Iintsuku Zesiprofeto ZikaDaniyeli Nokholo Lwethu

“Unoyolo olinde wafika kwiintsuku eziliwaka, elinamakhulu amathathu, anamanci mathathu anesihlanu.”—DANIYELI 12:12.

1. Kutheni abaninzi bengalufumani nje ulonwabo lokwenene, yaye ulonwabo lokwenyaniso lunxulunyaniswa nantoni?

WONKE ubani ufuna ukonwaba. Noko ke, namhlanje bambalwa gqitha abonwabileyo. Kutheni? Ngokuyinxenye kungenxa yokuba inkoliso ikhangela ulonwabo kwiindawo ezingezizo. Ulonwabo lukhangelwa kwizinto ezinjengemfundo, ubutyebi, umsebenzi, okanye ukuthi phithi ligunya. Noko ke, xa wayeqalisa iNtshumayelo yakhe yaseNtabeni uYesu wanxibelelanisa ulonwabo nokuphaphela intswelo kabani yokomoya, inceba, ukuba nentliziyo ehlambulukileyo neempawu ezifana nezo. (Mateyu 5:3-10) Olo hlobo lolonwabo uYesu wayethetha ngalo lolokwenene yaye luhlala luhleli.

2. Ngokutsho kwesiprofeto, yintoni engakhokelela kulonwabo kweli xesha lokuphela, yaye yiyiphi imibuzo ephakamayo ngokubhekisele koku?

² Kwintsalela ethanjisiweyo kweli xesha lokuphela, ulonwabo lunxibelelene nenye into engakumbi. Kwincwadi kaDaniyeli, sifunda oku: “Hamba, Daniyeli, kuba amazwi aya kuvalelwa, atywinwe kude kube lixesha lokuphela. Unoyolo olinde wafika kwiintsuku eziliwaka, elinamakhulu amathathu, anamanci mathathu anesihlanu.” (Daniyeli 12:9, 12) Ezi ntsuku zili-1 335 zazigubungela liphi ithuba lexesha? Kutheni abo babephila ebudeni bazo babonwabile nje? Ngaba oku kunokuthanani nokholo lwethu namhlanje? Siyancedwa siyiphendule le mibuzo ukuba sikhangela emva kwixesha lokubhala kukaDaniyeli la mazwi, kamsinya nje emva kokukhululwa kukaSirayeli ekuthinjweni eBhabhiloni ngonyaka wesithathu kaKoreshi ukumkani wasePersi.—Daniyeli 10:1.

Ukubuyiselwa Kuzisa Ulonwabo

3. Sisiphi isenzo sikaKumkani uKoreshi esawazisela ulonwabo olukhulu amaYuda athembekileyo ngowama-537 B.C.E., kodwa liliphi ilungelo uKoreshi angazange awanike lona amaYuda?

³ KumaYuda, ukukhululwa eBhabhiloni kwakusisihlandlo sentlokoma yokwenene. Emva kokuba amaYuda ayenyamezele phantse iminyaka engama-70 yokuthinjwa, uKoreshi Omkhulu wawakhuthaza ukuba abuyele eYerusalem ukuze akhe kwakhona itempile kaYehova. (Ezra 1:1, 2) Abo basabelayo banduluka benolindelo olukhulu, befika kwilizwe labo ngowama-537 B.C.E. Noko ke, uKoreshi akazange awakhuthaze ukuba abuyisele kwakhona ubukumkani phantsi kwenzala kaKumkani uDavide.

4, 5. (a) Ubukumkani bakwaDavide babhukuqwa nini? Kwakutheni? (b) Sisiphi isiqinisekiso uYehova awasinikelayo sokuba ubukumkani bakwaDavide babuza kubuyiselwa?

⁴ Oko kwakubalulekile. Iinkulungwane ezinokuba ntlanu ngaphambilana, uYehova wayethembise uDavide oku: “Iya kuqina indlu yakho nobukumkani bakho kude kuse ephakadeni phambi kwakho; itrone yakho iya kuqiniseka kude kuse ephakadeni.” (2 Samuweli 7:16) Ngelishwa, inkoliso yenzala kaDavide yasebukhosini yazingqina inemvukelo, yaye ityala legazi elizweni laba likhulu ngokokude ngowama-607 B.C.E., uYehova avumele ubukumkani bakwaDavide ukuba bubhukuqwe. Ngaphandle kwethutyana elifutshane lokulawula kweeMaccabees, iYerusalem yayilawulwa ziintlanga ukususela ngelo xesha de yatshatyalaliswa okwesibini ngowama-70 C.E. Ngaloo ndlela, ngowama-537 B.C.E., “amaxesha [amisiweyo] eentlanga,” ebudeni bawo ekwakungekho nyana kaDavide wayengalawula njengokumkani, ayeqhubeka.—Luka 21:24.

⁵ Sekunjalo, uYehova akazange asilibale isithembiso sakhe kuDavide. Ngongcelele lwemibono namaphupha, esebenzisa umprofeti wakhe uDaniyeli watyhila iinkcukacha zezigane-ko zehlabathi ezaziya kwenzeka ukutyhubela iinkulungwane ukususela kwixesha lokulawula kweBhabhiloni ihlabathi kuse kwixesha laxa ukumkani womnombo kaDavide wayeya kulawula kwakhona kubukumkani babantu bakaYehova. Ezi ziprofeto, ezibhalwe kuDaniyeli isahluko 2, 7, 8, nese-10 kuse kwese-12, zawaqinisekisa amaYuda athembekileyo ukuba, ekugqibeleni, ngokwenyaniso itrone kaDavide yayiya “kuqiniseka kude kuse ephakadeni.” Ngokuqinisekileyo, loo nyaniso ityhiliweyo yawazisela ulonwabo loo maYuda awayebuyele kwilizwe lawo lokuzalwa ngowama-537 B.C.E.!

6. Sazi njani ukuba ezinye zeziprofeto zikaDaniyeli zaziza kuzaliseka kwixesha lethu?

⁶ Inkoliso yabaphengululi beBhayibhile ithi iziprofeto zikaDaniyeli zazaliseka phantse zonke ngaphambi kokuzalwa kukaYesu Kristu. Kodwa ngokucacileyo oku akunjalo. KuDaniyeli 12:4, isithunywa sezulu simxelela oku uDaniyeli: “Wavalele amazwi la, uyitywine incwadi, kude kube lixesha lokuphela. Baninzi abaya kuyiphengulula, kwandiswe ukwazi.” Ukuba incwadi kaDaniyeli yayiza kucaciswa—intsingiselo yayo ityhilwe ngokupheleleyo—kuphela kwixesha lokuphela, ngokuqinisekileyo ubuncinane zimbi zeziprofeto zayo zimele zisebenze kwelo xesha.—Bona uDaniyeli 2:28; 8:17; 10:14.

7. (a) Amaxesha amisiweyo eentlanga aphela nini, yaye nguwuphi umbuzo ongxamisekileyo owawumele uphendulwe ngoko? (b) Ngoobani ‘ababengengomkhonzi uthembekileyo noqondayo’?

⁷ Ngowe-1914 amaxesha amisiweyo eentlanga aphela, yaye kwaqalisa ixesha lokuphela leli hlabathi. UBukumkani bakwaDavide babuyiselwa, kungekhona kwiYerusalem yasemhlabeni, kodwa ngokungabonakaliyo ‘kumafu ezulu.’ (Daniyeli 7:13, 14) Ngelo xesha, ngenxa yokuba “umdiza” wobuKristu bobuxoki wawuchumile, imeko yobuKristu bokwenyaniso yayingacacanga—ubuncinane kumehlo abantu. Sekunjalo, lo mbuzo ubalulekileyo wawumele uphendulwe: “Ngubani na ke loo mkhonzi uthembekileyo, uqondayo?” (Mateyu 13:24-30; 24:45) Ngubani emhlabeni owayengamela uBukumkani bakwaDavide obubuyiselweyo? Yayingengobantakwabo Daniyeli ngokwenyama, amaYuda. Bona babelahliwe kuba babengenalo ukholo yaye bakhubeka ngenxa kaMesiya. (Roma 9:31-33) Umkhonzi othembekileyo akazange afumaneke naphakathi kweentlangano zeNgqobhoko! Imisebenzi yazo engendawo yangqina ukuba uYesu wayengazazi. (Mateyu 7:21-23) Ngoko, yayingubani lo mkhonzi?

8. Ngoobani abaye bangqineka ‘bengumkhonzi othembekileyo noqondayo’ ebudeni bexesha lokuphela? Sazi njani?

⁸ Ngokungathandabuzekiyo, yayiliqumrhu elincinane labazalwana abathanjisiweyo bakaYesu abo ngowe-1914 babesaziwa njengabaFundi beBhayibhile kodwa ukususela ngowe-1931 baye bachazwa njengamaNgqina kaYehova. (Isaya 43:10) Ngabo kuphela abaye bavakalisa uBukumkani obubuyiselweyo kumnombo kaDavide. (Mateyu 24:14) Ngabo kuphela abaye bahlala bahlukile ehlabathini nabaye bazukisa igama likaYehova. (Yohane 17:6, 14) Kwaye ziye zazaliseka kubo kuphela iziprofeto zeBhayibhile ezinokuthanani nabantu bakaThixo kule mihla yokugqibela. Phakathi kwezi ziprofeto lungcelele lwamaxesha esiprofeto adweliswe kuDaniyeli isahluko 12 aquka iintsuku ezili-1 335 ezaziya kuzisa ulonwabo.

Iintsuku Ezili-1 260

9, 10. Ziziphi iziganeko ezaphawula “ixesha namaxesha nesiqingatha sexesha” kuDaniyeli 7:25, yaye ziziphi ezinye izibhalo ezikhankanya ixesha elifanayo?

⁹ KuDaniyeli 12:7, sifunda ngexesha lokuqala lesiprofeto: “Kuya kusa exesheni [elimisiweyo], emaxesheni amabini amisiweyo, nasesiqingatheni sexesha; kwakupheliswa ukuhlekezwa kwamandla abantu abangcwele, ziya kupheliswa zonke ezo zinto.”a Eli xesha likwalinye liyakhankanywa kwiSityhilelo 11:3-6, esithi amangqina kaThixo ayeya kushumayela ethiwe wambu ngezirhwexayo iminyaka emithathu enesiqingatha aze ke abulawe. Kwakhona, kuDaniyeli 7:25, sifunda oku: “[Yena, NW] athethe amazwi okuchasana nOsenyangweni, abonakalise abangcwele bOsenyangweni, acamange ngokuwenza wambi amathuba nomthetho, banikelwe esandleni sakhe ixesha namaxesha nesiqingatha sexesha.”

¹⁰ Kwesi siprofeto sicatshulwe mva, u-“yena” ligunya lehlabathi lesihlanu xa sibala ukususela kwiBhabhiloni. ‘Luphondo, oluncinane,’ olo ebudeni bexesha lokulawula kwalo uNyana womntu afumana “igunya, nobuhandiba, nobukumkani.” (Daniyeli 7:8, 14) Olu phondo lokomfuziselo, ntlandlolo olwalububukhosi baseBritani, lwakhula ebudeni bemfazwe yokuqala yehlabathi lwaba ligunya lehlabathi elintlu-mbini lamaNgesi namaMerika, ngoku ekukhonya kulo iUnited States. Amaxesha amathathu anesiqingatha, okanye iminyaka, eli gunya laliza kubonakalisa abangcwele lize lizame ukuwaguqula amathuba nomthetho. Ekugqibeleni, abangcwele babeya kunikelwa esandleni salo.—Bona kwaneSityhilelo 13:5, 7.

11, 12. Ziziphi iziganeko ezakhokelela ekuqaleni kweentsuku ezili-1 260 zesiprofeto?

¹¹ Zazaliseka njani zonke ezi ziprofeto zifanayo? Kangangeminyaka ngaphambi kweMfazwe Yehlabathi I, abazalwana bakaYesu abathanjisiweyo balumkisa ekuhleni ngelokuba ngowe-1914 ayeya kuqosheliswa amaxesha amisiweyo eentlanga. Xa kwaqhambuka imfazwe, kwakucacile ukuba isilumkiso sasingazange sinanzwe. USathana wasebenzisa “irhamncwa” lakhe, intlangano yezobupolitika yehlabathi ngelo xesha eyayilawulwa buBukhosi baseBritani, kumgudu ‘wokuwenza wambi amathuba nomthetho,’ wokurhoxisa ixesha obabuza kulawula ngalo uBukumkani bukaThixo. (ISityhilelo 13:1, 2) Akazange akwazi. UBukumkani bukaThixo bamiselwa ezulwini, apho kungekho mntu wayenokufikelela.—ISityhilelo 12:1-3.

¹² KubaFundi beBhayibhile, imfazwe yayilixesha lokuvavanywa. Ukususela ngoJanuwari 1914 babebonisa iPhoto-Drama of Creation, intshumayelo yeBhayibhile eyatsalel’ ingqalelo kwiziprofeto zikaDaniyeli. Ehlotyeni ngaloo nyaka kuMntla Weikhweyitha, kwaqhambuka imfazwe. Ngo-Oktobha, amaxesha amisiweyo aphela. Ngasekupheleni konyaka, intsalela ethanjisiweyo yayilindele intshutshiso, njengoko kubonakala kwisibakala sokuba umxholo wonyaka owawukhethelwe owe-1915 yayingumbuzo kaYesu kubafundi bakhe, “Ngaba ninako na ukusela kwindebe yam?” usekelwe kuMateyu 20:22, King James Version.

13. AbaFundi beBhayibhile bashumayela njani bethiwe wambu ngezirhwexayo ebudeni beentsuku ezili-1 260, yaye kwenzeka ntoni ekupheleni kwelo xesha?

¹³ Ngenxa yoko, ukususela ngoDisemba 1914, eli butho lincinane lamangqina ‘lashumayela lithiwe wambu ngezirhwexayo,’ ngokuthobeka linyamezele njengoko lalivakalisa imigwebo kaYehova. Okwawothusayo amaninzi, ngowe-1916, yaba kukufa kukaC. T. Russell, umongameli wokuqala weWatch Tower Bible and Tract Society. Njengoko umoya wemfazwe wawunwenwa, amaNgqina ahlangabezana nenkcaso eyayisanda. Amanye aphoswa ezintolongweni. Abantu ngabanye, njengoFrank Platt eNgilani noRobert Clegg eKhanada, babethuthunjiswa ngabasemagunyeni abaneengcwangu. Ekugqibeleni, ngoJuni 21, 1918, uJ. F. Rutherford, umongameli omtsha, kunye nabalathisi beWatch Tower Bible and Tract Society, wagwetyelwa ukuthothoza entolongweni ngezimangalo zobuxoki. Ngaloo ndlela, ngasekupheleni kwexesha lesiprofeto, “uphondo oluncinane” lwawubulala umsebenzi olungelelanisiweyo wokushumayela ekuhleni.—Daniyeli 7:8, King James Version.

14. Izinto zaguquka njani kwabathanjisiweyo ngowe-1919 nasemva koko?

¹⁴ Incwadi yeSityhilelo iprofeta ngoko kwenzekayo ngokulandelayo. Emva kwexesha elifutshane lokungenzi nto—elaxelwa kwangaphambili ngokuthi ziintsuku ezintathu ezinesiqingatha zokuqungquluza esitratweni ifile—intsalela ethanjisiweyo yavuka yaza yasebenza kwakhona. (ISityhilelo 11:11-13) NgoMatshi 26, 1919, umongameli nabalathisi beWatch Tower Bible and Tract Society bakhululwa, yaye kamva bavakaliswa bengenatyala ngokupheleleyo kwizimangalo zobuxoki ababebekwa zona. Ngoko nangoko emva kokukhululwa kwayo, intsalela yabathanjiswa yaqalisa ukulungelelanisa kwakhona izinto ukuze kuhanjiselwe phambili umsebenzi. Ngaloo ndlela, bezalisekisa owokuqala uyeha weSityhilelo, baphuma kwinzonzobila yokungasebenzi njengeenkumbi zokomoya eziphelekwa ngumsi omkhulu, ohlola ikamva elimfiliba ngonqulo lobuxoki. (ISityhilelo 9:1-11) Ebudeni beminyaka embalwa eyalandelayo, babesondliwa ngokomoya yaye belungiselelwa oko kwakubalindele ngaphambili. Ngowe-1921 bapapasha incwadi entsha ethi, Uhadi LukaThixo, eyayicetyelwe ukunceda abasebatsha nabantwana bafunde iinyaniso ezisisiseko zeBhayibhile. (ISityhilelo 12:6, 14) Zonke ezi zinto zenzeka ebudeni belinye ixesha elibalulekileyo.

Iintsuku Ezili-1 290

15. Yiyiphi indlela esinokukubala ngayo ukuqalisa kweentsuku ezili-1 290? Laphela nini eli xesha?

¹⁵ Isithunywa sezulu sathi kuDaniyeli: “Kususela kwelo xesha kwasuswayo inkonzo yamaxesha onke [“idini elenziwa ngokuqhubekayo,” umbhalo osemazantsi weNW], ukuze zimiswe izinto ezinezothe eziphanzisayo, ziintsuku eziliwaka, elinamakhulu amabini, anamanci asithoba.” (Daniyeli 12:11) Phantsi koMthetho kaMoses, “idini elenziwa ngokuqhubekayo” lalitshiswa kwisibingelelo esisetempileni eYerusalem. AmaKristu akanikeli amadini atshiswayo, kodwa anikela idini elenziwa ngokuqhubekayo lokomoya. UPawulos wabhekisela koku xa wathi: “Sinyuse ngamaxesha onke kuye uThixo umbingelelo wendumiso, oko kukuthi, isiqhamo somlomo olivumayo igama lakhe.” (Hebhere 13:15; thelekisa uHoseya 14:2.) Eli dini lenziwa ngokuqhubekayo lasuswa ngoJuni 1918. Yayiyintoni, ke, ‘into enezothe’—inkalo yesibini emele iqwalaselwe? YayiluManyano Lwezizwe, olwaququzelelwa ngamagunya oyisileyo ekupheleni kweMfazwe Yehlabathi I.b Lwalunezothe ngenxa yokuba iinkokeli zeNgqobhoko zalubeka kwindawo yoBukumkani bukaThixo, zisithi uManyano kuphela kwethemba lomntu lokuzisa uxolo. UManyano lwacetywa ngoJanuwari 1919. Ukuba sibala iintsuku ezili-1 290 (iminyaka emithathu eneenyanga ezisixhenxe) ukususela ngelo xesha, sifikelela kuSeptemba 1922.

16. Ekupheleni kweentsuku ezili-1 290, kwabonakala njani ukuba intsalela ethanjisiweyo yayilungele umsebenzi?

¹⁶ Kwenzeka ntoni ngelo xesha? Kaloku, abaFundi beBhayibhile ngoku babevuselelwe, bekhululekile kwiBhabhiloni Enkulu, yaye babelungele ukuqhubeka nomsebenzi. (ISityhilelo 18:4) Kwindibano eyaqhutywa ngoSeptemba 1922 eCedar Point, eOhio, eUnited States, baqalisa ukuvakalisa ngenkalipho imigwebo kaYehova ejoliswe kwiNgqobhoko. (ISityhilelo 8:7-12) Ngokwenene ulwamvila lweenkumbi lwaqalisa ukuhlaba kabuhlungu! Ngaphezu koko, uyeha wesibini weSityhilelo waqalisa. Inyambalala yomkhosi wamahashe wamaKristu—ekuqaleni owawubunjwa yintsalela ethanjisiweyo waza kamva wandiswa sisihlwele esikhulu—yawutyhutyha umhlaba. (ISityhilelo 7:9; 9:13-19) Ewe, ukuphela kweentsuku ezili-1 290 kwabazisela uvuyo abantu bakaThixo.c Kodwa kwakusekho okungakumbi okubalindeleyo.

Iintsuku Ezili-1 335

17. Iintsuku ezili-1 335 zaqala zaza zaphela nini?

¹⁷ UDaniyeli 12:12 uthi: “Unoyolo olinde wafika kwiintsuku eziliwaka, elinamakhulu amathathu, anamanci mathathu anesihlanu.” Ubungqina bubonisa ukuba ezi ntsuku zili-1 335, okanye iminyaka emithathu eneenyanga ezisibhozo ezinesiqingatha, zaqalisa ekupheleni kwexesha elisandul’ ukuchazwa. Xa sibala ukususela kuSeptemba 1922, oku kusizisa ekuzeni kuphela kwentlakohlaza (kuMntla Weikhweyitha) yowe-1926. Kwenzeka ntoni ebudeni bezo ntsuku zili-1 335?

18. Ziziphi izibakala ezibonisa ukuba emva phayaa ngowe-1922 kwakusafuneka kwenziwe inkqubela?

¹⁸ Phezu kwako nje ukuphawuleka kweziganeko zowe-1922, ngokobungqina bambi babesakhangela ngolangazelelo kwixesha elidluleyo. IStudies in the Scriptures, eyabhalwa nguC. T. Russell, yayisengumbandela osisiseko ofundisiswayo. Ngaphezu koko, incwadana eyasasazwa ngokubanzi ethi Millions Now Living Will Never Die yanikela imbono yokuba ngowe-1925, iinjongo zikaThixo eziphathelele ukwenziwa komhlaba ube yiParadisi kwakhona nokuvuswa kwabathembekileyo bakudala kwakuza kuqalisa ukuzaliseka. Ithuba lokunyamezela kwabathanjisiweyo labonakala lisondela esiphelweni. Sekunjalo, bambi ababenxulumana nabaFundi beBhayibhile abazange bazive benyanzelekile ukuba babelane nabanye ngeendaba ezilungileyo.

19, 20. (a) Izinto ezininzi zaguquka njani kubantu bakaThixo ebudeni beentsuku ezili-1 335? (b) Ziziphi iziganeko ezaphawula ukuphela kwexesha eliziintsuku ezili-1 335, ibe zazibonisa ntoni ngokubhekisele kubantu bakaYehova?

¹⁹ Njengoko iintsuku ezili-1 335 zazihamba, konke oku kwaguquka. Ukuze komelezwe abazalwana, kwalungelelaniswa amaqela okufundisisa IMboniselo. Kwagxininiswa kwinkonzo yasentsimini. Ukususela ngoMeyi 1923, wonk’ ubani wayekhuthazwa ukuba abe nesabelo kwinkonzo yasentsimini ngoLwesibini wokuqala nyanga nganye, yaye kwintlanganiso yebandla eqhutywa ebudeni beveki kwakubekelwa bucala ixesha lokubakhuthaza kulo msebenzi. NgoAgasti 1923, kwindibano eyayiseLos Angeles, eKhalifoniya, eUnited States, kwaboniswa ukuba umzekeliso kaYesu wezimvu neebhokhwe wawuya kuzaliseka ngaphambi koLawulo Lweminyaka Eliwaka. (Mateyu 25:31-40) Ngonyaka we-1924 kwasungulwa isikhululo sikanomathotholo esiyi-WBBR, esasisetyenziselwa ukusasaza iindaba ezilungileyo ngamaza omoya. Inqaku elithi “Ukuzalwa Kohlanga” kwinkupho yesiNgesi yeMboniselo kaMatshi 1, 1925, lanikela inkcazelo yokuqondwa okulungisiweyo kweSityhilelo isahluko 12. Ekugqibeleni, amaKristu athembekileyo ayenokuziqonda kakuhle iziganeko ezabangela izaqunge zowe-1914-19.

²⁰ Unyaka we-1925 waphela, kodwa ukuphela kona kwakungekafiki! Ukususela kwiminyaka yee-1870, abaFundi beBhayibhile babekhonza benomhla othile engqondweni—ekuqaleni ingowe-1914, yandula ke yangowe-1925. Ngoku, baqonda ukuba babemele bakhonze logama nje uYehova esanqwenela ukuba benjenjalo. Inkupho yesiNgesi yeMboniselo kaJanuwari 1, 1926, yayinenqaku eliphawulekayo elalisithi “Ngubani Oya Kuzukisa UYehova?” elalibalaselisa ngendlela engazange ibonwe ngaphambili ukubaluleka kwegama likaThixo. Yaye ekugqibeleni, ngoMeyi 1926 kwindibano eyayiseLondon, eNgilani, kwamkelwa isigqibo esasinomxholo othi “Ubungqina Obuya Kubalawuli Behlabathi.” Kwesi sigqibo kwavakaliswa ngokuphandle inyaniso engoBukumkani bukaThixo nentshabalalo esondelayo yehlabathi likaSathana. Kwakuloo ndibano, kwakhululwa incwadi eyaba nomphumo ophawulekayo neyayinomxholo othi Deliverance, eyaba yeyokuqala kungcelele olwaluza kuthabathel’ indawo oluthi Studies in the Scriptures. Ngoku abantu bakaThixo babekhangele phambili, kungekhona apho basuka khona. Iintsuku ezili-1 335 zaziphelile.

21. Ukunyamezela ebudeni beentsuku ezili-1 335 kwathetha ntoni kubantu bakaThixo emva phayaa, yaye ukuzaliseka kwesi siprofeto kweli xesha kuthetha ntoni kuthi?

²¹ Bambi babengakulungelanga ukwenza uhlengahlengiso ukuze bamkele le nkqubela, kodwa abo banyamezelayo babonwabile ngokwenyaniso. Ngaphezu koko, njengoko sikhangela emva kwinzaliseko yala maxesha esiprofeto, nathi sonwabile ngenxa yokuba siba nentembelo engakumbi yokuba iqumrhu elincinane lamaKristu athanjisiweyo awayephila kuloo maxesha ngokwenene lingumkhonzi othembekileyo noqondayo. Ekuhambeni kweminyaka ukususela ngelo xesha, intlangano kaYehova iye yakhula kanobom, kodwa umkhonzi othembekileyo noqondayo usesisiseko sayo, eyalathisa. Ngoko, hayi indlela esivuyiswa ngayo kukwazi ukuba abathanjisiweyo nezinye izimvu, basalindelwe lulonwabo olungakumbi! Oku kuza kubonakala njengoko siqwalasela esinye seziprofeto zikaDaniyeli.

[Imibhalo esemazantsi]

Ngaba Unokucacisa?

◻ Sazi njani ukuba ezinye zeziprofeto zikaDaniyeli zaziya kuzaliseka kwixesha lethu?

◻ Kutheni sinokuqiniseka nje ukuba intsalela ethanjisiweyo ‘ingumkhonzi othembekileyo noqondayo’?

◻ Iintsuku ezili-1 260 zaqala zaza zaphela nini?

◻ Kukuphi ukuhlaziyeka nokubuyiselwa okwaziswa ziintsuku ezili-1 290 kwintsalela ethanjisiweyo?

◻ Kutheni abo banyamezela de kwasekupheleni kweentsuku ezili-1 335 babonwabile nje?

[Ibhokisi ekwiphepha 11]

AMAXESHA ESIPROFETO KADANIYELI

Iintsuku ezili-1 260:

Disemba 1914 ukusa kuJuni 1918

Iintsuku ezili-1 290:

Januwari 1919 ukusa kuSeptemba 1922

Iintsuku ezili-1 335:

Septemba 1922 kuse kuMeyi 1926

[Umfanekiso okwiphepha 8]

Ukususela ngowe-1919 kuye kwacaca ukuba “umkhonzi othembekileyo, noqondayo” yintsalela ethanjisiweyo

[Umfanekiso okwiphepha 10]

Ikomkhulu loManyano Lwezizwe eGeneva, eSwitzerland

[Inkcazelo]

UN photo