Ukuxabiseka ‘Kweendaba Ezilungileyo’ Kwindawo Okuyo
Kweli hlabathi lanamhla sidla ngokuva abantu besithi, “Imigaqo yobuKristu ayisebenziseki nje kwaphela. Ayinakusebenza kwibutho labantu banamhla elineengxaki ezintsonkothileyo.” Noko ke, kwincoko eyabikwayo eyayiphakathi kwenkokeli yamaHindu uMahatma Gandhi nowayesakuba nguMmeli waseBritani eIndiya, uLord Irwin, kwavakaliswa uluvo olwahluke ngokupheleleyo. ULord Irwin wabuza okaGandhi oko wayecinga ukuba bekungacombulula iingxaki eziphakathi kweBritani neIndia. UGandhi wathabatha iBhayibhile waza wayivula kwisahluko sesihlanu sikaMateyu yaye wathi: “Ukuba ilizwe lakho nelam lingamanyana kwiimfundiso ezandlalwa nguKristu kule Ntshumayelo yaseNtabeni, soba sizicombulule iingxaki kungekuphela nje ezamazwe ethu kodwa kwanezo zehlabathi liphela.”
Loo ntshumayelo ithetha ngokufuna ukuba ngumntu wokomoya, ukuba ngolulamileyo, ngonoxolo, ngonenceba, ngumthandi wobulungisa. Ayigxeki nje kuphela ukubulala kodwa ikwagxeka nokuqumbela abanye; ibe ayigxeki nje kuphela ukukrexeza kodwa ikwagxeka neengcamango zeenkanuko. Iyakuhlaba ukuqhawulwa komtshato okungenasizinzi okudiliza amakhaya nokwenza abantwana babe ngamaxhoba. Isixelela oku: ‘Thanda kwanabo bangakuthandiyo, yipha abasweleyo, musa ukubagweba abanye ngokungenanceba, phatha abanye ngendlela nawe ubungathanda ukuba bakuphathe ngayo.’ Onke la macebiso, ukuba ebesetyenziswa, ebeya kuzisa iingenelo ezinkulu. Okukhona kukho abantu abangakumbi abakuqheliselayo oku kwindawo okuyo, kokukhona indawo okuyo iya kuba yelunge ngakumbi!
AmaNgqina kaYehova ayimpembelelo kule nkalo. IBhayibhile iwafundisa ukuba ahlonele umtshato. Abantwana bawo baqeqeshwa ngemigaqo efanelekileyo. Ukubaluleka kwentsapho kuyabethelelwa. Iintsapho ezimanyeneyo zingundoqo kummandla okuwo, nakwilizwe lakho. Imbali izaliswe yimizekelo yamagunya ehlabathi awathi awohloka xa amaqhina entsapho athi aba buthathaka naxa ukuziphatha okubi kwathi kwanda. Okukhona beya besiba baninzi abantu neentsapho eziphenjelelwa ngamaNgqina kaYehova ukuba baphile ngemigaqo yobuKristu, kokukhona uya kufumana ubunjubaqa nokuziphatha okubi nolwaphulo-mthetho oluncinane kwindawo okuyo!
Enye yeengxaki ezinkulu ezithwaxa iindawo neentlanga likhethe lobuzwe. Ngokwahlukileyo koko, umpostile uPetros wathi: “Ndiyaqiqa okwenyaniso ukuba uThixo akamkhethi wabuso bamntu; kwiintlanga zonke, lowo umoyikayo, asebenze ubulungisa, wamkelekile kuye.” Ibe uPawulos wabhala oku: “Akusekho mYuda namGrike; akusekho khoboka nakhululekileyo; akusekho ndoda nankazana; kuba nina nonke nimntu mnye, nikuKristu Yesu.” (IZenzo 10:34, 35; Galati 3:28) AmaNgqina kaYehova ayakwamkela oku. Zonke izizwe nabemibala eyahlukileyo zihlala zize zisebenze kunye kwikomkhulu lawo lehlabathi, kumasebe nasemabandleni.
EAfrika izizwe ezithile azinakuxubana zize zingalwi. Noko ke, kwiindibano zamaNgqina kaYehova apho, abantu abaphuma kwizizwe ezininzi ezahlukeneyo bayadla baze balale baze banqule kunye ngemvisiswano epheleleyo nobudlelane obufudumeleyo. Amagosa karhulumente ayamangaliswa akukubona oku. Umzekelo wempembelelo emanyanisayo yobuKristu bokwenyaniso kwathethwa ngawo kwiAmsterdam News yaseNew York ka-Agasti 2, 1958. La magqabaza avakaliswa ngokondelwa kwendibano yezizwe ngezizwe yamaNgqina kaYehova ekhankanywe ngaphambilana—leyo yayikwisixeko saseNew York apho kwakudibene abantu abangaphezu kwekota yesigidi.
“Kuzo zonk’ iindawo imidaka, abamhlophe nabaseMpuma, abaphuma kuzo zonke iindidi zobomi nakuzo zonke iindawo zehlabathi, babehlanganisene ngovuyo nangokukhululekileyo. . . . AmaNgqina anqulayo avela emazweni ali-120 aye aphila aza anqula kunye ngoxolo, ebonisa amaMerika indlela ekunokwenziwa ngokulula ngayo oku. . . . Le ndibano ingumzekelo oqaqambileyo wendlela abantu abanokusebenza baze baphile kunye ngayo.”
Abaninzi basenokuthi imigaqo yobuKristu ayisebenziseki kweli hlabathi lanamhla. Noko ke, yiyiphi enye into eye yasebenza, okanye eya kusebenza? Imigaqo yobuKristu inokuxabiseka ngokwenene ukuba iyasetyenziswa kwindawo okuyo ngoku, ibe iya kuba sisizinzi sokumanyanisa zonke ‘iintlanga, izizwe nabantu’ emhlabeni wonke phantsi kolawulo loBukumkani bukaThixo phezu koluntu.—ISityhilelo 7:9, 10.
[Amagama acatshulweyo akwiphepha 24]
Zonke izizwe nabemibala eyahlukileyo zisebenza kunye
[Amagama acatshulweyo akwiphepha 24]
UbuKristu buyinto eluncedo. Yiyiphi enye into eye yasebenza?