beya kuyitshabalalisa nje iBhabhiloni Enkulu? Kungenxa yokuba ‘uThixo ubeke ezintliziyweni zabo ukuba baphumeze ingcinga yakhe.’ (ISityhilelo 17:17) Iindaba “ezivela empumalanga” zisenokubhekisela kwesi senzo sikaYehova, xa, ngendlela athanda ngayo, ekubeka ezintliziyweni zeenkokeli ezingabantu ukuba zitshabalalise ihenyukazi elikhulu lonqulo.—Daniyeli 11:44.
Iindaba Ezivela Ngasentla
18. Liliphi elinye ixhoba ukumkani wasentla ajolise kulo, ibe kuthetha ukuba uphi xa efikelela ekupheleni kwakhe?
18 Kodwa kukho nelinye ixhoba ukumkani wasentla aya kujolisa kulo ingqumbo yakhe. Isithunywa sezulu sithi uya ‘kuzitwabulula iintente zebhotwe lakhe phakathi kweelwandle, ngasentabeni engcwele eligugu.’ (Daniyeli 11:45) Ngexesha likaDaniyeli, iilwandle yayiyiMeditera, ibe intaba engcwele yayiyiZiyon, apho kwakhe kwakho itempile kaThixo. Ngenxa yoko, kwinzaliseko yesiprofeto, ukumkani wasentla onengqumbo uhlasela ngomkhosi abantu bakaThixo! Ngokwengqiqo yokomoya namhlanje, ukuba “phakathi kweelwandle, ngasentabeni engcwele” kuthetha ukuba kwilizwe lokomoya labakhonzi bakaThixo abathanjisiweyo, abaye baphuma ‘kulwandle’ loluntu olutyekileyo nabanethemba lokulawula noYesu Kristu kwiNtaba yaseZiyon yasezulwini.—Isaya 57:20; Hebhere 12:22; ISityhilelo 14:1.
19. Njengoko kuboniswa sisiprofeto sikaHezekile, sinokuzichaza njani iindaba ezixhokonxa uhlaselo lukaGogi? (Bona umbhalo osemazantsi.)
19 NoHezekile, owayephila ngexesha likaDaniyeli, waprofeta ngokuhlaselwa kwabantu bakaThixo “ekupheleni kwemihla.” Wathi ezi ntlaselo zaziya kuqaliswa nguGogi wakwaMagogi, omela uSathana uMtyholi. (Hezekile 38:16) Ngokufuziselayo, uGogi uvela kweliphi icala? UYehova, ngoHezekile, uthi: “Uya kuphuma endaweni yakho, ezingontsini zasentla.” (Hezekile 38:15) Ngenxa yoko, iindaba “ezivela entla” zisenokuba yingxelo yenkohliso evela kuSathana exhokonxa ukumkani wasentla nabo bonke abanye ookumkani ukuba bahlasele abantu bakaYehova.b—Thelekisa ISityhilelo 16:13, 14; 17:14.
20, 21. (a) Kutheni uGogi eza kuxhokonxa iintlanga, kuquka nokumkani wasentla, ukuba zihlasele abantu bakaThixo? (b) Ngaba uhlaselo lwakhe luya kuphumelela?
20 UGogi ulungiselela ukumhlasela kanobom ngenxa yempumelelo yakhe ‘uSirayeli kaThixo,’ lowo, kunye nesihlwele esikhulu sezinye izimvu, ungaseyonxalenye yehlabathi lakhe. (Galati 6:16; Yohane 10:16; 17:15, 16; 1 Yohane 5:19) UGogi ubagxelesha kakubi ‘abantu abahlanganisiweyo ezintlangeni, bezuze imfuyo nempahla [yokomoya].’ (Hezekile 38:12; ISityhilelo 5:9; 7:9) Bezalisekisa la mazwi, abantu bakaYehova namhlanje banda ngendlela engazange ibonwe ngaphambili. Kumazwe amaninzi eYurophu, eAfrika naseAsia apho babekade bevalwe umlomo, ngoku banqula ngokukhululekileyo. Phakathi kowe-1987 nowe-1992, “izinto ezinqwenelekayo” ezingaphezulu kuhle kwisigidi ziye zaphuma ezintlangeni zisiza kwindlu kaYehova yonqulo lokwenyaniso. Ngokomoya, banemfuyo yaye baseluxolweni.—Hagayi 2:7; Isaya 2:2-4; 2 Korinte 8:9.
21 Ebona ilizwe lokomoya lamaKristu ‘linjengelizwe lamaphandle’ elinokoyiswa nje ngokulula, uGogi wenza umgudu omkhulu wokushenxisa lo mqobo uxabe kulawulo lwakhe olupheleleyo loluntu. (Hezekile 38:11) Kodwa uyoyisakala. Xa ookumkani bomhlaba behlasela abantu bakaYehova, baya ‘kufika ekupheleni kwabo.’ Njani?
Ukumkani Wesithathu
22, 23. Xa uGogi ehlasela, ngubani omela abantu bakaThixo, yaye ngayiphi imiphumo?
22 UHezekile uthi ukuhlasela kukaGogi ngumqondiso wokuba uYehova uThixo asukume emela abantu bakhe aze atshabalalise imikhosi kaGogi “ezintabeni zakwaSirayeli.” (Hezekile 38:18; 39:4) Oku kusikhumbuza oko isithunywa sezulu sikuxelela uDaniyeli: “Ngelo xesha uya kusuka eme uMikayeli, umthetheli omkhulu, omela oonyana babantu bakowenu. Kuya kubakho ixesha lembandezelo elingazanga libekho elinjalo, kususela koko lwabakhoyo uhlanga, kude kube nangelo xesha. Ngelo xesha baya kusinda abantu bakowenu, bonke abafunyenwe bebhaliwe encwadini.”—Daniyeli 12:1.
23 Ngowe-1914, uYesu—uMikayeli ongumphumi-mkhosi wasezulwini—waba nguKumkani woBukumkani bukaThixo basezulwini. (ISityhilelo 11:15; 12:7-9) Ukususela ngelo xesha, ebemela ‘oonyana babantu bakuloDaniyeli.’ Noko ke, kungekudala, uya “kusuka eme” egameni likaYehova njengoKumkani onguMphumi-mkhosi ongoyiswayo, ‘ebaphindezela abangamaziyo uThixo, nabangazilulameliyo iindaba ezilungileyo zeNkosi yethu uYesu.’ (2 Tesalonika 1:8) Zonke iintlanga zomhlaba, kuquka ookumkani besiprofeto sikaDaniyeli, ziya ‘kumbambazela.’ (Mateyu 24:30) Zisacinga iingcinga ezimbi ‘ngabantu bakuloDaniyeli,’ ziya kutshatyalaliswa ngonaphakade ‘nguMikayeli, umthetheli omkhulu.’—ISityhilelo 19:11-21.
24. Oku kufundisisa isiprofeto sikaDaniyeli kufanele kube nawuphi umphumo kuthi?
24 Ngaba asilangazeleli ukulubona olo loyiso luzukileyo lukaMikayeli noloThixo wakhe, uYehova? Kuba olo loyiso luya kuthetha “ukusinda” kumaKristu okwenyaniso. (Thelekisa uMalaki 4:1-3.) Ngoko ke, sikhangele kwikamva esililindele ngolangazelelo, sikhumbula la mazwi ompostile uPawulos: “Livakalise ilizwi; zingisa ukwenjenjalo ngamathuba alungileyo naxakileyo.” (2 Timoti 4:2) Masilibambe ngokuthe nkqi iLizwi lobomi yaye sikukhuthalele ukukhangela izimvu zikaYehova ngoxa kuselithuba elilungileyo. Sele siza kufika entanjeni kolu gqatso lobomi. Umvuzo uphambi kwethu. Ngamana sonke singazimisela ukunyamezela kude kube sekupheleni size ngaloo ndlela sibe phakathi kwabo baya kusindiswa.—Mateyu 24:13; Hebhere 12:1.
[Imibhalo esemazantsi]
a Bona incwadi ethi ISityhilelo—Incopho Yaso Ezukileyo Isondele! epapashwe yiWatchtower Bible and Tract Society of New York, Inc., iphepha 229-30.
b Okanye ke, iindaba “ezivela entla” zinokungqineka zivela kuYehova, ngenxa yala mazwi awawathetha kuGogi: “Ndikufake amakhonkco emihlathini, ndikurhole.” “Ndikunyuse uphume ezingontsini zasentla, ndikuse ezintabeni zakwaSirayeli.”—Hezekile 38:4; 39:2; thelekisa neNdumiso 48:2.
Uyaqonda Na?
◻ Ukumkani wasezantsi uye wahlabana njani nokumkani wasentla kwixesha lokuphela?
◻ Yintoni esiseza kuyifunda ngemiphumo yosukuzwano oluphakathi kwaba kumkani babini?
◻ Ziziphi iziganeko ezibini ngaphambi kweArmagedon ngokuqinisekileyo eziya kubandakanya ukumkani wasentla?
◻ ‘UMikayeli, umthetheli omkhulu,’ uya kubakhusela njani abantu bakaThixo?
◻ Sifanele sisabele njani kufundisiso lwethu lwesiprofeto sikaDaniyeli?
[Imifanekiso ekwiphepha 19]
Ukumkani wasentla uye wanqula uthixo owahlukileyo koothixo babo babengaphambi kwakhe
[Inkcazelo]
Top left and middle: UPI/Bettmann; bottom left: Reuters/Bettmann; bottom right: Jasmin/Gamma Liaison