Isahluko Seshumi Elinesixhenxe

Ukufanisa Abanquli Bokwenyaniso Ngexesha Lokuphela

1. Ngokutsho kwesahluko 7 sikaDaniyeli, ziziphi izinto ezikhethekileyo ezaziza kwenzeka kwiqaqobana labantu abangakwazi kuzikhusela kumhla wethu?

IQAQOBANA labantu abangakwazi kuzikhusela lihlaselwa ngolunya ligunya lehlabathi elinamandla. Liphuma lingenzekanga nto yaye kunoko liyahlaziywa—oku akwenzeki ngamandla alo kodwa ngenxa yokuba uYehova uThixo uyalixabisa. Isahluko 7 sikaDaniyeli sazixela kusengaphambili ezi ziganeko, ezenzeka ebutsheni benkulungwane yama-20. Noko ke, ngoobani abo? Kwaesi sahluko sinye sikaDaniyeli sibhekisela kubo ngokuthi ‘ngabangcwele baLowo uPhakamileyo,’ uYehova uThixo. Sikwatyhila nokuba aba bantu ekugqibeleni baya kulawula kunye kuBukumkani obungoMesiya!—Daniyeli 7:13, 14, 18, 21, 22, 25-27.

2. (a) UYehova uvakalelwa njani ngabakhonzi bakhe abathanjisiweyo? (b) Liliphi ikhondo ebekuya kuba bubulumko ukulithabatha ebudeni bale mihla yokugqibela?

² Njengoko sifunde kuDaniyeli isahluko 11, ukumkani wasemntla uya kufikelwa sisiphelo ngokusisigxina emva kokuba esongele ilizwe lokomoya laba bantu bathembekileyo. (Daniyeli 11:45; thelekisa uHezekile 38:18-23.) Ewe, uYehova akafuni nokuva ngabathanjiswa bakhe abathembekileyo. INdumiso 105:14, 15 isixelela oku: “Ngenxa yabo [uYehova] wohlwaya ookumkani, esithi: ‘Musani ukubachukumisa abathanjisiweyo bam, ningenzi okubi nakubaprofeti bam.’” Ngoko, ngaba akuvumi ukuba kula maxesha azaliswe ngamahla-ndinyuka, besiya kuba silumkile “isihlwele esikhulu” xa sizinxulumanisa ngokusondele kangangoko kunokwenzeka naba bantu bangcwele? (ISityhilelo 7:9; Zekariya 8:23) UYesu Kristu wakhuthaza abanjengezimvu ukuba benze loo nto kanye—banxulumane nabazalwana bakhe bokomoya ngokubaxhasa kumsebenzi wabo.—Mateyu 25:31-46; Galati 3:29.

3. (a) Kutheni kungelula ukufumana abalandeli bakaYesu abathanjisiweyo nokuhlala usondelelene nabo? (b) UDaniyeli isahluko 12 usinceda njani kulo mba?

³ Noko ke, uTshaba lukaThixo, uSathana, lulwel’ ukufa nokuphila nabathanjiswa. Uye wantyontyela unqulo lobuxoki, ephumelela ekuzaliseni ihlabathi ngoosinga-maKristu. Ngenxa yoko, abantu abaninzi baye balahlekiswa. Bambi sebephelelwe kwalithemba lokuba baya kuze bafumane abantu abamela unqulo lokwenyaniso. (Mateyu 7:15, 21-23; ISityhilelo 12:9, 17) Kwanabo bawufumanayo ‘umhlambi omncinane’ baze banxulumane nawo bamele balwele ukuzigcina benokholo, kuba eli hlabathi lisoloko lizama ukukhukulisa ukholo. (Luka 12:32) Kuthekani ngawe? Ngaba sele ubafumene “abangcwele baLowo uPhakamileyo” waza wanxulumana nabo? Ngaba ubufumene phofu ubungqina obubambekayo bokuba abo ubafumeneyo ngokwenene bangabo bakhethwe nguThixo? Obo bungqina bunokulomeleza ukholo lwakho. Yaye bunokukuxhobisa ukuze uncede nabanye basiqonde esi siphithanyongo sonqulo lwehlabathi lanamhlanje. UDaniyeli isahluko 12 uqulethe ubuncwane bolu lwazi lusindisa ubomi.

INKOSANA ENKULU ITHABATHA AMANYATHELO

4. (a) Ziziphi izinto ezimbini ezahlukeneyo ezixelwa kusengaphambili ngoMikayeli kuDaniyeli 12:1? (b) KuDaniyeli, ‘ukuma’ kudla ngokubhekisela entwenini?

⁴ UDaniyeli 12:1 ufundeka ngolu hlobo: “Ngelo xesha uya kusuka eme uMikayeli, inkosana enkulu emela oonyana babantu bakowenu.” Le ndinyana isixelela kusengaphambili ngezinto ezimbini ezahlukeneyo eziphathelele uMikayeli: eyokuqala yeyokuba, ‘umile,’ ibinzana elibonisa into eqhubekayo ukutyhubela ixesha elithile; eyesibini kukuba, uya “kusuka eme,” ibinzana elibonisa ukuba esi siganeko siza kwenzeka ebudeni belo xesha. Sifuna ukuqala ngokwazi ixesha uMikayeli ‘ema ngalo ngenxa yoonyana babantu [bakuloDaniyeli].’ Khumbula ukuba uMikayeli ligama elinikwe uYesu kwindima ayiphumezayo njengoMlawuli wasezulwini. Xa kuthethwa ‘ngokuma’ kwakhe sitsho sikhumbule indlela eli gama elisetyenziswa ngayo kwezinye iindinyana zencwadi kaDaniyeli. Ngokufuthi libhekisela kwinto eyenziwa ngukumkani, enjengokuqalisa ukulawula.—Daniyeli 11:2-4, 7, 20, 21.

5, 6. (a) UMikayeli uma ngaliphi ixesha? (b) UMikayeli ‘uma’ nini yaye njani, ibe uba yintoni umphumo?

⁵ Ngoko kuyabonakala ukuba le ngelosi yayithetha ngexesha ekuthethwe ngalo ndaweni ithile kwisiprofeto seBhayibhile. UYesu walibiza ngokuthi ‘bubukho’ bakhe (ngesiGrike ipa·rou·siʹa), njengoKumkani ezulwini. (Mateyu 24:37-39) Eli xesha likwabizwa ngokuba ‘yimihla yokugqibela’ ‘nexesha lesiphelo.’ (2 Timoti 3:1; Daniyeli 12:4, 9) Ukususela ekuqaleni kwelo xesha ngowe-1914, uMikayeli ebemi njengoKumkani ezulwini.—Thelekisa uIsaya 11:10; ISityhilelo 12:7-9.

⁶ Noko ke, ‘uma’ nini uMikayeli? Xa esukuma ukuze athabathe inyathelo elikhethekileyo. UYesu uya kukwenza oku kwixesha elizayo. Isiprofeto esikwiSityhilelo 19:11-16 sichaza uYesu njengoKumkani onamandla onguMesiya okhokela umkhosi weengelosi notshabalalisa iintshaba zikaThixo. UDaniyeli 12:1 uhlabela mgama esithi: “Kwaye ngokuqinisekileyo kuya kubakho ixesha lokubandezeleka ekungazange kubekho linjengalo ukususela oko lwabakhoyo uhlanga kude kube lelo xesha.” NanjengoMphumezi Oyintloko Wemigwebo kaYehova, uKristu uya kuyiphelisa yonke inkqubo engendawo yezinto ebudeni ‘bembandezelo enkulu’ eyaxelwa kwangaphambili.—Mateyu 24:21; Yeremiya 25:33; 2 Tesalonika 1:6-8; ISityhilelo 7:14; 16:14, 16.

7. (a) Liliphi ithemba abanalo bonke abathembekileyo ebudeni ‘bexesha lokubandezeleka’ elizayo? (b) Yintoni incwadi kaYehova, yaye kutheni kubalulekile ukuba ufunyanwe kuyo?

⁷ Abantu abaqhelisela ukholo baza kuqhuba njani ebudeni beli xesha lamanzithinzithi? Ngokuqhubekayo uDaniyeli waxelelwa oku: “Ngelo xesha ke abantu bakowenu baya kusinda, bonke abo bafunyenwe bebhaliwe encwadini.” (Thelekisa uLuka 21:34-36.) Yiyiphi le ncwadi? Kaloku, imela ukukhumbula kukaYehova uThixo abo benza ukuthanda kwakhe. (Malaki 3:16; Hebhere 6:10) Abo babhalwe kule ncwadi yobomi bangabona bantu banqabisekileyo kweli hlabathi, kuba bakhuselwa nguThixo. Naziphi na iinkxwaleko ezibathwaxayo, zinako yaye ziza kupheliswa. Kwanokuba bangaginywa lingcwaba ngaphambi kokuba lifike “ixesha lokubandezeleka” elizayo, bakhuselekile xa bekwinkumbulo engalinganiselwanga kaYehova. Uya kubakhumbula aze abavuse ebudeni boLawulo Lwewaka Leminyaka lukaYesu Kristu.—IZenzo 24:15; ISityhilelo 20:4-6.

ABANGCWELE ‘BAYAVUKA’

8. UDaniyeli 12:2 unikela liphi ithemba elichulumancisayo?

⁸ Ngokwenene ithemba lovuko liyathuthuzela. UDaniyeli 12:2 uyalikhankanya xa esithi: “Abaninzi kwabo balele eluthulini lomhlaba baya kuvuka, abanye baya kuvukela kubomi obuhlala ngokungenammiselo baze abanye bavukele kubomi behlazo nobenyanyekayo bexesha elingenammiselo.” (Thelekisa uIsaya 26:19.) La mazwi anokusikhumbuza kakuhle ngedinga elichukumisayo likaYesu Kristu lovuko lwabantu bonke. (Yohane 5:28, 29) Elinjani ukubangel’ imincili ithemba! Khawucinge nje ngabahlobo namalungu entsapho esiwathandayo—ngoku afileyo—ephinda enikwa ithuba lokuphinda aphile kwixesha elizayo! Kodwa ngokuyintloko eli dinga likwincwadi kaDaniyeli libhekisa kolunye uhlobo lovuko—olo sele lwenzekile. Kunokwenzeka njani oko?

9. (a) Kutheni kusengqiqweni ukulindela ukuba uDaniyeli 12:2 azaliseke kwimihla yokugqibela? (b) Esi siprofeto sibhekisela kuluphi uhlobo lovuko, ibe sikwazi njani oko?

⁹ Khawuphinde ubuyele kumongo. Indinyana yokuqala yesahluko 12 ibhekisela, njengoko sele sibonile, kungekhona esiphelweni sale nkqubo yezinto kodwa nakulo lonke ixesha lemihla yokugqibela. Enyanisweni, ubukhulu becala esi sahluko asizaliseki kwiparadesi yasemhlabeni ezayo, kodwa sizaliseka ebudeni bexesha lokuphela. Ngaba kuye kwakho uvuko ebudeni beli xesha? Umpostile uPawulos wakha wathetha ngovuko ‘lwabo bangabakaKristu’ esithi lwenzeka “ebudeni bobukho bakhe.” Noko ke, abo bavuswa baze baye kuphila ezulwini bavuka “bengenakonakala.” (1 Korinte 15:23, 52) Akukho namnye kubo ovuselwa ‘kwihlazo elonyanyekayo lexesha elingenammiselo,’ njengoko uDaniyeli 12:2 waxela kusengaphambili. Ngaba lukho olunye uhlobo lovuko? EBhayibhileni, maxa wambi uvuko luba nentsingiselo engokomoya. Ngokomzekelo, incwadi kaHezekile neyeSityhilelo ziqulethe iindinyana zesiprofeto ezibhekisela ekuvuselelweni ngokomoya, okanye kuvuko.—Hezekile 37:1-14; ISityhilelo 11:3, 7, 11.

10. (a) Abathanjiswa bavuswa ngayiphi ingqiqo ngemihla yokugqibela? (b) Kwenzeka njani ukuba abanye kubathanjiswa, nangona babevuselelwe, bavukele ‘kwihlazo nokwenyanyeka kwexesha elingenammiselo’?

¹⁰ Ngaba abakhonzi abathanjisiweyo bakaThixo bakhe bavuselelwa ngokomoya kweli xesha lokuphela? Kunjalo kanye! Ivunywa nayimbali into yokuba ngowe-1918 iqaqobana lentsalela yamaKristu athembekileyo lahlaselwa ngendlela engaqhelekanga nto leyo eyaphazamisa ubulungiseleli balo obulungelelanisiweyo basesidlangalaleni. Yandula ke, nangona yayibonakala ingenakwenzeka loo nto, ngowe-1919 yabuyela ebomini ngengqiqo yokomoya. Ezi zibakala zingena gingci kwindlela oluchazwe ngayo uvuko oluxelwe kwangaphambili kuDaniyeli 12:2. Inxalenye yabo ‘yavuka’ ngokomoya ngelo xesha nasemva koko. Noko ke, okulusizi kukuba asinguye wonk’ ubani owahlala ephila ngokomoya. Abo abathi emva kokuba bevusiwe bamshiya uKumkani onguMesiya baza bayishiya inkonzo kaThixo bazifumanela ‘ihlazo nokwenyanyeka kwexesha elingenammiselo’ njengoko kuchazwe kuDaniyeli 12:2. (Hebhere 6:4-6) Noko ke, abathanjiswa abathembekileyo bayisebenzisa kakuhle imeko yabo yokuvuseleleka ngokomoya, bemxhasa ngokunyaniseka uKumkani onguMesiya. Ekugqibeleni, njengoko esi siprofeto sibonisa, ukuthembeka kwabo kukhokelela “kubomi obuhlala ngokungenammiselo.” Namhlanje, ukomelela kwabo ngokomoya xa bejamelene nenkcaso kuyasinceda sikwazi ukubafanisa.

‘BAKHAZIMLA NJENGEENKWENKWEZI’

11. Ngoobani “abanengqiqo” namhlanje, yaye bakhazimla njengeenkwenkwezi ngayiphi ingqiqo?

¹¹ Iindinyana ezimbini ezilandelayo zikaDaniyeli isahluko 12 zide zisincede nangakumbi ukuba sifanise “abangcwele baLowo uPhakamileyo.” Kwindinyana 3 ingelosi imxelela oku uDaniyeli: “Abo ke banengqiqo baya kukhanya njengokuqaqamba kwesibhakabhaka; baze abo bakhokelele abaninzi ebulungiseni bakhazimle njengeenkwenkwezi ngonaphakade kanaphakade.” Ngoobani ‘abanengqiqo’ namhlanje? Kwakhona, ubungqina buphinda balathe ‘kwabangcwele baLowo uPhakamileyo.’ Ngapha koko, ngubani ngaphandle kwentsalela yabathanjiswa owaba nengqiqo yokuqonda ukuba uMikayeli, iNkosana Enkulu, waqalisa ukuma njengoKumkani ngowe-1914? Ngokushumayela iinyaniso ezinjengale—nangokugcina ihambo yobuKristu—iye ‘yakhanya njengezikhanyiso’ kweli hlabathi lenziwe mnyama ngokomoya. (Filipi 2:15; Yohane 8:12) Ethetha ngayo, uYesu waprofeta esithi: “Aya kuthi ke amalungisa aqaqambe njengelanga ebukumkanini bukaYise.”—Mateyu 13:43.

12. (a) Ebudeni bexesha lesiphelo, abathanjiswa baye babandakanyeka njani ‘ekukhokeleleni abaninzi ebulungiseni’? (b) Abathanjiswa baya kubakhokelela njani abaninzi ebulungiseni baze ‘bakhazimle njengeenkwenkwezi’ ebudeni boLawulo Lwewaka Leminyaka lukaKristu?

¹² UDaniyeli 12:3 ude asixelele nomsebenzi aza kuxakeka nguwo la maKristu athanjisiweyo kwixesha lesiphelo. Ayeza ‘kukhokelela abaninzi ebulungiseni.’ Intsalela ethanjisiweyo yaqalisa ukuhlanganisa abasaseleyo beendlalifa ezili-144 000 ezikunye noKristu. (Roma 8:16, 17; ISityhilelo 7:3, 4) Ekuqoshelisweni kwaloo msebenzi—ekubonakala ukuba wagqitywa phakathi kwiiminyaka yee-1930—yaqalisa ukuhlanganisa “isihlwele esikhulu” ‘sezinye izimvu.’ (ISityhilelo 7:9; Yohane 10:16) Nazo ziqhelisela ukholo kwidini lentlawulelo likaYesu Kristu. Ngoko zicocekile phambi koYehova. Namhlanje aba bafikelela kwizigidi, bayalixabisa ithemba lokusinda kwintshabalalo ezayo yeli hlabathi lingendawo. Ebudeni boLawulo Lwewaka Leminyaka lukaKristu, uYesu nabanye ookumkani abangababingeleli abali-144 000 baza kuthululela uluntu oluthobelayo olusemhlabeni iingenelo ezipheleleyo zentlawulelo, ngaloo ndlela benceda bonke abo baqhelisela ukholo ukuba bakhucule yonke imizila yesono abasizuze njengelifa kuAdam. (2 Petros 3:13; ISityhilelo 7:13, 14; 20:5, 6) Ngengqiqo epheleleyo, baya kwandula ke abathanjiswa babe nesabelo ‘ekukhokeleni abaninzi ebulungiseni’ baze ‘bakhazimle njengeenkwenkwezi’ ezulwini. Ngaba uyalixabisa ithemba lokuphila emhlabeni phantsi korhulumente wasezulwini ozukileyo oyilwe nguKristu nabo aza kulawula nabo? Elinjani ilungelo ekulilo ukuba nesabelo kunye ‘nabangcwele’ ekushumayeleni ezi ndaba zilungileyo zoBukumkani bukaThixo!—Mateyu 24:14.

‘BAYAPHENGULULA’

13. Amazwi encwadi kaDaniyeli atywinwa aza enziwa imfihlelo ngayiphi ingqiqo?

¹³ Isigidimi esidluliselwa yingelosi kuDaniyeli, esiqale kuDaniyeli 10:20, ngoku siqukunjelwa ngala mazwi ahlab’ umxhelo: “Wena ke, Daniyeli, wagcine eyimfihlelo la mazwi, uyitywine incwadi leyo, kude kube lixesha lesiphelo. Abaninzi baya kuphengulula, yaye ulwazi lokwenyaniso luya kuba luninzi.” (Daniyeli 12:4) Enyanisweni inkoliso yoko uDaniyeli waphefumlelwa ukuba akubhale kwagcinwa kuyimfihlelo kwaza kwatywinwa ukuze kungaqondwa ngabantu. Kaloku, noDaniyeli ngokwakhe kamva wabhala esithi: “Ndakuva oko, kodwa andakuqonda.” (Daniyeli 12:8) Kungale ngqiqo ke eyathi incwadi kaDaniyeli yahlala itywiniwe kangangeenkulungwane. Kuthekani namhlanje?

14. (a) Ebudeni ‘bexesha lokuphela,’ ngoobani abaye ‘baphengulula,’ ibe babeza kukwenza phi oko? (b) Bubuphi ubungqina obukhoyo bokuba uYehova uye walusikelela olo ‘phengululo’?

¹⁴ Kulilungelo kuthi ukuphila ‘ngexesha lesiphelo’ elaxelwa kwangaphambili kwincwadi kaDaniyeli. Njengoko kwakuprofetiwe, baninzi abaye ‘baliphengulula’ iLizwi likaThixo. Ube yintoni umphumo? Ngentsikelelo kaYehova, ulwazi lokwenene luye lwaluninzi. AmaNgqina kaYehova athanjisiweyo nathembekileyo aye asikelelwa ngengqiqo ewenze aqonda ukuba uNyana womntu wathweswa njengoKumkani ngowe-1914, akwazi ukufanisa amarhamncwa akwisiprofeto sikaDaniyeli, aza alumkisa ngokuphathelele “into elizothe lesiphanziso”—ibe le yimizekelo nje embalwa. (Daniyeli 11:31) Ngoko ke, olu lwazi luninzi lukwalolunye uphawu olufanisa “abangcwele baLowo uPhakamileyo.” Kodwa uDaniyeli wafumana ubungqina obengezelelekileyo.

‘BAYAPHULWA’

15. Nguwuphi umbuzo ngoku ophakanyiswa yingelosi, yaye loo mbuzo usikhumbuza bani?

¹⁵ Masikhumbule ukuba ekufumaneni kwakhe izigidimi zeengelosi uDaniyeli wayephezu ‘komlambo omkhulu’ iHidekeli, eyaziwa nangokuba yiTigris. (Daniyeli 10:4) Ngoku apha ubona izidalwa ezithathu eziziingelosi ibe uthi: “Mna Daniyeli, ndabona amanye amadoda amabini emi elunxwemeni lomsinga ngapha nangapha. Enye ke yathi kwindoda eyambethe ilinen, ebiphezu kwamanzi omsinga: ‘Kuya kude kube nini na ukuphela kwezi zinto zimangalisayo?’” (Daniyeli 12:5, 6) Umbuzo owaphakanyiswa yingelosi apha usenokuphinda usikhumbuze ‘ngabangcwele baLowo uPhakamileyo.’ Ekuqaleni ‘kwexesha lesiphelo,’ ngowe-1914, babexhalatyiswe ngokwenene ngumbandela wokuba kwakuya kuthabatha ixesha elide kangakanani ukuba amadinga kaThixo azaliseke. Isibakala sokuba ngabo ekubhekiselwa kubo kwesi siprofeto sicaca mhlophe kwimpendulo yalo mbuzo.

16. Sisiphi isiprofeto esidluliselwa yingelosi, ibe ikubethelela njani ukuqiniseka kwenzaliseko yaso?

¹⁶ Ingxelo kaDaniyeli iyaqhubeka: “Ndayiva indoda eyambethe ilinen, ebiphezu kwamanzi omsinga, njengoko yayiphakamisela isandla sayo sokunene nesasekhohlo emazulwini yaza yafunga Lowo uphila ixesha elingenammiselo, isithi: ‘Kuya kuba lixesha elimisiweyo, namaxesha amisiweyo anesiqingatha. Yaye kamsinya nje kwakuba kugqityiwe ukwaphulwa kwamandla abantu abangcwele, zonke ezi zinto ziya kuzaliseka.’” (Daniyeli 12:7) Lo ngumbandela onzulu. Le ngelosi iphakamisa izandla zozibini ifunga, mhlawumbi isenzela ukuba oku kubonakale nakwiingelosi ezimbini ezikumacala omabini alo mlambo ubanzi. Ngale ndlela iqinisekisa ngokupheleleyo ukuzaliseka kwesi siprofeto. Noko ke, anini la maxesha amiselweyo? Ukufumana impendulo akunzima njengokuba ucinga.

17. (a) Sifana njani isiprofeto sikaDaniyeli 7:25, esikaDaniyeli 12:7, neseSityhilelo 11:3, 7, 9? (b) Made kangakanani amaxesha amathathu anesiqingatha?

¹⁷ Esi siprofeto sifana ngendlela ephawulekayo nezinye iziprofeto ezibini. Esinye, esixutyushwe kwiSahluko 9 sale mpapasho, sifumaneka kuDaniyeli 7:25, esinye sikwiSityhilelo 11:3, 7, 9. Khawuphawule ezinye zezinto ezifana ngazo. Ngasinye sizaliseka ngexesha lokuphela. Zozibini ziphathelele abakhonzi abangcwele bakaThixo, zibonisa ukuba baza kutshutshiswa de okwexeshana bangakwazi ukuwuphumeza umsebenzi wabo wokushumayela esidlangalaleni. Isiprofeto ngasinye sibonisa ukuba abakhonzi bakaThixo bayavuseleleka baze baphinde baqalise umsebenzi wabo, bekatyisa abo babatshutshisayo. Yaye ngasinye kwezi ziprofeto sikhankanya ubude beli xesha lamanzithinzithi abangcwele. Zozibini ezi ziprofeto zikuDaniyeli (isahluko 7:25 nese–12:7) zibhekisela ‘kwixesha, amaxesha, nesiqingatha sexesha.’ Ngokuqhelekileyo abaphengululi bakugqala oku njengokubhekisela kumaxesha amathathu anesiqingatha. ISityhilelo sithi eli xesha linye liziinyanga ezingama-42, okanye imihla eli-1 260. (ISityhilelo 11:2, 3) Oku kungqina into yokuba amaxesha amathathu anesiqingatha akuDaniyeli abhekisela kwiminyaka emithathu enesiqingatha eneentsuku ezingama-360 umnye. Kodwa iqalisa nini le mihla ili-1 260?

18. (a) Ngokutsho kukaDaniyeli 12:7, sasiza kubonakala njani isiphelo semihla eli-1 260? (b) Ekugqibeleni aphulwa nini “amandla abantu abangcwele,” ibe kwenzeka njani oko? (c) Yaqalisa nini imihla eli-1 260, ibe abathanjiswa ‘baprofeta njani bambethe irhonya’ ebudeni belo xesha?

¹⁸ Esi siprofeto silibeka licace ixesha eyayiza kuphela ngalo imihla eli-1 260—xa “kugqityiwe ukwaphulwa kwamandla abantu abangcwele.” Phakathi kowe-1918, amalungu aphambili eWatch Tower Bible and Tract Society, kuquka nomongameli wayo, uJ. F. Rutherford, afunyaniswa enetyala ngenxa yezityholo ezibubuxoki, athiwa nka ngezigwebo ezide evalelwe entolongweni. Ngokwenene abangcwele bakaThixo bawubona umsebenzi wabo ‘usaphulwa,’ namandla abo eqhekeziwe. Xa sibala sibuya umva iminyaka emithathu enesiqingatha ukususela phakathi kowe-1918 sifika ngasekupheleni kowe-1914. Ngelo xesha eli qaqobana labathanjiswa lalizilungiselela ukuba likwazi ukumelana nentshutshiso eqatha. IMfazwe Yehlabathi I yayiqhambukile, yaye umsebenzi walo wawusiya uchaswa nangakumbi. Ngowe-1915, lada lasekela umxholo walo wonyaka kulo mbuzo owabuzwa nguKristu kubalandeli bakhe esithi: “Ninako na ukuyisela indebe yam?” (Mateyu 20:22, King James Version) Njengoko kwakuxelwe kwangaphambili kwiSityhilelo 11:3, imihla eli-1 260 eyalandelayo yaba lixesha leentsizi kubathanjiswa—yayingathi baprofeta bambethe irhonya. Intshutshiso yaya iqatsela. Abanye babo bavalelwa entolongweni, abanye bahlaselwa ngamahlokondiba ngoxa abanye babengcungcuthekiswa. Abaninzi betha amandla kwakufa umongameli wokuqala woMbutho, uC. T. Russell, ngowe-1916. Noko ke, yintoni eyayiza kwenzeka emva kokuba eli xesha lobumnyama liqukunjelwe ngokubulawa kwaba bangcwele njengentlangano eshumayelayo?

19. Isiprofeto esikwiSityhilelo isahluko 11 sisiqinisekisa njani ukuba abathanjiswa babengayi kuvalwa umlomo ixesha elide?

¹⁹ Isiprofeto esifana nesi esifumaneka kwiSityhilelo 11:3, 9, 11 sibonisa ukuba emva kokuba ‘amangqina amabini’ ebulewe, aqungquluza apho efile okwexeshana—imihla emithathu enesiqingatha—de avuselelwe. Ngokufanayo, isiprofeto sikaDaniyeli isahluko 12 sibonisa ukuba abangcwele babengayi kuthi cwaka kodwa babesenomsebenzi ongakumbi ababemele bawenze.

‘BAYAHLANJULULWA, BENZIWE MHLOPHE BAZE BASULUNGEKISWE’

20. Ngokutsho kukaDaniyeli 12:10, ziziphi iintsikelelo ezaziza kuthululwa kubathanjiswa emva kobunzima abatyhubele kubo, yaye oku kwahluka njani koko kuza kwenzeka kwabangendawo?

²⁰ Njengoko kuboniswe ngaphambilana, uDaniyeli wazibhala ezi zinto kodwa engaziqondi. Sekunjalo, umele ukuba wayezibuza enoba aba bangcwele babeza kuphelela ezandleni zabo babatshutshisayo kusini na, kuba wabuza, “Soba yintoni na isiphelo sayo yonke le nto?” Ingelosi yaphendula isithi: “Hamba, Daniyeli, kuba la mazwi aya kugcinwa eyimfihlelo, atywinwe kude kube lixesha lesiphelo. Abaninzi baya kuzihlambulula, bazenze mhlophe, baze basulungekiswe. Ke bona abangendawo ngokuqinisekileyo baya kwenza ngokungendawo, bangaqondi konke konke; kodwa bona abanengqiqo baya kuqonda.” (Daniyeli 12:8-10) Lalikho ithemba eliqinisekileyo ngabangcwele! Kunokuba batshatyalaliswe, babeza kwenziwa mhlophe, basikelelwe ngokuma okucocekileyo phambi koYehova uThixo. (Malaki 3:1-3) Ingqiqo ababenayo ngezinto zokomoya yayiza kubenza bahlale becocekile emehlweni kaThixo. Ngokwahlukileyo, abangendawo babengayi kufuna nokuziqonda izinto zokomoya. Kodwa yayiza kwenzeka nini yonke le nto?

21. (a) Ixesha elaxelwa kwangaphambili kuDaniyeli 12:11 laliya kuqalisa phantsi kwaziphi iimeko? (b) Wawuyintoni “umbingelelo owenziwa rhoqo,” ibe wasuswa nini? (Bona ibhokisi ekwiphepha 298.)

²¹ UDaniyeli waxelelwa oku: “Ukususela kwixesha lokupheliswa kombingelelo owenziwa rhoqo kwaza kwabekwa into elizothe lesiphanziso, yoba ziintsuku eziliwaka elinamakhulu amabini anamashumi asithoba.” Ngoko eli xesha laliza kuqalisa phantsi kweemeko ezithile. ‘Umbingelelo owenziwa rhoqo’—okanye “idini elenziwa ngokuqhubekayo”a—wawumele ushenxiswe. (Daniyeli 12:11, umbhalo osemazantsi weNW) Liliphi eli dini yayithetha ngalo ingelosi? Asingomadini ezilwanyana anyuswa kuyo nayiphi na itempile yasemhlabeni. Kaloku, kwanaloo tempile eyayikhe yema eYerusalem ‘yayingumfanekiso nje weyokwenene’—itempile kaYehova yokomoya ezukileyo, eyaqalisa ukusebenza xa uKristu waba nguMbingeleli Omkhulu wayo ngowama-29 C.E.! Kule tempile yokomoya, emela ilungiselelo likaThixo lonqulo olunyulu, akukho mfuneko yokuba kusoloko kunyuswa amadini esono, kuba ‘uKristu wanikelwa kwaba kanye ukuze athwale izono zabaninzi.’ (Hebhere 9:24-28) Sekunjalo, onke amaKristu okwenyaniso anyusa imibingelelo kule tempile. Umpostile uPawulos wabhala: “Ngaye [uKristu] masisoloko sinikela kuThixo umbingelelo wendumiso, oko kukuthi, isiqhamo semilebe evakalisa ekuhleni igama lakhe.” (Hebhere 13:15) Ngoko le nxalenye yokuqala yesiprofeto—ukushenxiswa “kombingelelo owenziwa rhoqo”—yenzeka phakathi kowe-1918 xa umsebenzi wokushumayela wavalwa phantse ngokupheleleyo.

22. (a) Yintoni “into elizothe” lesiphanziso, ibe yabekwa nini? (b) Laqalisa nini ixesha elixelwe kwangaphambili kuDaniyeli 12:11, yaye laphela nini?

²² Noko ke, kuthekani ngenxalenye yesibini—‘ukubekwa,’ okanye ukumiselwa, ‘kwento elizothe lesiphanziso’? Njengoko sibonile kwingxubusho kaDaniyeli 11:31, le nto ilizothe yaqala yaluManyano Lwezizwe yaza kamva yathi gqi sele iziZizwe Ezimanyeneyo. Zombini zilizothe kuba ziye zakhahlelwa njengekuphela kwento enokuzisa uxolo emhlabeni. Ngaloo ndlela, kwiintliziyo zabaninzi, le mibutho ithabatha indawo yoBukumkani bukaThixo! UManyano lwacwangciswa ngokusemthethweni ngoJanuwari 1919. Ngelo xesha, zombini iinxalenye zikaDaniyeli 12:11 zazaliseka. Ngoko imihla eli-1 290 yaqalisa ebutsheni bowe-1919 yaza yaya kutsho kukwindla (loMntla Weikhweyitha) ngowe-1922.

23. Abangcwele bakaThixo bayenza njani inkqubela ekhokelela ekuhlanjululweni ebudeni bemihla eli-1 290 eyaxelwa kwangaphambili kuDaniyeli isahluko 12?

²³ Ebudeni belo xesha, ngaba ikho inkqubela eyenziwa ngabangcwele ekhokelela ekwenziweni mhlophe nasekuhlambulukeni emehlweni kaThixo? Ngokuqinisekileyo yayikho! NgoMatshi 1919 umongameli weWatch Tower Society namaqabane akhe bakhululwa entolongweni. Kamva bahlanjwa kwizityholo zobuxoki ababebhutywe ngazo. Beqonda ukuba umsebenzi wabo awukapheli, babhinq’ omfutshane ngoko nangoko, belungiselela iindibano ezaziza kuqhutywa ngoSeptemba 1919. Kwangaloo nyaka, kwaqaliswa ukupapashwa iphephancwadi elihamba neMboniselo. Ekuqaleni lalibizwa ngokuba yiThe Golden Age (ngoku enguVukani!), yaye belisoloko lixhasa IMboniselo ekukubhenceni ngaphandle kwedyudyu ukonakala kweli hlabathi nasekuncedeni abantu bakaThixo ukuba bahlale becocekile. Ngasekupheleni kwemihla eli-1 290 eyayixelwe kwangaphambili, abangcwele babesekhondweni elisa ekuhlanjululweni baze babe kwimeko yangaphambili. NgoSeptemba 1922, malunga nethuba kanye elaphela ngalo eli xesha, baba nendibano ebalaseleyo eCedar Point, eOhio, eUnited States. Le ndibano yawutsho wema ngeenyawo umsebenzi wokushumayela. Noko ke, kwakusekho inkqubela eyayimele yenziwe. Ibe loo nto yayiza kwenziwa kwixesha elimiselweyo.

UYOLO LWABANGCWELE

24, 25. (a) Liliphi ixesha lesithathu elaxelwa kwangaphambili kuDaniyeli 12:12, yaye kubonakala ukuba laqalisa laza laphela nini? (b) Yayinjani imeko yokomoya yentsalela ethanjisiweyo ekuqaliseni kwemihla eli-1 335?

²⁴ Ingelosi kaYehova iqukumbela isiprofeto sayo esiphathelele abangcwele ngala mazwi: “Unoyolo lowo uhlala elindile kude kufike iintsuku eziliwaka elinamakhulu amathathu anamashumi mathathu anesihlanu!” (Daniyeli 12:12) Le ngelosi ayisihlebeli ukuba liya kuqala okanye liphele nini eli xesha. Imbali ibonisa ukuba liqalisa kanye emva kokuphela kwelingaphambi kwalo. Ukuba kunjalo ke lisusela kukwindla lowe-1922 lise ngasekupheleni kwentwasahlobo yowe-1926 (kuMntla Weikhweyitha). Ngaba abangcwele balufumana uyolo ekupheleni kwelo xesha? Ewe, balufumana ngeendlela ezibalulekileyo zokomoya.

²⁵ Kwanasemva kwendibano yowe-1922 (eboniswe kwiphepha 302), bambi babangcwele bakaThixo babesakhangele ngolangazelelo emva. Ezintlanganisweni kwakusafundwa iBhayibhile kunye nemiqulu yeStudies in the Scriptures, eyayibhalwe nguC. T. Russell. Ngelo xesha, uninzi lwabantu lwalucinga ukuba owe-1925 wawuza kuba ngunyaka wokuqalisa kovuko nokubuyiselwa kweParadesi emhlabeni. Ngaloo ndlela, abaninzi babekhonza benomhla othile ezingqondweni zabo. Bambi beqhutywa likratshi abazange bavume ukuba nesabelo kumsebenzi wokushumayela esidlangalaleni. Izinto zazingahambi kakuhle konke konke.

26. Njengoko imihla eli-1 335 yayiqhubeka, yatshintsha njani imeko yokomoya yabathanjiswa?

²⁶ Noko ke, njengoko imihla eli-1 335 yayiqhubeka, konke oku kwaqalisa ukutshintsha. Ukushumayela kwathabatha indawo yokuqala, njengoko kwakusenziwa amalungiselelo okuba wonk’ ubani abe nenxaxheba kubulungiseleli basentsimini. Ezintlanganisweni kwakuza kufundisiswa IMboniselo veki nganye. Inkupho (yesiNgesi) kaMatshi 1, 1925, yayinomxholo othi “Ukuzalwa Kohlanga,” owanika abantu bakaThixo ingcombolo ngoko kwakwenzeke phakathi kowe-1914 nowe-1919. Emva kowe-1925, abangcwele babengasamkhonzi uThixo becinga ngomhla wokugqibela okufutshane ochazwe ngokucacileyo. Kunoko, eyona nto yayiphambili yayikukungcwaliswa kwegama likaYehova. Le nyaniso ibalulekileyo yabalaseliswa, ngaphezulu kunanini na ngaphambili kwinqaku leMboniselo (yesiNgesi) kaJanuwari 1, 1926, elalinomxholo othi “Ngubani Oya Kubeka UYehova?” Kwindibano eyayingoMeyi 1926, kwakhululwa incwadi ethi Deliverance. (Bona iphepha 302.) Le ncwadi yayiyenye kuthotho lweencwadi ezazenzelwe ukuthabathel’ indawo iStudies in the Scriptures. Abangcwele abazange baphinde bakhangele emva. Babekhangele ngentembelo kwikamva nakumsebenzi owawubalindile. Njengoko kwakuprofetiwe, imihla eli-1 335 yaphela abangcwele sele bonwabile.

27. Amagqabantshintshi kaDaniyeli isahluko 12 asinceda njani ukuba sibafanise kakuhle abathanjiswa bakaYehova?

²⁷ Kakade ke, asingabo bonke abalinyamezelayo eli xesha lesaqunge. Alithandabuzeki elokuba yiloo nto eyabangela ingelosi ibethelele ukubaluleka ‘kokuhlala silindile.’ Abo banyamezelayo baza bahlala belindile bafumana intabalala yeentsikelelo. Amagqabantshintshi esahluko 12 sikaDaniyeli ayakucacisa oko. Njengoko kwakuxelwe kwangaphambili, abathanjiswa bavuselelwa, okanye bavuswa, ngengqiqo yokomoya. Banikwa ingqiqo ebalaseleyo ngeLizwi likaThixo, befumana amandla ‘okuphengulula’ kulo bekhokelwa ngumoya oyingcwele, ukuze baqonde izinto ekukudala ziziintsinda-badala. UYehova wabahlambulula waza wabenza bakhazimla ngokomoya, beqaqambe njengeenkwenkwezi. Ekugqibeleni, benza abaninzi bagqalwa bengamalungisa nguYehova uThixo.

28, 29. Yintoni esifanele sizimisele ukuyenza njengoko “ixesha lesiphelo” lisondela ekupheleni?

²⁸ Ekubeni sinazo zonke ezi mpawu zesiprofeto zokufanisa “abangcwele baLowo uPhakamileyo,” sisiphi isingxengxezo esinokubakho sokungabagqali nesokunganxulumani nabo? Isihlwele esikhulu, esithelela inani eliya lisihla lodidi lwabathanjiswa ekukhonzeni uYehova, silindelwe ziintsikelelo ezimangalisayo. Sonke simele sihlale silindele ukuzaliseka kwamadinga kaThixo. (Habhakuki 2:3) Kule mihla yethu uMikayeli, iNkosana Enkulu, ebemele abantu bakaThixo kangangamashumi eminyaka. Kungekudala uza kuthabatha amanyathelo njengomphumezi wemigwebo kaThixo kule nkqubo yezinto. Xa esenjenjalo, siya kube siphi thina?

²⁹ Impendulo yalo mbuzo ixhomekeke ekukhetheni kwethu ukuphila ubomi obuthe tye kwangoku. Ukuze sisomeleze isigqibo sethu sokwenjenjalo njengoko “ixesha lesiphelo” lisondela ekupheleni, masiqwalasele indinyana yokugqibela yencwadi kaDaniyeli. Ukuyihlolisisa kwethu kwisahluko esilandelayo kuya kusinceda sibone indlela uDaniyeli awema ngayo phambi kukaThixo nendlela aya kuma ngayo phambi Kwakhe kwixesha elizayo.

[Umbhalo osemazantsi]

UZUZE NTONI?

• UMikayeli ‘uma’ nini, yaye uya “kusuka eme” njani yaye nini?

• Hlobo luni lovuko abhekisela kulo uDaniyeli 12:2?

• Yiyiphi imihla esabonakala ngayo isiqalo nesiphelo

samaxesha amathathu anesiqingatha akhankanywe kuDaniyeli 12:7?

semihla eli-1 290 eyaxelwa kwangaphambili kuDaniyeli 12:11?

semihla eli-1 335 ekwaprofetwa ngayo kuDaniyeli 12:12?

• Ukunikela ingqalelo kuDaniyeli isahluko 12 kusinceda njani sifanise abanquli bokwenyaniso bakaYehova?

[Ibhokisi ekwiphepha 298]

UKUSUSWA KOMBINGELELO OWENZIWA RHOQO

Kwincwadi kaDaniyeli, ibinzana elithi ‘umbingelelo owenziwa rhoqo’ livela izihlandlo ezihlanu. Libhekisela kumbingelelo wendumiso—“isiqhamo semilebe”—onikelwa ngokuthe rhoqo kuYehova uThixo ngabakhonzi bakhe. (Hebhere 13:15) Ukususwa kwawo okwaxelwa kwangaphambili kuthethwa ngako kuDaniyeli 8:11, 11:31, nesahluko 12:11.

Ebudeni bazo zombini iimfazwe zehlabathi, abantu bakaYehova batshutshiswa kanobom kummandla ‘wokumkani wasemntla nakowokumkani wasemzantsi.’ (Daniyeli 11:14, 15) ‘Umbingelelo owenziwa rhoqo’ wasuswa ngasekupheleni kweMfazwe Yehlabathi I xa umsebenzi wokushumayela waphantse wapheliswa phakathi kowe-1918. (Daniyeli 12:7) Nasebudeni beMfazwe Yehlabathi II, iGunya Lehlabathi LamaNgesi NamaMerika ‘lawususa umbingelelo owenziwa rhoqo’ kangangemihla engama-2 300. (Daniyeli 8:11-14; bona iSahluko 10 sale ncwadi.) Kwakhona wasuswa ‘ziingalo’ zamaNazi kangangexesha elingachazwanga kwiZibhalo.—Daniyeli 11:31; bona iSahluko 15 sale ncwadi.

[Isicangca/Imifanekiso ekwiphepha 301]

AMAXESHA EKUPROFETWE NGAWO KUDANIYELI

[Imifanekiso ekwiphepha 287]

Abakhonzi abaphambili bakaYehova bavalelwa ngokungekho sikweni kwintolongo yaseAtlanta, eGeorgia, eUnited States. Ukusuka ekhohlo ukusa ekunene: (abahleli phantsi) UA. H. Macmillan, uJ. F. Rutherford, uW. E. Van Amburgh; (abemi ngeenyawo), uG. H. Fisher, uR. J. Martin, uG. DeCecca, uF. H. Robison, noC. J. Woodworth

[Imifanekiso ekwiphepha 299]

Ngowe-1919 (ngasentla) nangowe-1922 (ngezantsi) kwaqhutywa iindibano ezibalaseleyo eCedar Point, eOhio, eUnited States

[Umfanekiso ozalise iphepha, kwiphepha 302]