Indlela Eziluncedo Ngayo Iindaba Ezilungileyo Kwibutho Lenu
KWELI hlabathi lanamhlanje sisoloko sisiva abantu besithi: “Imigaqo yobuKristu ayisebenzi. Ayinakusebenza kwibutho labantu banamhlanje elineengxaki ezintsonkothileyo.” Noko ke, kwincoko ekwanikelwa ingxelo ngayo phakathi kwenkokeli yamaHindu uMohandas K. Gandhi nowayesakuba yiRhuluneli yaseBritani kwelo laseIndiya, uLord Irwin, kwavakaliswa uluvo olwahluke gqitha koko. Kuthiwa uLord Irwin wabuza lo kaGandhi oko wayecinga ukuba kwakuya kucombulula iingxaki eziphakathi kweBritani neIndiya. UGandhi wathabatha iBhayibhile waza wavula kwisahluko sesihlanu sencwadi kaMateyu waza wathi: “Ukuba ilizwe lakho nelam lingamanyana ekwenzeni ngokuvisisana neemfundiso ezabekwa nguKristu kule Ntshumayelo yaseNtabeni, siya kube sizicombulule iingxaki kungekuphela nje ezamazwe ethu kodwa kwanezo zehlabathi liphela.”
Loo ntshumayelo ithetha ngokufuna ukuba ngumntu ozixabisayo izinto zokomoya onomoya wobulali, othanda uxolo, onenceba, umthandi wobulungisa. Ayigxeki nje kuphela ukubulala kodwa ikwagxeka nokubaqumbela abanye, kungekhona nje ukukrexeza kodwa kwaneenkanuko zoko. Iyakugxeka ukuqhawulwa komtshato ngaphandle kwezizathu okubangela ukuqhekeka kwamakhaya kuze kwenze abantwana babe ngamaxhoba. Isixelela oku: ‘Thandani nkqu nabo banithiyileyo, yiphani abasweleyo, musani ukugweba abanye ngokungenanceba, phathani abanye ngendlela enithanda ukuphathwa ngayo.’ Onke la macebiso, ukuba ebesetyenziswa ebeya kuzisa iingenelo ezingathethekiyo. Okukhona kukho abantu abangakumbi abakwenzayo oku kwibutho lenu, kokukhona liya kulunga ngakumbi ibutho lenu!
AmaNgqina kaYehova ayimpembelelo kule nkalo. IBhayibhile iwafundisa ukuba awuhlonele umtshato. Abantwana bawo baqeqeshwa ngemigaqo efanelekileyo. Ukubaluleka kwentsapho kuyagxininiswa. Iintsapho ezimanyeneyo ziyintsikelelo kwibutho lenu, nakwilizwe lakho. Imbali izaliswe yimizekelo yamagunya ehlabathi awathi awohloka xa amaqhina entsapho aba buthathaka yaye ukuziphatha okubi kusanda. Okukhona besiba baninzi abantu neentsapho eziphenjelelwa ngamaNgqina kaYehova ukuba ziphile ngemigaqo yamaKristu, kokukhona buya kuncipha ubunjubaqa, ukuziphatha okubi nolwaphulo-mthetho kwibutho lenu.
Enye yeengxaki ezinkulu ezithwaxa amabutho neentlanga zabantu likhethe lobuhlanga. Ngokwahlukileyo koko, umpostile uPetros wathi: “Ndiyaqonda ukuba uThixo akakhethi buso, kodwa kwiintlanga zonke umntu omoyikayo aze asebenze ubulungisa wamkelekile kuye.” Yaye uPawulos wabhala: “Akukho mYuda namGrike, akukho khoboka nokhululekileyo, akukho ndoda nabhinqa; kuba nonke ningumntu omnye ngokumanyene noKristu Yesu.” (IZenzo 10:34, 35; Galati 3:28) AmaNgqina kaYehova ayakwamkela oku. Abantu bazo zonke iintlanga naliphi na ibala bahlala baze basebenze kunye kwikomkhulu lawo lehlabathi, kumasebe nasemabandleni awo.
EAfrika izizwe ezithile azinakuxubana zihlale kunye zize zingakruthakruthani. Noko ke, kwiindibano zamaNgqina kaYehova, abantu abaphuma kwizizwe ezininzi ezahlukeneyo bayatya, balale baze banqule kunye ngemvisiswano epheleleyo nangothando olufudumeleyo lobuzalwana. Amagosa karhulumente ayamangaliswa akukubona oku. Umzekelo wempembelelo emanyanisayo yobuKristu bokwenyaniso kwathethwa ngawo kwiphephandaba laseNew York iAmsterdam News ka-Agasti 2, 1958. La magqabaza avakaliswa emva kokuqwalaselwa kwendibano yezizwe ngezizwe ekhankanywe ngaphambilana apho amaNgqina angaphezu kwekota yesigidi ayehlanganisene kwisiXeko saseNew York.
“Kuzo zonk’ iindawo abantsundu, abamhlophe, nabemi baseMpuma, abaphuma kuzo zonke iindidi zobomi nakuzo zonke iindawo zehlabathi, babehlanganisene ngovuyo nangokukhululekileyo. . . La maNgqina anqulayo avela kumazwe ali-120 aye ahlala aze anqula kunye ngoxolo, ebonisa abemi baseMerika indlela ekunokwenzeka ngokulula ngayo oko. . . . Le ndibano ingumzekelo obalaseleyo wendlela abantu abanokusebenza baze bahlale kunye ngayo.”
Abaninzi basenokuthi imigaqo yobuKristu ayisebenzi kweli hlabathi lanamhlanje. Noko ke, yiyiphi enye into ekhe yasebenza okanye eya kusebenza? Imigaqo yamaKristu inokuba luncedo ngokwenene ukuba iyasetyenziswa kwibutho lenu ngoku, yaye iya kuba sisiseko sokumanyanisa zonke ‘iintlanga, izizwe nabantu,’ emhlabeni wonke phantsi kolawulo loBukumkani bukaThixo phezu koluntu.—ISityhilelo 7:9, 10.
[Amagama acatshulweyo akwiphepha 23]
Abantu bazo zonke iintlanga naliphi na ibala basebenza kunye
[Amagama acatshulweyo akwiphepha 24]
UbuKristu buyasebenza. Yiyiphi enye into ekhe yasebenza?